आश्रमं प्रति याते तु खरे खरपराक्रमे। तानेवौत्पातिकान्रामस्सह भ्रात्रा ददर्श ह।।

āśramaṅ prati yātē tu kharē kharaparākramē. tānēvautpātikānrāmassaha bhrātrā dadarśa ha৷৷

तानुत्पातान्महोघोरानुत्थितान्रोमहर्षणान्। प्रजानामहितान्दृष्ट्वा रामो लक्ष्मणमब्रवीत्।।

tānutpātānmahōghōrānutthitānrōmaharṣaṇān. prajānāmahitāndṛṣṭvā rāmō lakṣmaṇamabravīt৷৷

इमान्पश्य महाबाहो सर्वभूतापहारिणः। समुत्थितान्महोत्पातान्संहर्तुं सर्वराक्षसान्।।

imānpaśya mahābāhō sarvabhūtāpahāriṇaḥ. samutthitānmahōtpātānsaṅhartuṅ sarvarākṣasān৷৷

अमी रुधिरधारास्तु विसृजन्तः खरस्वनाः। व्योम्नि मेघा विवर्तन्ते परुषा गर्दभारुणाः।।

amī rudhiradhārāstu visṛjantaḥ kharasvanāḥ. vyōmni mēghā vivartantē paruṣā gardabhāruṇāḥ৷৷

सधूमाश्च शरास्सर्वे मम युद्धाभिनन्दिनः। रुक्मपृष्ठानि चापानि विचेष्टन्ते च लक्ष्मण।।

sadhūmāśca śarāssarvē mama yuddhābhinandinaḥ. rukmapṛṣṭhāni cāpāni vicēṣṭantē ca lakṣmaṇa৷৷

यादृशा इह कूजन्ति पक्षिणः वनचारिणः। अग्रतो नो भयं प्राप्तं संशयो जीवितस्य च।।

yādṛśā iha kūjanti pakṣiṇaḥ vanacāriṇaḥ. agratō nō bhayaṅ prāptaṅ saṅśayō jīvitasya ca৷৷

सम्प्रहारस्तु सुमहान्भविष्यति न संशयः। अयमाख्याति मे बाहुस्स्फुरमाणो मुहुर्मुहुः।।

samprahārastu sumahānbhaviṣyati na saṅśayaḥ. ayamākhyāti mē bāhussphuramāṇō muhurmuhuḥ৷৷

।। सन्निकर्षे तु न श्शूर जयं शत्रोः पराजयम्। सप्रभं च प्रसन्नं च तव वक्त्रं हि लक्ष्यते।।

৷৷ sannikarṣē tu na śśūra jayaṅ śatrōḥ parājayam. saprabhaṅ ca prasannaṅ ca tava vaktraṅ hi lakṣyatē৷৷

उद्यतानां हि युद्धार्थं येषां भवति लक्ष्मण। निष्प्रभं वदनं तेषां भवत्यायुः परिक्षयः।।

udyatānāṅ hi yuddhārthaṅ yēṣāṅ bhavati lakṣmaṇa. niṣprabhaṅ vadanaṅ tēṣāṅ bhavatyāyuḥ parikṣayaḥ৷৷

रक्षसां नर्दतां घोरश्श्रूयते च महाध्वनिः। आहतानां च भेरीणां राक्षसैः क्रूरकर्मभिः।।

rakṣasāṅ nardatāṅ ghōraśśrūyatē ca mahādhvaniḥ. āhatānāṅ ca bhērīṇāṅ rākṣasaiḥ krūrakarmabhiḥ৷৷

अनागतविधानं तु कर्तव्यं शुभमिच्छता। आपदं शङ्कमानेन पुरुषेण विपश्चिता।।

anāgatavidhānaṅ tu kartavyaṅ śubhamicchatā. āpadaṅ śaṅkamānēna puruṣēṇa vipaścitā৷৷

तस्माद्गृहीत्वा वैदेहीं शरपाणिर्धनुर्धरः। गुहामाश्रय शैलस्य दुर्गां पादपसङ्कुलाम्।।

tasmādgṛhītvā vaidēhīṅ śarapāṇirdhanurdharaḥ. guhāmāśraya śailasya durgāṅ pādapasaṅkulām৷৷

प्रतिकूलितुमिच्छामि न हि वाक्यमिदं त्वया। शापितो मम पादाभ्यां गम्यतां वत्स मा चिरम्।।

pratikūlitumicchāmi na hi vākyamidaṅ tvayā. śāpitō mama pādābhyāṅ gamyatāṅ vatsa mā ciram৷৷

त्वं हि शूरश्च बलवान्हन्याह्येतान्न संशयः। स्वयं तु हन्तुमिच्छामि सर्वानेव निशाचरान्।।

tvaṅ hi śūraśca balavānhanyāhyētānna saṅśayaḥ. svayaṅ tu hantumicchāmi sarvānēva niśācarān৷৷

एवमुक्तस्तु रामेण लक्ष्मणस्सह सीताया। शरानादाय चापं च गुहां दुर्गां समाश्रयत्।।

ēvamuktastu rāmēṇa lakṣmaṇassaha sītāyā. śarānādāya cāpaṅ ca guhāṅ durgāṅ samāśrayat৷৷

तस्मिन्प्रविष्टे तु गुहां लक्ष्मणे सह सीतया। हन्त निर्युक्तमित्युक्त्वा रामः कवचमाविशत्।।

tasminpraviṣṭē tu guhāṅ lakṣmaṇē saha sītayā. hanta niryuktamityuktvā rāmaḥ kavacamāviśat৷৷

स तेनाग्नि निकाशेन कवचेन विभूषितः। बभूव राम स्तिमिरे विधूमोऽग्निरिवोत्थितः।।

sa tēnāgni nikāśēna kavacēna vibhūṣitaḥ. babhūva rāma stimirē vidhūmō.gnirivōtthitaḥ৷৷

स चापमुद्यम्य महच्छरानादाय वीर्यवान्। बभूवावस्थितस्तत्र ज्यास्वनैः पूरयन्दिशः।।

sa cāpamudyamya mahaccharānādāya vīryavān. babhūvāvasthitastatra jyāsvanaiḥ pūrayandiśaḥ৷৷

ततो देवास्सगन्धर्वास्सिद्धाश्च सह चारणैः। समेयुश्च महात्मानो युद्धदर्शनकाङ्क्षिणः।।

tatō dēvāssagandharvāssiddhāśca saha cāraṇaiḥ. samēyuśca mahātmānō yuddhadarśanakāṅkṣiṇaḥ৷৷

ऋषयश्च महात्मानो लोके ब्रह्मर्षिसत्तमाः। समेत्य चोचुस्सहिता अन्योन्यं पुण्यकर्मणः।।

ṛṣayaśca mahātmānō lōkē brahmarṣisattamāḥ. samētya cōcussahitā anyōnyaṅ puṇyakarmaṇaḥ৷৷

स्वस्ति गोब्राह्मणेभ्योऽस्तु लोकानां येऽभिसङ्गताः। जयतां राघवो युद्धे पौलस्त्यान् रजनीचरान्।।

svasti gōbrāhmaṇēbhyō.stu lōkānāṅ yē.bhisaṅgatāḥ. jayatāṅ rāghavō yuddhē paulastyān rajanīcarān৷৷

एवमुक्त्वा पुनः प्रोचुरालोक्य च परस्परम्।।

ēvamuktvā punaḥ prōcurālōkya ca parasparam৷৷

।। चतुर्दश सहस्राणि रक्षसां भीमकर्मणाम्। एकश्च रामो धर्मात्मा कथं युद्धं भविष्यति।।

৷৷ caturdaśa sahasrāṇi rakṣasāṅ bhīmakarmaṇām. ēkaśca rāmō dharmātmā kathaṅ yuddhaṅ bhaviṣyati৷৷

इति राजर्षयस्सिद्धास्सगणाश्च द्विजर्षभाः। जातकौतूहलास्तस्थुर्विमानस्थाश्च देवताः।।

iti rājarṣayassiddhāssagaṇāśca dvijarṣabhāḥ. jātakautūhalāstasthurvimānasthāśca dēvatāḥ৷৷

आविष्टं तेजसा रामं सङ्ग्रामशिरसि स्थितम्। दृष्ट्वा सर्वाणि भूतानि भयाद्विव्यथिरे तदा।।

āviṣṭaṅ tējasā rāmaṅ saṅgrāmaśirasi sthitam. dṛṣṭvā sarvāṇi bhūtāni bhayādvivyathirē tadā৷৷

रूपमप्रतिमं तस्य रामस्याक्लिष्टकर्मणः। बभूव रूपं क्रुद्धस्य रुद्रस्येव पिनाकिनः।।

rūpamapratimaṅ tasya rāmasyākliṣṭakarmaṇaḥ. babhūva rūpaṅ kruddhasya rudrasyēva pinākinaḥ৷৷

ततो गम्भीरनिर्ह्रादं घोरवर्मायुधध्वजम्। अनीकं यातुधानानां समन्तात्प्रत्यदृश्यत।।

tatō gambhīranirhrādaṅ ghōravarmāyudhadhvajam. anīkaṅ yātudhānānāṅ samantātpratyadṛśyata৷৷

सिंहनादं विसृजतामन्योन्यमभिगर्जताम्। चापानि विस्फ़ारयतां जृम्भतामप्यभीक्ष्णशः।।

siṅhanādaṅ visṛjatāmanyōnyamabhigarjatām. cāpāni visphaārayatāṅ jṛmbhatāmapyabhīkṣṇaśaḥ৷৷

।। विप्रघुष्टस्वनानां च दुन्धुभींश्चापि निघ्नताम्। तेषां सुतुमुलश्शब्दः पूरयामास तद्वनम्।।

৷৷ vipraghuṣṭasvanānāṅ ca dundhubhīṅścāpi nighnatām. tēṣāṅ sutumulaśśabdaḥ pūrayāmāsa tadvanam৷৷

तेन शब्देन वित्रस्ताश्वापदा वनचारिणः। दुद्रुवुर्यत्र निश्शब्दं पृष्ठतो न व्यलोकयन्।।

tēna śabdēna vitrastāśvāpadā vanacāriṇaḥ. dudruvuryatra niśśabdaṅ pṛṣṭhatō na vyalōkayan৷৷

तत्त्वनीकं महाघोरं रामं समुपसर्पत। धृतनानाप्रहरणं गम्भीरं सागरोपमम्।।

tattvanīkaṅ mahāghōraṅ rāmaṅ samupasarpata. dhṛtanānāpraharaṇaṅ gambhīraṅ sāgarōpamam৷৷

रामोऽपि चारयंश्चक्षुस्सर्वतो रणपण्डितः। ददर्श खरसैन्यं तद्युद्धाभिमुखमुत्थितम्।।

rāmō.pi cārayaṅścakṣussarvatō raṇapaṇḍitaḥ. dadarśa kharasainyaṅ tadyuddhābhimukhamutthitam৷৷

वितत्य च धनुर्भीमं तूण्याश्चोद्धृत्य सायकान्। क्रोधमाहारयत्तीव्रं वधार्थं सर्वरक्षसाम्।।

vitatya ca dhanurbhīmaṅ tūṇyāścōddhṛtya sāyakān. krōdhamāhārayattīvraṅ vadhārthaṅ sarvarakṣasām৷৷

दुष्प्रेक्ष्यस्सोऽभवत्कृद्धो युगान्ताग्निरिव ज्वलन्। तं दृष्ट्वा तेजसाविष्टं प्राद्रवन्वनदेवताः।।

duṣprēkṣyassō.bhavatkṛddhō yugāntāgniriva jvalan. taṅ dṛṣṭvā tējasāviṣṭaṅ prādravanvanadēvatāḥ৷৷

तस्य क्रुद्धस्य रूपं तु रामस्य ददृशे तदा। दक्षस्येव क्रतुं हन्तुमुद्यतस्य पिनाकिनः।।

tasya kruddhasya rūpaṅ tu rāmasya dadṛśē tadā. dakṣasyēva kratuṅ hantumudyatasya pinākinaḥ৷৷

आविष्टं तेजसा रामं सङ्ग्रामशिरसि स्थितम्। दृष्ट्वा सर्वाणि भूतानि भयार्तानि प्रदुद्रुवुः।।

āviṣṭaṅ tējasā rāmaṅ saṅgrāmaśirasi sthitam. dṛṣṭvā sarvāṇi bhūtāni bhayārtāni pradudruvuḥ৷৷

तत्कार्मुकैराभरणैर्ध्वजैश्च तैर्वर्मभिश्चाग्निसमानवर्णैः। बभूव सैन्यं पिशिताशनानां सूर्योदये नीलमिवाभ्रबृन्दम्।।

tatkārmukairābharaṇairdhvajaiśca tairvarmabhiścāgnisamānavarṇaiḥ. babhūva sainyaṅ piśitāśanānāṅ sūryōdayē nīlamivābhrabṛndam৷৷