शिवरात्रिव्रतं वक्ष्ये भुक्तिमुक्तिप्रदं शृणु । माघफाल्गुनयोर्मध्ये कृष्णा या तु चतुर्दशी ।।

śivarātrivrataṃ vakṣye bhuktimuktipradaṃ śṛṇu | māghaphālgunayormadhye kṛṣṇā yā tu caturdaśī ||

कामयुक्ता तु सोपोष्या कुर्वन जागरणं व्रती । शिवरात्रिव्रतं कुर्वे चतुर्दश्यामभोजनं ।।

kāmayuktā tu sopoṣyā kurvan jāgaraṇaṃ vratī | śivarātrivrataṃ kurve caturdaśyāmabhojanaṃ ||

रात्रिजागरणेनैव पूजयामि शिवं व्रती । आवाहयाम्यहं शम्भुं भुक्तिमुक्तिप्रदायकं ।।

rātrijāgaraṇenaiva pūjayāmi śivaṃ vratī | āvāhayāmyahaṃ śambhuṃ bhuktimuktipradāyakaṃ ||

नरकार्णवकोत्तारनावं शिव नमो ऽस्तु ते । नमः शिवाय शान्ताय प्रजाराज्यादिदायिने ।।

narakārṇavakottāranāvaṃ śiva namo 'stu te | namaḥ śivāya śāntāya prajārājyādidāyine ||

सौभाग्यारोग्यविद्यार्थस्वर्गमार्गप्रदायिने । धर्मन्देहि धनन्देहि कामभोगादि देहि मे ।।

saubhāgyārogyavidyārthasvargamārgapradāyine | dharmandehi dhanandehi kāmabhogādi dehi me ||

गुणकीर्तिसुखं देहि स्वर्गं मोक्षं च देहि मे । लुब्धकः प्राप्तवान पुण्यं पापी सुन्दरसेनकः ।।

guṇakīrtisukhaṃ dehi svargaṃ mokṣaṃ ca dehi me | lubdhakaḥ prāptavān puṇyaṃ pāpī sundarasenakaḥ ||