वक्ष्याम्यृक्षात्मकं पिण्डं शुभाशुभविबुद्धये । यस्मिन्नृक्षे भवेत सूर्यस्तदादौ त्रीणि मूर्धनि ।।

vakṣyāmyṛkṣātmakaṃ piṇḍaṃ śubhāśubhavibuddhaye | yasminnṛkṣe bhavet sūryastadādau trīṇi mūrdhani ||

एकम्मुखे द्वयन्नेत्रे हस्तपादे चतुष्टयं । हृदि पञ्च सुते जानौ आयुर्बुद्धिं विचिन्तयेत ।।

ekammukhe dvayannetre hastapāde catuṣṭayaṃ | hṛdi pañca sute jānau āyurbuddhiṃ vicintayet ||

शिरस्थे तु भवेद्राज्यं पिण्डतो वक्त्रयोगतः । नेत्रयोः कान्तसौभाग्यं हृदये द्रव्यसङ्ग्रहः ।।

śirasthe tu bhavedrājyaṃ piṇḍato vaktrayogataḥ | netrayoḥ kāntasaubhāgyaṃ hṛdaye dravyasaṅgrahaḥ ||

हस्ते धृतं तस्करत्वङ्गतासुरध्वगः पदे । कुम्भाष्तके भानि लिख्य सूर्यकुम्भस्तु रिक्तकः ।।

haste dhṛtaṃ taskaratvaṅgatāsuradhvagaḥ pade | kumbhāṣtake bhāni likhya sūryakumbhastu riktakaḥ ||

अशुभः सूर्यकुम्भः स्याच्छुभः पूर्वादिसंस्थितः । फणिराहुं प्रवक्ष्यामि जयाजयविवेकदं ।।

aśubhaḥ sūryakumbhaḥ syācchubhaḥ pūrvādisaṃsthitaḥ | phaṇirāhuṃ pravakṣyāmi jayājayavivekadaṃ ||

अष्टाविंशांल्लिखेद्विन्दून पुनर्भाज्यस्त्रिभ्स्त्रिभिः । अथ ऋक्षाणि चत्वारि रेखास्तत्रैव दापयेत ।।

aṣṭāviṃśāṃllikhedvindūn punarbhājyastribhstribhiḥ | atha ṛkṣāṇi catvāri rekhāstatraiva dāpayet ||

यस्मिन्नृक्षे स्थितो राहुस्तदृक्षं फणिमूर्धनि । तदादि विन्यसेद भानि सप्तविंशक्रमेण तु ।।

yasminnṛkṣe sthito rāhustadṛkṣaṃ phaṇimūrdhani | tadādi vinyased bhāni saptaviṃśakrameṇa tu ||

वक्त्रे सप्तगते ऋक्षे म्रियते सर्व आहवे । स्कन्धे भङ्गं विजानीयात्सप्तमेषु च मध्यतः ।।

vaktre saptagate ṛkṣe mriyate sarva āhave | skandhe bhaṅgaṃ vijānīyātsaptameṣu ca madhyataḥ ||

उदरस्थेन पूजा च जयश चैवात्मनस तथा । कटिदेशे स्थिते योधे आहवे हरते परान ।।

udarasthena pūjā ca jayaś caivātmanas tathā | kaṭideśe sthite yodhe āhave harate parān ||

पुच्छस्थितेन कीर्तिः स्याद्राहुदृष्टे च भे मृतिः । पुनरन्यं प्रवक्ष्यामि रविराहुबलन्तव ।।

pucchasthitena kīrtiḥ syādrāhudṛṣṭe ca bhe mṛtiḥ | punaranyaṃ pravakṣyāmi ravirāhubalantava ||

रविः शुक्रो बुधश चैव सोमः सौरिर्गुरुस तथा । लोहितः संहिकश चैव एते यामार्धभागिनः ।।

raviḥ śukro budhaś caiva somaḥ saurirgurus tathā | lohitaḥ saṃhikaś caiva ete yāmārdhabhāginaḥ ||

सौरिं रविञ्च राहुञ्च कृत्वा यत्नेन पृष्ठतः । स जयेत सैन्यसङ्घातं द्यूतमध्वानमाहवं ।।

sauriṃ raviñca rāhuñca kṛtvā yatnena pṛṣṭhataḥ | sa jayet sainyasaṅghātaṃ dyūtamadhvānamāhavaṃ ||

रोहिणी चोत्तरास्तिस्रो मृगः पञ्च स्थिराणि हि । अश्विनी रेवती स्वाती धनिष्ठा शततारका ।।

rohiṇī cottarāstisro mṛgaḥ pañca sthirāṇi hi | aśvinī revatī svātī dhaniṣṭhā śatatārakā ||

क्षिप्राणि पञ्चभान्येव यात्रार्थी चैव योजयेत । अनुराधाहस्तमूलं मृगः पुष्यं पुनर्वसुः ।।

kṣiprāṇi pañcabhānyeva yātrārthī caiva yojayet | anurādhāhastamūlaṃ mṛgaḥ puṣyaṃ punarvasuḥ ||

सर्वकार्येषु चैतानि ज्येष्ठा चित्रा विशाखया । पुर्वास्तिस्रो ऽग्निर्भरणी मघार्द्राश्लेषादारुणाः ।।

sarvakāryeṣu caitāni jyeṣṭhā citrā viśākhayā | purvāstisro 'gnirbharaṇī maghārdrāśleṣādāruṇāḥ ||

स्थावरेषु स्थिरं ह्य ऋक्षं यात्रायां क्षिप्रमुत्तमं । सौभाग्यार्थे मृदून्येव उग्रेषूग्रन्तु कारयेत ।।

sthāvareṣu sthiraṃ hy ṛkṣaṃ yātrāyāṃ kṣipramuttamaṃ | saubhāgyārthe mṛdūnyeva ugreṣūgrantu kārayet ||

दारुणे दारुणं कुर्याद्वक्ष्ये चाधोमुखादिकं । कृत्रिका भरण्यश्लेषा विशाखा पितृनैरृतम ।।

dāruṇe dāruṇaṃ kuryādvakṣye cādhomukhādikaṃ | kṛtrikā bharaṇyaśleṣā viśākhā pitṛnairṛtam ||

पूर्वात्रयमधोवक्त्रं कर्म चाधोमुखञ्चरेत । एषु कूपतडागादि विद्याकर्म भिषक्क्रिया ।।

pūrvātrayamadhovaktraṃ karma cādhomukhañcaret | eṣu kūpataḍāgādi vidyākarma bhiṣakkriyā ||

स्थापनन्नौकाभूपादिविधानं खननन्तथा । रेवती चाश्विनी चित्रा हस्ता स्वाती पुनर्वसुः ।।

sthāpanannaukābhūpādividhānaṃ khananantathā | revatī cāśvinī citrā hastā svātī punarvasuḥ ||

अनुराधा मृगो ज्येष्ठा नव वै पार्श्वतोमुखाः । एषु राज्याभिषेकञ्च पट्टबन्धङ्गजाश्वयोः ।।

anurādhā mṛgo jyeṣṭhā nava vai pārśvatomukhāḥ | eṣu rājyābhiṣekañca paṭṭabandhaṅgajāśvayoḥ ||

आरामगृहप्रासादं प्राकारं क्षेत्रतोरणं । ध्वजचिह्नपताकाश च सर्वानेतांश च कारयेत ।।

ārāmagṛhaprāsādaṃ prākāraṃ kṣetratoraṇaṃ | dhvajacihnapatākāś ca sarvānetāṃś ca kārayet ||

द्वादशी सूर्यदग्धा तु चन्द्रेणैकदशी तथा । भौमेन दशमी दग्धा तृतीया वै बुधेन च ।।

dvādaśī sūryadagdhā tu candreṇaikadaśī tathā | bhaumena daśamī dagdhā tṛtīyā vai budhena ca ||

षष्टी च गुरुणा दग्धा द्वितीया भृगुणा तथा । सप्तमी सूर्यपुत्रेण त्रिपुष्करमथो वदे ।।

ṣaṣṭī ca guruṇā dagdhā dvitīyā bhṛguṇā tathā | saptamī sūryaputreṇa tripuṣkaramatho vade ||

द्वितीया द्वादशी चैव सप्तमी वै तृतीयया । रविर्भौमस तथा शौरिः षडेतास्तु त्रिपुष्कराः ।।

dvitīyā dvādaśī caiva saptamī vai tṛtīyayā | ravirbhaumas tathā śauriḥ ṣaḍetāstu tripuṣkarāḥ ||

विशाखा कृत्तिका चैव उत्तरे द्वे पुनर्वसुः । पूर्वभाद्रपदा चैव षडेते तु त्रिपुष्कराः ।।

viśākhā kṛttikā caiva uttare dve punarvasuḥ | pūrvabhādrapadā caiva ṣaḍete tu tripuṣkarāḥ ||

लाभो हानिर्जयो वृद्धिः पुत्रजन्म तथैव च । नष्टं भ्रष्टं विनष्टं वा तत्सर्वन्त्रिगुणं भवेत ।।

lābho hānirjayo vṛddhiḥ putrajanma tathaiva ca | naṣṭaṃ bhraṣṭaṃ vinaṣṭaṃ vā tatsarvantriguṇaṃ bhavet ||

अश्विनी भरणी चैव अश्लेषा पुष्यमेव च । खातिश चैव विशाखा च श्रवणं सप्तमं पुनः ।।

aśvinī bharaṇī caiva aśleṣā puṣyameva ca | khātiś caiva viśākhā ca śravaṇaṃ saptamaṃ punaḥ ||

एतानि दृढचक्षूंषि पश्यनति च दिशो दश । यात्रासु दूरगस्यापि आगमः पुण्यगोचरे ।।

etāni dṛḍhacakṣūṃṣi paśyanati ca diśo daśa | yātrāsu dūragasyāpi āgamaḥ puṇyagocare ||

आषाढे रेवती चित्रा केकराणि पुनर्वसुः । एषु पञ्चसु ऋक्षेषु निर्गतस्यागमो भवेत ।।

āṣāḍhe revatī citrā kekarāṇi punarvasuḥ | eṣu pañcasu ṛkṣeṣu nirgatasyāgamo bhavet ||

कृत्तिका रोहिणी सौम्यं फल्गुनी च मघा तथा । मूलं ज्येष्ठानुराधा च धनिष्ठा शततारकाः ।।

kṛttikā rohiṇī saumyaṃ phalgunī ca maghā tathā | mūlaṃ jyeṣṭhānurādhā ca dhaniṣṭhā śatatārakāḥ ||

पूर्वभाद्रपदा चैव चिपिटानि च तानि हि । अध्वानं व्रजमानस्य पुनरेवागमो भवेत ।।

pūrvabhādrapadā caiva cipiṭāni ca tāni hi | adhvānaṃ vrajamānasya punarevāgamo bhavet ||

हस्त उत्तरभाद्रश च आर्द्राषाढा तथैव च । नष्टार्थाश चैव दृश्यन्ते सङ्ग्रामो नैव विद्यते ।।

hasta uttarabhādraś ca ārdrāṣāḍhā tathaiva ca | naṣṭārthāś caiva dṛśyante saṅgrāmo naiva vidyate ||

पुनर्वक्ष्यामि गण्डान्तमृक्षमध्ये यथा स्थितम । रेवत्यन्ते चतुर्नाडी अश्विन्यादिचतुष्टयम ।।

punarvakṣyāmi gaṇḍāntamṛkṣamadhye yathā sthitam | revatyante caturnāḍī aśvinyādicatuṣṭayam ||

उभयोर्याममात्रन्तु वर्जयेत्तत प्रयत्नतः । अश्लेषान्ते मघादौ तु घटिकानां चतुष्टयम ।।

ubhayoryāmamātrantu varjayettat prayatnataḥ | aśleṣānte maghādau tu ghaṭikānāṃ catuṣṭayam ||

द्वितीयं गण्डमाख्यातं तृतीयं भैरवि शृणु । ज्येष्ठाभमूलयोर्मध्ये उग्ररूपन्तु यामकम ।।

dvitīyaṃ gaṇḍamākhyātaṃ tṛtīyaṃ bhairavi śṛṇu | jyeṣṭhābhamūlayormadhye ugrarūpantu yāmakam ||

न कुर्याच्छुभकर्माणि यदीच्छेदात्मजीवितं । दारके जातकाले च म्रियेते पितृमातरो ।।

na kuryācchubhakarmāṇi yadīcchedātmajīvitaṃ | dārake jātakāle ca mriyete pitṛmātaro ||