ततः प्रासादमासूत्र्य वर्तयेद्वास्तुमण्डपं । कुर्यात कोष्ठचतुःषष्टिं क्षेत्रे वेदास्रके समे ।।

tataḥ prāsādamāsūtrya vartayedvāstumaṇḍapaṃ | kuryāt koṣṭhacatuḥṣaṣṭiṃ kṣetre vedāsrake same ||

कोणेषु विन्यसेद वंशौ रज्जवो ऽष्टौ विकोणगाः । द्विपदाः षट्पदास्तास्तु वास्तुन्तत्रार्चयेद यथा ।।

koṇeṣu vinyased vaṃśau rajjavo 'ṣṭau vikoṇagāḥ | dvipadāḥ ṣaṭpadāstāstu vāstuntatrārcayed yathā ||

आकुञ्चितकचं वास्तुमुत्तानमसुराकृतिं । स्मरेत पूजासु कुड्यादिनिवेशे उत्तराननं ।।

ākuñcitakacaṃ vāstumuttānamasurākṛtiṃ | smaret pūjāsu kuḍyādiniveśe uttarānanaṃ ||

जानुनी कूर्परौ शक्थि दिशि वातहुताशयोः । पैत्र्यां पादपुटे रौद्र्यां शिरो ऽस्य हृदये ऽञ्जलिः ।।

jānunī kūrparau śakthi diśi vātahutāśayoḥ | paitryāṃ pādapuṭe raudryāṃ śiro 'sya hṛdaye 'ñjaliḥ ||

अस्य देहे समारूढा देवताः पूजिताः शुभाः । अष्टौ कोणाधिपास्तत्र कोणार्धेष्वष्टसु स्थिताः ।।

asya dehe samārūḍhā devatāḥ pūjitāḥ śubhāḥ | aṣṭau koṇādhipāstatra koṇārdheṣvaṣṭasu sthitāḥ ||

षट्पदास्तु मरीच्याद्या दिक्षु पूर्वादिषु क्रमात । मध्ये चतुष्पदो ब्रह्मा शेषास्तु पदिकाः स्मृताः ।।

ṣaṭpadāstu marīcyādyā dikṣu pūrvādiṣu kramāt | madhye catuṣpado brahmā śeṣāstu padikāḥ smṛtāḥ ||

समस्तनाडीसंयोगे महामर्मानुजं फलं । त्रिशूलं स्वस्तिकं वज्रं महास्वस्तिकसम्पुटौ ।।

samastanāḍīsaṃyoge mahāmarmānujaṃ phalaṃ | triśūlaṃ svastikaṃ vajraṃ mahāsvastikasampuṭau ||

त्रिकुटुं मणिबन्धं च सुविशुद्धं पदं तथा । इति द्वादश मर्माणि वास्तोर्भित्त्यादिषु त्यजेत ।।

trikuṭuṃ maṇibandhaṃ ca suviśuddhaṃ padaṃ tathā | iti dvādaśa marmāṇi vāstorbhittyādiṣu tyajet ||

साज्यमक्षतमीशाय पर्जन्यायाम्बुजोदकं । ददीताथ जयन्ताय पताकां कुङ्कुमोज्ज्वलां ।।

sājyamakṣatamīśāya parjanyāyāmbujodakaṃ | dadītātha jayantāya patākāṃ kuṅkumojjvalāṃ ||

रत्नवारि महेन्द्राय रवौ धूम्रं वितानकं । सत्याय घृतगोधूममाज्यभक्तं भृशाय च ।।

ratnavāri mahendrāya ravau dhūmraṃ vitānakaṃ | satyāya ghṛtagodhūmamājyabhaktaṃ bhṛśāya ca ||

विमांसमन्तरीक्षाय शुक्तुन्तेभ्यस्तु पूर्वतः । मधुक्षीराज्यसम्पूर्णां प्रदद्याद्वह्नये श्रुचं ।।

vimāṃsamantarīkṣāya śuktuntebhyastu pūrvataḥ | madhukṣīrājyasampūrṇāṃ pradadyādvahnaye śrucaṃ ||

लाजान पूर्णं सुवर्णाम्बु वितथाय निवेदयेत । दद्याद गृहक्षते क्षौद्रं यमराजे पलौदनं ।।

lājān pūrṇaṃ suvarṇāmbu vitathāya nivedayet | dadyād gṛhakṣate kṣaudraṃ yamarāje palaudanaṃ ||

गन्धं गन्धर्वनाथाय जिह्वां भृङ्गाय पक्षिणः । मृगाय पद्मपर्णानि याम्यामित्यष्टदेवताः ।।

gandhaṃ gandharvanāthāya jihvāṃ bhṛṅgāya pakṣiṇaḥ | mṛgāya padmaparṇāni yāmyāmityaṣṭadevatāḥ ||

पित्रे तिलोदकं क्षीरं वृक्षजं दन्तधावनं । दौवारिकाय देवाय प्रदद्याद धेनुमुद्रया ।।

pitre tilodakaṃ kṣīraṃ vṛkṣajaṃ dantadhāvanaṃ | dauvārikāya devāya pradadyād dhenumudrayā ||

सुग्रीवाय दिशेत पूपान पुष्पदन्ताय दर्भकं । रक्तं प्रचेतसे पद्ममसुराय सुरासवं ।।

sugrīvāya diśet pūpān puṣpadantāya darbhakaṃ | raktaṃ pracetase padmamasurāya surāsavaṃ ||

घृतं गुडौदनं शेषे रोगाय घृतमण्डकान । लाजान वा पश्चिमाशायां देवाष्टकमितीरितं ।।

ghṛtaṃ guḍaudanaṃ śeṣe rogāya ghṛtamaṇḍakān | lājān vā paścimāśāyāṃ devāṣṭakamitīritaṃ ||

मारुताय ध्वजं पीतं नागाय नागकेशरं । मुख्ये भक्ष्याणि भल्लाटे मुद्गसूपं सुसंस्कृतं ।।

mārutāya dhvajaṃ pītaṃ nāgāya nāgakeśaraṃ | mukhye bhakṣyāṇi bhallāṭe mudgasūpaṃ susaṃskṛtaṃ ||

सोमाय पायसं साज्यं शालूकमूषये दिशेत । लोपीमदितये दित्यै पुरीमित्युत्तराष्टकं ।।

somāya pāyasaṃ sājyaṃ śālūkamūṣaye diśet | lopīmaditaye dityai purīmityuttarāṣṭakaṃ ||

मोदकान ब्रह्मणः प्राच्यां षट्पादाय मरीचये । सवित्रे रक्तपुष्पाणि वह्न्यधःकोणकोष्ठके ।।

modakān brahmaṇaḥ prācyāṃ ṣaṭpādāya marīcaye | savitre raktapuṣpāṇi vahnyadhaḥkoṇakoṣṭhake ||

तदधःकोष्ठके दद्यात सावित्र्यै च कुशोदकं । दक्षिणे चन्दनं रक्तं षट्पदाय विवस्वते ।।

tadadhaḥkoṣṭhake dadyāt sāvitryai ca kuśodakaṃ | dakṣiṇe candanaṃ raktaṃ ṣaṭpadāya vivasvate ||

हरिद्रौदनमिन्द्राय रक्षोधःक्रीणकोष्ठके । इन्द्रजयाय मिश्रान्नमिन्द्राधस्तान्निवेदयेत ।।

haridraudanamindrāya rakṣodhaḥkrīṇakoṣṭhake | indrajayāya miśrānnamindrādhastānnivedayet ||

वरुण्यां षट्पदासीने मित्रे सङुडमोदनं । रुद्राय घृतसिद्धान्नं वायुकोणाधरे पदे ।।

varuṇyāṃ ṣaṭpadāsīne mitre saṅuḍamodanaṃ | rudrāya ghṛtasiddhānnaṃ vāyukoṇādhare pade ||

तदधो रुद्रदासाय मासं मार्गमथोत्तरे । ददीत माषनैवेद्यं षट्पदस्थे धराधरे ।।

tadadho rudradāsāya māsaṃ mārgamathottare | dadīta māṣanaivedyaṃ ṣaṭpadasthe dharādhare ||

आपाय शिवकोणाधः तद्वत्साय च तत्स्थले । क्रमाद्दद्याद्दधिक्षीरं पूजयित्वा विधानतः ।।

āpāya śivakoṇādhaḥ tadvatsāya ca tatsthale | kramāddadyāddadhikṣīraṃ pūjayitvā vidhānataḥ ||

चतुष्पदे निविष्टाय ब्रह्मणे मध्मदेशतः । पञ्चगव्याक्षतोपेतञ्चरुं साज्यं निवेदयेत ।।

catuṣpade niviṣṭāya brahmaṇe madhmadeśataḥ | pañcagavyākṣatopetañcaruṃ sājyaṃ nivedayet ||

ईशादिवायुपर्यन्तकोणेष्वथ यथाक्रमं । वास्तुवाह्ये चरक्याद्याश चतस्रः पूजयेद यथा ।।

īśādivāyuparyantakoṇeṣvatha yathākramaṃ | vāstuvāhye carakyādyāś catasraḥ pūjayed yathā ||

चरक्यै सघृतं मांसं विदार्यै दधिपङ्कजे । पूतनायै पलं पित्तं रुधिरं च निवेदयेत ।।

carakyai saghṛtaṃ māṃsaṃ vidāryai dadhipaṅkaje | pūtanāyai palaṃ pittaṃ rudhiraṃ ca nivedayet ||

अस्थीनि पापराक्षस्यै रक्तपित्तपलानि च । ततो माषौदनं प्राच्यां स्कन्दाय विनिवेदयेत ।।

asthīni pāparākṣasyai raktapittapalāni ca | tato māṣaudanaṃ prācyāṃ skandāya vinivedayet ||

अर्यम्णे दक्षिणाशायां पूपान कृसरया युतान । जम्भकाय च वारुण्यामामिषं रुधिरान्वितं ।।

aryamṇe dakṣiṇāśāyāṃ pūpān kṛsarayā yutān | jambhakāya ca vāruṇyāmāmiṣaṃ rudhirānvitaṃ ||

उदीच्यां पिलिपिञ्जाय रक्तान्नं कुसुमानि च । यजेद्वा सकलं वास्तुं कुशदध्यक्षतेर्जलैः ।।

udīcyāṃ pilipiñjāya raktānnaṃ kusumāni ca | yajedvā sakalaṃ vāstuṃ kuśadadhyakṣaterjalaiḥ ||

गृहे च नगरादौ च एकाशीतिपदैर यजेत । त्रिपदा रज्जवः कार्याः षट्पदाश च विकोणके ।।

gṛhe ca nagarādau ca ekāśītipadair yajet | tripadā rajjavaḥ kāryāḥ ṣaṭpadāś ca vikoṇake ||

ईशाद्याः पादिकास्तस्मिन्नागद्याश च द्विकोष्ठगाः । षट्पदस्था मरीच्याद्या ब्रह्मा नवपदः स्मृतः ।।

īśādyāḥ pādikāstasminnāgadyāś ca dvikoṣṭhagāḥ | ṣaṭpadasthā marīcyādyā brahmā navapadaḥ smṛtaḥ ||

नगरग्रामखेटादौ वास्तुः शतपदो ऽपि वा । वंशद्वयं कोणगतं दुर्जयं दुर्धरं सदा ।।

nagaragrāmakheṭādau vāstuḥ śatapado 'pi vā | vaṃśadvayaṃ koṇagataṃ durjayaṃ durdharaṃ sadā ||

यथा देवालये न्यसस तथा शतपदे हितः । ग्रहाः स्कन्दादयस्तत्र विज्ञेयाश चैव षट्पदाः ।।

yathā devālaye nyasas tathā śatapade hitaḥ | grahāḥ skandādayastatra vijñeyāś caiva ṣaṭpadāḥ ||

चरक्याद्या भूतपदा रज्जुवंशादि पूर्ववत । देशसंस्थापने वास्तु चतुस्त्रिंशच्छतं भवेत ।।

carakyādyā bhūtapadā rajjuvaṃśādi pūrvavat | deśasaṃsthāpane vāstu catustriṃśacchataṃ bhavet ||

चतुःषष्टिपदो ब्रह्मा मरीच्याद्याश च देवताः । चतुःपञ्चाशत्पदिका आपाद्यष्टौ रसाग्निभिः ।।

catuḥṣaṣṭipado brahmā marīcyādyāś ca devatāḥ | catuḥpañcāśatpadikā āpādyaṣṭau rasāgnibhiḥ ||

ईशानाद्या नवपदाः स्कन्दाद्याः शक्तिकाः स्मृताः । चरक्याद्यास्तद्वदेव रज्जुवंशादि पूर्ववत ।।

īśānādyā navapadāḥ skandādyāḥ śaktikāḥ smṛtāḥ | carakyādyāstadvadeva rajjuvaṃśādi pūrvavat ||

ज्ञेयो वंशसहस्रैस्तु वास्तुमण्डलगः पदैः । न्यासो नवगुणस्तत्र कर्तव्यो देशवास्तुवित ।।

jñeyo vaṃśasahasraistu vāstumaṇḍalagaḥ padaiḥ | nyāso navaguṇastatra kartavyo deśavāstuvit ||

पञ्चचिंशत्पदो वास्तुर्वैतालाख्यश्चितौ स्मृतः । अन्यो नवपदो वास्तुः षोडशाङ्घ्रिस तथापरः ।।

pañcaciṃśatpado vāsturvaitālākhyaścitau smṛtaḥ | anyo navapado vāstuḥ ṣoḍaśāṅghris tathāparaḥ ||

षडस्रत्र्यस्रवृत्तादेर्मध्ये स्याच्चतुरस्रकं । खाते वास्तोः समं पृष्ठे न्यासे ब्रह्मशिलात्मके ।।

ṣaḍasratryasravṛttādermadhye syāccaturasrakaṃ | khāte vāstoḥ samaṃ pṛṣṭhe nyāse brahmaśilātmake ||

शाषाकस्य निवेशे च मूर्तिसंस्थापने तथा । पायसेन तु नैवेद्यं सर्वेषां वा प्रदापयेत ।।

śāṣākasya niveśe ca mūrtisaṃsthāpane tathā | pāyasena tu naivedyaṃ sarveṣāṃ vā pradāpayet ||

उक्तानुक्ते तु वै वास्तुः पञ्चहस्तप्रमाणतः । गृहप्रासादमानेन वास्तुः श्रेष्ठस्तु सर्वदा ।।

uktānukte tu vai vāstuḥ pañcahastapramāṇataḥ | gṛhaprāsādamānena vāstuḥ śreṣṭhastu sarvadā ||