उपमन्युरुवाच ॥ प्रोक्षयेन्मूलमंत्रेण पूजास्थानं विशुद्धये ॥ गन्धचन्दनतोयेन पुष्पं तत्र विनिक्षिपेत् ॥ १ ॥

upamanyuruvAca ॥ prokSayenmUlamaMtreNa pUjAsthAnaM vizuddhaye ॥ gandhacandanatoyena puSpaM tatra vinikSipet ॥ 1 ॥

अस्त्रेणोत्सार्य वै विघ्नानवगुण्ठ्य च वर्मणा ॥ अस्त्रं दिक्षु प्रविन्यस्य कल्पयेदर्चनाभुवम् ॥ २ ॥

astreNotsArya vai vighnAnavaguNThya ca varmaNA ॥ astraM dikSu pravinyasya kalpayedarcanAbhuvam ॥ 2 ॥

तत्र दर्भान्परिस्तीर्य क्षालयेत्प्रोक्षणादिभिः ॥ संशोध्य सर्वपात्राणि द्रव्यशुद्धिं समाचरेत् ॥ ३ ॥

tatra darbhAnparistIrya kSAlayetprokSaNAdibhiH ॥ saMzodhya sarvapAtrANi dravyazuddhiM samAcaret ॥ 3 ॥

प्रोक्षणीमर्ध्यपात्रं च पाद्यपात्रमतः परम् ॥ तथैवाचमनीयस्य पात्रं चेति चतुष्टयम् ॥ ४ ॥

prokSaNImardhyapAtraM ca pAdyapAtramataH param ॥ tathaivAcamanIyasya pAtraM ceti catuSTayam ॥ 4 ॥

प्रक्षाल्य प्रोक्ष्य वीक्ष्याथ क्षिपेत्तेषु जलं शिवम् ॥ पुण्यद्रव्याणि सर्वाणि यथालाभं विनिक्षिपेत् ॥ ५ ॥

prakSAlya prokSya vIkSyAtha kSipetteSu jalaM zivam ॥ puNyadravyANi sarvANi yathAlAbhaM vinikSipet ॥ 5 ॥

रत्नानि रजतं हेम गन्धपुष्पाक्षतादयः ॥ फलपल्लवदर्भांश्च पुण्यद्रव्याण्यनेकधा ॥ ६ ॥

ratnAni rajataM hema gandhapuSpAkSatAdayaH ॥ phalapallavadarbhAMzca puNyadravyANyanekadhA ॥ 6 ॥

स्नानोदके सुगन्धादि पानीये च विशेषतः ॥ शीतलानि मनोज्ञानी कुसुमादीनि निक्षिपेत् ॥ ७ ॥

snAnodake sugandhAdi pAnIye ca vizeSataH ॥ zItalAni manojJAnI kusumAdIni nikSipet ॥ 7 ॥

उशीरं चन्दनं चैव पाद्ये तु परिकल्पयेत् ॥ जातिकंकोलकर्पूरबहुमूलतमालकान् ॥ ८ ॥

uzIraM candanaM caiva pAdye tu parikalpayet ॥ jAtikaMkolakarpUrabahumUlatamAlakAn ॥ 8 ॥

क्षिपेदाचमनीये च चूर्णयित्वा विशेषतः ॥ एलां पात्रेषु सर्वेषु कर्पूरं चन्दनं तथा ॥ ९ ॥

kSipedAcamanIye ca cUrNayitvA vizeSataH ॥ elAM pAtreSu sarveSu karpUraM candanaM tathA ॥ 9 ॥

कुशाग्राण्यक्षतांश्चैव यवव्रीहितिलानपि ॥ आज्यसिद्धार्थपुष्पाणि भसितञ्चार्घ्यपात्रके ॥ १० ॥

kuzAgrANyakSatAMzcaiva yavavrIhitilAnapi ॥ AjyasiddhArthapuSpANi bhasitaJcArghyapAtrake ॥ 10 ॥

कुशपुष्पयवव्रीहिबहुमूलतमालकान् ॥ प्रक्षिपेत्प्रोक्षणीपात्रे भसितं च यथाक्रमम् ॥ ११ ॥

kuzapuSpayavavrIhibahumUlatamAlakAn ॥ prakSipetprokSaNIpAtre bhasitaM ca yathAkramam ॥ 11 ॥

सर्वत्र मन्त्रं विन्यस्य वर्मणावेष्ट्य बाह्यतः ॥ पश्चादस्त्रेण संरक्ष्य धेनुमुद्रां प्रदर्शयेत् ॥ १२ ॥

sarvatra mantraM vinyasya varmaNAveSTya bAhyataH ॥ pazcAdastreNa saMrakSya dhenumudrAM pradarzayet ॥ 12 ॥

पूजाद्रव्याणि सर्वाणि प्रोक्षणीपात्रवारिणा ॥ सम्प्रोक्ष्य मूलमंत्रेण शोधयेद्विधिवत्ततः ॥ १३ ॥

pUjAdravyANi sarvANi prokSaNIpAtravAriNA ॥ samprokSya mUlamaMtreNa zodhayedvidhivattataH ॥ 13 ॥

पात्राणां प्रोक्षणीमेकामलाभे सर्वकर्मसु ॥ साधयेदर्घ्यमद्भिस्तत्सामान्यं साधकोत्तमः ॥ १४ ॥

pAtrANAM prokSaNImekAmalAbhe sarvakarmasu ॥ sAdhayedarghyamadbhistatsAmAnyaM sAdhakottamaH ॥ 14 ॥

ततो विनायकं देवं भक्ष्यभोज्यादिभिः क्रमात् ॥ पूजयित्वा विधानेन द्वारपार्श्वे ऽथ दक्षिणे ॥ १५ ॥

tato vinAyakaM devaM bhakSyabhojyAdibhiH kramAt ॥ pUjayitvA vidhAnena dvArapArzve 'tha dakSiNe ॥ 15 ॥

अन्तःपुराधिपं साक्षान्नन्दिनं सम्यगर्चयेत् ॥ चामीकराचलप्रख्यं सर्वाभरणभूषितम् ॥ १६ ॥

antaHpurAdhipaM sAkSAnnandinaM samyagarcayet ॥ cAmIkarAcalaprakhyaM sarvAbharaNabhUSitam ॥ 16 ॥

बालेन्दुमुकुटं सौम्यं त्रिनेत्रं च चतुर्भुजम् ॥ दीप्तशूलमृगीटंकतिग्मवेत्रधरं प्रभुम् ॥ १७ ॥

bAlendumukuTaM saumyaM trinetraM ca caturbhujam ॥ dIptazUlamRgITaMkatigmavetradharaM prabhum ॥ 17 ॥

चन्द्रबिम्बाभवदनं हरिवक्त्रमथापि वा ॥ उत्तरे द्वारपार्श्वस्य भार्यां च मरुतां सुताम् ॥ १८ ॥

candrabimbAbhavadanaM harivaktramathApi vA ॥ uttare dvArapArzvasya bhAryAM ca marutAM sutAm ॥ 18 ॥

सुयशां सुव्रतामम्बां पादमण्डनतत्पराम् ॥ पूजयित्वा प्रविश्यान्तर्भवनं परमेष्ठिनः ॥ १९ ॥

suyazAM suvratAmambAM pAdamaNDanatatparAm ॥ pUjayitvA pravizyAntarbhavanaM parameSThinaH ॥ 19 ॥

संपूज्य लिङ्गं तैर्द्रव्यैर्निर्माल्यमपनोदयेत् ॥ प्रक्षाल्य पुष्पं शिरसि न्यसेत्तस्य विशुद्धये ॥ २० ॥

saMpUjya liGgaM tairdravyairnirmAlyamapanodayet ॥ prakSAlya puSpaM zirasi nyasettasya vizuddhaye ॥ 20 ॥

पुष्पहस्तो जपेच्छक्त्या मन्त्रं मन्त्रविशुद्धये ॥ ऐशान्यां चण्दमाराध्य निर्माल्यं तस्य दापयेत् ॥ २१ ॥

puSpahasto japecchaktyA mantraM mantravizuddhaye ॥ aizAnyAM caNdamArAdhya nirmAlyaM tasya dApayet ॥ 21 ॥

कल्पयेदासनं पश्चादाधारादि यथाक्रमम् ॥ आधारशक्तिं कल्याणीं श्यामां ध्यायेदधो भुवि ॥ २२ ॥

kalpayedAsanaM pazcAdAdhArAdi yathAkramam ॥ AdhArazaktiM kalyANIM zyAmAM dhyAyedadho bhuvi ॥ 22 ॥

तस्याः पुरस्तादुत्कंठमनंतं कुण्डलाकृतिम् ॥ धवलं पञ्चफणिनं लेलिहानमिवाम्बरम् ॥ २३ ॥

tasyAH purastAdutkaMThamanaMtaM kuNDalAkRtim ॥ dhavalaM paJcaphaNinaM lelihAnamivAmbaram ॥ 23 ॥

तस्योपर्यासनं भद्रं कण्ठीरवचतुष्पदम् ॥ धर्मो ज्ञानं च वैराग्यमैश्वर्यञ्च पदानि वै ॥ २४ ॥

tasyoparyAsanaM bhadraM kaNThIravacatuSpadam ॥ dharmo jJAnaM ca vairAgyamaizvaryaJca padAni vai ॥ 24 ॥

आग्नेयादिश्वेतरक्तपीतश्यामानि वर्णतः ॥ अधर्मादीनि पूर्वादीन्युत्तरांतान्यनुक्रमात् ॥ २५ ॥

AgneyAdizvetaraktapItazyAmAni varNataH ॥ adharmAdIni pUrvAdInyuttarAMtAnyanukramAt ॥ 25 ॥

राजावर्तमणिप्रख्यान्न्यस्य गात्राणि भावयेत् ॥ अस्योर्ध्वच्छादनं पद्ममासनं विमलं सितम् ॥ २६ ॥

rAjAvartamaNiprakhyAnnyasya gAtrANi bhAvayet ॥ asyordhvacchAdanaM padmamAsanaM vimalaM sitam ॥ 26 ॥

अष्टपत्राणि तस्याहुरणिमादिगुणाष्टकम् ॥ केसराणि च वामाद्या रुद्रावामादिशक्तिभिः ॥ २७ ॥

aSTapatrANi tasyAhuraNimAdiguNASTakam ॥ kesarANi ca vAmAdyA rudrAvAmAdizaktibhiH ॥ 27 ॥

बीजान्यपि च ता एव शक्तयोंतर्मनोन्मनीः ॥ कर्णिकापरवैराग्यं नालं ज्ञानं शिवात्मकम् ॥ २८ ॥

bIjAnyapi ca tA eva zaktayoMtarmanonmanIH ॥ karNikAparavairAgyaM nAlaM jJAnaM zivAtmakam ॥ 28 ॥

कन्दश्च शिवधर्मात्मा कर्णिकान्ते त्रिमण्डले ॥ त्रिमण्डलोपर्यात्मादि तत्त्वत्रितयमासनम् ॥ २९ ॥

kandazca zivadharmAtmA karNikAnte trimaNDale ॥ trimaNDaloparyAtmAdi tattvatritayamAsanam ॥ 29 ॥

सर्वासनोपरि सुखं विचित्रास्तरणास्तृतम् ॥ आसनं कल्पयेद्दिव्यं शुद्धविद्यासमुज्ज्वलम् ॥ ३० ॥

sarvAsanopari sukhaM vicitrAstaraNAstRtam ॥ AsanaM kalpayeddivyaM zuddhavidyAsamujjvalam ॥ 30 ॥

आवाहनं स्थापनं च सन्निरोधं निरीक्षणम् ॥ नमस्कारं च कुर्वीत बध्वा मुद्राः पृथक्पृथक् ॥ ३१ ॥

AvAhanaM sthApanaM ca sannirodhaM nirIkSaNam ॥ namaskAraM ca kurvIta badhvA mudrAH pRthakpRthak ॥ 31 ॥

पाद्यमाचमनं चार्घ्यं गंधं पुष्पं ततः परम् ॥ धूपं दीपं च तांबूलं दत्त्वाथ स्वापयेच्छिवौ ॥ ३२ ॥

pAdyamAcamanaM cArghyaM gaMdhaM puSpaM tataH param ॥ dhUpaM dIpaM ca tAMbUlaM dattvAtha svApayecchivau ॥ 32 ॥

अथवा परिकल्प्यैवमासनं मूर्तिमेव च ॥ सकलीकृत्य मूलेन ब्रह्माभिश्चापरैस्तथा ॥ ३३ ॥

athavA parikalpyaivamAsanaM mUrtimeva ca ॥ sakalIkRtya mUlena brahmAbhizcAparaistathA ॥ 33 ॥

आवाहयेत्ततो देव्या शिवं परमकारणम् ॥ शुद्धस्फटिकसंकाशं देवं निश्चलमक्षरम् ॥ ३४ ॥

AvAhayettato devyA zivaM paramakAraNam ॥ zuddhasphaTikasaMkAzaM devaM nizcalamakSaram ॥ 34 ॥

कारणं सर्वलोकानां सर्वलोकमयं परम् ॥ अंतर्बहिःस्थितं व्याप्य ह्यणोरणु महत्तरम् २ ॥ ३५ ॥

kAraNaM sarvalokAnAM sarvalokamayaM param ॥ aMtarbahiHsthitaM vyApya hyaNoraNu mahattaram 2 ॥ 35 ॥

भक्तानामप्रयत्नेन दृश्यमीश्वरमव्ययम् ॥ ब्रह्मेंद्रविष्णुरुद्राद्यैरपि देवैरगोचरम् ॥ ३६ ॥

bhaktAnAmaprayatnena dRzyamIzvaramavyayam ॥ brahmeMdraviSNurudrAdyairapi devairagocaram ॥ 36 ॥

देवसारं च विद्वद्भिरगोचरमिति श्रुतम् ॥ आदिमध्यान्तरहितं भेषजं भवरोगिणाम् ॥ ३७ ॥

devasAraM ca vidvadbhiragocaramiti zrutam ॥ AdimadhyAntarahitaM bheSajaM bhavarogiNAm ॥ 37 ॥

शिवतत्त्वमिति ख्यातं शिवार्थं जगति स्थिरम् ॥ पञ्चोपचारवद्भक्त्या पूजयेल्लिंगमुत्तमम् ॥ ३८ ॥

zivatattvamiti khyAtaM zivArthaM jagati sthiram ॥ paJcopacAravadbhaktyA pUjayelliMgamuttamam ॥ 38 ॥

लिंगमूर्तिर्महेशस्य शिवस्य परमात्मनः ॥ स्नानकाले प्रकुर्वीत जयशब्दादिमंगलम् ॥ ३९ ॥

liMgamUrtirmahezasya zivasya paramAtmanaH ॥ snAnakAle prakurvIta jayazabdAdimaMgalam ॥ 39 ॥

पञ्चगव्यघृतक्षीरदधिमध्वादिपूर्वकैः ॥ मूलैः फलानां सारैश्च तिलसर्षपसक्तुभिः ॥ ४० ॥

paJcagavyaghRtakSIradadhimadhvAdipUrvakaiH ॥ mUlaiH phalAnAM sAraizca tilasarSapasaktubhiH ॥ 40 ॥

बीजैर्यवादिभिश्शस्तैश्चूर्णैर्माषादिसंभवैः ॥ संस्नाप्यालिप्य पिष्टाद्यैः स्नापयेदुष्णवारिभिः ॥ ४१ ॥

bIjairyavAdibhizzastaizcUrNairmASAdisaMbhavaiH ॥ saMsnApyAlipya piSTAdyaiH snApayeduSNavAribhiH ॥ 41 ॥

घर्षयेद्विल्वपत्राद्यैर्लेपगंधापनुत्तये ॥ पुनः संस्नाप्य सलिलैश्चक्रवर्त्युपचारतः ॥ ४२ ॥

gharSayedvilvapatrAdyairlepagaMdhApanuttaye ॥ punaH saMsnApya salilaizcakravartyupacArataH ॥ 42 ॥

सुगंधामलकं दद्याद्धरिद्रां च यथाक्रमम् ॥ ततः संशोध्य सलिलैर्लिंगं बेरमथापि वा ॥ ४३ ॥

sugaMdhAmalakaM dadyAddharidrAM ca yathAkramam ॥ tataH saMzodhya salilairliMgaM beramathApi vA ॥ 43 ॥

स्नापयेद्गंधतोयेन कुशपुष्पोदकेन च ॥ हिरण्यरत्नतोयैश्च मंत्रसिद्धैर्यथाक्रमम् ॥ ४४ ॥

snApayedgaMdhatoyena kuzapuSpodakena ca ॥ hiraNyaratnatoyaizca maMtrasiddhairyathAkramam ॥ 44 ॥

असंभवे तु द्रव्याणां यथासंभवसंभृतैः ॥ केवलैर्मंत्रतोयैर्वा स्नापयेच्छ्रद्धया शिवम् ॥ ४५ ॥

asaMbhave tu dravyANAM yathAsaMbhavasaMbhRtaiH ॥ kevalairmaMtratoyairvA snApayecchraddhayA zivam ॥ 45 ॥

कलशेनाथ शंखेन वर्धन्या पाणिना तथा ॥ सकुशेन सपुष्पेण स्नापयेन्मंत्रपूर्वकम् ॥ ४६ ॥

kalazenAtha zaMkhena vardhanyA pANinA tathA ॥ sakuzena sapuSpeNa snApayenmaMtrapUrvakam ॥ 46 ॥

पवमानेन रुद्रेण नीलेन त्वरितेन च ॥ लिंगसूक्तादिसूक्तैश्च शिरसाथर्वणेन च ॥ ४७ ॥

pavamAnena rudreNa nIlena tvaritena ca ॥ liMgasUktAdisUktaizca zirasAtharvaNena ca ॥ 47 ॥

ऋग्भिश्च सामभिः शैवैर्ब्रह्मभिश्चापि पञ्चभिः ॥ स्नापयेद्देवदेवेशं शिवेन प्रणवेन च ॥ ४८ ॥

Rgbhizca sAmabhiH zaivairbrahmabhizcApi paJcabhiH ॥ snApayeddevadevezaM zivena praNavena ca ॥ 48 ॥

यथा देवस्य देव्याश्च कुर्यात्स्नानादिकं तथा ॥ न तु कश्चिद्विशेषो ऽस्ति तत्र तौ सदृशौ यतः ॥ ४९ ॥

yathA devasya devyAzca kuryAtsnAnAdikaM tathA ॥ na tu kazcidvizeSo 'sti tatra tau sadRzau yataH ॥ 49 ॥

प्रथमं देवमुद्दिश्य कृत्वा स्नानादिकाः क्रियाः ॥ देव्यैः प्रश्चात्प्रकुर्वीत देवदेवस्य शासनात् ॥ ५० ॥

prathamaM devamuddizya kRtvA snAnAdikAH kriyAH ॥ devyaiH prazcAtprakurvIta devadevasya zAsanAt ॥ 50 ॥

अर्धनारीश्वरे पूज्ये पौर्वापर्यं न विद्यते ॥ तत्र तत्रोपचाराणां लिंगे वान्यत्र वा क्वचित् ॥ ५१ ॥

ardhanArIzvare pUjye paurvAparyaM na vidyate ॥ tatra tatropacArANAM liMge vAnyatra vA kvacit ॥ 51 ॥

कृत्वा ऽभिषेकं लिंगस्य शुचिना च सुगंधिना ॥ संमृज्य वाससा दद्यादंबरं चोपवीतकम् ॥ ५२ ॥

kRtvA 'bhiSekaM liMgasya zucinA ca sugaMdhinA ॥ saMmRjya vAsasA dadyAdaMbaraM copavItakam ॥ 52 ॥

पाद्यमाचमनं चार्घ्यं गंधं पुष्पं च भूषणम् ॥ धूपं दीपं च नैवेद्यं पानीयं मुखशोधनम् ॥ ५३ ॥

pAdyamAcamanaM cArghyaM gaMdhaM puSpaM ca bhUSaNam ॥ dhUpaM dIpaM ca naivedyaM pAnIyaM mukhazodhanam ॥ 53 ॥

पुनश्चाचमनीयं च मुखवासं ततः परम् ॥ मुकुटं च शुभं भद्रं सर्वरत्नैरलंकृतम् ॥ ५४ ॥

punazcAcamanIyaM ca mukhavAsaM tataH param ॥ mukuTaM ca zubhaM bhadraM sarvaratnairalaMkRtam ॥ 54 ॥

भूषणानि पवित्राणि माल्यानि विविधानि च ॥ व्यजने चामरे छत्रं तालवृंतं च दर्पणम् ॥ ५५ ॥

bhUSaNAni pavitrANi mAlyAni vividhAni ca ॥ vyajane cAmare chatraM tAlavRMtaM ca darpaNam ॥ 55 ॥

दत्त्वा नीराजनं कुर्यात्सर्वमंगलनिस्वनैः ॥ गीतनृत्यादिभिश्चैव जयशब्दसमन्वितः ॥ ५६ ॥

dattvA nIrAjanaM kuryAtsarvamaMgalanisvanaiH ॥ gItanRtyAdibhizcaiva jayazabdasamanvitaH ॥ 56 ॥

हैमे च राजते ताम्रे पात्रे वा मृन्मये शुभे ॥ पद्मकैश्शोभितैः पुष्पैर्बीजैर्दध्यक्षतादिभिः ॥ ५७ ॥

haime ca rAjate tAmre pAtre vA mRnmaye zubhe ॥ padmakaizzobhitaiH puSpairbIjairdadhyakSatAdibhiH ॥ 57 ॥

त्रिशूलशंखयुग्माब्जनन्द्यावर्तैः करीषजैः ॥ श्रीवत्सस्वस्तिकादर्शवज्रैर्वह्न्यादिचिह्नितैः ॥ ५८ ॥

trizUlazaMkhayugmAbjanandyAvartaiH karISajaiH ॥ zrIvatsasvastikAdarzavajrairvahnyAdicihnitaiH ॥ 58 ॥

अष्टौ प्रदीपान्परितो विधायैकं तु मध्यमे ॥ तेषु वामादिकाश्चिन्त्याः पूज्याश्च नव शक्तयः ॥ ५९ ॥

aSTau pradIpAnparito vidhAyaikaM tu madhyame ॥ teSu vAmAdikAzcintyAH pUjyAzca nava zaktayaH ॥ 59 ॥

कवचेन समाच्छाद्य संरक्ष्यास्त्रेण सर्वतः ॥ धेनुमुद्रां च संदर्श्य पाणिभ्यां पात्रमुद्धरेत् ॥ ६० ॥

kavacena samAcchAdya saMrakSyAstreNa sarvataH ॥ dhenumudrAM ca saMdarzya pANibhyAM pAtramuddharet ॥ 60 ॥

अथवारोपयेत्पात्रे पञ्चदीपान्यथाक्रमम् ॥ विदिक्ष्वपि च मध्ये च दीपमेकमथापि वा ॥ ६१ ॥

athavAropayetpAtre paJcadIpAnyathAkramam ॥ vidikSvapi ca madhye ca dIpamekamathApi vA ॥ 61 ॥

ततस्तत्पात्रमुद्धृत्य लिंगादेरुपरि क्रमात् ॥ त्रिः प्रदक्षिणयोगेन भ्रामयेन्मूलविद्यया ॥ ६२ ॥

tatastatpAtramuddhRtya liMgAderupari kramAt ॥ triH pradakSiNayogena bhrAmayenmUlavidyayA ॥ 62 ॥

दद्यादर्घ्यं ततो मूर्ध्नि भसितं च सुगंधितम् ॥ कृत्वा पुष्पांजलिं पश्चादुपहारान्निवेदयेत् ॥ ६३ ॥

dadyAdarghyaM tato mUrdhni bhasitaM ca sugaMdhitam ॥ kRtvA puSpAMjaliM pazcAdupahArAnnivedayet ॥ 63 ॥

पानीयं च ततो दद्याद्दत्त्वा वाचमनं पुनः ॥ पञ्चसौगंधिकोपेतं ताम्बूलं च निवेदयेत् ॥ ६४ ॥

pAnIyaM ca tato dadyAddattvA vAcamanaM punaH ॥ paJcasaugaMdhikopetaM tAmbUlaM ca nivedayet ॥ 64 ॥

प्रोक्षयेत्प्रोक्षणीयानि गाननाट्यानि कारयेत् ॥ लिंगादौ शिवयोश्चिन्तां कृत्वा शक्त्यजपेच्छिवम् ॥ ६५ ॥

prokSayetprokSaNIyAni gAnanATyAni kArayet ॥ liMgAdau zivayozcintAM kRtvA zaktyajapecchivam ॥ 65 ॥

प्रदक्षिणं प्रणामं च स्तवं चात्मसमर्पणम् ॥ विज्ञापनं च कार्याणां कुर्याद्विनयपूर्वकम् ॥ ६६ ॥

pradakSiNaM praNAmaM ca stavaM cAtmasamarpaNam ॥ vijJApanaM ca kAryANAM kuryAdvinayapUrvakam ॥ 66 ॥

अर्घ्यं पुष्पांजलिं दत्त्वा बद्ध्वा मुद्रां यथाविधि ॥ पश्चात्क्षमापयेद्देवमुद्वास्यात्मनि चिंतयेत् ॥ ६७ ॥

arghyaM puSpAMjaliM dattvA baddhvA mudrAM yathAvidhi ॥ pazcAtkSamApayeddevamudvAsyAtmani ciMtayet ॥ 67 ॥

पाद्यादिमुखवासांतमर्घ्याद्यं चातिसंकटे ॥ पुष्पविक्षेपमात्रं वा कुर्याद्भावपुरस्सरम् ॥ ६८ ॥

pAdyAdimukhavAsAMtamarghyAdyaM cAtisaMkaTe ॥ puSpavikSepamAtraM vA kuryAdbhAvapurassaram ॥ 68 ॥

तावतैव परो धर्मो भावने सुकृतो भवेत् ॥ असंपूज्य न भुञ्जीत शिवमाप्राणसंचरात् ॥ ६९ ॥

tAvataiva paro dharmo bhAvane sukRto bhavet ॥ asaMpUjya na bhuJjIta zivamAprANasaMcarAt ॥ 69 ॥

यदि पापस्तु भुंजीत स्वैरं तय्स न निष्कृतिः ॥ प्रमादेन तु भुंक्ते चेत्तदुद्गीर्य प्रयत्नतः ॥ ७० ॥

yadi pApastu bhuMjIta svairaM taysa na niSkRtiH ॥ pramAdena tu bhuMkte cettadudgIrya prayatnataH ॥ 70 ॥

स्नात्वा द्विगुणमभ्यर्च्य देवं देवीमुपोष्य च ॥ शिवस्यायुतमभ्यस्येद्ब्रह्मचर्यपुरस्सरम् ॥ ७१ ॥

snAtvA dviguNamabhyarcya devaM devImupoSya ca ॥ zivasyAyutamabhyasyedbrahmacaryapurassaram ॥ 71 ॥

परेद्युश्शक्तितो दत्त्वा सुवर्णाद्यं शिवाय च ॥ शिवभक्ताय वा कृत्वा महापूजां शुचिर्भवेत् ॥ ७२ ॥

paredyuzzaktito dattvA suvarNAdyaM zivAya ca ॥ zivabhaktAya vA kRtvA mahApUjAM zucirbhavet ॥ 72 ॥