तस्मिन्नवसरे व्योम्नि समाविरभवद्रथः ॥ सहस्रसूर्यसंकाशश्चारुचीरवृषध्वजः ॥ १ ॥

tasminnavasare vyomni samAvirabhavadrathaH ॥ sahasrasUryasaMkAzazcArucIravRSadhvajaH ॥ 1 ॥

अश्वरत्नद्वयोदारो रथचक्रचतुष्टयः ॥ सञ्चितानेकदिव्यास्त्रशस्त्ररत्नपरिष्कृतः ॥ २ ॥

azvaratnadvayodAro rathacakracatuSTayaH ॥ saJcitAnekadivyAstrazastraratnapariSkRtaH ॥ 2 ॥

तस्यापि रथवर्यस्य स्यात्स एव हि सारथिः ॥ यथा च त्रैपुरे युद्धे पूर्वं शार्वरथे स्थितः ॥ ३ ॥

tasyApi rathavaryasya syAtsa eva hi sArathiH ॥ yathA ca traipure yuddhe pUrvaM zArvarathe sthitaH ॥ 3 ॥

स तं रथवरं ब्रह्मा शासनादेव शूलिनः ॥ हरेस्समीपमानीय कृताञ्जलिरभाषत ॥ ४ ॥

sa taM rathavaraM brahmA zAsanAdeva zUlinaH ॥ haressamIpamAnIya kRtAJjalirabhASata ॥ 4 ॥

भगवन्भद्र भद्रांग भगवानिन्दुभूषणः ॥ आज्ञापयति वीरस्त्वां रथमारोढुमव्ययः ॥ ५ ॥

bhagavanbhadra bhadrAMga bhagavAnindubhUSaNaH ॥ AjJApayati vIrastvAM rathamAroDhumavyayaH ॥ 5 ॥

रेभ्याश्रमसमीपस्थस्त्र्यंबको ऽंबिकया सह ॥ सम्पश्यते महाबाहो दुस्सहं ते पराक्रमम् ॥ ६ ॥

rebhyAzramasamIpasthastryaMbako 'MbikayA saha ॥ sampazyate mahAbAho dussahaM te parAkramam ॥ 6 ॥

तस्य तद्वचनं श्रुत्वा स वीरो गणकुञ्जरः ॥ आरुरोह रथं दिव्यमनुगृह्य पितामहम् ॥ ७ ॥

tasya tadvacanaM zrutvA sa vIro gaNakuJjaraH ॥ Aruroha rathaM divyamanugRhya pitAmaham ॥ 7 ॥

तथा रथवरे तस्मिन्स्थिते ब्रह्मणि सारथौ ॥ भद्रस्य ववृधे लक्ष्मी रुद्रस्येव पुरद्विषः ॥ ८ ॥

tathA rathavare tasminsthite brahmaNi sArathau ॥ bhadrasya vavRdhe lakSmI rudrasyeva puradviSaH ॥ 8 ॥

ततः शंखवरं दीप्तं पूर्णचंद्रसमप्रभम् ॥ प्रदध्मौ वदने कृत्वा भानुकंपो महाबलः ॥ ९ ॥

tataH zaMkhavaraM dIptaM pUrNacaMdrasamaprabham ॥ pradadhmau vadane kRtvA bhAnukaMpo mahAbalaH ॥ 9 ॥

तस्य शंखस्य तं नादं भिन्नसारससन्निभम् ॥ श्रुत्वा भयेन देवानां जज्वाल जठरानलः ॥ १० ॥

tasya zaMkhasya taM nAdaM bhinnasArasasannibham ॥ zrutvA bhayena devAnAM jajvAla jaTharAnalaH ॥ 10 ॥

यक्षविद्याधराहीन्द्रैः सिद्धैर्युद्धदिदृक्षुभिः ॥ क्षणेन निबडीभूताः साकाशविवरा दिशाः ॥ ११ ॥

yakSavidyAdharAhIndraiH siddhairyuddhadidRkSubhiH ॥ kSaNena nibaDIbhUtAH sAkAzavivarA dizAH ॥ 11 ॥

ततः शार्ङ्गेण चापाङ्कात्स नारायणनीरदः ॥ महता बाणवर्षेण तुतोद गणगोवृषम् ॥ १२ ॥

tataH zArGgeNa cApAGkAtsa nArAyaNanIradaH ॥ mahatA bANavarSeNa tutoda gaNagovRSam ॥ 12 ॥

तं दृष्ट्वा विष्णुमायांतं शतधा बाणवर्षिणम् ॥ स चाददे धनुर्जैत्रं भद्रो बाणसहस्रमुक् ॥ १३ ॥

taM dRSTvA viSNumAyAMtaM zatadhA bANavarSiNam ॥ sa cAdade dhanurjaitraM bhadro bANasahasramuk ॥ 13 ॥

समादाय च तद्दिव्यं धनुस्समरभैरवम् ॥ शनैर्विस्फारयामास मेरुं धनुरिवेश्वरः ॥ १४ ॥

samAdAya ca taddivyaM dhanussamarabhairavam ॥ zanairvisphArayAmAsa meruM dhanurivezvaraH ॥ 14 ॥

तस्य विस्फार्यमाणस्य धनुषो ऽभून्महास्वनः ॥ तेन स्वनेन महता पृथिवीं समकंपयत् ॥ १५ ॥

tasya visphAryamANasya dhanuSo 'bhUnmahAsvanaH ॥ tena svanena mahatA pRthivIM samakaMpayat ॥ 15 ॥

ततः शरवरं घोरं दीप्तमाशीविषोपमम् ॥ जग्राह गणपः श्रीमान्स्वयमुग्रपराक्रमः ॥ १६ ॥

tataH zaravaraM ghoraM dIptamAzIviSopamam ॥ jagrAha gaNapaH zrImAnsvayamugraparAkramaH ॥ 16 ॥

बाणोद्धारे भुजो ह्यस्य तूणीवदनसंगतः ॥ प्रत्यदृश्यत वल्मीकं विवेक्षुरिव पन्नगः ॥ १७ ॥

bANoddhAre bhujo hyasya tUNIvadanasaMgataH ॥ pratyadRzyata valmIkaM vivekSuriva pannagaH ॥ 17 ॥

समुद्धृतः करे तस्य तत्क्षणं रुरुचे शरेः ॥ महाभुजंगसंदष्टो यथा बालभुजङ्गमः ॥ १८ ॥

samuddhRtaH kare tasya tatkSaNaM ruruce zareH ॥ mahAbhujaMgasaMdaSTo yathA bAlabhujaGgamaH ॥ 18 ॥

शरेण घनतीव्रेण भद्रो रुद्रपराक्रमः ॥ विव्याध कुपितो गाढं ललाटे विष्णुमव्ययम् ॥ १९ ॥

zareNa ghanatIvreNa bhadro rudraparAkramaH ॥ vivyAdha kupito gADhaM lalATe viSNumavyayam ॥ 19 ॥

ललाटे ऽभिहितो विष्णुः पूर्वमेवावमानितः ॥ चुकोप गणपेंद्राय मृगेंद्रायेव गोवृषः ॥ २० ॥

lalATe 'bhihito viSNuH pUrvamevAvamAnitaH ॥ cukopa gaNapeMdrAya mRgeMdrAyeva govRSaH ॥ 20 ॥

ततस्त्वशनिकल्पेन क्रूरास्येन महेषुणा ॥ विव्याध गणराजस्य भुजे भुजगसन्निभे ॥ २१ ॥

tatastvazanikalpena krUrAsyena maheSuNA ॥ vivyAdha gaNarAjasya bhuje bhujagasannibhe ॥ 21 ॥

सो ऽपि तस्य भुजे भूयः सूर्यायुतसमप्रभम् ॥ विससर्ज शरं वेगाद्वीरभद्रो महाबलः ॥ २२ ॥

so 'pi tasya bhuje bhUyaH sUryAyutasamaprabham ॥ visasarja zaraM vegAdvIrabhadro mahAbalaH ॥ 22 ॥

स च विष्णुः पुनर्भद्रं भद्रो विष्णुं तथा पुनः ॥ स च तं स च तं विप्राश्शरैस्तावनुजघ्नतुः ॥ २३ ॥

sa ca viSNuH punarbhadraM bhadro viSNuM tathA punaH ॥ sa ca taM sa ca taM viprAzzaraistAvanujaghnatuH ॥ 23 ॥

तयोः परस्परं वेगाच्छरानाशु विमुंचतोः ॥ द्वयोस्समभवद्युद्धं तुमुलं रोमहर्षणम् ॥ २४ ॥

tayoH parasparaM vegAccharAnAzu vimuMcatoH ॥ dvayossamabhavadyuddhaM tumulaM romaharSaNam ॥ 24 ॥

तद्दृष्ट्वा तुमुलं युद्धं तयोरेव परस्परम् ॥ हाहाकारो महानासीदाकाशे खेचरेरितः ॥ २५ ॥

taddRSTvA tumulaM yuddhaM tayoreva parasparam ॥ hAhAkAro mahAnAsIdAkAze khecareritaH ॥ 25 ॥

ततस्त्वनलतुंडेन शरेणादित्यवर्चसा ॥ विव्याध सुदृढं भद्रो विष्णोर्महति वक्षसि ॥ २६ ॥

tatastvanalatuMDena zareNAdityavarcasA ॥ vivyAdha sudRDhaM bhadro viSNormahati vakSasi ॥ 26 ॥

स तु तीव्रप्रपातेन शरेण दृढमाहतः ॥ महतीं रुजमासाद्य निपपात विमोहितः ॥ २७ ॥

sa tu tIvraprapAtena zareNa dRDhamAhataH ॥ mahatIM rujamAsAdya nipapAta vimohitaH ॥ 27 ॥

पुनः क्षणादिवोत्थाय लब्धसंज्ञस्तदा हरिः ॥ सर्वाण्यपि च दिव्यास्त्राण्यथैनं प्रत्यवासृजत् ॥ २८ ॥

punaH kSaNAdivotthAya labdhasaMjJastadA hariH ॥ sarvANyapi ca divyAstrANyathainaM pratyavAsRjat ॥ 28 ॥

स च विष्णुर्धनुर्मुक्तान्सर्वाञ्छर्वचमूपतिः ॥ सहसा वारयामास घोरैः प्रतिशरैः शरान् ॥ २९ ॥

sa ca viSNurdhanurmuktAnsarvAJcharvacamUpatiH ॥ sahasA vArayAmAsa ghoraiH pratizaraiH zarAn ॥ 29 ॥

ततो विष्णुस्स्वनामांकं बाणमव्याहतं क्वचित् ॥ ससर्ज क्रोधरक्ता क्षस्तमुद्दिश्य गणेश्वरम् ॥ तं बाणं बाणवर्येण भद्रो भद्राह्वयेण तु ॥ ३० ॥

tato viSNussvanAmAMkaM bANamavyAhataM kvacit ॥ sasarja krodharaktA kSastamuddizya gaNezvaram ॥ taM bANaM bANavaryeNa bhadro bhadrAhvayeNa tu ॥ 30 ॥

अप्राप्तमेव भगवाञ्चिच्छेद शतधा पथि ॥ अथैकेनेषुणा शार्ङ्गं द्वाभ्यां पक्षौ गरुत्मतः ॥ ३१ ॥

aprAptameva bhagavAJciccheda zatadhA pathi ॥ athaikeneSuNA zArGgaM dvAbhyAM pakSau garutmataH ॥ 31 ॥

निमेषादेव चिच्छेद तदद्भुतमिवाभवत् ॥ ततो योगबलाद्विष्णुर्देहाद्देवान्सुदारुणान् ॥ ३२ ॥

nimeSAdeva ciccheda tadadbhutamivAbhavat ॥ tato yogabalAdviSNurdehAddevAnsudAruNAn ॥ 32 ॥

शंखचक्रगदाहस्तान् विससर्ज सहस्रशः ॥ सर्वांस्तान्क्षणमात्रेण त्रैपुरानिव शंकरः ॥ ३३ ॥

zaMkhacakragadAhastAn visasarja sahasrazaH ॥ sarvAMstAnkSaNamAtreNa traipurAniva zaMkaraH ॥ 33 ॥

निर्ददाह महाबाहुर्नेत्रसृष्टेन वह्निना ॥ ततः क्रुद्धतरो विष्णुश्चक्रमुद्यम्य सत्वरः ॥ ३४ ॥

nirdadAha mahAbAhurnetrasRSTena vahninA ॥ tataH kruddhataro viSNuzcakramudyamya satvaraH ॥ 34 ॥

तस्मिन्वीरो समुत्स्रष्टुं तदानीमुद्यतो ऽभवत् ॥ तं दृष्ट्वा चक्रमुद्यम्य पुरतः समुपस्थितम् ॥ ३५ ॥

tasminvIro samutsraSTuM tadAnImudyato 'bhavat ॥ taM dRSTvA cakramudyamya purataH samupasthitam ॥ 35 ॥

स्मयन्निव गणेशानो व्यष्टंभयदयत्नतः ॥ स्तंभितांगस्तु तच्चक्रं घोरमप्रतिमं क्वचित् ॥ ३६ ॥

smayanniva gaNezAno vyaSTaMbhayadayatnataH ॥ staMbhitAMgastu taccakraM ghoramapratimaM kvacit ॥ 36 ॥

इच्छन्नपि समुत्स्रष्टुं न विष्णुरभवत्क्षमः ॥ श्वसन्निवैकमुद्धृत्य बाहुं चक्रसमन्वितम् ॥ ३७ ॥

icchannapi samutsraSTuM na viSNurabhavatkSamaH ॥ zvasannivaikamuddhRtya bAhuM cakrasamanvitam ॥ 37 ॥

अतिष्ठदलसो भूत्वा पाषाण इव निश्चलः ॥ विशरीरो यथाजीवो विशृङ्गो वा यथा वृषः ॥ ३८ ॥

atiSThadalaso bhUtvA pASANa iva nizcalaH ॥ vizarIro yathAjIvo vizRGgo vA yathA vRSaH ॥ 38 ॥

विदंष्ट्रश्च यथा सिंहस्तथा विष्णुरवस्थितः ॥ तं दृष्ट्वा दुर्दशापन्नं विष्णुमिंद्रादयः सुराः ॥ समुन्नद्धा गणेन्द्रेण मृगेंद्रेणेव गोवृषाः ॥ ३९ ॥

vidaMSTrazca yathA siMhastathA viSNuravasthitaH ॥ taM dRSTvA durdazApannaM viSNumiMdrAdayaH surAH ॥ samunnaddhA gaNendreNa mRgeMdreNeva govRSAH ॥ 39 ॥

प्रगृहीतायुधा यौद्धुंक्रुद्धाः समुपतस्थिरे ॥ तान्दृष्ट्वा समरे भद्रःक्षुद्रानिव हरिर्मृगान् ॥ ४० ॥

pragRhItAyudhA yauddhuMkruddhAH samupatasthire ॥ tAndRSTvA samare bhadraHkSudrAniva harirmRgAn ॥ 40 ॥

साक्षाद्रुद्रतनुर्वीरो वरवीरगणावृतः ॥ अट्टहासेन घोरेण व्यष्टं भयदनिंदितः ॥ ४१ ॥

sAkSAdrudratanurvIro varavIragaNAvRtaH ॥ aTTahAsena ghoreNa vyaSTaM bhayadaniMditaH ॥ 41 ॥

तथा शतमखस्यापि सवज्रो दक्षिणः करः ॥ सिसृक्षोरेव उद्वज्रश्चित्रीकृत इवाभवत् ॥ ४२ ॥

tathA zatamakhasyApi savajro dakSiNaH karaH ॥ sisRkSoreva udvajrazcitrIkRta ivAbhavat ॥ 42 ॥

अन्येषामपि सर्वेषां सरक्ता अपि बाहवः ॥ अलसानामिवारंभास्तादृशाः प्रतियांत्युत ॥ ४३ ॥

anyeSAmapi sarveSAM saraktA api bAhavaH ॥ alasAnAmivAraMbhAstAdRzAH pratiyAMtyuta ॥ 43 ॥

एवं भगवता तेन व्याहताशेषवैभवात् ॥ अमराः समरे तस्य पुरतः स्थातुमक्षमाः ॥ ४४ ॥

evaM bhagavatA tena vyAhatAzeSavaibhavAt ॥ amarAH samare tasya purataH sthAtumakSamAH ॥ 44 ॥

स्तब्धैरवयवैरेव दुद्रुवुर्भयविह्वलाः ॥ स्थितिं च चक्रिरे युद्धे वीरतेजोभयाकुलाः ॥ ४५ ॥

stabdhairavayavaireva dudruvurbhayavihvalAH ॥ sthitiM ca cakrire yuddhe vIratejobhayAkulAH ॥ 45 ॥

विद्रुतांस्त्रिदशान्वीरान्वीरभद्रो महाभुजः ॥ विव्याध निशितैर्बाणैर्मघो वर्षैरिवाचलान् ॥ ४६ ॥

vidrutAMstridazAnvIrAnvIrabhadro mahAbhujaH ॥ vivyAdha nizitairbANairmagho varSairivAcalAn ॥ 46 ॥

बहवस्तस्य वीरस्य बाहवः परिघोपमाः ॥ शस्त्रैश्चकाशिरे दीप्तैः साग्निज्वाला इवोरगाः ॥ ४७ ॥

bahavastasya vIrasya bAhavaH parighopamAH ॥ zastraizcakAzire dIptaiH sAgnijvAlA ivoragAH ॥ 47 ॥

अस्त्रशस्त्राण्यनेकानिसवीरो विसृजन्बभौ ॥ विसृजन्सर्वभूतानि यथादौ विश्वसंभवः ॥ ४८ ॥

astrazastrANyanekAnisavIro visRjanbabhau ॥ visRjansarvabhUtAni yathAdau vizvasaMbhavaH ॥ 48 ॥

यथा रश्मिभिरादित्यः प्रच्छादयति मेदिनीम् ॥ तथा वीरः क्षणादेव शरैः प्राच्छादयद्दिशः ॥ ४९ ॥

yathA razmibhirAdityaH pracchAdayati medinIm ॥ tathA vIraH kSaNAdeva zaraiH prAcchAdayaddizaH ॥ 49 ॥

खमंडले गणेन्द्रस्य शराः कनकभूषिताः ॥ उत्पतंतस्तडिद्रूपैरुपमानपदं ययुः ॥ ५० ॥

khamaMDale gaNendrasya zarAH kanakabhUSitAH ॥ utpataMtastaDidrUpairupamAnapadaM yayuH ॥ 50 ॥

महांतस्ते सुरगणान्मंडूकानिवडुंडुभाः ॥ प्राणैर्वियोजयामासुः पपुश्च रुधिरासवम् ॥ ५१ ॥

mahAMtaste suragaNAnmaMDUkAnivaDuMDubhAH ॥ prANairviyojayAmAsuH papuzca rudhirAsavam ॥ 51 ॥

निकृत्तबाहवः केचित्केचिल्लूनवराननाः ॥ पार्श्वे विदारिताः केचिन्निपेतुरमरा भुवि ॥ ५२ ॥

nikRttabAhavaH kecitkecillUnavarAnanAH ॥ pArzve vidAritAH kecinnipeturamarA bhuvi ॥ 52 ॥

विशिखोन्मथितैर्गात्रैर्बहुभिश्छिन्नसन्धिभिः ॥ विवृत्तनयनाः केचिन्निपेतुर्भूतले मृताः ॥ गां प्रवेष्टुमिवेच्छंतः खं गंतुमिव लिप्सवः ॥ ५३ ॥

vizikhonmathitairgAtrairbahubhizchinnasandhibhiH ॥ vivRttanayanAH kecinnipeturbhUtale mRtAH ॥ gAM praveSTumivecchaMtaH khaM gaMtumiva lipsavaH ॥ 53 ॥

अलब्धात्मनिरोधानां व्यलीयंतः परस्परम् ॥ भूमौ केचित्प्रविविशुः पर्वतानां गुहाः परे ॥ ५४ ॥

alabdhAtmanirodhAnAM vyalIyaMtaH parasparam ॥ bhUmau kecitpravivizuH parvatAnAM guhAH pare ॥ 54 ॥

अपरे जग्मुराकाशं परे च विविशुर्जलम् ॥ तथा संछिन्नसर्वांगैस्स वीरस्त्रिदशैर्बभौ ॥ ५५ ॥

apare jagmurAkAzaM pare ca vivizurjalam ॥ tathA saMchinnasarvAMgaissa vIrastridazairbabhau ॥ 55 ॥

परिग्रस्तप्रजावर्गो भगवानिव भैरवः ॥ दग्धत्रिपुरसंव्यूहस्त्रिपुरारिर्यथाभवत् ॥ ५६ ॥

parigrastaprajAvargo bhagavAniva bhairavaH ॥ dagdhatripurasaMvyUhastripurAriryathAbhavat ॥ 56 ॥

एवं देवबलं सर्वं दीनं बीभत्सदर्शनम् ॥ गणेश्वरसमुत्पन्नं कृपणं वपुराददे ॥ ५७ ॥

evaM devabalaM sarvaM dInaM bIbhatsadarzanam ॥ gaNezvarasamutpannaM kRpaNaM vapurAdade ॥ 57 ॥

तदा त्रिदशवीराणामसृक्सलिलवाहिनी ॥ प्रावर्तत नदी घोरा प्राणिनां भयशंसिनी ॥ ५८ ॥

tadA tridazavIrANAmasRksalilavAhinI ॥ prAvartata nadI ghorA prANinAM bhayazaMsinI ॥ 58 ॥

रुधिरेण परिक्लिन्ना यज्ञभूमिस्तदा बभौ ॥ रक्तार्द्रवसना श्यामा हतशुंभेव कैशिकी ॥ ५९ ॥

rudhireNa pariklinnA yajJabhUmistadA babhau ॥ raktArdravasanA zyAmA hatazuMbheva kaizikI ॥ 59 ॥

तस्मिन्महति संवृत्ते समरे भृशदारुणे ॥ भयेनेव परित्रस्ता प्रचचाल वसुन्धरा ॥ ६० ॥

tasminmahati saMvRtte samare bhRzadAruNe ॥ bhayeneva paritrastA pracacAla vasundharA ॥ 60 ॥

महोर्मिकलिलावर्तश्चुक्षुभे च महोदधिः ॥ पेतुश्चोल्का महोत्पाताः शाखाश्च मुमुचुर्द्रुमाः ॥ ६१ ॥

mahormikalilAvartazcukSubhe ca mahodadhiH ॥ petuzcolkA mahotpAtAH zAkhAzca mumucurdrumAH ॥ 61 ॥

अप्रसन्ना दिशः सर्वाः पवनश्चाशिवो ववौ ॥ अहो विधिविपर्यासस्त्वश्वमेधोयमध्वरः ॥ यजमानस्स्वयं दक्षौ ब्रह्मपुत्रप्रजापतिः ॥ ६२ ॥

aprasannA dizaH sarvAH pavanazcAzivo vavau ॥ aho vidhiviparyAsastvazvamedhoyamadhvaraH ॥ yajamAnassvayaM dakSau brahmaputraprajApatiH ॥ 62 ॥

धर्मादयस्सदस्याश्च रक्षिता गरुडध्वजः ॥ भागांश्च प्रतिगृह्णंति साक्षादिंद्रादयः सुराः ॥ ६३ ॥

dharmAdayassadasyAzca rakSitA garuDadhvajaH ॥ bhAgAMzca pratigRhNaMti sAkSAdiMdrAdayaH surAH ॥ 63 ॥

तथापि यजमानस्य यज्ञस्य च सहर्त्विजः ॥ सद्य एव शिरश्छेदस्साधु संपद्यते फलम् ॥ ६४ ॥

tathApi yajamAnasya yajJasya ca sahartvijaH ॥ sadya eva zirazchedassAdhu saMpadyate phalam ॥ 64 ॥

तस्मान्नावेदनिर्दिष्टं न चेश्वरबहिष्कृतम् ॥ नासत्परिगृहीतं च कर्म कुर्यात्कदाचन ॥ ६५ ॥

tasmAnnAvedanirdiSTaM na cezvarabahiSkRtam ॥ nAsatparigRhItaM ca karma kuryAtkadAcana ॥ 65 ॥

कृत्वापि सुमहत्पुण्यमिष्ट्वा यज्ञशतैरपि ॥ न तत्फलमवाप्नोति भक्तिहीनो महेश्वरे ॥ ६६ ॥

kRtvApi sumahatpuNyamiSTvA yajJazatairapi ॥ na tatphalamavApnoti bhaktihIno mahezvare ॥ 66 ॥

कृत्वापि सुमहत्पापं भक्त्या यजति यश्शिवम् ॥ मुच्यते पातकैः सर्वैर्नात्र कार्या विचारणा ॥ ६७ ॥

kRtvApi sumahatpApaM bhaktyA yajati yazzivam ॥ mucyate pAtakaiH sarvairnAtra kAryA vicAraNA ॥ 67 ॥

बहुनात्र किमुक्तेन वृथा दानं वृथा तपः ॥ वृथा यज्ञो वृथा होमः शिवनिन्दारतस्य तु ॥ ६८ ॥

bahunAtra kimuktena vRthA dAnaM vRthA tapaH ॥ vRthA yajJo vRthA homaH zivanindAratasya tu ॥ 68 ॥

ततः सनारायणकास्सरुद्राः सलोकपालास्समरे सुरौघाः ॥ गणेंद्रचापच्युतबाणविद्धाः प्रदुद्रुवुर्गाढरुजाभिभूताः ॥ ६९ ॥

tataH sanArAyaNakAssarudrAH salokapAlAssamare suraughAH ॥ gaNeMdracApacyutabANaviddhAH pradudruvurgADharujAbhibhUtAH ॥ 69 ॥

चेलुः क्वचित्केचन शीर्णकेशाः सेदुः क्वचित्केचन दीर्घगात्राः ॥ पेतुः क्वचित्केचन भिन्नवक्त्रा नेशुः क्वचित्केचन देववीराः ॥ ७० ॥

celuH kvacitkecana zIrNakezAH seduH kvacitkecana dIrghagAtrAH ॥ petuH kvacitkecana bhinnavaktrA nezuH kvacitkecana devavIrAH ॥ 70 ॥

केचिच्च तत्र त्रिदशा विपन्ना विस्रस्तवस्त्राभरणास्त्रशस्त्राः ॥ निपेतुरुद्भासितदीनमुद्रा मदं च दर्पं च बलं च हित्वा ॥ ७१ ॥

kecicca tatra tridazA vipannA visrastavastrAbharaNAstrazastrAH ॥ nipeturudbhAsitadInamudrA madaM ca darpaM ca balaM ca hitvA ॥ 71 ॥

सस्मुत्पथप्रस्थितमप्रधृष्यो विक्षिप्य दक्षाध्वरमक्षतास्त्रैः ॥ बभौ गणेशस्स गणेश्वराणां मध्ये स्थितः सिंह इवर्षभाणाम् ॥ ७२ ॥

sasmutpathaprasthitamapradhRSyo vikSipya dakSAdhvaramakSatAstraiH ॥ babhau gaNezassa gaNezvarANAM madhye sthitaH siMha ivarSabhANAm ॥ 72 ॥