तौ कबन्धेन तं मार्गं पम्पाया दर्शितं वने। प्रतस्थतुर्दिशं गृह्य प्रतीचीं नृवरात्मजौ।।

tau kabandhēna taṅ mārgaṅ pampāyā darśitaṅ vanē. pratasthaturdiśaṅ gṛhya pratīcīṅ nṛvarātmajau৷৷

तौ शैलेष्वाचितानेकान् क्षौद्रकल्पफलान्द्रुमान्। वीक्षन्तौ जग्मतुर्ध्रष्टुं सुग्रीवं रामलक्ष्मणौ।।

tau śailēṣvācitānēkān kṣaudrakalpaphalāndrumān. vīkṣantau jagmaturdhraṣṭuṅ sugrīvaṅ rāmalakṣmaṇau৷৷

कृत्वा च शैलपृष्ठे तु तौ वासं रामलक्ष्मणौ। पम्पायाः पश्चिमं तीरं राघवावुपतस्थतुः।।

kṛtvā ca śailapṛṣṭhē tu tau vāsaṅ rāmalakṣmaṇau. pampāyāḥ paścimaṅ tīraṅ rāghavāvupatasthatuḥ৷৷

तौ पुष्करिण्याः पम्पायास्तीरमासाद्य पश्चिमम्। अपश्यतां ततस्तत्र शबर्या रम्यमाश्रमम्।।

tau puṣkariṇyāḥ pampāyāstīramāsādya paścimam. apaśyatāṅ tatastatra śabaryā ramyamāśramam৷৷

तौ तमाश्रममासाद्य द्रुमैर्बहुभीरावृतम्। सुरम्यमभिवीक्षन्तौ शबरीमभ्युपेयतुः।।

tau tamāśramamāsādya drumairbahubhīrāvṛtam. suramyamabhivīkṣantau śabarīmabhyupēyatuḥ৷৷

तौ च दृष्ट्वा तदा सिद्धा समुत्थाय कृताञ्जलिः। रामस्य पादौ जग्राह लक्ष्मणस्य च धीमतः।।

tau ca dṛṣṭvā tadā siddhā samutthāya kṛtāñjaliḥ. rāmasya pādau jagrāha lakṣmaṇasya ca dhīmataḥ৷৷

पाद्यमाचमनीयं च सर्वं प्रादाद्यथाविधि। तामुवाच ततो रामश्श्रमणीं संशितव्रताम्।।

pādyamācamanīyaṅ ca sarvaṅ prādādyathāvidhi. tāmuvāca tatō rāmaśśramaṇīṅ saṅśitavratām৷৷

कच्चित्ते निर्जिता विघ्नाः कच्चित्ते वर्धते तपः। कच्चित्ते नियतः क्रोध आहारश्च तपोधने।।

kaccittē nirjitā vighnāḥ kaccittē vardhatē tapaḥ. kaccittē niyataḥ krōdha āhāraśca tapōdhanē৷৷

कच्चित्ते नियमाः प्राप्ताः कच्चित्ते मनसः सुखम्। कच्चित्ते गुरुशुश्रूषा सफला चारुभाषिणि।।

kaccittē niyamāḥ prāptāḥ kaccittē manasaḥ sukham. kaccittē guruśuśrūṣā saphalā cārubhāṣiṇi৷৷

रामेण तापसी पृष्टा सा सिद्धा सिद्धसम्मता। शशंस शबरी वृद्धा रामाय प्रत्युपस्थिता।।

rāmēṇa tāpasī pṛṣṭā sā siddhā siddhasammatā. śaśaṅsa śabarī vṛddhā rāmāya pratyupasthitā৷৷

अद्य प्राप्ता तपस्सिद्धिस्तव संदर्शनान्मया। अद्य मे सफलं तप्तं गुरवश्च सुपूजिताः।।

adya prāptā tapassiddhistava saṅdarśanānmayā. adya mē saphalaṅ taptaṅ guravaśca supūjitāḥ৷৷

अद्य मे सफलं जन्म स्वर्गश्चैव भविष्यति। त्वयि देववरे राम पूजिते पुरुषर्षभ।।

adya mē saphalaṅ janma svargaścaiva bhaviṣyati. tvayi dēvavarē rāma pūjitē puruṣarṣabha৷৷

चक्षुषा तव सौम्येन पूतास्मि रघुनन्दन। गमिष्याम्यक्षयान्लोकांस्त्वत्प्रसादादरिन्दम।।

cakṣuṣā tava saumyēna pūtāsmi raghunandana. gamiṣyāmyakṣayānlōkāṅstvatprasādādarindama৷৷

चित्रकूटं त्वयि प्राप्ते विमानैरतुलप्रभैः। इतस्ते दिवमारूढा यानहं पर्यचारिषम्।।

citrakūṭaṅ tvayi prāptē vimānairatulaprabhaiḥ. itastē divamārūḍhā yānahaṅ paryacāriṣam৷৷

तैश्चाहमुक्ता धर्मज्ञैर्महाभागैर्महर्षिभिः। आगमिष्यति ते रामस्सुपुण्यमिममाश्रमम्।।

taiścāhamuktā dharmajñairmahābhāgairmaharṣibhiḥ. āgamiṣyati tē rāmassupuṇyamimamāśramam৷৷

।। स ते प्रतिग्रहीतव्यस्सौमित्रिसहितोतिथिः। तं च दृष्ट्वा वरान्लोकानक्षयांस्त्वं गमिष्यसि।।

৷৷ sa tē pratigrahītavyassaumitrisahitōtithiḥ. taṅ ca dṛṣṭvā varānlōkānakṣayāṅstvaṅ gamiṣyasi৷৷

मया तु विविधं वन्यं सञ्चितं पुरुषर्षभ। तवार्थे पुरुषव्याघ्र पम्पायास्तीरसम्भवम्।।

mayā tu vividhaṅ vanyaṅ sañcitaṅ puruṣarṣabha. tavārthē puruṣavyāghra pampāyāstīrasambhavam৷৷

एवमुक्तस्स धर्मात्मा शबर्या शबरीमिदम्। राघवः प्राह विज्ञाने तां नित्यमबहिष्कृताम्।।

ēvamuktassa dharmātmā śabaryā śabarīmidam. rāghavaḥ prāha vijñānē tāṅ nityamabahiṣkṛtām৷৷

दनोस्सकाशात्तत्त्वेन प्रभावं ते महात्मनः। श्रुतं प्रत्यक्षमिच्छामि सन्द्रष्टुं यदि मन्यसे।।

danōssakāśāttattvēna prabhāvaṅ tē mahātmanaḥ. śrutaṅ pratyakṣamicchāmi sandraṣṭuṅ yadi manyasē৷৷

एतत्तु वचनं श्रुत्ता रामवक्त्राद्विनिस्सृतम्। शबरी दर्शयामास तावुभौ तद्वनं महत्।।

ētattu vacanaṅ śruttā rāmavaktrādvinissṛtam. śabarī darśayāmāsa tāvubhau tadvanaṅ mahat৷৷

पश्य मेघघनप्रख्यं मृगपक्षिसमाकुलम्। मतङ्गवनमित्येव विश्रुतं रघुनन्दन।।।

paśya mēghaghanaprakhyaṅ mṛgapakṣisamākulam. mataṅgavanamityēva viśrutaṅ raghunandana৷৷.

इह ते भावितात्मानो गुरवो मे महावने। जुहवाञ्चक्रिरे तीर्थं मन्त्रवन्मन्त्रपूजितम्।।

iha tē bhāvitātmānō guravō mē mahāvanē. juhavāñcakrirē tīrthaṅ mantravanmantrapūjitam৷৷

इयं प्रत्यक्थ्सली वेदिर्यत्र ते मे सुसत्कृताः। पुष्पोपहारं कुर्वन्ति श्रमादुद्वेपिभिः करैः।।

iyaṅ pratyakthsalī vēdiryatra tē mē susatkṛtāḥ. puṣpōpahāraṅ kurvanti śramādudvēpibhiḥ karaiḥ৷৷

तेषां तपःप्रभावेण पश्याद्यापि रघूद्वह। द्योतयन्ति दिशस्सर्वाश्श्रिया वेद्योऽतुलप्रभाः।।

tēṣāṅ tapaḥprabhāvēṇa paśyādyāpi raghūdvaha. dyōtayanti diśassarvāśśriyā vēdyō.tulaprabhāḥ৷৷

अशक्नुवद्भिस्तैर्गन्तुमुपवासश्रमालसैः। चिन्तितेऽभ्यागतान्पश्य सहितान्सप्तसागरान्।।

aśaknuvadbhistairgantumupavāsaśramālasaiḥ. cintitē.bhyāgatānpaśya sahitānsaptasāgarān৷৷

कृताभिषेकैस्तैर्न्यस्ता वल्कलाः पादपेष्विह। अद्यापि नावशुष्यन्ति प्रदेशे रघुनन्दन।।

kṛtābhiṣēkaistairnyastā valkalāḥ pādapēṣviha. adyāpi nāvaśuṣyanti pradēśē raghunandana৷৷

देवकार्याणि कुर्वद्भिर्यानीमानि कृतानि वै। पुष्पैःकुवलयैस्सार्धं म्लानत्वं नोपयान्तिवै।।

dēvakāryāṇi kurvadbhiryānīmāni kṛtāni vai. puṣpaiḥkuvalayaissārdhaṅ mlānatvaṅ nōpayāntivai৷৷

कृत्स्नं वनमिदं दृष्टं श्रोतव्यं च श्रुतं त्वया। तदिच्छाम्यभ्यनुज्ञाता त्यक्तुमेतत्कलेबरम्।।

kṛtsnaṅ vanamidaṅ dṛṣṭaṅ śrōtavyaṅ ca śrutaṅ tvayā. tadicchāmyabhyanujñātā tyaktumētatkalēbaram৷৷

तेषामिच्छाम्यहं गन्तुं समीपं भावितात्मनाम्। मुनीनामाश्रमो येषामहं च परिचारिणी।।

tēṣāmicchāmyahaṅ gantuṅ samīpaṅ bhāvitātmanām. munīnāmāśramō yēṣāmahaṅ ca paricāriṇī৷৷

धर्मिष्ठं तु वचश्श्रुत्वा राघवस्सहलक्ष्मणः। प्रहर्षमतुलं लेभे आश्चर्यमिति तत्त्वतः।।

dharmiṣṭhaṅ tu vacaśśrutvā rāghavassahalakṣmaṇaḥ. praharṣamatulaṅ lēbhē āścaryamiti tattvataḥ৷৷

तामुवाच ततो रामश्श्रमणीं संशितव्रताम्। अर्चितोऽहं त्वया भक्त्या गच्छकामं यथासुखम्।।

tāmuvāca tatō rāmaśśramaṇīṅ saṅśitavratām. arcitō.haṅ tvayā bhaktyā gacchakāmaṅ yathāsukham৷৷

इत्युक्ता जटिला वृद्धा चीरकृष्णाजिनाम्बरा। तस्मिन्मुहूर्ते शबरी देहं जीर्णं जिहासती।।

ityuktā jaṭilā vṛddhā cīrakṛṣṇājināmbarā. tasminmuhūrtē śabarī dēhaṅ jīrṇaṅ jihāsatī৷৷

।। अनुज्ञाता तु रामेण हुत्वात्मानं हुताशने। ज्वलत्पावकसङ्काशा स्वर्गमेव जगाम सा।।

৷৷ anujñātā tu rāmēṇa hutvātmānaṅ hutāśanē. jvalatpāvakasaṅkāśā svargamēva jagāma sā৷৷

दिव्याभरणसंयुक्ता दिव्यमाल्यानुलेपना। दिव्याम्बरधरा तत्र बभूव प्रियदर्शना।।

divyābharaṇasaṅyuktā divyamālyānulēpanā. divyāmbaradharā tatra babhūva priyadarśanā৷৷

यत्र ते सुकृतात्मानो विहरन्ति महर्षयः।।

yatra tē sukṛtātmānō viharanti maharṣayaḥ৷৷