प्रासादं सम्प्रवक्ष्यामि सर्वसाधारणं शृणु । चतुरस्रीकृतं क्षेत्रं भजेत षोडशधा बुधः ।।

prāsādaṃ sampravakṣyāmi sarvasādhāraṇaṃ śṛṇu | caturasrīkṛtaṃ kṣetraṃ bhajet ṣoḍaśadhā budhaḥ ||

मध्ये तस्य चतुर्भिस्तु कुर्यादायसमन्वितं । द्वदशैव तु भागानि भित्त्यर्थं परिकल्पयेत ।।

madhye tasya caturbhistu kuryādāyasamanvitaṃ | dvadaśaiva tu bhāgāni bhittyarthaṃ parikalpayet ||

जङ्घोच्छ्रायन्तु कर्तव्यं चतुर्भागेण चायतं । जङ्घायां द्विगुणोच्छ्रायं मञ्जर्याः कल्पयेद बुधः ।।

jaṅghocchrāyantu kartavyaṃ caturbhāgeṇa cāyataṃ | jaṅghāyāṃ dviguṇocchrāyaṃ mañjaryāḥ kalpayed budhaḥ ||

तुर्यभागेन मञ्जर्याः कार्यः सम्यक प्रदक्षिणः । तन्माननिर्गमं कार्यमुभयोः पार्श्वयोः समं ।।

turyabhāgena mañjaryāḥ kāryaḥ samyak pradakṣiṇaḥ | tanmānanirgamaṃ kāryamubhayoḥ pārśvayoḥ samaṃ ||

शिखरेण समं कार्यमग्रे जगति विस्तरं । द्विगुणेनापि कर्तव्यं यथाशोभानुरूपतः ।।

śikhareṇa samaṃ kāryamagre jagati vistaraṃ | dviguṇenāpi kartavyaṃ yathāśobhānurūpataḥ ||

विस्तारान्मण्डपस्याग्रे गर्भसूत्रद्वयेन तु । दैर्घ्यात्पादाधिकं कुर्यान्मध्यस्तम्भैर विभूषितं ।।

vistārānmaṇḍapasyāgre garbhasūtradvayena tu | dairghyātpādādhikaṃ kuryānmadhyastambhair vibhūṣitaṃ ||

प्रासादगर्भमानं वा कुर्वीत मुखमण्डपं । एकाशीतिपदैर व्यास्तुं पश्चात मण्डपमारभेत ।।

prāsādagarbhamānaṃ vā kurvīta mukhamaṇḍapaṃ | ekāśītipadair vyāstuṃ paścāt maṇḍapamārabhet ||

शुकान प्राग्द्वारविन्यासे पादान्तःस्थान यजेत सुरान । तथा प्राकारविन्यासे यजेद द्वात्रिंशदन्तगान ।।

śukān prāgdvāravinyāse pādāntaḥsthān yajet surān | tathā prākāravinyāse yajed dvātriṃśadantagān ||

सर्वसाधारणं चैतत प्रासादस्य च लक्षणं । मानेन प्रतिमाया वा प्रासादमपरं शृणु ।।

sarvasādhāraṇaṃ caitat prāsādasya ca lakṣaṇaṃ | mānena pratimāyā vā prāsādamaparaṃ śṛṇu ||

प्रतिमायाः प्रमाणन कर्तव्या पिण्डिका शुभा । गर्भस्तु पिण्डिकार्धेन गर्भमानास्तु भित्तयः ।।

pratimāyāḥ pramāṇana kartavyā piṇḍikā śubhā | garbhastu piṇḍikārdhena garbhamānāstu bhittayaḥ ||

भित्तेरायाममानेन उत्सेधन्तु प्रकल्पयेत । भित्त्युच्छ्रायात्तु द्विगुणं शिखरं कल्पयेद बुधः ।।

bhitterāyāmamānena utsedhantu prakalpayet | bhittyucchrāyāttu dviguṇaṃ śikharaṃ kalpayed budhaḥ ||

शिखरस्य तु तुर्येण भ्रमणं परिकल्पयेत । शिखरस्य चतुर्थेन व्यग्रतो मुखमण्डपं ।।

śikharasya tu turyeṇa bhramaṇaṃ parikalpayet | śikharasya caturthena vyagrato mukhamaṇḍapaṃ ||

अष्टमांसेन गर्भस्य रथकानान्तु निर्गमः । परिधेर्गुणभागेन रथकांस्तत्र कल्पयेत ।।

aṣṭamāṃsena garbhasya rathakānāntu nirgamaḥ | paridherguṇabhāgena rathakāṃstatra kalpayet ||

तत्तृतीयेण वा कुर्याद्रथकानान्तु निर्गमं । वामत्रयं स्थापनीयं रथकत्रितये सदा ।।

tattṛtīyeṇa vā kuryādrathakānāntu nirgamaṃ | vāmatrayaṃ sthāpanīyaṃ rathakatritaye sadā ||

शिखरार्थं हि सूत्राणि चत्वारि विनिपातयेत । शुकनाशोर्ध्वतः सूत्रं तिर्यग्भूतं निपातयेत ।।

śikharārthaṃ hi sūtrāṇi catvāri vinipātayet | śukanāśordhvataḥ sūtraṃ tiryagbhūtaṃ nipātayet ||

शिखरस्यार्धभागस्थं सिंहं तत्र तु कारयेत । शुकनासां स्थिरीकृत्य मध्यसन्धौ निधापयेत ।।

śikharasyārdhabhāgasthaṃ siṃhaṃ tatra tu kārayet | śukanāsāṃ sthirīkṛtya madhyasandhau nidhāpayet ||

अपरे च तथा पार्श्वं तद्वत सूत्रं निधापयेत । तदूर्ध्वन्तु भवेद्वेदी सकण्टा मनसारकं ।।

apare ca tathā pārśvaṃ tadvat sūtraṃ nidhāpayet | tadūrdhvantu bhavedvedī sakaṇṭā manasārakaṃ ||

स्कन्धभग्नं न कर्तव्यं विकरालं तथैव च । ऊर्ध्वं च वेदिकामानात कलशं परिकल्पयेत ।।

skandhabhagnaṃ na kartavyaṃ vikarālaṃ tathaiva ca | ūrdhvaṃ ca vedikāmānāt kalaśaṃ parikalpayet ||

विस्ताराद्द्विगुणं द्वारं कर्तव्यं तु सुशोभनं । उदुम्बरौ तदूर्ध्वञ्च न्यसेच्छाखां सुमङ्गलैः ।।

vistārāddviguṇaṃ dvāraṃ kartavyaṃ tu suśobhanaṃ | udumbarau tadūrdhvañca nyasecchākhāṃ sumaṅgalaiḥ ||

द्वारस्य तु चतुर्थांशे कार्यौ चण्डप्रचण्दकौ । विश्वक्सेनवत्सदण्डौ शिखोर्ध्वोडुम्बरे श्रियं ।।

dvārasya tu caturthāṃśe kāryau caṇḍapracaṇdakau | viśvaksenavatsadaṇḍau śikhordhvoḍumbare śriyaṃ ||

दिग्गजैः स्नाप्यमानान्तां घटेः साब्जां सुरूपिकां । प्रासादस्य चतुर्थांशैः प्राकारस्योच्छ्रयो भवेत ।।

diggajaiḥ snāpyamānāntāṃ ghaṭeḥ sābjāṃ surūpikāṃ | prāsādasya caturthāṃśaiḥ prākārasyocchrayo bhavet ||

प्रासादात पादहीनस्तु गोपुरस्योच्छ्रयो भवेत । पञ्चहस्तस्य देवस्य एकहस्ता तु पीठिका ।।

prāsādāt pādahīnastu gopurasyocchrayo bhavet | pañcahastasya devasya ekahastā tu pīṭhikā ||

गारुडं मण्डपञ्चाग्रे एकं भौमादिधाम च । कुर्याद्धि प्रतिमायान्तु दिक्षु चाष्टमासु चोपरि ।।

gāruḍaṃ maṇḍapañcāgre ekaṃ bhaumādidhāma ca | kuryāddhi pratimāyāntu dikṣu cāṣṭamāsu copari ||

पूर्वे वराहं दक्षे च नृसिंहं श्रीधरं जले । उत्तरे तु हयग्रीवनाग्नेय्यां जामदग्न्यकं ।।

pūrve varāhaṃ dakṣe ca nṛsiṃhaṃ śrīdharaṃ jale | uttare tu hayagrīvanāgneyyāṃ jāmadagnyakaṃ ||

नैरृत्यां रामकं वायौ वामनं वासुदेवकं । ईशे प्रासादरचना देया वस्वर्ककादिभिः । द्वारस्य चाष्टमाद्यंशं त्यत्का बेधो न दोषभाक ।।

nairṛtyāṃ rāmakaṃ vāyau vāmanaṃ vāsudevakaṃ | īśe prāsādaracanā deyā vasvarkakādibhiḥ | dvārasya cāṣṭamādyaṃśaṃ tyatkā bedho na doṣabhāk ||