गायत्र्यैव महानद्यां स्नातः सन्ध्यां समाचरेत । गायत्र्या अग्रतः प्रातः श्राद्धं पिण्डमथाक्षयं ।।

gāyatryaiva mahānadyāṃ snātaḥ sandhyāṃ samācaret | gāyatryā agrataḥ prātaḥ śrāddhaṃ piṇḍamathākṣayaṃ ||

मध्याह्ने चोद्यति स्नात्वा गीतवाद्यैर ह्युपास्य च । सावित्रीपुरतः सन्ध्यां पिण्डदानञ्च तत्पदे ।।

madhyāhne codyati snātvā gītavādyair hyupāsya ca | sāvitrīpurataḥ sandhyāṃ piṇḍadānañca tatpade ||

अगस्त्यस्य पदे कुर्याद्योनिद्वारं प्रविश्य च । निर्गतो न पुनर्योनिं प्रविशेन्मुच्यते भवात ।।

agastyasya pade kuryādyonidvāraṃ praviśya ca | nirgato na punaryoniṃ praviśenmucyate bhavāt ||

बलिं काकशिलायाञ्च कुमारञ्च नमेत्ततः । स्वर्गद्वार्यां सोमकुण्डे वायुतीर्थे ऽथ पिण्डदः ।।

baliṃ kākaśilāyāñca kumārañca namettataḥ | svargadvāryāṃ somakuṇḍe vāyutīrthe 'tha piṇḍadaḥ ||

भवेदाकशगङ्गायां कपिलायाञ्च पिण्डदः । कपिलेशं शिवं नत्वा रुक्मिकुण्डे च पिण्डदः ।।

bhavedākaśagaṅgāyāṃ kapilāyāñca piṇḍadaḥ | kapileśaṃ śivaṃ natvā rukmikuṇḍe ca piṇḍadaḥ ||

कोटीतीर्थे च कोटीशं नत्वामोघपदे नरः । गदालोले वानरके गोप्रचारे च पिण्डदः ।।

koṭītīrthe ca koṭīśaṃ natvāmoghapade naraḥ | gadālole vānarake gopracāre ca piṇḍadaḥ ||

नत्वा गावं वैतरण्यामेकविंशकुलोद्धृतिः । श्राद्धपिण्डप्रदाता स्यात क्रौञ्चपदे च पिण्डदः ।।

natvā gāvaṃ vaitaraṇyāmekaviṃśakuloddhṛtiḥ | śrāddhapiṇḍapradātā syāt krauñcapade ca piṇḍadaḥ ||

तृतीयायां विशालायां निश्चिरायाञ्च पिण्डदः । ऋणमोक्षे पापमोक्षे भस्मकुण्डे ऽथ भस्मना ।।

tṛtīyāyāṃ viśālāyāṃ niścirāyāñca piṇḍadaḥ | ṛṇamokṣe pāpamokṣe bhasmakuṇḍe 'tha bhasmanā ||

स्नानकृन मुच्यते पापान्नमेद्देवं जनार्दनम । एष पिण्डो मया दत्तस्तव हस्ते जनार्दन ।।

snānakṛn mucyate pāpānnameddevaṃ janārdanam | eṣa piṇḍo mayā dattastava haste janārdana ||

परलोकगते मह्यमक्ष्यय्यमुपतिष्ठतां । गयायां पितृरूपेण स्वयमेव जनार्दनः ।।

paralokagate mahyamakṣyayyamupatiṣṭhatāṃ | gayāyāṃ pitṛrūpeṇa svayameva janārdanaḥ ||

तं दृष्ट्वा पुण्डरीकाक्षं मुच्यते वै ऋणत्रयात । मार्कण्डेयेश्वरं नत्वा नमेद्गृध्रेश्वरं नरः ।।

taṃ dṛṣṭvā puṇḍarīkākṣaṃ mucyate vai ṛṇatrayāt | mārkaṇḍeyeśvaraṃ natvā namedgṛdhreśvaraṃ naraḥ ||

मूलक्षेत्रे महेशस्य धारायां पिण्डदो भवेत । गृध्रकूटे गृध्रवटे धौतपादे च पिण्डदः ।।

mūlakṣetre maheśasya dhārāyāṃ piṇḍado bhavet | gṛdhrakūṭe gṛdhravaṭe dhautapāde ca piṇḍadaḥ ||

पुष्करिण्यां कर्दमाले रामतीर्थे च पिण्डदः । प्रभासेशन्नमेत प्रेतशिलायां पिण्डदो भवेत ।।

puṣkariṇyāṃ kardamāle rāmatīrthe ca piṇḍadaḥ | prabhāseśannamet pretaśilāyāṃ piṇḍado bhavet ||

दिव्यान्तरीक्षभूमिष्ठाः पितरो बान्धवादयः । प्रेतादिरूपा मुक्ताः स्युः पिण्डैर दत्तैर मयाखिलाः ।।

divyāntarīkṣabhūmiṣṭhāḥ pitaro bāndhavādayaḥ | pretādirūpā muktāḥ syuḥ piṇḍair dattair mayākhilāḥ ||

स्थानत्रये प्रेतशिला गयाशिरसि पावनी । प्रभासे प्रेतकुण्डे च पिण्डदस्तारयेत कुलम ।।

sthānatraye pretaśilā gayāśirasi pāvanī | prabhāse pretakuṇḍe ca piṇḍadastārayet kulam ||

वसिष्ठेशन्नमस्कृत्य तदग्रे पिण्डदो भवेत । गयानाभौ सुषुम्णायां महाकोष्ट्याञ्च पिण्डदः ।।

vasiṣṭheśannamaskṛtya tadagre piṇḍado bhavet | gayānābhau suṣumṇāyāṃ mahākoṣṭyāñca piṇḍadaḥ ||

गदाधराग्रतो मुण्डपृष्ठे देव्याश च सन्निधौ । मुण्दपृष्ठं नमेदादौ क्षेत्रपालादिसंयुतम ।।

gadādharāgrato muṇḍapṛṣṭhe devyāś ca sannidhau | muṇdapṛṣṭhaṃ namedādau kṣetrapālādisaṃyutam ||

पूजयित्वा भयं न स्याद्विषरोगादिनाशनम । ब्रह्माणञ्च नमस्कृत्य ब्रह्मलोकं नयेत कुलम ।।

pūjayitvā bhayaṃ na syādviṣarogādināśanam | brahmāṇañca namaskṛtya brahmalokaṃ nayet kulam ||

सुभद्रां बलभद्रञ्च प्रपूज्य पुरुषोत्तमम । सर्वकामसमायुक्तः कुलमुद्धृत्य नाकभाक ।।

subhadrāṃ balabhadrañca prapūjya puruṣottamam | sarvakāmasamāyuktaḥ kulamuddhṛtya nākabhāk ||

हृषीकेशं नमस्कृत्य तदग्रे पिण्डदो भवेत । माधवं पूजयित्वा च देवो वैमानिको भवेत ।।

hṛṣīkeśaṃ namaskṛtya tadagre piṇḍado bhavet | mādhavaṃ pūjayitvā ca devo vaimāniko bhavet ||

महालक्ष्मीं प्रार्च्य गौरीं मङ्गलाञ्च सरस्वतीम । पितॄनुद्धृत्य स्वर्गस्थो भुक्तभोगो ऽत्र शास्त्रधीः ।।

mahālakṣmīṃ prārcya gaurīṃ maṅgalāñca sarasvatīm | pitṝnuddhṛtya svargastho bhuktabhogo 'tra śāstradhīḥ ||

द्वादशादित्यमभ्यर्य वह्निं रेवन्तमिन्द्रकम । रोगादिमुक्तः स्वर्गी स्याच्छ्रीकपर्दिविनायकम ।।

dvādaśādityamabhyarya vahniṃ revantamindrakam | rogādimuktaḥ svargī syācchrīkapardivināyakam ||

प्रपूज्य कार्त्तिकेयञ्च निर्विघ्नः सिद्धिमाप्नुयात । सोमनाथञ्च कालेशङ्केदारं प्रपितामहम ।।

prapūjya kārttikeyañca nirvighnaḥ siddhimāpnuyāt | somanāthañca kāleśaṅkedāraṃ prapitāmaham ||

सिद्धेश्वरञ्च रुद्रेशं रामेशं ब्रह्मकेश्वरम । अष्टलिङ्गानि गुह्यानि पूजयित्वा तु सर्वभाक ।।

siddheśvarañca rudreśaṃ rāmeśaṃ brahmakeśvaram | aṣṭaliṅgāni guhyāni pūjayitvā tu sarvabhāk ||

नारायणं वराहञ्च नारसिंहं नमेच्छ्रिये । ब्रह्मविष्णुमहेशाख्यं त्रिपुरघ्नमशेषदम ।।

nārāyaṇaṃ varāhañca nārasiṃhaṃ namecchriye | brahmaviṣṇumaheśākhyaṃ tripuraghnamaśeṣadam ||

सीतां रामञ्च गरुडं वामनं सम्प्रपूज्य च । सर्वकामानवाप्नोति ब्रह्मलोकं नयेत पितॄन ।।

sītāṃ rāmañca garuḍaṃ vāmanaṃ samprapūjya ca | sarvakāmānavāpnoti brahmalokaṃ nayet pitṝn ||

देवैः सार्धं सम्प्रपूज्य देवमादिगदाधरम । ऋणत्रयविनिर्मुक्तस्तारयेत सकलं कुलम ।।

devaiḥ sārdhaṃ samprapūjya devamādigadādharam | ṛṇatrayavinirmuktastārayet sakalaṃ kulam ||

देवरूपा शिला पुण्या तस्माद्देवमयी शिला । गयायां नहि तत स्थानं यत्र तीर्थं न विद्यते ।।

devarūpā śilā puṇyā tasmāddevamayī śilā | gayāyāṃ nahi tat sthānaṃ yatra tīrthaṃ na vidyate ||

यन्नाम्ना पातयेत पिण्डं तन्नयेद्ब्रह्म शाश्वतम । फल्ग्वीशं फल्गुचण्डीं च प्रणम्याङ्गारकेश्वरम ।।

yannāmnā pātayet piṇḍaṃ tannayedbrahma śāśvatam | phalgvīśaṃ phalgucaṇḍīṃ ca praṇamyāṅgārakeśvaram ||

मतङ्गस्य पदे श्राद्धी भरताश्रमके भवेत । हंसतीर्थे कोटितीर्थे यत्र पाण्डुशिलान्नदः ।।

mataṅgasya pade śrāddhī bharatāśramake bhavet | haṃsatīrthe koṭitīrthe yatra pāṇḍuśilānnadaḥ ||

तत्र स्यादग्निधारायां मधुस्रवसि पिण्डदः । रुद्रेशं किलिकिलेशं नमेद्वृद्धिविनायकम ।।

tatra syādagnidhārāyāṃ madhusravasi piṇḍadaḥ | rudreśaṃ kilikileśaṃ namedvṛddhivināyakam ||

पिण्डदो धेनुकारण्ये पदे धेनोर नमेच्च गाम । सर्वान पितॄंस्तारयेच्च सरस्वत्याञ्च पिण्डदः ।।

piṇḍado dhenukāraṇye pade dhenor namecca gām | sarvān pitṝṃstārayecca sarasvatyāñca piṇḍadaḥ ||

सन्ध्यामुपास्य सायाह्ने नमेद्देवीं सरस्वतीम । त्रिसन्ध्याकृद्भवेद्विप्रो वेदवेदाङ्गपारगः ।।

sandhyāmupāsya sāyāhne nameddevīṃ sarasvatīm | trisandhyākṛdbhavedvipro vedavedāṅgapāragaḥ ||

गयां प्रदक्षिणीकृत्य गयाविप्रान प्रपूज्य च । अन्नदानादिकं सर्वं कृतन्तत्राक्षयं भवेत ।।

gayāṃ pradakṣiṇīkṛtya gayāviprān prapūjya ca | annadānādikaṃ sarvaṃ kṛtantatrākṣayaṃ bhavet ||

स्तुत्वा सम्प्रार्थयेदेवमादिदेवं गदाधरम । गदाधरं गयावासं पित्रादीनां गतिप्रदम ।।

stutvā samprārthayedevamādidevaṃ gadādharam | gadādharaṃ gayāvāsaṃ pitrādīnāṃ gatipradam ||

धर्मार्थकाममोक्षार्थं योगदं प्रणमाम्यहम । देहेन्द्रियमनोबुद्धिप्राणाहङ्कारवर्जितम ।।

dharmārthakāmamokṣārthaṃ yogadaṃ praṇamāmyaham | dehendriyamanobuddhiprāṇāhaṅkāravarjitam ||

नित्यशुद्धं बुद्धियुक्तं सत्यं ब्रह्म नमाम्यहम । आनन्दमद्वयं देवं देवदानववन्दितम ।।

nityaśuddhaṃ buddhiyuktaṃ satyaṃ brahma namāmyaham | ānandamadvayaṃ devaṃ devadānavavanditam ||

देवदेवीवृन्दयुक्तं सर्वदा प्रणमाम्यहम । कलिकल्मषकालार्तिदमनं वनमालिनम ।।

devadevīvṛndayuktaṃ sarvadā praṇamāmyaham | kalikalmaṣakālārtidamanaṃ vanamālinam ||

पालिताखिललोकेशं कुलोद्धरणमानसम । व्यक्ताव्यक्तविभक्तात्माविभक्तात्मानमात्मनि ।।

pālitākhilalokeśaṃ kuloddharaṇamānasam | vyaktāvyaktavibhaktātmāvibhaktātmānamātmani ||

स्थितं स्थिरतरं सारं वन्दे घोराघमर्दनम । आगतो ऽस्मि गयां देव पितृकार्ये गदाधरः ।।

sthitaṃ sthirataraṃ sāraṃ vande ghorāghamardanam | āgato 'smi gayāṃ deva pitṛkārye gadādharaḥ ||

त्वं मे साक्षी भवाद्येह अनृणो ऽहमृणत्रयात । साक्षिणः सन्तु मे देवा ब्रह्मेशानादयस तथा ।।

tvaṃ me sākṣī bhavādyeha anṛṇo 'hamṛṇatrayāt | sākṣiṇaḥ santu me devā brahmeśānādayas tathā ||

मया गयां समासाद्य पितॄणां निष्कृतिः कृता । गयामाहात्म्यपठनाच्छ्राद्धादौ ब्रह्मलोकभाक ।।

mayā gayāṃ samāsādya pitṝṇāṃ niṣkṛtiḥ kṛtā | gayāmāhātmyapaṭhanācchrāddhādau brahmalokabhāk ||

//43 ।।

//43 ||