॥ नारद उवाच ॥ श्रुतमस्माभिरानंदप्रदं चरितमुत्तमम् ॥ गृहस्थस्यैव शंभोश्च गणस्कंदादिसत्कथम् ॥१॥

॥ nArada uvAca ॥ zrutamasmAbhirAnaMdapradaM caritamuttamam ॥ gRhasthasyaiva zaMbhozca gaNaskaMdAdisatkatham ॥1॥

इदानीं ब्रूहि सुप्रीत्या चरितं वरमुत्तमम् ॥ शंकरो हि यथा रुद्रो जघान विहरन्खलान् ॥२॥

idAnIM brUhi suprItyA caritaM varamuttamam ॥ zaMkaro hi yathA rudro jaghAna viharankhalAn ॥2॥

कथं ददाह भगवान्नगराणि सुरद्विषाम् ॥ त्रीण्येकेन च बाणेन युगपत्केन वीर्यवान् ॥३॥

kathaM dadAha bhagavAnnagarANi suradviSAm ॥ trINyekena ca bANena yugapatkena vIryavAn ॥3॥

एतत्सर्वं समाचक्ष्व चरितं शशिमौलिनः ॥ देवर्षिसुखदं शश्वन्मायाविहरतः प्रभोः ॥ ४ ॥

etatsarvaM samAcakSva caritaM zazimaulinaH ॥ devarSisukhadaM zazvanmAyAviharataH prabhoH ॥ 4 ॥

॥ ब्रह्मोवाच ॥ एवमेतत्पुरा पृष्टो व्यासेन ऋषिसत्तमः ॥ सनत्कुमारं प्रोवाच तदेव कथयाम्यहम् ॥५॥

॥ brahmovAca ॥ evametatpurA pRSTo vyAsena RSisattamaH ॥ sanatkumAraM provAca tadeva kathayAmyaham ॥5॥

सनत्कुमार उवाच ॥ शृणु व्यास महाप्राज्ञ चरितं शशिमौलिनः ॥ यथा ददाह त्रिपुरं बाणेनैकेन विश्व हृत्॥६॥

sanatkumAra uvAca ॥ zRNu vyAsa mahAprAjJa caritaM zazimaulinaH ॥ yathA dadAha tripuraM bANenaikena vizva hRt॥6॥

शिवात्मजेन स्कन्देन निहते तारकासुरे॥ तत्पुत्रास्तु त्रयो दैत्याः पर्यतप्यन्मुनीश्वर॥७॥

zivAtmajena skandena nihate tArakAsure॥ tatputrAstu trayo daityAH paryatapyanmunIzvara॥7॥

तारकाख्यस्तु तज्जेष्ठो विद्युन्माली च मध्यमः ॥ कमलाक्षः कनीयांश्च सर्वे तुल्यबलास्सदा ॥८॥

tArakAkhyastu tajjeSTho vidyunmAlI ca madhyamaH ॥ kamalAkSaH kanIyAMzca sarve tulyabalAssadA ॥8॥

जितेन्द्रियास्ससन्नद्धास्संयतास्सत्यवादिनः ॥ दृढचित्ता महावीरा देवद्रोहिण एव च ॥ ९ ॥

jitendriyAssasannaddhAssaMyatAssatyavAdinaH ॥ dRDhacittA mahAvIrA devadrohiNa eva ca ॥ 9 ॥

ते तु मेरुगुहां गत्वा तपश्चक्रुर्महाद्भुतम् ॥ त्रयस्सर्वान्सुभोगांश्च विहाय सुमनोहरान् ॥ 2-5-1-१० ॥

te tu meruguhAM gatvA tapazcakrurmahAdbhutam ॥ trayassarvAnsubhogAMzca vihAya sumanoharAn ॥ 2-5-1-10 ॥

वसंते सर्वकामांश्च गीतवादित्रनिस्स्वनम् ॥ विहाय सोत्सवं तेपुस्त्रयस्ते तारकात्मजाः॥११॥

vasaMte sarvakAmAMzca gItavAditranissvanam ॥ vihAya sotsavaM tepustrayaste tArakAtmajAH॥11॥

ग्रीष्मे सूर्यप्रभां जित्वा दिक्षु प्रज्वाल्य पावकम् ॥ तन्मध्यसंस्थाः सिद्ध्यर्थं जुहुवुर्हव्यमादरात् ॥१२॥

grISme sUryaprabhAM jitvA dikSu prajvAlya pAvakam ॥ tanmadhyasaMsthAH siddhyarthaM juhuvurhavyamAdarAt ॥12॥

महाप्रतापपतितास्सर्वेप्यासन् सुमूर्छिताः ॥ वर्षासु गतसंत्रासा वृष्टिं मूर्द्धन्यधारयन् ॥१३॥

mahApratApapatitAssarvepyAsan sumUrchitAH ॥ varSAsu gatasaMtrAsA vRSTiM mUrddhanyadhArayan ॥13॥

शरत्काले प्रसूतं तु भोजनं तु बुभुक्षिताः ॥ रम्यं स्निग्धं स्थिरं हृद्यं फलं मूलमनुत्तमम्॥१४॥

zaratkAle prasUtaM tu bhojanaM tu bubhukSitAH ॥ ramyaM snigdhaM sthiraM hRdyaM phalaM mUlamanuttamam॥14॥

संयमात्क्षुत्तृषो जित्वा पानान्युच्चावचान्यपि ॥ बुभुक्षितेभ्यो दत्त्वा तु बुभूवुरुपला इव ॥१५॥

saMyamAtkSuttRSo jitvA pAnAnyuccAvacAnyapi ॥ bubhukSitebhyo dattvA tu bubhUvurupalA iva ॥15॥

संस्थितास्ते महात्मानो निराधाराश्चतुर्दिशम् ॥ हेमंते गिरिमाश्रित्य धैर्येण परमेण तु ॥ १६ ॥

saMsthitAste mahAtmAno nirAdhArAzcaturdizam ॥ hemaMte girimAzritya dhairyeNa parameNa tu ॥ 16 ॥

तुषारदेहसंछन्ना जलक्लिन्नेन वाससा ॥ आसाद्य देहं क्षौमेण शिशिरे तोयमध्यगाः ॥ १७ ॥

tuSAradehasaMchannA jalaklinnena vAsasA ॥ AsAdya dehaM kSaumeNa zizire toyamadhyagAH ॥ 17 ॥

अनिर्विण्णास्ततस्सर्वे क्रमशोऽवर्द्धयंस्तपः ॥ तेपुस्त्रयस्ते तत्पुत्रा विधिमुद्दिश्य सत्तमाः ॥ १८ ॥

anirviNNAstatassarve kramazo'varddhayaMstapaH ॥ tepustrayaste tatputrA vidhimuddizya sattamAH ॥ 18 ॥

तप उग्रं समास्थाय नियमे परमे स्थिता ॥ तपसा कर्षयामासुर्देहान् स्वान् दानवोत्तमाः ॥१९॥

tapa ugraM samAsthAya niyame parame sthitA ॥ tapasA karSayAmAsurdehAn svAn dAnavottamAH ॥19॥

वर्षाणां शतकं चैव पदमेकं निधाय च ॥ भूमौ स्थित्वा परं तत्र तेपुस्ते बलवत्तराः ॥ 2-5-1-२० ॥

varSANAM zatakaM caiva padamekaM nidhAya ca ॥ bhUmau sthitvA paraM tatra tepuste balavattarAH ॥ 2-5-1-20 ॥

ते सहस्रं तु वर्षाणां वातभक्षास्सुदारुणाः ॥ तपस्तेपुर्दुरात्मानः परं तापमुपागताः ॥ २१ ॥

te sahasraM tu varSANAM vAtabhakSAssudAruNAH ॥ tapastepurdurAtmAnaH paraM tApamupAgatAH ॥ 21 ॥

वर्षाणां तु सहस्रं वै मस्तकेनास्थितास्तथा ॥ वर्षाणां तु शतेनैव ऊर्द्ध्वबाहव आसिताः ॥२२॥

varSANAM tu sahasraM vai mastakenAsthitAstathA ॥ varSANAM tu zatenaiva UrddhvabAhava AsitAH ॥22॥

एवं दुःखं परं प्राप्ता दुराग्रहपरा इमे ॥ ईदृक्ते संस्थिता दैत्या दिवारात्रमतंद्रिता ॥ २३ ॥

evaM duHkhaM paraM prAptA durAgrahaparA ime ॥ IdRkte saMsthitA daityA divArAtramataMdritA ॥ 23 ॥

एवं तेषां गतः कालो महान् सुतपतां मुने ॥ ब्रह्मात्मनां तारकाणां धर्मेणेति मतिर्मम ॥ २४ ॥

evaM teSAM gataH kAlo mahAn sutapatAM mune ॥ brahmAtmanAM tArakANAM dharmeNeti matirmama ॥ 24 ॥

प्रादुरासीत्ततो ब्रह्मा सुरासुरगुरुर्महान् ॥ संतुष्टस्तपसा तेषां वरं दातुं महायशाः ॥ २५ ॥

prAdurAsIttato brahmA surAsuragururmahAn ॥ saMtuSTastapasA teSAM varaM dAtuM mahAyazAH ॥ 25 ॥

मुनिदेवासुरैस्सार्द्धं सांत्वपूर्वमिदं वचः ॥ ततस्तानब्रवीत्सर्वान् सर्वभूतपितामहः ॥ २६॥

munidevAsuraissArddhaM sAMtvapUrvamidaM vacaH ॥ tatastAnabravItsarvAn sarvabhUtapitAmahaH ॥ 26॥

ब्रह्मोवाच ॥ प्रसन्नोऽस्मि महादैत्या युष्माकं तपसा मुने ॥ सर्वं दास्यामि युष्मभ्यं वरं ब्रूत यदीप्सितम् ॥ २७ ॥

brahmovAca ॥ prasanno'smi mahAdaityA yuSmAkaM tapasA mune ॥ sarvaM dAsyAmi yuSmabhyaM varaM brUta yadIpsitam ॥ 27 ॥

किमर्थं सुतपस्तप्तं कथयध्वं सुरद्विषां ॥ सर्वेषां तपसो दाता सर्वकर्तास्मि सर्वदा ॥ २८ ॥

kimarthaM sutapastaptaM kathayadhvaM suradviSAM ॥ sarveSAM tapaso dAtA sarvakartAsmi sarvadA ॥ 28 ॥

सनत्कुमार उवाच ॥ तस्य तद्वचनं श्रुत्वा शनैस्ते स्वात्मनो गतम् ॥ ऊचुः प्रांजलयस्सर्वे प्रणिपत्य पितामहम् ॥ २९ ॥

sanatkumAra uvAca ॥ tasya tadvacanaM zrutvA zanaiste svAtmano gatam ॥ UcuH prAMjalayassarve praNipatya pitAmaham ॥ 29 ॥

दैत्या ऊचुः ॥ यदि प्रसन्नो देवेश यदि देयो वरस्त्वया ॥ अवध्यत्वं च सर्वेषां सर्वभूतेषु देहिनः ॥ 2-5-1-३० ॥

daityA UcuH ॥ yadi prasanno deveza yadi deyo varastvayA ॥ avadhyatvaM ca sarveSAM sarvabhUteSu dehinaH ॥ 2-5-1-30 ॥

स्थिरान् कुरु जगन्नाथ पांतु नः परिपंथिनः ॥ जरारोगादयस्सर्वे नास्मान्मृत्युरगात् क्वचित् ॥ ३१ ॥

sthirAn kuru jagannAtha pAMtu naH paripaMthinaH ॥ jarArogAdayassarve nAsmAnmRtyuragAt kvacit ॥ 31 ॥

अजराश्चामरास्सर्वे भवाम इति नो मतम् ॥ समृत्यवः करिष्यामस्सर्वानन्यांस्त्रिलोकके ॥३२॥

ajarAzcAmarAssarve bhavAma iti no matam ॥ samRtyavaH kariSyAmassarvAnanyAMstrilokake ॥32॥

लक्ष्म्या किं तद्विपुलया किं कार्यं हि पुरोत्तमैः ॥ अन्यैश्च विपुलैर्भोगैस्स्थानैश्वर्येण वा पुनः ॥ ३३ ॥

lakSmyA kiM tadvipulayA kiM kAryaM hi purottamaiH ॥ anyaizca vipulairbhogaissthAnaizvaryeNa vA punaH ॥ 33 ॥

यत्रैव मृत्युना ग्रस्तो नियतं पंचभिर्दिनैः ॥ व्यर्थं तस्याखिलं ब्रह्मन् निश्चितं न इतीव हि ॥ ३४ ॥

yatraiva mRtyunA grasto niyataM paMcabhirdinaiH ॥ vyarthaM tasyAkhilaM brahman nizcitaM na itIva hi ॥ 34 ॥

सनत्कुमार उवाच ॥ इति श्रुत्वा वचस्तेषां दैत्यानां च तपस्विनाम् ॥ प्रत्युवाच शिवं स्मृत्वा स्वप्रभुं गिरिशं विधिः ॥३५॥

sanatkumAra uvAca ॥ iti zrutvA vacasteSAM daityAnAM ca tapasvinAm ॥ pratyuvAca zivaM smRtvA svaprabhuM girizaM vidhiH ॥35॥

ब्रह्मोवाच ॥ नास्ति सर्वामरत्वं च निवर्तध्वमतोऽसुराः ॥ अन्यं वरं वृणीध्वं वै यादृशो वो हि रोचते ॥ ३६ ॥

brahmovAca ॥ nAsti sarvAmaratvaM ca nivartadhvamato'surAH ॥ anyaM varaM vRNIdhvaM vai yAdRzo vo hi rocate ॥ 36 ॥

जातो जनिष्यते नूनं जंतुः कोप्यसुराः क्वचित् ॥ अजरश्चामरो लोके न भविष्यति भूतले ॥ ३७ ॥

jAto janiSyate nUnaM jaMtuH kopyasurAH kvacit ॥ ajarazcAmaro loke na bhaviSyati bhUtale ॥ 37 ॥

ऋते तु खंडपरशोः कालकालाद्धरेस्तथा ॥ तौ धर्माधर्मपरमावव्यक्तौ व्यक्तरूपिणौ ॥३८॥

Rte tu khaMDaparazoH kAlakAlAddharestathA ॥ tau dharmAdharmaparamAvavyaktau vyaktarUpiNau ॥38॥

संपीडनाय जगतो यदि स क्रियते तपः ॥ सफलं तद्गतं वेद्यं तस्मात्सुविहितं तपः ॥३९॥

saMpIDanAya jagato yadi sa kriyate tapaH ॥ saphalaM tadgataM vedyaM tasmAtsuvihitaM tapaH ॥39॥

तद्विचार्य स्वयं बुद्ध्या न शक्यं यत्सुरासुरैः ॥ दुर्लभं वा सुदुस्साध्यं मृत्युं वंचयतानघाः ॥2-5-1-४०॥

tadvicArya svayaM buddhyA na zakyaM yatsurAsuraiH ॥ durlabhaM vA sudussAdhyaM mRtyuM vaMcayatAnaghAH ॥2-5-1-40॥

तत्किंचिन्मरणे हेतुं वृणीध्वं सत्त्वमाश्रिताः ॥ येन मृत्युर्नैव वृतो रक्षतस्तत्पृथक् पृथक् ॥४१॥

tatkiMcinmaraNe hetuM vRNIdhvaM sattvamAzritAH ॥ yena mRtyurnaiva vRto rakSatastatpRthak pRthak ॥41॥

सनत्कुमार उवाच ॥ एतद्विधिवचः श्रुत्वा मुहूर्त्तं ध्यानमास्थिताः ॥ प्रोचुस्ते चिंतयित्वाथ सर्वलोकपितामहम् ॥४२॥

sanatkumAra uvAca ॥ etadvidhivacaH zrutvA muhUrttaM dhyAnamAsthitAH ॥ procuste ciMtayitvAtha sarvalokapitAmaham ॥42॥

दैत्या ऊचुः॥ भगवन्नास्ति नो वेश्म पराक्रमवतामपि ॥ अधृष्याः शात्रवानां तु यन्न वत्स्यामहे सुखम् ॥ ४३ ॥

daityA UcuH॥ bhagavannAsti no vezma parAkramavatAmapi ॥ adhRSyAH zAtravAnAM tu yanna vatsyAmahe sukham ॥ 43 ॥

पुराणि त्रीणि नो देहि निर्मायात्यद्भुतानि हि ॥ सर्वसंपत्समृद्धान्य प्रधृष्याणि दिवौकसाम्॥४४॥

purANi trINi no dehi nirmAyAtyadbhutAni hi ॥ sarvasaMpatsamRddhAnya pradhRSyANi divaukasAm॥44॥

वयं पुराणि त्रीण्येव समास्थाय महीमिमाम्॥ चरिष्यामो हि लोकेश त्वत्प्रसादाज्जगद्गुरो ॥ ४५ ॥

vayaM purANi trINyeva samAsthAya mahImimAm॥ cariSyAmo hi lokeza tvatprasAdAjjagadguro ॥ 45 ॥

तारकाक्षस्ततः प्राह यदभेद्यं सुरैरपि ॥ करोति विश्वकर्मा तन्मम हेममयं पुरम्॥ ४६ ॥

tArakAkSastataH prAha yadabhedyaM surairapi ॥ karoti vizvakarmA tanmama hemamayaM puram॥ 46 ॥

ययाचे कमलाक्षस्तु राजतं सुमहत्पुरम् ॥ विद्युन्माली च संहृष्टो वज्रायसमयं महत्॥४७॥

yayAce kamalAkSastu rAjataM sumahatpuram ॥ vidyunmAlI ca saMhRSTo vajrAyasamayaM mahat॥47॥

पुरेष्वेतेषु भो ब्रह्मन्नेकस्थानस्थितेषु च ॥ मध्याह्नाभिजिते काले शीतांशौ पुष्प संस्थिते ॥ ४८ ॥

pureSveteSu bho brahmannekasthAnasthiteSu ca ॥ madhyAhnAbhijite kAle zItAMzau puSpa saMsthite ॥ 48 ॥

उपर्युपर्यदृष्टेषु व्योम्नि लीलाभ्रसंस्थिते ॥ वर्षत्सु कालमेघेषु पुष्करावर्तनामसु ॥ ४९ ॥

uparyuparyadRSTeSu vyomni lIlAbhrasaMsthite ॥ varSatsu kAlamegheSu puSkarAvartanAmasu ॥ 49 ॥

तथा वर्षसहस्राते समेष्यामः परस्परम् ॥ एकीभावं गमिष्यंति पुराण्येतानि नान्यथा ॥2-5-1-५०॥

tathA varSasahasrAte sameSyAmaH parasparam ॥ ekIbhAvaM gamiSyaMti purANyetAni nAnyathA ॥2-5-1-50॥

सर्वदेवमयो देवस्सर्वेषां मे कुहेलया॥ असंभवे रथे तिष्ठन् सर्वोपस्करणान्विते ॥ ५१ ॥

sarvadevamayo devassarveSAM me kuhelayA॥ asaMbhave rathe tiSThan sarvopaskaraNAnvite ॥ 51 ॥

असंभाव्यैककांडेन भिनत्तु नगराणि नः ॥ निर्वैरः कृत्तिवासास्तु योस्माकमिति नित्यशः ॥ ५२ । ।

asaMbhAvyaikakAMDena bhinattu nagarANi naH ॥ nirvairaH kRttivAsAstu yosmAkamiti nityazaH ॥ 52 । ।

वंद्यः पूज्योभिवाद्यश्च सोस्माकं निर्दहेत्कथम् ॥ इति चेतसि संधाय तादृशो भुवि दुर्लभः ॥ ५३ ॥

vaMdyaH pUjyobhivAdyazca sosmAkaM nirdahetkatham ॥ iti cetasi saMdhAya tAdRzo bhuvi durlabhaH ॥ 53 ॥

सनत्कुमार उवाच ॥ एतच्छ्रुत्वा वचस्तेषां ब्रह्मा लोकपितामहः ॥ एवमस्तीति तान् प्राह सृष्टिकर्ता स्मरञ्शिवम् ॥५४॥

sanatkumAra uvAca ॥ etacchrutvA vacasteSAM brahmA lokapitAmahaH ॥ evamastIti tAn prAha sRSTikartA smaraJzivam ॥54॥

आज्ञां ददौ मयस्यापि कुत्र त्वं नगरत्रयम् ॥ कांचनं राजतं चैव आयसं चेति भो मय ॥५५॥

AjJAM dadau mayasyApi kutra tvaM nagaratrayam ॥ kAMcanaM rAjataM caiva AyasaM ceti bho maya ॥55॥

इत्यादिश्य मयं ब्रह्मा प्रत्यक्षं प्राविशद्दिवम् ॥ तेषां तारकपुत्राणां पश्यतां निजधाम हि ॥५६॥

ityAdizya mayaM brahmA pratyakSaM prAvizaddivam ॥ teSAM tArakaputrANAM pazyatAM nijadhAma hi ॥56॥

ततो मयश्च तपसा चक्रे धीरः पुराण्यथ ॥ कांचनं तारकाक्षस्य कमलाक्षस्य राजतम् ॥५७॥

tato mayazca tapasA cakre dhIraH purANyatha ॥ kAMcanaM tArakAkSasya kamalAkSasya rAjatam ॥57॥

विद्युन्माल्यायसं चैव त्रिविधं दुर्गमुत्तमम् ॥ स्वर्गे व्योम्नि च भूमौ च क्रमाज्ज्ञेयानि तानि वै ॥५८॥

vidyunmAlyAyasaM caiva trividhaM durgamuttamam ॥ svarge vyomni ca bhUmau ca kramAjjJeyAni tAni vai ॥58॥

दत्वा तेभ्यो सुरेभ्यश्च पुराणि त्रीणि वै मयः ॥ प्रविवेश स्वयं तत्र हितकामपरायणः ॥ ५९ ॥

datvA tebhyo surebhyazca purANi trINi vai mayaH ॥ praviveza svayaM tatra hitakAmaparAyaNaH ॥ 59 ॥

एवं पुत्रत्रयं प्राप्य प्रविष्टास्तारकात्मजाः ॥ बुभुजुस्सकलान्भोगान्महाबलपराक्रमाः ॥ 2-5-1-६० ॥

evaM putratrayaM prApya praviSTAstArakAtmajAH ॥ bubhujussakalAnbhogAnmahAbalaparAkramAH ॥ 2-5-1-60 ॥

कल्पद्रुमैश्च संकीर्णं गजवाजिसमाकुलम् ॥ नानाप्रासादसंकीर्णं मणिजालसमा वृतम् ॥ ६१ ॥

kalpadrumaizca saMkIrNaM gajavAjisamAkulam ॥ nAnAprAsAdasaMkIrNaM maNijAlasamA vRtam ॥ 61 ॥

सूर्यमण्डलसंकाशैर्विमानैस्सर्वतोमुखैः ॥ पद्मरागमयैश्चैव शोभितं चन्द्रसन्निभैः ॥ ६२ ॥

sUryamaNDalasaMkAzairvimAnaissarvatomukhaiH ॥ padmarAgamayaizcaiva zobhitaM candrasannibhaiH ॥ 62 ॥

प्रासादैर्गोपुरैर्दिव्यैः कैलासशिखरोपमैः ॥ दिव्यस्त्रीजनसंकीर्णैर्गंधर्वैस्सिद्धचारणैः ॥ ६३ ॥

prAsAdairgopurairdivyaiH kailAsazikharopamaiH ॥ divyastrIjanasaMkIrNairgaMdharvaissiddhacAraNaiH ॥ 63 ॥

रुद्रालयैः प्रतिगृहमग्निहोत्रैः प्रतिष्ठितैः ॥ द्विजोत्तमैश्शास्त्र ज्ञैश्शिवभक्तिरतैस्सदा ॥ ६४ ॥

rudrAlayaiH pratigRhamagnihotraiH pratiSThitaiH ॥ dvijottamaizzAstra jJaizzivabhaktirataissadA ॥ 64 ॥

वापीकूपतडागैश्च दीर्घिकाभिस्सुशोभितम् ॥ उद्यानवनवृक्षैश्च स्वर्गच्युत गुणोत्तमैः ॥ ६५ ॥

vApIkUpataDAgaizca dIrghikAbhissuzobhitam ॥ udyAnavanavRkSaizca svargacyuta guNottamaiH ॥ 65 ॥

नदीनदसरिन्मुख्यपुष्करैः शोभितं सदा ॥ सर्वकामफलाद्यैश्चानेकैर्वृक्षैर्मनोहरम् ॥ ६६ ॥

nadInadasarinmukhyapuSkaraiH zobhitaM sadA ॥ sarvakAmaphalAdyaizcAnekairvRkSairmanoharam ॥ 66 ॥

मत्तमातंगयूथैश्च तुरंगैश्च सुशोभनैः ॥ रथैश्च विविधाकारैश्शिबिकाभिरलंकृतम् ॥६७॥

mattamAtaMgayUthaizca turaMgaizca suzobhanaiH ॥ rathaizca vividhAkAraizzibikAbhiralaMkRtam ॥67॥

समयादिशिकैश्चैव क्रीडास्थानैः पृथक्पृथक् ॥ वेदाध्ययनशालाभिर्विविधाभिः पृथक्पृथक् ॥ ६८ ॥

samayAdizikaizcaiva krIDAsthAnaiH pRthakpRthak ॥ vedAdhyayanazAlAbhirvividhAbhiH pRthakpRthak ॥ 68 ॥

अदृष्टं मनसा वाचा पापान्वितनरैस्सदा ॥ महात्मभिश्शुभाचारैः पुण्यवद्भिः प्रवीक्ष्यते ॥ ६९ ॥

adRSTaM manasA vAcA pApAnvitanaraissadA ॥ mahAtmabhizzubhAcAraiH puNyavadbhiH pravIkSyate ॥ 69 ॥

पतिव्रताभिः सर्वत्र पावितं स्थलमुत्तमम् ॥ पतिसेवनशीलाभिर्विमुखाभिः कुधर्मतः ॥2-5-1-७०॥

pativratAbhiH sarvatra pAvitaM sthalamuttamam ॥ patisevanazIlAbhirvimukhAbhiH kudharmataH ॥2-5-1-70॥

दैत्यशूरैर्महाभागैस्सदारैस्ससुतैर्द्विजैः ॥ श्रौतस्मार्तार्थतत्त्वज्ञैस्स्वधर्मनिरतैर्युतम्॥७१॥

daityazUrairmahAbhAgaissadAraissasutairdvijaiH ॥ zrautasmArtArthatattvajJaissvadharmaniratairyutam॥71॥

व्यूढोरस्कैर्वृषस्कंधैस्सामयुद्धधरैस्सदा॥ प्रशांतैः कुपितैश्चैव कुब्जैर्वामनकैस्तथा॥७२॥

vyUDhoraskairvRSaskaMdhaissAmayuddhadharaissadA॥ prazAMtaiH kupitaizcaiva kubjairvAmanakaistathA॥72॥

नीलोत्पलदलप्रख्यैर्नीलकुंचितमूर्द्धजैः ॥ मयेन रक्षितैस्सर्वैश्शिक्षितैर्युद्धलालसैः ॥ ७३ ॥

nIlotpaladalaprakhyairnIlakuMcitamUrddhajaiH ॥ mayena rakSitaissarvaizzikSitairyuddhalAlasaiH ॥ 73 ॥

वरसमररतैर्युतं समंतादजशिवपूजनया विशुद्धवीर्यैः ॥ रविमरुतमहेन्द्रसंनिकाशैस्सुरमथनैस्सुदृढैस्सुसेवितं यत् ॥७४॥

varasamararatairyutaM samaMtAdajazivapUjanayA vizuddhavIryaiH ॥ ravimarutamahendrasaMnikAzaissuramathanaissudRDhaissusevitaM yat ॥74॥

शास्त्रवेदपुराणेषु येये धर्माः प्रकीर्तिताः ॥ शिवप्रियास्सदा देवास्ते धर्मास्तत्र सर्वतः ॥ ७५ ॥

zAstravedapurANeSu yeye dharmAH prakIrtitAH ॥ zivapriyAssadA devAste dharmAstatra sarvataH ॥ 75 ॥

एवं लब्धवरास्ते तु दैतेयास्तारकात्मजाः ॥ शैवं मयमुपाश्रित्य निवसंति स्म तत्र ह ॥ ७६ ॥

evaM labdhavarAste tu daiteyAstArakAtmajAH ॥ zaivaM mayamupAzritya nivasaMti sma tatra ha ॥ 76 ॥

सर्वं त्रैलोक्यमुत्सार्य प्रविश्य नगराणि ते ॥ कुर्वंति स्म महद्राज्यं शिवमार्गरतास्सदा ॥ ७७ ॥

sarvaM trailokyamutsArya pravizya nagarANi te ॥ kurvaMti sma mahadrAjyaM zivamArgaratAssadA ॥ 77 ॥

ततो महान् गतः कालो वसतां पुण्यकर्मणाम् ॥ यथासुखं यथाजोषं सद्राज्यं कुर्वतां मुने ॥ ७८ ॥

tato mahAn gataH kAlo vasatAM puNyakarmaNAm ॥ yathAsukhaM yathAjoSaM sadrAjyaM kurvatAM mune ॥ 78 ॥