मुनय ऊचुः ॥ व्यासशिष्य महाभाग सूत पौराणिकोत्तम ॥ अपरं श्रोतुमिच्छामः किमप्याख्यानमीशितुः॥ १॥

munaya UcuH ॥ vyAsaziSya mahAbhAga sUta paurANikottama ॥ aparaM zrotumicchAmaH kimapyAkhyAnamIzituH॥ 1॥

उमाया जगदम्बायाः क्रियायोगमनुत्तमम् ॥ प्रोक्तं सनत्कुमारेण व्यासाय च महात्मने ॥ २ ॥

umAyA jagadambAyAH kriyAyogamanuttamam ॥ proktaM sanatkumAreNa vyAsAya ca mahAtmane ॥ 2 ॥

सूत उवाच ॥ धन्या यूयं महात्मानो देवीभक्तिदृढव्रताः ॥ पराशक्तेः परं गुप्तं रहस्यं शृणुतादरात् ॥ ३ ॥

sUta uvAca ॥ dhanyA yUyaM mahAtmAno devIbhaktidRDhavratAH ॥ parAzakteH paraM guptaM rahasyaM zRNutAdarAt ॥ 3 ॥

व्यास उवाच ॥ सनत्कुमार सर्वज्ञ ब्रह्मपुत्र महामते ॥ उमायाश्श्रोतुमिच्छामि क्रियायोगं महाद्भुतम् ॥ ४ ॥

vyAsa uvAca ॥ sanatkumAra sarvajJa brahmaputra mahAmate ॥ umAyAzzrotumicchAmi kriyAyogaM mahAdbhutam ॥ 4 ॥

कीदृक्च लक्षणं तस्य किं कृते च फलं भवेत् ॥ प्रियं यच्च पराम्बायास्तदशेषं वदस्व मे ॥ ५ ॥

kIdRkca lakSaNaM tasya kiM kRte ca phalaM bhavet ॥ priyaM yacca parAmbAyAstadazeSaM vadasva me ॥ 5 ॥

सनत्कुमार उवाच ॥ द्वैपायन यदेतत्त्वं रहस्यं परिपृच्छसि ॥ तच्छृणुष्व महाबुद्धे सर्वं मे वर्णयिष्यतः ॥ ६ ॥

sanatkumAra uvAca ॥ dvaipAyana yadetattvaM rahasyaM paripRcchasi ॥ tacchRNuSva mahAbuddhe sarvaM me varNayiSyataH ॥ 6 ॥

ज्ञानयोगः क्रियायोगो भक्तियोगस्तथैव च ॥ त्रयो मार्गास्समाख्याताः श्रीमातुर्मुक्तिमुक्तिदा ॥ ७ ॥

jJAnayogaH kriyAyogo bhaktiyogastathaiva ca ॥ trayo mArgAssamAkhyAtAH zrImAturmuktimuktidA ॥ 7 ॥

ज्ञानयोगस्तु संयोगश्चित्तस्यैवात्मना तु यः ॥ यस्तु बाह्यार्थसंयोगः क्रियायोगः स उच्यते ॥ ८ ॥

jJAnayogastu saMyogazcittasyaivAtmanA tu yaH ॥ yastu bAhyArthasaMyogaH kriyAyogaH sa ucyate ॥ 8 ॥

भक्तियोगो मतो देव्या आत्मनश्चैक्यभावनम् ॥ त्रयाणामपि योगानां क्रियायोगस्स उच्यते ॥ ९ ॥

bhaktiyogo mato devyA AtmanazcaikyabhAvanam ॥ trayANAmapi yogAnAM kriyAyogassa ucyate ॥ 9 ॥

कर्मणा जायते भक्तिर्भक्त्या ज्ञानं प्रजायते ॥ ज्ञानात्प्रजायते मुक्तिरिति शास्त्रेषु निश्चयः॥ १०॥

karmaNA jAyate bhaktirbhaktyA jJAnaM prajAyate ॥ jJAnAtprajAyate muktiriti zAstreSu nizcayaH॥ 10॥

प्रधानं कारणं योगो विमुक्तेर्मुनिसत्तम ॥ क्रियायोगस्तु योगस्य परमन्ध्येयसाधनम् ॥ ११॥

pradhAnaM kAraNaM yogo vimuktermunisattama ॥ kriyAyogastu yogasya paramandhyeyasAdhanam ॥ 11॥

मायान्तु प्रकृतिं विद्यान्मायावि ब्रह्म शाश्वतम् ॥ अभिन्नं तद्वपुर्ज्ञात्वा मुच्यते भवबन्धनात् ॥ १२ ॥

mAyAntu prakRtiM vidyAnmAyAvi brahma zAzvatam ॥ abhinnaM tadvapurjJAtvA mucyate bhavabandhanAt ॥ 12 ॥

यस्तु देव्यालयं कुर्यात्पाषाणन्दारवन्तथा ॥ मृन्मयं वाथ कालेय तस्य पुण्यफलं शृणु ॥ अहन्यहनियोगेन जयतो यन्महाफलम्॥ १३॥

yastu devyAlayaM kuryAtpASANandAravantathA ॥ mRnmayaM vAtha kAleya tasya puNyaphalaM zRNu ॥ ahanyahaniyogena jayato yanmahAphalam॥ 13॥

प्राप्नोति तत्फलन्देव्या यः कारयति मन्दिरम्॥ सहस्रकुलमागामि व्यतीतं च सहस्रकम् ॥ तारयति धर्मात्मा श्रीमातुर्धाम कारयन् ॥ १४॥

prApnoti tatphalandevyA yaH kArayati mandiram॥ sahasrakulamAgAmi vyatItaM ca sahasrakam ॥ tArayati dharmAtmA zrImAturdhAma kArayan ॥ 14॥

कोटिजन्मकृतं पापं स्वल्पं वा यदि वा बहु ॥ श्रीमातुर्मन्दिरारम्भक्षणादेव प्रणश्यति ॥ १५ ॥

koTijanmakRtaM pApaM svalpaM vA yadi vA bahu ॥ zrImAturmandirArambhakSaNAdeva praNazyati ॥ 15 ॥

नदीषु च यथा गंगा शोणः सर्वनदेषु च ॥ क्षमायां च यथा पृथ्वी गांभीर्ये च यथोदधिः ॥ १६॥

nadISu ca yathA gaMgA zoNaH sarvanadeSu ca ॥ kSamAyAM ca yathA pRthvI gAMbhIrye ca yathodadhiH ॥ 16॥

ग्रहाणां च समस्तानां यथा सूर्यो विशिष्यते॥। तथा सर्वेषु देवेषु श्रीपराम्बा विशिष्यते ॥ १७ ॥

grahANAM ca samastAnAM yathA sUryo viziSyate॥। tathA sarveSu deveSu zrIparAmbA viziSyate ॥ 17 ॥

सर्वदेवेषु सा मुख्या यस्तस्याः कारयेद्गृहम् ॥ प्रतिष्ठां समवाप्नोति स च जन्म निजन्मनि ॥ १८ ॥

sarvadeveSu sA mukhyA yastasyAH kArayedgRham ॥ pratiSThAM samavApnoti sa ca janma nijanmani ॥ 18 ॥

वाराणस्यां कुरुक्षेत्रे प्रयागे पुष्करे तथा ॥ गंगासमुद्रतीरे च नैमिषेऽमरकण्टके ॥ १९ ॥

vArANasyAM kurukSetre prayAge puSkare tathA ॥ gaMgAsamudratIre ca naimiSe'marakaNTake ॥ 19 ॥

श्रीपर्वते महापुण्ये गोकर्णे ज्ञानपर्वते ॥ मथुरायामयोध्यायां द्वारावत्यां तथैव च ॥ २० ॥

zrIparvate mahApuNye gokarNe jJAnaparvate ॥ mathurAyAmayodhyAyAM dvArAvatyAM tathaiva ca ॥ 20 ॥

इत्यादि पुण्यदेशेषु यत्र कुत्र स्थलेऽपि वा ॥ कारयन्मातुरावासं मुक्तो भवति बन्धनात् ॥ २१ ॥

ityAdi puNyadezeSu yatra kutra sthale'pi vA ॥ kArayanmAturAvAsaM mukto bhavati bandhanAt ॥ 21 ॥

इष्टकानां तु विन्यासो यावद्वर्षाणि तिष्ठति ॥ तावद्वर्षसहस्राणि मणिद्वीपे महीयते ॥ २२ ॥

iSTakAnAM tu vinyAso yAvadvarSANi tiSThati ॥ tAvadvarSasahasrANi maNidvIpe mahIyate ॥ 22 ॥

प्रतिमाः कारयेद्यस्तु सर्वलक्षणलक्षिताः ॥ स उमायाः परं लोकं निर्भयो व्रजति धुवम् ॥ २३ ॥

pratimAH kArayedyastu sarvalakSaNalakSitAH ॥ sa umAyAH paraM lokaM nirbhayo vrajati dhuvam ॥ 23 ॥

देवीमूर्तिं प्रतिष्ठाप्य शुभर्तुं ग्रहतारके ॥ कृतकृत्यो भवेन्मर्त्यो योगमायाप्रसादतः ॥ २४ ॥

devImUrtiM pratiSThApya zubhartuM grahatArake ॥ kRtakRtyo bhavenmartyo yogamAyAprasAdataH ॥ 24 ॥

ये भविष्यन्ति येऽतीता आकल्पात्पुरुषाः कुले ॥ तांस्तांस्तारयते देव्या मूर्तिं संस्थाप्य शोभनाम् ॥ २५ ॥

ye bhaviSyanti ye'tItA AkalpAtpuruSAH kule ॥ tAMstAMstArayate devyA mUrtiM saMsthApya zobhanAm ॥ 25 ॥

त्रिलोकीस्थापनात्पुण्यं यद्भवेन्मुनिपुंगव ॥ तत्कोटिगुणितं पुण्यं श्रीदेवीस्थापनाद्भवेत् ॥ २६॥

trilokIsthApanAtpuNyaM yadbhavenmunipuMgava ॥ tatkoTiguNitaM puNyaM zrIdevIsthApanAdbhavet ॥ 26॥

मध्ये देवीं स्थापयित्वा पञ्चायतनदेवताः ॥ चतुर्द्दिक्षु स्थापयेद्यस्तस्य पुण्यं न गण्यते ॥ २७॥

madhye devIM sthApayitvA paJcAyatanadevatAH ॥ caturddikSu sthApayedyastasya puNyaM na gaNyate ॥ 27॥

विष्णोर्नाम्नां कोटिजपाद्ग्रहणेचन्द्रसूर्ययोः ॥ यत्फलं लभ्यते तस्माच्छतकोटिगुणोत्तरम् ॥ २८॥

viSNornAmnAM koTijapAdgrahaNecandrasUryayoH ॥ yatphalaM labhyate tasmAcchatakoTiguNottaram ॥ 28॥

शिवनाम्नो जपादेव तस्मात्कोटि गुणोत्तरम् ॥ श्रीदेवीनामजापात्तु ततः कोटिगुणोत्तरम् ॥ २९॥

zivanAmno japAdeva tasmAtkoTi guNottaram ॥ zrIdevInAmajApAttu tataH koTiguNottaram ॥ 29॥

देव्याः प्रासादकरणात्पुण्यन्तु समवाप्यते ॥ स्थापिता येन सा देवी जगन्माता त्रयीमयी ॥ ३०॥

devyAH prAsAdakaraNAtpuNyantu samavApyate ॥ sthApitA yena sA devI jaganmAtA trayImayI ॥ 30॥

न तस्य दुर्लभं किंचिच्छ्रीमातुः करुणावशात् ॥ वर्द्धते पुत्रपौत्राद्या नश्यत्यखिलकश्मलम् ॥ ३१॥

na tasya durlabhaM kiMcicchrImAtuH karuNAvazAt ॥ varddhate putrapautrAdyA nazyatyakhilakazmalam ॥ 31॥

मनसा ये चिकीर्षंति मूर्तिस्थापनमुत्तमम् ॥ तेत्युमायाः परं लोकं प्रयान्ति मुनिदुर्लभम् ॥ ३२॥

manasA ye cikIrSaMti mUrtisthApanamuttamam ॥ tetyumAyAH paraM lokaM prayAnti munidurlabham ॥ 32॥

क्रियमाणन्तु यः प्रेक्ष्य चेतसा ह्यनुचिन्तयेत् ॥ कारयिष्याम्यहं यर्हि संपन्मे संभविष्यति ॥ ३३॥

kriyamANantu yaH prekSya cetasA hyanucintayet ॥ kArayiSyAmyahaM yarhi saMpanme saMbhaviSyati ॥ 33॥

एवन्तस्य कुलं सद्यो याति स्वर्गं न संशयः ॥ महामायाप्रभावेण दुर्लभं किं जगत्त्रये ॥ ३४॥

evantasya kulaM sadyo yAti svargaM na saMzayaH ॥ mahAmAyAprabhAveNa durlabhaM kiM jagattraye ॥ 34॥

श्रीपराम्बाजगद्योनिं केवलं ये समाश्रिताः ॥ ते मनुष्या न मन्तव्यास्साक्षाद्देवीगणाश्च ते ॥ ३५॥

zrIparAmbAjagadyoniM kevalaM ye samAzritAH ॥ te manuSyA na mantavyAssAkSAddevIgaNAzca te ॥ 35॥

ये व्रजन्तः स्वपन्तश्च तिष्ठन्तो वाप्यहर्निशम् ॥ उमेति द्व्यक्षरं नाम ब्रुवते ते शिवागणाः ॥ ३६॥

ye vrajantaH svapantazca tiSThanto vApyaharnizam ॥ umeti dvyakSaraM nAma bruvate te zivAgaNAH ॥ 36॥

नित्ये नैमित्तिके देवीं ये यजन्ति परां शिवाम्॥ पुष्पैर्धूपैस्तथादीपैस्ते प्रयास्यन्त्युमालयम् ॥ ३७॥

nitye naimittike devIM ye yajanti parAM zivAm॥ puSpairdhUpaistathAdIpaiste prayAsyantyumAlayam ॥ 37॥

ये देवीमण्डपं नित्यं गोमयेन मृदाथवा ॥ उपलिंपन्ति मार्जन्ति ते प्रयास्यन्त्युमालयम् ॥ ३८॥

ye devImaNDapaM nityaM gomayena mRdAthavA ॥ upaliMpanti mArjanti te prayAsyantyumAlayam ॥ 38॥

यैर्देव्या मन्दिरं रम्यं निर्मापि तमनुत्तमम् ॥ तत्कुलीनाञ्जनान्माता ह्याशिषः संप्रयच्छति ॥ ३९॥

yairdevyA mandiraM ramyaM nirmApi tamanuttamam ॥ tatkulInAJjanAnmAtA hyAziSaH saMprayacchati ॥ 39॥

मदीयाः शतवर्षाणि जीवन्तु प्रेमभाग्जनाः॥ नापदामयनानीत्थं श्रीमाता वक्त्यहर्निशम्॥ ४०॥

madIyAH zatavarSANi jIvantu premabhAgjanAH॥ nApadAmayanAnItthaM zrImAtA vaktyaharnizam॥ 40॥

येन मूर्तिर्म्महादेब्या उमायाः कारिता शुभा॥ नरायुतन्तत्कुलजं मणिद्वीपे महीयते॥ ४१॥

yena mUrtirmmahAdebyA umAyAH kAritA zubhA॥ narAyutantatkulajaM maNidvIpe mahIyate॥ 41॥

स्थापयित्वा महामायामूर्तिं सम्यक्प्रपूज्य च॥ यंयं प्रार्थयते कामं तंतं प्राप्नोति साधकः ॥ ४२॥

sthApayitvA mahAmAyAmUrtiM samyakprapUjya ca॥ yaMyaM prArthayate kAmaM taMtaM prApnoti sAdhakaH ॥ 42॥

यः स्नापयति श्रीमातुः स्थापितां मूर्तिमुत्तमाम् ॥ घृतेन मधुनाक्तेन तत्फलं गणयेत्तु कः॥ ४३॥

yaH snApayati zrImAtuH sthApitAM mUrtimuttamAm ॥ ghRtena madhunAktena tatphalaM gaNayettu kaH॥ 43॥

चन्दनागुरुकर्पूर मांसीमुस्तादियुग्जलैः ॥ एकवर्णगवां क्षीरैः स्नापयेत्परमेश्वरीम्॥ ४४॥

candanAgurukarpUra mAMsImustAdiyugjalaiH ॥ ekavarNagavAM kSIraiH snApayetparamezvarIm॥ 44॥

धूपेनाष्टादशांगेन दद्यादाहुतिमुत्तमाम् ॥ नीराजनं चरेद्देव्या स्साज्यकर्पूरवर्तिभिः ॥ ४५ ॥

dhUpenASTAdazAMgena dadyAdAhutimuttamAm ॥ nIrAjanaM careddevyA ssAjyakarpUravartibhiH ॥ 45 ॥

कृष्णाष्टम्यां नवम्यां वामायां वा पंचदिक्तिथौ ॥ पूजयेज्जगतां धात्रीं गंधपुष्पैर्विशेषतः ॥ ४६ ॥

kRSNASTamyAM navamyAM vAmAyAM vA paMcadiktithau ॥ pUjayejjagatAM dhAtrIM gaMdhapuSpairvizeSataH ॥ 46 ॥

संपठञ्जननीसूक्तं श्रीसूक्तमथ वा पठन्॥ देवीसूक्तमथो वापि मूकमन्त्रमथापि वा ॥ ४७॥

saMpaThaJjananIsUktaM zrIsUktamatha vA paThan॥ devIsUktamatho vApi mUkamantramathApi vA ॥ 47॥

विष्णुक्रान्तां च तुलसीं वर्जयित्वाखिलं सुमम् ॥ देवीप्रीतिकरं ज्ञेयं कमलन्तु विशेषतः ॥ ४८॥

viSNukrAntAM ca tulasIM varjayitvAkhilaM sumam ॥ devIprItikaraM jJeyaM kamalantu vizeSataH ॥ 48॥

अर्पयेत्स्वर्णपुष्पं यो देव्यै राजतमेव वा ॥ स याति परमं धाम सिद्धकोटि भिरन्वितम् ॥ ४९॥

arpayetsvarNapuSpaM yo devyai rAjatameva vA ॥ sa yAti paramaM dhAma siddhakoTi bhiranvitam ॥ 49॥

पूजनान्ते सदा कार्यं दासैरेनः क्षमापनम्॥ प्रसीद परमेशानि जगदानन्ददायिनि॥ ५०॥

pUjanAnte sadA kAryaM dAsairenaH kSamApanam॥ prasIda paramezAni jagadAnandadAyini॥ 50॥

इति वाक्यैस्स्तुवन्मन्त्री देवीभक्तिपरायणः ॥ ध्यायेत्कण्ठीरवारूढां वरदाभयपाणिकाम् ॥ ५१॥

iti vAkyaisstuvanmantrI devIbhaktiparAyaNaH ॥ dhyAyetkaNThIravArUDhAM varadAbhayapANikAm ॥ 51॥

इत्थं ध्यात्वा महेशानीं भक्ताभीष्टफलप्रदाम् ॥ नानाफलानि पक्वानि नैवेद्यत्वे प्रकल्पयेत् ॥ ५२॥

itthaM dhyAtvA mahezAnIM bhaktAbhISTaphalapradAm ॥ nAnAphalAni pakvAni naivedyatve prakalpayet ॥ 52॥

नैवेद्यं भक्षयेद्यस्तु शंभुशक्तेः परात्मनः ॥ स निर्भूयाखिलं पङ्कं निर्मलो मानवो भवेत् ॥ ५३॥

naivedyaM bhakSayedyastu zaMbhuzakteH parAtmanaH ॥ sa nirbhUyAkhilaM paGkaM nirmalo mAnavo bhavet ॥ 53॥

चैत्रशुक्लतृतीयायां यो भवानीव्रतं चरेत् ॥ भववन्धननिर्मुक्तः प्राप्नुयात्परमं पदम् ॥ ५४ ॥

caitrazuklatRtIyAyAM yo bhavAnIvrataM caret ॥ bhavavandhananirmuktaH prApnuyAtparamaM padam ॥ 54 ॥

अस्यामेव तृतीयायां कुर्याद्दोलोत्सवं बुधः ॥ पूजयेज्जगतां धात्रीमुमां शंकरसंयुताम्॥ ५५॥

asyAmeva tRtIyAyAM kuryAddolotsavaM budhaH ॥ pUjayejjagatAM dhAtrImumAM zaMkarasaMyutAm॥ 55॥

कुसुमैः कुंकुमैर्वस्त्रैः कर्पूरागुरुचन्दनैः ॥ धूपैर्द्दीपैस्सनैवेद्यैः स्रग्गन्धैरपरैरपि॥ ५६ ॥

kusumaiH kuMkumairvastraiH karpUrAgurucandanaiH ॥ dhUpairddIpaissanaivedyaiH sraggandhairaparairapi॥ 56 ॥

आन्दोलयेत्ततो देवीं महामायां महेश्वरीम् ॥ श्रीगौरीं शिवसंयुक्तां सर्वकल्याणकारिणीम् ॥ ५७ ॥

Andolayettato devIM mahAmAyAM mahezvarIm ॥ zrIgaurIM zivasaMyuktAM sarvakalyANakAriNIm ॥ 57 ॥

प्रत्यब्दं कुरुते योस्यां बतमान्दोलनं तथा ॥ नियमेन शिवा तस्मै सर्वमिष्टं प्रयच्छति ॥ ५८ ॥

pratyabdaM kurute yosyAM batamAndolanaM tathA ॥ niyamena zivA tasmai sarvamiSTaM prayacchati ॥ 58 ॥

माधवस्य सिते पक्षे तृतीया याऽक्षयाभिधा॥ तस्यां यो जगदम्बाया व्रतं कुर्यादतन्द्रितः॥ ५९॥

mAdhavasya site pakSe tRtIyA yA'kSayAbhidhA॥ tasyAM yo jagadambAyA vrataM kuryAdatandritaH॥ 59॥

मल्लिकामालतीचंपाजपाबन्धूकपंकजैः॥ कुसुमैः पूजयेद्गौरीं शंकरेण समन्विताम् ॥ ६० ॥

mallikAmAlatIcaMpAjapAbandhUkapaMkajaiH॥ kusumaiH pUjayedgaurIM zaMkareNa samanvitAm ॥ 60 ॥

कोटिजन्मकृतं पापं मनोवाक्कायसम्भवम् ॥ निर्धूय चतुरो वर्गानक्षयानिह सोऽश्नुते ॥ ६१ ॥

koTijanmakRtaM pApaM manovAkkAyasambhavam ॥ nirdhUya caturo vargAnakSayAniha so'znute ॥ 61 ॥

ज्येष्ठे शुक्लतृतीयायां व्रतं कृत्वा महेश्वरीम् ॥ योऽर्चयेत्परमप्रीत्या तस्यासाध्यं न किंचन ॥ ६२ ॥

jyeSThe zuklatRtIyAyAM vrataM kRtvA mahezvarIm ॥ yo'rcayetparamaprItyA tasyAsAdhyaM na kiMcana ॥ 62 ॥

आषाढशुक्लपक्षीयतृतीयायां रथोत्सवम ॥ देव्याः प्रियतमं कुर्याद्यथावित्तानुसारतः ॥ ६३ ॥

ASADhazuklapakSIyatRtIyAyAM rathotsavama ॥ devyAH priyatamaM kuryAdyathAvittAnusArataH ॥ 63 ॥

रथं पृथ्वीं विजानीयाद्रथांगे चन्द्रभास्करौ ॥ वेदानश्वान्विजानीयात्सारथिं पद्मसं भवम् ॥ ६४ ॥

rathaM pRthvIM vijAnIyAdrathAMge candrabhAskarau ॥ vedAnazvAnvijAnIyAtsArathiM padmasaM bhavam ॥ 64 ॥

नानामणिगणाकीर्णं पुष्पमालाविराजितम् ॥ एवं रथं कल्पयित्वा तस्मिन्त्संस्थापयेच्छिवाम् ॥ ६५ ॥

nAnAmaNigaNAkIrNaM puSpamAlAvirAjitam ॥ evaM rathaM kalpayitvA tasmintsaMsthApayecchivAm ॥ 65 ॥

लोकसंरक्षणार्थाय लोकं द्रष्टुं पराम्बिका ॥ रथमध्ये संस्थितेति भावयेन्मतिमान्नरः ॥ ६६॥

lokasaMrakSaNArthAya lokaM draSTuM parAmbikA ॥ rathamadhye saMsthiteti bhAvayenmatimAnnaraH ॥ 66॥

रथे प्रचलिते मन्दं जयशब्दमुदीरयेत्॥ पाहि देवि जनानस्मान्प्रपन्नान्दीनवत्सले ॥ ६७ ॥

rathe pracalite mandaM jayazabdamudIrayet॥ pAhi devi janAnasmAnprapannAndInavatsale ॥ 67 ॥

इति वाक्यैस्तोषयेच्च नानावादित्रनिस्वनैः ॥ सीमान्ते तु रथं नीत्वा तत्र संपूजये द्रथे ॥ ६८ ॥

iti vAkyaistoSayecca nAnAvAditranisvanaiH ॥ sImAnte tu rathaM nItvA tatra saMpUjaye drathe ॥ 68 ॥

नानास्तोत्रैस्ततः स्तुत्वाप्यानयेत्तां स्ववेश्मनि ॥ प्रणिपातशतं कृत्वा प्रार्थयेज्जगदम्बिकाम् ॥ ६९ ॥

nAnAstotraistataH stutvApyAnayettAM svavezmani ॥ praNipAtazataM kRtvA prArthayejjagadambikAm ॥ 69 ॥

एवं यः कुरुते विद्वान्पूजाव्रतरथोत्सवम् ॥ इह भुक्त्वाखिलान्भोगान्सोन्ते देवीपदं व्रजेत् ॥ ७० ॥

evaM yaH kurute vidvAnpUjAvratarathotsavam ॥ iha bhuktvAkhilAnbhogAnsonte devIpadaM vrajet ॥ 70 ॥

शुक्लायान्तु तृतीयायामेवं श्रावणभाद्रयोः॥ यो व्रतं कुरुतेऽम्बायाः पूजनं च यथाविधि ॥ ७१ ॥

zuklAyAntu tRtIyAyAmevaM zrAvaNabhAdrayoH॥ yo vrataM kurute'mbAyAH pUjanaM ca yathAvidhi ॥ 71 ॥

मोदते पुत्रपौत्राद्यैर्धनाद्यैरिह सन्ततम् ॥ सोऽन्ते गच्छेदुमालोकं सर्वलोकोपरि स्थितम्॥ ७२ ॥

modate putrapautrAdyairdhanAdyairiha santatam ॥ so'nte gacchedumAlokaM sarvalokopari sthitam॥ 72 ॥

आश्विने धवले पक्षे नवरात्रव्रतं चरेत् ॥ यत्कृते सकलाः कामास्सिद्ध्यन्त्येव न संशयः ॥ ७३ ॥

Azvine dhavale pakSe navarAtravrataM caret ॥ yatkRte sakalAH kAmAssiddhyantyeva na saMzayaH ॥ 73 ॥

नवरात्रव्रतस्यास्य प्रभावं वक्तुमीश्वरः ॥ चतुरास्यो न पंचास्यो न षडास्यो न कोऽपरः ॥ ७४॥

navarAtravratasyAsya prabhAvaM vaktumIzvaraH ॥ caturAsyo na paMcAsyo na SaDAsyo na ko'paraH ॥ 74॥

नवरात्रव्रतं कृत्वा भूपालो विरथात्मजः॥ हृतं राज्यं निजं लेभे सुरथो मुनिसत्तमाः ॥ ७५ ॥

navarAtravrataM kRtvA bhUpAlo virathAtmajaH॥ hRtaM rAjyaM nijaM lebhe suratho munisattamAH ॥ 75 ॥

ध्रुवसंधिसुतो धीमानयोध्याधिपतिर्नृपः ॥ सुदर्शनो हृतं राज्यं प्रापदस्य प्रभावतः॥ ७६॥

dhruvasaMdhisuto dhImAnayodhyAdhipatirnRpaH ॥ sudarzano hRtaM rAjyaM prApadasya prabhAvataH॥ 76॥

व्रतराजमिमं कृत्वा समाराध्य महेश्वरीम्॥ संसारबन्धनान्मुक्तः समाधिर्मुक्तिभागभूत्॥ ७७॥

vratarAjamimaM kRtvA samArAdhya mahezvarIm॥ saMsArabandhanAnmuktaH samAdhirmuktibhAgabhUt॥ 77॥

तृतीयायां च पञ्चम्यां सप्तम्याम ष्टमीतिथौ ॥ नवम्यां वा चतुर्दश्यां यो देवी पूजयेन्नरः ॥ ७८॥

tRtIyAyAM ca paJcamyAM saptamyAma STamItithau ॥ navamyAM vA caturdazyAM yo devI pUjayennaraH ॥ 78॥

आश्विनस्य सिते पक्षे व्रतं कृत्वा विधानतः ॥ तस्य सर्वं मनोभीष्टं पूरयत्यनिशं शिवा ॥ ७९॥

Azvinasya site pakSe vrataM kRtvA vidhAnataH ॥ tasya sarvaM manobhISTaM pUrayatyanizaM zivA ॥ 79॥

यः कार्त्तिकस्य मार्गस्य पौषस्य तपसस्तथा ॥ तपस्यस्य सिते पक्षे तृतीयायां व्रतं चरेत्॥ ८०॥

yaH kArttikasya mArgasya pauSasya tapasastathA ॥ tapasyasya site pakSe tRtIyAyAM vrataM caret॥ 80॥

लोहितैः करवीराद्यैः पुष्पैर्धूपैस्सुगन्धितैः ॥ पूजयेन्मङ्गलान्देवीं स सर्वं मंगलं लभेत्॥ ८१॥

lohitaiH karavIrAdyaiH puSpairdhUpaissugandhitaiH ॥ pUjayenmaGgalAndevIM sa sarvaM maMgalaM labhet॥ 81॥

सौभाग्याय सदा स्त्रीभिः कार्य्यमेतन्महाव्रतम्॥ विद्याधनसुताप्त्यर्थं विधेयं पुरुषैरपि ॥ ८२ ॥

saubhAgyAya sadA strIbhiH kAryyametanmahAvratam॥ vidyAdhanasutAptyarthaM vidheyaM puruSairapi ॥ 82 ॥

उमामहेश्वरादीनि व्रतान्यन्यानि यान्यपि ॥ देवीप्रियाणि कार्याणि स्वभक्त्यैवं मुमुक्षुभिः॥ ८३॥

umAmahezvarAdIni vratAnyanyAni yAnyapi ॥ devIpriyANi kAryANi svabhaktyaivaM mumukSubhiH॥ 83॥

संहितेयं महापुण्या शिवभक्तिविवर्द्धिनी॥ नानाख्यानसमायुक्ता भुक्तिमुक्तिप्रदा शिवा॥ ८४॥

saMhiteyaM mahApuNyA zivabhaktivivarddhinI॥ nAnAkhyAnasamAyuktA bhuktimuktipradA zivA॥ 84॥

य एनां शृणुयाद्भक्त्या श्रावयेद्वा समाहितः ॥ पठेद्वा पाठयेद्वापि स याति परमां गतिम् ॥ ८५॥

ya enAM zRNuyAdbhaktyA zrAvayedvA samAhitaH ॥ paThedvA pAThayedvApi sa yAti paramAM gatim ॥ 85॥

यस्य गेहे स्थिता चेयं लिखिता ललिताक्षरैः ॥ संपूजिता च विधिवत्सर्वान्कामान्स आप्नुयात् ॥ ८६॥

yasya gehe sthitA ceyaM likhitA lalitAkSaraiH ॥ saMpUjitA ca vidhivatsarvAnkAmAnsa ApnuyAt ॥ 86॥

भूतप्रेतपिशाचादिदुष्टेभ्यो न भयं क्वचित॥ पुत्रपौत्रादिसम्पत्तिं लभत्येव न संशयः ॥ ८७ ॥

bhUtapretapizAcAdiduSTebhyo na bhayaM kvacita॥ putrapautrAdisampattiM labhatyeva na saMzayaH ॥ 87 ॥

तस्मादियं महापुण्या रम्योमासंहिता सदा ॥ श्रोतव्या पठितव्या च शिवभक्तिमभीप्सुभिः ॥ ८८ ॥

tasmAdiyaM mahApuNyA ramyomAsaMhitA sadA ॥ zrotavyA paThitavyA ca zivabhaktimabhIpsubhiH ॥ 88 ॥