राम दाशरथे राम वीर्यं ते श्रूयतेऽद्भुतम्। धनुषो भेदनं चैव निखिलेन मया श्रुतम्।।

rāma! dāśarathē! rāma! vīryaṅ tē śrūyatē.dbhutam. dhanuṣō bhēdanaṅ caiva nikhilēna mayā śrutam৷৷

तदद्भुतमचिन्त्यं च भेदनं धनुषस्त्वया। तच्छ्रुत्वाऽहमनुप्राप्तो धनुर्गृह्यापरं शुभम्।।

tadadbhutamacintyaṅ ca bhēdanaṅ dhanuṣastvayā. tacchrutvā.hamanuprāptō dhanurgṛhyāparaṅ śubham৷৷

तदिदं घोरसङ्काशं जामदग्न्यं महद्धनु:। पूरयस्व शरेणैव स्वबलं दर्शयस्व च।।

tadidaṅ ghōrasaṅkāśaṅ jāmadagnyaṅ mahaddhanu:. pūrayasva śarēṇaiva svabalaṅ darśayasva ca৷৷

तदहं ते बलं दृष्ट्वा धनुषोऽस्य प्रपूरणे। द्वन्द्वयुद्धं प्रदास्यामि वीर्यश्लाघ्यस्य राघव।।

tadahaṅ tē balaṅ dṛṣṭvā dhanuṣō.sya prapūraṇē. dvandvayuddhaṅ pradāsyāmi vīryaślāghyasya rāghava৷৷

तस्य तद्वचनं श्रुत्वा राजा दशरथस्तदा। विषण्णवदनो दीन: प्राञ्जलिर्वाक्यमब्रवीत्।।

tasya tadvacanaṅ śrutvā rājā daśarathastadā. viṣaṇṇavadanō dīna: prāñjalirvākyamabravīt৷৷

क्षत्ररोषात्प्रशान्तस्त्वं ब्राह्मणश्च महायशा:। बालानां मम पुत्राणामभयं दातुमर्हसि।।

kṣatrarōṣātpraśāntastvaṅ brāhmaṇaśca mahāyaśā:. bālānāṅ mama putrāṇāmabhayaṅ dātumarhasi৷৷

भार्गवाणां कुले जात: स्वाध्यायव्रतशालिनाम्। सहास्राक्षे प्रतिज्ञाय शस्त्रं निक्षिप्तवानसि।।

bhārgavāṇāṅ kulē jāta: svādhyāyavrataśālinām. sahāsrākṣē pratijñāya śastraṅ nikṣiptavānasi৷৷

स त्वं धर्मपरो भूत्वा काश्यपाय वसुन्धराम् । दत्त्वा वनमुपागम्य महेन्द्रकृतकेतन:।।

sa tvaṅ dharmaparō bhūtvā kāśyapāya vasundharām . dattvā vanamupāgamya mahēndrakṛtakētana:৷৷

मम सर्वविनाशाय सम्प्राप्तस्त्वं महामुने। न चैकस्मिन् हते रामे सर्वे जीवामहे वयम् ।।

mama sarvavināśāya samprāptastvaṅ mahāmunē. na caikasmin hatē rāmē sarvē jīvāmahē vayam ৷৷

ब्रुवत्येवं दशरथे जामदग्न्य: प्रतापवान्। अनादृत्यैव तद्वाक्यं राममेवाभ्यभाषत।।

bruvatyēvaṅ daśarathē jāmadagnya: pratāpavān. anādṛtyaiva tadvākyaṅ rāmamēvābhyabhāṣata৷৷

इमे द्वे धनुषी श्रेष्ठे दिव्ये लोकाभिविश्रुते। दृढे बलवती मुख्ये सुकृते विश्वकर्मणा।।

imē dvē dhanuṣī śrēṣṭhē divyē lōkābhiviśrutē. dṛḍhē balavatī mukhyē sukṛtē viśvakarmaṇā৷৷

अतिसृष्टं सुरैरेकं त्र्यम्बकाय युयुत्सवे। त्रिपुरघ्नं नरश्रेष्ठ भग्नं काकुत्स्थ यत्त्वया।।

atisṛṣṭaṅ surairēkaṅ tryambakāya yuyutsavē. tripuraghnaṅ naraśrēṣṭha! bhagnaṅ kākutstha! yattvayā৷৷

इदं द्वितीयं दुर्धर्षं विष्णोर्दत्तं सुरोत्तमै:। तदिदं वैष्णवं राम धनु: परमभास्वरम्। समानसारं काकुत्स्थ रौद्रेण धनुषा त्विदम्।।

idaṅ dvitīyaṅ durdharṣaṅ viṣṇōrdattaṅ surōttamai:. tadidaṅ vaiṣṇavaṅ rāma! dhanu: paramabhāsvaram. samānasāraṅ kākutstha! raudrēṇa dhanuṣā tvidam৷৷

तदा तु देवतास्सर्वा: पृच्छन्ति स्म पितामहम्। शितिकण्ठस्य विष्णोश्च बलाबलनिरीक्षया।।

tadā tu dēvatāssarvā: pṛcchanti sma pitāmaham. śitikaṇṭhasya viṣṇōśca balābalanirīkṣayā৷৷

अभिप्रायं तु विज्ञाय देवतानां पितामह:। विरोधं जनयामास तयो स्सत्यवतां वर:।।

abhiprāyaṅ tu vijñāya dēvatānāṅ pitāmaha:. virōdhaṅ janayāmāsa tayō ssatyavatāṅ vara:৷৷

विरोधे च महद्युद्धमभवद्रोमहर्षणम् । शितिकण्ठस्य विष्णोश्च परस्परजिगीषुणो:।।

virōdhē ca mahadyuddhamabhavadrōmaharṣaṇam . śitikaṇṭhasya viṣṇōśca parasparajigīṣuṇō:৷৷

तदा तु जृम्भितं शैवं धनुर्भीमपराक्रमम्। हुङ्कारेण महादेव स्तम्भितोऽथ त्रिलोचन:।।

tadā tu jṛmbhitaṅ śaivaṅ dhanurbhīmaparākramam. huṅkārēṇa mahādēva stambhitō.tha trilōcana:৷৷

देवैस्तदा समागम्य सर्षिसघै स्सचारणै:। याचितौ प्रशमं तत्र जग्मतुस्तौ सुरोत्तमौ।।

dēvaistadā samāgamya sarṣisaghai ssacāraṇai:. yācitau praśamaṅ tatra jagmatustau surōttamau৷৷

जृम्भितं तद्धनुर्द्रृष्ट्वा शैवं विष्णुपराक्रमै:। अधिकं मेनिरे विष्णुं देवा स्सर्षिगणास्तदा ।।

jṛmbhitaṅ taddhanurdrṛṣṭvā śaivaṅ viṣṇuparākramai:. adhikaṅ mēnirē viṣṇuṅ dēvā ssarṣigaṇāstadā ৷৷

धनू रुद्रस्तु सङ्कृद्धो विदेहेषु महायशा:। देवरातस्य राजर्षेर्ददौ हस्ते ससायकम्।।

dhanū rudrastu saṅkṛddhō vidēhēṣu mahāyaśā:. dēvarātasya rājarṣērdadau hastē sasāyakam৷৷

इदं च वैष्णवं राम धनु: परपुरञ्जयम्। ऋचीके भार्गवे प्रादाद्विष्णु: स न्यासमुत्तमम्।।

idaṅ ca vaiṣṇavaṅ rāma! dhanu: parapurañjayam. ṛcīkē bhārgavē prādādviṣṇu: sa nyāsamuttamam৷৷

ऋचीकस्तु महातेजा: पुत्रस्याप्रतिकर्मण:। पितुर्मम ददौ दिव्यं जमदग्नेर्महात्मन:।।

ṛcīkastu mahātējā: putrasyāpratikarmaṇa:. piturmama dadau divyaṅ jamadagnērmahātmana:৷৷

न्यस्तशस्त्रे पितरि मे तपोबलसमन्विते। अर्जुनो विदधे मृत्युं प्राकृतां बुद्धिमास्थित:।।

nyastaśastrē pitari mē tapōbalasamanvitē. arjunō vidadhē mṛtyuṅ prākṛtāṅ buddhimāsthita:৷৷

वधमप्रतिरूपं तु पितु श्शृत्वा सुदारुणम्। क्षत्रमुत्सादयन्रोषाज्जातं जातमनेकश:।।

vadhamapratirūpaṅ tu pitu śśṛtvā sudāruṇam. kṣatramutsādayanrōṣājjātaṅ jātamanēkaśa:৷৷

।। पृथिवीं चाखिलां प्राप्य काश्यपाय महात्मने । यज्ञस्यान्ते तदा राम दक्षिणां पुण्यकर्मणे । दत्त्वा महेन्द्रनिलयस्तपोबलसमन्वित:।।

৷৷ pṛthivīṅ cākhilāṅ prāpya kāśyapāya mahātmanē . yajñasyāntē tadā rāma dakṣiṇāṅ puṇyakarmaṇē . dattvā mahēndranilayastapōbalasamanvita:৷৷

अद्यतूत्तमवीर्येण त्वया राम महाबल। श्रुतवान् धनुषो भेदं ततोऽहं द्रुतमागत:।।

adyatūttamavīryēṇa tvayā rāma mahābala. śrutavān dhanuṣō bhēdaṅ tatō.haṅ drutamāgata:৷৷

तदिदं वैष्णवं राम पितृपैतामहं महत्। क्षत्रधर्मं पुरस्कृत्य गृह्णीष्व धनुरुत्तमम्।।

tadidaṅ vaiṣṇavaṅ rāma! pitṛpaitāmahaṅ mahat. kṣatradharmaṅ puraskṛtya gṛhṇīṣva dhanuruttamam৷৷

योजयस्व धनुश्श्रेष्ठे शरं परपुरञ्जयम्। यदि शक्नोषि काकुत्स्थ द्वन्द्वं दास्यामि ते तत:।।

yōjayasva dhanuśśrēṣṭhē śaraṅ parapurañjayam. yadi śaknōṣi kākutstha! dvandvaṅ dāsyāmi tē tata:৷৷