कृष्ण उवाच ॥ युगावर्तेषु सर्वेषु योगाचार्यच्छलेन तु ॥ अवतारान्हि शर्वस्य शिष्यांश्च भगवन्वद ॥ १ ॥

kRSNa uvAca ॥ yugAvarteSu sarveSu yogAcAryacchalena tu ॥ avatArAnhi zarvasya ziSyAMzca bhagavanvada ॥ 1 ॥

उपमन्युरुवाच ॥ श्वेतः सुतारो मदनः सुहोत्रः कङ्क एव च ॥ लौगाक्षिश्च महामायो जैगीषव्यस्तथैव च ॥ २ ॥

upamanyuruvAca ॥ zvetaH sutAro madanaH suhotraH kaGka eva ca ॥ laugAkSizca mahAmAyo jaigISavyastathaiva ca ॥ 2 ॥

दधिवाहश्च ऋषभो मुनिरुग्रो ऽत्रिरेव च ॥ सुपालको गौतमश्च तथा वेदशिरा मुनिः ॥ ३ ॥

dadhivAhazca RSabho munirugro 'trireva ca ॥ supAlako gautamazca tathA vedazirA muniH ॥ 3 ॥

गोकर्णश्च गुहावासी शिखण्डी चापरः स्मृतः ॥ जटामाली चाट्टहासो दारुको लांगुली तथा ॥ ४ ॥

gokarNazca guhAvAsI zikhaNDI cAparaH smRtaH ॥ jaTAmAlI cATTahAso dAruko lAMgulI tathA ॥ 4 ॥

महाकालश्च शूली च डंडी मुण्डीश एव च ॥ सविष्णुस्सोमशर्मा च लकुलीश्वर एव च ॥ ५ ॥

mahAkAlazca zUlI ca DaMDI muNDIza eva ca ॥ saviSNussomazarmA ca lakulIzvara eva ca ॥ 5 ॥

एते वाराह कल्पे ऽस्मिन्सप्तमस्यांतरो मनोः ॥ अष्टाविंशतिसंख्याता योगाचार्या युगक्रमात् ॥ ६ ॥

ete vArAha kalpe 'sminsaptamasyAMtaro manoH ॥ aSTAviMzatisaMkhyAtA yogAcAryA yugakramAt ॥ 6 ॥

शिष्याः प्रत्येकमेतेषां चत्वारश्शांतचेतसः ॥ श्वेतादयश्च रुष्यांतांस्तान्ब्रवीमि यथाक्रमम् ॥ ७ ॥

ziSyAH pratyekameteSAM catvArazzAMtacetasaH ॥ zvetAdayazca ruSyAMtAMstAnbravImi yathAkramam ॥ 7 ॥

श्वेतश्श्वेतशिखश्चैव श्वेताश्वः श्वेतलोहितः ॥ दुन्दुभिश्शतरूपश्च ऋचीकः केतुमांस्तथा ॥ ८ ॥

zvetazzvetazikhazcaiva zvetAzvaH zvetalohitaH ॥ dundubhizzatarUpazca RcIkaH ketumAMstathA ॥ 8 ॥

विकोशश्च विकेशश्च विपाशः पाशनाशनः ॥ सुमुखो दुर्मुखश्चैव दुर्गमो दुरतिक्रमः ॥ ९ ॥

vikozazca vikezazca vipAzaH pAzanAzanaH ॥ sumukho durmukhazcaiva durgamo duratikramaH ॥ 9 ॥

सनत्कुमारस्सनकः सनंदश्च सनातनः ॥ सुधामा विरजाश्चैव शंखश्चांडज एव च ॥ १० ॥

sanatkumArassanakaH sanaMdazca sanAtanaH ॥ sudhAmA virajAzcaiva zaMkhazcAMDaja eva ca ॥ 10 ॥

सारस्वतश्च मेघश्च मेघवाहस्सुवाहकः ॥ कपिलश्चासुरिः पञ्चशिखो बाष्कल एव च ॥ ११ ॥

sArasvatazca meghazca meghavAhassuvAhakaH ॥ kapilazcAsuriH paJcazikho bASkala eva ca ॥ 11 ॥

पराशराश्च गर्गश्च भार्गवश्चांगिरास्तथा ॥ बलबन्धुर्निरामित्राः केतुशृंगस्तपोधनः ॥ १२ ॥

parAzarAzca gargazca bhArgavazcAMgirAstathA ॥ balabandhurnirAmitrAH ketuzRMgastapodhanaH ॥ 12 ॥

लंबोदरश्च लंबश्च लम्बात्मा लंबकेशकः ॥ सर्वज्ञस्समबुद्धिश्च साध्यसिद्धिस्तथैव च ॥ १३ ॥

laMbodarazca laMbazca lambAtmA laMbakezakaH ॥ sarvajJassamabuddhizca sAdhyasiddhistathaiva ca ॥ 13 ॥

सुधामा कश्यपश्चैव वसिष्ठो विरजास्तथा ॥ अत्रिरुग्रो गुरुश्रेष्ठः श्रवनोथ श्रविष्टकः ॥ १४ ॥

sudhAmA kazyapazcaiva vasiSTho virajAstathA ॥ atrirugro guruzreSThaH zravanotha zraviSTakaH ॥ 14 ॥

कुणिश्च कुणिबाहुश्च कुशरीरः कुनेत्रकः ॥ काश्यपो ह्युशनाश्चैव च्यवनश्च बृहस्पतिः ॥ १५ ॥

kuNizca kuNibAhuzca kuzarIraH kunetrakaH ॥ kAzyapo hyuzanAzcaiva cyavanazca bRhaspatiH ॥ 15 ॥

उतथ्यो वामदेवश्च महाकालो महा ऽनिलः ॥ वाचःश्रवाः सुवीरश्च श्यावकश्च यतीश्वरः ॥ १६ ॥

utathyo vAmadevazca mahAkAlo mahA 'nilaH ॥ vAcaHzravAH suvIrazca zyAvakazca yatIzvaraH ॥ 16 ॥

हिरण्यनाभः कौशल्यो लोकाक्षिः कुथुमिस्तथा ॥ सुमन्तुर्जैमिनिश्चैव कुबन्धः कुशकन्धरः ॥ १७ ॥

hiraNyanAbhaH kauzalyo lokAkSiH kuthumistathA ॥ sumanturjaiminizcaiva kubandhaH kuzakandharaH ॥ 17 ॥

प्लक्षो दार्भायणिश्चैव केतुमान्गौतमस्तथा ॥ भल्लवी मधुपिंगश्च श्वेतकेतुस्तथैव च ॥ १८ ॥

plakSo dArbhAyaNizcaiva ketumAngautamastathA ॥ bhallavI madhupiMgazca zvetaketustathaiva ca ॥ 18 ॥

उशिजो बृहदश्वश्च देवलः कविरेव च ॥ शालिहोत्रः सुवेषश्च युवनाश्वः शरद्वसुः ॥ १९ ॥

uzijo bRhadazvazca devalaH kavireva ca ॥ zAlihotraH suveSazca yuvanAzvaH zaradvasuH ॥ 19 ॥

अक्षपादः कणादश्च उलूको वत्स एव च ॥ कुलिकश्चैव गर्गश्च मित्रको रुष्य एव च ॥ २० ॥

akSapAdaH kaNAdazca ulUko vatsa eva ca ॥ kulikazcaiva gargazca mitrako ruSya eva ca ॥ 20 ॥

एते शिष्या महेशस्य योगाचार्यस्वरूपिणः ॥ संख्या च शतमेतेषां सह द्वादशसंख्यया ॥ २१ ॥

ete ziSyA mahezasya yogAcAryasvarUpiNaH ॥ saMkhyA ca zatameteSAM saha dvAdazasaMkhyayA ॥ 21 ॥

सर्वे पाशुपताः सिद्धा भस्मोद्धूलितविग्रहाः ॥ सर्वशास्त्रार्थतत्त्वज्ञा वेदवेदांगपारगाः ॥ २२ ॥

sarve pAzupatAH siddhA bhasmoddhUlitavigrahAH ॥ sarvazAstrArthatattvajJA vedavedAMgapAragAH ॥ 22 ॥

शिवाश्रमरतास्सर्वे शिवज्ञानपरायणाः ॥ सर्वे संगविनिर्मुक्ताः शिवैकासक्तचेतसः ॥ २३ ॥

zivAzramaratAssarve zivajJAnaparAyaNAH ॥ sarve saMgavinirmuktAH zivaikAsaktacetasaH ॥ 23 ॥

सर्वद्वंद्वसहा धीराः सर्वभूतहिते रताः ॥ ऋजवो मृदवः स्वस्था जितक्रोधा जितेंद्रियाः ॥ २४ ॥

sarvadvaMdvasahA dhIrAH sarvabhUtahite ratAH ॥ Rjavo mRdavaH svasthA jitakrodhA jiteMdriyAH ॥ 24 ॥

रुद्राक्षमालाभरणास्त्रिपुंड्रांकितमस्तकाः ॥ शिखाजटास्सर्वजटा अजटा मुंडशीर्षकाः ॥ २५ ॥

rudrAkSamAlAbharaNAstripuMDrAMkitamastakAH ॥ zikhAjaTAssarvajaTA ajaTA muMDazIrSakAH ॥ 25 ॥

फलमूलाशनप्रायाः प्राणायामपरायणाः ॥ शिवाभिमानसंपन्नाः शिवध्यानैकतत्पराः ॥ २६ ॥

phalamUlAzanaprAyAH prANAyAmaparAyaNAH ॥ zivAbhimAnasaMpannAH zivadhyAnaikatatparAH ॥ 26 ॥

समुन्मथितसंसारविषवृक्षांकुरोद्गमाः ॥ प्रयातुमेव सन्नद्धाः परं शिवपुरं प्रति ॥ २७ ॥

samunmathitasaMsAraviSavRkSAMkurodgamAH ॥ prayAtumeva sannaddhAH paraM zivapuraM prati ॥ 27 ॥

सदेशिकानिमान्मत्वा नित्यं यश्शिवमर्चयेत् ॥ स याति शिवसायुज्यं नात्र कार्या विचारणा ॥ २८ ॥

sadezikAnimAnmatvA nityaM yazzivamarcayet ॥ sa yAti zivasAyujyaM nAtra kAryA vicAraNA ॥ 28 ॥