[Description of the harem of Ravana.] तस्यालयवरिष्ठस्य मध्ये विपुलमायतं। ददर्श भवनश्रेष्ठं हनुमान्मारुतात्मजः।।

[Description of the harem of Ravana.] tasyālayavariṣṭhasya madhyē vipulamāyataṅ. dadarśa bhavanaśrēṣṭhaṅ hanumānmārutātmajaḥ৷৷

अर्धयोजनविस्तीर्णमायतं योजनं हि तत्। भवनं राक्षसेन्द्रस्य बहुप्रासादसङ्कुलम्।।

ardhayōjanavistīrṇamāyataṅ yōjanaṅ hi tat. bhavanaṅ rākṣasēndrasya bahuprāsādasaṅkulam৷৷

मार्गमाणस्तु वैदेहीं सीतामायतलोचनाम्। सर्वतः परिचक्राम हनूमानरिसूदनः।।

mārgamāṇastu vaidēhīṅ sītāmāyatalōcanām. sarvataḥ paricakrāma hanūmānarisūdanaḥ৷৷

उत्तमं राक्षसावासं हनुमानवलोकयन्। आससादाथ लक्ष्मीवान् राक्षसेन्द्रनिवेशनम्।।

uttamaṅ rākṣasāvāsaṅ hanumānavalōkayan. āsasādātha lakṣmīvān rākṣasēndranivēśanam৷৷

।। चतुर्विषाणैर्द्विरदैस्त्रिविषाणैस्तथैव च। परिक्षिप्तमसम्बाधं रक्ष्यमाणमुदायुधैः।।

৷৷ caturviṣāṇairdviradaistriviṣāṇaistathaiva ca. parikṣiptamasambādhaṅ rakṣyamāṇamudāyudhaiḥ৷৷

राक्षसीभिश्च पत्नीभी रावणस्य निवेशनम्। आहृताभिश्च विक्रम्य राजकन्याभिरावृतम्।।

rākṣasībhiśca patnībhī rāvaṇasya nivēśanam. āhṛtābhiśca vikramya rājakanyābhirāvṛtam৷৷

।। तन्नक्रमकराकीर्णं तिमिङ्गिलझषाकुलम्। वायुवेगसमाधूतं पन्नगैरिव सागरम्।।

৷৷ tannakramakarākīrṇaṅ timiṅgilajhaṣākulam. vāyuvēgasamādhūtaṅ pannagairiva sāgaram৷৷

या हि वैश्रवणे लक्ष्मीर्या चेन्द्रे हरिवाहने। सा रावणगृहे सर्वा नित्यमेवानपायिनी।।

yā hi vaiśravaṇē lakṣmīryā cēndrē harivāhanē. sā rāvaṇagṛhē sarvā nityamēvānapāyinī৷৷

या च राज्ञः कुबेरस्य यमस्य वरुणस्य च। तादृशी तद्विशिष्टा वा ऋद्धी रक्षोगृहेष्विह।।

yā ca rājñaḥ kubērasya yamasya varuṇasya ca. tādṛśī tadviśiṣṭā vā ṛddhī rakṣōgṛhēṣviha৷৷

तस्य हर्म्यस्य मध्यस्थं वेश्म चान्यत्सुनिर्मितं। बहुनिर्यूहसङ्कीर्णं ददर्श पवनात्मजः।।

tasya harmyasya madhyasthaṅ vēśma cānyatsunirmitaṅ. bahuniryūhasaṅkīrṇaṅ dadarśa pavanātmajaḥ৷৷

ब्रह्मणोऽर्थे कृतं दिव्यं दिवि यद्विश्वकर्मणा। विमानं पुष्पकं नाम सर्वरत्नविभूषितम्।।

brahmaṇō.rthē kṛtaṅ divyaṅ divi yadviśvakarmaṇā. vimānaṅ puṣpakaṅ nāma sarvaratnavibhūṣitam৷৷

।। परेण तपसा लेभे यत्कुबेरः पितामहात्। कुबेरमोजसा जित्वा लेभे तद्राक्षसेश्वरः।।

৷৷ parēṇa tapasā lēbhē yatkubēraḥ pitāmahāt. kubēramōjasā jitvā lēbhē tadrākṣasēśvaraḥ৷৷

ईहामृगसमायुक्त्तै: कार्तस्वरहिरमण्मयैः। सुकृतैराचितं स्तम्भैः प्रदीप्तमिव च श्रिया।।

īhāmṛgasamāyukttai: kārtasvarahiramaṇmayaiḥ. sukṛtairācitaṅ stambhaiḥ pradīptamiva ca śriyā৷৷

।। मेरुमन्दरसङ्काशैरुल्लिखद्भिरिवाम्बरं। कूटागारैश्शुभाकारैस्सर्वतस्समलङ्कृतम्।।

৷৷ mērumandarasaṅkāśairullikhadbhirivāmbaraṅ. kūṭāgāraiśśubhākāraissarvatassamalaṅkṛtam৷৷

ज्वलनार्कप्रतीकाशं सुकृतं विश्वकर्मणा। हेमसोपानसंयुक्तं चारुप्रवरवेदिकम्।।

jvalanārkapratīkāśaṅ sukṛtaṅ viśvakarmaṇā. hēmasōpānasaṅyuktaṅ cārupravaravēdikam৷৷

जालवातायनैर्युक्तं काञ्चनैः स्स्फाटिकैरपि। इन्द्रनीलमहानीलमणिप्रवरवेदिकम्।।

jālavātāyanairyuktaṅ kāñcanaiḥ ssphāṭikairapi. indranīlamahānīlamaṇipravaravēdikam৷৷

विद्रुमेण विचित्रेण मणिभिश्च महाघनैः। निस्तुलाभिश्च मुक्ताभिस्तलेनाभिविराजितम्।।

vidrumēṇa vicitrēṇa maṇibhiśca mahāghanaiḥ. nistulābhiśca muktābhistalēnābhivirājitam৷৷

चन्दनेन च रक्तेन तपनीयनिभेन च। सुपुण्यगन्धिना युक्तमादित्यतरुणोपमम्।।

candanēna ca raktēna tapanīyanibhēna ca. supuṇyagandhinā yuktamādityataruṇōpamam৷৷

कूटागारैर्वराकारैर्विविधैस्समलङ्कृतम्। विमानं पुष्पकं दिव्यमारुरोह महाकपिः।।

kūṭāgārairvarākārairvividhaissamalaṅkṛtam. vimānaṅ puṣpakaṅ divyamārurōha mahākapiḥ৷৷

तत्रस्थस्स तदा गन्धं पानभक्ष्यान्नसम्भवम्। दिव्यं सम्मूर्छितं जिघ्रद्रूपवन्तमिवानिलम्।।

tatrasthassa tadā gandhaṅ pānabhakṣyānnasambhavam. divyaṅ sammūrchitaṅ jighradrūpavantamivānilam৷৷

स गन्धस्तं महासत्त्वं बन्धुर्बन्धुमिवोत्तमम्। इत एहीत्युवाचेन तत्र यत्र स रावणः।।

sa gandhastaṅ mahāsattvaṅ bandhurbandhumivōttamam. ita ēhītyuvācēna tatra yatra sa rāvaṇaḥ৷৷

ततस्तां प्रस्थितश्शालां ददर्श महतीं शुभाम्। रावणस्य मनः कान्तां कान्तामिव वरस्त्रियम्।।

tatastāṅ prasthitaśśālāṅ dadarśa mahatīṅ śubhām. rāvaṇasya manaḥ kāntāṅ kāntāmiva varastriyam৷৷

मणिसोपानविकृतां हेमजालविभूषिताम्। स्फाटिकैरावृततलां दन्तान्तरितरूपिकाम्।।

maṇisōpānavikṛtāṅ hēmajālavibhūṣitām. sphāṭikairāvṛtatalāṅ dantāntaritarūpikām৷৷

मुक्ताभिश्च प्रवालैश्च रूप्यचामीकरैरपि। विभूषितां मणिस्तम्भैस्सुबहुस्तम्भभूषिताम्।।

muktābhiśca pravālaiśca rūpyacāmīkarairapi. vibhūṣitāṅ maṇistambhaissubahustambhabhūṣitām৷৷

नम्रैरृजुभिरत्युच्चैस्समन्तात्सुविभूषितैः। स्तम्भै: पक्षैरिवात्युच्चैर्दिवं संप्रस्थितामिव।।

namrairṛjubhiratyuccaissamantātsuvibhūṣitaiḥ. stambhai: pakṣairivātyuccairdivaṅ saṅprasthitāmiva৷৷

महत्या कुथयास्तीर्णां पृथिवीलक्षणाङ्कया। पृथिवीमिव विस्तीर्णां सराष्ट्रगृहमालिनीम्।।

mahatyā kuthayāstīrṇāṅ pṛthivīlakṣaṇāṅkayā. pṛthivīmiva vistīrṇāṅ sarāṣṭragṛhamālinīm৷৷

नादितां मत्तविहगैर्दिव्यगन्धाधिवासिताम्। परार्ध्यास्तरणोपेतां रक्षोधिपनिषेविताम्।।

nāditāṅ mattavihagairdivyagandhādhivāsitām. parārdhyāstaraṇōpētāṅ rakṣōdhipaniṣēvitām৷৷

धूम्रामगरुधूपेन विमलां हंसपाण्डुराम्। चित्रां पुष्पोपहारेण कल्माषीमिव सुप्रभाम्।।

dhūmrāmagarudhūpēna vimalāṅ haṅsapāṇḍurām. citrāṅ puṣpōpahārēṇa kalmāṣīmiva suprabhām৷৷

मनस्संह्लादजननीं वर्णस्यापि प्रसादिनीम्। तां शोकनाशिनीं दिव्यां श्रियः सञ्जननीमिव।।

manassaṅhlādajananīṅ varṇasyāpi prasādinīm. tāṅ śōkanāśinīṅ divyāṅ śriyaḥ sañjananīmiva৷৷

इन्द्रियाणीन्द्रियार्थैस्तु पञ्च पञ्चभिरुत्तमैः। तर्पयामास मातेव तदा रावणपालिता।।

indriyāṇīndriyārthaistu pañca pañcabhiruttamaiḥ. tarpayāmāsa mātēva tadā rāvaṇapālitā৷৷

स्वर्गोऽयं देवलोकोऽयमिन्द्रस्येयं पुरी भवेत्। सिद्धिर्वेयं परा हि स्यादित्यमन्यत मारुतिः।।

svargō.yaṅ dēvalōkō.yamindrasyēyaṅ purī bhavēt. siddhirvēyaṅ parā hi syādityamanyata mārutiḥ৷৷

प्रध्यायत इवापश्यत्प्रदीपांस्तत्र काञ्चनान्। धूर्तानिव महाधूतैर्देवनेन पराजितान्।।

pradhyāyata ivāpaśyatpradīpāṅstatra kāñcanān. dhūrtāniva mahādhūtairdēvanēna parājitān৷৷

दीपानां च प्रकाशेन तेजसा रावणस्य च। अर्चिर्भिर्भूषणानां च प्रदीप्तेत्यभ्यमन्यत।।

dīpānāṅ ca prakāśēna tējasā rāvaṇasya ca. arcirbhirbhūṣaṇānāṅ ca pradīptētyabhyamanyata৷৷

ततोऽपश्यत्कुथाऽऽसीनं नानावरायम्बरस्रजम्। सहस्रं वरनारीणां नानावेषविभूषितम्।।

tatō.paśyatkuthā৷৷sīnaṅ nānāvarāyambarasrajam. sahasraṅ varanārīṇāṅ nānāvēṣavibhūṣitam৷৷

परिवृत्तेऽर्धरात्रे तु पाननिद्रावशं गतम्। क्रीडित्वोपरतं रात्रौ सुष्वाप बलवत्तदा।।

parivṛttē.rdharātrē tu pānanidrāvaśaṅ gatam. krīḍitvōparataṅ rātrau suṣvāpa balavattadā৷৷

तत्प्रसुप्तं विरुरुचे निश्शब्दान्तरभूषणम्। निःशब्दहंसभ्रमरं यथा पद्मवनं महत्।।

tatprasuptaṅ virurucē niśśabdāntarabhūṣaṇam. niḥśabdahaṅsabhramaraṅ yathā padmavanaṅ mahat৷৷

तासां संवृतदन्तानि मीलिताक्षीणि मारुतिः। अपश्यत्पद्मगन्धीनि वदनानि सुयोषिताम्।।

tāsāṅ saṅvṛtadantāni mīlitākṣīṇi mārutiḥ. apaśyatpadmagandhīni vadanāni suyōṣitām৷৷

प्रबुद्धानीव पद्मानि तासां भूत्वा क्षपाक्षये। पुनस्संवृतपत्राणि रात्राविव बभुस्तदा।।

prabuddhānīva padmāni tāsāṅ bhūtvā kṣapākṣayē. punassaṅvṛtapatrāṇi rātrāviva babhustadā৷৷

इमानि मुखपद्मानि नियतं मत्तषट्पदाः। अम्बुजानीव फुल्लानि प्रार्थयन्ति पुनः पुनः।।

imāni mukhapadmāni niyataṅ mattaṣaṭpadāḥ. ambujānīva phullāni prārthayanti punaḥ punaḥ৷৷

इति चामन्यत श्रीमानुपपत्त्या महाकपिः। मेने हि गुणतस्तानि समानि सलिलोद्भवैः।।

iti cāmanyata śrīmānupapattyā mahākapiḥ. mēnē hi guṇatastāni samāni salilōdbhavaiḥ৷৷

सा तस्य शुशुभे शाला ताभिस्त्रीभिर्विराजिता। शारदीव प्रसन्ना द्यौस्ताराभिरभिशोभिता।।

sā tasya śuśubhē śālā tābhistrībhirvirājitā. śāradīva prasannā dyaustārābhirabhiśōbhitā৷৷

स च ताभिः परिवृतश्शुशुभे राक्षसाधिपः। यथा ह्युडुपतिश्शीमांस्ताराभिरभिसंवृतः।।

sa ca tābhiḥ parivṛtaśśuśubhē rākṣasādhipaḥ. yathā hyuḍupatiśśīmāṅstārābhirabhisaṅvṛtaḥ৷৷

याश्च्यवन्तेऽम्बरात्ताराः पुण्यशेषसमावृताः। इमास्तास्सङ्गताः कृत्स्ना इति मेने हरिस्तदा।।

yāścyavantē.mbarāttārāḥ puṇyaśēṣasamāvṛtāḥ. imāstāssaṅgatāḥ kṛtsnā iti mēnē haristadā৷৷

ताराणामिव सुव्यक्तं महतीनां शुभार्चिषाम्। प्रभावर्णप्रसादाश्च विरेजुस्तत्र योषिताम्।।

tārāṇāmiva suvyaktaṅ mahatīnāṅ śubhārciṣām. prabhāvarṇaprasādāśca virējustatra yōṣitām৷৷

व्यावृत्तगुरुपीनस्रक्प्रकीर्णवरभूषणाः। पानव्यायामकालेषु निद्रापहृतचेतसः।।

vyāvṛttagurupīnasrakprakīrṇavarabhūṣaṇāḥ. pānavyāyāmakālēṣu nidrāpahṛtacētasaḥ৷৷

व्यावृत्ततिलकाः काश्चित्काश्चिदुद्भ्रन्तनूपुराः। पार्श्वे गलितहाराश्च काश्चित्परमयोषितः।।

vyāvṛttatilakāḥ kāścitkāścidudbhrantanūpurāḥ. pārśvē galitahārāśca kāścitparamayōṣitaḥ৷৷

मुक्ताहाराऽवृताश्चान्याः काश्चिद्विस्रस्तवाससः। व्याविद्धरशनादामाः किशोर्य इव वाहिताः।।

muktāhārā.vṛtāścānyāḥ kāścidvisrastavāsasaḥ. vyāviddharaśanādāmāḥ kiśōrya iva vāhitāḥ৷৷

सुकुण्डलधराश्चान्या विच्छिन्नमृदितस्रजः। गजेन्द्रमृदिताः फुल्ला लता इव महावने।।

sukuṇḍaladharāścānyā vicchinnamṛditasrajaḥ. gajēndramṛditāḥ phullā latā iva mahāvanē৷৷

चन्द्रांशुकिरणाभाश्च हाराः कासांचिदुत्कटाः। हंसा इव बभुस्सुप्ताः स्तनमध्येषु योषिताम्।।

candrāṅśukiraṇābhāśca hārāḥ kāsāṅcidutkaṭāḥ. haṅsā iva babhussuptāḥ stanamadhyēṣu yōṣitām৷৷

अपरासां च वैडूर्याः कादम्बा इव पक्षिणः। हेमसूत्राणि चान्यासां चक्रवाका इवाभवन्।।

aparāsāṅ ca vaiḍūryāḥ kādambā iva pakṣiṇaḥ. hēmasūtrāṇi cānyāsāṅ cakravākā ivābhavan৷৷

हंसकारण्डवाकीर्णाश्चक्रवाकोपशोभिताः। आपगा इव ता रेजुर्जघनैः पुलिनैरिव।।

haṅsakāraṇḍavākīrṇāścakravākōpaśōbhitāḥ. āpagā iva tā rējurjaghanaiḥ pulinairiva৷৷

किङ्किणीजालसङ्कोशास्ता हैमविपुलाम्बुजाः। भावग्राहा यशस्तीराः सुप्ता नद्य इवाऽऽबभुः।।

kiṅkiṇījālasaṅkōśāstā haimavipulāmbujāḥ. bhāvagrāhā yaśastīrāḥ suptā nadya ivā৷৷babhuḥ৷৷

मृदुष्वङ्गेषु कासाञ्चित्कुचाग्रेषु च संस्थिताः। बभुर्वर्भूषणानीव शुभा भूषणराजयः।।

mṛduṣvaṅgēṣu kāsāñcitkucāgrēṣu ca saṅsthitāḥ. babhurvarbhūṣaṇānīva śubhā bhūṣaṇarājayaḥ৷৷

अंशुकान्ताश्च कासाञ्चिन्मुखमारुतकम्पिताः। उपर्युपरि वक्त्राणां व्याधूयन्ते पुनः पुनः।।

aṅśukāntāśca kāsāñcinmukhamārutakampitāḥ. uparyupari vaktrāṇāṅ vyādhūyantē punaḥ punaḥ৷৷

ताः पताका इवोद्धूताः पत्नीनां रुचिरप्रभाः। नानावर्णसुवर्णानां वक्त्रमूलेषु रेजिरे।।

tāḥ patākā ivōddhūtāḥ patnīnāṅ ruciraprabhāḥ. nānāvarṇasuvarṇānāṅ vaktramūlēṣu rējirē৷৷

ववल्गुश्चात्र कासांचित्कुण्डलानि शुभार्चिषाम्। मुखमारुतसंसर्गान्मन्दं मन्दं सुयोषिताम्।।

vavalguścātra kāsāṅcitkuṇḍalāni śubhārciṣām. mukhamārutasaṅsargānmandaṅ mandaṅ suyōṣitām৷৷

शर्कराऽसवगन्धैश्च प्रकृत्या सुरभिः सुखः। तासां वदननिश्वासस्सिषेवे रावणं तदा।।

śarkarā.savagandhaiśca prakṛtyā surabhiḥ sukhaḥ. tāsāṅ vadananiśvāsassiṣēvē rāvaṇaṅ tadā৷৷

रावणाननशङ्काश्च काश्चिद्रावणयोषितः। मुखानि स्म सपत्नीनामुपाजिघ्रन्पुनः पुनः।।

rāvaṇānanaśaṅkāśca kāścidrāvaṇayōṣitaḥ. mukhāni sma sapatnīnāmupājighranpunaḥ punaḥ৷৷

अत्यर्थं सक्तमनसो रावणे ता वरस्त्रियः। अस्वतन्त्राः सपत्नीनां प्रियमेवाऽचरंस्तदा।।

atyarthaṅ saktamanasō rāvaṇē tā varastriyaḥ. asvatantrāḥ sapatnīnāṅ priyamēvā.caraṅstadā৷৷

बाहूनुपनिधायान्याः पारिहार्यविभूषितान्। अंशुकानि च रम्याणि प्रमदास्तत्र शिश्यिरे।।

bāhūnupanidhāyānyāḥ pārihāryavibhūṣitān. aṅśukāni ca ramyāṇi pramadāstatra śiśyirē৷৷

अन्या वक्षसि चान्यस्यास्तस्याः काचित्पुनर्भुजम्। अपरा त्वङ्कमन्यस्यास्तस्याश्चाप्यपरा भुजौ।।

anyā vakṣasi cānyasyāstasyāḥ kācitpunarbhujam. aparā tvaṅkamanyasyāstasyāścāpyaparā bhujau৷৷

ऊरुपार्श्वकटीपृष्ठमन्योन्यस्य समाश्रिताः। परस्परनिविष्टाङ्ग्यो मदस्नेहवशानुगाः।।

ūrupārśvakaṭīpṛṣṭhamanyōnyasya samāśritāḥ. parasparaniviṣṭāṅgyō madasnēhavaśānugāḥ৷৷

अन्योन्यभुजसूत्रेण स्त्रीमाला ग्रथिता हि सा। मालेव ग्रथिता सूत्रे शुशुभे मत्तषट्पदा।।

anyōnyabhujasūtrēṇa strīmālā grathitā hi sā. mālēva grathitā sūtrē śuśubhē mattaṣaṭpadā৷৷

लतानां माधवे मासि फुल्लानां वायुसेवनात्। अन्योन्य मालाग्रथितं संसक्तकुसुमोच्चयम्।।

latānāṅ mādhavē māsi phullānāṅ vāyusēvanāt. anyōnya mālāgrathitaṅ saṅsaktakusumōccayam৷৷

।। व्यतिवेष्टितसुस्कन्धमन्योन्यभ्रमराकुलम्। आसीद्वनमिवोद्धूतं स्त्रीवनं रावणस्य तत्।।

৷৷ vyativēṣṭitasuskandhamanyōnyabhramarākulam. āsīdvanamivōddhūtaṅ strīvanaṅ rāvaṇasya tat৷৷

उचितेष्वपि सुव्यक्तं न तासां योषितां तदा। विवेकः शक्य आधातुं भूषणाङ्गाम्बरस्रजाम्।।

ucitēṣvapi suvyaktaṅ na tāsāṅ yōṣitāṅ tadā. vivēkaḥ śakya ādhātuṅ bhūṣaṇāṅgāmbarasrajām৷৷

रावणे सुखसंविष्टे तास्त्रियो विविधप्रभाः। ज्वलन्तः काञ्चना दीपाः प्रैक्षन्तानिमिषा इव।।

rāvaṇē sukhasaṅviṣṭē tāstriyō vividhaprabhāḥ. jvalantaḥ kāñcanā dīpāḥ praikṣantānimiṣā iva৷৷

राजर्षिपितृदैत्यानां गन्धर्वाणां च योषितः। राक्षसानां च याः कन्यास्तस्य कामवशं गताः।।

rājarṣipitṛdaityānāṅ gandharvāṇāṅ ca yōṣitaḥ. rākṣasānāṅ ca yāḥ kanyāstasya kāmavaśaṅ gatāḥ৷৷

युद्धकामेन ताः सर्वा रावणेन हृताः स्त्रियः। समदा मदनेनैव मोहिताः काश्चिदागताः।।

yuddhakāmēna tāḥ sarvā rāvaṇēna hṛtāḥ striyaḥ. samadā madanēnaiva mōhitāḥ kāścidāgatāḥ৷৷

न तत्र काचित्प्रमदा प्रसह्य वीर्योपपन्नेन गुणेन लब्धा। न चान्यकामापि न चान्यपूर्वा विना वरार्हां जनकात्मजां ताम्।।

na tatra kācitpramadā prasahya vīryōpapannēna guṇēna labdhā. na cānyakāmāpi na cānyapūrvā vinā varārhāṅ janakātmajāṅ tām৷৷

न चाकुलीना न च हीनरूपा नादक्षिणा नानुपचारयुक्ता। भार्याभवत्तस्य न हीनसत्त्वा न चापि कान्तस्य न कामनीया।।

na cākulīnā na ca hīnarūpā nādakṣiṇā nānupacārayuktā. bhāryābhavattasya na hīnasattvā na cāpi kāntasya na kāmanīyā৷৷

बभूव बुद्धिस्तु हरीश्वरस्य यदीदृशी राघवधर्मपत्नी। इमा यथा राक्षसराजभार्याः सुजातमस्येति हि साधुबुद्धेः।।

babhūva buddhistu harīśvarasya yadīdṛśī rāghavadharmapatnī. imā yathā rākṣasarājabhāryāḥ sujātamasyēti hi sādhubuddhēḥ৷৷

पुनश्च सोऽचिन्तयादात्तरूपो ध्रुवं विशिष्टा गुणतो हि सीता। अथायमस्यां कृतवान्महात्मा लङ्केश्वरः कष्टमनार्यकर्म।।

punaśca sō.cintayādāttarūpō dhruvaṅ viśiṣṭā guṇatō hi sītā. athāyamasyāṅ kṛtavānmahātmā laṅkēśvaraḥ kaṣṭamanāryakarma৷৷