चण्डी विंशतिबाहुः स्याद्बिभ्रती दक्षिणैः करः । शूलासिशक्तिचक्राणि पाशं खेटायुधाभयं ।।

caṇḍī viṃśatibāhuḥ syādbibhratī dakṣiṇaiḥ karaḥ | śūlāsiśakticakrāṇi pāśaṃ kheṭāyudhābhayaṃ ||

डमरुं शक्तिकां वामैर नागपाशञ्च खेटकं । कुठाङ्कुशचापांश च घण्टाध्वजगदांस तथा ।।

ḍamaruṃ śaktikāṃ vāmair nāgapāśañca kheṭakaṃ | kuṭhāṅkuśacāpāṃś ca ghaṇṭādhvajagadāṃs tathā ||

आदर्शमुद्गरान हस्तैश चण्डी वा दशबाहुका । तदधो महिषश्छिन्नमूर्धा पतितमस्तकः ।।

ādarśamudgarān hastaiś caṇḍī vā daśabāhukā | tadadho mahiṣaśchinnamūrdhā patitamastakaḥ ||

शस्त्रोद्यतकरः क्रुद्धस्तद्ग्रीवासम्भवः पुमान । शूलहस्तो वमद्रक्तो रक्तस्रङ्मूर्धजेक्षणः ।।

śastrodyatakaraḥ kruddhastadgrīvāsambhavaḥ pumān | śūlahasto vamadrakto raktasraṅmūrdhajekṣaṇaḥ ||

सिंहेनास्वाद्यमानस्तु पाशबद्धो गले भृशं । याम्याङ्घ्य्राक्रान्तसिंहा च सव्याङ्घ्रिर्नीचगासुरे ।।

siṃhenāsvādyamānastu pāśabaddho gale bhṛśaṃ | yāmyāṅghyrākrāntasiṃhā ca savyāṅghrirnīcagāsure ||

चण्डिकेयं त्रिनेत्रा च सशस्त्रा रिपुमर्दनी । नवपद्मात्मके स्थाने पूज्या दुर्गा स्वमूर्तितः ।।

caṇḍikeyaṃ trinetrā ca saśastrā ripumardanī | navapadmātmake sthāne pūjyā durgā svamūrtitaḥ ||

आदौ मध्ये तथेन्द्रादौ नवातत्त्वात्मभिः क्रमात । अष्टादशभुजैका तु दक्षे मुण्डं च खेटकं ।।

ādau madhye tathendrādau navātattvātmabhiḥ kramāt | aṣṭādaśabhujaikā tu dakṣe muṇḍaṃ ca kheṭakaṃ ||

आदर्शतर्जनीचापं ध्वजं डमरुकं तथा । पाशं वामे बिभ्रती च शक्तिमुद्गरशूलकं ।।

ādarśatarjanīcāpaṃ dhvajaṃ ḍamarukaṃ tathā | pāśaṃ vāme bibhratī ca śaktimudgaraśūlakaṃ ||

वज्रखड्गाङ्कुशशरान चक्रन्देवी शलाकया । एतैर एवायुधैर युक्ता शेषाः षोडशबहुकाः ।।

vajrakhaḍgāṅkuśaśarān cakrandevī śalākayā | etair evāyudhair yuktā śeṣāḥ ṣoḍaśabahukāḥ ||

डमरुं तर्जनीं त्यक्त्वा रुद्रचण्डादयो नव । रुद्रचण्डा प्रचण्डा च चण्डोग्रा चण्डनायिका ।।

ḍamaruṃ tarjanīṃ tyaktvā rudracaṇḍādayo nava | rudracaṇḍā pracaṇḍā ca caṇḍogrā caṇḍanāyikā ||

चण्डा चण्दवती चैव चण्डरूपातिचण्डिका । उग्रचण्डा च मध्यस्था रोचनाभारुणासिता ।।

caṇḍā caṇdavatī caiva caṇḍarūpāticaṇḍikā | ugracaṇḍā ca madhyasthā rocanābhāruṇāsitā ||

नीला शुक्ला धूम्रिका च पीता श्वेता च सिंहगाः । महिषोथ पुमान शस्त्री तत्कचग्रहमुष्टिकाः ।।

nīlā śuklā dhūmrikā ca pītā śvetā ca siṃhagāḥ | mahiṣotha pumān śastrī tatkacagrahamuṣṭikāḥ ||

आलीढा नव दुर्गाः स्युः स्थाप्याः पुत्रादिवृद्धये । तथा गौरी च चण्डिकाद्या कुण्ड्यक्षररदाग्निधृक ।।

ālīḍhā nava durgāḥ syuḥ sthāpyāḥ putrādivṛddhaye | tathā gaurī ca caṇḍikādyā kuṇḍyakṣararadāgnidhṛk ||

सैव रम्भा वने सिद्धाग्निहीना ललिता तथा । स्कन्धमूर्धकरा वामे द्वितीये धृतदर्पणा ।।

saiva rambhā vane siddhāgnihīnā lalitā tathā | skandhamūrdhakarā vāme dvitīye dhṛtadarpaṇā ||

याम्ये फलाञ्जलिहस्ता सौभाग्या तत्र चोर्ध्विका । लक्ष्मीर्याम्यकराम्भोजा वामे श्रीफलसंयुता ।।

yāmye phalāñjalihastā saubhāgyā tatra cordhvikā | lakṣmīryāmyakarāmbhojā vāme śrīphalasaṃyutā ||

पुस्ताक्षमालिकाहस्ता वीणाहस्ता सरस्वती । कुम्भाब्जहस्ता श्वेताभा मकरोपरि जाह्नवी ।।

pustākṣamālikāhastā vīṇāhastā sarasvatī | kumbhābjahastā śvetābhā makaropari jāhnavī ||

कूर्मगा यमुना कुम्भकरा श्यामा च पूज्यते । सवीणस्तुम्बुरुः शुक्लः शूली मात्रग्रतो वृषे ।।

kūrmagā yamunā kumbhakarā śyāmā ca pūjyate | savīṇastumburuḥ śuklaḥ śūlī mātragrato vṛṣe ||

गौरी चतुर्मुखी ब्राह्मी अक्षमालासुरान्विता । कुण्डक्षपात्रिणी वामे हंसगा शाङ्करी सिता ।।

gaurī caturmukhī brāhmī akṣamālāsurānvitā | kuṇḍakṣapātriṇī vāme haṃsagā śāṅkarī sitā ||

शरचापौ दक्षिणे ऽस्या वामे चक्रं धनुर्वृषे । कौमारी शिखिगा रक्ता शक्तिहस्ता द्विबाहुका ।।

śaracāpau dakṣiṇe 'syā vāme cakraṃ dhanurvṛṣe | kaumārī śikhigā raktā śaktihastā dvibāhukā ||

चक्रशङ्खधरा सव्ये वामे लक्ष्मीर्गदाब्जधृक । दण्डशङ्खासि गदया वाराहो महिषस्थिता ।।

cakraśaṅkhadharā savye vāme lakṣmīrgadābjadhṛk | daṇḍaśaṅkhāsi gadayā vārāho mahiṣasthitā ||

ऐन्द्री वामे वज्रहस्ता सहस्राक्षी तु सिद्धये । चामुण्डा कोटराघ्नी स्यान्निर्मांसा तु त्रिलोचना ।।

aindrī vāme vajrahastā sahasrākṣī tu siddhaye | cāmuṇḍā koṭarāghnī syānnirmāṃsā tu trilocanā ||

निर्मांसा अस्थिसारा वा ऊर्ध्वकेशी कृशोदरी । द्वीपचर्मधरा वामे कपालं पट्टिशङ्करे ।।

nirmāṃsā asthisārā vā ūrdhvakeśī kṛśodarī | dvīpacarmadharā vāme kapālaṃ paṭṭiśaṅkare ||

शूलं कर्त्री दक्षणे ऽस्याः शवारूढास्थितभूषणा । विनायको नराकारो वृहत्कुक्षिर्गजाननः ।।

śūlaṃ kartrī dakṣaṇe 'syāḥ śavārūḍhāsthitabhūṣaṇā | vināyako narākāro vṛhatkukṣirgajānanaḥ ||

वृहच्छुण्डो ह्य उपवीतो मुखं सप्तकलं भवेत । विस्ताराद्दैर्घ्यतचैव शुण्डं षट्त्रिंशदङ्गुलं ।।

vṛhacchuṇḍo hy upavīto mukhaṃ saptakalaṃ bhavet | vistārāddairghyatacaiva śuṇḍaṃ ṣaṭtriṃśadaṅgulaṃ ||

कला द्वादश नाडी तु ग्रीवा सार्धकलोच्छ्रिता । षट्त्रिंशदङ्गुलं कण्ठं गुह्यमध्यर्धमङ्गुलं ।।

kalā dvādaśa nāḍī tu grīvā sārdhakalocchritā | ṣaṭtriṃśadaṅgulaṃ kaṇṭhaṃ guhyamadhyardhamaṅgulaṃ ||

नाभिरूरू द्वादशञ्च जङ्घे पादे तु दक्षिणे । स्वदन्तं परशुं वामे लड्डुकञ्चोत्पलं शये ।।

nābhirūrū dvādaśañca jaṅghe pāde tu dakṣiṇe | svadantaṃ paraśuṃ vāme laḍḍukañcotpalaṃ śaye ||

सुमुखी च विडालाक्षी पार्श्वे स्कन्दो मयूरगः । स्वामी शाखो विशाखश च द्विभुजो बालरूपधृक ।।

sumukhī ca viḍālākṣī pārśve skando mayūragaḥ | svāmī śākho viśākhaś ca dvibhujo bālarūpadhṛk ||

दक्षे शक्तिः कुक्कुटोथ एकवक्त्रोथ षण्मुखः । षड्भुजो वा द्वादशभिर्ग्रामेरण्ये द्विबाहुकः ।।

dakṣe śaktiḥ kukkuṭotha ekavaktrotha ṣaṇmukhaḥ | ṣaḍbhujo vā dvādaśabhirgrāmeraṇye dvibāhukaḥ ||

शक्तीषुपाशनिस्त्रिंशतोत्रदोस्तर्जनीयुतः । शक्त्या दाक्षिणहस्तेषु षट्सु वामे करे तथा ।।

śaktīṣupāśanistriṃśatotradostarjanīyutaḥ | śaktyā dākṣiṇahasteṣu ṣaṭsu vāme kare tathā ||

शिखिपिच्छन्धनुः खेटं पताकाभयकुक्कुटे । कपालकर्तरीशूलपाशभृद्याम्यसौम्ययोः ।।

śikhipicchandhanuḥ kheṭaṃ patākābhayakukkuṭe | kapālakartarīśūlapāśabhṛdyāmyasaumyayoḥ ||

गजचर्मभृदूर्ध्वास्यपादा स्यात रुद्रचर्चिका । सैव चाष्टभुजा देवी शिरोडमरुकान्विता ।।

gajacarmabhṛdūrdhvāsyapādā syāt rudracarcikā | saiva cāṣṭabhujā devī śiroḍamarukānvitā ||

तेन सा रुद्रचामुण्डा नाटेश्वर्यथ नृत्यती । इयमेव महालक्ष्मीरुपविष्टा चतुर्मुखी ।।

tena sā rudracāmuṇḍā nāṭeśvaryatha nṛtyatī | iyameva mahālakṣmīrupaviṣṭā caturmukhī ||

नृवाजिमहिषेभांश च खादन्ती च करे स्थितान । दशबाहुस्त्रिनेत्रा च शस्त्रासिडमरुत्रिकं ।।

nṛvājimahiṣebhāṃś ca khādantī ca kare sthitān | daśabāhustrinetrā ca śastrāsiḍamarutrikaṃ ||

बिभ्रती दक्षिणे हस्ते वामे घण्टां च खेटकं । खट्वाङ्गं च त्रिशूलञ्च सिद्धचामुण्डकाह्वया ।।

bibhratī dakṣiṇe haste vāme ghaṇṭāṃ ca kheṭakaṃ | khaṭvāṅgaṃ ca triśūlañca siddhacāmuṇḍakāhvayā ||

सिद्धयोगेश्वरी देवी सर्वसिद्धप्रदायिका । एतद्रूपा भवेदन्या पाशाङ्कुशयुतारुणा ।।

siddhayogeśvarī devī sarvasiddhapradāyikā | etadrūpā bhavedanyā pāśāṅkuśayutāruṇā ||

भैरवी रूपविद्या तु भुजैर द्वादशभिर्युता । एताः श्मशानजा रौद्रा अम्बाष्टकमिदं स्मृतं ।।

bhairavī rūpavidyā tu bhujair dvādaśabhiryutā | etāḥ śmaśānajā raudrā ambāṣṭakamidaṃ smṛtaṃ ||

क्षमा शिवावृता वृद्धा द्विभुजा विवृतानना । दन्तुरा क्षेमकरी स्याद्भूमौ जानुकरा स्थिता ।।

kṣamā śivāvṛtā vṛddhā dvibhujā vivṛtānanā | danturā kṣemakarī syādbhūmau jānukarā sthitā ||

यक्षिण्यस्तब्धदीर्घाक्षाः शाकिन्यो वक्रदृष्टयः । पिङ्गाक्षाः स्युर्महारम्या रूपिण्योप्सरसः सदा ।।

yakṣiṇyastabdhadīrghākṣāḥ śākinyo vakradṛṣṭayaḥ | piṅgākṣāḥ syurmahāramyā rūpiṇyopsarasaḥ sadā ||

साक्षमाली त्रिशूली च नन्दीशो द्वारपालकः । महाकालोसिमुण्डी स्याच्छूलखटकवांस तथा ।।

sākṣamālī triśūlī ca nandīśo dvārapālakaḥ | mahākālosimuṇḍī syācchūlakhaṭakavāṃs tathā ||

कृशो भङ्गी च नृत्यन वै कुष्माण्डस्थूलखर्ववान । गजगोकर्णवक्त्राद्या वीरभद्रादयो गणाः ।।

kṛśo bhaṅgī ca nṛtyan vai kuṣmāṇḍasthūlakharvavān | gajagokarṇavaktrādyā vīrabhadrādayo gaṇāḥ ||

घण्टाकर्णोष्टदशदोः पापरोगं विदारयन । वज्रासिदण्डचक्रेषुमुषलाङ्कुशमुद्गरान ।।

ghaṇṭākarṇoṣṭadaśadoḥ pāparogaṃ vidārayan | vajrāsidaṇḍacakreṣumuṣalāṅkuśamudgarān ||

दक्षिणे तर्जनीं खेटं शक्तिं मुण्डञ्च पाशकं । चापं घण्टां कुठारञ्च द्वाभ्याञ्चैव त्रिशूलकं । घण्टामालाकुलो देवो विस्फोटकविमर्दनः ।।

dakṣiṇe tarjanīṃ kheṭaṃ śaktiṃ muṇḍañca pāśakaṃ | cāpaṃ ghaṇṭāṃ kuṭhārañca dvābhyāñcaiva triśūlakaṃ | ghaṇṭāmālākulo devo visphoṭakavimardanaḥ ||