उषित्वा रजनीं तत्र राजपुत्रावरिन्दमौ। महर्षिमभिवाद्याथ जग्मतुस्तं गिरिं प्रति।।

uṣitvā rajanīṅ tatra rājaputrāvarindamau. maharṣimabhivādyātha jagmatustaṅ giriṅ prati৷৷

तेषां चैव स्वस्त्ययनं महर्षि स्स चकार ह। प्रस्थितांश्चैव तान्प्रेक्ष्य पिता पुत्रानिवान्वगात्।।

tēṣāṅ caiva svastyayanaṅ maharṣi ssa cakāra ha. prasthitāṅścaiva tānprēkṣya pitā putrānivānvagāt৷৷

ततः प्रचक्रमे वक्तुं वचनं स महामुनिः। भरद्वाजो महातेजा रामं सत्यपराक्रमम्।।

tataḥ pracakramē vaktuṅ vacanaṅ sa mahāmuniḥ. bharadvājō mahātējā rāmaṅ satyaparākramam৷৷

गङ्गायमुनयो स्सन्धिमासाद्य मनुजर्षभौ। कालिन्दीमनुगच्छेतां नदीं पश्चान्मुखाश्रिताम्।।

gaṅgāyamunayō ssandhimāsādya manujarṣabhau. kālindīmanugacchētāṅ nadīṅ paścānmukhāśritām৷৷

अथाऽसाद्य तु कालिन्दी शीघ्रस्रोतसमापगाम्। तस्यास्तीर्थं प्रचलितं पुराणं प्रेक्ष्य राघवौ।।

athā.sādya tu kālindī śīghrasrōtasamāpagām. tasyāstīrthaṅ pracalitaṅ purāṇaṅ prēkṣya rāghavau৷৷

ततो न्यग्रोधमासाद्य महान्तं हरितच्छदम्।।

tatō nyagrōdhamāsādya mahāntaṅ haritacchadam৷৷

।। विवृद्धं बहुभिर्वृक्षै श्श्यामं सिद्धोपसेवितम्। तस्मै सीताञ्जलिं कृत्वा प्रयुञ्जीताशिषश्शिवाः।।

৷৷ vivṛddhaṅ bahubhirvṛkṣai śśyāmaṅ siddhōpasēvitam. tasmai sītāñjaliṅ kṛtvā prayuñjītāśiṣaśśivāḥ৷৷

समासाद्य तु तं वृक्षं वसेद्वातिक्रमेत वा। क्रोशमात्रं ततो गत्वा नीलं द्रक्ष्यथ काननम्।।

samāsādya tu taṅ vṛkṣaṅ vasēdvātikramēta vā. krōśamātraṅ tatō gatvā nīlaṅ drakṣyatha kānanam৷৷

स पन्थाश्चित्रकूटस्य गत स्सुबहुशो मया।।

sa panthāścitrakūṭasya gata ssubahuśō mayā৷৷

इति पन्थानमावेद्य महर्षिस्सन्यवर्तत।।

iti panthānamāvēdya maharṣissanyavartata৷৷

उपावृत्ते मुनौ तस्मिन्रामो लक्ष्मणमब्रवीत्।।

upāvṛttē munau tasminrāmō lakṣmaṇamabravīt৷৷

इति तौ पुरुषव्याघ्रौ मन्त्रयित्वा मनस्विनौ। सीतामेवाग्रतः कृत्वा कालिन्दीं जग्मतुर्नदीम्।।

iti tau puruṣavyāghrau mantrayitvā manasvinau. sītāmēvāgrataḥ kṛtvā kālindīṅ jagmaturnadīm৷৷

अथाऽसाद्य तु कालिन्दीं शीघ्रस्रोतोवहां नदीम्। चिन्तामापेदिरे सर्वे नदीजलतितीर्षवः।।

athā.sādya tu kālindīṅ śīghrasrōtōvahāṅ nadīm. cintāmāpēdirē sarvē nadījalatitīrṣavaḥ৷৷

तौ काष्ठसङ्घातमथो चक्रतु स्सुमहाप्लवम्। शुष्कैर्वंशै स्समास्तीर्णमुशीरैश्च समावृतम्।।

tau kāṣṭhasaṅghātamathō cakratu ssumahāplavam. śuṣkairvaṅśai ssamāstīrṇamuśīraiśca samāvṛtam৷৷

ततो वेतसशाखाश्च जम्बूशाखाश्च वीर्यवान्। चकार लक्ष्मणश्छित्वा सीताया स्सुखमासनम्।।

tatō vētasaśākhāśca jambūśākhāśca vīryavān. cakāra lakṣmaṇaśchitvā sītāyā ssukhamāsanam৷৷

तत्र श्रियमिवाचिन्त्यां रामो दाशरथिः प्रियाम्। ईषत्संलज्जमानां तामध्यारोपयतप्लवम्।।

tatra śriyamivācintyāṅ rāmō dāśarathiḥ priyām. īṣatsaṅlajjamānāṅ tāmadhyārōpayataplavam৷৷

पार्श्वे च तत्र वैदेह्या वसने भूषणानि च। प्लवे कठिनकाजं च रामश्चक्रे सहायुधैः।।

pārśvē ca tatra vaidēhyā vasanē bhūṣaṇāni ca. plavē kaṭhinakājaṅ ca rāmaścakrē sahāyudhaiḥ৷৷

आरोप्य प्रथमं सीतां सङ्घाटं परिगृह्य तौ। तत प्रतेरतुर्यत्तौ वीरौ दशरथात्मजौ।।

ārōpya prathamaṅ sītāṅ saṅghāṭaṅ parigṛhya tau. tata pratēraturyattau vīrau daśarathātmajau৷৷

कालिन्दीमध्यमायाता सीता त्वेनामवन्दत। स्वस्ति देवि तरामि त्वां पारये न्मे पतिर्व्रतम्।।

kālindīmadhyamāyātā sītā tvēnāmavandata. svasti dēvi! tarāmi tvāṅ pārayē nmē patirvratam৷৷

।। यक्ष्ये त्वां गोसहस्रेण सुराघटशतेन च। स्वस्ति प्रत्यागते रामे पुरी मिक्ष्वाकुपालिताम्।।

৷৷ yakṣyē tvāṅ gōsahasrēṇa surāghaṭaśatēna ca. svasti pratyāgatē rāmē purī mikṣvākupālitām৷৷

कालिन्दी मथ सीता तु याचमाना कृताञ्जलिः। तीरमेवाभिसम्प्राप्ता दक्षिणं वरवर्णिनी।।

kālindī matha sītā tu yācamānā kṛtāñjaliḥ. tīramēvābhisamprāptā dakṣiṇaṅ varavarṇinī৷৷

तत प्लवेनांशुमतीं शीघ्रगामूर्मिमालिनीम्। तीरजै र्बहुभिर्वृक्षै स्सन्तेरुर्यमुनां नदीम्।।

tata plavēnāṅśumatīṅ śīghragāmūrmimālinīm. tīrajai rbahubhirvṛkṣai ssantēruryamunāṅ nadīm৷৷

ते तीर्णाः प्लवमुत्सृज्य प्रस्थाय यमुनावनात्। श्यामं न्यग्रोध मासेदु श्शीतलं हरितच्छदम्।।

tē tīrṇāḥ plavamutsṛjya prasthāya yamunāvanāt. śyāmaṅ nyagrōdha māsēdu śśītalaṅ haritacchadam৷৷

न्यग्रोधं तमुपागम्य वैदेही वाक्यमब्रवीत्। नमस्तेऽस्तु महावृक्ष पारयेन्मे पतिर्व्रतम्।।

nyagrōdhaṅ tamupāgamya vaidēhī vākyamabravīt. namastē.stu mahāvṛkṣa! pārayēnmē patirvratam৷৷

।। कौशल्यां चैव पश्येयं सुमित्रां च यशश्विनीम्। इति सीताऽञ्जलिं कृत्वा पर्यगच्छद्वनस्पतिम्।।

৷৷ kauśalyāṅ caiva paśyēyaṅ sumitrāṅ ca yaśaśvinīm. iti sītā.ñjaliṅ kṛtvā paryagacchadvanaspatim৷৷

अवलोक्य तत स्सीतामायाचन्तीमनिन्दिताम्। दयितां च विधेयां च रामो लक्ष्मणमब्रवीत्।।

avalōkya tata ssītāmāyācantīmaninditām. dayitāṅ ca vidhēyāṅ ca rāmō lakṣmaṇamabravīt৷৷

सीतामादाय गच्छत्वमग्रतो भरतानुज। पृष्ठतोऽहं गमिष्यामि सायुधो द्विपदां वर।।

sītāmādāya gacchatvamagratō bharatānuja. pṛṣṭhatō.haṅ gamiṣyāmi sāyudhō dvipadāṅ vara৷৷

यद्यत्फलं प्रार्थयते पुष्पं वा जनकात्मजा। तत्तत्प्रदद्या वैदेह्या यत्राऽस्या रमते मनः।।

yadyatphalaṅ prārthayatē puṣpaṅ vā janakātmajā. tattatpradadyā vaidēhyā yatrā.syā ramatē manaḥ৷৷

गच्छतोऽस्तु तयोर्मध्ये बभूव जनकात्मजा। मातङ्गयोर्मध्यगता शुभा नागवधूरिव।।

gacchatō.stu tayōrmadhyē babhūva janakātmajā. mātaṅgayōrmadhyagatā śubhā nāgavadhūriva৷৷

एकैकं पादपं गुल्मं लतां वा पुष्पशालिनीम्। अदृष्टपूर्वां पश्यन्ती रामं पप्रच्छ साऽबला।।

ēkaikaṅ pādapaṅ gulmaṅ latāṅ vā puṣpaśālinīm. adṛṣṭapūrvāṅ paśyantī rāmaṅ papraccha sā.balā৷৷

रमणीयान्बहुविधान्पादपान्कुसुमोत्कटान्। सीतावचनसंरब्ध आनयामास लक्ष्मणः।।

ramaṇīyānbahuvidhānpādapānkusumōtkaṭān. sītāvacanasaṅrabdha ānayāmāsa lakṣmaṇaḥ৷৷

विचित्रवालुकजलां हंससारसनादिताम्। रेमे जनकराजस्य सुता प्रेक्ष्य तदा नदीम्।।

vicitravālukajalāṅ haṅsasārasanāditām. rēmē janakarājasya sutā prēkṣya tadā nadīm৷৷

क्रोशमात्रं ततो गत्वा भ्रातरौ रामलक्ष्मणौ। बहून्मेध्यान्मृगान्हत्वा चेरतुर्यमुनावने।।

krōśamātraṅ tatō gatvā bhrātarau rāmalakṣmaṇau. bahūnmēdhyānmṛgānhatvā cēraturyamunāvanē৷৷

विहृत्य ते बर्हिणपूगनादिते शुभे वने वानरवारणायुते। समं नदीवप्रमुपेत्य सम्मतं निवास माजग्मु रदीनदर्शनाः।।

vihṛtya tē barhiṇapūganāditē śubhē vanē vānaravāraṇāyutē. samaṅ nadīvapramupētya sammataṅ nivāsa mājagmu radīnadarśanāḥ৷৷