तां तथा दर्शयित्वा तु मैथिलीं गिरिनिम्नगाम्। निषसाद गिरिप्रस्थे सीतां मांसेन छन्दयन्।।

tāṅ tathā darśayitvā tu maithilīṅ girinimnagām. niṣasāda giriprasthē sītāṅ māṅsēna chandayan৷৷

इदं मेध्यमिदं स्वादु निष्टप्तमिदमग्निना। एवमास्ते स धर्मात्मा सीतया सह राघवः।।

idaṅ mēdhyamidaṅ svādu niṣṭaptamidamagninā. ēvamāstē sa dharmātmā sītayā saha rāghavaḥ৷৷

तथा तत्राऽसतस्तस्य भरतस्यौपयायिनः। सैन्यरेणुश्च शब्दश्च प्रादुरास्तां नभस्पृशौ।।

tathā tatrā.satastasya bharatasyaupayāyinaḥ. sainyarēṇuśca śabdaśca prādurāstāṅ nabhaspṛśau৷৷

एतस्मिन्नन्तरे त्रस्ता श्शब्देन महता ततः। अर्दिता यूथपा मत्ता स्सयूथा दुद्रुवुर्दिशः।।

ētasminnantarē trastā śśabdēna mahatā tataḥ. arditā yūthapā mattā ssayūthā dudruvurdiśaḥ৷৷

स तं सैन्यसमुद्धूतं शब्दं शुश्राव राघवः। तां श्च विप्रद्रुतान्सर्वान्यूथपानन्ववैक्षत।।

sa taṅ sainyasamuddhūtaṅ śabdaṅ śuśrāva rāghavaḥ. tāṅ śca vipradrutānsarvānyūthapānanvavaikṣata৷৷

तांश्च विद्रुवतो दृष्ट्वा तं च श्रुत्वा च निस्वनम्। उवाच राम स्सौमित्रिं लक्ष्मणं दीप्ततेजसम्।।

tāṅśca vidruvatō dṛṣṭvā taṅ ca śrutvā ca nisvanam. uvāca rāma ssaumitriṅ lakṣmaṇaṅ dīptatējasam৷৷

हन्त लक्ष्मण पश्येह सुमित्रासुप्रजास्त्वया। भीमस्तनितगम्भीरस्तुमुलः श्रूयते स्वनः।।

hanta lakṣmaṇa paśyēha sumitrāsuprajāstvayā. bhīmastanitagambhīrastumulaḥ śrūyatē svanaḥ৷৷

गजयूथानि वाऽरण्ये महिषा वा महावने। वित्रासिता मृगा स्सिंहै स्सहसा प्रद्रुता दिशः।।

gajayūthāni vā.raṇyē mahiṣā vā mahāvanē. vitrāsitā mṛgā ssiṅhai ssahasā pradrutā diśaḥ৷৷

राजा वा राजपुत्रो वा मृगयामटते वने। अन्यद्वा श्वापदं किञ्चित्सौमित्रे ज्ञातुमर्हसि।।

rājā vā rājaputrō vā mṛgayāmaṭatē vanē. anyadvā śvāpadaṅ kiñcitsaumitrē jñātumarhasi৷৷

सुदुश्चरो गिरिश्चायं पक्षिणामपि लक्ष्मण। सर्वमेतद्यथातत्त्वमचिरात् ज्ञातुमर्हसि।।

suduścarō giriścāyaṅ pakṣiṇāmapi lakṣmaṇa. sarvamētadyathātattvamacirāt jñātumarhasi৷৷

स लक्ष्मण स्सन्त्वरित स्सालमारुह्य पुष्पितम्। प्रेक्षमाणो दिश स्सर्वाः पूर्वां दिशमुदैक्षत।।

sa lakṣmaṇa ssantvarita ssālamāruhya puṣpitam. prēkṣamāṇō diśa ssarvāḥ pūrvāṅ diśamudaikṣata৷৷

उदङ्मुखः प्रेक्षमाणो ददर्श महतीं चमूम्। रथाश्वगजसम्बाधां यत्तैर्युक्तां पदातिभिः।।

udaṅmukhaḥ prēkṣamāṇō dadarśa mahatīṅ camūm. rathāśvagajasambādhāṅ yattairyuktāṅ padātibhiḥ৷৷

तामश्वगजसम्पूर्णां रथध्वजविभूषिताम्। शशंस सेनां रामाय वचनं चेदमब्रवीत्।।

tāmaśvagajasampūrṇāṅ rathadhvajavibhūṣitām. śaśaṅsa sēnāṅ rāmāya vacanaṅ cēdamabravīt৷৷

अग्निं संशमयत्वार्य स्सीता च भजतां गुहाम्। सज्यं कुरुष्व चापं च शरांश्च कवचं तथा।।

agniṅ saṅśamayatvārya ssītā ca bhajatāṅ guhām. sajyaṅ kuruṣva cāpaṅ ca śarāṅśca kavacaṅ tathā৷৷

तं रामः पुरुषव्याघ्रो लक्ष्मणं प्रत्युवाच ह। अङ्गावेक्षस्व सौमित्रे कस्येमां मन्यसे चमूम्।।

taṅ rāmaḥ puruṣavyāghrō lakṣmaṇaṅ pratyuvāca ha. aṅgāvēkṣasva saumitrē kasyēmāṅ manyasē camūm৷৷

एवमुक्तस्तु रामेण लक्ष्मणो वाक्यमब्रवीत्। दिधक्षन्निव तां सेनां रुषितः पावको यथा।।

ēvamuktastu rāmēṇa lakṣmaṇō vākyamabravīt. didhakṣanniva tāṅ sēnāṅ ruṣitaḥ pāvakō yathā৷৷

सम्पन्नं राज्यमिच्छंस्तु व्यक्तं प्राप्याभिषेचनम्। आवां हन्तुं समभ्येति कैकेय्या भरतस्सुतः।।

sampannaṅ rājyamicchaṅstu vyaktaṅ prāpyābhiṣēcanam. āvāṅ hantuṅ samabhyēti kaikēyyā bharatassutaḥ৷৷

एष वै सुमहाञ्छ्रीमान्विटपी सम्प्रकाशते। विराजत्युद्गतस्कन्धं कोविदारध्वजो रथे।।

ēṣa vai sumahāñchrīmānviṭapī samprakāśatē. virājatyudgataskandhaṅ kōvidāradhvajō rathē৷৷

असौ हि सुमहास्कन्धो विटपी च महाद्रुमः। विराजते महासैन्ये कोविदारध्वजो रथे।।

asau hi sumahāskandhō viṭapī ca mahādrumaḥ. virājatē mahāsainyē kōvidāradhvajō rathē৷৷

भजन्त्येते यथाकाममश्वानारुह्य शीघ्रगान्। एते भ्राजन्ति संहृष्टा गजानारुह्य सादिनः।।

bhajantyētē yathākāmamaśvānāruhya śīghragān. ētē bhrājanti saṅhṛṣṭā gajānāruhya sādinaḥ৷৷

गृहीतधनुषौ चावां गिरिं वीर श्रयावहै। अथवेहैव तिष्ठाव स्सन्नद्धावुद्यतायुधौ।।

gṛhītadhanuṣau cāvāṅ giriṅ vīra śrayāvahai. athavēhaiva tiṣṭhāva ssannaddhāvudyatāyudhau৷৷

अपि नौ वशमागच्छेत्कोविदारध्वजो रणे। अपि द्रक्ष्यामि भरतं यत्कृते व्यसनं महत्।।

api nau vaśamāgacchētkōvidāradhvajō raṇē. api drakṣyāmi bharataṅ yatkṛtē vyasanaṅ mahat৷৷

यन्निमित्तं भवान्राज्याच्छ्युतो राघव शाश्वतात्।।

yannimittaṅ bhavānrājyācchyutō rāghava śāśvatāt৷৷

भरतस्य वधे दोषं नाहं पश्यामि राघव। पूर्वापकारिणं हत्वा न ह्यधर्मेण युज्यते।।

bharatasya vadhē dōṣaṅ nāhaṅ paśyāmi rāghava. pūrvāpakāriṇaṅ hatvā na hyadharmēṇa yujyatē৷৷

पूर्वापकारी भरतस्त्यक्तधर्मश्च राघव। एतस्मिन्निहते कृत्स्नामनुशाधि वसुन्धराम्।।

pūrvāpakārī bharatastyaktadharmaśca rāghava. ētasminnihatē kṛtsnāmanuśādhi vasundharām৷৷

अद्य पुत्रं हतं संख्ये कैकेयी राज्यकामुका। मया पश्येत्सुदुःखार्ता हस्तिभग्नमिव द्रुमम्।।

adya putraṅ hataṅ saṅkhyē kaikēyī rājyakāmukā. mayā paśyētsuduḥkhārtā hastibhagnamiva drumam৷৷

कैकेयीं च वधिष्यामि सानुबन्धां सबान्धवाम्। कलुषेणाद्य महता मेदिनी परिमुच्यताम्।।

kaikēyīṅ ca vadhiṣyāmi sānubandhāṅ sabāndhavām. kaluṣēṇādya mahatā mēdinī parimucyatām৷৷

अद्येमं संयतं क्रोधमसत्कारं च मानद। मोक्ष्यामि शत्रुसैन्येषु कक्षेष्विव हुताशनम्।।

adyēmaṅ saṅyataṅ krōdhamasatkāraṅ ca mānada. mōkṣyāmi śatrusainyēṣu kakṣēṣviva hutāśanam৷৷

अद्यैतच्छित्रकूटस्य काननं निशितै श्शरैः। छिन्दञ्चत्रुशरीराणि करिष्ये शोणितोक्षितम्।।

adyaitacchitrakūṭasya kānanaṅ niśitai śśaraiḥ. chindañcatruśarīrāṇi kariṣyē śōṇitōkṣitam৷৷

शरैर्निर्भिन्नहृदयान्कुञ्जरांस्तुरगांस्तथा। श्वापदाः परिकर्षन्तु नरांश्च निहतान्मया।।

śarairnirbhinnahṛdayānkuñjarāṅsturagāṅstathā. śvāpadāḥ parikarṣantu narāṅśca nihatānmayā৷৷

शराणां धनुषश्चाहमनृणोऽस्मिन्महावने। ससैन्यं भरतं हत्वा भविष्यामि न संशयः।।

śarāṇāṅ dhanuṣaścāhamanṛṇō.sminmahāvanē. sasainyaṅ bharataṅ hatvā bhaviṣyāmi na saṅśayaḥ৷৷