तत्रादौ शिवयोः ॥ पार्श्वे दक्षिणे वामतः क्रमात् ॥ गंधाद्यैरर्चयेत्पूर्वं देवौ हेरंबषण्मुखौ ॥ १ ॥

tatrAdau zivayoH ॥ pArzve dakSiNe vAmataH kramAt ॥ gaMdhAdyairarcayetpUrvaM devau heraMbaSaNmukhau ॥ 1 ॥

ततो ब्रह्माणि परित ईशानादि यथाक्रमम् ॥ सशक्तिकानि सद्यांतं प्रथमावरणे यजेत् ॥ २ ॥

tato brahmANi parita IzAnAdi yathAkramam ॥ sazaktikAni sadyAMtaM prathamAvaraNe yajet ॥ 2 ॥

षडंगान्यपि तत्रैव हृदयादीन्यनुक्रमात् ॥ शिवस्य च शिवायाश्च वाह्नेयादि समर्चयेत् ॥ ३ ॥

SaDaMgAnyapi tatraiva hRdayAdInyanukramAt ॥ zivasya ca zivAyAzca vAhneyAdi samarcayet ॥ 3 ॥

तत्र वामादिकान्रुद्रानष्टौ वामादिशक्तिभिः ॥ अर्चयेद्वा न वा पश्चात्पूर्वादिपरितः क्रमात् ॥ ४ ॥

tatra vAmAdikAnrudrAnaSTau vAmAdizaktibhiH ॥ arcayedvA na vA pazcAtpUrvAdiparitaH kramAt ॥ 4 ॥

प्रथमावरणं प्रोक्तं मया ते यदुनंदन ॥ द्वितीयावरणं प्रीत्या प्रोच्यते श्रद्धया शृणु ॥ ५ ॥

prathamAvaraNaM proktaM mayA te yadunaMdana ॥ dvitIyAvaraNaM prItyA procyate zraddhayA zRNu ॥ 5 ॥

अनंतं पूर्वादिक्पत्रे तच्छक्तिं तस्य वामतः ॥ सूक्ष्मं दक्षिणदिक्पत्रे सह शक्त्या समर्चयेत् ॥ ६ ॥

anaMtaM pUrvAdikpatre tacchaktiM tasya vAmataH ॥ sUkSmaM dakSiNadikpatre saha zaktyA samarcayet ॥ 6 ॥

ततः पश्चिमदिक्पत्रे सह शक्त्या शिवोत्तमम् ॥ तथैवोत्तरदिक्पत्रे चैकनेत्रं समर्चयेत् ॥ ७ ॥

tataH pazcimadikpatre saha zaktyA zivottamam ॥ tathaivottaradikpatre caikanetraM samarcayet ॥ 7 ॥

एकरुद्रं च तच्छक्तिं पश्चादीशदले ऽर्चयेत् ॥ त्रिमूर्तिं तस्य शक्तिं च पूजयेदग्निदिग्दले ॥ ८ ॥

ekarudraM ca tacchaktiM pazcAdIzadale 'rcayet ॥ trimUrtiM tasya zaktiM ca pUjayedagnidigdale ॥ 8 ॥

श्रीकण्ठं नैरृते पत्रे तच्छक्तिं तस्य वामतः ॥ तथैव मारुते पत्रे शिखंडीशं समर्चयेत् ॥ ९ ॥

zrIkaNThaM nairRte patre tacchaktiM tasya vAmataH ॥ tathaiva mArute patre zikhaMDIzaM samarcayet ॥ 9 ॥

द्वितीयावरणे चेज्यास्सर्वर्तश्चक्रवर्तिनः ॥ तृतीयावरणे पूज्याः शक्तिभिश्चाष्टमूर्तयः ॥ १० ॥

dvitIyAvaraNe cejyAssarvartazcakravartinaH ॥ tRtIyAvaraNe pUjyAH zaktibhizcASTamUrtayaH ॥ 10 ॥

अष्टसु क्रमशो दिक्षु पूर्वादिपरितः क्रमात् ॥ भवः शर्वस्तथेशानो रुद्रः पशुपतिस्ततः ॥ ११ ॥

aSTasu kramazo dikSu pUrvAdiparitaH kramAt ॥ bhavaH zarvastathezAno rudraH pazupatistataH ॥ 11 ॥

उग्रो भीमो महादेव इत्यष्टौ मूर्तयः क्रमात् ॥ अनंतरं ततश्चैव महादेवादयः क्रमात् ॥ शक्तिभिस्सह संपूज्यास्तत्रैकादशमूर्तयः ॥ १२ ॥

ugro bhImo mahAdeva ityaSTau mUrtayaH kramAt ॥ anaMtaraM tatazcaiva mahAdevAdayaH kramAt ॥ zaktibhissaha saMpUjyAstatraikAdazamUrtayaH ॥ 12 ॥

महादेवः शिवो रुद्रः शंकरो नीललोहितः ॥ ईशानो विजयो भीमो देवदेवो भवोद्भवः ॥ १३ ॥

mahAdevaH zivo rudraH zaMkaro nIlalohitaH ॥ IzAno vijayo bhImo devadevo bhavodbhavaH ॥ 13 ॥

कपर्दीशश्च कथ्यंते तथैकादशशक्तयः ॥ तत्राष्टौ प्रथमं पूज्याः वाह्नेयादि यथाक्रमम् ॥ १४ ॥

kapardIzazca kathyaMte tathaikAdazazaktayaH ॥ tatrASTau prathamaM pUjyAH vAhneyAdi yathAkramam ॥ 14 ॥

देवदेवः पूर्वपत्रे ईशानं चाग्निगोचरे ॥ भवोद्भवस्तयोर्मध्ये कपालीशस्ततः परम् ॥ १५ ॥

devadevaH pUrvapatre IzAnaM cAgnigocare ॥ bhavodbhavastayormadhye kapAlIzastataH param ॥ 15 ॥

तस्मिन्नावरणे भूयो वृषेन्द्रं पुरतो यजेत् ॥ नंदिनं दक्षिणे तस्य महाकालं तथोत्तरे ॥ १६ ॥

tasminnAvaraNe bhUyo vRSendraM purato yajet ॥ naMdinaM dakSiNe tasya mahAkAlaM tathottare ॥ 16 ॥

शास्तारं वह्निदिक्पत्रे मात्ःर्दक्षिणदिग्दले ॥ गजास्यं नैरृते पत्रे षण्मुखं वारुणे पुनः ॥ १७ ॥

zAstAraM vahnidikpatre mAtHrdakSiNadigdale ॥ gajAsyaM nairRte patre SaNmukhaM vAruNe punaH ॥ 17 ॥

ज्येष्ठां वायुदले गौरीमुत्तरे चंडमैश्वरे ॥ शास्तृनन्दीशयोर्मध्ये मुनीन्द्रं वृषभं यजेत् ॥ १८ ॥

jyeSThAM vAyudale gaurImuttare caMDamaizvare ॥ zAstRnandIzayormadhye munIndraM vRSabhaM yajet ॥ 18 ॥

महाकालस्योत्तरतः पिंगलं तु समर्चयेत् ॥ शास्तृमातृसमूहस्य मध्ये भृंगीश्वरं ततः ॥ १९ ॥

mahAkAlasyottarataH piMgalaM tu samarcayet ॥ zAstRmAtRsamUhasya madhye bhRMgIzvaraM tataH ॥ 19 ॥

मातृविघ्नेशमध्ये तु वीरभद्रं समर्चयेत् ॥ स्कन्दविघ्नेशयोर्मध्ये यजेद्देवीं सरस्वतीम् ॥ २० ॥

mAtRvighnezamadhye tu vIrabhadraM samarcayet ॥ skandavighnezayormadhye yajeddevIM sarasvatIm ॥ 20 ॥

ज्येष्ठाकुमारयोर्मध्ये श्रियं शिवपदार्चिताम् ॥ ज्येष्ठागणाम्बयोर्मध्ये महामोटीं समर्चयेत् ॥ २१ ॥

jyeSThAkumArayormadhye zriyaM zivapadArcitAm ॥ jyeSThAgaNAmbayormadhye mahAmoTIM samarcayet ॥ 21 ॥

गणाम्बाचण्डयोर्मध्ये देवीं दुर्गां प्रपूजयेत् ॥ अत्रैवावरणे भूयः शिवानुचरसंहतिम् ॥ २२ ॥

gaNAmbAcaNDayormadhye devIM durgAM prapUjayet ॥ atraivAvaraNe bhUyaH zivAnucarasaMhatim ॥ 22 ॥

रुद्रप्रथमभूताख्यां विविधां च सशक्तिकाम् ॥ शिवायाश्च सखीवर्गं जपेद्ध्यात्वा समाहितः ॥ २३ ॥

rudraprathamabhUtAkhyAM vividhAM ca sazaktikAm ॥ zivAyAzca sakhIvargaM japeddhyAtvA samAhitaH ॥ 23 ॥

एवं तृतीयावरणे वितते पूजिते सति ॥ चतुर्थावरणं ध्यात्वा बहिस्तस्य समर्चयेत् ॥ २४ ॥

evaM tRtIyAvaraNe vitate pUjite sati ॥ caturthAvaraNaM dhyAtvA bahistasya samarcayet ॥ 24 ॥

भानुः पूर्वदले पूज्यो दक्षिणे चतुराननः ॥ रुद्रो वरुणदिक्पत्रे विष्णुरुत्तरदिग्दले ॥ २५ ॥

bhAnuH pUrvadale pUjyo dakSiNe caturAnanaH ॥ rudro varuNadikpatre viSNuruttaradigdale ॥ 25 ॥

चतुर्णामपि देवानां पृथगावरणान्यथ ॥ तस्यांगानि षडेवादौ दीप्ताद्याभिश्च शक्तिभिः ॥ २६ ॥

caturNAmapi devAnAM pRthagAvaraNAnyatha ॥ tasyAMgAni SaDevAdau dIptAdyAbhizca zaktibhiH ॥ 26 ॥

दीप्ता सूक्ष्मा जया भद्रा विभूतिर्विमला क्रमात् ॥ अमोघा विद्युता चैव पूर्वादि परितः स्थिताः ॥ २७ ॥

dIptA sUkSmA jayA bhadrA vibhUtirvimalA kramAt ॥ amoghA vidyutA caiva pUrvAdi paritaH sthitAH ॥ 27 ॥

द्वितीयावरणे पूज्याश्चतस्रो मूर्तयः क्रमात् ॥ पूर्वाद्युत्तरपर्यंताः शक्तयश्च ततः परम् ॥ २८ ॥

dvitIyAvaraNe pUjyAzcatasro mUrtayaH kramAt ॥ pUrvAdyuttaraparyaMtAH zaktayazca tataH param ॥ 28 ॥

आदित्यो भास्करो भानू रविश्चेत्यनुपूर्वशः ॥ अर्को ब्रह्मा तथा रुद्रो विष्णुश्चैते विवस्वतः ॥ २९ ॥

Adityo bhAskaro bhAnU ravizcetyanupUrvazaH ॥ arko brahmA tathA rudro viSNuzcaite vivasvataH ॥ 29 ॥

विस्तारा पूर्वदिग्भागे सुतरां दक्षिणे स्थिताः ॥ बोधनी पश्चिमे भागे आप्यायिन्युत्तरे पुनः ॥ ३० ॥

vistArA pUrvadigbhAge sutarAM dakSiNe sthitAH ॥ bodhanI pazcime bhAge ApyAyinyuttare punaH ॥ 30 ॥

उषां प्रभां तथा प्राज्ञां सन्ध्यामपि ततः परम् ॥ ऐशानादिषु विन्यस्य द्वितीयावरणे यजेत् ॥ ३१ ॥

uSAM prabhAM tathA prAjJAM sandhyAmapi tataH param ॥ aizAnAdiSu vinyasya dvitIyAvaraNe yajet ॥ 31 ॥

सोममंगारकं चैव बुधं बुद्धिमतां वरम् ॥ बृहस्पतिं बृहद्बुद्धिं भार्गवं तेजसां निधिम् ॥ ३२ ॥

somamaMgArakaM caiva budhaM buddhimatAM varam ॥ bRhaspatiM bRhadbuddhiM bhArgavaM tejasAM nidhim ॥ 32 ॥

शनैश्चरं तथा राहुं केतुं धूम्रं भयंकरम् ॥ समंततो यजेदेतांस्तृतीयावरणे क्रमात् ॥ ३३ ॥

zanaizcaraM tathA rAhuM ketuM dhUmraM bhayaMkaram ॥ samaMtato yajedetAMstRtIyAvaraNe kramAt ॥ 33 ॥

अथवा द्वादशादित्या द्वितीयावरणे यजेत् ॥ तृतीयावरणे चैव राशीन्द्वादश पूजयेत् ॥ ३४ ॥

athavA dvAdazAdityA dvitIyAvaraNe yajet ॥ tRtIyAvaraNe caiva rAzIndvAdaza pUjayet ॥ 34 ॥

सप्तसप्त गणांश्चैव बहिस्तस्य समंततः ॥ ऋषीन्देवांश्च गंधर्वान्पन्नगानप्सरोगणान् ॥ ३५ ॥

saptasapta gaNAMzcaiva bahistasya samaMtataH ॥ RSIndevAMzca gaMdharvAnpannagAnapsarogaNAn ॥ 35 ॥

ग्रामण्यश्च तथा यक्षान्यातुधानांस्तथा हयान् ॥ सप्तच्छंदोमयांश्चैव वालखिल्यांश्च पूजयेत् ॥ ३६ ॥

grAmaNyazca tathA yakSAnyAtudhAnAMstathA hayAn ॥ saptacchaMdomayAMzcaiva vAlakhilyAMzca pUjayet ॥ 36 ॥

एवं तृतीयावरणे समभ्यर्च्य दिवाकरम् ॥ ब्रह्माणमर्चयेत्पश्चात्त्रिभिरावरणैः सहः ॥ ३७ ॥

evaM tRtIyAvaraNe samabhyarcya divAkaram ॥ brahmANamarcayetpazcAttribhirAvaraNaiH sahaH ॥ 37 ॥

हिरण्यगर्भं पूर्वस्यां विराजं दक्षिणे ततः ॥ कालं पश्चिमदिग्भागे पुरुषं चोत्तरे यजेत् ॥ ३८ ॥

hiraNyagarbhaM pUrvasyAM virAjaM dakSiNe tataH ॥ kAlaM pazcimadigbhAge puruSaM cottare yajet ॥ 38 ॥

हिरण्यगर्भः प्रथमो ब्रह्मा कमलसन्निभः ॥ कालो जात्यंजनप्रख्यः पुरुषः स्फटिकोपमः ॥ ३९ ॥

hiraNyagarbhaH prathamo brahmA kamalasannibhaH ॥ kAlo jAtyaMjanaprakhyaH puruSaH sphaTikopamaH ॥ 39 ॥

त्रिगुणो राजसश्चैव तामसः सात्त्विकस्तथा ॥ चत्वार एते क्रमशः प्रथमावरणे स्थिताः ॥ ४० ॥

triguNo rAjasazcaiva tAmasaH sAttvikastathA ॥ catvAra ete kramazaH prathamAvaraNe sthitAH ॥ 40 ॥

द्वितीयावरणे पूज्याः पूर्वादिपरितः क्रमात् ॥ सनत्कुमारः सनकः सनंदश्च सनातनः ॥ ४१ ॥

dvitIyAvaraNe pUjyAH pUrvAdiparitaH kramAt ॥ sanatkumAraH sanakaH sanaMdazca sanAtanaH ॥ 41 ॥

तृतीयावरणे पश्चादर्चयेच्च प्रजापतीन् ॥ अष्टौ पूर्वांश्च पूर्वादौ त्रीन्प्राक्पश्चादनुक्रमात् ॥ ४२ ॥

tRtIyAvaraNe pazcAdarcayecca prajApatIn ॥ aSTau pUrvAMzca pUrvAdau trInprAkpazcAdanukramAt ॥ 42 ॥

दक्षो रुचिर्भृगुश्चैव मरीचिश्च तथांगिराः ॥ पुलस्त्यः पुलहश्चैव क्रतुरत्रिश्च कश्यपः ॥ ४३ ॥

dakSo rucirbhRguzcaiva marIcizca tathAMgirAH ॥ pulastyaH pulahazcaiva kraturatrizca kazyapaH ॥ 43 ॥

वसिष्ठश्चेति विख्याताः प्रजानां पतयस्त्विमे ॥ तेषां भार्याश्च तैस्सार्धं पूजनीया यथाक्रमम् ॥ ४४ ॥

vasiSThazceti vikhyAtAH prajAnAM patayastvime ॥ teSAM bhAryAzca taissArdhaM pUjanIyA yathAkramam ॥ 44 ॥

प्रसूतिश्च तथा"कूतिः ख्यातिः सम्भूतिरेव च ॥ धृतिः स्मृतिः क्षमा चैव सन्नतिश्चानसूयका ॥ ४५ ॥

prasUtizca tathA"kUtiH khyAtiH sambhUtireva ca ॥ dhRtiH smRtiH kSamA caiva sannatizcAnasUyakA ॥ 45 ॥

देवमातारुन्धती च सर्वाः खलु पतिव्रताः ॥ शिवार्चनरतो नित्यं श्रीमत्यः प्रियदर्शनाः ॥ ४६ ॥

devamAtArundhatI ca sarvAH khalu pativratAH ॥ zivArcanarato nityaM zrImatyaH priyadarzanAH ॥ 46 ॥

प्रथमावरणे वेदांश्चतुरो वा प्रपूजयेत् ॥ इतिहासपुराणानि द्वितीयावरणे पुनः ॥ ४७ ॥

prathamAvaraNe vedAMzcaturo vA prapUjayet ॥ itihAsapurANAni dvitIyAvaraNe punaH ॥ 47 ॥

तृतीयावरणे पश्चाद्धर्मशास्त्रपुरस्सराः ॥ दिक्यो निखिला विद्याः पूज्या एव समंततः ॥ ४८ ॥

tRtIyAvaraNe pazcAddharmazAstrapurassarAH ॥ dikyo nikhilA vidyAH pUjyA eva samaMtataH ॥ 48 ॥

पूर्वादिपुरतो वेदास्तदन्ये तु यथारुचि ॥ अष्टधा वा चतुर्धा वा कृत्वा पूजां समंततः ॥ ४९ ॥

pUrvAdipurato vedAstadanye tu yathAruci ॥ aSTadhA vA caturdhA vA kRtvA pUjAM samaMtataH ॥ 49 ॥

एवं ब्रह्माणमभ्यर्च्य त्रिभिरावरणैर्युतम् ॥ दक्षिणे पश्चिमे पश्चाद्रुद्रं सावरणं यजेत् ॥ ५० ॥

evaM brahmANamabhyarcya tribhirAvaraNairyutam ॥ dakSiNe pazcime pazcAdrudraM sAvaraNaM yajet ॥ 50 ॥

तस्य ब्रह्मषडंगानि प्रथमावरणं स्मृतम् ॥ द्वितीयावरणे चैव विद्येश्वरमयं तथा ॥ ५१ ॥

tasya brahmaSaDaMgAni prathamAvaraNaM smRtam ॥ dvitIyAvaraNe caiva vidyezvaramayaM tathA ॥ 51 ॥

तृतीयावरणे भेदो विद्यते स तु कथ्यते ॥ चतस्रो मूर्तयस्तस्य पूज्याः पूर्वादितः क्रमात् ॥ ५२ ॥

tRtIyAvaraNe bhedo vidyate sa tu kathyate ॥ catasro mUrtayastasya pUjyAH pUrvAditaH kramAt ॥ 52 ॥

त्रिगुणास्सकलो देवः पुरस्ताच्छिवसंज्ञकः ॥ राजसो दक्षिणे ब्रह्मा सृष्टिकृत्पूज्यते भवः ॥ ५३ ॥

triguNAssakalo devaH purastAcchivasaMjJakaH ॥ rAjaso dakSiNe brahmA sRSTikRtpUjyate bhavaH ॥ 53 ॥

तामसः पश्चिमे चाग्निः पूज्यस्संहारको हरः ॥ सात्त्विकस्सुखकृत्सौम्ये विष्णुर्विश्वपतिर्मृडः ॥ ५४ ॥

tAmasaH pazcime cAgniH pUjyassaMhArako haraH ॥ sAttvikassukhakRtsaumye viSNurvizvapatirmRDaH ॥ 54 ॥

एवं पश्चिमदिग्भागे शम्भोः षड्विंशकं शिवम् ॥ समभ्यर्च्योत्तरे पार्श्वे ततो वैकुंठमर्चयेत् ॥ ५५ ॥

evaM pazcimadigbhAge zambhoH SaDviMzakaM zivam ॥ samabhyarcyottare pArzve tato vaikuMThamarcayet ॥ 55 ॥

वासुदेवं पुरस्कृत्वा प्रथमावरणे यजेत् ॥ अनिरुद्धं दक्षिणतः प्रद्युम्नं पश्चिमे ततः ॥ ५६ ॥

vAsudevaM puraskRtvA prathamAvaraNe yajet ॥ aniruddhaM dakSiNataH pradyumnaM pazcime tataH ॥ 56 ॥

सौम्ये संकर्षणं पश्चाद्व्यत्यस्तौ वा यजेदिमौ ॥ प्रथमावरणं प्रोक्तं द्वितीयावरणं शुभम् ॥ ५७ ॥

saumye saMkarSaNaM pazcAdvyatyastau vA yajedimau ॥ prathamAvaraNaM proktaM dvitIyAvaraNaM zubham ॥ 57 ॥

मत्स्यः कूर्मो वराहश्च नरसिंहोथ वामनः ॥ रामश्चान्यतमः कृष्णो भवानश्वमुखोपि च ॥ ५८ ॥

matsyaH kUrmo varAhazca narasiMhotha vAmanaH ॥ rAmazcAnyatamaH kRSNo bhavAnazvamukhopi ca ॥ 58 ॥

तृतीयावरणे चक्रुः पूर्वभागे समर्चयेत् ॥ नारायणाख्यां याम्येस्त्रं क्वचिदव्याहतं यजेत् ॥ ५९ ॥

tRtIyAvaraNe cakruH pUrvabhAge samarcayet ॥ nArAyaNAkhyAM yAmyestraM kvacidavyAhataM yajet ॥ 59 ॥

पश्चिमे पांचजन्यं च शार्ङ्गंधनुरथोत्तरे ॥ एवं त्र्यावरणैः साक्षाद्विश्वाख्यां परमं हरिम् ॥ ६० ॥

pazcime pAMcajanyaM ca zArGgaMdhanurathottare ॥ evaM tryAvaraNaiH sAkSAdvizvAkhyAM paramaM harim ॥ 60 ॥

महाविष्णुं सदाविष्णुं मूर्तीकृत्य समर्चयेत् ॥ इत्थं विष्णोश्चतुर्व्यूहक्रमान्मूर्तिचतुष्टयम् ॥ पूजयित्वा च तच्छक्तीश्चतस्रः पुजयेत्क्रमात् ॥ ६१ ॥

mahAviSNuM sadAviSNuM mUrtIkRtya samarcayet ॥ itthaM viSNozcaturvyUhakramAnmUrticatuSTayam ॥ pUjayitvA ca tacchaktIzcatasraH pujayetkramAt ॥ 61 ॥

प्रभामाग्नेयदिग्भागे नैरृते तु सरस्वतीम् ॥ गणांबिका च वायव्ये लक्ष्मीं रौद्रे समर्चयेत् ॥ ६२ ॥

prabhAmAgneyadigbhAge nairRte tu sarasvatIm ॥ gaNAMbikA ca vAyavye lakSmIM raudre samarcayet ॥ 62 ॥

एवं भान्वादिमूर्तीनां तच्छक्तीनामनंतरम् ॥ पूजां विधाय लोकेशांस्तत्रैवावरणे यजेत् ॥ ६३ ॥

evaM bhAnvAdimUrtInAM tacchaktInAmanaMtaram ॥ pUjAM vidhAya lokezAMstatraivAvaraNe yajet ॥ 63 ॥

इन्द्रमग्निं यमं चैव निरृतिं वरुणं तथा ॥ वायुं सोमं कुबेरं च पश्चादीशानमर्चयेत् ॥ ६४ ॥

indramagniM yamaM caiva nirRtiM varuNaM tathA ॥ vAyuM somaM kuberaM ca pazcAdIzAnamarcayet ॥ 64 ॥

एवं चतुर्थावरणं पूजयित्वा विधानतः ॥ आयुधानि महेशस्य पश्चाद्बांह्यं समर्चयेत् ॥ ६५ ॥

evaM caturthAvaraNaM pUjayitvA vidhAnataH ॥ AyudhAni mahezasya pazcAdbAMhyaM samarcayet ॥ 65 ॥

श्रीमन्त्रिशूलमैशाने वज्रं माहेन्द्रदिङ्मुखे ॥ परशुं वह्निदिग्भागे याम्ये सायकमर्चयेत् ॥ ६६ ॥

zrImantrizUlamaizAne vajraM mAhendradiGmukhe ॥ parazuM vahnidigbhAge yAmye sAyakamarcayet ॥ 66 ॥

नैरृते तु यजेत्खड्गं पाशं वारुणगोचरे ॥ अंकुशं मारुते भागे पिनाकं चोत्तरे यजेत् ॥ ६७ ॥

nairRte tu yajetkhaDgaM pAzaM vAruNagocare ॥ aMkuzaM mArute bhAge pinAkaM cottare yajet ॥ 67 ॥

पश्चिमाभिमुखं रौद्रं क्षेत्रपालं समर्चयेत् ॥ पञ्चमावरणं चैव सम्पूज्यानन्तरं बहिः ॥ ६८ ॥

pazcimAbhimukhaM raudraM kSetrapAlaM samarcayet ॥ paJcamAvaraNaM caiva sampUjyAnantaraM bahiH ॥ 68 ॥

सर्वावरणदेवानां बहिर्वा पञ्चमे ऽथवा ॥ पञ्चमे मातृभिस्सार्धं महोक्ष पुरतो यजेत् ॥ ६९ ॥

sarvAvaraNadevAnAM bahirvA paJcame 'thavA ॥ paJcame mAtRbhissArdhaM mahokSa purato yajet ॥ 69 ॥

ततः समंततः पूज्यास्सर्वा वै देवयोनयः ॥ खेचरा ऋषयस्सिद्धा दैत्या यक्षाश्च राक्षसाः ॥ ७० ॥

tataH samaMtataH pUjyAssarvA vai devayonayaH ॥ khecarA RSayassiddhA daityA yakSAzca rAkSasAH ॥ 70 ॥

अनंताद्याश्च नागेंद्रा नागैस्तत्तत्कुलोद्भवैः ॥ डाकिनीभूतवेतालप्रेतभैरवनायकाः ॥ ७१ ॥

anaMtAdyAzca nAgeMdrA nAgaistattatkulodbhavaiH ॥ DAkinIbhUtavetAlapretabhairavanAyakAH ॥ 71 ॥

पातालवासिनश्चान्ये नानायोनिसमुद्भवाः ॥ नद्यस्समुद्रा गिरयः काननानि सरांसि च ॥ ७२ ॥

pAtAlavAsinazcAnye nAnAyonisamudbhavAH ॥ nadyassamudrA girayaH kAnanAni sarAMsi ca ॥ 72 ॥

पशवः पक्षिणो वृक्षाः कीटाद्याः क्षुद्रयोनयः ॥ नराश्च विविधाकारा मृगाश्च क्षुद्रयोनयः ॥ ७३ ॥

pazavaH pakSiNo vRkSAH kITAdyAH kSudrayonayaH ॥ narAzca vividhAkArA mRgAzca kSudrayonayaH ॥ 73 ॥

भुवनान्यन्तरण्डस्य ततो ब्रह्माण्डकोटयः ॥ बहिरंडान्यसंख्यानि भुवनानि सहाधिपैः ॥ ७४ ॥

bhuvanAnyantaraNDasya tato brahmANDakoTayaH ॥ bahiraMDAnyasaMkhyAni bhuvanAni sahAdhipaiH ॥ 74 ॥

ब्रह्मांडाधारका रुद्रा दशदिक्षु व्यवस्थिताः ॥ यद्गौड यच्च मामेयं यद्वा शाक्तं ततः परम् ॥ ७५ ॥

brahmAMDAdhArakA rudrA dazadikSu vyavasthitAH ॥ yadgauDa yacca mAmeyaM yadvA zAktaM tataH param ॥ 75 ॥

यत्किञ्चिदस्ति शब्दस्य वाच्यं चिदचिदात्मकम् ॥ तत्सर्वं शिवयोः पार्श्वे बुद्ध्वा सामान्यतो यजेत् ॥ ७६ ॥

yatkiJcidasti zabdasya vAcyaM cidacidAtmakam ॥ tatsarvaM zivayoH pArzve buddhvA sAmAnyato yajet ॥ 76 ॥

कृतांजलिपुटाः सर्वे ऽचिंत्याः स्मितमुखास्तथा ॥ प्रीत्या संप्रेक्षमाणाश्च देवं देवीं च सर्वदा ॥ ७७ ॥

kRtAMjalipuTAH sarve 'ciMtyAH smitamukhAstathA ॥ prItyA saMprekSamANAzca devaM devIM ca sarvadA ॥ 77 ॥

इत्थमावरणाभ्यर्चां कृत्वाविक्षेपशांतये ॥ पुनरभ्यर्च्य देवेशं पक्त्वाक्षरमुदीरयेत् ॥ ७८ ॥

itthamAvaraNAbhyarcAM kRtvAvikSepazAMtaye ॥ punarabhyarcya devezaM paktvAkSaramudIrayet ॥ 78 ॥

निवेदयेत्ततः पश्चाच्छिवयोरमृतोपमम् ॥ सुव्यञ्जनसमायुक्तं शुद्धं चारु महाचरुम् ॥ ७९ ॥

nivedayettataH pazcAcchivayoramRtopamam ॥ suvyaJjanasamAyuktaM zuddhaM cAru mahAcarum ॥ 79 ॥

द्वात्रिंशदाढकैर्मुख्यमधमं त्वाढकावरम् ॥ साधयित्वा यथासंपच्छ्रद्धया विनिवेदयेत् ॥ ८० ॥

dvAtriMzadADhakairmukhyamadhamaM tvADhakAvaram ॥ sAdhayitvA yathAsaMpacchraddhayA vinivedayet ॥ 80 ॥

ततो निवेद्य पानीयं तांबूलं चोपदंशकैः ॥ नीराजनादिकं कृत्वा पूजाशेषं समापयेत् ॥ ८१ ॥

tato nivedya pAnIyaM tAMbUlaM copadaMzakaiH ॥ nIrAjanAdikaM kRtvA pUjAzeSaM samApayet ॥ 81 ॥

भोगोपयोग्यद्रव्याणि विशिष्टान्येव साधयेत् ॥ वित्तशाठ्यं न कुर्वीत भक्तिमान्विभवे सति ॥ ८२ ॥

bhogopayogyadravyANi viziSTAnyeva sAdhayet ॥ vittazAThyaM na kurvIta bhaktimAnvibhave sati ॥ 82 ॥

शठस्योपेक्षकस्यापि व्यंग्यं चैवानुतिष्ठतः ॥ न फलंत्येव कर्माणि काम्यानीति सतां कथा ॥ ८३ ॥

zaThasyopekSakasyApi vyaMgyaM caivAnutiSThataH ॥ na phalaMtyeva karmANi kAmyAnIti satAM kathA ॥ 83 ॥

तस्मात्सम्यगुपेक्षां च त्यक्त्वा सर्वांगयोगतः ॥ कुर्यात्काम्यानि कर्माणि फलसिद्धिं यदीच्छति ॥ ८४ ॥

tasmAtsamyagupekSAM ca tyaktvA sarvAMgayogataH ॥ kuryAtkAmyAni karmANi phalasiddhiM yadIcchati ॥ 84 ॥

इत्थं पूजां समाप्याथ देवं देवीं प्रणम्य च ॥ भक्त्या मनस्समाधाय पश्चात्स्तोत्रमुदीरयेत् ॥ ८५ ॥

itthaM pUjAM samApyAtha devaM devIM praNamya ca ॥ bhaktyA manassamAdhAya pazcAtstotramudIrayet ॥ 85 ॥

ततः स्तोत्रमुपास्यान्ते त्वष्टोत्तरशतावराम् ॥ जपेत्पञ्चाक्षरीं विद्यां सहस्रोत्तरमुत्सुकः ॥ ८६ ॥

tataH stotramupAsyAnte tvaSTottarazatAvarAm ॥ japetpaJcAkSarIM vidyAM sahasrottaramutsukaH ॥ 86 ॥

विद्यापूजां गुरोः पूजां कृत्वा पश्चाद्यथाक्रमम् ॥ यथोदयं यथाश्राद्धं सदस्यानपि पूजयेत् ॥ ८७ ॥

vidyApUjAM guroH pUjAM kRtvA pazcAdyathAkramam ॥ yathodayaM yathAzrAddhaM sadasyAnapi pUjayet ॥ 87 ॥

ततः उद्वास्य देवेशं सर्वैरावरणैः सह ॥ मण्डलं गुरवे दद्याद्यागोपकरणैस्सह ॥ ८८ ॥

tataH udvAsya devezaM sarvairAvaraNaiH saha ॥ maNDalaM gurave dadyAdyAgopakaraNaissaha ॥ 88 ॥

शिवाश्रितेभ्यो वा दद्यात्सर्वमेवानुपूर्वशः ॥ अथवा तच्छिवायैव शिवक्षेत्रे समर्पयेत् ॥ ८९ ॥

zivAzritebhyo vA dadyAtsarvamevAnupUrvazaH ॥ athavA tacchivAyaiva zivakSetre samarpayet ॥ 89 ॥

शिवाग्नौ वा यजेद्देवं होमद्रव्यैश्च सप्तभिः ॥ समभ्यर्च्य यथान्यायं सर्वावरणदेवताः ॥ ९० ॥

zivAgnau vA yajeddevaM homadravyaizca saptabhiH ॥ samabhyarcya yathAnyAyaM sarvAvaraNadevatAH ॥ 90 ॥

एष योगेश्वरो नाम त्रिषु लोकेषु विश्रुतः ॥ न तस्मादधिकः कश्चिद्यागो ऽस्ति भुवने क्वचित् ॥ ९१ ॥

eSa yogezvaro nAma triSu lokeSu vizrutaH ॥ na tasmAdadhikaH kazcidyAgo 'sti bhuvane kvacit ॥ 91 ॥

न तदस्ति जगत्यस्मिन्नसध्यं यदनेन तु ॥ ऐहिकं वा फलं किंचिदामुष्मिकफलं तु वा ॥ ९२ ॥

na tadasti jagatyasminnasadhyaM yadanena tu ॥ aihikaM vA phalaM kiMcidAmuSmikaphalaM tu vA ॥ 92 ॥

इदमस्य फलं नेदमिति नैव नियम्यते ॥ श्रेयोरूपस्य कृत्स्नस्य तदिदं श्रेष्टसाधनम् ॥ ९३ ॥

idamasya phalaM nedamiti naiva niyamyate ॥ zreyorUpasya kRtsnasya tadidaM zreSTasAdhanam ॥ 93 ॥

इदं न शक्यते वक्तुं पुरुषेण यदर्च्यते ॥ चिंतामणेरिवैतस्मात्तत्तेन प्राप्यते फलम् ॥ ९४ ॥

idaM na zakyate vaktuM puruSeNa yadarcyate ॥ ciMtAmaNerivaitasmAttattena prApyate phalam ॥ 94 ॥

तथापि क्षुद्रमुद्दिश्य फलं नैतत्प्रयोजयेत् ॥ लघ्वर्थी महतो यस्मात्स्वयं लघुतरो भवेत् ॥ ९५ ॥

tathApi kSudramuddizya phalaM naitatprayojayet ॥ laghvarthI mahato yasmAtsvayaM laghutaro bhavet ॥ 95 ॥

महद्वा फलमल्पं वा कृतं चेत्कर्म सिध्यति ॥ महादेवं समुद्दिश्य कृतं कर्म प्रयुज्यताम् ॥ ९६ ॥

mahadvA phalamalpaM vA kRtaM cetkarma sidhyati ॥ mahAdevaM samuddizya kRtaM karma prayujyatAm ॥ 96 ॥

तस्मादनन्यलभ्येषु शत्रुमृत्युंजयादिषु ॥ फलेषु दृष्टादृष्टेषु कुर्यादेतद्विचक्षणः ॥ ९७ ॥

tasmAdananyalabhyeSu zatrumRtyuMjayAdiSu ॥ phaleSu dRSTAdRSTeSu kuryAdetadvicakSaNaH ॥ 97 ॥

महत्स्वपि च पातेषु महारागभयादिषु ॥ दुर्भिक्षादिषु शांत्यर्थं शांतिं कुर्यादनेन तु ॥ ९८ ॥

mahatsvapi ca pAteSu mahArAgabhayAdiSu ॥ durbhikSAdiSu zAMtyarthaM zAMtiM kuryAdanena tu ॥ 98 ॥

बहुना किं प्रलापेन महाव्यापन्निवारकम् ॥ आत्मीयमस्त्रं शैवानामिदमाह महेश्वरः ॥ ९९ ॥

bahunA kiM pralApena mahAvyApannivArakam ॥ AtmIyamastraM zaivAnAmidamAha mahezvaraH ॥ 99 ॥

तस्मादितः परं नास्ति परित्राणमिहात्मनः ॥ इति मत्वा प्रयुंजानः कर्मेदं शुभमश्नुते ॥ १०० ॥

tasmAditaH paraM nAsti paritrANamihAtmanaH ॥ iti matvA prayuMjAnaH karmedaM zubhamaznute ॥ 100 ॥

स्तोत्रमात्रं शुचिर्भूत्वा यः पठेत्सुसमाहितः ॥ सोप्यभीष्टतमादर्थादष्टांशफलमाप्नुयात् ॥ १०१ ॥

stotramAtraM zucirbhUtvA yaH paThetsusamAhitaH ॥ sopyabhISTatamAdarthAdaSTAMzaphalamApnuyAt ॥ 101 ॥

अर्थं तस्यानुसन्धाय पर्वण्यनशनः पठेत् ॥ अष्टाभ्यां वा चतुर्दश्यां फलमर्धं समाप्नुयात् ॥ १०२ ॥

arthaM tasyAnusandhAya parvaNyanazanaH paThet ॥ aSTAbhyAM vA caturdazyAM phalamardhaM samApnuyAt ॥ 102 ॥

यस्त्वर्थमनुसंधाय पर्वादिषु तथा व्रती ॥ मासमेकं जपेत्स्तोत्रं स कृत्स्नं फलमाप्नुयात् ॥ १०३ ॥

yastvarthamanusaMdhAya parvAdiSu tathA vratI ॥ mAsamekaM japetstotraM sa kRtsnaM phalamApnuyAt ॥ 103 ॥