ततः पक्षिनिनादेन वृक्षभङ्गस्वनेन च। बभूवुस्त्राससम्भ्रान्तास्सर्वे लङ्कानिवासिनः।।

tataḥ pakṣininādēna vṛkṣabhaṅgasvanēna ca. babhūvustrāsasambhrāntāssarvē laṅkānivāsinaḥ৷৷

विद्रुताश्च भयत्रस्ता विनेदुर्मृगपक्षिणः। रक्षसां च निमित्तानि क्रूराणि प्रतिपेदिरे।।

vidrutāśca bhayatrastā vinēdurmṛgapakṣiṇaḥ. rakṣasāṅ ca nimittāni krūrāṇi pratipēdirē৷৷

ततो गतायां निद्रायां राक्षस्यो विकृताननाः। तद्वनं ददृशुर्भग्नं तं च वीरं महाकपिम्।।

tatō gatāyāṅ nidrāyāṅ rākṣasyō vikṛtānanāḥ. tadvanaṅ dadṛśurbhagnaṅ taṅ ca vīraṅ mahākapim৷৷

स ता दृष्ट्वा महाबाहुर्महासत्त्वो महाबलः। चकार सुमहद्रूपं राक्षसीनां भयावहम्।।

sa tā dṛṣṭvā mahābāhurmahāsattvō mahābalaḥ. cakāra sumahadrūpaṅ rākṣasīnāṅ bhayāvaham৷৷

ततस्तं गिरिसङ्काशमतिकायं महाबलम्। राक्षस्यो वानरं दृष्ट्वा पप्रच्छुर्जनकात्मजाम्।।

tatastaṅ girisaṅkāśamatikāyaṅ mahābalam. rākṣasyō vānaraṅ dṛṣṭvā papracchurjanakātmajām৷৷

कोऽयं कस्य कुतो वायं किं निमित्तमिहागतः। कथं त्वया सहानेन संवादः कृत इत्युत।।

kō.yaṅ kasya kutō vāyaṅ kiṅ nimittamihāgataḥ. kathaṅ tvayā sahānēna saṅvādaḥ kṛta ityuta৷৷

आचक्ष्व नो विशालाक्षि मा भूत्ते सुभगे भयम्। संवादमसितापाङ्गे त्वया किं कृतवानयम्।।

ācakṣva nō viśālākṣi mā bhūttē subhagē bhayam. saṅvādamasitāpāṅgē tvayā kiṅ kṛtavānayam৷৷

अथाब्रवीन्महासाध्वी सीता सर्वाङ्गसुन्दरी। रक्षसां भीमरूपाणां विज्ञाने मम का गतिः।।

athābravīnmahāsādhvī sītā sarvāṅgasundarī. rakṣasāṅ bhīmarūpāṇāṅ vijñānē mama kā gatiḥ৷৷

यूयमेवाभिजानीत योऽयं यद्वा करिष्यति। अहिरेव ह्यहेः पादान्विजानाति न संशयः।।

yūyamēvābhijānīta yō.yaṅ yadvā kariṣyati. ahirēva hyahēḥ pādānvijānāti na saṅśayaḥ৷৷

अहमप्यस्य भीतास्मि नैनं जानामि को न्वयं। वेद्मि राक्षसमेवैनं कामरूपिणमागतम्।।

ahamapyasya bhītāsmi nainaṅ jānāmi kō nvayaṅ. vēdmi rākṣasamēvainaṅ kāmarūpiṇamāgatam৷৷

वैदेह्या वचनं श्रुत्वा राक्षस्यो विद्रुता दिशः। स्थिताः काश्चिद्गताः काश्चिद्रावणाय निवेदितुम्।।

vaidēhyā vacanaṅ śrutvā rākṣasyō vidrutā diśaḥ. sthitāḥ kāścidgatāḥ kāścidrāvaṇāya nivēditum৷৷

रावणस्य समीपे तु राक्षस्यो विकृताननाः। विरूपं वानरं भीममाख्यातुमुपचक्रमुः।।

rāvaṇasya samīpē tu rākṣasyō vikṛtānanāḥ. virūpaṅ vānaraṅ bhīmamākhyātumupacakramuḥ৷৷

अशोकवनिकामध्ये राजन्भीमवपुः कपिः। सीतया कृतसंवादस्तिष्ठत्यमितविक्रमः।।

aśōkavanikāmadhyē rājanbhīmavapuḥ kapiḥ. sītayā kṛtasaṅvādastiṣṭhatyamitavikramaḥ৷৷

न च तं जानकी सीता हरिं हरिणलोचना। अस्माभिर्बहुधा पृष्टा निवेदयितुमिच्छति।।

na ca taṅ jānakī sītā hariṅ hariṇalōcanā. asmābhirbahudhā pṛṣṭā nivēdayitumicchati৷৷

वासवस्य भवेद्दूतो दूतो वैश्रवणस्य वा। प्रेषितो वापि रामेण सीतान्वेषणकाङ्क्षया।।

vāsavasya bhavēddūtō dūtō vaiśravaṇasya vā. prēṣitō vāpi rāmēṇa sītānvēṣaṇakāṅkṣayā৷৷

तेन त्वद्भुतरूपेण यत्तत्तव मनोहरम्। नानामृगगणाकीर्णं प्रमृष्टं प्रमदावनम्।।

tēna tvadbhutarūpēṇa yattattava manōharam. nānāmṛgagaṇākīrṇaṅ pramṛṣṭaṅ pramadāvanam৷৷

न तत्र कश्चिदुद्देशो यस्तेन न विनाशितः। यत्र सा जानकी सीता स तेन न विनाशितः।।

na tatra kaściduddēśō yastēna na vināśitaḥ. yatra sā jānakī sītā sa tēna na vināśitaḥ৷৷

जानकीरक्षणार्थं वा श्रमाद्वा नोपलभ्यते। अथवा कश्श्रमस्तस्य सैव तेनाभिरक्षिता।।

jānakīrakṣaṇārthaṅ vā śramādvā nōpalabhyatē. athavā kaśśramastasya saiva tēnābhirakṣitā৷৷

चारुपल्लवपुष्पाढ्यं यं सीता स्वयमास्थिता। प्रवृद्धश्शिंशुपावृक्ष स्स च तेनाभिरक्षितः।।

cārupallavapuṣpāḍhyaṅ yaṅ sītā svayamāsthitā. pravṛddhaśśiṅśupāvṛkṣa ssa ca tēnābhirakṣitaḥ৷৷

तस्योग्ररूपस्योग्र त्वं दण्डमाज्ञातुमर्हसि। सीता सम्भाषिता येन तद्वनं च विनाशितम्।।

tasyōgrarūpasyōgra! tvaṅ daṇḍamājñātumarhasi. sītā sambhāṣitā yēna tadvanaṅ ca vināśitam৷৷

मनः परिगृहीतां तां तव रक्षोगणेश्वर। कस्सीतामभिभाषेत यो न स्यात्त्यक्तजीवितः।।

manaḥ parigṛhītāṅ tāṅ tava rakṣōgaṇēśvara. kassītāmabhibhāṣēta yō na syāttyaktajīvitaḥ৷৷

राक्षसीनां वचश्त्रुत्वा रावणो राक्षसेश्वरः। हुताग्निरिव जज्वाल कोपसंवर्तितेक्षणः।।

rākṣasīnāṅ vacaśtrutvā rāvaṇō rākṣasēśvaraḥ. hutāgniriva jajvāla kōpasaṅvartitēkṣaṇaḥ৷৷

तस्य क्रुद्धस्य नेत्राभ्यां प्रापतन्नास्रबिन्दवः। दीप्ताभ्यामिव दीपाभ्यां सार्चिष स्स्नेहबिन्दवः।।

tasya kruddhasya nētrābhyāṅ prāpatannāsrabindavaḥ. dīptābhyāmiva dīpābhyāṅ sārciṣa ssnēhabindavaḥ৷৷

आत्मनस्सदृशान्शूरान्किङ्करान्नाम राक्षसान्। व्यादिदेश महातेजा निग्रहार्थं हनूमतः।।

ātmanassadṛśānśūrānkiṅkarānnāma rākṣasān. vyādidēśa mahātējā nigrahārthaṅ hanūmataḥ৷৷

तेषामशीतिसाहस्रं किङ्कराणां तरस्विनाम्। निर्ययुर्भवनात्तस्मात्कूटमुद्गरपाणयः।।

tēṣāmaśītisāhasraṅ kiṅkarāṇāṅ tarasvinām. niryayurbhavanāttasmātkūṭamudgarapāṇayaḥ৷৷

।। महोदरा महादंष्ट्रा घोररूपा महाबलाः। युद्धाभिमनसस्सर्वे हनुमद्ग्रहणोद्यताः।।

৷৷ mahōdarā mahādaṅṣṭrā ghōrarūpā mahābalāḥ. yuddhābhimanasassarvē hanumadgrahaṇōdyatāḥ৷৷

ते कपीन्द्रं समासाद्य तोरणस्थमवस्थितम्। अभिपेतुर्महावेगाः पतङ्गा इव पावकम्।।

tē kapīndraṅ samāsādya tōraṇasthamavasthitam. abhipēturmahāvēgāḥ pataṅgā iva pāvakam৷৷

ते गदाभिर्विचित्राभिः परिघैः काञ्चनाङ्गदैः। आजघ्नुर्वानरश्रेष्ठं शरैश्चादित्यसन्निभैः।।

tē gadābhirvicitrābhiḥ parighaiḥ kāñcanāṅgadaiḥ. ājaghnurvānaraśrēṣṭhaṅ śaraiścādityasannibhaiḥ৷৷

मुद्गरैः पट्टिशैश्शूलैः प्रासतोमरशक्तिभिः। परिवार्य हनूमन्तं सहसा तस्थुरग्रतः।।

mudgaraiḥ paṭṭiśaiśśūlaiḥ prāsatōmaraśaktibhiḥ. parivārya hanūmantaṅ sahasā tasthuragrataḥ৷৷

हनुमानपि तेजस्वी श्रीमान्पर्वतसन्निभः। क्षितावाविध्य लाङ्गूलं ननाद च महास्वनम्।।

hanumānapi tējasvī śrīmānparvatasannibhaḥ. kṣitāvāvidhya lāṅgūlaṅ nanāda ca mahāsvanam৷৷

स भूत्वा सुमहाकायो हनुमान्मारुतात्मजः। धृष्टमास्फोटयामास लङ्कां शब्देन पूरयन्।।

sa bhūtvā sumahākāyō hanumānmārutātmajaḥ. dhṛṣṭamāsphōṭayāmāsa laṅkāṅ śabdēna pūrayan৷৷

तस्यास्फोटितशब्देन महता सानुनादिना। पेतुर्विहङ्गा गगनादुच्चैश्चेदमघोषयत्।।

tasyāsphōṭitaśabdēna mahatā sānunādinā. pēturvihaṅgā gaganāduccaiścēdamaghōṣayat৷৷

जयत्यतिबलो रामो लक्ष्मणश्च महाबलः। राजा जयति सुग्रीवो राघवेणाभिपालितः।।

jayatyatibalō rāmō lakṣmaṇaśca mahābalaḥ. rājā jayati sugrīvō rāghavēṇābhipālitaḥ৷৷

दासोऽहं कोसलेन्द्रस्य रामस्याक्लिष्टकर्मणः। हनुमान्शत्रुसैन्यानां निहन्ता मारुतात्मजः।।

dāsō.haṅ kōsalēndrasya rāmasyākliṣṭakarmaṇaḥ. hanumānśatrusainyānāṅ nihantā mārutātmajaḥ৷৷

न रावणसहस्रं मे युद्धे प्रतिबलं भवेत्। शिलाभिस्तु प्रहरतः पादपैश्च सहस्रशः।।

na rāvaṇasahasraṅ mē yuddhē pratibalaṅ bhavēt. śilābhistu praharataḥ pādapaiśca sahasraśaḥ৷৷

अर्दयित्वा पुरीं लङ्कामभिवाद्य च मैथिलीम्। समृद्धार्थो गमिष्यामि मिषतां सर्वरक्षसाम्।।

ardayitvā purīṅ laṅkāmabhivādya ca maithilīm. samṛddhārthō gamiṣyāmi miṣatāṅ sarvarakṣasām৷৷

तस्य सन्नादशब्देन तेऽभवन्भयशङ्किताः। ददृशुश्च हनूमन्तं सन्ध्यामेघमिवोन्नतम्।।

tasya sannādaśabdēna tē.bhavanbhayaśaṅkitāḥ. dadṛśuśca hanūmantaṅ sandhyāmēghamivōnnatam৷৷

स्वामिसन्देशनिश्शङ्कास्ततस्ते राक्षसाः कपिम्। चित्रैः प्रहरणैर्भीमैरभिपेतुस्ततस्ततः।।

svāmisandēśaniśśaṅkāstatastē rākṣasāḥ kapim. citraiḥ praharaṇairbhīmairabhipētustatastataḥ৷৷

स तैः परिवृतश्शूरैस्सर्वतस्सुमहाबलः। आससादाऽयसं भीमं परिघं तोरणाश्रितम्।।

sa taiḥ parivṛtaśśūraissarvatassumahābalaḥ. āsasādā.yasaṅ bhīmaṅ parighaṅ tōraṇāśritam৷৷

स तं परिघमादाय जघान रजनीचरान्। स पन्नगमिवादाय स्फुरन्तं विनतासुतः।।

sa taṅ parighamādāya jaghāna rajanīcarān. sa pannagamivādāya sphurantaṅ vinatāsutaḥ৷৷

स हत्वा राक्षसान्वीरान्किङ्करान्मारुतात्मजः।।

sa hatvā rākṣasānvīrānkiṅkarānmārutātmajaḥ৷৷

ततस्तस्माद्भयान्मुक्ताः कतिचित्तत्र राक्षसाः।।

tatastasmādbhayānmuktāḥ katicittatra rākṣasāḥ৷৷

स राक्षसानां निहतं महद्बलं निशम्य राजा परिवृत्तलोचनः। समादिदेशाप्रतिमं पराक्रमे प्रहस्तपुत्रं समरे सुदुर्जयम्।।

sa rākṣasānāṅ nihataṅ mahadbalaṅ niśamya rājā parivṛttalōcanaḥ. samādidēśāpratimaṅ parākramē prahastaputraṅ samarē sudurjayam৷৷