वायुरुवाच ॥ यदा पुनः प्रजाः सृष्टा न व्यवर्धन्त वेधसः ॥ तदा मैथुनजां सृष्टिं ब्रह्मा कर्तुममन्यत ॥ १ ॥

vAyuruvAca ॥ yadA punaH prajAH sRSTA na vyavardhanta vedhasaH ॥ tadA maithunajAM sRSTiM brahmA kartumamanyata ॥ 1 ॥

न निर्गतं पुरा यस्मान्नारीणां कुलमीश्वरात् ॥ तेन मैथुनजां सृष्टिं न शशाक पितामहः ॥ २ ॥

na nirgataM purA yasmAnnArINAM kulamIzvarAt ॥ tena maithunajAM sRSTiM na zazAka pitAmahaH ॥ 2 ॥

ततस्स विदधे बुद्धिमर्थनिश्चयगामिनीम् ॥ प्रजानमेव वृद्ध्यर्थं प्रष्टव्यः परमेश्वर ॥ ३ ॥

tatassa vidadhe buddhimarthanizcayagAminIm ॥ prajAnameva vRddhyarthaM praSTavyaH paramezvara ॥ 3 ॥

प्रसादेन विना तस्य न वर्धेरन्निमाः प्रजाः ॥ एवं संचिन्त्य विश्वात्मा तपः कर्तुं प्रचक्रमे ॥ ४ ॥

prasAdena vinA tasya na vardherannimAH prajAH ॥ evaM saMcintya vizvAtmA tapaH kartuM pracakrame ॥ 4 ॥

तदाद्या परमा शक्तिरनंता लोकभाविनी ॥ आद्या सूक्ष्मतरा शुद्धा भावगम्या मनोहरा ॥ ५ ॥

tadAdyA paramA zaktiranaMtA lokabhAvinI ॥ AdyA sUkSmatarA zuddhA bhAvagamyA manoharA ॥ 5 ॥

निर्गुणा निष्प्रपञ्चा च निष्कला निरुपप्लवा ॥ निरंतरतरा नित्या नित्यमीश्वरपार्श्वगा ॥ ६ ॥

nirguNA niSprapaJcA ca niSkalA nirupaplavA ॥ niraMtaratarA nityA nityamIzvarapArzvagA ॥ 6 ॥

तया परमया शक्त्या भगवंतं त्रियम्बकम् ॥ संचिन्त्य हृदये ब्रह्मा तताप परमं तपः ॥ ७ ॥

tayA paramayA zaktyA bhagavaMtaM triyambakam ॥ saMcintya hRdaye brahmA tatApa paramaM tapaH ॥ 7 ॥

तीव्रेण तपसा तस्य युक्तस्य परमेष्ठिनः ॥ अचिरेणैव कालेन पिता संप्रतुतोष ह ॥ ८ ॥

tIvreNa tapasA tasya yuktasya parameSThinaH ॥ acireNaiva kAlena pitA saMpratutoSa ha ॥ 8 ॥

ततः केनचिदंशेन मूर्तिमाविश्य कामपि ॥ अर्धनारीश्वरो भूत्वा ययौ देवस्स्वयं हरः ॥ ९ ॥

tataH kenacidaMzena mUrtimAvizya kAmapi ॥ ardhanArIzvaro bhUtvA yayau devassvayaM haraH ॥ 9 ॥

तं दृष्ट्वा परमं देवं तमसः परमव्ययम् ॥ अद्वितीयमनिर्देश्यमदृश्यमकृतात्मभिः ॥ १० ॥

taM dRSTvA paramaM devaM tamasaH paramavyayam ॥ advitIyamanirdezyamadRzyamakRtAtmabhiH ॥ 10 ॥

सर्वलोकविधातारं सर्वलोकेश्वरेश्वरम् ॥ सर्वलोकविधायिन्या शक्त्या परमया युतम् ॥ ११ ॥

sarvalokavidhAtAraM sarvalokezvarezvaram ॥ sarvalokavidhAyinyA zaktyA paramayA yutam ॥ 11 ॥

अप्रतर्क्यमनाभासममेयमजरं ध्रुवम् ॥ अचलं निर्गुणं शांतमनंतमहिमास्पदम् ॥ १२ ॥

apratarkyamanAbhAsamameyamajaraM dhruvam ॥ acalaM nirguNaM zAMtamanaMtamahimAspadam ॥ 12 ॥

सर्वगं सर्वदं सर्वसदसद्व्यक्तिवर्जितम् ॥ सर्वोपमाननिर्मुक्तं शरण्यं शाश्वतं शिवम् ॥ १३ ॥

sarvagaM sarvadaM sarvasadasadvyaktivarjitam ॥ sarvopamAnanirmuktaM zaraNyaM zAzvataM zivam ॥ 13 ॥

प्रणम्य दंडवद्ब्रह्मा समुत्थाय कृतांजलिः ॥ श्रद्धाविनयसंपन्नैः श्राव्यैः संस्करसंयुतैः ॥ १४ ॥

praNamya daMDavadbrahmA samutthAya kRtAMjaliH ॥ zraddhAvinayasaMpannaiH zrAvyaiH saMskarasaMyutaiH ॥ 14 ॥

यथार्थयुक्तसर्वार्थैर्वेदार्थपरिबृंहितैः ॥ तुष्टाव देवं देवीं च सूक्तैः सूक्ष्मार्थगोचरैः ॥ १५ ॥

yathArthayuktasarvArthairvedArthaparibRMhitaiH ॥ tuSTAva devaM devIM ca sUktaiH sUkSmArthagocaraiH ॥ 15 ॥

ब्रह्मोवाच ॥ जय देव महादेव जयेश्वर महेश्वर ॥ जय सर्वगुण श्रेष्ठ जय सर्वसुराधिप ॥ १६ ॥

brahmovAca ॥ jaya deva mahAdeva jayezvara mahezvara ॥ jaya sarvaguNa zreSTha jaya sarvasurAdhipa ॥ 16 ॥

जय प्रकृति कल्याणि जय प्रकृतिनायिके ॥ जय प्रकृतिदूरे त्वं जय प्रकृतिसुन्दरि ॥ १७ ॥

jaya prakRti kalyANi jaya prakRtinAyike ॥ jaya prakRtidUre tvaM jaya prakRtisundari ॥ 17 ॥

जयामोघमहामाय जयामोघ मनोरथ ॥ जयामोघमहालील जयामोघमहाबल ॥ १८ ॥

jayAmoghamahAmAya jayAmogha manoratha ॥ jayAmoghamahAlIla jayAmoghamahAbala ॥ 18 ॥

जय विश्वजगन्मातर्जय विश्वजगन्मये ॥ जय विश्वजगद्धात्रि जय विश्वजगत्सखि ॥ १९ ॥

jaya vizvajaganmAtarjaya vizvajaganmaye ॥ jaya vizvajagaddhAtri jaya vizvajagatsakhi ॥ 19 ॥

जय शाश्वतिकैश्वर्ये जय शाश्वतिकालय ॥ जय शाश्वतिकाकार जय शाश्वतिकानुग ॥ २० ॥

jaya zAzvatikaizvarye jaya zAzvatikAlaya ॥ jaya zAzvatikAkAra jaya zAzvatikAnuga ॥ 20 ॥

जयात्मत्रयनिर्मात्रि जयात्मत्रयपालिनि ॥ जयात्मत्रयसंहर्त्रि जयात्मत्रयनायिके ॥ २१ ॥

jayAtmatrayanirmAtri jayAtmatrayapAlini ॥ jayAtmatrayasaMhartri jayAtmatrayanAyike ॥ 21 ॥

जयावलोकनायत्तजगत्कारणबृंहण ॥ जयोपेक्षाकटाक्षोत्थहुतभुग्भुक्तभौतिक ॥ २२ ॥

jayAvalokanAyattajagatkAraNabRMhaNa ॥ jayopekSAkaTAkSotthahutabhugbhuktabhautika ॥ 22 ॥

जय देवाद्यविज्ञेये स्वात्मसूक्ष्मदृशोज्ज्वले ॥ जय स्थूलात्मशक्त्येशेजय व्याप्तचराचरे ॥ २३ ॥

jaya devAdyavijJeye svAtmasUkSmadRzojjvale ॥ jaya sthUlAtmazaktyezejaya vyAptacarAcare ॥ 23 ॥

जय नामैकविन्यस्तविश्वतत्त्वसमुच्चय ॥ जयासुरशिरोनिष्ठश्रेष्ठानुगकदंबक ॥ २४ ॥

jaya nAmaikavinyastavizvatattvasamuccaya ॥ jayAsurazironiSThazreSThAnugakadaMbaka ॥ 24 ॥

जयोपाश्रितसंरक्षासंविधानपटीयसि ॥ जयोन्मूलितसंसारविषवृक्षांकुरोद्गमे ॥ २५ ॥

jayopAzritasaMrakSAsaMvidhAnapaTIyasi ॥ jayonmUlitasaMsAraviSavRkSAMkurodgame ॥ 25 ॥

जय प्रादेशिकैश्वर्यवीर्यशौर्यविजृंभण ॥ जय विश्वबहिर्भूत निरस्तपरवैभव ॥ २६ ॥

jaya prAdezikaizvaryavIryazauryavijRMbhaNa ॥ jaya vizvabahirbhUta nirastaparavaibhava ॥ 26 ॥

जय प्रणीतपञ्चार्थप्रयोगपरमामृत ॥ जय पञ्चार्थविज्ञानसुधास्तोत्रस्वरूपिणि ॥ २७ ॥

jaya praNItapaJcArthaprayogaparamAmRta ॥ jaya paJcArthavijJAnasudhAstotrasvarUpiNi ॥ 27 ॥

जयति घोरसंसारमहारोगभिषग्वर ॥ जयानादिमलाज्ञानतमःपटलचंद्रिके ॥ २८ ॥

jayati ghorasaMsAramahArogabhiSagvara ॥ jayAnAdimalAjJAnatamaHpaTalacaMdrike ॥ 28 ॥

जय त्रिपुरकालाग्ने जय त्रिपुरभैरवि ॥ जय त्रिगुणनिर्मुक्ते जय त्रिगुणमर्दिनि ॥ २९ ॥

jaya tripurakAlAgne jaya tripurabhairavi ॥ jaya triguNanirmukte jaya triguNamardini ॥ 29 ॥

जय प्रथमसर्वज्ञ जय सर्वप्रबोधिक ॥ जय प्रचुरदिव्यांग जय प्रार्थितदायिनि ॥ ३० ॥

jaya prathamasarvajJa jaya sarvaprabodhika ॥ jaya pracuradivyAMga jaya prArthitadAyini ॥ 30 ॥

क्व देव ते परं धाम क्व च तुच्छं च नो वचः ॥ तथापि भगवन् भक्त्या प्रलपंतं क्षमस्व माम् ॥ ३१ ॥

kva deva te paraM dhAma kva ca tucchaM ca no vacaH ॥ tathApi bhagavan bhaktyA pralapaMtaM kSamasva mAm ॥ 31 ॥

विज्ञाप्यैवंविधैः सूक्तैर्विश्वकर्मा चतुर्मुखः ॥ नमश्चकार रुद्राय रद्राण्यै च मुहुर्मुहुः ॥ ३२ ॥

vijJApyaivaMvidhaiH sUktairvizvakarmA caturmukhaH ॥ namazcakAra rudrAya radrANyai ca muhurmuhuH ॥ 32 ॥

इदं स्तोत्रवरं पुण्यं ब्रह्मणा समुदीरितम् ॥ अर्धनारीश्वरं नाम शिवयोर्हर्षवर्धनम् ॥ ३३ ॥

idaM stotravaraM puNyaM brahmaNA samudIritam ॥ ardhanArIzvaraM nAma zivayorharSavardhanam ॥ 33 ॥

य इदं कीर्तयेद्भक्त्या यस्य कस्यापि शिक्षया ॥ स तत्फलमवाप्नोति शिवयोः प्रीतिकारणात् ॥ ३४ ॥

ya idaM kIrtayedbhaktyA yasya kasyApi zikSayA ॥ sa tatphalamavApnoti zivayoH prItikAraNAt ॥ 34 ॥

सकलभुवनभूतभावनाभ्यां जननविनाशविहीनविग्रहाभ्याम् ॥ नरवरयुवतीवपुर्धराभ्यां सततमहं प्रणतोस्मि शंकराभ्याम् ॥ ३५ ॥

sakalabhuvanabhUtabhAvanAbhyAM jananavinAzavihInavigrahAbhyAm ॥ naravarayuvatIvapurdharAbhyAM satatamahaM praNatosmi zaMkarAbhyAm ॥ 35 ॥