ईश्वर उवाच ॥ आज्ञाहीनं क्रियाहीनं श्रद्धाहीनं वरानने ॥ आज्ञार्थं दक्षिणाहीनं सदा जप्तं च निष्फलम् ॥ १ ॥

Izvara uvAca ॥ AjJAhInaM kriyAhInaM zraddhAhInaM varAnane ॥ AjJArthaM dakSiNAhInaM sadA japtaM ca niSphalam ॥ 1 ॥

आज्ञासिद्धं क्रियासिद्धं श्रद्धासिद्धं ममात्मकम् ॥ एवं चेद्दक्षिणायुक्तं मंत्रसिद्धिर्महत्फलम् ॥ २ ॥

AjJAsiddhaM kriyAsiddhaM zraddhAsiddhaM mamAtmakam ॥ evaM ceddakSiNAyuktaM maMtrasiddhirmahatphalam ॥ 2 ॥

उपगम्य गुरुं विप्रमाचार्यं तत्त्ववेदिनम् ॥ जापितं सद्गुणोपेतं ध्यानयोगपरायणम् ॥ ३ ॥

upagamya guruM vipramAcAryaM tattvavedinam ॥ jApitaM sadguNopetaM dhyAnayogaparAyaNam ॥ 3 ॥

तोषयेत्तं प्रयत्नेन भावशुद्धिसमन्वितः ॥ वाचा च मनसा चैव कायेन द्रविणेन च ॥ ४ ॥

toSayettaM prayatnena bhAvazuddhisamanvitaH ॥ vAcA ca manasA caiva kAyena draviNena ca ॥ 4 ॥

आचार्यं पूजयेद्विप्रः सर्वदातिप्रयत्नतः ॥ हस्त्यश्वरथरत्नानि क्षेत्राणि च गृहाणि च ॥ ५ ॥

AcAryaM pUjayedvipraH sarvadAtiprayatnataH ॥ hastyazvaratharatnAni kSetrANi ca gRhANi ca ॥ 5 ॥

भूषणानि च वासांसि धान्यानि च धनानि च ॥ एतानि गुरवे दद्याद्भक्त्या च विभवे सति ॥ ६ ॥

bhUSaNAni ca vAsAMsi dhAnyAni ca dhanAni ca ॥ etAni gurave dadyAdbhaktyA ca vibhave sati ॥ 6 ॥

वित्तशाठ्यं न कुर्वीत यदीच्छेत्सिद्धिमात्मनः ॥ पश्चान्निवेद्य स्वात्मानं गुरवे सपरिच्छदम् ॥ ७ ॥

vittazAThyaM na kurvIta yadIcchetsiddhimAtmanaH ॥ pazcAnnivedya svAtmAnaM gurave saparicchadam ॥ 7 ॥

एवं संपूज्य विधिवद्यथाशक्तित्ववंचयन् ॥ आददीत गुरोर्मंत्रं ज्ञानं चैव क्रमेण तु ॥ ८ ॥

evaM saMpUjya vidhivadyathAzaktitvavaMcayan ॥ AdadIta gurormaMtraM jJAnaM caiva krameNa tu ॥ 8 ॥

एवं तुष्टो गुरुः शिष्यं पूजकं वत्सरोषितम् ॥ शुश्रूषुमनहंकारं स्नातं शुचिमुपोषितम् ॥ ९ ॥

evaM tuSTo guruH ziSyaM pUjakaM vatsaroSitam ॥ zuzrUSumanahaMkAraM snAtaM zucimupoSitam ॥ 9 ॥

स्नापयित्वा विशुद्ध्यर्थं पूर्णकुंभघृतेन वै ॥ जलेन मन्त्रशुद्धेन पुण्यद्रव्ययुतेन च ॥ १० ॥

snApayitvA vizuddhyarthaM pUrNakuMbhaghRtena vai ॥ jalena mantrazuddhena puNyadravyayutena ca ॥ 10 ॥

अलंकृत्य सुवेषं च गंधस्रग्वस्त्रभूषणैः ॥ पुण्याहं वाचयित्वा च ब्राह्मणानभिपूज्य च ॥ ११ ॥

alaMkRtya suveSaM ca gaMdhasragvastrabhUSaNaiH ॥ puNyAhaM vAcayitvA ca brAhmaNAnabhipUjya ca ॥ 11 ॥

समुद्रतीरे नद्यां च गोष्ठे देवालये ऽपि वा ॥ शुचौ देशे गृहे वापि काले सिद्धिकरे तिथौ ॥ १२ ॥

samudratIre nadyAM ca goSThe devAlaye 'pi vA ॥ zucau deze gRhe vApi kAle siddhikare tithau ॥ 12 ॥

नक्षत्रे शुभयोगे च सर्वदोषविवर्जिते ॥ अनुगृह्य ततो दद्याज्ज्ञानं मम यथाविधि ॥ १३ ॥

nakSatre zubhayoge ca sarvadoSavivarjite ॥ anugRhya tato dadyAjjJAnaM mama yathAvidhi ॥ 13 ॥

स्वरेणोच्चारयेत्सम्यगेकांते ऽतिप्रसन्नधीः ॥ उच्चार्योच्चारयित्वा तमावयोर्मंत्रमुत्तमम् ॥ १४ ॥

svareNoccArayetsamyagekAMte 'tiprasannadhIH ॥ uccAryoccArayitvA tamAvayormaMtramuttamam ॥ 14 ॥

शिवं चास्तु शुभं चास्तु शोभनो ऽस्तु प्रियो ऽस्त्विति ॥ एवं दद्याद्गुरुर्मंत्रमाज्ञां चैव ततः परम् ॥ १५ ॥

zivaM cAstu zubhaM cAstu zobhano 'stu priyo 'stviti ॥ evaM dadyAdgururmaMtramAjJAM caiva tataH param ॥ 15 ॥

एवं लब्ध्वा गुरोर्मंत्रमाज्ञां चैव समाहितः ॥ संकल्प्य च जपेन्नित्यं पुरश्चरणपूर्वकम् ॥ १६ ॥

evaM labdhvA gurormaMtramAjJAM caiva samAhitaH ॥ saMkalpya ca japennityaM purazcaraNapUrvakam ॥ 16 ॥

यावज्जीवं जपेन्नित्यमष्टोत्तरसहस्रकम् ॥ अनन्यस्तत्परो भूत्वा स याति परमां गतिम् ॥ १७ ॥

yAvajjIvaM japennityamaSTottarasahasrakam ॥ ananyastatparo bhUtvA sa yAti paramAM gatim ॥ 17 ॥

जपेदक्षरलक्षं वै चतुर्गुणितमादरात् ॥ नक्ताशी संयमी यस्स पौरश्चरणिकः स्मृतः ॥ १८ ॥

japedakSaralakSaM vai caturguNitamAdarAt ॥ naktAzI saMyamI yassa paurazcaraNikaH smRtaH ॥ 18 ॥

यः पुरश्चरणं कृत्वा नित्यजापी भवेत्पुनः ॥ तस्य नास्ति समो लोके स सिद्धः सिद्धदो भवेत् ॥ १९ ॥

yaH purazcaraNaM kRtvA nityajApI bhavetpunaH ॥ tasya nAsti samo loke sa siddhaH siddhado bhavet ॥ 19 ॥

स्नानं कृत्वा शुचौ देशे बद्ध्वा रुचिरमानसम् ॥ त्वया मां हृदि संचिंत्य संचिंत्य स्वगुरुं ततः ॥ २० ॥

snAnaM kRtvA zucau deze baddhvA ruciramAnasam ॥ tvayA mAM hRdi saMciMtya saMciMtya svaguruM tataH ॥ 20 ॥

उदङ्मुखः प्राङ्मुखो वा मौनी चैकाग्रमानसः ॥ विशोध्य पञ्चतत्त्वानि दहनप्लावनादिभिः ॥ २१ ॥

udaGmukhaH prAGmukho vA maunI caikAgramAnasaH ॥ vizodhya paJcatattvAni dahanaplAvanAdibhiH ॥ 21 ॥

मन्त्रन्यासादिकं कृत्वा सफलीकृतविग्रहः ॥ आवयोर्विग्रहौ ध्यायन्प्राणापानौ नियम्य च ॥ २२ ॥

mantranyAsAdikaM kRtvA saphalIkRtavigrahaH ॥ Avayorvigrahau dhyAyanprANApAnau niyamya ca ॥ 22 ॥

विद्यास्थानं स्वकं रूपमृषिञ्छन्दो ऽधिदैवतम् ॥ बीजं शक्तिं तथा वाक्यं स्मृत्वा पञ्चाक्षरीं जपेत् ॥ २३ ॥

vidyAsthAnaM svakaM rUpamRSiJchando 'dhidaivatam ॥ bIjaM zaktiM tathA vAkyaM smRtvA paJcAkSarIM japet ॥ 23 ॥

उत्तमं मानसं जाप्यमुपांशुं चैवमध्यमम् ॥ अधमं वाचिकं प्राहुरागमार्थविशारदाः ॥ २४ ॥

uttamaM mAnasaM jApyamupAMzuM caivamadhyamam ॥ adhamaM vAcikaM prAhurAgamArthavizAradAH ॥ 24 ॥

उत्तमं रुद्रदैवत्यं मध्यमं विष्णुदैवतम् ॥ अधमं ब्रह्मदैवत्यमित्याहुरनुपूर्वशः ॥ २५ ॥

uttamaM rudradaivatyaM madhyamaM viSNudaivatam ॥ adhamaM brahmadaivatyamityAhuranupUrvazaH ॥ 25 ॥

यदुच्चनीचस्वरितैःस्पष्टास्पष्टपदाक्षरैः ॥ मंत्रमुच्चारयेद्वाचा वाचिको ऽयं जपस्स्मृतः ॥ २६ ॥

yaduccanIcasvaritaiHspaSTAspaSTapadAkSaraiH ॥ maMtramuccArayedvAcA vAciko 'yaM japassmRtaH ॥ 26 ॥

जिह्वामात्रपरिस्पंदादीषदुच्चारितो ऽपि वा ॥ अपरैरश्रुतः किंचिच्छ्रुतो वोपांशुरुच्यते ॥ २७ ॥

jihvAmAtraparispaMdAdISaduccArito 'pi vA ॥ aparairazrutaH kiMcicchruto vopAMzurucyate ॥ 27 ॥

धिया यदक्षरश्रेण्या वर्णाद्वर्णं पदात्पदम् ॥ शब्दार्थचिंतनं भूयः कथ्यते मानसो जपः ॥ २८ ॥

dhiyA yadakSarazreNyA varNAdvarNaM padAtpadam ॥ zabdArthaciMtanaM bhUyaH kathyate mAnaso japaH ॥ 28 ॥

वाचिकस्त्वेक एव स्यादुपांशुः शतमुच्यते ॥ साहस्रं मानसः प्रोक्तः सगर्भस्तु शताधिकः ॥ २९ ॥

vAcikastveka eva syAdupAMzuH zatamucyate ॥ sAhasraM mAnasaH proktaH sagarbhastu zatAdhikaH ॥ 29 ॥

प्राणायामसमायुक्तस्सगर्भो जप उच्यते ॥ आद्यंतयोरगर्भो ऽपि प्राणायामः प्रशस्यते ॥ ३० ॥

prANAyAmasamAyuktassagarbho japa ucyate ॥ AdyaMtayoragarbho 'pi prANAyAmaH prazasyate ॥ 30 ॥

चत्वारिंशत्समावृत्तीः प्राणानायम्य संस्मरेत् ॥ मंत्रं मंत्रार्थविद्धीमानशक्तः शक्तितो जपेत् ॥ ३१ ॥

catvAriMzatsamAvRttIH prANAnAyamya saMsmaret ॥ maMtraM maMtrArthaviddhImAnazaktaH zaktito japet ॥ 31 ॥

पञ्चकं त्रिकमेकं वा प्राणायामं समाचरेत् ॥ अगर्भं वा सगर्भं वा सगर्भस्तत्र शस्यते ॥ ३२ ॥

paJcakaM trikamekaM vA prANAyAmaM samAcaret ॥ agarbhaM vA sagarbhaM vA sagarbhastatra zasyate ॥ 32 ॥

सगर्भादपि साहस्रं सध्यानो जप उच्यते ॥ एषु पञ्चविधेष्वेकः कर्तव्यः शक्तितो जपः ॥ ३३ ॥

sagarbhAdapi sAhasraM sadhyAno japa ucyate ॥ eSu paJcavidheSvekaH kartavyaH zaktito japaH ॥ 33 ॥

अङ्गुल्या जपसंख्यानमेकमेवमुदाहृतम् ॥ रेखयाष्टगुणं विद्यात्पुत्रजीवैर्दशाधिकम् ॥ ३४ ॥

aGgulyA japasaMkhyAnamekamevamudAhRtam ॥ rekhayASTaguNaM vidyAtputrajIvairdazAdhikam ॥ 34 ॥

शतं स्याच्छंखमणिभिः प्रवालैस्तु सहस्रकम् ॥ स्फटिकैर्दशसाहस्रं मौक्तिकैर्लक्षमुच्यते ॥ ३५ ॥

zataM syAcchaMkhamaNibhiH pravAlaistu sahasrakam ॥ sphaTikairdazasAhasraM mauktikairlakSamucyate ॥ 35 ॥

पद्माक्षैर्दशलक्षन्तु सौवर्णैः कोटिरुच्यते ॥ कुशग्रंथ्या च रुद्राक्षैरनंतगुणितं भवेत् ॥ ३६ ॥

padmAkSairdazalakSantu sauvarNaiH koTirucyate ॥ kuzagraMthyA ca rudrAkSairanaMtaguNitaM bhavet ॥ 36 ॥

त्रिंशदक्षैः कृता माला धनदा जपकर्मणि ॥ सप्तविंशतिसंख्यातैरक्षैः पुष्टिप्रदा भवेत् ॥ ३७ ॥

triMzadakSaiH kRtA mAlA dhanadA japakarmaNi ॥ saptaviMzatisaMkhyAtairakSaiH puSTipradA bhavet ॥ 37 ॥

पञ्चविंशतिसंख्यातैः कृता मुक्तिं प्रयच्छति ॥ अक्षैस्तु पञ्चदशभिरभिचारफलप्रदा ॥ ३८ ॥

paJcaviMzatisaMkhyAtaiH kRtA muktiM prayacchati ॥ akSaistu paJcadazabhirabhicAraphalapradA ॥ 38 ॥

अंगुष्ठं मोक्षदं विद्यात्तर्जनीं शत्रुनाशिनीम् ॥ मध्यमां धनदां शांतिं करोत्येषा ह्यनामिका ॥ ३९ ॥

aMguSThaM mokSadaM vidyAttarjanIM zatrunAzinIm ॥ madhyamAM dhanadAM zAMtiM karotyeSA hyanAmikA ॥ 39 ॥

अष्टोत्तरशतं माला तत्र स्यादुत्तमोत्तमा ॥ शतसंख्योत्तमा माला पञ्चाशद्भिस्तु मध्यमा ॥ ४० ॥

aSTottarazataM mAlA tatra syAduttamottamA ॥ zatasaMkhyottamA mAlA paJcAzadbhistu madhyamA ॥ 40 ॥

चतुः पञ्चाशदक्षैस्तु हृच्छ्रेष्ठा हि प्रकीर्तिता ॥ इत्येवं मालया कुर्याज्जपं कस्मै न दर्शयेत् ॥ ४१ ॥

catuH paJcAzadakSaistu hRcchreSThA hi prakIrtitA ॥ ityevaM mAlayA kuryAjjapaM kasmai na darzayet ॥ 41 ॥

कनिष्ठा क्षरिणी प्रोक्ता जपकर्मणि शोभना ॥ अंगुष्ठेन जपेज्जप्यमन्यैरंगुलिभिस्सह ॥ ४२ ॥

kaniSThA kSariNI proktA japakarmaNi zobhanA ॥ aMguSThena japejjapyamanyairaMgulibhissaha ॥ 42 ॥

अंगुष्ठेन विना जप्यं कृतं तदफलं यतः ॥ गृहे जपं समं विद्याद्गोष्ठे शतगुणं विदुः ॥ ४३ ॥

aMguSThena vinA japyaM kRtaM tadaphalaM yataH ॥ gRhe japaM samaM vidyAdgoSThe zataguNaM viduH ॥ 43 ॥

पुण्यारण्ये तथारामे सहस्रगुणमुच्यते ॥ अयुतं पर्वते पुण्ये नद्यां लक्षमुदाहृतम् ॥ ४४ ॥

puNyAraNye tathArAme sahasraguNamucyate ॥ ayutaM parvate puNye nadyAM lakSamudAhRtam ॥ 44 ॥

कोटिं देवालये प्राहुरनन्तं मम सन्निधौ ॥ सूर्यस्याग्नेर्गुरोरिंदोर्दीपस्य च जलस्य च ॥ ४५ ॥

koTiM devAlaye prAhuranantaM mama sannidhau ॥ sUryasyAgnerguroriMdordIpasya ca jalasya ca ॥ 45 ॥

विप्राणां च गवां चैव सन्निधौ शस्यते जपः ॥ तत्पूर्वाभिमुखं वश्यं दक्षिणं चाभिचारिकम् ॥ ४६ ॥

viprANAM ca gavAM caiva sannidhau zasyate japaH ॥ tatpUrvAbhimukhaM vazyaM dakSiNaM cAbhicArikam ॥ 46 ॥

पश्चिमं धनदं विद्यादौत्तरं शातिदं भवेत् ॥ सूर्याग्निविप्रदेवानां गुरूणामपि सन्निधौ ॥ ४७ ॥

pazcimaM dhanadaM vidyAdauttaraM zAtidaM bhavet ॥ sUryAgnivipradevAnAM gurUNAmapi sannidhau ॥ 47 ॥

अन्येषां च प्रसक्तानां मन्त्रं न विमुखो जपेत् ॥ उष्णीषी कुंचुकी नम्रो मुक्तकेशो गलावृतः ॥ ४८ ॥

anyeSAM ca prasaktAnAM mantraM na vimukho japet ॥ uSNISI kuMcukI namro muktakezo galAvRtaH ॥ 48 ॥

अपवित्रकरो ऽशुद्धो विलपन्न जपेत्क्वचित् ॥ क्रोधं मदं क्षुतं त्रीणि निष्ठीवनविजृंभणे ॥ ४९ ॥

apavitrakaro 'zuddho vilapanna japetkvacit ॥ krodhaM madaM kSutaM trINi niSThIvanavijRMbhaNe ॥ 49 ॥

दर्शनं च श्वनीचानां वर्जयेज्जपकर्मणि ॥ आचमेत्संभवे तेषां स्मरेद्वा मां त्वया सह ॥ ५० ॥

darzanaM ca zvanIcAnAM varjayejjapakarmaNi ॥ AcametsaMbhave teSAM smaredvA mAM tvayA saha ॥ 50 ॥

ज्योतींषि च प्रपश्येद्वा कुर्याद्वा प्राणसंयमम् ॥ अनासनः शयाने वा गच्छन्नुत्थित एव वा ॥ ५१ ॥

jyotIMSi ca prapazyedvA kuryAdvA prANasaMyamam ॥ anAsanaH zayAne vA gacchannutthita eva vA ॥ 51 ॥

रथ्यायामशिवे स्थाने न जपेत्तिमिरान्तरे ॥ प्रसार्य न जपेत्पादौ कुक्कुटासन एव वा ॥ ५२ ॥

rathyAyAmazive sthAne na japettimirAntare ॥ prasArya na japetpAdau kukkuTAsana eva vA ॥ 52 ॥

यानशय्याधिरूढो वा चिंताव्याकुलितो ऽथ वा ॥ शक्तश्चेत्सर्वमेवैतदशक्तः शक्तितो जपेत् ॥ ५३ ॥

yAnazayyAdhirUDho vA ciMtAvyAkulito 'tha vA ॥ zaktazcetsarvamevaitadazaktaH zaktito japet ॥ 53 ॥

किमत्र बहुनोक्तेन समासेन वचः शृणु ॥ सदाचारो जपञ्छुद्धं ध्यायन्भद्रं समश्नुते ॥ ५४ ॥

kimatra bahunoktena samAsena vacaH zRNu ॥ sadAcAro japaJchuddhaM dhyAyanbhadraM samaznute ॥ 54 ॥

आचारः परमो धर्म आचारः परमं धनं ॥ आचारः परमा विद्या आचारः परमा गतिः ॥ ५५ ॥

AcAraH paramo dharma AcAraH paramaM dhanaM ॥ AcAraH paramA vidyA AcAraH paramA gatiH ॥ 55 ॥

आचारहीनः पुरुषो लोके भवति निंदितः ॥ परत्र च सुखी न स्यात्तस्मादाचारवान्भवेत् ॥ ५६ ॥

AcArahInaH puruSo loke bhavati niMditaH ॥ paratra ca sukhI na syAttasmAdAcAravAnbhavet ॥ 56 ॥

यस्य यद्विहितं कर्म वेदे शास्त्रे च वैदिकैः ॥ तस्य तेन समाचारः सदाचारो न चेतरः ॥ ५७ ॥

yasya yadvihitaM karma vede zAstre ca vaidikaiH ॥ tasya tena samAcAraH sadAcAro na cetaraH ॥ 57 ॥

सद्भिराचरितत्वाच्च सदाचारः स उच्यते ॥ सदाचारस्य तस्याहुरास्तिक्यं मूलकारणम् ॥ ५८ ॥

sadbhirAcaritatvAcca sadAcAraH sa ucyate ॥ sadAcArasya tasyAhurAstikyaM mUlakAraNam ॥ 58 ॥

आस्तिकश्चेत्प्रमादाद्यैः सदाचारादविच्युतः ॥ न दुष्यति नरो नित्यं तस्मादास्तिकतां व्रजेत् ॥ ५९ ॥

AstikazcetpramAdAdyaiH sadAcArAdavicyutaH ॥ na duSyati naro nityaM tasmAdAstikatAM vrajet ॥ 59 ॥

यथेहास्ति सुखं दुःखं सुकृतैर्दुष्कृतैरपि ॥ तथा परत्र चास्तीति मतिरास्तिक्यमुच्यते ॥ ६० ॥

yathehAsti sukhaM duHkhaM sukRtairduSkRtairapi ॥ tathA paratra cAstIti matirAstikyamucyate ॥ 60 ॥

रहस्यमन्यद्वक्ष्यामि गोपनीयमिदं प्रिये ॥ न वाच्यं यस्य कस्यापि नास्तिकस्याथ वा पशोः ॥ ६१ ॥

rahasyamanyadvakSyAmi gopanIyamidaM priye ॥ na vAcyaM yasya kasyApi nAstikasyAtha vA pazoH ॥ 61 ॥

सदाचारविहीनस्य पतितस्यान्त्यजस्य च ॥ पञ्चाक्षरात्परं नास्ति परित्राणं कलौ युगे ॥ ६२ ॥

sadAcAravihInasya patitasyAntyajasya ca ॥ paJcAkSarAtparaM nAsti paritrANaM kalau yuge ॥ 62 ॥

गच्छतस्तिष्ठतो वापि स्वेच्छया कर्म कुर्वतः ॥ अशुचेर्वा शुचेर्वापि मन्त्रो ऽयन्न च निष्फलः ॥ ६३ ॥

gacchatastiSThato vApi svecchayA karma kurvataH ॥ azucervA zucervApi mantro 'yanna ca niSphalaH ॥ 63 ॥

अनाचारवतां पुंसामविशुद्धषडध्वनाम् ॥ अनादिष्टो ऽपि गुरुणा मन्त्रो ऽयं न च निष्फलः ॥ ६४ ॥

anAcAravatAM puMsAmavizuddhaSaDadhvanAm ॥ anAdiSTo 'pi guruNA mantro 'yaM na ca niSphalaH ॥ 64 ॥

अन्त्यजस्यापि मूर्खस्य मूढस्य पतितस्य च ॥ निर्मर्यादस्य नीचस्य मंत्रो ऽयं न च निष्फलः ॥ ६५ ॥

antyajasyApi mUrkhasya mUDhasya patitasya ca ॥ nirmaryAdasya nIcasya maMtro 'yaM na ca niSphalaH ॥ 65 ॥

सर्वावस्थां गतस्यापि मयि भक्तिमतः परम् ॥ सिध्यत्येव न संदेहो नापरस्य तु कस्यचित् ॥ ६६ ॥

sarvAvasthAM gatasyApi mayi bhaktimataH param ॥ sidhyatyeva na saMdeho nAparasya tu kasyacit ॥ 66 ॥

न लग्नतिथिनक्षत्रवारयोगादयः प्रिये ॥ अस्यात्यंतमवेक्ष्याः स्युर्नैष सप्तस्सदोदितः ॥ ६७ ॥

na lagnatithinakSatravArayogAdayaH priye ॥ asyAtyaMtamavekSyAH syurnaiSa saptassadoditaH ॥ 67 ॥

न कदाचिन्न कस्यापि रिपुरेष महामनुः ॥ सुसिद्धो वापि सिद्धो वा साध्यो वापि भविष्यति ॥ ६८ ॥

na kadAcinna kasyApi ripureSa mahAmanuH ॥ susiddho vApi siddho vA sAdhyo vApi bhaviSyati ॥ 68 ॥

सिद्धेन गुरुणादिष्टस्सुसिद्ध इति कथ्यते ॥ असिद्धेनापि वा दत्तस्सिद्धसाध्यस्तु केवलः ॥ ६९ ॥

siddhena guruNAdiSTassusiddha iti kathyate ॥ asiddhenApi vA dattassiddhasAdhyastu kevalaH ॥ 69 ॥

असाधितस्साधितो वा सिध्यत्वेन न संशयः ॥ श्रद्धातिशययुक्तस्य मयि मंत्रे तथा गुरौ ॥ ७० ॥

asAdhitassAdhito vA sidhyatvena na saMzayaH ॥ zraddhAtizayayuktasya mayi maMtre tathA gurau ॥ 70 ॥

तस्मान्मंत्रान्तरांस्त्यक्त्वा सापायान् १ धिकारतः ॥ आश्रमेत्परमां विद्यां साक्षात्पञ्चाक्षरीं बुधः ॥ ७१ ॥

tasmAnmaMtrAntarAMstyaktvA sApAyAn 1 dhikArataH ॥ AzrametparamAM vidyAM sAkSAtpaJcAkSarIM budhaH ॥ 71 ॥

मंत्रान्तरेषु सिद्धेषु मंत्र एष न सिध्यति ॥ सिद्धे त्वस्मिन्महामंत्रे ते च सिद्धा भवंत्युत ॥ ७२ ॥

maMtrAntareSu siddheSu maMtra eSa na sidhyati ॥ siddhe tvasminmahAmaMtre te ca siddhA bhavaMtyuta ॥ 72 ॥

यथा देवेष्वलब्धो ऽस्मि लब्धेष्वपि महेश्वरि ॥ मयि लब्धे तु ते लब्धा मंत्रेष्वेषु समो विधिः ॥ ७३ ॥

yathA deveSvalabdho 'smi labdheSvapi mahezvari ॥ mayi labdhe tu te labdhA maMtreSveSu samo vidhiH ॥ 73 ॥

ये दोषास्सर्वमंत्राणां न ते ऽस्मिन्संभवंत्यपि ॥ अस्य मंत्रस्य जात्यादीननपेक्ष्य प्रवर्तनात् ॥ ७४ ॥

ye doSAssarvamaMtrANAM na te 'sminsaMbhavaMtyapi ॥ asya maMtrasya jAtyAdInanapekSya pravartanAt ॥ 74 ॥

तथापि नैव क्षुद्रेषु फलेषु प्रति योगिषु ॥ सहसा विनियुंजीत तस्मादेष महाबलः ॥ ७५ ॥

tathApi naiva kSudreSu phaleSu prati yogiSu ॥ sahasA viniyuMjIta tasmAdeSa mahAbalaH ॥ 75 ॥

उपमन्युरुवाच ॥ एवं साक्षान्महादेव्यै महादेवेन शूलिना ॥ हिता य जगतामुक्तः पञ्चाक्षरविधिर्यथा ॥ ७६ ॥

upamanyuruvAca ॥ evaM sAkSAnmahAdevyai mahAdevena zUlinA ॥ hitA ya jagatAmuktaH paJcAkSaravidhiryathA ॥ 76 ॥

य इदं कीर्तयेद्भक्त्या शृणुयाद्वा समाहितः ॥ सर्वपापविनिर्मुक्तः प्रयाति परमां गतिम् ॥ ७७ ॥

ya idaM kIrtayedbhaktyA zRNuyAdvA samAhitaH ॥ sarvapApavinirmuktaH prayAti paramAM gatim ॥ 77 ॥