ततश्शूर्पणखां रामः कामपाशावपाशिताम्। स्वच्छया श्लक्ष्णया वाचा स्मितपूर्वमथाब्रवीत्।।

tataśśūrpaṇakhāṅ rāmaḥ kāmapāśāvapāśitām. svacchayā ślakṣṇayā vācā smitapūrvamathābravīt৷৷

कृतदारोऽस्मि भवति भार्येयं दयिता मम। त्वद्विधानां तु नारीणां सुदुःखा ससपत्नता।।

kṛtadārō.smi bhavati bhāryēyaṅ dayitā mama. tvadvidhānāṅ tu nārīṇāṅ suduḥkhā sasapatnatā৷৷

अनुजस्त्वेष मे भ्राता शीलवान्प्रियदर्शनः। श्रीमानकृतदारश्च लक्ष्मणो नाम वीर्यवान्।।

anujastvēṣa mē bhrātā śīlavānpriyadarśanaḥ. śrīmānakṛtadāraśca lakṣmaṇō nāma vīryavān৷৷

अपूर्वी भार्यया चार्थी तरुणः प्रियदर्शनः। अनुरूपश्च ते भर्ता रूपस्यास्य भविष्यति।।

apūrvī bhāryayā cārthī taruṇaḥ priyadarśanaḥ. anurūpaśca tē bhartā rūpasyāsya bhaviṣyati৷৷

एनं भज विशालाक्षि भर्तारं भ्रातरं मम। असपत्ना वरारोहे मेरुमर्कप्रभा यथा।।

ēnaṅ bhaja viśālākṣi bhartāraṅ bhrātaraṅ mama. asapatnā varārōhē mērumarkaprabhā yathā৷৷

इति रामेण सा प्रोक्ता राक्षसी काममोहिता। विसृज्य रामं सहसा ततो लक्ष्मणमब्रवीत्।।

iti rāmēṇa sā prōktā rākṣasī kāmamōhitā. visṛjya rāmaṅ sahasā tatō lakṣmaṇamabravīt৷৷

अस्य रूपस्य ते युक्ता भार्याहं वरवर्णिनी। मया सह सुखं सर्वान्दण्डकान्विचरिष्यसि।।

asya rūpasya tē yuktā bhāryāhaṅ varavarṇinī. mayā saha sukhaṅ sarvāndaṇḍakānvicariṣyasi৷৷

एवमुक्तस्तु सौमित्री राक्षस्या वाक्यकोविदः। ततश्शूर्पणखीं स्मित्वा लक्ष्मणो युक्तमब्रवीत्।।

ēvamuktastu saumitrī rākṣasyā vākyakōvidaḥ. tataśśūrpaṇakhīṅ smitvā lakṣmaṇō yuktamabravīt৷৷

कथं दासस्य मे दासी भार्या भवितुमिच्छसि। सोऽहमार्येण परवान्भ्रात्रा कमलवर्णिनि।।

kathaṅ dāsasya mē dāsī bhāryā bhavitumicchasi. sō.hamāryēṇa paravānbhrātrā kamalavarṇini৷৷

समृद्धार्थस्य सिद्धार्था मुदितामलवर्णिनी। आर्यस्य त्वं विशालाक्षि भार्या भव यवीयसी।।

samṛddhārthasya siddhārthā muditāmalavarṇinī. āryasya tvaṅ viśālākṣi bhāryā bhava yavīyasī৷৷

एनां विरूपामसतीं करालां निर्णतोदरीम्। भार्यां वृद्धां परित्यज्य त्वामेवैष भजिष्यति।।

ēnāṅ virūpāmasatīṅ karālāṅ nirṇatōdarīm. bhāryāṅ vṛddhāṅ parityajya tvāmēvaiṣa bhajiṣyati৷৷

को हि रूपमिदं श्रेष्ठं संत्यज्य वरवर्णिनि। मानुषीषु वरारोहे कुर्याद्भावं विचक्षणः।।

kō hi rūpamidaṅ śrēṣṭhaṅ saṅtyajya varavarṇini. mānuṣīṣu varārōhē kuryādbhāvaṅ vicakṣaṇaḥ৷৷

इति सा लक्ष्मणेनोक्ता कराला निर्णतोदरी। मन्यते तद्वचस्तथ्यं परिहासाविचक्षणा।।

iti sā lakṣmaṇēnōktā karālā nirṇatōdarī. manyatē tadvacastathyaṅ parihāsāvicakṣaṇā৷৷

सा रामं पर्णशालायामुपविष्टं परन्तपम्। सीतया सह दुर्दर्षमब्रवीत्काममोहिता।।

sā rāmaṅ parṇaśālāyāmupaviṣṭaṅ parantapam. sītayā saha durdarṣamabravītkāmamōhitā৷৷

एनां विरूपामसतीं करालां निर्णतोदरीम्। वृद्धां भार्यामवष्टभ्य मां न त्वं बहुमन्यसे।।

ēnāṅ virūpāmasatīṅ karālāṅ nirṇatōdarīm. vṛddhāṅ bhāryāmavaṣṭabhya māṅ na tvaṅ bahumanyasē৷৷

अद्येमां भक्षयिष्यामि पश्यतस्तव मानुषीम्। त्वया सह चरिष्यामि निस्सपत्ना यथासुखम्।।

adyēmāṅ bhakṣayiṣyāmi paśyatastava mānuṣīm. tvayā saha cariṣyāmi nissapatnā yathāsukham৷৷

इत्युक्त्वा मृगशाबाक्षीमलातसदृशेक्षणा। अभ्यधावत्सुसङ्कृद्धा महोल्कां रोहिणीमिव।।

ityuktvā mṛgaśābākṣīmalātasadṛśēkṣaṇā. abhyadhāvatsusaṅkṛddhā mahōlkāṅ rōhiṇīmiva৷৷

तां मृत्युपाशप्रतिमामापतन्तीं महाबलः। निगृह्य रामः कुपित स्ततो लक्ष्मणमब्रवीत्।।

tāṅ mṛtyupāśapratimāmāpatantīṅ mahābalaḥ. nigṛhya rāmaḥ kupita statō lakṣmaṇamabravīt৷৷

क्रूरैरनार्यै स्सौमित्रे परिहासः कथञ्चन। न कार्यः पश्यवैदेहीं कथञ्चित्सौम्य जीवतीम्।।

krūrairanāryai ssaumitrē parihāsaḥ kathañcana. na kāryaḥ paśyavaidēhīṅ kathañcitsaumya jīvatīm৷৷

इमां विरूपामसतीमतिमत्तां महोदरीम्। राक्षसीं पुरुषव्याघ्र विरूपयितुमर्हसि।।

imāṅ virūpāmasatīmatimattāṅ mahōdarīm. rākṣasīṅ puruṣavyāghra virūpayitumarhasi৷৷

इत्युक्तो लक्ष्मणस्तस्याः क्रुद्धो रामस्य पार्श्वतः। उद्धृत्य खङ्गं चिच्छेद कर्णनासं महाबलः।।

ityuktō lakṣmaṇastasyāḥ kruddhō rāmasya pārśvataḥ. uddhṛtya khaṅgaṅ cicchēda karṇanāsaṅ mahābalaḥ৷৷

निकृत्तकर्णनासा तु विस्वरं सा विनद्य च। यथागतं प्रदुद्राव घोरा शूर्पणखा वनम्।।

nikṛttakarṇanāsā tu visvaraṅ sā vinadya ca. yathāgataṅ pradudrāva ghōrā śūrpaṇakhā vanam৷৷

सा विरूपा महाघोरा राक्षसी शोणितोक्षिता। ननाद विविधान्नादान्यथा प्रावृषि तोयदः।।

sā virūpā mahāghōrā rākṣasī śōṇitōkṣitā. nanāda vividhānnādānyathā prāvṛṣi tōyadaḥ৷৷

सा विक्षरन्ती रुधिरं बहुधा घोरदर्शना। प्रगृह्य बाहू गर्जन्ती प्रविवेश महावनम्।।

sā vikṣarantī rudhiraṅ bahudhā ghōradarśanā. pragṛhya bāhū garjantī pravivēśa mahāvanam৷৷

ततस्तु सा राक्षससङ्घसंवृतं खरं जनस्थानगतं विरूपिता। उपेत्य तं भ्रातरमुग्रदर्शनं पपात भूमौ गगनाद्यथाऽशनिः।।

tatastu sā rākṣasasaṅghasaṅvṛtaṅ kharaṅ janasthānagataṅ virūpitā. upētya taṅ bhrātaramugradarśanaṅ papāta bhūmau gaganādyathā.śaniḥ৷৷

ततस्सभार्यं भयमोहमूर्छिता सलक्ष्मणं राघवमागतं वनम्। विरूपणं चात्मनि शोणितोक्षिता शशंस सर्वं भगिनी खरस्य सा।।

tatassabhāryaṅ bhayamōhamūrchitā salakṣmaṇaṅ rāghavamāgataṅ vanam. virūpaṇaṅ cātmani śōṇitōkṣitā śaśaṅsa sarvaṅ bhaginī kharasya sā৷৷