उपमन्युरुवाच ॥ एतत्ते कथितं कृष्ण कर्मेहामुत्र सिद्धिदम् ॥ क्रियातपोजपध्यानसमुच्चयमयं परम् ॥ १ ॥

upamanyuruvAca ॥ etatte kathitaM kRSNa karmehAmutra siddhidam ॥ kriyAtapojapadhyAnasamuccayamayaM param ॥ 1 ॥

अथ वक्ष्यामि शैवानामिहैव फलदं नृणाम् ॥ पूजाहोमजपध्यानतपोदानमयं महत् ॥ २ ॥

atha vakSyAmi zaivAnAmihaiva phaladaM nRNAm ॥ pUjAhomajapadhyAnatapodAnamayaM mahat ॥ 2 ॥

तत्र संसाधयेत्पूर्वं मन्त्रं मन्त्रार्थवित्तमः ॥ दृष्टसिद्धिकरं कर्म नान्यथा फलदं यतः ॥ ३ ॥

tatra saMsAdhayetpUrvaM mantraM mantrArthavittamaH ॥ dRSTasiddhikaraM karma nAnyathA phaladaM yataH ॥ 3 ॥

सिद्धमन्त्रो ऽप्यदृष्टेन प्रबलेन तु केनचित् ॥ प्रतिबन्धफलं कर्म न कुर्यात्सहसा बुधः ॥ ४ ॥

siddhamantro 'pyadRSTena prabalena tu kenacit ॥ pratibandhaphalaM karma na kuryAtsahasA budhaH ॥ 4 ॥

तस्य तु प्रतिबन्धस्य कर्तुं शक्येह निष्कृतिः ॥ परीक्ष्य शकुनाद्यैस्तदादौ निष्कृतिमाचरेत् ॥ ५ ॥

tasya tu pratibandhasya kartuM zakyeha niSkRtiH ॥ parIkSya zakunAdyaistadAdau niSkRtimAcaret ॥ 5 ॥

यो ऽन्यथा कुरुते मोहात्कर्मैहिकफलं नरः ॥ न तेन फलभाक्स स्यात्प्राप्नुयाच्चोपहास्यताम् ॥ ६ ॥

yo 'nyathA kurute mohAtkarmaihikaphalaM naraH ॥ na tena phalabhAksa syAtprApnuyAccopahAsyatAm ॥ 6 ॥

अबिस्रब्धो न कुर्वीत कर्म दृष्टफलं क्वचित् ॥ स खल्वश्रद्धधानः स्यान्नाश्रद्धः फलमृच्छति ॥ ७ ॥

abisrabdho na kurvIta karma dRSTaphalaM kvacit ॥ sa khalvazraddhadhAnaH syAnnAzraddhaH phalamRcchati ॥ 7 ॥

नापराधोस्ति देवस्य कर्मण्यपि तु निष्फले ॥ यथोक्तकारिणां पुंसामिहैव फलदर्शनात् ॥ ८ ॥

nAparAdhosti devasya karmaNyapi tu niSphale ॥ yathoktakAriNAM puMsAmihaiva phaladarzanAt ॥ 8 ॥

साधकः सिद्धमंत्रश्च निरस्तप्रतिबंधकः ॥ विश्वस्तः श्रद्धधानश्च कुर्वन्नाप्नोति तत्फलम् ॥ ९ ॥

sAdhakaH siddhamaMtrazca nirastapratibaMdhakaH ॥ vizvastaH zraddhadhAnazca kurvannApnoti tatphalam ॥ 9 ॥

अथवा तत्फलावाप्त्यै ब्रह्मचर्यरतो भवेत् ॥ रात्रौ हविष्यमश्नीयात्पायसं वा फलानि वा ॥ १० ॥

athavA tatphalAvAptyai brahmacaryarato bhavet ॥ rAtrau haviSyamaznIyAtpAyasaM vA phalAni vA ॥ 10 ॥

हिंसादि यन्निषिद्धं स्यान्न कुर्यान्मनसापि तत् ॥ सदा भस्मानुलिप्तां गस्सुवेषश्च शुचिर्भवेत् ॥ ११ ॥

hiMsAdi yanniSiddhaM syAnna kuryAnmanasApi tat ॥ sadA bhasmAnuliptAM gassuveSazca zucirbhavet ॥ 11 ॥

इत्थमाचारवान्भूत्वा स्वानुकूले शुभे ऽहनि ॥ पूर्वोक्तलक्षणे देशे पुष्पदामाद्यलंकृते ॥ १२ ॥

itthamAcAravAnbhUtvA svAnukUle zubhe 'hani ॥ pUrvoktalakSaNe deze puSpadAmAdyalaMkRte ॥ 12 ॥

आलिप्य शकृता १ भूमिं हस्तमानावरां यथा ॥ विलिखेत्कमले भद्रे दीप्यमानं स्वतेजसा ॥ १३ ॥

Alipya zakRtA 1 bhUmiM hastamAnAvarAM yathA ॥ vilikhetkamale bhadre dIpyamAnaM svatejasA ॥ 13 ॥

तप्तजांबूनदमयमष्टपत्रं सकेसरम् ॥ मध्ये कर्णिकया युक्तं सर्वरत्नैरलंकृतम् ॥ १४ ॥

taptajAMbUnadamayamaSTapatraM sakesaram ॥ madhye karNikayA yuktaM sarvaratnairalaMkRtam ॥ 14 ॥

स्वाकारसदृशेनैव नालेन च समन्वितम् ॥ तादृशे स्वर्णनिर्माणे कंदे सम्यग्विधानतः ॥ १५ ॥

svAkArasadRzenaiva nAlena ca samanvitam ॥ tAdRze svarNanirmANe kaMde samyagvidhAnataH ॥ 15 ॥

तत्राणिमादिकं सर्वं संकल्प्य मनसा पुनः ॥ रत्नजं वाथ सौवर्णं स्फटिकं वा सलक्षणम् ॥ लिङ्गं सवेदिकं चैव स्थापयित्वा विधानतः ॥ १६ ॥

tatrANimAdikaM sarvaM saMkalpya manasA punaH ॥ ratnajaM vAtha sauvarNaM sphaTikaM vA salakSaNam ॥ liGgaM savedikaM caiva sthApayitvA vidhAnataH ॥ 16 ॥

तत्रावाह्य यजेद्देवं सांबं सगणमव्ययम् ॥ तत्र माहेश्वरी कल्प्या मूर्तिर्मूर्तिमतः प्रभोः ॥ १७ ॥

tatrAvAhya yajeddevaM sAMbaM sagaNamavyayam ॥ tatra mAhezvarI kalpyA mUrtirmUrtimataH prabhoH ॥ 17 ॥

चतुर्भुजा चतुर्वक्त्रा सर्वाभरणभूषिता ॥ शार्दूलचर्मवसना किंचिद्विहसितानना ॥ १८ ॥

caturbhujA caturvaktrA sarvAbharaNabhUSitA ॥ zArdUlacarmavasanA kiMcidvihasitAnanA ॥ 18 ॥

वरदाभयहस्ता च मृगटंकधरा तथा ॥ अथ वाष्टभुजा चिंत्या चिंतकस्य यथारुचि ॥ १९ ॥

varadAbhayahastA ca mRgaTaMkadharA tathA ॥ atha vASTabhujA ciMtyA ciMtakasya yathAruci ॥ 19 ॥

तदा त्रिशूलपरशुखड्गवज्राणि दक्षिणे ॥ वामे पाशांकुशौ तद्वत्खेटं नागं च बिभ्रती ॥ २० ॥

tadA trizUlaparazukhaDgavajrANi dakSiNe ॥ vAme pAzAMkuzau tadvatkheTaM nAgaM ca bibhratI ॥ 20 ॥

बालार्कसदृशप्रख्या प्रतिवक्त्रं त्रिलोचना ॥ तस्याः पूर्वमुखं सौम्यं स्वाकारसदृशप्रभम् ॥ २१ ॥

bAlArkasadRzaprakhyA prativaktraM trilocanA ॥ tasyAH pUrvamukhaM saumyaM svAkArasadRzaprabham ॥ 21 ॥

दक्षिणं नीलजीमूतसदृशं घोरदर्शनम् ॥ उत्तरं विद्रुमप्रख्यं नीलालकविभूषितम् ॥ २२ ॥

dakSiNaM nIlajImUtasadRzaM ghoradarzanam ॥ uttaraM vidrumaprakhyaM nIlAlakavibhUSitam ॥ 22 ॥

पश्चिमं पूर्णचंद्राभं सौम्यमिंदुकलाधरम् ॥ तदंकमंडलारूढा शक्तिर्माहेश्वरी परा ॥ २३ ॥

pazcimaM pUrNacaMdrAbhaM saumyamiMdukalAdharam ॥ tadaMkamaMDalArUDhA zaktirmAhezvarI parA ॥ 23 ॥

महालक्ष्मीरिति ख्याता श्यामा सर्वमनोहरा ॥ मूर्तिं कृत्वैवमाकारां सकलीकृत्य च क्रमात् ॥ २४ ॥

mahAlakSmIriti khyAtA zyAmA sarvamanoharA ॥ mUrtiM kRtvaivamAkArAM sakalIkRtya ca kramAt ॥ 24 ॥

मूर्तिमंतमथावाह्य यजेत्परमकारणम् ॥ स्नानार्थे कल्पयेत्तत्र पञ्चगव्यं तु कापिलम् ॥ २५ ॥

mUrtimaMtamathAvAhya yajetparamakAraNam ॥ snAnArthe kalpayettatra paJcagavyaM tu kApilam ॥ 25 ॥

पञ्चामृतं च पूर्णानि बीजानि च विशेषतः ॥ पुरस्तान्मण्डलं कृत्वा रत्नचूर्णाद्यलंकृतम् ॥ २६ ॥

paJcAmRtaM ca pUrNAni bIjAni ca vizeSataH ॥ purastAnmaNDalaM kRtvA ratnacUrNAdyalaMkRtam ॥ 26 ॥

कर्णिकायां प्रविन्यस्येदीशानकलशं पुनः ॥ सद्यादिकलशान्पश्चात्परितस्तस्य कल्पयेत् ॥ २७ ॥

karNikAyAM pravinyasyedIzAnakalazaM punaH ॥ sadyAdikalazAnpazcAtparitastasya kalpayet ॥ 27 ॥

ततो विद्येशकलशानष्टौ पूर्वादिवत्क्रमात् ॥ तीर्थाम्बुपूरितान्कृत्वा सूत्रेणावेष्ट्य पूर्ववत् ॥ २८ ॥

tato vidyezakalazAnaSTau pUrvAdivatkramAt ॥ tIrthAmbupUritAnkRtvA sUtreNAveSTya pUrvavat ॥ 28 ॥

पुण्यद्रव्याणि निक्षिप्य समन्त्रं सविधानकम् ॥ दुकूलाद्येन वस्त्रेण समाच्छाद्य समंततः ॥ २९ ॥

puNyadravyANi nikSipya samantraM savidhAnakam ॥ dukUlAdyena vastreNa samAcchAdya samaMtataH ॥ 29 ॥

सर्वत्र मंत्रं विन्यस्य तत्तन्मंत्रपुरस्सरम् ॥ स्नानकाले तु संप्राप्ते सर्वमङ्गलनिस्वनैः ॥ ३० ॥

sarvatra maMtraM vinyasya tattanmaMtrapurassaram ॥ snAnakAle tu saMprApte sarvamaGgalanisvanaiH ॥ 30 ॥

पञ्चगव्यादिभिश्चैव स्नापयेत्परमेश्वरम् ॥ ततः कुशोदकाद्यानि स्वर्णरत्नोदकान्यपि ॥ ३१ ॥

paJcagavyAdibhizcaiva snApayetparamezvaram ॥ tataH kuzodakAdyAni svarNaratnodakAnyapi ॥ 31 ॥

गंधपुष्पादिसिद्धानि मन्त्रसिद्धानि च क्रमात् ॥ उद्धृत्योद्धृत्य मन्त्रेण तैस्तैस्स्नाप्य महेश्वरम् ॥ ३२ ॥

gaMdhapuSpAdisiddhAni mantrasiddhAni ca kramAt ॥ uddhRtyoddhRtya mantreNa taistaissnApya mahezvaram ॥ 32 ॥

गंधं पुष्पादिदीपांश्च पूजाकर्म समाचरेत् ॥ पलावरः स्यादालेप एकादशपलोत्तरः ॥ ३३ ॥

gaMdhaM puSpAdidIpAMzca pUjAkarma samAcaret ॥ palAvaraH syAdAlepa ekAdazapalottaraH ॥ 33 ॥

सुवर्णरत्नपुष्पाणि शुभानि सुरभीणि च ॥ नीलोत्पलाद्युत्पलानि बिल्वपत्राण्यनेकशः ॥ ३४ ॥

suvarNaratnapuSpANi zubhAni surabhINi ca ॥ nIlotpalAdyutpalAni bilvapatrANyanekazaH ॥ 34 ॥

कमलानि च रक्तानि श्वेतान्यपि च शंभवे ॥ कृष्णागुरूद्भवो धूपः सकर्पूराज्यगुग्गुलः ॥ ३५ ॥

kamalAni ca raktAni zvetAnyapi ca zaMbhave ॥ kRSNAgurUdbhavo dhUpaH sakarpUrAjyaguggulaH ॥ 35 ॥

कपिलाघृतसंसिद्धा दीपाः कर्पूरवर्तिजाः ॥ पञ्चब्रह्मषडंगानि पूज्यान्यावरणानि च ॥ ३६ ॥

kapilAghRtasaMsiddhA dIpAH karpUravartijAH ॥ paJcabrahmaSaDaMgAni pUjyAnyAvaraNAni ca ॥ 36 ॥

नैवेद्यः पयसा सिद्धः स गुडाज्यो महाचरुः ॥ पाटलोत्पलपद्माद्यैः पानीयं च सुगन्धितम् ॥ ३७ ॥

naivedyaH payasA siddhaH sa guDAjyo mahAcaruH ॥ pATalotpalapadmAdyaiH pAnIyaM ca sugandhitam ॥ 37 ॥

पञ्चसौगंधिकोपेतं तांबूलं च सुसंस्कृतम् ॥ सुवर्णरत्नसिद्धानि भूषणानि विशेषतः ॥ ३८ ॥

paJcasaugaMdhikopetaM tAMbUlaM ca susaMskRtam ॥ suvarNaratnasiddhAni bhUSaNAni vizeSataH ॥ 38 ॥

वासांसि च विचित्राणि सूक्ष्माणि च नवानि च ॥ दर्शनीयानि देयानि गानवाद्यादिभिस्सह ॥ ३९ ॥

vAsAMsi ca vicitrANi sUkSmANi ca navAni ca ॥ darzanIyAni deyAni gAnavAdyAdibhissaha ॥ 39 ॥

जपश्च मूलमंत्रस्य लक्षः परमसंख्यया ॥ एकावरा त्र्युत्तरा च पूजा फलवशादिह ॥ ४० ॥

japazca mUlamaMtrasya lakSaH paramasaMkhyayA ॥ ekAvarA tryuttarA ca pUjA phalavazAdiha ॥ 40 ॥

दशसंख्यावरो होमः प्रतिद्रव्यं शतोत्तरः ॥ घोररूपश्शिवश्चिंत्यो मारणोच्चाटनादिषु ॥ ४१ ॥

dazasaMkhyAvaro homaH pratidravyaM zatottaraH ॥ ghorarUpazzivazciMtyo mAraNoccATanAdiSu ॥ 41 ॥

शिवलिंगे शिवाग्नौ च ह्यन्यासु प्रतिमासु च ॥ चिंत्यस्सौम्यतनुश्शंभुः कार्ये शांतिकपौष्टिके ॥ ४२ ॥

zivaliMge zivAgnau ca hyanyAsu pratimAsu ca ॥ ciMtyassaumyatanuzzaMbhuH kArye zAMtikapauSTike ॥ 42 ॥

आयसौ स्रुक्स्रुवौ कार्यौ मारणादिषु कर्मसु ॥ तदन्यत्र तु सौवर्णौ शांतिकाद्येषु कृत्स्नशः ॥ ४३ ॥

Ayasau sruksruvau kAryau mAraNAdiSu karmasu ॥ tadanyatra tu sauvarNau zAMtikAdyeSu kRtsnazaH ॥ 43 ॥

दूर्वया घृतगोक्षीरमिश्रया मधुना तथा ॥ चरुणा सघृतेनैव केवलं पयसापि वा ॥ ४४ ॥

dUrvayA ghRtagokSIramizrayA madhunA tathA ॥ caruNA saghRtenaiva kevalaM payasApi vA ॥ 44 ॥

जुहुयान्मृत्युविजये तिलै रोगोपशांतये ॥ घृतेन पयसा चैव कमलैर्वाथ केवलैः ॥ ४५ ॥

juhuyAnmRtyuvijaye tilai rogopazAMtaye ॥ ghRtena payasA caiva kamalairvAtha kevalaiH ॥ 45 ॥

समृद्धिकामो जुहुयान्महादारिद्र्यशांतये ॥ जातीपुष्पेण वश्यार्थी जुहुयात्सघृतेन तु ॥ ४६ ॥

samRddhikAmo juhuyAnmahAdAridryazAMtaye ॥ jAtIpuSpeNa vazyArthI juhuyAtsaghRtena tu ॥ 46 ॥

घृतेन करवीरैश्च कुर्यादाकर्षणं द्विजः ॥ तैलेनोच्चाटनं कुर्यात्स्तंभनं मधुना पुनः ॥ ४७ ॥

ghRtena karavIraizca kuryAdAkarSaNaM dvijaH ॥ tailenoccATanaM kuryAtstaMbhanaM madhunA punaH ॥ 47 ॥

स्तंभनं सर्षपेणापि लशुनेन तु पातनम् ॥ ताडनं रुधिरेण स्यात्खरस्योष्ट्रस्य चोभयोः ॥ ४८ ॥

staMbhanaM sarSapeNApi lazunena tu pAtanam ॥ tADanaM rudhireNa syAtkharasyoSTrasya cobhayoH ॥ 48 ॥

मारणोच्चाटने कुर्याद्रोहिबीजैस्तिलान्वितैः ॥ विद्वेषणं च तैलेन कुर्याल्लांगलकस्य तु ॥ ४९ ॥

mAraNoccATane kuryAdrohibIjaistilAnvitaiH ॥ vidveSaNaM ca tailena kuryAllAMgalakasya tu ॥ 49 ॥

बंधनं रोहिबीजेन सेनास्तंभनमेव च ॥ रक्तसर्षपसंमिश्रैर्होमद्रव्यैरशेषतः ॥ ५० ॥

baMdhanaM rohibIjena senAstaMbhanameva ca ॥ raktasarSapasaMmizrairhomadravyairazeSataH ॥ 50 ॥

हस्तयंत्रोद्भवैस्तैलैर्जुहुयादाभिचारिके ॥ कटुकीतुषसंयुक्तैः कार्पासास्थिभिरेव च ॥ ५१ ॥

hastayaMtrodbhavaistailairjuhuyAdAbhicArike ॥ kaTukItuSasaMyuktaiH kArpAsAsthibhireva ca ॥ 51 ॥

सर्षपैस्तैलसंमिश्रैर्जुहुयादाभिचारिके ॥ ज्वरोपशांतिदं क्षीरं सौभाग्यफलदं तथा ॥ ५२ ॥

sarSapaistailasaMmizrairjuhuyAdAbhicArike ॥ jvaropazAMtidaM kSIraM saubhAgyaphaladaM tathA ॥ 52 ॥

सर्वसिद्धिकरो होमः क्षौद्राज्यदधिभिर्युतैः ॥ क्षीरेण तंदुलैश्चैव चरुणा केवलेन वा ॥ ५३ ॥

sarvasiddhikaro homaH kSaudrAjyadadhibhiryutaiH ॥ kSIreNa taMdulaizcaiva caruNA kevalena vA ॥ 53 ॥

शांतिकं पौष्टिकं वापि सप्तभिः समिदादिभिः ॥ द्रव्यैर्विशेषतो होमे वश्यमाकर्षणं तथा ॥ ५४ ॥

zAMtikaM pauSTikaM vApi saptabhiH samidAdibhiH ॥ dravyairvizeSato home vazyamAkarSaNaM tathA ॥ 54 ॥

वश्यमाकर्षणं चैव श्रीपदं च विशेषतः ॥ बिल्वपत्रैस्तु हवनं शत्रोर्विजयदं तथा ॥ ५५ ॥

vazyamAkarSaNaM caiva zrIpadaM ca vizeSataH ॥ bilvapatraistu havanaM zatrorvijayadaM tathA ॥ 55 ॥

समिधः शांतिकार्येषु पालाशखदिरादिकाः ॥ करवीरार्कजाः क्रौर्ये कण्टकिन्यश्च विग्रहे ॥ ५६ ॥

samidhaH zAMtikAryeSu pAlAzakhadirAdikAH ॥ karavIrArkajAH kraurye kaNTakinyazca vigrahe ॥ 56 ॥

प्रशांतः शांतिकं कुर्यात्पौष्टिकं च विशेषतः ॥ निर्घृणः क्रुद्धचित्तस्तु प्रकुर्यादाभिचारिकम् ॥ ५७ ॥

prazAMtaH zAMtikaM kuryAtpauSTikaM ca vizeSataH ॥ nirghRNaH kruddhacittastu prakuryAdAbhicArikam ॥ 57 ॥

अतीवदुरवस्थायां प्रतीकारांतरं न चेत् ॥ आततायिनमुद्दिश्य प्रकुर्यादाभिचारिकम् ॥ ५८ ॥

atIvaduravasthAyAM pratIkArAMtaraM na cet ॥ AtatAyinamuddizya prakuryAdAbhicArikam ॥ 58 ॥

स्वराष्ट्रपतिमुद्दिश्य न कुर्यादाभिचारिकम् ॥ यद्यास्तिकस्सुधर्मिष्ठो मान्यो वा यो ऽपि कोपि वा ॥ ५९ ॥

svarASTrapatimuddizya na kuryAdAbhicArikam ॥ yadyAstikassudharmiSTho mAnyo vA yo 'pi kopi vA ॥ 59 ॥

तमुद्दिश्यापि नो कुर्यादाततायिनमप्युत ॥ मनसा कर्मणा वाचा यो ऽपि कोपि शिवाश्रितः ॥ ६० ॥

tamuddizyApi no kuryAdAtatAyinamapyuta ॥ manasA karmaNA vAcA yo 'pi kopi zivAzritaH ॥ 60 ॥

स्वराष्ट्रपतिमुद्दिश्य शिवा श्रितमथापि वा ॥ कृत्वाभिचारिकं कर्म सद्यो विनिपतेन्नरः ॥ ६१ ॥

svarASTrapatimuddizya zivA zritamathApi vA ॥ kRtvAbhicArikaM karma sadyo vinipatennaraH ॥ 61 ॥

स्वराष्ट्रपालकं तस्माच्छिवभक्तं च कञ्चन ॥ न हिंस्यादभिचाराद्यैर्यदीच्छेत्सुखमात्मनः ॥ ६२ ॥

svarASTrapAlakaM tasmAcchivabhaktaM ca kaJcana ॥ na hiMsyAdabhicArAdyairyadIcchetsukhamAtmanaH ॥ 62 ॥

अन्यं कमपि चोद्दिश्य कृत्वा वै मारणादिकम् ॥ पश्चात्तापेन संयुक्तः प्रायश्चित्तं समाचरेत् ॥ ६३ ॥

anyaM kamapi coddizya kRtvA vai mAraNAdikam ॥ pazcAttApena saMyuktaH prAyazcittaM samAcaret ॥ 63 ॥

बाणलिंगे ऽपि वा कुर्यान्निर्धनो धनवानपि ॥ स्वयंभूते ऽथ वा लिंगे आर्षके वैदिके ऽपि वा ॥ ६४ ॥

bANaliMge 'pi vA kuryAnnirdhano dhanavAnapi ॥ svayaMbhUte 'tha vA liMge ArSake vaidike 'pi vA ॥ 64 ॥

अभावे हेमरत्नानामशक्तौ च तदर्जने ॥ मनसैवाचरेदेतद्द्रव्यैर्वा प्रतिरूपकैः ॥ ६५ ॥

abhAve hemaratnAnAmazaktau ca tadarjane ॥ manasaivAcaredetaddravyairvA pratirUpakaiH ॥ 65 ॥

क्वचिदंशे तु यः शक्तस्त्वशक्तः क्वचिदंशके ॥ सो ऽपि शक्त्यनुसारेण कुर्वंश्चेत्फलमृच्छति ॥ ६६ ॥

kvacidaMze tu yaH zaktastvazaktaH kvacidaMzake ॥ so 'pi zaktyanusAreNa kurvaMzcetphalamRcchati ॥ 66 ॥

कर्मण्यनुष्ठिते ऽप्यस्मिन्फलं यत्र न दृश्यते ॥ द्विस्त्रिर्वावर्तयेत्तत्र सर्वथा दृश्यते फलम् ॥ ६७ ॥

karmaNyanuSThite 'pyasminphalaM yatra na dRzyate ॥ dvistrirvAvartayettatra sarvathA dRzyate phalam ॥ 67 ॥

पूजोपयुक्तं यद्द्रव्यं हेमरत्नाद्यनुत्तमम् ॥ तत्सर्वं गुरवे दद्याद्दक्षिणां च ततः पृथक् ॥ ६८ ॥

pUjopayuktaM yaddravyaM hemaratnAdyanuttamam ॥ tatsarvaM gurave dadyAddakSiNAM ca tataH pRthak ॥ 68 ॥

स चेन्नेच्छति तत्सर्वं शिवाय विनिवेदयेत् ॥ अथवा शिवभक्तेभ्यो नान्येभ्यस्तु प्रदीयते ॥ ६९ ॥

sa cennecchati tatsarvaM zivAya vinivedayet ॥ athavA zivabhaktebhyo nAnyebhyastu pradIyate ॥ 69 ॥

यः स्वयं साधयेच्छक्त्या गुर्वादिनिरपेक्षया ॥ सो ऽप्येवमाचरेदत्र न गृह्णीयात्स्वयं पुनः ॥ ७० ॥

yaH svayaM sAdhayecchaktyA gurvAdinirapekSayA ॥ so 'pyevamAcaredatra na gRhNIyAtsvayaM punaH ॥ 70 ॥

स्वयं गृह्णाति यो लोभात्पूजांगद्रव्यमुत्तमम् ॥ कांक्षितं न लभेन्मूढो नात्र कार्या विचारणा ॥ ७१ ॥

svayaM gRhNAti yo lobhAtpUjAMgadravyamuttamam ॥ kAMkSitaM na labhenmUDho nAtra kAryA vicAraNA ॥ 71 ॥

अर्चितं यत्तु तल्लिंगं गृह्णीयाद्वा नवा स्वयम् ॥ गृह्णीयाद्यदि तन्नित्यं स्वयं वान्यो ऽपि वार्चयेत् ॥ ७२ ॥

arcitaM yattu talliMgaM gRhNIyAdvA navA svayam ॥ gRhNIyAdyadi tannityaM svayaM vAnyo 'pi vArcayet ॥ 72 ॥

यथोक्तमेव कर्मैतदाचरेद्यो ऽनपायतः ॥ फलं व्यभिचरेन्नैवमित्यतः किं प्ररोचकम् ॥ ७३ ॥

yathoktameva karmaitadAcaredyo 'napAyataH ॥ phalaM vyabhicarennaivamityataH kiM prarocakam ॥ 73 ॥

तथाप्युद्देशतो वक्ष्ये कर्मणः सिद्धिमुत्तमम् ॥ अपि शत्रुभिराक्रांतो व्याधिभिर्वाप्यनेकशः ॥ ७४ ॥

tathApyuddezato vakSye karmaNaH siddhimuttamam ॥ api zatrubhirAkrAMto vyAdhibhirvApyanekazaH ॥ 74 ॥

मृत्योरास्यगतश्चापि मुच्यते निरपायतः ॥ पूजायते ऽतिकृपणो रिक्तो वैश्रवणायते ॥ ७५ ॥

mRtyorAsyagatazcApi mucyate nirapAyataH ॥ pUjAyate 'tikRpaNo rikto vaizravaNAyate ॥ 75 ॥

कामायते विरूपो ऽपि वृद्धो ऽपि तरुणायते ॥ शत्रुर्मित्रायते सद्यो विरोधी किंकरायते ॥ ७६ ॥

kAmAyate virUpo 'pi vRddho 'pi taruNAyate ॥ zatrurmitrAyate sadyo virodhI kiMkarAyate ॥ 76 ॥

विषायते यदमृतं विषमप्यमृतायते ॥ स्थलायते समुद्रो ऽपि स्थलमप्यर्णवायते ॥ ७७ ॥

viSAyate yadamRtaM viSamapyamRtAyate ॥ sthalAyate samudro 'pi sthalamapyarNavAyate ॥ 77 ॥

महीधरायते श्वभ्रं स च श्वभ्रायते गिरिः ॥ पद्माकरायते वह्निः सरो वैश्वानरायते ॥ ७८ ॥

mahIdharAyate zvabhraM sa ca zvabhrAyate giriH ॥ padmAkarAyate vahniH saro vaizvAnarAyate ॥ 78 ॥

वनायते यदुद्यानं तदुद्यानायते वनम् ॥ सिंहायते मृगः क्षुद्रः सिंहः क्रीडामृगायते ॥ ७९ ॥

vanAyate yadudyAnaM tadudyAnAyate vanam ॥ siMhAyate mRgaH kSudraH siMhaH krIDAmRgAyate ॥ 79 ॥

स्त्रियो ऽभिसारिकायन्ते लक्ष्मीः सुचरितायते ॥ स्वैरप्रेष्यायते वाणी कीर्तिस्तु गणिकायते ॥ ८० ॥

striyo 'bhisArikAyante lakSmIH sucaritAyate ॥ svairapreSyAyate vANI kIrtistu gaNikAyate ॥ 80 ॥

स्वैराचारायते मेधा वज्रसूचीयते मनः ॥ महावातायते शक्तिर्बलं मत्तगजायते ॥ ८१ ॥

svairAcArAyate medhA vajrasUcIyate manaH ॥ mahAvAtAyate zaktirbalaM mattagajAyate ॥ 81 ॥

स्तम्भायते समुद्योगैः शत्रुपक्षे स्थिता क्रिया ॥ शत्रुपक्षायते ऽरीणां सर्व एव सुहृज्जनः ॥ ८२ ॥

stambhAyate samudyogaiH zatrupakSe sthitA kriyA ॥ zatrupakSAyate 'rINAM sarva eva suhRjjanaH ॥ 82 ॥

शत्रवः कुणपायन्ते जीवन्तोपि सबांधवाः ॥ आपन्नो ऽपि गतारिष्टः स्वयं खल्वमृतायते ॥ ८३ ॥

zatravaH kuNapAyante jIvantopi sabAMdhavAH ॥ Apanno 'pi gatAriSTaH svayaM khalvamRtAyate ॥ 83 ॥

रसाय नायते नित्यमपथ्यमपि सेवितम् ॥ अनिशं क्रियमाणापि रतिस्त्वभिनवायते ॥ ८४ ॥

rasAya nAyate nityamapathyamapi sevitam ॥ anizaM kriyamANApi ratistvabhinavAyate ॥ 84 ॥

अनागतादिकं सर्वं करस्थामलकायते ॥ यादृच्छिकफलायन्ते सिद्धयो ऽप्यणिमादयः ॥ ८५ ॥

anAgatAdikaM sarvaM karasthAmalakAyate ॥ yAdRcchikaphalAyante siddhayo 'pyaNimAdayaH ॥ 85 ॥

बहुनात्र किमुक्तेन सर्वकामार्थसिद्धिषु ॥ अस्मिन्कर्मणि निर्वृत्ते त्वनवाप्यं न विद्यते ॥ ८६ ॥

bahunAtra kimuktena sarvakAmArthasiddhiSu ॥ asminkarmaNi nirvRtte tvanavApyaM na vidyate ॥ 86 ॥