नन्दीश्वर उवाच ॥ अवताराञ्छृणु विभोर्द्वादशप्रमितान्परान् ॥ ज्योतिर्लिङ्गस्वरूपान्वै नानोति कारकान्मुने ॥ १ ॥

nandIzvara uvAca ॥ avatArAJchRNu vibhordvAdazapramitAnparAn ॥ jyotirliGgasvarUpAnvai nAnoti kArakAnmune ॥ 1 ॥

सौराष्ट्रे सोमनाथश्च श्रीशैले मल्लिकार्जुनः ॥ उज्जयिन्यां महाकाल ओंकारे चामरेश्वरः ॥ २॥

saurASTre somanAthazca zrIzaile mallikArjunaH ॥ ujjayinyAM mahAkAla oMkAre cAmarezvaraH ॥ 2॥

केदारो हिमव त्पृष्टे डाकिन्याम्भीमशंकरः ॥ वाराणस्यां च विश्वेशस्त्र्यम्बको गौतमीतटे ॥ ३ ॥

kedAro himava tpRSTe DAkinyAmbhImazaMkaraH ॥ vArANasyAM ca vizvezastryambako gautamItaTe ॥ 3 ॥

वैद्यनाथश्चिताभूमौ नागेशो दारुकावने ॥ सेतुबन्धे च रामेशो घुश्मेशश्च शिवालये ॥ ४॥

vaidyanAthazcitAbhUmau nAgezo dArukAvane ॥ setubandhe ca rAmezo ghuzmezazca zivAlaye ॥ 4॥

अवतारद्वादशकमेतच्छम्भोः परात्मनः ॥ सर्वानन्दकरं पुंसान्दर्शनात्स्पर्शनान्मुने॥ ५॥

avatAradvAdazakametacchambhoH parAtmanaH ॥ sarvAnandakaraM puMsAndarzanAtsparzanAnmune॥ 5॥

तत्राद्यस्सोमनाथो हि चन्द्रदुःखक्षयंकरः॥ क्षयकुष्ठादिरोगाणां नाशकः पूजनान्मुने ॥ ६॥

tatrAdyassomanAtho hi candraduHkhakSayaMkaraH॥ kSayakuSThAdirogANAM nAzakaH pUjanAnmune ॥ 6॥

शिवावतारस्सोमेशो लिंगरूपेण संस्थितः॥ सौराष्ट्रे शुभदेशे च शशिना पूजितः पुरा ॥ ७॥

zivAvatArassomezo liMgarUpeNa saMsthitaH॥ saurASTre zubhadeze ca zazinA pUjitaH purA ॥ 7॥

चंद्रकुण्डं च तत्रैव सर्वपापविनाशकम् ॥ तत्र स्नात्वा नरो धीमान्सर्वरोगैः प्रमुच्यते॥ ८ ॥

caMdrakuNDaM ca tatraiva sarvapApavinAzakam ॥ tatra snAtvA naro dhImAnsarvarogaiH pramucyate॥ 8 ॥

सोमेश्वरं महालिंगं शिवस्य परमात्मकम्॥ दृष्ट्वा प्रमुच्यते पापाद्भुक्तिं मुक्तिं च विन्दति ॥ ९ ॥

somezvaraM mahAliMgaM zivasya paramAtmakam॥ dRSTvA pramucyate pApAdbhuktiM muktiM ca vindati ॥ 9 ॥

मल्लिकार्जुनसंज्ञश्चावतारश्शंकरस्य वै ॥ द्वितीयः श्रीगिरौ तात भक्ताभीष्टफलप्रदः ॥ १० ॥

mallikArjunasaMjJazcAvatArazzaMkarasya vai ॥ dvitIyaH zrIgirau tAta bhaktAbhISTaphalapradaH ॥ 10 ॥

संस्तुतो लिंगरूपेण सुतदर्शनहेतुतः ॥ गतस्तत्र महाप्रीत्या स शिवः स्वगिरेर्मुने ॥ ११॥

saMstuto liMgarUpeNa sutadarzanahetutaH ॥ gatastatra mahAprItyA sa zivaH svagirermune ॥ 11॥

ज्योतिर्लिंगं द्वितीयन्तद्दर्शनात्पूजनान्मुने ॥ महासुखकरं चान्ते मुक्तिदन्नात्र संशयः ॥ १२॥

jyotirliMgaM dvitIyantaddarzanAtpUjanAnmune ॥ mahAsukhakaraM cAnte muktidannAtra saMzayaH ॥ 12॥

महाकालाभिधस्तातावतारश्शंकरस्य वै ॥ उज्जयिन्यां नगर्य्यां च बभूव स्वजनावनः ॥ १३ ॥

mahAkAlAbhidhastAtAvatArazzaMkarasya vai ॥ ujjayinyAM nagaryyAM ca babhUva svajanAvanaH ॥ 13 ॥

दूषणाख्यासुरं यस्तु वेदधर्मप्रमर्दकम् ॥। उज्जयिन्यां गतं विप्रद्वेषिणं सर्वनाशनम् ॥ १४ ॥

dUSaNAkhyAsuraM yastu vedadharmapramardakam ॥। ujjayinyAM gataM vipradveSiNaM sarvanAzanam ॥ 14 ॥

वेदविप्रसुतध्यातो हुङ्कारेणैव स द्रुतम् ॥ भस्मसात्कृतवांस्तं च रत्नमाल निवासिनम् ॥ १५ ॥

vedaviprasutadhyAto huGkAreNaiva sa drutam ॥ bhasmasAtkRtavAMstaM ca ratnamAla nivAsinam ॥ 15 ॥

तं हत्वा स महाकालो ज्योतिर्लिंगस्वरूपतः ॥ देवैस्स प्रार्थितोऽतिष्ठत्स्वभक्तपरिपालकः ॥ १६ ॥

taM hatvA sa mahAkAlo jyotirliMgasvarUpataH ॥ devaissa prArthito'tiSThatsvabhaktaparipAlakaH ॥ 16 ॥

महाकालाह्वयं लिंगं दृष्ट्वाभ्यर्च्य प्रयत्नतः ॥ सर्वान्कामानवाप्नोति लभते परतो गतिम् ॥ १७ ॥

mahAkAlAhvayaM liMgaM dRSTvAbhyarcya prayatnataH ॥ sarvAnkAmAnavApnoti labhate parato gatim ॥ 17 ॥

ओङ्कारः परमेशानो धृतः शम्भो परात्मनः ॥ अवतारश्चतुर्थो हि भक्ताभीष्टफलप्रदः ॥ १८ ॥

oGkAraH paramezAno dhRtaH zambho parAtmanaH ॥ avatArazcaturtho hi bhaktAbhISTaphalapradaH ॥ 18 ॥

विधिना स्थापितो भक्त्या स्वलिंगात्पार्थिवान्मुने ॥ प्रादुर्भूतो महादेवो विन्ध्यकामप्रपूरकः ॥ १९ ॥

vidhinA sthApito bhaktyA svaliMgAtpArthivAnmune ॥ prAdurbhUto mahAdevo vindhyakAmaprapUrakaH ॥ 19 ॥

देवैस्संप्रार्थितस्तत्र द्विधारूपेण संस्थितः ॥ भुक्तिमुक्तिप्रदो लिंगरूपो वै शक्तवत्सल ॥ २० ॥

devaissaMprArthitastatra dvidhArUpeNa saMsthitaH ॥ bhuktimuktiprado liMgarUpo vai zaktavatsala ॥ 20 ॥

प्रणवे चैव चोंकारनामासील्लिंगमुत्तमम् ॥ परमेश्वरनामासीत्पार्थिवश्च मुनीश्वर ॥ २१॥

praNave caiva coMkAranAmAsIlliMgamuttamam ॥ paramezvaranAmAsItpArthivazca munIzvara ॥ 21॥

भक्ताभीष्टप्रदो ज्ञेयो योपि दृष्टोर्चितो मुने ॥ ज्योतिर्लिंगे महादिव्ये वर्णिते ते महामुने॥ २२॥

bhaktAbhISTaprado jJeyo yopi dRSTorcito mune ॥ jyotirliMge mahAdivye varNite te mahAmune॥ 22॥

केदारेशोवतारस्तु पंचमः परमश्शिवः ॥ ज्योतिर्लिंगस्वरूपेण केदारे संस्थितस्य च ॥ २३ ॥

kedArezovatArastu paMcamaH paramazzivaH ॥ jyotirliMgasvarUpeNa kedAre saMsthitasya ca ॥ 23 ॥

नरनारायणाख्यौ याववतारौ हरेर्मुने ॥ तत्प्रार्थितश्शिवस्तत्स्थैः केदारे हिमभूधरे ॥ २४ ॥

naranArAyaNAkhyau yAvavatArau harermune ॥ tatprArthitazzivastatsthaiH kedAre himabhUdhare ॥ 24 ॥

ताभ्यां च पूजितो नित्यं केदारेश्वरसंज्ञकः ॥ भक्ताभीष्टप्रदः शम्भुर्दर्शनादर्चनादपि ॥ २५॥

tAbhyAM ca pUjito nityaM kedArezvarasaMjJakaH ॥ bhaktAbhISTapradaH zambhurdarzanAdarcanAdapi ॥ 25॥

अस्य खण्डस्य स स्वामी सर्वेशोपि विशेषतः ॥ सर्वकामप्रदस्तात सोवतारश्शिवस्य वै ॥ २६॥

asya khaNDasya sa svAmI sarvezopi vizeSataH ॥ sarvakAmapradastAta sovatArazzivasya vai ॥ 26॥

भीमशंकरसंज्ञस्तु षष्ठः शम्भोर्महाप्रभोः ॥ अवतारो महालीलो भीमासुरविनाशनः ॥ २७॥

bhImazaMkarasaMjJastu SaSThaH zambhormahAprabhoH ॥ avatAro mahAlIlo bhImAsuravinAzanaH ॥ 27॥

सुदक्षिणाभिधम्भक्तङ्कामरूपेश्वरन्नृपम्॥ यो ररक्षाद्भुतं हत्वासुरन्तं भक्तदुःखदम् ॥ २८॥

sudakSiNAbhidhambhaktaGkAmarUpezvarannRpam॥ yo rarakSAdbhutaM hatvAsurantaM bhaktaduHkhadam ॥ 28॥

भीमशङ्करनामा स डाकिन्यां संस्थितस्स्वयम् ॥ ज्योतिर्लिंगस्वरूपेण प्रार्थितस्तेन शंकरः ॥ २९॥

bhImazaGkaranAmA sa DAkinyAM saMsthitassvayam ॥ jyotirliMgasvarUpeNa prArthitastena zaMkaraH ॥ 29॥

विश्वेश्वरावतारस्तु काश्यां जातो हि सप्तमः ॥ सर्वब्रह्माण्डरूपश्च भुक्तिमुक्तिप्रदो मुने ॥ ३० ॥

vizvezvarAvatArastu kAzyAM jAto hi saptamaH ॥ sarvabrahmANDarUpazca bhuktimuktiprado mune ॥ 30 ॥

पूजितस्सर्वदेवैश्च भक्त्या विष्ण्वादिभिस्सदा ॥ कैलासपतिना चापि भैरवेणापि नित्यशः ॥ ३१ ॥

pUjitassarvadevaizca bhaktyA viSNvAdibhissadA ॥ kailAsapatinA cApi bhairaveNApi nityazaH ॥ 31 ॥

ज्योतिर्लिंगस्वरूपेण संस्थितस्तत्र मुक्तिदः ॥ स्वयं सिद्धस्वरूपो हि तथा स्वपुरि स प्रभुः ॥ ३२ ॥

jyotirliMgasvarUpeNa saMsthitastatra muktidaH ॥ svayaM siddhasvarUpo hi tathA svapuri sa prabhuH ॥ 32 ॥

काशीविश्वेशयोर्भक्त्या तन्नामजपकारकाः ॥ निर्लिप्ताः कर्मभिर्न्नित्यं केवल्यपदभागिनः ॥ ३३ ॥

kAzIvizvezayorbhaktyA tannAmajapakArakAH ॥ nirliptAH karmabhirnnityaM kevalyapadabhAginaH ॥ 33 ॥

त्र्यंबकाख्योऽवतारो यः सोष्टमो गौतमीतटे ॥ प्रार्थितो गौतमेनाविर्बभूव शशिमौलिनः ॥ ३४॥

tryaMbakAkhyo'vatAro yaH soSTamo gautamItaTe ॥ prArthito gautamenAvirbabhUva zazimaulinaH ॥ 34॥

गौतमस्य प्रार्थनया ज्योतिर्लिंग स्वरूपतः ॥ स्थितस्तत्राचलः प्रीत्या तन्मुनेः प्रीतिकाम्यया॥ ३५॥

gautamasya prArthanayA jyotirliMga svarUpataH ॥ sthitastatrAcalaH prItyA tanmuneH prItikAmyayA॥ 35॥

तस्य सन्दर्शनात्स्पर्शाद्दर्शनाच्च महेशितुः ॥ सर्वे कामाः प्रसिध्यन्ति ततो मुक्तिर्भवेदहो ॥ ३६॥

tasya sandarzanAtsparzAddarzanAcca mahezituH ॥ sarve kAmAH prasidhyanti tato muktirbhavedaho ॥ 36॥

शिवानुग्रहतस्तत्र गंगा नाम्ना तु गौतमी ॥ संस्थिता गौतमप्रीत्या पावनी शंकरप्रिया ॥ ३७॥

zivAnugrahatastatra gaMgA nAmnA tu gautamI ॥ saMsthitA gautamaprItyA pAvanI zaMkarapriyA ॥ 37॥

वैद्यनाथावतारो हि नवमस्तत्र कीर्तितः ॥ आविर्भूतो रावणार्थं बहुलीलाकरः प्रभुः॥ ३८॥

vaidyanAthAvatAro hi navamastatra kIrtitaH ॥ AvirbhUto rAvaNArthaM bahulIlAkaraH prabhuH॥ 38॥

तदानयनरूपं हि व्याजं कृत्वा महेश्वरः ॥ ज्योतिर्लिंगस्वरूपेण चिताभूमौ प्रतिष्ठितः ॥ ३९॥

tadAnayanarUpaM hi vyAjaM kRtvA mahezvaraH ॥ jyotirliMgasvarUpeNa citAbhUmau pratiSThitaH ॥ 39॥

वैद्यनाथेश्वरो नाम्ना प्रसिद्धोभूज्जगत्त्रये ॥ दर्शनात्पूजनाद्भक्त्या भुक्तिमुक्तिप्रदः स हि ॥ ४०॥

vaidyanAthezvaro nAmnA prasiddhobhUjjagattraye ॥ darzanAtpUjanAdbhaktyA bhuktimuktipradaH sa hi ॥ 40॥

वैद्यनाथेश्वरशिवमाहात्म्यमनुशासनम् ॥ पठतां शृण्वतां चापि भुक्तिमुक्तिप्रदं मुने ॥ ४१ ॥

vaidyanAthezvarazivamAhAtmyamanuzAsanam ॥ paThatAM zRNvatAM cApi bhuktimuktipradaM mune ॥ 41 ॥

नागेश्वरावतारस्तु दशमः परिकीर्तितः ॥ आविर्भूतः स्वभक्तार्थं दुष्टानां दण्डदस्सदा ॥ ४२॥

nAgezvarAvatArastu dazamaH parikIrtitaH ॥ AvirbhUtaH svabhaktArthaM duSTAnAM daNDadassadA ॥ 42॥

हत्वा दारुकनामानं राक्षसन्धर्मघातकम् ॥ स्वभक्तं वैश्यनाथं च प्रारक्षत्सुप्रियाभिधम् ॥ ४३॥

hatvA dArukanAmAnaM rAkSasandharmaghAtakam ॥ svabhaktaM vaizyanAthaM ca prArakSatsupriyAbhidham ॥ 43॥

लोकानामुपकारार्थं ज्योतिर्लिंगस्वरूपधृक्॥ सन्तस्थौ सांबिकश्शम्भुर्बहुलीलाकरः परः ॥ ४४ ॥

lokAnAmupakArArthaM jyotirliMgasvarUpadhRk॥ santasthau sAMbikazzambhurbahulIlAkaraH paraH ॥ 44 ॥

तद्दृष्ट्वा शिवलिंगन्तु मुने नागेश्वराभिधम् ॥ विनश्यन्ति द्रुतं चार्च्य महापातकराशयः ॥ ४५॥

taddRSTvA zivaliMgantu mune nAgezvarAbhidham ॥ vinazyanti drutaM cArcya mahApAtakarAzayaH ॥ 45॥

रामेश्वरावतारस्तु शिवस्यैकादशः स्मृतः ॥ रामचन्द्रप्रियकरो रामसंस्थापितो मुने ॥ ४६॥

rAmezvarAvatArastu zivasyaikAdazaH smRtaH ॥ rAmacandrapriyakaro rAmasaMsthApito mune ॥ 46॥

ददौ जयवरं प्रीत्या यो रामाय सुतोषितः ॥ आविर्भूतस्य लिंगस्तु शंकरो भक्तवत्सलः ॥ ४७॥

dadau jayavaraM prItyA yo rAmAya sutoSitaH ॥ AvirbhUtasya liMgastu zaMkaro bhaktavatsalaH ॥ 47॥

रामेण प्रार्थितोऽत्यर्थं ज्योतिर्लिंगस्वरूपतः ॥ सन्तस्थौ सेतुबन्धे च रामसंसेवितो मुने ॥ ४८ ॥

rAmeNa prArthito'tyarthaM jyotirliMgasvarUpataH ॥ santasthau setubandhe ca rAmasaMsevito mune ॥ 48 ॥

रामेश्वरस्य महिमाद्भुतोऽभूद्भुवि चातुलः ॥ भुक्तिमुक्तिप्रदश्चैव सर्वदा भक्तकामदः॥ ४९॥

rAmezvarasya mahimAdbhuto'bhUdbhuvi cAtulaH ॥ bhuktimuktipradazcaiva sarvadA bhaktakAmadaH॥ 49॥

तं च गंगाजलेनैव स्नापयिष्यति यो नरः ॥ रामेश्वरं च सद्भक्त्या स जीवन्मुक्त एव हि ॥ ५० ॥

taM ca gaMgAjalenaiva snApayiSyati yo naraH ॥ rAmezvaraM ca sadbhaktyA sa jIvanmukta eva hi ॥ 50 ॥

इह भुक्त्वाखिलान्भोगान्देवतादुर्ल्लभानपि॥ अतः प्राप्य परं ज्ञानं कैवल्यं मोक्षमाप्नुयात् ॥ ५१ ॥

iha bhuktvAkhilAnbhogAndevatAdurllabhAnapi॥ ataH prApya paraM jJAnaM kaivalyaM mokSamApnuyAt ॥ 51 ॥

घुश्मेश्वरावतारस्तु द्वादशश्शंकरस्य हि ॥ नानालीलाकरो घुश्मानन्ददो भक्तवत्सलः॥ ५२ ॥

ghuzmezvarAvatArastu dvAdazazzaMkarasya hi ॥ nAnAlIlAkaro ghuzmAnandado bhaktavatsalaH॥ 52 ॥

दक्षिणस्यान्दिशि मुने देवशैलसमीपतः ॥ आविर्बभूव सरसि घुश्माप्रियकरः प्रभुः ॥ ५३॥

dakSiNasyAndizi mune devazailasamIpataH ॥ AvirbabhUva sarasi ghuzmApriyakaraH prabhuH ॥ 53॥

सुदेह्यमारितं घुश्मापुत्रं साकल्यतो मुने ॥ तुष्टस्तद्भक्तितश्शम्भुर्योरक्षद्भक्तवत्सलः ॥ ५४॥

sudehyamAritaM ghuzmAputraM sAkalyato mune ॥ tuSTastadbhaktitazzambhuryorakSadbhaktavatsalaH ॥ 54॥

तत्प्रार्थितस्स वै शम्भुस्तडागे तत्र कामदाः॥ ज्योतिर्लिंग स्वरूपेण तस्थौ घुश्मेश्वराभिधः ॥ ५५॥

tatprArthitassa vai zambhustaDAge tatra kAmadAH॥ jyotirliMga svarUpeNa tasthau ghuzmezvarAbhidhaH ॥ 55॥

तन्दृष्ट्वा शिवलिंगन्तु समभ्यर्च्य च भक्तितः॥ इह सर्वसुखम्भुक्त्वा ततो मुक्तिं च विन्दति॥ ५६॥

tandRSTvA zivaliMgantu samabhyarcya ca bhaktitaH॥ iha sarvasukhambhuktvA tato muktiM ca vindati॥ 56॥

इति ते हि समाख्याता ज्योतिर्लिंगावली मया॥ द्वादशप्रमिता दिव्या भुक्तिमुक्तिप्रदायिनी॥ ५७॥

iti te hi samAkhyAtA jyotirliMgAvalI mayA॥ dvAdazapramitA divyA bhuktimuktipradAyinI॥ 57॥

एतां ज्योतिर्लिंगकथां यः पठेच्छृणुयादपि॥ मुच्यते सर्वपापेभ्यो भुक्तिं मुक्तिं च विन्दति॥ ५८॥

etAM jyotirliMgakathAM yaH paThecchRNuyAdapi॥ mucyate sarvapApebhyo bhuktiM muktiM ca vindati॥ 58॥

शतरुद्राभिदा चेयम्वर्णिता संहिता मया॥ शतावतारसत्कीर्तिस्सर्वकामफलप्रदा॥ ५९॥

zatarudrAbhidA ceyamvarNitA saMhitA mayA॥ zatAvatArasatkIrtissarvakAmaphalapradA॥ 59॥

इमां यः पठते नित्यं शृणुयाद्वा समाहितः ॥ सर्वान्कामानवाप्नोति ततो मुक्तिं लभेद्ध्रुवम् ॥ ६०॥

imAM yaH paThate nityaM zRNuyAdvA samAhitaH ॥ sarvAnkAmAnavApnoti tato muktiM labheddhruvam ॥ 60॥