तमुक्तवन्तं वैदेहं विश्वामित्रो महामुनि:। उवाच वचनं वीरं वसिष्ठसहितो नृपम्।।

tamuktavantaṅ vaidēhaṅ viśvāmitrō mahāmuni:. uvāca vacanaṅ vīraṅ vasiṣṭhasahitō nṛpam৷৷

अचिन्त्यान्यप्रमेयानि कुलानि नरपुङ्गव। इक्ष्वाकूणां विदेहानां नैषां तुल्योऽस्ति कश्चन।।

acintyānyapramēyāni kulāni narapuṅgava!. ikṣvākūṇāṅ vidēhānāṅ naiṣāṅ tulyō.sti kaścana৷৷

सदृशो धर्मसम्बन्ध: सदृशो रूपसम्पदा। रामलक्ष्मणयो राजन् सीता चोर्मिलया सह।।

sadṛśō dharmasambandha: sadṛśō rūpasampadā. rāmalakṣmaṇayō rājan! sītā cōrmilayā saha৷৷

वक्तव्यं च नरश्रेष्ठ श्रूयतां वचनं मम। भ्राता यवीयान् धर्मज्ञ एष राजा कुशध्वज:।।

vaktavyaṅ ca naraśrēṣṭha! śrūyatāṅ vacanaṅ mama. bhrātā yavīyān dharmajña ēṣa rājā kuśadhvaja:৷৷

अस्य धर्मात्मनो राजन् रूपेणाप्रतिमं भुवि । सुताद्वयं नरश्रेष्ठ पत्न्यर्थं वरयामहे।।

asya dharmātmanō rājan! rūpēṇāpratimaṅ bhuvi . sutādvayaṅ naraśrēṣṭha patnyarthaṅ varayāmahē৷৷

भरतस्य कुमारस्य शत्रुघ्नस्य च धीमत:। वरयामस्सुते राजन् तयोरर्थे महात्मनो:।।

bharatasya kumārasya śatrughnasya ca dhīmata:. varayāmassutē rājan tayōrarthē mahātmanō:৷৷

पुत्रा दशरथस्येमे रूपयौवनशालिन:। लोकपालोपमास्सर्वे देवतुल्यपराक्रमा:।।

putrā daśarathasyēmē rūpayauvanaśālina:. lōkapālōpamāssarvē dēvatulyaparākramā:৷৷

उभयोरपि राजेन्द्र सम्बन्धेनानुबध्यताम्। इक्ष्वाको: कुलमव्यग्रं भवत:पुण्यकर्मण:।।

ubhayōrapi rājēndra sambandhēnānubadhyatām. ikṣvākō: kulamavyagraṅ bhavata:puṇyakarmaṇa:৷৷

विश्वामित्रवच श्शृत्वा वसिष्ठस्य मते तदा। जनक: प्रांजलिर्वाक्यमुवाच मुनिपुङ्गवौ।।

viśvāmitravaca śśṛtvā vasiṣṭhasya matē tadā. janaka: prāṅjalirvākyamuvāca munipuṅgavau৷৷

कुलं धन्यमिदं मन्ये येषां नो मुनिपुङ्गवौ । सदृशं कुलसम्बन्धं यदाज्ञापयथ: स्वयम्।।

kulaṅ dhanyamidaṅ manyē yēṣāṅ nō munipuṅgavau . sadṛśaṅ kulasambandhaṅ yadājñāpayatha: svayam৷৷

एवं भवतु भद्रं व: कुशध्वजसुते इमे। पत्न्यौ भजेतां सहितौ शत्रुघ्नभरतावुभौ।।

ēvaṅ bhavatu bhadraṅ va: kuśadhvajasutē imē. patnyau bhajētāṅ sahitau śatrughnabharatāvubhau৷৷

एकाह्ना राजपुत्रीणां चतसृणां महामुने। पाणीन् गृह्णन्तु चत्वारो राजपुत्रा महाबला:।।

ēkāhnā rājaputrīṇāṅ catasṛṇāṅ mahāmunē!. pāṇīn gṛhṇantu catvārō rājaputrā mahābalā:৷৷

उत्तरे दिवसे ब्रह्मन् फल्गुनीभ्यां मनीषिण:। वैवाहिकं प्रशंसन्ति भगो यत्र प्रजापति:।।

uttarē divasē brahman! phalgunībhyāṅ manīṣiṇa:. vaivāhikaṅ praśaṅsanti bhagō yatra prajāpati:৷৷

एवमुक्त्वा वचस्सौम्यं प्रत्युत्थाय कृताञ्जलि:। उभौ मुनिवरौ राजा जनको वाक्यमब्रवीत्।।

ēvamuktvā vacassaumyaṅ pratyutthāya kṛtāñjali:. ubhau munivarau rājā janakō vākyamabravīt৷৷

परो धर्म: कृतो मह्यं शिष्योऽस्मिभवतो सदा। इमान्यासनमुख्यानि आसातां मुनिपुङ्गवौ।।

parō dharma: kṛtō mahyaṅ śiṣyō.smibhavatō sadā. imānyāsanamukhyāni āsātāṅ munipuṅgavau৷৷

यथा दशरथस्येयं तथाऽयोध्या पुरी मम। प्रभुत्वे नास्ति सन्देहो यथार्हं कर्तुमर्हथ।।

yathā daśarathasyēyaṅ tathā.yōdhyā purī mama. prabhutvē nāsti sandēhō yathārhaṅ kartumarhatha৷৷

तथा ब्रुवति वैदेहे जनके रघुनन्दन:। राजा दशरथो हृष्ट: प्रत्युवाच महीपतिम्।।

tathā bruvati vaidēhē janakē raghunandana:. rājā daśarathō hṛṣṭa: pratyuvāca mahīpatim৷৷

युवामसङ्ख्येयगुणौ भ्रातरौ मिथिलेश्वरौ। ऋषयो राजसङ्घाश्च भवद्भ्यामभिपूजिता:।।

yuvāmasaṅkhyēyaguṇau bhrātarau mithilēśvarau. ṛṣayō rājasaṅghāśca bhavadbhyāmabhipūjitā:৷৷

स्वस्ति प्राप्नुहि भद्रं ते गमिष्यामि स्वमालयम्। श्राद्धकर्माणि सर्वाणि विधास्यामीति चाब्रवीत्।।

svasti prāpnuhi bhadraṅ tē gamiṣyāmi svamālayam. śrāddhakarmāṇi sarvāṇi vidhāsyāmīti cābravīt৷৷

तमापृष्ट्वा नरपतिं राजा दशरथस्तदा। मुनीन्द्रौ तौ पुरस्कृत्य जगामाशु महायशा:।।

tamāpṛṣṭvā narapatiṅ rājā daśarathastadā. munīndrau tau puraskṛtya jagāmāśu mahāyaśā:৷৷

स गत्वा निलयं राजा श्राद्धं कृत्वा विधानत:। प्रभाते काल्यमुत्थाय चक्रे गोदानमुत्तमम्।।

sa gatvā nilayaṅ rājā śrāddhaṅ kṛtvā vidhānata:. prabhātē kālyamutthāya cakrē gōdānamuttamam৷৷

गवां शतसहस्राणि ब्राह्मणेभ्यो नराधिप:। एकैकशो ददौ राजा पुत्रानुद्दिश्य धर्मत:।।

gavāṅ śatasahasrāṇi brāhmaṇēbhyō narādhipa:. ēkaikaśō dadau rājā putrānuddiśya dharmata:৷৷

सुवर्णश्रुङ्गा स्सम्पन्ना स्सवत्सा: कांस्यदोहना:। गवां शतसहस्राणि चत्वारि पुरुषर्षभ:।।

suvarṇaśruṅgā ssampannā ssavatsā: kāṅsyadōhanā:. gavāṅ śatasahasrāṇi catvāri puruṣarṣabha:৷৷

।। वित्तमन्यच्च सुबहुद्विजेभ्यो रघुनन्दन:। ददौ गोदानमुद्दिश्य पुत्राणां पुत्रवत्सल:।।

৷৷ vittamanyacca subahudvijēbhyō raghunandana:. dadau gōdānamuddiśya putrāṇāṅ putravatsala:৷৷

स सुतै: कृतगोदानैर्वृतस्तु नृपतिस्तदा। लोकपालैरिवाभाति वृत: स्सौम्य: प्रजापति:।।

sa sutai: kṛtagōdānairvṛtastu nṛpatistadā. lōkapālairivābhāti vṛta: ssaumya: prajāpati:৷৷