अथ पञ्चवटीं गच्छन्नन्तरा रघुनन्दनः। आससाद महाकायं गृध्रं भीमपराक्रमम्।।

atha pañcavaṭīṅ gacchannantarā raghunandanaḥ. āsasāda mahākāyaṅ gṛdhraṅ bhīmaparākramam৷৷

तं दृष्ट्वा तौ महाभागौ वटस्थं रामलक्ष्मणौ। मेनाते राक्षसं पक्षिं ब्रुवाणौ को भवानिति।।

taṅ dṛṣṭvā tau mahābhāgau vaṭasthaṅ rāmalakṣmaṇau. mēnātē rākṣasaṅ pakṣiṅ bruvāṇau kō bhavāniti৷৷

स तौ मधुरया वाचा सौम्यया प्रीणयन्निव। उवाच वत्स मां विद्धि वयस्यं पितुरात्मनः।।

sa tau madhurayā vācā saumyayā prīṇayanniva. uvāca vatsa! māṅ viddhi vayasyaṅ piturātmanaḥ৷৷

स तं पितृसखं बुद्ध्वा पूजयामास राघवः। स तस्य कुलमव्यग्रमथ पप्रच्छ नाम च।।

sa taṅ pitṛsakhaṅ buddhvā pūjayāmāsa rāghavaḥ. sa tasya kulamavyagramatha papraccha nāma ca৷৷

रामस्य वचनं श्रुत्वा सर्वभूतसमुद्भवम्। आचचक्षे द्विजस्तस्मै कुलमात्मानमेव च।।

rāmasya vacanaṅ śrutvā sarvabhūtasamudbhavam. ācacakṣē dvijastasmai kulamātmānamēva ca৷৷

पूर्वकाले महाबाहो ये प्रजापतयोऽभवन्। तान्मे निगदतस्सर्वानादितश्शृणु राघव।।

pūrvakālē mahābāhō yē prajāpatayō.bhavan. tānmē nigadatassarvānāditaśśṛṇu rāghava৷৷

कर्दमः प्रथमस्तेषां विक्रीतस्तदनन्तरः। शेषश्च संश्रयश्चैव बहुपुत्रश्च वीर्यवान्।।

kardamaḥ prathamastēṣāṅ vikrītastadanantaraḥ. śēṣaśca saṅśrayaścaiva bahuputraśca vīryavān৷৷

।। स्थाणुर्मरीचिरत्रिश्च क्रतुश्चैव महाबलः। पुलस्त्यश्चाङ्गिराश्चैव प्रचेताः पूलहस्तथा।।

৷৷ sthāṇurmarīciratriśca kratuścaiva mahābalaḥ. pulastyaścāṅgirāścaiva pracētāḥ pūlahastathā৷৷

।। दक्षो विवस्वानपरोऽरिष्टनेमिश्च राघव। काश्यपश्च महातेजास्तेषामासीच्च पश्चिमः।।

৷৷ dakṣō vivasvānaparō.riṣṭanēmiśca rāghava. kāśyapaśca mahātējāstēṣāmāsīcca paścimaḥ৷৷

प्रजापतेस्तु दक्षस्य बभूवुरिति विश्रुतम्। षष्टिर्दुहितरो राम यशस्विन्यो महायशः।।

prajāpatēstu dakṣasya babhūvuriti viśrutam. ṣaṣṭirduhitarō rāma yaśasvinyō mahāyaśaḥ৷৷

काश्यपः प्रतिजग्राह तासामष्टौ सुमध्यमाः। अदितिं च दितिं चैव दनुमप्यथ कालिकाम्।।

kāśyapaḥ pratijagrāha tāsāmaṣṭau sumadhyamāḥ. aditiṅ ca ditiṅ caiva danumapyatha kālikām৷৷

तास्तु कन्यास्ततः प्रीतः काश्यपः पुनरब्रवीत्।।

tāstu kanyāstataḥ prītaḥ kāśyapaḥ punarabravīt৷৷

अदितिस्तन्मना राम दितिश्च मनुजर्षभ।।

aditistanmanā rāma ditiśca manujarṣabha৷৷

अदित्यां जज्ञिरे देवात्रयस्त्रिंशदरिंदम।।

adityāṅ jajñirē dēvātrayastriṅśadariṅdama!৷৷

दितिस्त्वजनयत्पुत्रान् दैत्यांस्तात यशस्विनः।।

ditistvajanayatputrān daityāṅstāta yaśasvinaḥ৷৷

दनुस्त्वजनयत्पुत्रमश्वग्रीवमरिन्दम।।

danustvajanayatputramaśvagrīvamarindama৷৷

क्रौञ्चीं भासीं तथा श्येनीं धृतराष्ट्रीं तथा शुकीम्।।

krauñcīṅ bhāsīṅ tathā śyēnīṅ dhṛtarāṣṭrīṅ tathā śukīm৷৷

उलूकाञ्जनयत्क्रौञ्ची भासी भासान्व्यजायत।।

ulūkāñjanayatkrauñcī bhāsī bhāsānvyajāyata৷৷

।। श्येनी श्येनांश्च गृध्रांश्च व्यजायत सुतेजसः। धृतराष्ट्रीतु हंसांश्च कलहंसांश्च सर्वशः।।

৷৷ śyēnī śyēnāṅśca gṛdhrāṅśca vyajāyata sutējasaḥ. dhṛtarāṣṭrītu haṅsāṅśca kalahaṅsāṅśca sarvaśaḥ৷৷

चक्रवाकांश्च भद्रं ते विजज्ञे सापि भामिनी। शुकी नतां विजज्ञे तु नताया विनता सुता।।

cakravākāṅśca bhadraṅ tē vijajñē sāpi bhāminī. śukī natāṅ vijajñē tu natāyā vinatā sutā৷৷

दश क्रोधवशा राम विजज्ञे ह्यात्मसम्भवाः। मृगीं च मृगमन्दां च हरीं भद्रमदामपि।।

daśa krōdhavaśā rāma vijajñē hyātmasambhavāḥ. mṛgīṅ ca mṛgamandāṅ ca harīṅ bhadramadāmapi৷৷

।। मातङ्गीमपि शार्दूलीं श्वेतां च सुरभिं तथा। सर्वलक्षणसम्पन्नां सुरसां कद्रुकामपि।।

৷৷ mātaṅgīmapi śārdūlīṅ śvētāṅ ca surabhiṅ tathā. sarvalakṣaṇasampannāṅ surasāṅ kadrukāmapi৷৷

अपत्यं तु मृगास्सर्वे मृग्या नरवरोत्तम। ऋक्षाश्च मृगमन्दायास्सृमराश्चमरा स्तथा।।

apatyaṅ tu mṛgāssarvē mṛgyā naravarōttama. ṛkṣāśca mṛgamandāyāssṛmarāścamarā stathā৷৷

हर्याश्च हरयोऽपत्यं वानराश्च तरस्स्विनः। ततस्त्विरावतीं नाम जज्ञे भद्रमदा सुताम्।।

haryāśca harayō.patyaṅ vānarāśca tarassvinaḥ. tatastvirāvatīṅ nāma jajñē bhadramadā sutām৷৷

तस्यास्त्वैरावतः पुत्रो लोकनाथो महागजः। मातङ्ग्या स्त्वथ मातङ्गा अपत्यं मनुजर्षभ।।

tasyāstvairāvataḥ putrō lōkanāthō mahāgajaḥ. mātaṅgyā stvatha mātaṅgā apatyaṅ manujarṣabha৷৷

गोलाङ्गूलांश्च शार्दूली व्याघ्रांश्चाजनयत्सुतान्। दिशागजांश्च काकुत्स्थ श्वेताप्यजनयत्सुतान्।।

gōlāṅgūlāṅśca śārdūlī vyāghrāṅścājanayatsutān. diśāgajāṅśca kākutstha śvētāpyajanayatsutān৷৷

ततो दुहितरौ राम सुरभिर्द्वेव्यजायत। रोहिणीं नाम भद्रं ते गन्धर्वीं च यशस्स्विनीम्।।

tatō duhitarau rāma surabhirdvēvyajāyata. rōhiṇīṅ nāma bhadraṅ tē gandharvīṅ ca yaśassvinīm৷৷

रोहिण्यजनयद् गावो गन्धर्वी वाजिनः सुतान्। सुरसाऽजनयन्नागान्राम कद्रूस्तु पन्नगान्।।

rōhiṇyajanayadgāvai gandharvī vājinassutān. surasā.janayannāgānrāma kadrūstu pannagān৷৷

मनुर्मनुष्यान् जनयद्राम पुत्रान् यशस्विनः। ब्राह्मणान् क्षत्रियान् वैश्यान् शूद्रांश्च मनुजर्षभ।।

manurmanuṣyān janayadrāma putrān yaśasvinaḥ. brāhmaṇān kṣatriyān vaiśyān śūdrāṅśca manujarṣabha৷৷

सर्वान् पुण्यफलान्वृक्षाननलापि व्यजायत। विनता च शुकीपौत्री कद्रूश्च सुरसास्वसा।।

sarvān puṇyaphalānvṛkṣānanalāpi vyajāyata. vinatā ca śukīpautrī kadrūśca surasāsvasā৷৷

कद्रूर्नागं सहस्रास्यं विजज्ञे धरणीधरम्। द्वौ पुत्रौ विनतायास्तु गरुडोऽरुण एव च।।

kadrūrnāgaṅ sahasrāsyaṅ vijajñē dharaṇīdharam. dvau putrau vinatāyāstu garuḍō.ruṇa ēva ca৷৷

तस्माज्जातोऽहमरुणात्सम्पातिस्तु ममाग्रजः। जटायुरिति मां विद्धि श्येनीपुत्रमरिन्दम।।

tasmājjātō.hamaruṇātsampātistu mamāgrajaḥ. jaṭāyuriti māṅ viddhi śyēnīputramarindama৷৷

सोऽहं वाससहायस्ते भविष्यामि यदीच्छसि। इदं दुर्गं हि कान्तारं मृगराक्षस सेवितम्।।

sō.haṅ vāsasahāyastē bhaviṣyāmi yadīcchasi. idaṅ durgaṅ hi kāntāraṅ mṛgarākṣasa sēvitam৷৷

जटायुषं तं प्रतिपूज्य राघवो मुदा परिष्वज्य च सन्नतोऽभवत्। पितुर्हि शुश्राव सखित्वमात्मवान् जटायुषा सङ्कथितं पुनः पुनः।।

jaṭāyuṣaṅ taṅ pratipūjya rāghavō mudā pariṣvajya ca sannatō.bhavat. piturhi śuśrāva sakhitvamātmavān jaṭāyuṣā saṅkathitaṅ punaḥ punaḥ৷৷

स तत्र सीतां परिदाय मैथिलीं सहैव तेनातिबलेन पक्षिणा। जगाम तां पञ्चवटीं सलक्ष्मणो रिपून्दिधक्षञ्छलभानि वानलः।।

sa tatra sītāṅ paridāya maithilīṅ sahaiva tēnātibalēna pakṣiṇā. jagāma tāṅ pañcavaṭīṅ salakṣmaṇō ripūndidhakṣañchalabhāni vānalaḥ৷৷