श्रीकृष्ण उवाच ॥ भगवञ्छ्रोतुमिच्छामि प्रतिष्ठाविधिमुत्तमम् ॥ लिंगस्यापि च बेरस्य शिवेन विहितं यथा ॥ १ ॥

zrIkRSNa uvAca ॥ bhagavaJchrotumicchAmi pratiSThAvidhimuttamam ॥ liMgasyApi ca berasya zivena vihitaM yathA ॥ 1 ॥

उपमन्युरुवाच अनात्मप्रतिकूले तु दिवसे शुक्लपक्षके ॥ शिवशास्त्रोक्तमार्गेण कुर्याल्लिंगं प्रमाणवत् ॥ २ ॥

upamanyuruvAca anAtmapratikUle tu divase zuklapakSake ॥ zivazAstroktamArgeNa kuryAlliMgaM pramANavat ॥ 2 ॥

स्वीकृत्याथ शुभस्थानं भूपरीक्षां विधाय च ॥ दशोपचारान्कुर्वीत लक्षणोद्धारपूर्वकान् ॥ ३ ॥

svIkRtyAtha zubhasthAnaM bhUparIkSAM vidhAya ca ॥ dazopacArAnkurvIta lakSaNoddhArapUrvakAn ॥ 3 ॥

तेषां दशोपचाराणां पूर्वं पूज्य १ विनायकम् ॥ स्थानशुद्ध्यादिकं कृत्वालिंगं स्नानालयं नयेत् ॥ ४ ॥

teSAM dazopacArANAM pUrvaM pUjya 1 vinAyakam ॥ sthAnazuddhyAdikaM kRtvAliMgaM snAnAlayaM nayet ॥ 4 ॥

शलाकया कांचनया २ कुंकुमादिरसाक्तया ॥ लक्षितं लक्षणं शिल्पशास्त्रेण विलिखेत्ततः ॥ ५ ॥

zalAkayA kAMcanayA 2 kuMkumAdirasAktayA ॥ lakSitaM lakSaNaM zilpazAstreNa vilikhettataH ॥ 5 ॥

अष्टमृत्सलिलैर्वाथ पञ्चमृत्सलिलैस्तथा ॥ लिङ्गं पिंडिकया सार्धं पञ्चगव्यैश्च शोधयेत् ॥ ६ ॥

aSTamRtsalilairvAtha paJcamRtsalilaistathA ॥ liGgaM piMDikayA sArdhaM paJcagavyaizca zodhayet ॥ 6 ॥

सवेदिकं समभ्यर्च्य दिव्याद्यं तु जलाशयम् ॥ नीत्वाधिवासयेत्तत्र लिंगं पिंडिकया सह ॥ ७ ॥

savedikaM samabhyarcya divyAdyaM tu jalAzayam ॥ nItvAdhivAsayettatra liMgaM piMDikayA saha ॥ 7 ॥

अधिवासालये शुद्धे सर्वशोभासमन्विते ॥सतोरणे सावरणे दर्भमालासमावृते ॥ ८ ॥

adhivAsAlaye zuddhe sarvazobhAsamanvite ॥satoraNe sAvaraNe darbhamAlAsamAvRte ॥ 8 ॥

दिग्गजाष्टकसंपन्ने दिक्पालाष्टघटान्विते ॥ अष्टमंगलकैर्युक्ते कृतदिक्पालकार्चिते ॥ ९ ॥

diggajASTakasaMpanne dikpAlASTaghaTAnvite ॥ aSTamaMgalakairyukte kRtadikpAlakArcite ॥ 9 ॥

तेजसं दारवं वापि कृत्वा पद्मासनांकितम् ॥ विन्यसेन्मध्यतस्तत्र विपुलं पीठकालयम् ॥ १० ॥

tejasaM dAravaM vApi kRtvA padmAsanAMkitam ॥ vinyasenmadhyatastatra vipulaM pIThakAlayam ॥ 10 ॥

द्वारपालान्समभ्यर्च्य भद्रादींश्चतुरःक्रमात् ॥ समुद्रश्च विभद्रश्च सुनंदश्च विनंदकः ॥ ११ ॥

dvArapAlAnsamabhyarcya bhadrAdIMzcaturaHkramAt ॥ samudrazca vibhadrazca sunaMdazca vinaMdakaH ॥ 11 ॥

स्नापयित्वा समभ्यर्च्य लिंगं वेदिकया सह ॥ सकूर्चाभ्यां तु वस्त्राभ्यां समावेष्ट्यं समंततः ॥ १२ ॥

snApayitvA samabhyarcya liMgaM vedikayA saha ॥ sakUrcAbhyAM tu vastrAbhyAM samAveSTyaM samaMtataH ॥ 12 ॥

प्रापय्य शनकैस्तोयं पीठिकोपरि शाययेत् ॥ प्राक्शिरस्कमधःसूत्रं पिंडिकां चास्य पश्चिमे ॥ १३ ॥

prApayya zanakaistoyaM pIThikopari zAyayet ॥ prAkziraskamadhaHsUtraM piMDikAM cAsya pazcime ॥ 13 ॥

सर्वमंगलसंयुक्तं लिंगं तत्राधिवासयेत् ॥ पञ्चरात्रं त्रिरात्रं वाप्येकरात्रमथापि वा ॥ १४ ॥

sarvamaMgalasaMyuktaM liMgaM tatrAdhivAsayet ॥ paJcarAtraM trirAtraM vApyekarAtramathApi vA ॥ 14 ॥

विसृज्य पूजितं तत्र शोधयित्वा च पूर्ववत् ॥ संपूज्योत्सवमार्गेण शयनालयमानयेत् ॥ १५ ॥

visRjya pUjitaM tatra zodhayitvA ca pUrvavat ॥ saMpUjyotsavamArgeNa zayanAlayamAnayet ॥ 15 ॥

तत्रापि शयनस्थानं कुर्यान्मंडलमध्यतः ॥ शुद्धैर्जलैः स्नापयित्वा लिंगमभ्यर्चयेत्क्रमात् ॥ १६ ॥

tatrApi zayanasthAnaM kuryAnmaMDalamadhyataH ॥ zuddhairjalaiH snApayitvA liMgamabhyarcayetkramAt ॥ 16 ॥

ऐशान्यां पद्ममालिख्य शुद्धलिप्ते महीतले ॥ शिवकुंभं शोधयित्वा तत्रावाह्य शिवं यजेत् ॥ १७ ॥

aizAnyAM padmamAlikhya zuddhalipte mahItale ॥ zivakuMbhaM zodhayitvA tatrAvAhya zivaM yajet ॥ 17 ॥

क्षौमाद्यैर्वाहतैर्वस्त्रैः पुष्पैर्दर्भैरथापि वा ॥ प्रकल्प्य शयनं तस्मिन्हेमपुष्पं विनिक्षिपेत् ॥ १९ ॥

kSaumAdyairvAhatairvastraiH puSpairdarbhairathApi vA ॥ prakalpya zayanaM tasminhemapuSpaM vinikSipet ॥ 19 ॥

क्षौमाद्यैर्वाहतैर्वस्त्रैः पुष्पैर्दर्भैरथापि वा ॥ प्रकल्प्य शयनं तस्मिन्हेमपुष्पं विनिक्षिपेत् ॥ १९ ॥

kSaumAdyairvAhatairvastraiH puSpairdarbhairathApi vA ॥ prakalpya zayanaM tasminhemapuSpaM vinikSipet ॥ 19 ॥

तत्र लिंगं समानीय सर्वमंगलनिःस्वनैः ॥ रक्तेन वस्त्रयुग्मेन सकूर्चेन समंततः ॥ २० ॥

tatra liMgaM samAnIya sarvamaMgalaniHsvanaiH ॥ raktena vastrayugmena sakUrcena samaMtataH ॥ 20 ॥

सह पिंडिकयावेष्ट्य शाययेच्च यथा पुरा ॥ पुरस्तात्पद्ममालिख्य तद्दलेषु यथाक्रमम् ॥ २१ ॥

saha piMDikayAveSTya zAyayecca yathA purA ॥ purastAtpadmamAlikhya taddaleSu yathAkramam ॥ 21 ॥

विद्येशकलशान्न्यस्येन्मध्ये शैवीं च वर्धनीम् ॥ परीत्य पद्मत्रितयं जुहुयुर्द्विजसत्तमाः ॥ २२ ॥

vidyezakalazAnnyasyenmadhye zaivIM ca vardhanIm ॥ parItya padmatritayaM juhuyurdvijasattamAH ॥ 22 ॥

ते चाष्टमूर्तयः कल्प्याः पूर्वादिपरितः स्थिताः ॥ चत्वारश्चाथ वा दिक्षु स्वध्येतारस्सजापकाः ॥ २३ ॥

te cASTamUrtayaH kalpyAH pUrvAdiparitaH sthitAH ॥ catvArazcAtha vA dikSu svadhyetArassajApakAH ॥ 23 ॥

जुहुयुस्ते विरंच्याद्याश्चतस्रो मूर्तयः स्मृताः ॥ दैशिकः प्रथमं तेषामैशान्यां पश्चिमे ऽथ वा ॥ २४ ॥

juhuyuste viraMcyAdyAzcatasro mUrtayaH smRtAH ॥ daizikaH prathamaM teSAmaizAnyAM pazcime 'tha vA ॥ 24 ॥

प्रधानहोमं कुर्वीत सप्तद्रव्यैर्यथाक्रमम् ॥ आचार्यात्पादमर्धं वा जुहुयुश्चापरे द्विजाः ॥ २५ ॥

pradhAnahomaM kurvIta saptadravyairyathAkramam ॥ AcAryAtpAdamardhaM vA juhuyuzcApare dvijAH ॥ 25 ॥

प्रधानमेकमेवात्र जुहुयादथ वा गुरुः ॥ पूर्वं पूर्णाहुतिं हुत्वा घृतेनाष्टोत्तरं शतम् ॥ २६ ॥

pradhAnamekamevAtra juhuyAdatha vA guruH ॥ pUrvaM pUrNAhutiM hutvA ghRtenASTottaraM zatam ॥ 26 ॥

मूर्ध्नि मूलेन लिंगस्य शिवहस्तं प्रविन्यसेत् ॥ शतमर्धं तदर्धं वा क्रमाद्द्रव्यैश्च सप्तभिः ॥ २७ ॥

mUrdhni mUlena liMgasya zivahastaM pravinyaset ॥ zatamardhaM tadardhaM vA kramAddravyaizca saptabhiH ॥ 27 ॥

हुत्वाहुत्वा स्पृशेल्लिंगं वेदिकां च पुनः पुनः ॥ पूर्णाहुतिं ततो हुत्वा क्रमाद्दद्याच्च दक्षिणाम् ॥ २८ ॥

hutvAhutvA spRzelliMgaM vedikAM ca punaH punaH ॥ pUrNAhutiM tato hutvA kramAddadyAcca dakSiNAm ॥ 28 ॥

आचार्यात्पादमर्धं वा होत्ःणां स्थपतेरपि ॥ तदर्धं देयमन्येभ्यः सदस्येभ्यश्च शक्तितः ॥ २९ ॥

AcAryAtpAdamardhaM vA hotHNAM sthapaterapi ॥ tadardhaM deyamanyebhyaH sadasyebhyazca zaktitaH ॥ 29 ॥

ततः श्वभ्रे वृषं हैमं कूर्चं वापि निवेश्य च ॥ मृदंभसा पञ्चगव्यैः पुनः शुद्धजलेन च ॥ ३० ॥

tataH zvabhre vRSaM haimaM kUrcaM vApi nivezya ca ॥ mRdaMbhasA paJcagavyaiH punaH zuddhajalena ca ॥ 30 ॥

शोधितां चंदनालिप्तां श्वभ्रे ब्रह्मशिलां क्षिपेत् ॥ करन्यासं ततः कृत्वा नवभिः शक्तिनामभिः ॥ ३१ ॥

zodhitAM caMdanAliptAM zvabhre brahmazilAM kSipet ॥ karanyAsaM tataH kRtvA navabhiH zaktinAmabhiH ॥ 31 ॥

हरितालादिधातूंश्च बीजगंधौषधैरपि ॥ शिवशास्त्रोक्तविधिना क्षिपेद्ब्रह्मशिलोपरि ॥ ३२ ॥

haritAlAdidhAtUMzca bIjagaMdhauSadhairapi ॥ zivazAstroktavidhinA kSipedbrahmazilopari ॥ 32 ॥

प्रतिलिंगं तु संस्थाप्य क्षीरं वृक्षसमुद्भवम् ॥ स्थितं बुद्ध्वा तदुत्सृज्य लिंगं ब्रह्मशिलोपरि ॥ ३३ ॥

pratiliMgaM tu saMsthApya kSIraM vRkSasamudbhavam ॥ sthitaM buddhvA tadutsRjya liMgaM brahmazilopari ॥ 33 ॥

प्रागुदक्प्रवरां किंचित्स्थापयेन्मूलविद्यया ॥ पिंडिकां चाथ संयोज्य शाक्तं मूलमनुस्मरन् ॥ ३४ ॥

prAgudakpravarAM kiMcitsthApayenmUlavidyayA ॥ piMDikAM cAtha saMyojya zAktaM mUlamanusmaran ॥ 34 ॥

बन्धनं बंधकद्रव्यैः कृत्वा स्थानं विशोध्य च ॥ दत्त्वा चार्घ्यं च पुष्पाणि कुर्युर्यवनिकां पुनः ॥ ३५ ॥

bandhanaM baMdhakadravyaiH kRtvA sthAnaM vizodhya ca ॥ dattvA cArghyaM ca puSpANi kuryuryavanikAM punaH ॥ 35 ॥

यथायोग्यं निषेकादि लिंगस्य पुरतस्तदा ॥ आनीय शयनस्थानात्कलशान्विन्यसेत्क्रमात् ॥ ३६ ॥

yathAyogyaM niSekAdi liMgasya puratastadA ॥ AnIya zayanasthAnAtkalazAnvinyasetkramAt ॥ 36 ॥

महापूजामथारभ्य संपूज्य कलशान्दश ॥ शिवमंत्रमनुस्मृत्य शिवकुंभजलांतरे ॥ ३७ ॥

mahApUjAmathArabhya saMpUjya kalazAndaza ॥ zivamaMtramanusmRtya zivakuMbhajalAMtare ॥ 37 ॥

अंगुष्ठानामिकायोगादादाय तमुदीरयेत् ॥ न्यसेदीशानभागस्य मध्ये लिंगस्य मंत्रवित् ॥ ३८ ॥

aMguSThAnAmikAyogAdAdAya tamudIrayet ॥ nyasedIzAnabhAgasya madhye liMgasya maMtravit ॥ 38 ॥

शक्तिं न्यसेत्तथा विद्यां विद्येशांश्च यथाक्रमम् ॥ लिङ्गमूले शिवजलैस्ततो लिंगं निषेचयेत् ॥ ३९ ॥

zaktiM nyasettathA vidyAM vidyezAMzca yathAkramam ॥ liGgamUle zivajalaistato liMgaM niSecayet ॥ 39 ॥

वर्धन्यां पिंडिकालिंगं विद्येशकलशैः पुनः ॥ अभिषिच्यासनं पश्चादाधाराद्यं प्रकल्पयेत् ॥ ४० ॥

vardhanyAM piMDikAliMgaM vidyezakalazaiH punaH ॥ abhiSicyAsanaM pazcAdAdhArAdyaM prakalpayet ॥ 40 ॥

कृत्वा पञ्चकलान्यासं दीप्तं लिंगमनुस्मरेत् ॥ आवाहयेच्छिवौ साक्षात्प्राञ्जलिः प्रागुदङ्मुखः ॥ ४१ ॥

kRtvA paJcakalAnyAsaM dIptaM liMgamanusmaret ॥ AvAhayecchivau sAkSAtprAJjaliH prAgudaGmukhaH ॥ 41 ॥

वृषाधिराजमारुह्य विमानं वा नभस्तलात् ॥ अलंकृतं सहायांतं देव्या देवमनुस्मरन् ॥ सर्वाभरणशोभाढ्यं सर्वमंगलनिस्वनैः ॥ ४२ ॥

vRSAdhirAjamAruhya vimAnaM vA nabhastalAt ॥ alaMkRtaM sahAyAMtaM devyA devamanusmaran ॥ sarvAbharaNazobhADhyaM sarvamaMgalanisvanaiH ॥ 42 ॥

ब्रह्मविष्णुमहेशार्कशक्राद्यैर्देवदानवैः ॥ आनंदक्लिन्नसर्वांगैर्विन्यस्तांजलिमस्तकैः ॥ ४३ ॥

brahmaviSNumahezArkazakrAdyairdevadAnavaiH ॥ AnaMdaklinnasarvAMgairvinyastAMjalimastakaiH ॥ 43 ॥

स्तुवद्भिरेव नृत्यद्भिर्नामद्भिरभितो वृतम् ॥ ततः पञ्चोपचारांश्च कृत्वा पूजां समापयेत् ॥ ४४ ॥

stuvadbhireva nRtyadbhirnAmadbhirabhito vRtam ॥ tataH paJcopacArAMzca kRtvA pUjAM samApayet ॥ 44 ॥

नातः परतरः कश्चिद्विधिः पञ्चोपचारकात् ॥ प्रतिष्ठां लिंगवत्कुर्यात्प्रतिमास्वपि सर्वतः ॥ ४५ ॥

nAtaH parataraH kazcidvidhiH paJcopacArakAt ॥ pratiSThAM liMgavatkuryAtpratimAsvapi sarvataH ॥ 45 ॥

लक्षणोद्धारसमये कार्यं नयनमोचनम् ॥ जलाधिवासे शयने शाययेत्तान्त्वधोमुखीम् ॥ ४६ ॥

lakSaNoddhArasamaye kAryaM nayanamocanam ॥ jalAdhivAse zayane zAyayettAntvadhomukhIm ॥ 46 ॥

कुम्भोदशायितां मंत्रैर्हृदि तां सन्नियोजयेत् ॥ कृतालयां परामाहुः प्रतिष्ठामकृतालयात् ॥ ४७ ॥

kumbhodazAyitAM maMtrairhRdi tAM sanniyojayet ॥ kRtAlayAM parAmAhuH pratiSThAmakRtAlayAt ॥ 47 ॥

शक्तः कृतालयः पश्चात्प्रतिष्ठाविधिमाचरेत् ॥ अशक्तश्चेत्प्रतिष्ठाप्य लिंगं बेरमथापि वा ॥ ४८ ॥

zaktaH kRtAlayaH pazcAtpratiSThAvidhimAcaret ॥ azaktazcetpratiSThApya liMgaM beramathApi vA ॥ 48 ॥

शक्तेरनुगुणं पश्चात्प्रकुर्वीत शिवालयम् ॥ गृहार्चां च पुनर्वक्ष्ये प्रतिष्ठाविधिमुत्तमम् ॥ ४९ ॥

zakteranuguNaM pazcAtprakurvIta zivAlayam ॥ gRhArcAM ca punarvakSye pratiSThAvidhimuttamam ॥ 49 ॥

कृत्वा कनीयसंबेरं लिंगं वा लक्षणान्वितम् ॥ अयने चोत्तरे प्राप्ते शुक्लपक्शे शुभे दिने ॥ ५० ॥

kRtvA kanIyasaMberaM liMgaM vA lakSaNAnvitam ॥ ayane cottare prApte zuklapakze zubhe dine ॥ 50 ॥

देवीं कृत्वा शुभे देशे तत्राब्जं पूर्ववल्लिखेत् ॥ विकीर्य पत्रपुष्पाद्यैर्मध्ये कुंभं निधाय च ॥ ५१ ॥

devIM kRtvA zubhe deze tatrAbjaM pUrvavallikhet ॥ vikIrya patrapuSpAdyairmadhye kuMbhaM nidhAya ca ॥ 51 ॥

परितस्तस्य चतुरः कलशान् दिक्षु विन्यसेत् ॥ पञ्च ब्रह्माणि तद्बीजैस्तेषु पञ्चसु पञ्चभिः ॥ ५२ ॥

paritastasya caturaH kalazAn dikSu vinyaset ॥ paJca brahmANi tadbIjaisteSu paJcasu paJcabhiH ॥ 52 ॥

न्यस्य संपूज्य मुद्रादि दर्शयित्वाभिरक्ष्य च ॥ विशोध्य लिंगं बेरं वा मृत्तोयाद्यैर्यथा पुरा ॥ ५३ ॥

nyasya saMpUjya mudrAdi darzayitvAbhirakSya ca ॥ vizodhya liMgaM beraM vA mRttoyAdyairyathA purA ॥ 53 ॥

स्थापयेत्पुष्पसंछन्नमुत्तरस्थे वरासने ॥ निधाय पुष्पं शिरसि प्रोक्षयेत्प्रोक्षणीजलैः ॥ ५४ ॥

sthApayetpuSpasaMchannamuttarasthe varAsane ॥ nidhAya puSpaM zirasi prokSayetprokSaNIjalaiH ॥ 54 ॥

समभ्यर्च्य पुनः पुष्पैर्जयशब्दादिपूर्वकम् ॥ कुम्भैरीशानविद्यांतैः स्नापयेन्मूलविद्यया ॥ ५५ ॥

samabhyarcya punaH puSpairjayazabdAdipUrvakam ॥ kumbhairIzAnavidyAMtaiH snApayenmUlavidyayA ॥ 55 ॥

ततः पञ्चकलान्यासं कृत्वा पूजां च पूर्ववत् ॥ नित्यमाराधयेत्तत्र देव्या देवं त्रिलोचनम् ॥ ५६ ॥

tataH paJcakalAnyAsaM kRtvA pUjAM ca pUrvavat ॥ nityamArAdhayettatra devyA devaM trilocanam ॥ 56 ॥

एकमेवाथ वा कुंभं मूर्तिमन्त्रसमन्वितम् ॥ न्यस्य पद्मांतरे सर्वं शेषं पूर्ववदाचरेत् ॥ ५७ ॥

ekamevAtha vA kuMbhaM mUrtimantrasamanvitam ॥ nyasya padmAMtare sarvaM zeSaM pUrvavadAcaret ॥ 57 ॥

अत्यंतोपहतं लिंगं विशोध्य स्थापयेत्पुनः ॥ संप्रोक्षयेदुपहतमनागुपहतं यजेत् ॥ ५८ ॥

atyaMtopahataM liMgaM vizodhya sthApayetpunaH ॥ saMprokSayedupahatamanAgupahataM yajet ॥ 58 ॥

लिंगानि बाणसंज्ञानि स्थापनीयानि वा न वा ॥ तानि पूर्वं शिवेनैव संस्कृतानि यतस्ततः ॥ ५९ ॥

liMgAni bANasaMjJAni sthApanIyAni vA na vA ॥ tAni pUrvaM zivenaiva saMskRtAni yatastataH ॥ 59 ॥

शेषाणि स्थापनीयानि यानि दृष्टानि बाणवत् ॥ स्वयमुद्भूतलिंगे च दिव्ये चार्षे तथैव च ॥ ६० ॥

zeSANi sthApanIyAni yAni dRSTAni bANavat ॥ svayamudbhUtaliMge ca divye cArSe tathaiva ca ॥ 60 ॥

अपीठे पीठमावेश्य कृत्वा संप्रोक्षणं विधिम् ॥ यजेत्तत्र शिवं तेषां प्रतिष्ठा न विधीयते ॥ ६१ ॥

apIThe pIThamAvezya kRtvA saMprokSaNaM vidhim ॥ yajettatra zivaM teSAM pratiSThA na vidhIyate ॥ 61 ॥

दग्धं श्लथं क्षतांगं च क्षिपेल्लिंगं जलाशये ॥ संधानयोग्यं संधाय प्रतिष्ठाविधिमाचरेत् ॥ ६२ ॥

dagdhaM zlathaM kSatAMgaM ca kSipelliMgaM jalAzaye ॥ saMdhAnayogyaM saMdhAya pratiSThAvidhimAcaret ॥ 62 ॥

बेराद्वा विकलाल्लिंगाद्देवपूजापुरस्सरम् ॥ उद्वास्य हृदि संधानं त्यागं वा युक्तमाचरेत् ॥ ६३ ॥

berAdvA vikalAlliMgAddevapUjApurassaram ॥ udvAsya hRdi saMdhAnaM tyAgaM vA yuktamAcaret ॥ 63 ॥

एकाहपूजाविहतौ कुर्याद्द्विगुणमर्चनम् ॥ द्विरात्रे च महापूजां संप्रोक्षणमतः परम् ॥ ६४ ॥

ekAhapUjAvihatau kuryAddviguNamarcanam ॥ dvirAtre ca mahApUjAM saMprokSaNamataH param ॥ 64 ॥

मासादूर्ध्वमनेकाहं पूजा यदि विहन्यते ॥ प्रतिष्ठा प्रोच्यते कैश्चित्कैश्चित्संप्रोक्षणक्रमः ॥ ६५ ॥

mAsAdUrdhvamanekAhaM pUjA yadi vihanyate ॥ pratiSThA procyate kaizcitkaizcitsaMprokSaNakramaH ॥ 65 ॥

संप्रोक्षणे तु लिंगादेर्देवमुद्वास्य पूर्ववत् ॥ अष्टपञ्चक्रमेणैव स्नापयित्वा मृदंभसा ॥ ६६ ॥

saMprokSaNe tu liMgAderdevamudvAsya pUrvavat ॥ aSTapaJcakrameNaiva snApayitvA mRdaMbhasA ॥ 66 ॥

गवां रसैश्च संस्नाप्य दर्भतोयैर्विशोध्य च ॥ प्रोक्षयेत्प्रोक्षणीतोयैर्मूलेनाष्टोत्तरं शतम् ॥ ६७ ॥

gavAM rasaizca saMsnApya darbhatoyairvizodhya ca ॥ prokSayetprokSaNItoyairmUlenASTottaraM zatam ॥ 67 ॥

सपुष्पं सकुशं पाणिं न्यस्य लिंगस्य मस्तके ॥ पञ्चवारं जपेन्मूलमष्टोत्तरशतं ततः ॥ ६८ ॥

sapuSpaM sakuzaM pANiM nyasya liMgasya mastake ॥ paJcavAraM japenmUlamaSTottarazataM tataH ॥ 68 ॥

ततो मूलेन मूर्धादिपीठांतं संस्पृशेदपि ॥ पूजां च महतीं कुर्याद्देवमावाह्य पूर्ववत् ॥ ६९ ॥

tato mUlena mUrdhAdipIThAMtaM saMspRzedapi ॥ pUjAM ca mahatIM kuryAddevamAvAhya pUrvavat ॥ 69 ॥

अलब्धे स्थापिते लिंगे शिवस्थाने जले ऽथ वा ॥ वह्नौ रवौ तथा व्योम्नि भगवंतं शिवं यजेत् ॥ ७० ॥

alabdhe sthApite liMge zivasthAne jale 'tha vA ॥ vahnau ravau tathA vyomni bhagavaMtaM zivaM yajet ॥ 70 ॥