श्रीकृष्ण उवाच ॥ भगवंस्त्वन्मुखादेव श्रुतं श्रुतिसमं मया ॥ स्वाश्रितानां शिवप्रोक्तं नित्यनैमित्तिकं तथा ॥ १ ॥

zrIkRSNa uvAca ॥ bhagavaMstvanmukhAdeva zrutaM zrutisamaM mayA ॥ svAzritAnAM zivaproktaM nityanaimittikaM tathA ॥ 1 ॥

इदानीं श्रोतुमिच्छामि शिवधर्माधिकारिणाम् ॥ काम्यमप्यस्ति चेत्कर्म वक्तुमर्हसि साम्प्रतम् ॥ २ ॥

idAnIM zrotumicchAmi zivadharmAdhikAriNAm ॥ kAmyamapyasti cetkarma vaktumarhasi sAmpratam ॥ 2 ॥

उपमन्युरुवाच ॥ अस्त्यैहिकफलं किञ्चिदामुष्मिकफलं तथा ॥ ऐहिकामुष्मिकञ्चापि तच्च पञ्चविधं पुनः ॥ ३ ॥

upamanyuruvAca ॥ astyaihikaphalaM kiJcidAmuSmikaphalaM tathA ॥ aihikAmuSmikaJcApi tacca paJcavidhaM punaH ॥ 3 ॥

किंचित्क्रियामयं कर्म किंचित्कर्म तपो मयम् ॥ ४ ॥

kiMcitkriyAmayaM karma kiMcitkarma tapo mayam ॥ 4 ॥

जपध्यानमयं किंचित्किंचित्सर्वमयं तथा ॥ क्रियामयं तथा भिन्नं होमदानार्चनक्रमात् ॥ ५ ॥

japadhyAnamayaM kiMcitkiMcitsarvamayaM tathA ॥ kriyAmayaM tathA bhinnaM homadAnArcanakramAt ॥ 5 ॥

सर्वशक्तिमतामेव नान्येषां सफलं भवेत् ॥ शक्तिश्चाज्ञा मदेशस्य शिवस्य परमात्मनः ॥ ६ ॥

sarvazaktimatAmeva nAnyeSAM saphalaM bhavet ॥ zaktizcAjJA madezasya zivasya paramAtmanaH ॥ 6 ॥

तस्मात्काम्यानि कर्माणि कुर्यादाज्ञाधरोद्विजः ॥ अथ वक्ष्यामि काम्यं हि चेहामुत्र फलप्रदम् ॥ ७ ॥

tasmAtkAmyAni karmANi kuryAdAjJAdharodvijaH ॥ atha vakSyAmi kAmyaM hi cehAmutra phalapradam ॥ 7 ॥

शैवैर्माहेश्वरैश्चैव कार्यमंतर्बहिः क्रमात् ॥ शिवो महेश्वरश्चेति नात्यंतमिह भिद्यते ॥ ८ ॥

zaivairmAhezvaraizcaiva kAryamaMtarbahiH kramAt ॥ zivo mahezvarazceti nAtyaMtamiha bhidyate ॥ 8 ॥

यथा तथा न भिद्यंते शैवा माहेश्वरा अपि ॥ शिवाश्रिता हि ते शैवा ज्ञानयज्ञरता नराः ॥ ९ ॥

yathA tathA na bhidyaMte zaivA mAhezvarA api ॥ zivAzritA hi te zaivA jJAnayajJaratA narAH ॥ 9 ॥

माहेश्वरास्समाख्याता कर्मयज्ञरता भुवि ॥ तस्मादाभ्यन्तरे कुर्युः शैवा माहेश्वरा वहिः ॥ १० ॥

mAhezvarAssamAkhyAtA karmayajJaratA bhuvi ॥ tasmAdAbhyantare kuryuH zaivA mAhezvarA vahiH ॥ 10 ॥

न तु प्रयोगो भिद्येत वक्ष्यमाणस्य कर्मणः ॥ परीक्ष्य भूमिं विधिवद्गंधवर्णरसादिभिः ॥ ११ ॥

na tu prayogo bhidyeta vakSyamANasya karmaNaH ॥ parIkSya bhUmiM vidhivadgaMdhavarNarasAdibhiH ॥ 11 ॥

मनोभिलषिते तत्र वितानविततांबरे ॥ सुप्रलिप्ते महीपृष्ठे दर्पणोदरसंनिभे ॥ १२ ॥

manobhilaSite tatra vitAnavitatAMbare ॥ supralipte mahIpRSThe darpaNodarasaMnibhe ॥ 12 ॥

प्राचीमुत्पादयेत्पूर्वं शास्त्रदृष्टेन वर्त्मना ॥ एकहस्तं द्विहस्तं वा मण्डलं परिकल्पयेत् ॥ १३ ॥

prAcImutpAdayetpUrvaM zAstradRSTena vartmanA ॥ ekahastaM dvihastaM vA maNDalaM parikalpayet ॥ 13 ॥

आलिखेद्विमलं पद्ममष्टपत्रं सकर्णिकम् ॥ रत्नहेमादिभिश्चूर्णैर्यथासंभवसंभृतैः ॥ १४ ॥

AlikhedvimalaM padmamaSTapatraM sakarNikam ॥ ratnahemAdibhizcUrNairyathAsaMbhavasaMbhRtaiH ॥ 14 ॥

पञ्चावरणसंयुक्तं बहुशोभासमन्वितम् ॥ दलेषु सिद्धयः कल्प्याः केसरेषु सशक्तिकाः ॥ १५ ॥

paJcAvaraNasaMyuktaM bahuzobhAsamanvitam ॥ daleSu siddhayaH kalpyAH kesareSu sazaktikAH ॥ 15 ॥

रुद्रा वामादयस्त्वष्टौ पूर्वादिदलतः क्रमात् ॥ कर्णिकायां च वैराग्यं बीजेषु नव शक्तयः ॥ १६ ॥

rudrA vAmAdayastvaSTau pUrvAdidalataH kramAt ॥ karNikAyAM ca vairAgyaM bIjeSu nava zaktayaH ॥ 16 ॥

स्कन्दे शिवात्मको धर्मो नाले ज्ञानं शिवाश्रयम् ॥ कर्णिकोपरि चाग्नेयं मंडलं सौरमैन्दवम् ॥ १७ ॥

skande zivAtmako dharmo nAle jJAnaM zivAzrayam ॥ karNikopari cAgneyaM maMDalaM sauramaindavam ॥ 17 ॥

शिवविद्यात्मतत्त्वाख्यं तत्त्वत्रयमतः परम् ॥ सर्वासनोपरि सुखं विचित्रकुसुमान्वितम् ॥ १८ ॥

zivavidyAtmatattvAkhyaM tattvatrayamataH param ॥ sarvAsanopari sukhaM vicitrakusumAnvitam ॥ 18 ॥

पञ्चावरणसंयुक्तं पूजयेदंबया सह ॥ शुद्धस्फटिकसंकाशं प्रसन्नं शीतलद्युतिम् ॥ १९ ॥

paJcAvaraNasaMyuktaM pUjayedaMbayA saha ॥ zuddhasphaTikasaMkAzaM prasannaM zItaladyutim ॥ 19 ॥

विद्युद्वलयसंकाशजटामुकुटभूषितम् ॥ शार्दूलचर्मवसनं किञ्चित्स्मितमुखांबुजम् ॥ २० ॥

vidyudvalayasaMkAzajaTAmukuTabhUSitam ॥ zArdUlacarmavasanaM kiJcitsmitamukhAMbujam ॥ 20 ॥

रक्तपद्मदलप्रख्यपादपाणितलाधरम् ॥ सर्वलक्षणसंपन्नं सर्वाभरणभूषितम् ॥ २१ ॥

raktapadmadalaprakhyapAdapANitalAdharam ॥ sarvalakSaNasaMpannaM sarvAbharaNabhUSitam ॥ 21 ॥

दिव्यायुधवरैर्युक्तं दिव्यगंधानुलेपनम् ॥ पञ्चवक्त्रं दशभुजं चन्द्रखण्डशिखामणिम् ॥ २२ ॥

divyAyudhavarairyuktaM divyagaMdhAnulepanam ॥ paJcavaktraM dazabhujaM candrakhaNDazikhAmaNim ॥ 22 ॥

अस्य पूर्वमुखं सौम्यं बालार्कसदृशप्रभम् ॥ त्रिलोचनारविंदाढ्यं कृतबालेंदुशेखरम् ॥ २३ ॥

asya pUrvamukhaM saumyaM bAlArkasadRzaprabham ॥ trilocanAraviMdADhyaM kRtabAleMduzekharam ॥ 23 ॥

दक्षिणं नीलजीमूतसमानरुचिरप्रभम् ॥ भ्रुकुटीकुटिलं घोरं रक्तवृत्तेक्षणत्रयम् ॥ २४ ॥

dakSiNaM nIlajImUtasamAnaruciraprabham ॥ bhrukuTIkuTilaM ghoraM raktavRttekSaNatrayam ॥ 24 ॥

दंष्ट्राकरालं दुर्धर्षं स्फुरिताधरपल्लवम् ॥ उत्तरं विद्रुमप्रख्यं नीलालकविभूषितम् ॥ २५ ॥

daMSTrAkarAlaM durdharSaM sphuritAdharapallavam ॥ uttaraM vidrumaprakhyaM nIlAlakavibhUSitam ॥ 25 ॥

सविलासं त्रिनयनं चन्द्राभरणशेखरम् ॥ पश्चिमं पूर्णचन्द्राभं लोचनत्रितयोज्ज्वलम् ॥ २६ ॥

savilAsaM trinayanaM candrAbharaNazekharam ॥ pazcimaM pUrNacandrAbhaM locanatritayojjvalam ॥ 26 ॥

चन्द्ररेखाधरं सौम्यं मंदस्मितमनोहरम् ॥ पञ्चमं स्फटिकप्रख्यमिंदुरेखासमुज्ज्वलम् ॥ २७ ॥

candrarekhAdharaM saumyaM maMdasmitamanoharam ॥ paJcamaM sphaTikaprakhyamiMdurekhAsamujjvalam ॥ 27 ॥

अतीव सौम्यमुत्फुल्ललोचनत्रितयोज्ज्वलम् ॥ दक्षिणे शूलपरशुवज्रखड्गानलोज्ज्वलम् ॥ २८ ॥

atIva saumyamutphullalocanatritayojjvalam ॥ dakSiNe zUlaparazuvajrakhaDgAnalojjvalam ॥ 28 ॥

सव्ये च नागनाराचघण्टापाशांकुशोज्ज्वलम् ॥ निवृत्त्याजानुसंबद्धमानाभेश्च प्रतिष्ठया ॥ २९ ॥

savye ca nAganArAcaghaNTApAzAMkuzojjvalam ॥ nivRttyAjAnusaMbaddhamAnAbhezca pratiSThayA ॥ 29 ॥

आकंठं विद्यया तद्वदाललाटं तु शांतया ॥ तदूर्ध्वं शांत्यतीताख्यकलया परया तथा ॥ ३० ॥

AkaMThaM vidyayA tadvadAlalATaM tu zAMtayA ॥ tadUrdhvaM zAMtyatItAkhyakalayA parayA tathA ॥ 30 ॥

पञ्चाध्वव्यापिनं साक्षात्कलापञ्चकविग्रहम् ॥ ईशानमुकुटं देवं पुरुषाख्यं पुरातनम् ॥ ३१ ॥

paJcAdhvavyApinaM sAkSAtkalApaJcakavigraham ॥ IzAnamukuTaM devaM puruSAkhyaM purAtanam ॥ 31 ॥

अघोरहृदयं तद्वद्वामगुह्यं महेश्वरम् ॥ सद्यपादं च तन्मूर्तिमष्टत्रिंशत्कलामयम् ॥ ३२ ॥

aghorahRdayaM tadvadvAmaguhyaM mahezvaram ॥ sadyapAdaM ca tanmUrtimaSTatriMzatkalAmayam ॥ 32 ॥

मातृकामयमीशानं पञ्चब्रह्ममयं तथा ॥ ओंकाराख्यमयं चैव हंसशक्त्या समन्वितम् ॥ ३३ ॥

mAtRkAmayamIzAnaM paJcabrahmamayaM tathA ॥ oMkArAkhyamayaM caiva haMsazaktyA samanvitam ॥ 33 ॥

तथेच्छात्मिकया शक्त्या समारूढांकमंडलम् ॥ ज्ञानाख्यया दक्षिणतो वामतश्च क्रियाख्यया ॥ ३४ ॥

tathecchAtmikayA zaktyA samArUDhAMkamaMDalam ॥ jJAnAkhyayA dakSiNato vAmatazca kriyAkhyayA ॥ 34 ॥

तत्त्वत्रयमयं साक्षाद्विद्यामूर्तिं सदाशिवम् ॥ मूर्तिमूलेन संकल्प्य सकलीकृत्य च क्रमात् ॥ ३५ ॥

tattvatrayamayaM sAkSAdvidyAmUrtiM sadAzivam ॥ mUrtimUlena saMkalpya sakalIkRtya ca kramAt ॥ 35 ॥

संपूज्य च यथान्यायमर्घान्तं मूलविद्यया ॥ मूर्तिमन्तं शिवं साक्षाच्छक्त्या परमया सह ॥ ३६ ॥

saMpUjya ca yathAnyAyamarghAntaM mUlavidyayA ॥ mUrtimantaM zivaM sAkSAcchaktyA paramayA saha ॥ 36 ॥

तत्रावाह्य महादेवं सदसद्व्यक्तिवर्जितम् ॥ पञ्चोपकरणं कृत्वा पूजयेत्परमेश्वरम् ॥ ३७ ॥

tatrAvAhya mahAdevaM sadasadvyaktivarjitam ॥ paJcopakaraNaM kRtvA pUjayetparamezvaram ॥ 37 ॥

ब्रह्मभिश्च षडङ्गैश्च ततो मातृकया सह ॥ प्रणवेन शिवेनैव शक्तियुक्तेन च क्रमात् ॥ ३८ ॥

brahmabhizca SaDaGgaizca tato mAtRkayA saha ॥ praNavena zivenaiva zaktiyuktena ca kramAt ॥ 38 ॥

शांतेन वा तथान्यैश्च वेदमन्त्रैश्च कृत्स्नशः ॥ पूजयेत्परमं देवं केवलेन शिवेन वा ॥ ३९ ॥

zAMtena vA tathAnyaizca vedamantraizca kRtsnazaH ॥ pUjayetparamaM devaM kevalena zivena vA ॥ 39 ॥

पाद्यादिमुखवासांतं कृत्वा प्रस्थापनं विना ॥ पञ्चावरणपूजां तु ह्यारभेत यथाक्रमम् ॥ ४० ॥

pAdyAdimukhavAsAMtaM kRtvA prasthApanaM vinA ॥ paJcAvaraNapUjAM tu hyArabheta yathAkramam ॥ 40 ॥