स वेश्मजालं बलवान् ददर्श व्यासक्तवैडूर्यसुवर्णजालम्। यथा महत् प्रावृषि मेघजालं विद्युत्पिनद्धं सविहङ्गजालम्।।

sa vēśmajālaṅ balavān dadarśa vyāsaktavaiḍūryasuvarṇajālam. yathā mahat prāvṛṣi mēghajālaṅ vidyutpinaddhaṅ savihaṅgajālam৷৷

निवेशनानां विविधाश्च शालाः प्रधानशङ्खायुधचापशालाः। मनोहराश्चापि पुनर्विशालाः ददर्श वेश्माद्रिषु चन्द्रशालाः।।

nivēśanānāṅ vividhāśca śālāḥ pradhānaśaṅkhāyudhacāpaśālāḥ. manōharāścāpi punarviśālāḥ dadarśa vēśmādriṣu candraśālāḥ৷৷

गृहाणि नानावसुराजितानि देवासुरैश्चापि सुपूजितानि। सर्वैश्च दोषैः परिवर्जितानि कपिर्ददर्श स्वबलार्जितानि।।

gṛhāṇi nānāvasurājitāni dēvāsuraiścāpi supūjitāni. sarvaiśca dōṣaiḥ parivarjitāni kapirdadarśa svabalārjitāni৷৷

तानि प्रयत्नाभिसमाहितानि मयेन साक्षादिव निर्मितानि। महीतले सर्वगुणोत्तराणि ददर्श लङ्काधिपतेर्गृहाणि।।

tāni prayatnābhisamāhitāni mayēna sākṣādiva nirmitāni. mahītalē sarvaguṇōttarāṇi dadarśa laṅkādhipatērgṛhāṇi৷৷

ततो ददर्शोछ्रचितमेघरूपं मनोहरं काञ्चनचारुरूपम्। रक्षोऽधिपस्यात्मबलानुरूपं गृहोत्तमं ह्यप्रतिरूपरूपम्।।

tatō dadarśōchracitamēgharūpaṅ manōharaṅ kāñcanacārurūpam. rakṣō.dhipasyātmabalānurūpaṅ gṛhōttamaṅ hyapratirūparūpam৷৷

महीतले स्वर्गमिव प्रकीर्णं श्रिया ज्वलन्तं बहुरत्नकीर्णम्। नानातरूणां कुसुमावकीर्णं गिरेरिवाग्रं रजसावकीर्णम्।।

mahītalē svargamiva prakīrṇaṅ śriyā jvalantaṅ bahuratnakīrṇam. nānātarūṇāṅ kusumāvakīrṇaṅ girērivāgraṅ rajasāvakīrṇam৷৷

नारीप्रवेकैरिव दीप्यमानं तटिद्भिरम्भोदवदर्च्यमानम्। हंसप्रवेकैरिव वाह्यमानं श्रिया युतं खे सुकृतां विमानम्।।

nārīpravēkairiva dīpyamānaṅ taṭidbhirambhōdavadarcyamānam. haṅsapravēkairiva vāhyamānaṅ śriyā yutaṅ khē sukṛtāṅ vimānam৷৷

यथा नगाग्रं बहुधातुचित्रं यथा नभश्च ग्रहचन्द्रचित्रम्। ददर्शयुक्तीकृतमेघचित्रं विमानरत्नं बहुरत्नचित्रम्।।

yathā nagāgraṅ bahudhātucitraṅ yathā nabhaśca grahacandracitram. dadarśayuktīkṛtamēghacitraṅ vimānaratnaṅ bahuratnacitram৷৷

मही कृता पर्वतराजिपूर्णा शैलाः कृता वृक्षवितानपूर्णाः। वृक्षाः कृताः पुष्पवितानपूर्णाः पुष्पं कृतं केसरपत्रपूर्णम्।।

mahī kṛtā parvatarājipūrṇā śailāḥ kṛtā vṛkṣavitānapūrṇāḥ. vṛkṣāḥ kṛtāḥ puṣpavitānapūrṇāḥ puṣpaṅ kṛtaṅ kēsarapatrapūrṇam৷৷

कृतानि वेश्मानि च पाण्डुराणि तथा सुपुष्पाण्यपि पुष्कराणि। पुनश्च पद्मानि सकेसराणि धन्यानि चित्राणि तथा वनानि।।

kṛtāni vēśmāni ca pāṇḍurāṇi tathā supuṣpāṇyapi puṣkarāṇi. punaśca padmāni sakēsarāṇi dhanyāni citrāṇi tathā vanāni৷৷

पुष्पाह्वयं नामविराजमानं रत्नप्रभाभिश्च विवर्धमानम्। वेश्मोत्तमानामपि चोच्यमानं महाकपिस्तत्र महाविमानम्।।

puṣpāhvayaṅ nāmavirājamānaṅ ratnaprabhābhiśca vivardhamānam. vēśmōttamānāmapi cōcyamānaṅ mahākapistatra mahāvimānam৷৷

कृताश्च वैडूर्यमया विहङ्गाः रूप्यप्रवालैश्च तथा विहङ्गाः। चित्राश्च नानावसुभिर्भुजङ्गाः जात्यानुरूपास्तुरगाः शुभाङ्गाः।।

kṛtāśca vaiḍūryamayā vihaṅgāḥ rūpyapravālaiśca tathā vihaṅgāḥ. citrāśca nānāvasubhirbhujaṅgāḥ jātyānurūpāsturagāḥ śubhāṅgāḥ৷৷

प्रवालजाम्बूनदपुष्पपक्षाः सलीलमावर्जितजिह्मपक्षाः। कामस्य साक्षादिव भान्ति पक्षाः कृता विहङ्गाः सुमुखाः सुपक्षाः।।

pravālajāmbūnadapuṣpapakṣāḥ salīlamāvarjitajihmapakṣāḥ. kāmasya sākṣādiva bhānti pakṣāḥ kṛtā vihaṅgāḥ sumukhāḥ supakṣāḥ৷৷

नियुज्यमानास्तु गजाः सुहस्ताः सकेसराश्चोत्पलपत्रहस्ताः। बभूवदेवी च कृता सुहस्ता लक्ष्मी स्तथा पद्मिनि पद्महस्ता।।

niyujyamānāstu gajāḥ suhastāḥ sakēsarāścōtpalapatrahastāḥ. babhūvadēvī ca kṛtā suhastā lakṣmī stathā padmini padmahastā৷৷

इतीव तद्गृहमभिगम्य शोभनम् सविस्मयो नगमिव चारुशोभनम्। पुनश्च तत्परमसुगन्धि सुन्दरम् हिमात्यये नगमिव चारुकन्दरम्।।

itīva tadgṛhamabhigamya śōbhanam savismayō nagamiva cāruśōbhanam. punaśca tatparamasugandhi sundaram himātyayē nagamiva cārukandaram৷৷

ततः स तां कपिरभिपत्य पूजितां चरन् पुरीं दशमुखबाहुपालिताम्। अदृश्य तां जनकसुतां सुपूजितां सुदुःखितः पतिगुणवेगवर्जिताम्।।

tataḥ sa tāṅ kapirabhipatya pūjitāṅ caran purīṅ daśamukhabāhupālitām. adṛśya tāṅ janakasutāṅ supūjitāṅ suduḥkhitaḥ patiguṇavēgavarjitām৷৷

ततस्तदा बहुविधभावितात्मनः कृतात्मनो जनकसुतां सुवर्त्मनः। अपश्यतोऽभवदतिदुःखितं मनः सुचक्षुषः प्रविचरतो महात्मनः।।

tatastadā bahuvidhabhāvitātmanaḥ kṛtātmanō janakasutāṅ suvartmanaḥ. apaśyatō.bhavadatiduḥkhitaṅ manaḥ sucakṣuṣaḥ pravicaratō mahātmanaḥ৷৷