वायुरुवाच ॥ एवं लब्ध्वा परां शक्तिमीश्वरादेव शाश्वतीम् ॥ मैथुनप्रभवां सृष्टिं कर्तृकामः प्रजापतिः ॥ १ ॥

vAyuruvAca ॥ evaM labdhvA parAM zaktimIzvarAdeva zAzvatIm ॥ maithunaprabhavAM sRSTiM kartRkAmaH prajApatiH ॥ 1 ॥

स्वयमप्यद्भुतो नारी चार्धेन पुरुषो ऽभवत् ॥ यार्धेन नारी सा तस्माच्छतरूपा व्यजायत ॥ २ ॥

svayamapyadbhuto nArI cArdhena puruSo 'bhavat ॥ yArdhena nArI sA tasmAcchatarUpA vyajAyata ॥ 2 ॥

विराजमसृजद्ब्रह्मा सो ऽर्धन पुरुषो ऽभवत् ॥ स वै स्वायंभुवः पूर्वं पुरुषो मनुरुच्यते ॥ ३ ॥

virAjamasRjadbrahmA so 'rdhana puruSo 'bhavat ॥ sa vai svAyaMbhuvaH pUrvaM puruSo manurucyate ॥ 3 ॥

सा देवी शतरूपा तु तपः कृत्वा सुदुश्चरम् ॥ भर्तारं दीप्तयशसं मनुमेवान्वपद्यत ॥ ४ ॥

sA devI zatarUpA tu tapaH kRtvA suduzcaram ॥ bhartAraM dIptayazasaM manumevAnvapadyata ॥ 4 ॥

तस्मात्तु शतरूपा सा पुत्रद्वयमसूयत ॥ प्रियव्रतोत्तानपादौ पुत्रौ पुत्रवतां वरौ ॥ ५ ॥

tasmAttu zatarUpA sA putradvayamasUyata ॥ priyavratottAnapAdau putrau putravatAM varau ॥ 5 ॥

कन्ये द्वे च महाभागे याभ्यां जातास्त्विमाः प्रजाः ॥ आकूतिरेका विज्ञेया प्रसूतिरपरा स्मृता ॥ ६ ॥

kanye dve ca mahAbhAge yAbhyAM jAtAstvimAH prajAH ॥ AkUtirekA vijJeyA prasUtiraparA smRtA ॥ 6 ॥

स्वायंभुवः प्रसूतिं च ददौ दक्षाय तां प्रभुः ॥ रुचेः प्रजापतिश्चैव चाकूतिं समपादयत् ॥ ७ ॥

svAyaMbhuvaH prasUtiM ca dadau dakSAya tAM prabhuH ॥ ruceH prajApatizcaiva cAkUtiM samapAdayat ॥ 7 ॥

आकूत्यां मिथुनं जज्ञे मानसस्य रुचेः शुभम् ॥ यज्ञश्च दक्षिणा चैव याभ्यां संवर्तितं जगत् ॥ ८ ॥

AkUtyAM mithunaM jajJe mAnasasya ruceH zubham ॥ yajJazca dakSiNA caiva yAbhyAM saMvartitaM jagat ॥ 8 ॥

स्वायंभुवसुतायां तु प्रसूत्यां लोकमातरः ॥ चतस्रो विंशतिः कन्या दक्षस्त्वजनयत्प्रभुः ॥ ९ ॥

svAyaMbhuvasutAyAM tu prasUtyAM lokamAtaraH ॥ catasro viMzatiH kanyA dakSastvajanayatprabhuH ॥ 9 ॥

श्रद्धा लक्ष्मीर्धृतिः पुष्टिस्तुष्टिर्मेधा क्रिया तथा ॥ बुद्धिर्लज्जा वपुः शांतिस्सिद्धिः कीर्तिस्त्रयोदशी ॥ १० ॥

zraddhA lakSmIrdhRtiH puSTistuSTirmedhA kriyA tathA ॥ buddhirlajjA vapuH zAMtissiddhiH kIrtistrayodazI ॥ 10 ॥

पत्न्यर्थं प्रतिजग्राह धर्मो दाक्षायणीः प्रभुः ॥ ताभ्यः शिष्टा यवीयस्य एकादश सुलोचनाः ॥ ११ ॥

patnyarthaM pratijagrAha dharmo dAkSAyaNIH prabhuH ॥ tAbhyaH ziSTA yavIyasya ekAdaza sulocanAH ॥ 11 ॥

ख्यातिः सत्यर्थसंभूतिः स्मृतिः प्रीतिः क्षमा तथा ॥ सन्नतिश्चानसूया च ऊर्जा स्वाहा स्वधा तथा ॥ १२ ॥

khyAtiH satyarthasaMbhUtiH smRtiH prItiH kSamA tathA ॥ sannatizcAnasUyA ca UrjA svAhA svadhA tathA ॥ 12 ॥

भृगुश्शर्वो मरीचिश्च अंगिराः पुलहः क्रतुः ॥ पुलस्त्यो ऽत्रिर्विशिष्ठश्च पावकः पितरस्तथा ॥ १३ ॥

bhRguzzarvo marIcizca aMgirAH pulahaH kratuH ॥ pulastyo 'trirviziSThazca pAvakaH pitarastathA ॥ 13 ॥

ख्यात्याद्या जगृहुः कन्यामुनयो मुनिसत्तमाः ॥ कामाद्यास्तु यशोंता ये ते त्रयोदश सूनवः ॥ १४ ॥

khyAtyAdyA jagRhuH kanyAmunayo munisattamAH ॥ kAmAdyAstu yazoMtA ye te trayodaza sUnavaH ॥ 14 ॥

धर्मस्य जज्ञिरे तास्तु श्रद्धाद्यास्सुसुखोत्तराः ॥ दुःखोत्तराश्च हिंसायामधर्मस्य च संततौ ॥ १५ ॥

dharmasya jajJire tAstu zraddhAdyAssusukhottarAH ॥ duHkhottarAzca hiMsAyAmadharmasya ca saMtatau ॥ 15 ॥

निकृत्यादय उत्पन्नाःपुत्राश्च धर्मलक्षणाः ॥ नैषां भार्याश्च पुत्रा वा सर्वे त्वनियमाः स्मृताः ॥ १६ ॥

nikRtyAdaya utpannAHputrAzca dharmalakSaNAH ॥ naiSAM bhAryAzca putrA vA sarve tvaniyamAH smRtAH ॥ 16 ॥

स एष तामसस्सर्गो जज्ञे धर्मनियामकः ॥ या सा दक्षस्य दुहिता रुद्रस्य दयिता सती ॥ १७ ॥

sa eSa tAmasassargo jajJe dharmaniyAmakaH ॥ yA sA dakSasya duhitA rudrasya dayitA satI ॥ 17 ॥

भर्तृनिन्दाप्रसंगेन त्यक्त्वा दाक्षायिणीं तनुम् ॥ दक्षं च दक्षभार्यां च विनिंद्य सह बन्धुभिः ॥ १८ ॥

bhartRnindAprasaMgena tyaktvA dAkSAyiNIM tanum ॥ dakSaM ca dakSabhAryAM ca viniMdya saha bandhubhiH ॥ 18 ॥

सा मेनायामाविरभूत्पुत्री हिमवतो गिरेः ॥ रुद्रस्तु तां सतीं दृष्ट्वा रुद्रांस्त्वात्मसमप्रभान् ॥ १९ ॥

sA menAyAmAvirabhUtputrI himavato gireH ॥ rudrastu tAM satIM dRSTvA rudrAMstvAtmasamaprabhAn ॥ 19 ॥

यथासृजदसंख्यातांस्तथा कथितमेव च ॥ भृगोः ख्यात्यां समुत्पन्ना लक्ष्मीर्नारायणप्रिया ॥ २० ॥

yathAsRjadasaMkhyAtAMstathA kathitameva ca ॥ bhRgoH khyAtyAM samutpannA lakSmIrnArAyaNapriyA ॥ 20 ॥

देवौ धातृविधातारौ मन्वंतरविधारिणौ ॥ तयोर्वै पुत्रपौत्राद्याश्शतशो ऽथ सहस्रशः ॥ २१ ॥

devau dhAtRvidhAtArau manvaMtaravidhAriNau ॥ tayorvai putrapautrAdyAzzatazo 'tha sahasrazaH ॥ 21 ॥

स्वायंभुवे ऽंतरे नीताः सर्वे ते भार्गवा मताः ॥ मरीचेरपि संभूतिः पौर्णमासमसूयत ॥ २२ ॥

svAyaMbhuve 'Mtare nItAH sarve te bhArgavA matAH ॥ marIcerapi saMbhUtiH paurNamAsamasUyata ॥ 22 ॥

कन्याचतुष्टयं चैव महीयांसस्तदन्वयाः ॥ येषां वंशे समुत्पन्नो बहुपुत्रस्य कश्यपः ॥ २३ ॥

kanyAcatuSTayaM caiva mahIyAMsastadanvayAH ॥ yeSAM vaMze samutpanno bahuputrasya kazyapaH ॥ 23 ॥

स्मृतिश्चांगिरसः पत्नी जनयामास वै सुतौ ॥ आग्नीध्रं शरभञ्चैव तथा कन्याचतुष्टयम् ॥ २४ ॥

smRtizcAMgirasaH patnI janayAmAsa vai sutau ॥ AgnIdhraM zarabhaJcaiva tathA kanyAcatuSTayam ॥ 24 ॥

तदीयाः पुत्रपौत्राश्च येतीतास्ते सहस्रशः ॥ प्रीत्यां पुलस्त्यभार्यायां दन्तोग्निरभवत्सुतः ॥ पूर्वजन्मनि योगस्त्यस्स्मृतः स्वायंभुवे ऽंतरे ॥ २५ ॥

tadIyAH putrapautrAzca yetItAste sahasrazaH ॥ prItyAM pulastyabhAryAyAM dantognirabhavatsutaH ॥ pUrvajanmani yogastyassmRtaH svAyaMbhuve 'Mtare ॥ 25 ॥

तत्संततीया बहवः पौलस्त्या इति विश्रुताः ॥ क्षमा तु सुषुवे पुत्रान्पुलहस्य प्रजापतेः ॥ २६ ॥

tatsaMtatIyA bahavaH paulastyA iti vizrutAH ॥ kSamA tu suSuve putrAnpulahasya prajApateH ॥ 26 ॥

कर्दमश्च सुरिश्चैव सहिष्णुश्चेति ते त्रयः ॥ त्रेताग्निवर्चसस्सर्वे येषां वंशः प्रतिष्ठितः ॥ २७ ॥

kardamazca surizcaiva sahiSNuzceti te trayaH ॥ tretAgnivarcasassarve yeSAM vaMzaH pratiSThitaH ॥ 27 ॥

क्रतोः क्रतुसमान्भार्या सन्नतिस्सुषुवे सुतान् ॥ नैषां भार्याश्च पुत्राश्च सर्वे ते ह्यूर्ध्वरेतसः ॥ २८ ॥

kratoH kratusamAnbhAryA sannatissuSuve sutAn ॥ naiSAM bhAryAzca putrAzca sarve te hyUrdhvaretasaH ॥ 28 ॥

षष्टिस्तानि सहस्राणि वालखिल्या इति स्मृताः ॥ अनूरोरग्रतो यांति परिवार्य दिवाकरम् ॥ २९ ॥

SaSTistAni sahasrANi vAlakhilyA iti smRtAH ॥ anUroragrato yAMti parivArya divAkaram ॥ 29 ॥

अत्रेर्भार्यानुसूया च पञ्चात्रेयानसूयत ॥ कन्यकां च श्रुतिं नाम माता शंखपदस्य च ॥ ३० ॥

atrerbhAryAnusUyA ca paJcAtreyAnasUyata ॥ kanyakAM ca zrutiM nAma mAtA zaMkhapadasya ca ॥ 30 ॥

सत्यनेत्रश्च हव्यश्च आपोमूर्तिश्शनैश्चरः ॥ सोमश्च पञ्चमस्त्वेते पञ्चात्रेयाः प्रकीर्तिताः ॥ ३१ ॥

satyanetrazca havyazca ApomUrtizzanaizcaraH ॥ somazca paJcamastvete paJcAtreyAH prakIrtitAH ॥ 31 ॥

तेषां पुत्राश्च पौत्राश्च ह्यात्रेयाणां महात्मनाम् ॥ स्वायंभुवे ऽंतरे ऽतीताः शतशो ऽथ सहस्रशः ॥ ३२ ॥

teSAM putrAzca pautrAzca hyAtreyANAM mahAtmanAm ॥ svAyaMbhuve 'Mtare 'tItAH zatazo 'tha sahasrazaH ॥ 32 ॥

ऊर्जायां तु वसिष्ठस्य पुत्रा वै सप्त जज्ञिरे ॥ ज्यायसी च स्वसा तेषां पुंडरीका सुमध्यमा ॥ ३३ ॥

UrjAyAM tu vasiSThasya putrA vai sapta jajJire ॥ jyAyasI ca svasA teSAM puMDarIkA sumadhyamA ॥ 33 ॥

रजो गात्रोर्ध्वबाहू च सवनश्चानयश्च यः ॥ सुतपाश्शुक्र इत्येते सप्त सप्तर्षयः स्मृताः ॥ ३४ ॥

rajo gAtrordhvabAhU ca savanazcAnayazca yaH ॥ sutapAzzukra ityete sapta saptarSayaH smRtAH ॥ 34 ॥

गोत्राणि नामभिस्तेषां वासिष्ठानां महात्मनाम् ॥ स्वायंभुवे ऽंतरे ऽतीतान्यर्बुदानि शतानि च ॥ ३५ ॥

gotrANi nAmabhisteSAM vAsiSThAnAM mahAtmanAm ॥ svAyaMbhuve 'Mtare 'tItAnyarbudAni zatAni ca ॥ 35 ॥

इत्येष ऋषिसर्गस्तु सानुबंधः प्रकीर्तितः ॥ समासाद्विस्तराद्वक्तुमशक्यो ऽयमिति द्विजाः ॥ ३६ ॥

ityeSa RSisargastu sAnubaMdhaH prakIrtitaH ॥ samAsAdvistarAdvaktumazakyo 'yamiti dvijAH ॥ 36 ॥

यो ऽसौ रुद्रात्मको बह्निब्रह्मणो मानसस्सुतः ॥ स्वाहा तस्य प्रिया लेभे पुत्रांस्त्रीनमितौजसः ॥ ३७ ॥

yo 'sau rudrAtmako bahnibrahmaNo mAnasassutaH ॥ svAhA tasya priyA lebhe putrAMstrInamitaujasaH ॥ 37 ॥

पावकः पवमानश्च शुचिरित्येष ते त्रयः ॥ निर्मंथ्यः पवमानस्स्याद्वैद्युतः पावकस्स्मृतः ॥ ३८ ॥

pAvakaH pavamAnazca zucirityeSa te trayaH ॥ nirmaMthyaH pavamAnassyAdvaidyutaH pAvakassmRtaH ॥ 38 ॥

सूर्ये तपति यश्चासौ शुचिः सौर उदाहृतः ॥ हव्यवाहः कव्यवाहः सहरक्षा इति त्रयः ॥ ३९ ॥

sUrye tapati yazcAsau zuciH saura udAhRtaH ॥ havyavAhaH kavyavAhaH saharakSA iti trayaH ॥ 39 ॥

त्रयाणां क्रमशः पुत्रा देवपितृसुराश्च ते ॥ एतेषां पुत्रपौत्राश्च चत्वारिंशन्नवैव ते ॥ ४० ॥

trayANAM kramazaH putrA devapitRsurAzca te ॥ eteSAM putrapautrAzca catvAriMzannavaiva te ॥ 40 ॥

काम्यनैमित्तिकाजस्रकर्मसु त्रिषु संस्थिताः ॥ सर्वे तपस्विनो ज्ञेयाः सर्वे व्रतभृतस्तथा ॥ ४१ ॥

kAmyanaimittikAjasrakarmasu triSu saMsthitAH ॥ sarve tapasvino jJeyAH sarve vratabhRtastathA ॥ 41 ॥

सर्वे रुद्रात्मकश्चैव सर्वे रुद्रपरायणाः ॥ तस्मादग्निमुखे यत्तद्धुतं स्यादेव केनचित् ॥ ४२ ॥

sarve rudrAtmakazcaiva sarve rudraparAyaNAH ॥ tasmAdagnimukhe yattaddhutaM syAdeva kenacit ॥ 42 ॥

तत्सर्वं रुद्रमुद्दिश्य दत्तं स्यान्नात्र संशयः ॥ इत्येवं निश्चयोग्नीनामनुक्रांतो यथातथम् ॥ ४३ ॥

tatsarvaM rudramuddizya dattaM syAnnAtra saMzayaH ॥ ityevaM nizcayognInAmanukrAMto yathAtatham ॥ 43 ॥

नातिविस्तरतो विप्राः पितॄन्वक्ष्याम्यतः परम् ॥ यस्मात्षडृतवस्तेषां स्थानं स्थानाभिमानिनाम् ॥ ४४ ॥

nAtivistarato viprAH pitRRnvakSyAmyataH param ॥ yasmAtSaDRtavasteSAM sthAnaM sthAnAbhimAninAm ॥ 44 ॥

ऋतवः पितरस्तस्मादित्येषा वैदिकी श्रुतिः ॥ युष्मादृतुषु सर्वे हि जायंते स्थास्नुजंगमा ॥ ४५ ॥

RtavaH pitarastasmAdityeSA vaidikI zrutiH ॥ yuSmAdRtuSu sarve hi jAyaMte sthAsnujaMgamA ॥ 45 ॥

तस्मादेते पितर आर्तवा इति च श्रुतम् ॥ एवं पितॄणामेतेषामृतुकालाभिमानिनाम् ॥ ४६ ॥

tasmAdete pitara ArtavA iti ca zrutam ॥ evaM pitRRNAmeteSAmRtukAlAbhimAninAm ॥ 46 ॥

आत्मैश्वर्या महात्मानस्तिष्ठंतीहाब्भ्रसंगमात् ॥ आग्निष्वात्ता बर्हिषदः पितरो द्विविधाः स्मृताः ॥ ४७ ॥

AtmaizvaryA mahAtmAnastiSThaMtIhAbbhrasaMgamAt ॥ AgniSvAttA barhiSadaH pitaro dvividhAH smRtAH ॥ 47 ॥

अयज्वानश्च यज्वानः क्रमात्ते मृहमेधिनः ॥ स्वधासूत पितृभ्यश्च द्वे कन्ये लोकविश्रुते ॥ ४८ ॥

ayajvAnazca yajvAnaH kramAtte mRhamedhinaH ॥ svadhAsUta pitRbhyazca dve kanye lokavizrute ॥ 48 ॥

मेनां च धरणीं चैव याभ्यां विश्वमिदं धृतम् ॥ अग्निष्वात्तसुता मेना धरणी बर्हिषत्सुता ॥ ४९ ॥

menAM ca dharaNIM caiva yAbhyAM vizvamidaM dhRtam ॥ agniSvAttasutA menA dharaNI barhiSatsutA ॥ 49 ॥

मेना हिमवतः पत्नी मैनाकं क्रौंचमेव च ॥ गौरीं गंगां च सुषुवे भवांगाश्लेषपावनीम् ॥ ५० ॥

menA himavataH patnI mainAkaM krauMcameva ca ॥ gaurIM gaMgAM ca suSuve bhavAMgAzleSapAvanIm ॥ 50 ॥

मेरोस्तु धरणी पत्नी दिव्यौषधिसमन्वितम् ॥ मंदरं सुषुवे पुत्रं चित्रिसुन्दरकन्धरम् ॥ ५१ ॥

merostu dharaNI patnI divyauSadhisamanvitam ॥ maMdaraM suSuve putraM citrisundarakandharam ॥ 51 ॥

स एव मंदरः श्रीमान्मेरुपुत्रस्तपोबलात् ॥ साक्षाच्छ्रीकंठनाथस्य शिवस्यावसथं गतः ॥ ५२ ॥

sa eva maMdaraH zrImAnmeruputrastapobalAt ॥ sAkSAcchrIkaMThanAthasya zivasyAvasathaM gataH ॥ 52 ॥

सासूता धरणी भूयस्त्रिंशत्कन्याश्च विश्रुताः ॥ वेलां च नियतिं चैव तृतीयामपि चायतिम् ॥ ५३ ॥

sAsUtA dharaNI bhUyastriMzatkanyAzca vizrutAH ॥ velAM ca niyatiM caiva tRtIyAmapi cAyatim ॥ 53 ॥

आयतिर्नियतिश्चैव पत्न्यौ द्वे भृगुपुत्रयोः ॥ स्वायंभुवे ऽंतरे पूर्वं कथितस्ते तदन्वयः ॥ ५४ ॥

Ayatirniyatizcaiva patnyau dve bhRguputrayoH ॥ svAyaMbhuve 'Mtare pUrvaM kathitaste tadanvayaH ॥ 54 ॥

सुषुवे सागराद्वेला कन्यामेकामनिंदिताम् ॥ सवर्णां नाम सामुद्रीं पत्नीं प्राचीनबर्हिषः ॥ ५५ ॥

suSuve sAgarAdvelA kanyAmekAmaniMditAm ॥ savarNAM nAma sAmudrIM patnIM prAcInabarhiSaH ॥ 55 ॥

सामुद्री सुषुवे पुत्रान्दश प्राचीनबर्हिषः ॥ सर्वे प्राचेतसा नाम धनुर्वेदस्य पारगाः ॥ ५६ ॥

sAmudrI suSuve putrAndaza prAcInabarhiSaH ॥ sarve prAcetasA nAma dhanurvedasya pAragAH ॥ 56 ॥

येषां स्वायंभुवे दक्षः पुत्रत्वमगमत्पुरा ॥ त्रियम्बकस्य शापेन चाक्षुषस्यांतरे मनोः ॥ ५७ ॥

yeSAM svAyaMbhuve dakSaH putratvamagamatpurA ॥ triyambakasya zApena cAkSuSasyAMtare manoH ॥ 57 ॥

इत्येते ब्रह्मपुत्राणां धर्मादीनाम्महात्मनाम् ॥ नातिसंक्षेपतो विप्रा नाति विस्तरतः क्रमात् ॥ ५८ ॥

ityete brahmaputrANAM dharmAdInAmmahAtmanAm ॥ nAtisaMkSepato viprA nAti vistarataH kramAt ॥ 58 ॥

वर्णिता वै मया वंशा दिव्या देवगणान्विताः ॥ क्रियावंतः प्रजावंतो महर्धिभिरलंकृताः ॥ ५९ ॥

varNitA vai mayA vaMzA divyA devagaNAnvitAH ॥ kriyAvaMtaH prajAvaMto mahardhibhiralaMkRtAH ॥ 59 ॥

प्रजानां संनिवेशो ऽयं प्रजापतिसमुद्भवः ॥ न हि शक्यः प्रसंख्यातुं वर्षकोटिशतैरपि ॥ ६० ॥

prajAnAM saMnivezo 'yaM prajApatisamudbhavaH ॥ na hi zakyaH prasaMkhyAtuM varSakoTizatairapi ॥ 60 ॥

राज्ञामपि च यो वंशो द्विधा सो ऽपि प्रवर्तते ॥ सूर्यवंशस्सोमवंश इति पुण्यतमः क्षितौ ॥ ६१ ॥

rAjJAmapi ca yo vaMzo dvidhA so 'pi pravartate ॥ sUryavaMzassomavaMza iti puNyatamaH kSitau ॥ 61 ॥

इक्ष्वाकुरम्बरीषश्च ययातिर्नाहुषादयः ॥ पुण्यश्लोकाः श्रुता ये ऽत्र ते पि तद्वंशसंभवाः ॥ ६२ ॥

ikSvAkurambarISazca yayAtirnAhuSAdayaH ॥ puNyazlokAH zrutA ye 'tra te pi tadvaMzasaMbhavAH ॥ 62 ॥

अन्ये च राजऋषयो नानावीर्यसमन्विता ॥ किं तैः फलमनुत्क्रांतैरुक्तपूर्वैः पुरातनैः ॥ ६३ ॥

anye ca rAjaRSayo nAnAvIryasamanvitA ॥ kiM taiH phalamanutkrAMtairuktapUrvaiH purAtanaiH ॥ 63 ॥

किं चेश्वरकथा वृत्ता यत्र तत्रान्यकीर्तनम् ॥ न सद्भिः संमतं मत्वा नोत्सहे बहुभाषितुम् ॥ ६४ ॥

kiM cezvarakathA vRttA yatra tatrAnyakIrtanam ॥ na sadbhiH saMmataM matvA notsahe bahubhASitum ॥ 64 ॥

प्रसंगादीश्वरस्यैव प्रभावद्योतनादपि ॥ सर्गादयो ऽपि कथिता इत्यत्र तत्प्रविस्तरैः ॥ ६५ ॥

prasaMgAdIzvarasyaiva prabhAvadyotanAdapi ॥ sargAdayo 'pi kathitA ityatra tatpravistaraiH ॥ 65 ॥