श्रीमतीं कुब्जिकां वक्ष्ये धर्मार्थादिजयप्रदां । पूजयेन्मूलमन्त्रेण परिवारयुतेन वा ।।

śrīmatīṃ kubjikāṃ vakṣye dharmārthādijayapradāṃ | pūjayenmūlamantreṇa parivārayutena vā ||

कृत्वा कराङ्गन्यासञ्च सन्ध्यावन्दनमाचरेत । वामा ज्येष्ठा तथा रौद्रीं सन्ध्यात्रयमनुक्रमात ।।

kṛtvā karāṅganyāsañca sandhyāvandanamācaret | vāmā jyeṣṭhā tathā raudrīṃ sandhyātrayamanukramāt ||

मन्त्राः पञ्च प्रणवाद्याः पादुकां पूजयामि च । मध्ये नाम चतुर्थ्यन्तं द्विनवात्मकवीजकाः ।।

mantrāḥ pañca praṇavādyāḥ pādukāṃ pūjayāmi ca | madhye nāma caturthyantaṃ dvinavātmakavījakāḥ ||

नमोन्ता वाथ षष्ट्या तु सर्वे ज्ञेया वदामि तान । कौलीशनाथः सुकला जन्मतः कुब्जिका ततः ।।

namontā vātha ṣaṣṭyā tu sarve jñeyā vadāmi tān | kaulīśanāthaḥ sukalā janmataḥ kubjikā tataḥ ||

श्रीकण्ठनाथः कौलेशो गगनानन्दनाथकः । चटुला देवी मैत्रीशी कराली तूर्णनाथकः ।।

śrīkaṇṭhanāthaḥ kauleśo gaganānandanāthakaḥ | caṭulā devī maitrīśī karālī tūrṇanāthakaḥ ||

अतलदेवी श्रीचन्द्रा देवीत्यन्तास्ततस्त्विमे । भगात्मपुङ्गणदेवमोहनीं पादुकां यजेत ।।

ataladevī śrīcandrā devītyantāstatastvime | bhagātmapuṅgaṇadevamohanīṃ pādukāṃ yajet ||

अतीतभुवनानन्दरत्नाढ्यां पादुकां यजेत । ब्रह्मज्ञानाथ कमला परमा विद्यया सह ।।

atītabhuvanānandaratnāḍhyāṃ pādukāṃ yajet | brahmajñānātha kamalā paramā vidyayā saha ||

विद्यादेवीगुरुशुद्धिस्त्रिशुद्धिं प्रवदामि ते । गगनश चटुली चात्मा पद्मानन्दो मणिः कला ।।

vidyādevīguruśuddhistriśuddhiṃ pravadāmi te | gaganaś caṭulī cātmā padmānando maṇiḥ kalā ||

कमलो माणिक्यकण्ठो गगनः कुमुदस्ततः । श्रीपद्मो भैरवानन्दो देवः कमल इत्य अतः ।।

kamalo māṇikyakaṇṭho gaganaḥ kumudastataḥ | śrīpadmo bhairavānando devaḥ kamala ity ataḥ ||

शिवो भवो ऽथ कृष्णश च नवसिद्धाश च षोडश । चन्द्रपूरो ऽथ गुल्मश च शुभः कामो ऽतिमुक्तकः ।।

śivo bhavo 'tha kṛṣṇaś ca navasiddhāś ca ṣoḍaśa | candrapūro 'tha gulmaś ca śubhaḥ kāmo 'timuktakaḥ ||

कण्ठो वीरः प्रयोगो ऽथ कुशलो देवभोगकः । विश्वदेवः खड्गदेवो रुद्रो धातासिरेव च ।।

kaṇṭho vīraḥ prayogo 'tha kuśalo devabhogakaḥ | viśvadevaḥ khaḍgadevo rudro dhātāsireva ca ||

मुद्रास्फीटी वंशपूरो भोजः षोडश सिद्धकाः । समयान्यस्तु देहस्तु षोढान्यासेन यन्त्रितः ।।

mudrāsphīṭī vaṃśapūro bhojaḥ ṣoḍaśa siddhakāḥ | samayānyastu dehastu ṣoḍhānyāsena yantritaḥ ||

प्रक्षिप्य मण्डले पुष्पं मण्डलान्यथ पूजयेत । अनन्तञ्च महान्तञ्च सर्वदा शिवपादुकां ।।

prakṣipya maṇḍale puṣpaṃ maṇḍalānyatha pūjayet | anantañca mahāntañca sarvadā śivapādukāṃ ||

महाव्याप्तिश च शून्यञ्च पञ्चतत्त्वात्ममण्डलं । श्रीकण्ठनाथपादुकां शङ्करानन्तकौ यजेत ।।

mahāvyāptiś ca śūnyañca pañcatattvātmamaṇḍalaṃ | śrīkaṇṭhanāthapādukāṃ śaṅkarānantakau yajet ||

सदाशिवः पिङ्गलश च भृग्वानन्दश च नाथकः । लाङ्गूलानन्दसंवर्तौ मण्डलस्थानके यजेत ।।

sadāśivaḥ piṅgalaś ca bhṛgvānandaś ca nāthakaḥ | lāṅgūlānandasaṃvartau maṇḍalasthānake yajet ||

नैरृत्ये श्रीमहकालः पिनाकी च महेन्द्रकः । खड्गो भुजङ्गो वाणश च अघासिः शब्दको वशः ।।

nairṛtye śrīmahakālaḥ pinākī ca mahendrakaḥ | khaḍgo bhujaṅgo vāṇaś ca aghāsiḥ śabdako vaśaḥ ||

आज्ञारूपो नन्दरूपो बलिन्दत्वा क्रमं यजेत । बलिशेषे ऽथ यजेत ह्रीं ह्रूं हां श्रीं वै त्रिकूटकं ।।

ājñārūpo nandarūpo balindatvā kramaṃ yajet | baliśeṣe 'tha yajet hrīṃ hrūṃ hāṃ śrīṃ vai trikūṭakaṃ ||

वामे च दक्षिणे ह्य अग्रे याम्ये निशानाथपादुकाः । दक्षे तमोरिनाथस्य हग्रे कालानलस्य च ।।

vāme ca dakṣiṇe hy agre yāmye niśānāthapādukāḥ | dakṣe tamorināthasya hagre kālānalasya ca ||

उड्डियाणं जालन्धरं पूर्णं वै कामरुपकं । गगनानन्ददेवञ्च स्वर्गानन्दं सवर्गकं ।।

uḍḍiyāṇaṃ jālandharaṃ pūrṇaṃ vai kāmarupakaṃ | gaganānandadevañca svargānandaṃ savargakaṃ ||

परमानन्ददेवञ्च सत्यानन्दस्य पादुकां । नागानन्दञ्च वर्गाख्यमुक्तान्ते रत्नपञ्चकं ।।

paramānandadevañca satyānandasya pādukāṃ | nāgānandañca vargākhyamuktānte ratnapañcakaṃ ||

सौम्ये शिवे यजेत षट्कं सुरनाथस्य पादुकां । श्रीमत्समयकोटीशं विद्याकोटीश्वरं यजेत ।।

saumye śive yajet ṣaṭkaṃ suranāthasya pādukāṃ | śrīmatsamayakoṭīśaṃ vidyākoṭīśvaraṃ yajet ||

कोटीशं विन्दुकोटीशं सिद्धकोटीश्वरन्तथा । सिद्धचतुष्कमाग्नेय्यां अमरीशेश्वरं यजेत ।।

koṭīśaṃ vindukoṭīśaṃ siddhakoṭīśvarantathā | siddhacatuṣkamāgneyyāṃ amarīśeśvaraṃ yajet ||

चक्रीशनाथं कुरुङ्गेशं वृत्रेशञ्चन्द्रनाथकं । यजेद्गन्धादिभिश चैतान याम्ये विमलपञ्चकं ।।

cakrīśanāthaṃ kuruṅgeśaṃ vṛtreśañcandranāthakaṃ | yajedgandhādibhiś caitān yāmye vimalapañcakaṃ ||

यजेदनादिविमलं सर्वज्ञविमलं ततः । यजेद्योगीशविमलं सिद्धाख्यं समयाख्यकं ।।

yajedanādivimalaṃ sarvajñavimalaṃ tataḥ | yajedyogīśavimalaṃ siddhākhyaṃ samayākhyakaṃ ||

नैऋत्ये चतुरो देवान जयेत कन्दर्पनाथकं । पूर्वाः शक्तीश च सर्वाश च कुब्जिकापादुकां यजेत ।।

naiṛtye caturo devān jayet kandarpanāthakaṃ | pūrvāḥ śaktīś ca sarvāś ca kubjikāpādukāṃ yajet ||

नवातम्केन मन्त्रेण पञ्चप्रणवकेन वा । सहस्राक्षमनवद्यं विष्णुं शिवं सदा यजेत ।।

navātamkena mantreṇa pañcapraṇavakena vā | sahasrākṣamanavadyaṃ viṣṇuṃ śivaṃ sadā yajet ||

पूर्वाच्छिवान्तं ब्रह्मादि ब्रह्माणी च महेश्वरी । कौमारी वैष्णवी चैव वाराही शक्रशक्तिका ।।

pūrvācchivāntaṃ brahmādi brahmāṇī ca maheśvarī | kaumārī vaiṣṇavī caiva vārāhī śakraśaktikā ||

चामुण्डा च महालक्ष्मीः पूर्वादीशान्तमर्चयेत । डाकिनी राकिनी पूज्या लाकिनी काकिनी तथा ।।

cāmuṇḍā ca mahālakṣmīḥ pūrvādīśāntamarcayet | ḍākinī rākinī pūjyā lākinī kākinī tathā ||

शाकिनी याकिनी पूज्या वायव्यादुग्रषट्षु च । यजेद ध्यात्वा ततो देवीं द्वात्रिंशद्वर्णकात्मकां ।।

śākinī yākinī pūjyā vāyavyādugraṣaṭṣu ca | yajed dhyātvā tato devīṃ dvātriṃśadvarṇakātmakāṃ ||

पञ्चप्रणवकेनापि ह्रीं कारेणाथवा यजेत । नीलोत्पलदलश्यामा षड्वक्त्रा षट्प्रकारिका ।।

pañcapraṇavakenāpi hrīṃ kāreṇāthavā yajet | nīlotpaladalaśyāmā ṣaḍvaktrā ṣaṭprakārikā ||

चिच्छक्तिक्तिरष्टादशाख्या बाहुद्वादशसंयुता । सिंहासनसुखासीना प्रेतपद्मोपरिस्थिता ।।

cicchaktiktiraṣṭādaśākhyā bāhudvādaśasaṃyutā | siṃhāsanasukhāsīnā pretapadmoparisthitā ||

कुलकोटिसहस्राढ्या कर्कोटो मेखलास्थितः । तक्षकेणोपरिष्टाच्च गले हारश च वासुकिः ।।

kulakoṭisahasrāḍhyā karkoṭo mekhalāsthitaḥ | takṣakeṇopariṣṭācca gale hāraś ca vāsukiḥ ||

कुलिकः कर्णयोर्यस्याः कूर्मः कुण्डलमण्डलहः । भ्रुवोः पद्मो मकापद्मो वामे नागः कपालकः ।।

kulikaḥ karṇayoryasyāḥ kūrmaḥ kuṇḍalamaṇḍalahḥ | bhruvoḥ padmo makāpadmo vāme nāgaḥ kapālakaḥ ||

अक्षसूत्रञ्च खट्वाङ्गं शङ्कं पुस्तञ्च दक्षिणे । त्रिशूलन्तदर्पणं खड्गं रत्नमालाङ्कुशन्धनुः ।।

akṣasūtrañca khaṭvāṅgaṃ śaṅkaṃ pustañca dakṣiṇe | triśūlantadarpaṇaṃ khaḍgaṃ ratnamālāṅkuśandhanuḥ ||

श्वेतमूर्ध्वमुखन्देव्या ऊर्ध्वश्वेतन्तथापरं । पूर्वास्यं पाण्डरं क्रोधि दक्षिणं कृष्णवर्णकं ।।

śvetamūrdhvamukhandevyā ūrdhvaśvetantathāparaṃ | pūrvāsyaṃ pāṇḍaraṃ krodhi dakṣiṇaṃ kṛṣṇavarṇakaṃ ||

हिमकुन्देन्दभं सौम्यं ब्रह्मा पादतले स्थितः । विष्णुस्तु जघने रुद्रो हृदि कण्ठे तथेश्वरः ।।

himakundendabhaṃ saumyaṃ brahmā pādatale sthitaḥ | viṣṇustu jaghane rudro hṛdi kaṇṭhe tatheśvaraḥ ||

सदाशिवो ललाटे स्याच्छिवस्तस्योर्ध्वतः स्थितः । आघूर्णिता कुब्जिकैवन्ध्येया पूजादिकर्मसु ।।

sadāśivo lalāṭe syācchivastasyordhvataḥ sthitaḥ | āghūrṇitā kubjikaivandhyeyā pūjādikarmasu ||