व्यास उवाच नमश्शिवाय सोमाय सगणाय ससूनवे ॥ प्रधानपुरुषेशाय सर्गस्थित्यंतहेतवे ॥ १ ॥

vyAsa uvAca namazzivAya somAya sagaNAya sasUnave ॥ pradhAnapuruSezAya sargasthityaMtahetave ॥ 1 ॥

शक्तिरप्रतिमा यस्य ह्यैश्वर्यं चापि सर्वगम् ॥ स्वामित्वं च विभुत्वं च स्वभावं संप्रचक्षते ॥ २ ॥

zaktirapratimA yasya hyaizvaryaM cApi sarvagam ॥ svAmitvaM ca vibhutvaM ca svabhAvaM saMpracakSate ॥ 2 ॥

तमजं विश्वकर्माणं शाश्वतं शिवमव्ययम् ॥ महादेवं महात्मानं व्रजामि शरणं शिवम् ॥ ३ ॥

tamajaM vizvakarmANaM zAzvataM zivamavyayam ॥ mahAdevaM mahAtmAnaM vrajAmi zaraNaM zivam ॥ 3 ॥

धर्मक्षेत्रे महातीर्थे गंगाकालिंदिसंगमे ॥ प्रयागे नैमिषारण्ये ब्रह्मलोकस्य वर्त्मनि ॥ ४ ॥

dharmakSetre mahAtIrthe gaMgAkAliMdisaMgame ॥ prayAge naimiSAraNye brahmalokasya vartmani ॥ 4 ॥

मुनयश्शंसितात्मानः सत्यव्रतपरायणाः ॥ महौजसो महाभागा महासत्रं वितेनिरे ॥ ५ ॥

munayazzaMsitAtmAnaH satyavrataparAyaNAH ॥ mahaujaso mahAbhAgA mahAsatraM vitenire ॥ 5 ॥

तत्र सत्रं समाकर्ण्य तेषामक्लिष्टकर्मणाम् ॥ साक्षात्सत्यवतीसूनोर्वेदव्यासस्य धीमतः ॥ ६ ॥

tatra satraM samAkarNya teSAmakliSTakarmaNAm ॥ sAkSAtsatyavatIsUnorvedavyAsasya dhImataH ॥ 6 ॥

शिष्यो महात्मा मेधावी त्रिषु लोकेषु विश्रुतः ॥ पञ्चावयवयुक्तस्य वाक्यस्य गुणदोषवित् ॥ ७ ॥

ziSyo mahAtmA medhAvI triSu lokeSu vizrutaH ॥ paJcAvayavayuktasya vAkyasya guNadoSavit ॥ 7 ॥

उत्तरोत्तरवक्ता च ब्रुवतो ऽपि बृहस्पतेः ॥ मधुरः श्रवणानां च मनोज्ञपदपर्वणाम् ॥ ८ ॥

uttarottaravaktA ca bruvato 'pi bRhaspateH ॥ madhuraH zravaNAnAM ca manojJapadaparvaNAm ॥ 8 ॥

कथानां निपुणो वक्ता कालविन्नयवित्कविः ॥ आजगाम स तं देशं सूतः पौराणिकोत्तमः ॥ ९ ॥

kathAnAM nipuNo vaktA kAlavinnayavitkaviH ॥ AjagAma sa taM dezaM sUtaH paurANikottamaH ॥ 9 ॥

तं दृष्ट्वा सूतमायांतं मुनयो हृष्टमानसाः ॥ तस्मै साम च पूजां च यथावत्प्रत्यपादयन् ॥ १० ॥

taM dRSTvA sUtamAyAMtaM munayo hRSTamAnasAH ॥ tasmai sAma ca pUjAM ca yathAvatpratyapAdayan ॥ 10 ॥

प्रतिगृह्य सतां पूजां मुनिभिः प्रतिपादिताम् ॥ उद्दिष्टमानसं भेजे नियुक्तो युक्तमात्मनः ॥ ११ ॥

pratigRhya satAM pUjAM munibhiH pratipAditAm ॥ uddiSTamAnasaM bheje niyukto yuktamAtmanaH ॥ 11 ॥

ततस्तत्संगमादेव मुनीनां भावितात्मनाम् ॥ सोत्कंठमभवच्चितं श्रोतुं पौराणिकीं कथाम् ॥ १२ ॥

tatastatsaMgamAdeva munInAM bhAvitAtmanAm ॥ sotkaMThamabhavaccitaM zrotuM paurANikIM kathAm ॥ 12 ॥

तदा तमनुकूलाभिर्वाग्भिः पूज्य १ महर्षयः ॥ अतीवाभिमुखं कृत्वा वचनं चेदमब्रुवन् ॥ १३ ॥

tadA tamanukUlAbhirvAgbhiH pUjya 1 maharSayaH ॥ atIvAbhimukhaM kRtvA vacanaM cedamabruvan ॥ 13 ॥

ऋषय ऊचुः रोमहर्षण सर्वज्ञ भवान्नो भाग्यगौरवात् ॥ संप्राप्तोद्य महाभाग शैवराज महामते ॥ १४ ॥

RSaya UcuH romaharSaNa sarvajJa bhavAnno bhAgyagauravAt ॥ saMprAptodya mahAbhAga zaivarAja mahAmate ॥ 14 ॥

पुराणविद्यामखिलां व्यासात्प्रत्यक्षमीयिवान् ॥ तस्मादाश्चर्यभूतानां कथानां त्वं हि भाजनम् ॥ १५ ॥

purANavidyAmakhilAM vyAsAtpratyakSamIyivAn ॥ tasmAdAzcaryabhUtAnAM kathAnAM tvaM hi bhAjanam ॥ 15 ॥

रत्नानामुरुसाराणां रत्नाकर इवार्णवः ॥ यच्च भूतं यच्च भव्यं यच्चान्यद्वस्तु वर्तते ॥ १६ ॥

ratnAnAmurusArANAM ratnAkara ivArNavaH ॥ yacca bhUtaM yacca bhavyaM yaccAnyadvastu vartate ॥ 16 ॥

न तवाविदितं किञ्चित्त्रिषु लोकेषु विद्यते ॥ त्वमदृष्टवशादस्मद्दर्शनार्थमिहागतः ॥ अकुर्वन्किमपि श्रेयो न वृथा गन्तुमर्हसि ॥ १७ ॥

na tavAviditaM kiJcittriSu lokeSu vidyate ॥ tvamadRSTavazAdasmaddarzanArthamihAgataH ॥ akurvankimapi zreyo na vRthA gantumarhasi ॥ 17 ॥

तस्माच्छ्राव्यतरं पुण्यं सत्कथाज्ञानसंहितम् ॥ वेदांतसारसर्वस्वं पुराणं श्रावयाशु नः ॥ १८ ॥

tasmAcchrAvyataraM puNyaM satkathAjJAnasaMhitam ॥ vedAMtasArasarvasvaM purANaM zrAvayAzu naH ॥ 18 ॥

एवमभ्यर्थितस्सूतो मुनिभिर्वेदवादिभिः ॥ श्लक्ष्णां च न्यायसंयुक्तां प्रत्युवाच शुभां गिरम् ॥ १९ ॥

evamabhyarthitassUto munibhirvedavAdibhiH ॥ zlakSNAM ca nyAyasaMyuktAM pratyuvAca zubhAM giram ॥ 19 ॥

सूत उवाच पूजितो ऽनुगृहीतश्च भवद्भिरिति चोदितः ॥ कस्मात्सम्यङ्न विब्रूयां पुराणमृषिपूजितम् ॥ २० ॥

sUta uvAca pUjito 'nugRhItazca bhavadbhiriti coditaH ॥ kasmAtsamyaGna vibrUyAM purANamRSipUjitam ॥ 20 ॥

अभिवंद्य महादेवं देवीं स्कंदं विनायकम् ॥ नंदिनं च तथा व्यासं साक्षात्सत्यवतीसुतम् ॥ २१ ॥

abhivaMdya mahAdevaM devIM skaMdaM vinAyakam ॥ naMdinaM ca tathA vyAsaM sAkSAtsatyavatIsutam ॥ 21 ॥

वक्ष्यामि परमं पुण्यं पुराणं वेदसंमितम् ॥ शिवज्ञानार्णवं साक्षाद्भक्तिमुक्तिफलप्रदम् ॥ २२ ॥

vakSyAmi paramaM puNyaM purANaM vedasaMmitam ॥ zivajJAnArNavaM sAkSAdbhaktimuktiphalapradam ॥ 22 ॥

शब्दार्थन्यायसंयुक्तै रागमार्थैर्विभूषितम् ॥ श्वेतकल्पप्रसंगेन वायुना कथितं पुरा ॥ २३ ॥

zabdArthanyAyasaMyuktai rAgamArthairvibhUSitam ॥ zvetakalpaprasaMgena vAyunA kathitaM purA ॥ 23 ॥

विद्यास्थानानि सर्वाणि पुराणानुक्रमं तथा ॥ तत्पुराणस्य चोत्पत्तिं ब्रुवतो मे निबोधत ॥ २४ ॥

vidyAsthAnAni sarvANi purANAnukramaM tathA ॥ tatpurANasya cotpattiM bruvato me nibodhata ॥ 24 ॥

अंगानि वेदाश्चत्वारो मीमांसान्यायविस्तरः ॥ पुराणं धर्मशास्त्रं च विद्याश्चेताश्चतुर्दश ॥ २५ ॥

aMgAni vedAzcatvAro mImAMsAnyAyavistaraH ॥ purANaM dharmazAstraM ca vidyAzcetAzcaturdaza ॥ 25 ॥

आयुर्वेदो धनुर्वेदो गांधर्वश्चेत्यनुक्रमात् ॥ अर्थशास्त्रं परं तस्माद्विद्या ह्यष्टादश स्मृताः ॥ २६ ॥

Ayurvedo dhanurvedo gAMdharvazcetyanukramAt ॥ arthazAstraM paraM tasmAdvidyA hyaSTAdaza smRtAH ॥ 26 ॥

अष्टादशानां विद्यानामेतासां भिन्नवर्त्मनाम् ॥ आदिकर्ता कविस्साक्षाच्छूलपाणिरिति श्रुतिः ॥ २७ ॥

aSTAdazAnAM vidyAnAmetAsAM bhinnavartmanAm ॥ AdikartA kavissAkSAcchUlapANiriti zrutiH ॥ 27 ॥

स हि सर्वजगन्नाथः सिसृक्षुरखिलं जगत् ॥ ब्रह्माणं विदधे साक्षात्पुत्रमग्रे सनातनम् ॥ २८ ॥

sa hi sarvajagannAthaH sisRkSurakhilaM jagat ॥ brahmANaM vidadhe sAkSAtputramagre sanAtanam ॥ 28 ॥

तस्मै प्रथमपुत्राय ब्रह्मणे विश्वयोनये ॥ विद्याश्चेमा ददौ पूर्वं विश्वसृष्ट्यर्थमीश्वरः ॥ २९ ॥

tasmai prathamaputrAya brahmaNe vizvayonaye ॥ vidyAzcemA dadau pUrvaM vizvasRSTyarthamIzvaraH ॥ 29 ॥

पालनाय हरिं देवं रक्षाशक्तिं ददौ ततः ॥ मध्यमं तनयं विष्णुं पातारं ब्रह्मणो ऽपि हि ॥ ३० ॥

pAlanAya hariM devaM rakSAzaktiM dadau tataH ॥ madhyamaM tanayaM viSNuM pAtAraM brahmaNo 'pi hi ॥ 30 ॥

लब्धविद्येन विधिना प्रजासृष्टिं वितन्वता ॥ प्रथमं सर्वशास्त्राणां पुराणं ब्रह्मणा स्मृतम्॥ ३१ ॥

labdhavidyena vidhinA prajAsRSTiM vitanvatA ॥ prathamaM sarvazAstrANAM purANaM brahmaNA smRtam॥ 31 ॥

अनंतरं तु वक्त्रेभ्यो वेदास्तस्य विनिर्गताः ॥ प्रवृत्तिस्सर्वशास्त्राणां तन्मुखादभवत्ततः ॥ ३२ ॥

anaMtaraM tu vaktrebhyo vedAstasya vinirgatAH ॥ pravRttissarvazAstrANAM tanmukhAdabhavattataH ॥ 32 ॥

यदास्य विस्तरं शक्ता नाधिगंतुं प्रजा भुवि ॥ तदा विद्यासमासार्थं विश्वेश्वरनियोगतः ॥ ३३ ॥

yadAsya vistaraM zaktA nAdhigaMtuM prajA bhuvi ॥ tadA vidyAsamAsArthaM vizvezvaraniyogataH ॥ 33 ॥

द्वापरांतेषु विश्वात्मा विष्णुर्विश्वंभरः प्रभुः ॥ व्यासनाम्ना चरत्यस्मिन्नवतीर्य महीतले ॥ ३४ ॥

dvAparAMteSu vizvAtmA viSNurvizvaMbharaH prabhuH ॥ vyAsanAmnA caratyasminnavatIrya mahItale ॥ 34 ॥

एवं व्यस्ताश्च वेदाश्च द्वापरेद्वापरे द्विजाः ॥ निर्मितानि पुराणानि अन्यानि च ततः परम् ॥ ३५ ॥

evaM vyastAzca vedAzca dvAparedvApare dvijAH ॥ nirmitAni purANAni anyAni ca tataH param ॥ 35 ॥

स पुनर्द्वापरे चास्मिन्कृष्णद्वैपायनाख्यया ॥ अरण्यामिव हव्याशी सत्यवत्यामजायत ॥ ३६ ॥

sa punardvApare cAsminkRSNadvaipAyanAkhyayA ॥ araNyAmiva havyAzI satyavatyAmajAyata ॥ 36 ॥

संक्षिप्य स पुनर्वेदांश्चतुर्धा कृतवान्मुनिः ॥ व्यस्तवेदतया लोके वेदव्यास इति श्रुतः ॥ ३७ ॥

saMkSipya sa punarvedAMzcaturdhA kRtavAnmuniH ॥ vyastavedatayA loke vedavyAsa iti zrutaH ॥ 37 ॥

पुराणानाञ्च संक्षिप्तं चतुर्लक्षप्रमाणतः ॥ अद्यापि देवलोके तच्छतकोटिप्रविस्तरम् ॥ ३८ ॥

purANAnAJca saMkSiptaM caturlakSapramANataH ॥ adyApi devaloke tacchatakoTipravistaram ॥ 38 ॥

यो विद्याच्चतुरो वेदान् सांगोपणिषदान्द्विजः ॥ न चेत्पुराणं संविद्यान्नैव स स्याद्विचक्षणः ॥ ३९ ॥

yo vidyAccaturo vedAn sAMgopaNiSadAndvijaH ॥ na cetpurANaM saMvidyAnnaiva sa syAdvicakSaNaH ॥ 39 ॥

इतिहासपुराणाभ्यां वेदं समुपबृंहयेत् ॥ बिभेत्यल्पश्रुताद्वेदो मामयं प्रतरिष्यति ॥ ४० ॥

itihAsapurANAbhyAM vedaM samupabRMhayet ॥ bibhetyalpazrutAdvedo mAmayaM pratariSyati ॥ 40 ॥

सर्गश्च प्रतिसर्गश्च वंशो मन्वंतराणि च ॥ वंशानुचरितं चैव पुराणं पञ्चलक्षणम् ॥ ४१ ॥

sargazca pratisargazca vaMzo manvaMtarANi ca ॥ vaMzAnucaritaM caiva purANaM paJcalakSaNam ॥ 41 ॥

दशधा चाष्टधा चैतत्पुराणमुपदिश्यते ॥ बृहत्सूक्ष्मप्रभेदेन मुनिभिस्तत्त्ववित्तमैः ॥ ४२ ॥

dazadhA cASTadhA caitatpurANamupadizyate ॥ bRhatsUkSmaprabhedena munibhistattvavittamaiH ॥ 42 ॥

ब्राह्मं पाद्मं वैष्णवं च शैवं भागवतं तथा ॥ भविष्यं नारदीयं च मार्कंडेयमतः परम् ॥ ४३ ॥

brAhmaM pAdmaM vaiSNavaM ca zaivaM bhAgavataM tathA ॥ bhaviSyaM nAradIyaM ca mArkaMDeyamataH param ॥ 43 ॥

आग्नेयं ब्रह्मवैवर्तं लैंगं वाराहमेव च ॥ स्कान्दं च वामनं चैव कौर्म्यं मात्स्यं च गारुडम् ॥ ४४ ॥

AgneyaM brahmavaivartaM laiMgaM vArAhameva ca ॥ skAndaM ca vAmanaM caiva kaurmyaM mAtsyaM ca gAruDam ॥ 44 ॥

ब्रह्मांडं चेति पुण्यो ऽयं पुराणानामनुक्रमः ॥ तत्र शैवं तुरीयं यच्छार्वं सर्वार्थसाधकम् ॥ ४५ ॥

brahmAMDaM ceti puNyo 'yaM purANAnAmanukramaH ॥ tatra zaivaM turIyaM yacchArvaM sarvArthasAdhakam ॥ 45 ॥

ग्रंथो लक्षप्रमाणं तद्व्यस्तं द्वादशसंहितम् ॥ निर्मितं तच्छिवेनैव तत्र धर्मः प्रतिष्ठितः ॥ ४६ ॥

graMtho lakSapramANaM tadvyastaM dvAdazasaMhitam ॥ nirmitaM tacchivenaiva tatra dharmaH pratiSThitaH ॥ 46 ॥

तदुक्तेनैव धर्मेण शैवास्त्रैवर्णिका नराः ॥ तस्माद्विमुकुतिमन्विच्छञ्च्छिवमेव समाश्रयेत् ॥ ४७ ॥

taduktenaiva dharmeNa zaivAstraivarNikA narAH ॥ tasmAdvimukutimanvicchaJcchivameva samAzrayet ॥ 47 ॥

तमाश्रित्यैव देवानामपि मुक्तिर्न चान्यथा ॥ ४८ ॥

tamAzrityaiva devAnAmapi muktirna cAnyathA ॥ 48 ॥

यदिदं शैवमाख्यातं पुराणं वेदसंमितम् ॥ तस्य भेदान्समासेन ब्रुवतो मे निबोधत ॥ ४९ ॥

yadidaM zaivamAkhyAtaM purANaM vedasaMmitam ॥ tasya bhedAnsamAsena bruvato me nibodhata ॥ 49 ॥

विद्येश्वरं तथा रौद्रं वैनायकमनुत्तमम् ॥ औमं मातृपुराणं च रुद्रैकादशकं तथा ॥ ५० ॥

vidyezvaraM tathA raudraM vainAyakamanuttamam ॥ aumaM mAtRpurANaM ca rudraikAdazakaM tathA ॥ 50 ॥

कैलासं शतरुद्रं च शतरुद्राख्यमेव च ॥ सहस्रकोटिरुद्राख्यं वायवीयं ततःपरम् ॥ ५१ ॥

kailAsaM zatarudraM ca zatarudrAkhyameva ca ॥ sahasrakoTirudrAkhyaM vAyavIyaM tataHparam ॥ 51 ॥

धर्मसंज्ञं पुराणं चेत्येवं द्वादश संहिताः ॥ विद्येशं दशसाहस्रमुदितं ग्रंथसंख्यया ॥ ५२ ॥

dharmasaMjJaM purANaM cetyevaM dvAdaza saMhitAH ॥ vidyezaM dazasAhasramuditaM graMthasaMkhyayA ॥ 52 ॥

रौद्रं वैनायकं चौमं मातृकाख्यं ततः परम् ॥ प्रत्येकमष्टसाहस्रं त्रयोदशसहस्रकम् ॥ ५३ ॥

raudraM vainAyakaM caumaM mAtRkAkhyaM tataH param ॥ pratyekamaSTasAhasraM trayodazasahasrakam ॥ 53 ॥

रौद्रकादशकाख्यं यत्कैलासं षट्सहस्रकम् ॥ शतरुद्रं त्रिसाहस्रं कोटिरुद्रं ततः परम् ॥ ५४ ॥

raudrakAdazakAkhyaM yatkailAsaM SaTsahasrakam ॥ zatarudraM trisAhasraM koTirudraM tataH param ॥ 54 ॥

सहस्रैर्नवभिर्युक्तं सर्वार्थज्ञानसंयुतम् ॥ सहस्रकोटिरुद्राख्यमेकादशसहस्रकम् ॥ ५५ ॥

sahasrairnavabhiryuktaM sarvArthajJAnasaMyutam ॥ sahasrakoTirudrAkhyamekAdazasahasrakam ॥ 55 ॥

चतुस्सहस्रसंख्येयं वायवीयमनुत्तमम् ॥ धर्मसंज्ञं पुराणं यत्तद्द्वादशसहस्रकम् ॥ ५६ ॥

catussahasrasaMkhyeyaM vAyavIyamanuttamam ॥ dharmasaMjJaM purANaM yattaddvAdazasahasrakam ॥ 56 ॥

तदेवं लक्षमुद्दिष्टं शैवं शाखाविभेदतः ॥ पुराणं वेदसारं तद्भुक्तिमुक्तिफलप्रदम् ॥ ५७ ॥

tadevaM lakSamuddiSTaM zaivaM zAkhAvibhedataH ॥ purANaM vedasAraM tadbhuktimuktiphalapradam ॥ 57 ॥

व्यासेन तत्तु संक्षिप्तं चतुर्विंशत्सहस्रकम् ॥ शैवन्तत्र पुराणं वै चतुर्थं सप्तसंहितम् ॥ ५८ ॥

vyAsena tattu saMkSiptaM caturviMzatsahasrakam ॥ zaivantatra purANaM vai caturthaM saptasaMhitam ॥ 58 ॥

विद्येश्वराख्या तत्राद्या द्वितीया रुद्रसंहिता ॥ तृतीया शतरुद्राख्या कोटिरुद्रा चतुर्थिका ॥ ५९ ॥

vidyezvarAkhyA tatrAdyA dvitIyA rudrasaMhitA ॥ tRtIyA zatarudrAkhyA koTirudrA caturthikA ॥ 59 ॥

पञ्चमी कथिता चोमा षष्ठी कैलाससंहिता ॥ सप्तमी वायवीयाख्या सप्तैवं संहिता इह ॥ ६० ॥

paJcamI kathitA comA SaSThI kailAsasaMhitA ॥ saptamI vAyavIyAkhyA saptaivaM saMhitA iha ॥ 60 ॥

विद्येश्वरं द्विसाहस्रं रौद्रं पञ्चशतायुतम् ॥ त्रिंशत्तथा द्विसाहस्रं सार्धैकशतमीरितम् ॥ ६१ ॥

vidyezvaraM dvisAhasraM raudraM paJcazatAyutam ॥ triMzattathA dvisAhasraM sArdhaikazatamIritam ॥ 61 ॥

शतरुद्रन्तथा कोटिरुद्रं व्योमयुगाधिकम् ॥ द्विसाहस्रं च द्विशतं तथोमं भूसहस्रकम् ॥ ६२ ॥

zatarudrantathA koTirudraM vyomayugAdhikam ॥ dvisAhasraM ca dvizataM tathomaM bhUsahasrakam ॥ 62 ॥

चत्वारिंशत्साष्टशतं कैलासं भूसहस्रकम् ॥ चत्वारिंशच्च द्विशतं वायवीयमतः परम् ॥ ६३ ॥

catvAriMzatsASTazataM kailAsaM bhUsahasrakam ॥ catvAriMzacca dvizataM vAyavIyamataH param ॥ 63 ॥

चतुस्साहस्रसंख्याकमेवं संख्याविभेदतः ॥ श्रुतम्परमपुण्यन्तु पुराणं शिवसंज्ञकम् ॥ ६४ ॥

catussAhasrasaMkhyAkamevaM saMkhyAvibhedataH ॥ zrutamparamapuNyantu purANaM zivasaMjJakam ॥ 64 ॥

चतुःसाहस्रकं यत्तु वायवीयमुदीरितम् ॥ तदिदं वर्तयिष्यामि भागद्वयसमन्वितम् ॥ ६५ ॥

catuHsAhasrakaM yattu vAyavIyamudIritam ॥ tadidaM vartayiSyAmi bhAgadvayasamanvitam ॥ 65 ॥

नावेदविदुषे वाच्यमिदं शास्त्रमनुत्तमम् ॥ न चैवाश्रद्धधानाय नापुराणविदे तथा ॥ ६६ ॥

nAvedaviduSe vAcyamidaM zAstramanuttamam ॥ na caivAzraddhadhAnAya nApurANavide tathA ॥ 66 ॥

परीक्षिताय शिष्याय धार्मिकायानसूयवे ॥ प्रदेयं शिवभक्ताय शिवधर्मानुसारिणे ॥ ६७ ॥

parIkSitAya ziSyAya dhArmikAyAnasUyave ॥ pradeyaM zivabhaktAya zivadharmAnusAriNe ॥ 67 ॥

पुराणसंहिता यस्य प्रसादान्मयि वर्तते ॥ नमो भगवते तस्मै व्यासायामिततेजसे ॥ ६८ ॥

purANasaMhitA yasya prasAdAnmayi vartate ॥ namo bhagavate tasmai vyAsAyAmitatejase ॥ 68 ॥