वायुरुवाच ॥ अथ देवो महादेवो महाजलदनादया ॥ वाचा मधुरगंभीरशिवदश्लक्ष्णवर्णया ॥ १ ॥

vAyuruvAca ॥ atha devo mahAdevo mahAjaladanAdayA ॥ vAcA madhuragaMbhIrazivadazlakSNavarNayA ॥ 1 ॥

अर्थसंपन्नपदया राजलक्षणयुक्तया ॥ अशेषविषयारंभरक्षाविमलदक्षया ॥ २ ॥

arthasaMpannapadayA rAjalakSaNayuktayA ॥ azeSaviSayAraMbharakSAvimaladakSayA ॥ 2 ॥

मनोहरतरोदारमधुरस्मितपूर्वया ॥ संबभाषे सुसंपीतो विश्वकर्माणमीश्वरः ॥ ३ ॥

manoharatarodAramadhurasmitapUrvayA ॥ saMbabhASe susaMpIto vizvakarmANamIzvaraH ॥ 3 ॥

ईश्वर उवाच ॥ वत्स वत्स महाभाग मम पुत्र पितामह ॥ ज्ञातमेव मया सर्वं तव वाक्यस्य गौरवम् ॥ ४ ॥

Izvara uvAca ॥ vatsa vatsa mahAbhAga mama putra pitAmaha ॥ jJAtameva mayA sarvaM tava vAkyasya gauravam ॥ 4 ॥

प्रजानामेव बृद्ध्यर्थं तपस्तप्तं त्वयाधुना ॥ तपसा ऽनेन तुष्टोस्मि ददामि च तवेप्सितम् ॥ ५ ॥

prajAnAmeva bRddhyarthaM tapastaptaM tvayAdhunA ॥ tapasA 'nena tuSTosmi dadAmi ca tavepsitam ॥ 5 ॥

इत्युक्त्वा परमोदारं स्वभावमधुरं वचः ॥ ससर्ज वपुषो भागाद्देवीं देववरो हरः ॥ ६ ॥

ityuktvA paramodAraM svabhAvamadhuraM vacaH ॥ sasarja vapuSo bhAgAddevIM devavaro haraH ॥ 6 ॥

यामाहुर्ब्रह्मविद्वांसो देवीं दिव्यगुणान्विताम् ॥ परस्य परमां शक्तिं भवस्य परमात्मनः ॥ ७ ॥

yAmAhurbrahmavidvAMso devIM divyaguNAnvitAm ॥ parasya paramAM zaktiM bhavasya paramAtmanaH ॥ 7 ॥

यस्यां न खलु विद्यंते जन्म मृत्युजरादयः ॥ या भवानी भवस्यांगात्समाविरभवत्किल ॥ ८ ॥

yasyAM na khalu vidyaMte janma mRtyujarAdayaH ॥ yA bhavAnI bhavasyAMgAtsamAvirabhavatkila ॥ 8 ॥

यस्या वाचो निवर्तन्ते मनसा चेंद्रियैः सह ॥ सा भर्तुर्वपुषो भागाज्जातेव समदृश्यत ॥ ९ ॥

yasyA vAco nivartante manasA ceMdriyaiH saha ॥ sA bharturvapuSo bhAgAjjAteva samadRzyata ॥ 9 ॥

या सा जगदिदं कृत्स्नं महिम्ना व्याप्य तिष्ठति ॥ शरीरिणीव स देवी विचित्रं समलक्ष्यत ॥ १० ॥

yA sA jagadidaM kRtsnaM mahimnA vyApya tiSThati ॥ zarIriNIva sa devI vicitraM samalakSyata ॥ 10 ॥

सर्वं जगदिदं चैषा संमोहयति मायया ॥ ईश्वरात्सैव जाताभूदजाता परमार्थतः ॥ ११ ॥

sarvaM jagadidaM caiSA saMmohayati mAyayA ॥ IzvarAtsaiva jAtAbhUdajAtA paramArthataH ॥ 11 ॥

न यस्या परमो भावः सुराणामपि गोचरः ॥ विश्वामरेश्वरी चैव विभक्ता भर्तुरंगतः ॥ १२ ॥

na yasyA paramo bhAvaH surANAmapi gocaraH ॥ vizvAmarezvarI caiva vibhaktA bharturaMgataH ॥ 12 ॥

तां दृष्ट्वा परमेशानीं सर्वलोकमहेश्वरीम् ॥ सर्वज्ञां सर्वगां सूक्ष्मां सदसद्व्यक्तिवर्जिताम् ॥ १३ ॥

tAM dRSTvA paramezAnIM sarvalokamahezvarIm ॥ sarvajJAM sarvagAM sUkSmAM sadasadvyaktivarjitAm ॥ 13 ॥

परमां निखिलं भासा भासयन्तीमिदं जगत् ॥ प्रणिपत्य महादेवीं प्रार्थयामास वै विराट् ॥ १४ ॥

paramAM nikhilaM bhAsA bhAsayantImidaM jagat ॥ praNipatya mahAdevIM prArthayAmAsa vai virAT ॥ 14 ॥

ब्रह्मोवाच ॥ देवि देवेन सृष्टो ऽहमादौ सर्वजगन्मयि ॥ प्रजासर्गे नियुक्तश्च सृजामि सकलं जगत् ॥ १५ ॥

brahmovAca ॥ devi devena sRSTo 'hamAdau sarvajaganmayi ॥ prajAsarge niyuktazca sRjAmi sakalaM jagat ॥ 15 ॥

मनसा निर्मिताः सर्वे देवि देवादयो मया ॥ न वृद्धिमुपगच्छन्ति सृज्यमानाः पुनः पुनः ॥ १६ ॥

manasA nirmitAH sarve devi devAdayo mayA ॥ na vRddhimupagacchanti sRjyamAnAH punaH punaH ॥ 16 ॥

मिथुनप्रभवामेव कृत्वा सृष्टिमतः परम् ॥ संवर्धयितुमिच्छामि सर्वा एव मम प्रजाः ॥ १७ ॥

mithunaprabhavAmeva kRtvA sRSTimataH param ॥ saMvardhayitumicchAmi sarvA eva mama prajAH ॥ 17 ॥

न निर्गतं पुरा त्वत्तो नारीणां कुलमव्ययम् ॥ तेन नारीकुलं स्रष्टुं शक्तिर्मम न विद्यते ॥ १८ ॥

na nirgataM purA tvatto nArINAM kulamavyayam ॥ tena nArIkulaM sraSTuM zaktirmama na vidyate ॥ 18 ॥

सर्वासामेव शक्तीनां त्वत्तः खलु समुद्भवः ॥ तस्मात्सर्वत्र सर्वेषां सर्वशक्तिप्रदायिनीम् ॥ १९ ॥

sarvAsAmeva zaktInAM tvattaH khalu samudbhavaH ॥ tasmAtsarvatra sarveSAM sarvazaktipradAyinIm ॥ 19 ॥

त्वामेव वरदां मायां प्रार्थयामि सुरेश्वरीम् ॥ चराचरविवृद्ध्यर्थमंशेनैकेन सर्वगे ॥ २० ॥

tvAmeva varadAM mAyAM prArthayAmi surezvarIm ॥ carAcaravivRddhyarthamaMzenaikena sarvage ॥ 20 ॥

दक्षस्य मम पुत्रस्य पुत्री भव भवार्दिनि ॥ एवं सा याचिता देवी ब्रह्मणा ब्रह्मयोनिना ॥ २१ ॥

dakSasya mama putrasya putrI bhava bhavArdini ॥ evaM sA yAcitA devI brahmaNA brahmayoninA ॥ 21 ॥

शक्तिमेकां भ्रुवोर्मध्यात्ससर्जात्मसमप्रभाम् ॥ तामाह प्रहसन्प्रेक्ष्य देवदेववरो हरः ॥ २२ ॥

zaktimekAM bhruvormadhyAtsasarjAtmasamaprabhAm ॥ tAmAha prahasanprekSya devadevavaro haraH ॥ 22 ॥

ब्रह्माणं तपसाराध्य कुरु तस्य यथेप्सितम् ॥ तामाज्ञां परमेशस्य शिरसा प्रतिगृह्य सा ॥ २३ ॥

brahmANaM tapasArAdhya kuru tasya yathepsitam ॥ tAmAjJAM paramezasya zirasA pratigRhya sA ॥ 23 ॥

ब्रह्मणो वचनाद्देवी दक्षस्य दुहिताभवत् ॥ दत्त्वैवमतुलां शक्तिं ब्रह्मणे ब्रह्मरूपिणीम् ॥ २४ ॥

brahmaNo vacanAddevI dakSasya duhitAbhavat ॥ dattvaivamatulAM zaktiM brahmaNe brahmarUpiNIm ॥ 24 ॥

विवेश देहं देवस्य देवश्चांतरधीयत ॥ तदा प्रभृति लोके ऽस्मिन् स्त्रियां भोगः प्रतिष्ठितः ॥ २५ ॥

viveza dehaM devasya devazcAMtaradhIyata ॥ tadA prabhRti loke 'smin striyAM bhogaH pratiSThitaH ॥ 25 ॥

प्रजासृष्टिश्च विप्रेंद्रा मैथुनेन प्रवर्तते ॥ ब्रह्मापि प्राप सानन्दं सन्तोषं मुनिपुंगवाः ॥ २६ ॥

prajAsRSTizca vipreMdrA maithunena pravartate ॥ brahmApi prApa sAnandaM santoSaM munipuMgavAH ॥ 26 ॥

एतद्वस्सर्वमाख्यातं देव्याः शक्तिसमुद्भवम् ॥ पुण्यवृद्धिकरं श्राव्यं भूतसर्गानुपंगतः ॥ २७ ॥

etadvassarvamAkhyAtaM devyAH zaktisamudbhavam ॥ puNyavRddhikaraM zrAvyaM bhUtasargAnupaMgataH ॥ 27 ॥

य इदं कीर्तयेन्नित्यं देव्याः शक्तिसमुद्भवम् ॥ पुण्यं सर्वमवाप्नोति पुत्रांश्च लभते शुभान् ॥ २८ ॥

ya idaM kIrtayennityaM devyAH zaktisamudbhavam ॥ puNyaM sarvamavApnoti putrAMzca labhate zubhAn ॥ 28 ॥