उपमन्युरुवाच ॥ पुण्ये ऽहनि शुचौ देशे बहुदोषविवर्जिते ॥ देशिकः प्रथमं कुर्यात्संस्कारं समयाह्वयम् ॥ १ ॥

upamanyuruvAca ॥ puNye 'hani zucau deze bahudoSavivarjite ॥ dezikaH prathamaM kuryAtsaMskAraM samayAhvayam ॥ 1 ॥

परीक्ष्य भूमिं विधिवद्गंधवर्णरसादिभिः ॥ शिल्पिशास्त्रोक्तमार्गेण मण्डपं तत्र कल्पयेत् ॥ २ ॥

parIkSya bhUmiM vidhivadgaMdhavarNarasAdibhiH ॥ zilpizAstroktamArgeNa maNDapaM tatra kalpayet ॥ 2 ॥

कृत्वा वेदिं च तन्मध्ये कुण्डानि परिकल्पयेत् ॥ अष्टदिक्षु तथा दिक्षु तत्रैशान्यां पुनः क्रमात् ॥ ३ ॥

kRtvA vediM ca tanmadhye kuNDAni parikalpayet ॥ aSTadikSu tathA dikSu tatraizAnyAM punaH kramAt ॥ 3 ॥

प्रधानकुंडं कुर्वीत यद्वा पश्चिमभागतः ॥ प्रधानमेकमेवाथ कृत्वा शोभां प्रकल्पयेत् ॥ ४ ॥

pradhAnakuMDaM kurvIta yadvA pazcimabhAgataH ॥ pradhAnamekamevAtha kRtvA zobhAM prakalpayet ॥ 4 ॥

वितानध्वजमालाभिर्विविधाभिरनेकशः ॥ वेदिमध्ये ततः कुर्यान्मंडलं शुभलक्षणम् ॥ ५ ॥

vitAnadhvajamAlAbhirvividhAbhiranekazaH ॥ vedimadhye tataH kuryAnmaMDalaM zubhalakSaNam ॥ 5 ॥

रक्तहेमादिभिश्चूर्णैरीश्वरावाहनोचितम् ॥ सिंदूरशालिनीवारचूर्णैरेवाथ निर्धनः ॥ ६ ॥

raktahemAdibhizcUrNairIzvarAvAhanocitam ॥ siMdUrazAlinIvAracUrNairevAtha nirdhanaH ॥ 6 ॥

एकहस्तं द्विहस्तं वा सितं वा रक्तमेव वा ॥ एकहस्तस्य पद्मस्य कर्णिकाष्टांगुला मता ॥ ७ ॥

ekahastaM dvihastaM vA sitaM vA raktameva vA ॥ ekahastasya padmasya karNikASTAMgulA matA ॥ 7 ॥

केसराणि तदर्धानि शेषं चाष्टदलादिकम् ॥ द्विहस्तस्य तु पद्मस्य द्विगुणं कर्णिकादिकम् ॥ ८ ॥

kesarANi tadardhAni zeSaM cASTadalAdikam ॥ dvihastasya tu padmasya dviguNaM karNikAdikam ॥ 8 ॥

कृत्वा शोभोपशोभाढ्यमैशान्यां तस्य कल्पयेत् ॥ एकहस्तं तदर्धं वा पुनर्वेद्यः तु मंडलम् ॥ ९ ॥

kRtvA zobhopazobhADhyamaizAnyAM tasya kalpayet ॥ ekahastaM tadardhaM vA punarvedyaH tu maMDalam ॥ 9 ॥

व्रीहितंदुलसिद्धार्थतिलपुष्पकुशास्तृते ॥ तत्र लक्षणसंयुक्तं शिवकुंभं प्रसाधयेत् ॥ १० ॥

vrIhitaMdulasiddhArthatilapuSpakuzAstRte ॥ tatra lakSaNasaMyuktaM zivakuMbhaM prasAdhayet ॥ 10 ॥

सौवर्णं राजतं वापि ताम्रजं मृन्मयं तु वा ॥ गन्धपुष्पाक्षताकीर्णं कुशदूर्वांकुराचितम् ॥ ११ ॥

sauvarNaM rAjataM vApi tAmrajaM mRnmayaM tu vA ॥ gandhapuSpAkSatAkIrNaM kuzadUrvAMkurAcitam ॥ 11 ॥

सितसूत्रावृतं कंठे नववस्त्रयुगावृतम् ॥ शुद्धाम्बुपूर्णमुत्कूर्चं सद्रव्यं सपिधानकम् ॥ १२ ॥

sitasUtrAvRtaM kaMThe navavastrayugAvRtam ॥ zuddhAmbupUrNamutkUrcaM sadravyaM sapidhAnakam ॥ 12 ॥

भृङ्गारं वर्धनीं चापि शंखं च चक्रमेव वा ॥ विना सूत्रादिकं सर्वं पद्मपत्रमथापि वा ॥ १३ ॥

bhRGgAraM vardhanIM cApi zaMkhaM ca cakrameva vA ॥ vinA sUtrAdikaM sarvaM padmapatramathApi vA ॥ 13 ॥

तस्यासनारविंदस्य कल्पयेदुत्तरे दले ॥ अग्रतश्चंदनांभोभिरस्त्रराजस्य वर्धनीम् ॥ १४ ॥

tasyAsanAraviMdasya kalpayeduttare dale ॥ agratazcaMdanAMbhobhirastrarAjasya vardhanIm ॥ 14 ॥

मण्डलस्य ततः प्राच्यां मंत्रकुंभे च पूर्ववत् ॥ कृत्वा विधिवदीशस्य महापूजां समाचरेत् ॥ १५ ॥

maNDalasya tataH prAcyAM maMtrakuMbhe ca pUrvavat ॥ kRtvA vidhivadIzasya mahApUjAM samAcaret ॥ 15 ॥

अथार्णवस्य तीरे वा नद्यां गोष्ठे ऽपि वा गिरौ ॥ देवागरे गृहे वापि देशे ऽन्यस्मिन्मनोहरे ॥ १६ ॥

athArNavasya tIre vA nadyAM goSThe 'pi vA girau ॥ devAgare gRhe vApi deze 'nyasminmanohare ॥ 16 ॥

कृत्वा पूर्वोदितं सर्वं विना वा मंडपादिकम् ॥ मंडलं पूर्ववत्कृत्वा स्थंडिलं च विभावसोः ॥ १७ ॥

kRtvA pUrvoditaM sarvaM vinA vA maMDapAdikam ॥ maMDalaM pUrvavatkRtvA sthaMDilaM ca vibhAvasoH ॥ 17 ॥

प्रविश्य पूजाभवनं प्रहृष्टवदनो गुरुः ॥ सर्वमंगलसंयुक्तः समाचरितनैत्यकः ॥ १८ ॥

pravizya pUjAbhavanaM prahRSTavadano guruH ॥ sarvamaMgalasaMyuktaH samAcaritanaityakaH ॥ 18 ॥

महापूजां महेशस्य कृत्वा मण्डलमध्यतः ॥ शिवकुंभे तथा भूयः शिवमावाह्य पूजयेत् ॥ १९ ॥

mahApUjAM mahezasya kRtvA maNDalamadhyataH ॥ zivakuMbhe tathA bhUyaH zivamAvAhya pUjayet ॥ 19 ॥

पश्चिमाभिमुखं ध्यात्वा यज्ञरक्षकमीश्वरम् ॥ अर्चयेदस्त्रवर्धन्यामस्त्रमीशस्य दक्षिणे ॥ २० ॥

pazcimAbhimukhaM dhyAtvA yajJarakSakamIzvaram ॥ arcayedastravardhanyAmastramIzasya dakSiNe ॥ 20 ॥

मन्त्रकुम्भे च विन्यस्य मन्त्रं मन्त्रविशारदः ॥ कृत्वा मुद्रादिकं सर्वं मन्त्रयागं समाचरेत् ॥ २१ ॥

mantrakumbhe ca vinyasya mantraM mantravizAradaH ॥ kRtvA mudrAdikaM sarvaM mantrayAgaM samAcaret ॥ 21 ॥

ततश्शिवानले होमं कुर्याद्देशिकसत्तमः ॥ प्रधानकुण्डे परितो जुहुयुश्चापरे द्विजाः ॥ २२ ॥

tatazzivAnale homaM kuryAddezikasattamaH ॥ pradhAnakuNDe parito juhuyuzcApare dvijAH ॥ 22 ॥

आचार्यात्पादमर्धं वा होमस्तेषां विधीयते ॥ प्रधानकुण्ड एवाथ जुहुयाद्देशिकोत्तमः ॥ २३ ॥

AcAryAtpAdamardhaM vA homasteSAM vidhIyate ॥ pradhAnakuNDa evAtha juhuyAddezikottamaH ॥ 23 ॥

स्वाध्यायमपरे कुर्युः स्तोत्रं मंगलवाचनम् ॥ जपं च विधिवच्चान्ये शिवभक्तिपरायणाः ॥ २४ ॥

svAdhyAyamapare kuryuH stotraM maMgalavAcanam ॥ japaM ca vidhivaccAnye zivabhaktiparAyaNAH ॥ 24 ॥

नृत्यं गीतं च वाद्यं च मंगलान्यपराणि च ॥ पूजनं च सदस्यानां कृत्वा सम्यग्विधानतः ॥ २५ ॥

nRtyaM gItaM ca vAdyaM ca maMgalAnyaparANi ca ॥ pUjanaM ca sadasyAnAM kRtvA samyagvidhAnataH ॥ 25 ॥

पुण्याहं कारयित्वाथ पुनः संपूज्य शंकरम् ॥ प्रार्थयेद्देशिको देवं शिष्यानुग्रहकाम्यया ॥ २६ ॥

puNyAhaM kArayitvAtha punaH saMpUjya zaMkaram ॥ prArthayeddeziko devaM ziSyAnugrahakAmyayA ॥ 26 ॥

प्रसीद देवदेवेश देहमाविश्य मामकम् ॥ विमोचयैनं विश्वेश घृणया च घृणानिधे ॥ २७ ॥

prasIda devadeveza dehamAvizya mAmakam ॥ vimocayainaM vizveza ghRNayA ca ghRNAnidhe ॥ 27 ॥

अथ चैवं करोमीति लब्धानुज्ञस्तु देशिकः ॥ आनीयोपोषितं शिष्यं हविष्याशिनमेव वा ॥ २८ ॥

atha caivaM karomIti labdhAnujJastu dezikaH ॥ AnIyopoSitaM ziSyaM haviSyAzinameva vA ॥ 28 ॥

एकाशनं वा विरतं स्नातं प्रातःकृतक्रियम् ॥ जपंतं प्रणवं देवं ध्यायंतं कृतमंगलम् ॥ २९ ॥

ekAzanaM vA virataM snAtaM prAtaHkRtakriyam ॥ japaMtaM praNavaM devaM dhyAyaMtaM kRtamaMgalam ॥ 29 ॥

द्वारस्य पश्चिमस्याग्रमण्डले दक्षिणस्य वा ॥ दर्भासने समासीनं विधायोदङ्मुखं शिशुम् ॥ ३० ॥

dvArasya pazcimasyAgramaNDale dakSiNasya vA ॥ darbhAsane samAsInaM vidhAyodaGmukhaM zizum ॥ 30 ॥

स्वयं प्राग्वदनस्तिष्ठन्नूर्ध्वकायं कृतांजलिम् ॥ संप्रोक्ष्य प्रोक्षणौतोयैर्मूर्धन्यस्त्रेण मुद्रया ॥ ३१ ॥

svayaM prAgvadanastiSThannUrdhvakAyaM kRtAMjalim ॥ saMprokSya prokSaNautoyairmUrdhanyastreNa mudrayA ॥ 31 ॥

पुष्पक्षेपेण संताड्य बध्नीयाल्लोचनं गुरुः ॥ दुकूलार्धेन वस्त्रेण मंत्रितेन नवेन च ॥ ३२ ॥

puSpakSepeNa saMtADya badhnIyAllocanaM guruH ॥ dukUlArdhena vastreNa maMtritena navena ca ॥ 32 ॥

ततः प्रवेशयेच्छिष्यं गुरुर्द्वारेण मंडलम् ॥ सो ऽपि तेनेरितः शंभोराचरेत्त्रिः प्रदक्षिणम् ॥ ३३ ॥

tataH pravezayecchiSyaM gururdvAreNa maMDalam ॥ so 'pi teneritaH zaMbhorAcarettriH pradakSiNam ॥ 33 ॥

ततस्सुवर्णसंमिश्रं दत्त्वा पुष्पांजलिं प्रभोः ॥ प्राङ्मुखश्चोदङ्मुखो वा प्रणमेद्दंडवत्क्षितो ॥ ३४ ॥

tatassuvarNasaMmizraM dattvA puSpAMjaliM prabhoH ॥ prAGmukhazcodaGmukho vA praNameddaMDavatkSito ॥ 34 ॥

ततस्संप्रोक्ष्य मूलेन शिरस्यस्त्रेण पूर्ववत् ॥ संताड्य देशिकस्तस्य मोचयेन्नेत्रबंधनम् ॥ ३५ ॥

tatassaMprokSya mUlena zirasyastreNa pUrvavat ॥ saMtADya dezikastasya mocayennetrabaMdhanam ॥ 35 ॥

स दृष्ट्वा मंडलं भूयः प्रणमेत्साञ्जलिः प्रभुम् ॥ अथासीनं शिवाचार्यो मंडलस्य तु दक्षिणे ॥ ३६ ॥

sa dRSTvA maMDalaM bhUyaH praNametsAJjaliH prabhum ॥ athAsInaM zivAcAryo maMDalasya tu dakSiNe ॥ 36 ॥

उपवेश्यात्मनस्सव्ये शिष्यं दर्भासने गुरुः ॥ आराध्य च महादेवं शिवहस्तं प्रविन्यसेत् ॥ ३७ ॥

upavezyAtmanassavye ziSyaM darbhAsane guruH ॥ ArAdhya ca mahAdevaM zivahastaM pravinyaset ॥ 37 ॥

शिवतेजोमयं पाणिं शिवमंत्रमुदीरयेत् ॥ शिवाभिमानसंपन्नो न्यसेच्छिष्यस्य मस्तके ॥ ३८ ॥

zivatejomayaM pANiM zivamaMtramudIrayet ॥ zivAbhimAnasaMpanno nyasecchiSyasya mastake ॥ 38 ॥

सर्वांगालंबनं चैव कुर्यात्तेनैव देशिकः ॥ शिष्यो ऽपि प्रणमेद्भूमौ देशिकाकृतमीश्वरम् ॥ ३९ ॥

sarvAMgAlaMbanaM caiva kuryAttenaiva dezikaH ॥ ziSyo 'pi praNamedbhUmau dezikAkRtamIzvaram ॥ 39 ॥

ततश्शिवानले देवं समभ्यर्च्य यथाविधि ॥ हुताहुतित्रयं शिष्यमुपवेश्य यथा पुरा ॥ ४० ॥

tatazzivAnale devaM samabhyarcya yathAvidhi ॥ hutAhutitrayaM ziSyamupavezya yathA purA ॥ 40 ॥

दर्भाग्रैः संस्पृशंस्तं च विद्ययात्मानमाविशेत् ॥ नमस्कृत्य महादेवं नाडीसंधानमाचरेत् ॥ ४१ ॥

darbhAgraiH saMspRzaMstaM ca vidyayAtmAnamAvizet ॥ namaskRtya mahAdevaM nADIsaMdhAnamAcaret ॥ 41 ॥

शिवशास्त्रोक्तमार्गेण कृत्वा प्राणस्य निर्गमम् ॥ शिष्यदेहप्रवेशं च स्मृत्वा मंत्रांस्तु तर्पयेत् ॥ ४२ ॥

zivazAstroktamArgeNa kRtvA prANasya nirgamam ॥ ziSyadehapravezaM ca smRtvA maMtrAMstu tarpayet ॥ 42 ॥

संतर्पणाय मूलस्य तेनैवाहुतयो दश ॥ देयास्तिस्रस्तथांगानामंगैरेव यथाक्रमम् ॥ ४३ ॥

saMtarpaNAya mUlasya tenaivAhutayo daza ॥ deyAstisrastathAMgAnAmaMgaireva yathAkramam ॥ 43 ॥

ततः पूर्णाहुतिं दत्त्वा प्रायश्चित्ताय देशिकः ॥ पुनर्दशाहुतीन्कुर्यान्मूलमंत्रेण मंत्रवित् ॥ ४४ ॥

tataH pUrNAhutiM dattvA prAyazcittAya dezikaH ॥ punardazAhutInkuryAnmUlamaMtreNa maMtravit ॥ 44 ॥

पुनः संपूज्य देवेशं सम्यगाचम्य देशिकः ॥ हुत्वा चैव यथान्यायं स्वजात्या वैश्यमुद्धरेत् ॥ ४५ ॥

punaH saMpUjya devezaM samyagAcamya dezikaH ॥ hutvA caiva yathAnyAyaM svajAtyA vaizyamuddharet ॥ 45 ॥

तस्यैवं जनयेत्क्षात्रमुद्धारं च ततः पुनः ॥ कृत्वा तथैव विप्रत्वं जनयेदस्य देशिकः ॥ ४६ ॥

tasyaivaM janayetkSAtramuddhAraM ca tataH punaH ॥ kRtvA tathaiva vipratvaM janayedasya dezikaH ॥ 46 ॥

राजन्यं चैवमुद्धृत्य कृत्वा विप्रं पुनस्तयोः ॥ रुद्रत्वं जनयेद्विप्रे रुद्रनामैव साधयेत् ॥ ४७ ॥

rAjanyaM caivamuddhRtya kRtvA vipraM punastayoH ॥ rudratvaM janayedvipre rudranAmaiva sAdhayet ॥ 47 ॥

प्रोक्षणं ताडनं कृत्वा शिशोस्स्वात्मानमात्मनि ॥ शिवात्मकमनुस्मृत्य स्फुरंतं विस्फुलिंगवत् ॥ ४८ ॥

prokSaNaM tADanaM kRtvA zizossvAtmAnamAtmani ॥ zivAtmakamanusmRtya sphuraMtaM visphuliMgavat ॥ 48 ॥

नाड्या यथोक्तया वायुं रेचयेन्मंत्रतो गुरुः ॥ निर्गम्य प्रविशेन्नाड्या शिष्यस्य हृदयं तथा ॥ ४९ ॥

nADyA yathoktayA vAyuM recayenmaMtrato guruH ॥ nirgamya pravizennADyA ziSyasya hRdayaM tathA ॥ 49 ॥

प्रविश्य तस्य चैतन्यं नीलबिन्दुनिभं स्मरन् ॥ स्वतेजसापास्तमलं ज्वलंतमनुचिंतयेत् ॥ ५० ॥

pravizya tasya caitanyaM nIlabindunibhaM smaran ॥ svatejasApAstamalaM jvalaMtamanuciMtayet ॥ 50 ॥

तमादाय तया नाड्या मंत्री संहारमुद्रया ॥ न पूरकेण निवेश्यैनमेकीभावार्थमात्मनः ॥ ५१ ॥

tamAdAya tayA nADyA maMtrI saMhAramudrayA ॥ na pUrakeNa nivezyainamekIbhAvArthamAtmanaH ॥ 51 ॥

कुंभकेन तथा नाड्या रेचकेन यथा पुरा ॥ तस्मादादाय शिष्यस्य हृदये तन्निवेशयेत् ॥ ५२ ॥

kuMbhakena tathA nADyA recakena yathA purA ॥ tasmAdAdAya ziSyasya hRdaye tannivezayet ॥ 52 ॥

तमालभ्य शिवाल्लब्धं तस्मै दत्त्वोपवीतकम् ॥ हुत्वा"हुतित्रयं पश्चाद्दद्यात्पूर्णाहुतिं ततः ॥ ५३ ॥

tamAlabhya zivAllabdhaM tasmai dattvopavItakam ॥ hutvA"hutitrayaM pazcAddadyAtpUrNAhutiM tataH ॥ 53 ॥

देवस्य दक्षिणे शिष्यमुपवेश्यवरासने ॥ कुशपुष्पपरिस्तीर्णे बद्धांजलिरुदङ्मुखम् ॥ ५४ ॥

devasya dakSiNe ziSyamupavezyavarAsane ॥ kuzapuSpaparistIrNe baddhAMjalirudaGmukham ॥ 54 ॥

स्वस्तिकासनमारूढं विधाय प्राङ्मुखः स्वयम् ॥ वरासनस्थितो मंत्रैर्महामंगलनिःस्वनैः ॥ ५५ ॥

svastikAsanamArUDhaM vidhAya prAGmukhaH svayam ॥ varAsanasthito maMtrairmahAmaMgalaniHsvanaiH ॥ 55 ॥

समादाय घटं पूर्णं पूर्णमेव प्रसादितम् ॥ ध्यायमानः शिवं शिष्यमाभिषिंचेत देशिकः ॥ ५६ ॥

samAdAya ghaTaM pUrNaM pUrNameva prasAditam ॥ dhyAyamAnaH zivaM ziSyamAbhiSiMceta dezikaH ॥ 56 ॥

अथापनुद्य स्नानांबु परिधाय सितांबरम् ॥ आचान्तोलंकृतश्शिष्यः प्रांजलिर्मंडपं व्रजेत् ॥ ५७ ॥

athApanudya snAnAMbu paridhAya sitAMbaram ॥ AcAntolaMkRtazziSyaH prAMjalirmaMDapaM vrajet ॥ 57 ॥

उपवेश्य यथापूर्वं तं गुरुर्दर्भविष्टरे ॥ संपूज्य मंडलं देवं करन्यासं समाचरेत् ॥ ५८ ॥

upavezya yathApUrvaM taM gururdarbhaviSTare ॥ saMpUjya maMDalaM devaM karanyAsaM samAcaret ॥ 58 ॥

ततस्तु भस्मना देवं ध्यायन्मनसि देशिकः ॥ समालभेत पाणिभ्यां शिशुं शिवमुदीरयेत् ॥ ५९ ॥

tatastu bhasmanA devaM dhyAyanmanasi dezikaH ॥ samAlabheta pANibhyAM zizuM zivamudIrayet ॥ 59 ॥

अथ तस्य शिवाचार्यो दहनप्लावनादिकम् ॥ सकलीकरणं कृत्वा मातृकान्यासवर्त्मना ॥ ६० ॥

atha tasya zivAcAryo dahanaplAvanAdikam ॥ sakalIkaraNaM kRtvA mAtRkAnyAsavartmanA ॥ 60 ॥

ततः शिवासनं ध्यात्वा शिष्यमूर्ध्नि देशिकः ॥ तत्रावाह्य यथान्यायमर्चयेन्मनसा शिवम् ॥ ६१ ॥

tataH zivAsanaM dhyAtvA ziSyamUrdhni dezikaH ॥ tatrAvAhya yathAnyAyamarcayenmanasA zivam ॥ 61 ॥

प्रार्थयेत्प्रांजलिर्देवं नित्यमत्र स्थितो भव ॥ इति विज्ञाप्य तं शंभोस्तेजसा भासुरं स्मरेत् ॥ ६२ ॥

prArthayetprAMjalirdevaM nityamatra sthito bhava ॥ iti vijJApya taM zaMbhostejasA bhAsuraM smaret ॥ 62 ॥

संपूज्याथ शिवं शैवीमाज्ञां प्राप्य शिवात्मिकाम् ॥ कर्णे शिष्यस्य शनकैश्शिवमन्त्रमुदीरयेत् ॥ ६३ ॥

saMpUjyAtha zivaM zaivImAjJAM prApya zivAtmikAm ॥ karNe ziSyasya zanakaizzivamantramudIrayet ॥ 63 ॥

स तु बद्धांजलिः श्रुत्वा मन्त्रं तद्गतमानसः ॥ शनैस्तं व्याहरेच्छिष्यशिवाचार्यस्य शासनात् ॥ ६४ ॥

sa tu baddhAMjaliH zrutvA mantraM tadgatamAnasaH ॥ zanaistaM vyAharecchiSyazivAcAryasya zAsanAt ॥ 64 ॥

ततः शाक्तं च संदिश्य मन्त्रं मन्त्रविचक्षणः ॥ उच्चारयित्वा च सुखं तस्मै मंगलमादिशेत् ॥ ६५ ॥

tataH zAktaM ca saMdizya mantraM mantravicakSaNaH ॥ uccArayitvA ca sukhaM tasmai maMgalamAdizet ॥ 65 ॥

ततस्समासान्मन्त्रार्थं वाच्यवाचकयोगतः ॥ समदिश्येश्वरं रूपं योगमासनमादिशेत् ॥ ६६ ॥

tatassamAsAnmantrArthaM vAcyavAcakayogataH ॥ samadizyezvaraM rUpaM yogamAsanamAdizet ॥ 66 ॥

अथ गुर्वाज्ञया शिष्यः शिवाग्निगुरुसन्निधौ ॥ भक्त्यैवमभिसंधाय दीक्षावाक्यमुदीरयेत् ॥ ६७ ॥

atha gurvAjJayA ziSyaH zivAgnigurusannidhau ॥ bhaktyaivamabhisaMdhAya dIkSAvAkyamudIrayet ॥ 67 ॥

वरं प्राणपरित्यागश्छेदनं शिरसो ऽपि वा ॥ न त्वनभ्यर्च्य भुंजीय भगवन्तं त्रिलोचनम् ॥ ६८ ॥

varaM prANaparityAgazchedanaM ziraso 'pi vA ॥ na tvanabhyarcya bhuMjIya bhagavantaM trilocanam ॥ 68 ॥

स एव दद्यान्नियतो यावन्मोहविपर्ययः ॥ तावदाराधयेद्देवं तन्निष्ठस्तत्परायणः ॥ ६९ ॥

sa eva dadyAnniyato yAvanmohaviparyayaH ॥ tAvadArAdhayeddevaM tanniSThastatparAyaNaH ॥ 69 ॥

ततः स समयो नाम भविष्यति शिवाश्रमे ॥ लब्धाधिकारो गुर्वाज्ञापालकस्तद्वशो भवेत् ॥ ७० ॥

tataH sa samayo nAma bhaviSyati zivAzrame ॥ labdhAdhikAro gurvAjJApAlakastadvazo bhavet ॥ 70 ॥

अतः परं न्यस्तकरो भस्मादाय स्वहस्ततः ॥ दद्याच्छिष्याय मूलेन रुद्राक्षं चाभिमंत्रितम् ॥ ७१ ॥

ataH paraM nyastakaro bhasmAdAya svahastataH ॥ dadyAcchiSyAya mUlena rudrAkSaM cAbhimaMtritam ॥ 71 ॥

प्रतिमा वापि देवस्य गूढदेहमथापि वा ॥ पूजाहोमजपध्यानसाधनानि च संभवे ॥ ७२ ॥

pratimA vApi devasya gUDhadehamathApi vA ॥ pUjAhomajapadhyAnasAdhanAni ca saMbhave ॥ 72 ॥

सोपि शिष्यः शिवाचार्याल्लब्धानि बहुमानतः ॥ आददीताज्ञया तस्य देशिकस्य न चान्यथा ॥ ७३ ॥

sopi ziSyaH zivAcAryAllabdhAni bahumAnataH ॥ AdadItAjJayA tasya dezikasya na cAnyathA ॥ 73 ॥

आचार्यादाप्तमखिलं शिरस्याधाय भक्तितः ॥ रक्षयेत्पूजयेच्छंभुं मठे वा गृह एववा ॥ ७४ ॥

AcAryAdAptamakhilaM zirasyAdhAya bhaktitaH ॥ rakSayetpUjayecchaMbhuM maThe vA gRha evavA ॥ 74 ॥

अतः परं शिवाचारमादिशेदस्य देशिकः ॥ भक्तिश्रद्धानुसारेण प्रज्ञायाश्चानुसारतः ॥ ७५ ॥

ataH paraM zivAcAramAdizedasya dezikaH ॥ bhaktizraddhAnusAreNa prajJAyAzcAnusArataH ॥ 75 ॥

यदुक्तं यत्समाज्ञातं यच्चैवान्यत्प्रकीर्तितम् ॥ शिवाचार्येण समये तत्सर्वं शिरसा वहेत् ॥ ७६ ॥

yaduktaM yatsamAjJAtaM yaccaivAnyatprakIrtitam ॥ zivAcAryeNa samaye tatsarvaM zirasA vahet ॥ 76 ॥

शिवागमस्य ग्रहणं वाचनं श्रवणं तथा ॥ देशिकदेशतः कुर्यान्न स्वेच्छातो न चान्यतः ॥ ७७ ॥

zivAgamasya grahaNaM vAcanaM zravaNaM tathA ॥ dezikadezataH kuryAnna svecchAto na cAnyataH ॥ 77 ॥

इति संक्षेपतः प्रोक्तः संस्कारः समयाह्वयः ॥ साक्षाच्छिवपुरप्राप्तौ नृणां परमसाधनम् ॥ ७८ ॥

iti saMkSepataH proktaH saMskAraH samayAhvayaH ॥ sAkSAcchivapuraprAptau nRNAM paramasAdhanam ॥ 78 ॥