तां तथा पतितां दृष्ट्वा विरूपां शोणितोक्षिताम्। भगिनीं क्रोधसन्तप्तः खरः पप्रच्छ राक्षसः।।

tāṅ tathā patitāṅ dṛṣṭvā virūpāṅ śōṇitōkṣitām. bhaginīṅ krōdhasantaptaḥ kharaḥ papraccha rākṣasaḥ৷৷

उत्तिष्ठ तावदाख्याहि प्रमोहं जहि सम्भ्रमम्। व्यक्तमाख्याहि केन त्वमेवं रूपा विरूपिता।।

uttiṣṭha tāvadākhyāhi pramōhaṅ jahi sambhramam. vyaktamākhyāhi kēna tvamēvaṅ rūpā virūpitā৷৷

कः कृष्णसर्पमासीनमाशीविषमनागसम्। तुदत्यभिसमापन्नमङ्गुल्यग्रेण लीलया।।

kaḥ kṛṣṇasarpamāsīnamāśīviṣamanāgasam. tudatyabhisamāpannamaṅgulyagrēṇa līlayā৷৷

कः कालपाशं समासज्य कण्ठे मोहान्न बुध्यते। यस्त्वामद्य समासाद्य पीतवान्विषमुत्तमम्।।

kaḥ kālapāśaṅ samāsajya kaṇṭhē mōhānna budhyatē. yastvāmadya samāsādya pītavānviṣamuttamam৷৷

बलविक्रमसम्पन्ना कामगा कामरूपिणी। इमामवस्थां नीता त्वं केनान्तकसमागता।।

balavikramasampannā kāmagā kāmarūpiṇī. imāmavasthāṅ nītā tvaṅ kēnāntakasamāgatā৷৷

देवगन्धर्वभूतानामृषीणां च महात्मनाम्। कोऽयमेवं विरूपां त्वां महावीर्यश्चकार ह।।

dēvagandharvabhūtānāmṛṣīṇāṅ ca mahātmanām. kō.yamēvaṅ virūpāṅ tvāṅ mahāvīryaścakāra ha৷৷

न हि पश्याम्यहं लोके यः कुर्यान्मम विप्रियम्। अमरेषु सहस्राक्षं महेन्द्रं पाकशासनम्।।

na hi paśyāmyahaṅ lōkē yaḥ kuryānmama vipriyam. amarēṣu sahasrākṣaṅ mahēndraṅ pākaśāsanam৷৷

अद्याहं मार्गणैः प्राणानादास्ये जीवितान्तकैः। सलिले क्षीरमासक्तं निष्पिबन्निव सारसः।।

adyāhaṅ mārgaṇaiḥ prāṇānādāsyē jīvitāntakaiḥ. salilē kṣīramāsaktaṅ niṣpibanniva sārasaḥ৷৷

निहतस्य मया सङ्ख्ये शरसंकृत्तमर्मणः। सफेनं रुधिरं रक्तं मेदिनी कस्य पास्यति।।

nihatasya mayā saṅkhyē śarasaṅkṛttamarmaṇaḥ. saphēnaṅ rudhiraṅ raktaṅ mēdinī kasya pāsyati৷৷

कस्य पत्ररथाः कायान्मांसमुत्कृत्य सङ्गताः। प्रहृष्टा भक्षयिष्यन्ति निहतस्य मया रणे।।

kasya patrarathāḥ kāyānmāṅsamutkṛtya saṅgatāḥ. prahṛṣṭā bhakṣayiṣyanti nihatasya mayā raṇē৷৷

तं न देवा न गन्धर्वा न पिशाचा न राक्षसाः। मयापकृष्टं कृपणं शक्तास्त्रातुं महाहवे।।

taṅ na dēvā na gandharvā na piśācā na rākṣasāḥ. mayā.pakṛṣṭaṅ kṛpaṇaṅ śaktāstrātumihāhavē৷৷

उपलभ्य शनैस्संज्ञां तं मे शंसितुमर्हसि। येन त्वं दुर्विनीतेन वने विक्रम्य निर्जिता।।

upalabhya śanaissaṅjñāṅ taṅ mē śaṅsitumarhasi. yēna tvaṅ durvinītēna vanē vikramya nirjitā৷৷

इति भ्रातुर्वचश्श्रुत्वा क्रुद्धस्य च विशेषतः। ततश्शूर्पणखा वाक्यं सबाष्पमिदमब्रवीत्।।

iti bhrāturvacaśśrutvā kruddhasya ca viśēṣataḥ. tataśśūrpaṇakhā vākyaṅ sabāṣpamidamabravīt৷৷

तरुणौ रूपसम्पन्नौ सुकुमारौ महाबलौ। पुण्डरीकविशालाक्षौ चीरकृष्णाजिनाम्बरौ।।

taruṇau rūpasampannau sukumārau mahābalau. puṇḍarīkaviśālākṣau cīrakṛṣṇājināmbarau৷৷

।। फलमूलाशनौ दान्तौ तापसौ धर्मचारिणौ। पुत्रौ दशरथस्यास्तां भ्रातरौ रामलक्ष्मणौ।।

৷৷ phalamūlāśanau dāntau tāpasau dharmacāriṇau. putrau daśarathasyāstāṅ bhrātarau rāmalakṣmaṇau৷৷

गन्धर्वराजप्रतिमौ पार्थिवव्यञ्जनान्वितौ। देवौ वा मानुषौ वा तौ न तर्कयितुमुत्सहे।।

gandharvarājapratimau pārthivavyañjanānvitau. dēvau vā mānuṣau vā tau na tarkayitumutsahē৷৷

तरुणी रूपसम्पन्ना सर्वाभरणभूषिता। दृष्टा तत्र मया नारी तयोर्मध्ये सुमध्यमा।।

taruṇī rūpasampannā sarvābharaṇabhūṣitā. dṛṣṭā tatra mayā nārī tayōrmadhyē sumadhyamā৷৷

ताभ्यामुभाभ्यां सम्भूय प्रमदामधिकृत्य ताम्। इमामवस्थां नीताहं यथानाथासती तथा।।

tābhyāmubhābhyāṅ sambhūya pramadāmadhikṛtya tām. imāmavasthāṅ nītāhaṅ yathānāthā.satī tathā৷৷

तस्याश्चानृजुवृत्तायास्तयोश्च हतयोरहम्। सफेनं पातुमिच्छामि रुधिरं रणमूर्धनि।।

tasyāścānṛjuvṛttāyāstayōśca hatayōraham. saphēnaṅ pātumicchāmi rudhiraṅ raṇamūrdhani৷৷

एष मे प्रथमः कामः कृतस्तात त्वया भवेत्। तस्यास्तयोश्च रुधिरं पिबेयमहमाहवे।।

ēṣa mē prathamaḥ kāmaḥ kṛtastāta tvayā bhavēt. tasyāstayōśca rudhiraṅ pibēyamahamāhavē৷৷

इति तस्यां ब्रुवाणायां चतुर्दश महाबलान्। व्यादिदेश खरः क्रुद्धो राक्षसानन्तकोपमान्।।

iti tasyāṅ bruvāṇāyāṅ caturdaśa mahābalān. vyādidēśa kharaḥ kruddhō rākṣasānantakōpamān৷৷

मानुषौ शस्त्रसम्पन्नौ चीरकृष्णाजिनाम्बरौ। प्रविष्टौ दण्डकारण्यं घोरं प्रमदया सह।।

mānuṣau śastrasampannau cīrakṛṣṇājināmbarau. praviṣṭau daṇḍakāraṇyaṅ ghōraṅ pramadayā saha৷৷

तौ हत्वा तां च दुर्वृत्तामपावर्तितुमर्हथ। इयं च रुधिरं तेषां भगिनी मम पास्यति।।

tau hatvā tāṅ ca durvṛttāmapāvartitumarhatha. iyaṅ ca rudhiraṅ tēṣāṅ bhaginī mama pāsyati৷৷

मनोरथोऽयमिष्टोऽस्या भगिन्या मम राक्षसाः। शीघ्रं सम्पाद्यतां तौ च प्रमथ्य स्वेन तेजसा।।

manōrathō.yamiṣṭō.syā bhaginyā mama rākṣasāḥ. śīghraṅ sampādyatāṅ tau ca pramathya svēna tējasā৷৷

इति प्रतिसमादिष्टा राक्षसास्ते चतुर्दश। तत्र जग्मुस्तया सार्धं घना वातेरिता यथा।।

iti pratisamādiṣṭā rākṣasāstē caturdaśa. tatra jagmustayā sārdhaṅ ghanā vātēritā yathā৷৷

ततस्तु ते तं समुदग्रतेजसं तथापिऽतीक्ष्णप्रदरा निशाचराः। न शेकुरेनं सहसा प्रमर्दितुं वनद्विपा दीप्तमिवाग्निमुत्थितम्।।

tatastu tē taṅ samudagratējasaṅ tathāpi.tīkṣṇapradarā niśācarāḥ. na śēkurēnaṅ sahasā pramardituṅ vanadvipā dīptamivāgnimutthitam৷৷