उपमन्युरुवाच ॥ अतः परं प्रवक्ष्यामि केवलामुष्मिकं विधिम् ॥ नैतेन सदृशं किंचित्कर्मास्ति भुवनत्रये ॥ १ ॥

upamanyuruvAca ॥ ataH paraM pravakSyAmi kevalAmuSmikaM vidhim ॥ naitena sadRzaM kiMcitkarmAsti bhuvanatraye ॥ 1 ॥

पुण्यातिशयसंयुक्तः सर्वैर्देवैरनुष्ठितः ॥ ब्रह्मणा विष्णुना चैव रुद्रेण च विशेषतः ॥ २ ॥

puNyAtizayasaMyuktaH sarvairdevairanuSThitaH ॥ brahmaNA viSNunA caiva rudreNa ca vizeSataH ॥ 2 ॥

इंद्रादिलोकपारैश्च सूर्याद्यैर्नवभिर्ग्रहैः ॥ विश्वामित्रवसिष्ठाद्यैर्ब्रह्मविद्भिर्महर्षिभिः ॥ ३ ॥

iMdrAdilokapAraizca sUryAdyairnavabhirgrahaiH ॥ vizvAmitravasiSThAdyairbrahmavidbhirmaharSibhiH ॥ 3 ॥

श्वेतागस्त्यदधीचाद्यैरस्माभिश्च शिवाश्रितैः ॥ नंदीश्वरमहाकालभृंगीशाद्यैर्गणेश्वरैः ॥ ४ ॥

zvetAgastyadadhIcAdyairasmAbhizca zivAzritaiH ॥ naMdIzvaramahAkAlabhRMgIzAdyairgaNezvaraiH ॥ 4 ॥

पातालवासिभिर्दैत्यैः शेषाद्यैश्च महोरगैः ॥ सिद्धैर्यक्षैश्च गंधर्वै रक्षोभूतपिशाचकैः ॥ ५ ॥

pAtAlavAsibhirdaityaiH zeSAdyaizca mahoragaiH ॥ siddhairyakSaizca gaMdharvai rakSobhUtapizAcakaiH ॥ 5 ॥

स्वंस्वं पदमनुप्राप्तं सर्वैरयमनुष्ठितः ॥ अनेन विधिना सर्वे देवा देवत्वमागताः ॥ ६ ॥

svaMsvaM padamanuprAptaM sarvairayamanuSThitaH ॥ anena vidhinA sarve devA devatvamAgatAH ॥ 6 ॥

ब्रह्मा ब्रह्मत्वमापन्नो विष्णुर्विष्णुत्वमागतः ॥ रुद्रो रुद्रत्वमापन्न इंद्रश्चेन्द्रत्वमागतः ॥ ७ ॥

brahmA brahmatvamApanno viSNurviSNutvamAgataH ॥ rudro rudratvamApanna iMdrazcendratvamAgataH ॥ 7 ॥

गणेशश्च गणेशत्वमनेन विधिना गतः ॥ सितचंदनतोयेन लिंगं स्नाप्य शिवं शिवाम् ॥ श्वेतैर्विकसितैः पद्मैः संपूज्य प्रणिपत्य च ॥ ८ ॥

gaNezazca gaNezatvamanena vidhinA gataH ॥ sitacaMdanatoyena liMgaM snApya zivaM zivAm ॥ zvetairvikasitaiH padmaiH saMpUjya praNipatya ca ॥ 8 ॥

तत्र पद्मासनं रम्यं कृत्वा लक्षणसंयुतम् ॥ विभवे सति हेमाद्यै रत्नाद्यैर्वा स्वशक्तितः ॥ ९ ॥

tatra padmAsanaM ramyaM kRtvA lakSaNasaMyutam ॥ vibhave sati hemAdyai ratnAdyairvA svazaktitaH ॥ 9 ॥

मध्ये केसरजालास्य स्थाप्य लिंगं कनीयसम् ॥ अंगुष्ठप्रतिमं रम्यं सर्वगन्धमयं शुभम् ॥ १० ॥

madhye kesarajAlAsya sthApya liMgaM kanIyasam ॥ aMguSThapratimaM ramyaM sarvagandhamayaM zubham ॥ 10 ॥

दक्षिणे स्थापयित्वा तु बिल्वपत्रैः समर्चयेत् ॥ अगुरुं दक्षिणे पार्श्वे पश्चिमे तु मनःशिलाम् ॥ ११ ॥

dakSiNe sthApayitvA tu bilvapatraiH samarcayet ॥ aguruM dakSiNe pArzve pazcime tu manaHzilAm ॥ 11 ॥

उत्तरे चंदनं दद्याद्धरितालं तु पूर्वतः ॥ सुगन्धैः कुसुमै रम्यैर्विचित्रैश्चापि पूजयेत् ॥ १२ ॥

uttare caMdanaM dadyAddharitAlaM tu pUrvataH ॥ sugandhaiH kusumai ramyairvicitraizcApi pUjayet ॥ 12 ॥

धूपं कृष्णागुरुं दद्यात्सर्वतश्च सगुग्गुलम् ॥ वासांसि चातिसूक्ष्माणि विकाशानि निवेदयेत् ॥ १३ ॥

dhUpaM kRSNAguruM dadyAtsarvatazca saguggulam ॥ vAsAMsi cAtisUkSmANi vikAzAni nivedayet ॥ 13 ॥

पायसं घृतसंमिश्रं घृतदीपांश्च दापयेत् ॥ सर्वं निवेद्य मन्त्रेण ततो गच्छेत्प्रदक्षिणाम् ॥ १४ ॥

pAyasaM ghRtasaMmizraM ghRtadIpAMzca dApayet ॥ sarvaM nivedya mantreNa tato gacchetpradakSiNAm ॥ 14 ॥

प्रणम्य भक्त्या देवेशं स्तुत्वा चान्ते क्षमापयेत् ॥ सर्वोपहारसंमिश्रं ततो लिंगं निवेदयेत् ॥ १५ ॥

praNamya bhaktyA devezaM stutvA cAnte kSamApayet ॥ sarvopahArasaMmizraM tato liMgaM nivedayet ॥ 15 ॥

शिवाय शिवमन्त्रेण दक्षिणामूर्तिमाश्रितः ॥ एवं यो ऽर्चयते नित्यं पञ्चगन्धमयं शुभम् ॥ १६ ॥

zivAya zivamantreNa dakSiNAmUrtimAzritaH ॥ evaM yo 'rcayate nityaM paJcagandhamayaM zubham ॥ 16 ॥

सर्वपापविनिर्मुक्तः शिवलोके महीयते ॥ एतद्व्रतोत्तमं गुह्यं शिवलिंगमहाव्रतम् ॥ १७ ॥

sarvapApavinirmuktaH zivaloke mahIyate ॥ etadvratottamaM guhyaM zivaliMgamahAvratam ॥ 17 ॥

भक्तस्य ते समाख्यातं न देयं यस्य कस्यचित् ॥ देयं च शिवभक्तेभ्यः शिवेन कथितं पुरा ॥ १८ ॥

bhaktasya te samAkhyAtaM na deyaM yasya kasyacit ॥ deyaM ca zivabhaktebhyaH zivena kathitaM purA ॥ 18 ॥