नारद उवाच ॥ जीविते गिरिजापुत्रे देव्या दृष्टे प्रजेश्वर ॥ ततः किमभवत्तत्र कृपया तद्वदाधुना ॥ १ ॥

nArada uvAca ॥ jIvite girijAputre devyA dRSTe prajezvara ॥ tataH kimabhavattatra kRpayA tadvadAdhunA ॥ 1 ॥

ब्रह्मोवाच ॥ जीविते गिरिजापुत्रे देव्या दृष्टे मुनीश्वर ॥ यज्जातं तच्छृणुष्वाद्य वच्मि ते महदुत्सवम् ॥२॥

brahmovAca ॥ jIvite girijAputre devyA dRSTe munIzvara ॥ yajjAtaM tacchRNuSvAdya vacmi te mahadutsavam ॥2॥

जीवितस्स शिवापुत्रो निर्व्यग्रो विकृतो मुने॥ अभिषिक्तस्तदा देवैर्गणाध्यक्षैर्गजाननः ॥३॥

jIvitassa zivAputro nirvyagro vikRto mune॥ abhiSiktastadA devairgaNAdhyakSairgajAnanaH ॥3॥

दृष्ट्वा स्वतनयं देवी शिवा हर्षसमन्विता ॥ गृहीत्वा बालकं दोर्भ्यां प्रमुदा परिषस्वजे॥ ४ ॥

dRSTvA svatanayaM devI zivA harSasamanvitA ॥ gRhItvA bAlakaM dorbhyAM pramudA pariSasvaje॥ 4 ॥

वस्त्राणि विविधानीह नानालंकरणानि च ॥ ददौ प्रीत्या गणेशाय स्वपुत्राय मुदांबिका ॥ ५ ॥

vastrANi vividhAnIha nAnAlaMkaraNAni ca ॥ dadau prItyA gaNezAya svaputrAya mudAMbikA ॥ 5 ॥

पूजयित्वा तया देव्या सिद्धिभिश्चाप्यनेकशः ॥ करेण स्पर्शितस्सोथ सर्वदुःखहरेण वै ॥६॥

pUjayitvA tayA devyA siddhibhizcApyanekazaH ॥ kareNa sparzitassotha sarvaduHkhahareNa vai ॥6॥

पूजयित्वा सुतं देवी मुखमाचुम्ब्य शांकरी ॥ वरान्ददौ तदा प्रीत्या जातस्त्वं दुःखितोऽधुना ॥ ७ ॥

pUjayitvA sutaM devI mukhamAcumbya zAMkarI ॥ varAndadau tadA prItyA jAtastvaM duHkhito'dhunA ॥ 7 ॥

धन्योसि कृतकृत्योसि पूर्वपूज्यो भवाधुना ॥ सर्वेषाममराणां वै सर्वदा दुःखवर्जितः ॥ ८ ॥

dhanyosi kRtakRtyosi pUrvapUjyo bhavAdhunA ॥ sarveSAmamarANAM vai sarvadA duHkhavarjitaH ॥ 8 ॥

आनने तव सिन्दूरं दृश्यते सांप्रतं यदि ॥ तस्मात्त्वं पूजनीयोसि सिन्दूरेण सदा नरैः ॥ ९ ॥

Anane tava sindUraM dRzyate sAMprataM yadi ॥ tasmAttvaM pUjanIyosi sindUreNa sadA naraiH ॥ 9 ॥

पुष्पैर्वा चन्दनैर्वापि गन्धेनैव शुभेन च ॥ नैवेद्ये सुरम्येण नीराजेन विधानतः ॥ 2-4-18-१० ॥

puSpairvA candanairvApi gandhenaiva zubhena ca ॥ naivedye suramyeNa nIrAjena vidhAnataH ॥ 2-4-18-10 ॥

तांम्बूलैरथ दानैश्च तथा प्रक्रमणैरपि ॥ नमस्कारविधानेन पूजां यस्ते विधास्यति ॥ ११ ॥

tAMmbUlairatha dAnaizca tathA prakramaNairapi ॥ namaskAravidhAnena pUjAM yaste vidhAsyati ॥ 11 ॥

तस्य वै सकला सिद्धिर्भविष्यति न संशयः ॥ विघ्नान्यनेकरूपाणि क्षयं यास्यंत्यसंशयम् ॥ १२ ॥

tasya vai sakalA siddhirbhaviSyati na saMzayaH ॥ vighnAnyanekarUpANi kSayaM yAsyaMtyasaMzayam ॥ 12 ॥

ब्रह्मोवाच ॥ इत्युक्त्वा च तदा देवी स्वपुत्रं तं महेश्वरो ॥ नानावस्तुभिरुत्कृष्टं पुनरप्यर्चयत्तथा ॥ १३ ॥

brahmovAca ॥ ityuktvA ca tadA devI svaputraM taM mahezvaro ॥ nAnAvastubhirutkRSTaM punarapyarcayattathA ॥ 13 ॥

ततस्स्वास्थ्यं च देवानां गणानां च विशेषतः ॥ गिरिजाकृपया विप्र जातं तत्क्षणमात्रतः ॥ १४ ॥

tatassvAsthyaM ca devAnAM gaNAnAM ca vizeSataH ॥ girijAkRpayA vipra jAtaM tatkSaNamAtrataH ॥ 14 ॥

एतस्मिंश्च क्षणे देवा वासवाद्याः शिवं मुदा॥ स्तुत्वा प्रसाद्य तं देवं भक्ता निन्युः शिवांतिकम् ॥१५॥

etasmiMzca kSaNe devA vAsavAdyAH zivaM mudA॥ stutvA prasAdya taM devaM bhaktA ninyuH zivAMtikam ॥15॥

संसाद्य गिरिशं पश्चादुत्संगे सन्न्यवेशयन् ॥ बालकं तं महेशान्यास्त्रिजगत्सुखहेतवे ॥१६॥

saMsAdya girizaM pazcAdutsaMge sannyavezayan ॥ bAlakaM taM mahezAnyAstrijagatsukhahetave ॥16॥

शिवोपि तस्य शिरसि दत्त्वा स्वकरपंकजम् ॥ उवाच वचनं देवान् पुत्रोऽयमिति मेऽपरः ॥१७॥

zivopi tasya zirasi dattvA svakarapaMkajam ॥ uvAca vacanaM devAn putro'yamiti me'paraH ॥17॥

गणेशोपि तदोत्थाय नमस्कृत्य शिवाय वै ॥ पार्वत्यै च नमस्कृत्य मह्यं वै विष्णवे तथा ॥१८॥

gaNezopi tadotthAya namaskRtya zivAya vai ॥ pArvatyai ca namaskRtya mahyaM vai viSNave tathA ॥18॥

नारादाद्यानृषीन्सर्वान्सत्वास्थाय पुरोऽब्रवीत्॥ क्षंतव्यश्चापराधो मे मानश्चैवेदृशो नृणाम्॥१९॥

nArAdAdyAnRSInsarvAnsatvAsthAya puro'bravIt॥ kSaMtavyazcAparAdho me mAnazcaivedRzo nRNAm॥19॥

अहं च शंकरश्चैव विष्णुश्चैते त्रयस्सुराः॥ प्रत्यूचुर्युगपत्प्रीत्या ददतो वरमुत्तमम् ॥2-4-18-२०॥

ahaM ca zaMkarazcaiva viSNuzcaite trayassurAH॥ pratyUcuryugapatprItyA dadato varamuttamam ॥2-4-18-20॥

त्रयो वयं सुरवरा यथापूज्या जगत्त्रये॥ तथायं गणनाथश्च सकलैः प्रतिपूज्यताम्॥२१॥

trayo vayaM suravarA yathApUjyA jagattraye॥ tathAyaM gaNanAthazca sakalaiH pratipUjyatAm॥21॥

वयं च प्राकृताश्चायं प्राकृतः पूज्य एव च ॥ गणेशो विघ्नहर्ता हि सर्वकामफलप्रदः ॥२२॥

vayaM ca prAkRtAzcAyaM prAkRtaH pUjya eva ca ॥ gaNezo vighnahartA hi sarvakAmaphalapradaH ॥22॥

एतत्पूजां पुरा कृत्वा पश्चात्पूज्या वयं नरैः ॥ वयं च पूजितास्सर्वे नायं चापूजितो यदा॥२३॥

etatpUjAM purA kRtvA pazcAtpUjyA vayaM naraiH ॥ vayaM ca pUjitAssarve nAyaM cApUjito yadA॥23॥

अस्मिन्नपूजिते देवाः परपूजाकृता यदि ॥ तदा तत्फलहानिः स्यान्नात्र कार्या विचारणा ॥ २४ ॥

asminnapUjite devAH parapUjAkRtA yadi ॥ tadA tatphalahAniH syAnnAtra kAryA vicAraNA ॥ 24 ॥

ब्रह्मोवाच ॥ इत्युक्त्वा स गणेशानो नानावस्तुभिरादरात् ॥ शिवेन पूजितः पूर्वं विष्णुनानु प्रपूजितः ॥२५॥

brahmovAca ॥ ityuktvA sa gaNezAno nAnAvastubhirAdarAt ॥ zivena pUjitaH pUrvaM viSNunAnu prapUjitaH ॥25॥

ब्रह्मणा च मया तत्र पार्वत्या च प्रपूजितः ॥ सर्वैर्देवैर्गणैश्चैव पूजितः परया मुदा ॥२६॥

brahmaNA ca mayA tatra pArvatyA ca prapUjitaH ॥ sarvairdevairgaNaizcaiva pUjitaH parayA mudA ॥26॥

सवैर्मिलित्वा तत्रैव ब्रह्मविष्णुहरादिभिः ॥ सगणेशश्शिवातुष्ट्यै सर्वाध्यक्षो निवेदितः ॥ २७ ॥

savairmilitvA tatraiva brahmaviSNuharAdibhiH ॥ sagaNezazzivAtuSTyai sarvAdhyakSo niveditaH ॥ 27 ॥

पुनश्चैव शिवेनास्मै सुप्रसन्नेन चेतसा ॥ सर्वदा सुखदा लोके वरा दत्ता ह्यनेकशः ॥२८॥

punazcaiva zivenAsmai suprasannena cetasA ॥ sarvadA sukhadA loke varA dattA hyanekazaH ॥28॥

शिव उवाच ॥ हे गिरीन्द्रसुतापुत्र संतुष्टोहं न संशयः ॥ मयि तुष्टे जगत्तुष्टं विरुद्धः कोपि नो भवेत् ॥ २९ ॥

ziva uvAca ॥ he girIndrasutAputra saMtuSTohaM na saMzayaH ॥ mayi tuSTe jagattuSTaM viruddhaH kopi no bhavet ॥ 29 ॥

बालरूपोपि यस्मात्त्वं महाविक्रमकारकः ॥ शक्तिपुत्रस्सुतेजस्वी तस्माद्भव सदा सुखी ॥2-4-18-३०॥

bAlarUpopi yasmAttvaM mahAvikramakArakaH ॥ zaktiputrassutejasvI tasmAdbhava sadA sukhI ॥2-4-18-30॥

त्वन्नाम विघ्नहंतृत्वे श्रेष्ठं चैव भवत्विति॥ मम सर्वगणाध्यक्षः संपूज्यस्त्वं भवाधुना ॥ ३१ ॥

tvannAma vighnahaMtRtve zreSThaM caiva bhavatviti॥ mama sarvagaNAdhyakSaH saMpUjyastvaM bhavAdhunA ॥ 31 ॥

एवमुक्त्वा शंकरेण पूजाविधिरनेकशः ॥ आशिषश्चाप्यनेका हि कृतास्तस्मिंस्तु तत्क्षणात् ॥३२॥

evamuktvA zaMkareNa pUjAvidhiranekazaH ॥ AziSazcApyanekA hi kRtAstasmiMstu tatkSaNAt ॥32॥

ततो देवगणाश्चैव गीत वाद्यं च नृत्यकम् ॥ मुदा ते कारयामासुस्तथैवप्सरसां गणाः ॥३३॥

tato devagaNAzcaiva gIta vAdyaM ca nRtyakam ॥ mudA te kArayAmAsustathaivapsarasAM gaNAH ॥33॥

पुनश्चैव वरो दत्तस्सुप्रसन्नेन शंभुना ॥ तस्मै च गणनाथाय शिवेनैव महात्मना ॥३४॥

punazcaiva varo dattassuprasannena zaMbhunA ॥ tasmai ca gaNanAthAya zivenaiva mahAtmanA ॥34॥

चतुर्थ्यां त्वं समुत्पन्नो भाद्रे मासि गणेश्वर ॥ असिते च तथा पक्षे चंद्रस्योदयने शुभे ॥ ३५ ॥

caturthyAM tvaM samutpanno bhAdre mAsi gaNezvara ॥ asite ca tathA pakSe caMdrasyodayane zubhe ॥ 35 ॥

प्रथमे च तथा यामे गिरिजायास्सुचेतसः ॥ आविर्बभूव ते रूपं यस्मात्ते व्रतमुत्तमम् ।३६॥

prathame ca tathA yAme girijAyAssucetasaH ॥ AvirbabhUva te rUpaM yasmAtte vratamuttamam ।36॥

तस्मात्तद्दिनमारभ्य तस्यामेव तिथौ मुदा ॥ व्रतं कार्यं विशेषेण सर्वसिद्ध्यै सुशोभनम् ॥ ३७ ॥

tasmAttaddinamArabhya tasyAmeva tithau mudA ॥ vrataM kAryaM vizeSeNa sarvasiddhyai suzobhanam ॥ 37 ॥

यावत्पुनस्समायाति वर्षान्ते च चतुर्थिका ॥ तावद्व्रतं च कर्तव्यं तव चैव ममाज्ञया ॥३८॥

yAvatpunassamAyAti varSAnte ca caturthikA ॥ tAvadvrataM ca kartavyaM tava caiva mamAjJayA ॥38॥

संसारे सुखमिच्छन्ति येऽतुलं चाप्यनेकशः ॥ त्वां पूजयन्तु ते भक्त्या चतुर्थ्यां विधिपूर्वकम् ॥३९॥

saMsAre sukhamicchanti ye'tulaM cApyanekazaH ॥ tvAM pUjayantu te bhaktyA caturthyAM vidhipUrvakam ॥39॥

मार्गशीर्षे तथा मासे रमा या वै चतुर्थिका ॥ प्रातःस्नानं तदा कृत्वा व्रतं विप्रान्निवेदयेत ॥2-4-18-४०॥

mArgazIrSe tathA mAse ramA yA vai caturthikA ॥ prAtaHsnAnaM tadA kRtvA vrataM viprAnnivedayeta ॥2-4-18-40॥

दूर्वाभिः पूजनं कार्यमुपवासस्तथाविधः ॥ रात्रेश्च प्रहरे जाते स्नात्वा संपूजयेन्नरः ॥४१ ॥

dUrvAbhiH pUjanaM kAryamupavAsastathAvidhaH ॥ rAtrezca prahare jAte snAtvA saMpUjayennaraH ॥41 ॥

मूर्तिं धातुमयीं कृत्वा प्रवालसंभवां तथा ॥ श्वेतार्कसंभवां चापि मार्द्दिकां निर्मितां तथा॥४२॥

mUrtiM dhAtumayIM kRtvA pravAlasaMbhavAM tathA ॥ zvetArkasaMbhavAM cApi mArddikAM nirmitAM tathA॥42॥

प्रतिष्ठाप्य तदा तत्र पूजयेत्प्रयतः पुमान् ॥ गंधैर्नानाविधैर्दिव्यैश्चन्दनैः पुष्पकैरिह ॥४३॥

pratiSThApya tadA tatra pUjayetprayataH pumAn ॥ gaMdhairnAnAvidhairdivyaizcandanaiH puSpakairiha ॥43॥

वितस्तिमात्रा दूर्वा च व्यंगा वै मूलवर्जिता ॥ ईदृशानां तद्बलानां शतेनैकोत्तरेण ह ॥ ४४ ॥

vitastimAtrA dUrvA ca vyaMgA vai mUlavarjitA ॥ IdRzAnAM tadbalAnAM zatenaikottareNa ha ॥ 44 ॥

एकविंशतिकेनैव पूजयेत्प्रतिमां स्थिताम् ॥ धूपैर्दीपैश्च नैवेद्यैर्विविधैर्गणनायकम् ॥ ४५ ॥

ekaviMzatikenaiva pUjayetpratimAM sthitAm ॥ dhUpairdIpaizca naivedyairvividhairgaNanAyakam ॥ 45 ॥

ताम्बूलाद्यर्घसद्द्रव्यैः प्रणिपत्य स्तवैस्तथा ॥ त्वां तत्र पूजयित्वेत्थं बालचंद्रं च पूजयेत् ॥ ४६ ॥

tAmbUlAdyarghasaddravyaiH praNipatya stavaistathA ॥ tvAM tatra pUjayitvetthaM bAlacaMdraM ca pUjayet ॥ 46 ॥

पश्चाद्विप्रांश्च संपूज्य भोजयेन्मधुरैर्मुदा ॥ स्वयं चैव ततो भुंज्यान्मधुरं लवणं विना ॥४७॥

pazcAdviprAMzca saMpUjya bhojayenmadhurairmudA ॥ svayaM caiva tato bhuMjyAnmadhuraM lavaNaM vinA ॥47॥

विसर्जयेत्ततः पश्चान्नियमं सर्वमात्मनः ॥ गणेशस्मरणं कुर्य्यात्संपूर्णं स्याद्व्रतं शुभम् ॥४८॥

visarjayettataH pazcAnniyamaM sarvamAtmanaH ॥ gaNezasmaraNaM kuryyAtsaMpUrNaM syAdvrataM zubham ॥48॥

एवं व्रतेन संपूर्णे वर्षे जाते नरस्तदा ॥ उद्यापनविधिं कुर्याद्व्रतसम्पूर्त्तिहेतवे ॥४९॥

evaM vratena saMpUrNe varSe jAte narastadA ॥ udyApanavidhiM kuryAdvratasampUrttihetave ॥49॥

द्वादश ब्राह्मणास्तत्र भोजनीया मदाज्ञया ॥ कुंभमेकं च संस्थाप्य पूज्या मूर्तिस्त्वदीयिका ॥2-4-18-५०॥

dvAdaza brAhmaNAstatra bhojanIyA madAjJayA ॥ kuMbhamekaM ca saMsthApya pUjyA mUrtistvadIyikA ॥2-4-18-50॥

स्थण्डिलेष्टपलं कृत्वा तदा वेदविधानतः ॥ होमश्चैवात्र कर्तव्यो वित्तशाठ्यविवर्जितैः ॥ ५१ ॥

sthaNDileSTapalaM kRtvA tadA vedavidhAnataH ॥ homazcaivAtra kartavyo vittazAThyavivarjitaiH ॥ 51 ॥

स्त्रीद्वयं च तथा चात्र बटुकद्वयमादरात्॥ भोजयेत्पूजयित्वा वै मूर्त्यग्रे विधिपूर्वकम् ॥५२॥

strIdvayaM ca tathA cAtra baTukadvayamAdarAt॥ bhojayetpUjayitvA vai mUrtyagre vidhipUrvakam ॥52॥

निशि जागरणं कार्यं पुनः प्रातः प्रपूजयेत्॥ विसर्जनं ततश्चैव पुनरागमनाय च ॥५३॥

nizi jAgaraNaM kAryaM punaH prAtaH prapUjayet॥ visarjanaM tatazcaiva punarAgamanAya ca ॥53॥

बालकाच्चाशिषो ग्राह्यास्स्वस्तिवाचनमेव च ॥ पुष्पांजलिं प्रदद्याच्च व्रतसंपूर्ण हेतवे॥५४॥

bAlakAccAziSo grAhyAssvastivAcanameva ca ॥ puSpAMjaliM pradadyAcca vratasaMpUrNa hetave॥54॥

नमस्कारांस्ततः कृत्वा नानाकार्यं प्रकल्पयेत् ॥ एवं व्रतं कृतं येन तस्येप्सितफलं भवेत् ॥५५॥

namaskArAMstataH kRtvA nAnAkAryaM prakalpayet ॥ evaM vrataM kRtaM yena tasyepsitaphalaM bhavet ॥55॥

यो नित्यं श्रद्धया सार्द्धं पूजां चैव स्व शक्तितः ॥ कुर्य्यात्तव गणेशान सर्वकामफलाप्तये ॥५६॥

yo nityaM zraddhayA sArddhaM pUjAM caiva sva zaktitaH ॥ kuryyAttava gaNezAna sarvakAmaphalAptaye ॥56॥

सिन्दूरैश्चन्दनैश्चैव तंडुलैः केतकैस्तथा ॥ उपचारैरनेकैश्च पूजयेत्त्वां गणे श्वरम् ॥५७॥

sindUraizcandanaizcaiva taMDulaiH ketakaistathA ॥ upacArairanekaizca pUjayettvAM gaNe zvaram ॥57॥

एवं त्वां पूजयेयुर्ये भक्त्या नानोपचारतः ॥ तेषां सिद्धिर्भवेन्नित्यं विघ्ननाशो भवेदिह ॥५८॥

evaM tvAM pUjayeyurye bhaktyA nAnopacArataH ॥ teSAM siddhirbhavennityaM vighnanAzo bhavediha ॥58॥

सर्वैर्वर्णैः प्रकर्त्तव्या स्त्रीभिश्चैव विशेषतः ॥ उदयाभिमुखैश्चैव राजभिश्च विशेषतः ॥५९॥

sarvairvarNaiH prakarttavyA strIbhizcaiva vizeSataH ॥ udayAbhimukhaizcaiva rAjabhizca vizeSataH ॥59॥

यं यं कामयते यो वै तंतमाप्नोति निश्चितम् ॥ अतः कामयमानेन तेन सेव्यस्सदा भवान् ॥ 2-4-18-६० ॥

yaM yaM kAmayate yo vai taMtamApnoti nizcitam ॥ ataH kAmayamAnena tena sevyassadA bhavAn ॥ 2-4-18-60 ॥

यं यं कामयते यो वै तंतमाप्नोति निश्चितम् ॥ अतः कामयमानेन तेन सेव्यस्सदा भवान् ॥ 2-4-18-६० ॥

yaM yaM kAmayate yo vai taMtamApnoti nizcitam ॥ ataH kAmayamAnena tena sevyassadA bhavAn ॥ 2-4-18-60 ॥

तथेत्युक्त्वा तु तैस्सर्वैर्गणैश्शंभुप्रियैर्मुने ॥ पूजितो हि गणाधीशो विधिना परमेण सः॥६२॥

tathetyuktvA tu taissarvairgaNaizzaMbhupriyairmune ॥ pUjito hi gaNAdhIzo vidhinA parameNa saH॥62॥

ततश्चैव गणास्सर्वे प्रणेमुस्ते गणेश्वरम् ॥ समानर्चुर्विशेषेण नानावस्तुभिरादरात् ॥ ६३ ॥

tatazcaiva gaNAssarve praNemuste gaNezvaram ॥ samAnarcurvizeSeNa nAnAvastubhirAdarAt ॥ 63 ॥

गिरिजायास्समुत्पन्नो यश्च हर्षो मुनीश्वर ॥ चतुर्भिर्वदनैर्वै तमवर्ण्यं च कथं ब्रुवे ॥ ६४ ॥

girijAyAssamutpanno yazca harSo munIzvara ॥ caturbhirvadanairvai tamavarNyaM ca kathaM bruve ॥ 64 ॥

देवदुंदुभयो नेदुर्ननृतुश्चाप्सरोगणाः ॥ जगुर्गंधर्वमुख्याश्च पुष्पवर्षं पपात ह ॥ ६५ ॥

devaduMdubhayo nedurnanRtuzcApsarogaNAH ॥ jagurgaMdharvamukhyAzca puSpavarSaM papAta ha ॥ 65 ॥

जगत्स्वास्थ्यं तदा प्राप गणाधीशे प्रतिष्ठिते॥ महोत्सवो महानासीत्सर्वं दुःखं क्षयं गणम् ॥६६॥

jagatsvAsthyaM tadA prApa gaNAdhIze pratiSThite॥ mahotsavo mahAnAsItsarvaM duHkhaM kSayaM gaNam ॥66॥

शिवाशिवौ च मोदेतां विशेषेणाति नारद ॥ आसीत्सुमंगलं भूरि सर्वत्र सुखदायकम्॥६७॥

zivAzivau ca modetAM vizeSeNAti nArada ॥ AsItsumaMgalaM bhUri sarvatra sukhadAyakam॥67॥

ततो देवगणाः सर्वे ऋषीणां च गणास्तथा ॥ समागताश्च ये तत्र जग्मुस्ते तु शिवाज्ञया ॥६८॥

tato devagaNAH sarve RSINAM ca gaNAstathA ॥ samAgatAzca ye tatra jagmuste tu zivAjJayA ॥68॥

प्रशंसंतश्शिवा तत्र गणेशं च पुनः पुनः ॥ शिवं चैव तथा स्तुत्वा कीदृशं युद्धमेव च॥६९॥

prazaMsaMtazzivA tatra gaNezaM ca punaH punaH ॥ zivaM caiva tathA stutvA kIdRzaM yuddhameva ca॥69॥

यदा सा गिरिजा देवी कोपहीना बभूव ह ॥ शिवोऽपि गिरिजां तत्र पूर्ववत्संप्रपद्य ताम्॥2-4-18-७०॥

yadA sA girijA devI kopahInA babhUva ha ॥ zivo'pi girijAM tatra pUrvavatsaMprapadya tAm॥2-4-18-70॥

चकार विविधं सौख्यं लोकानां हितकाम्यया॥ स्वात्मारामोऽपि परमो भक्तकार्योद्यतः सदा ॥७१॥

cakAra vividhaM saukhyaM lokAnAM hitakAmyayA॥ svAtmArAmo'pi paramo bhaktakAryodyataH sadA ॥71॥

विष्णुश्च शिवमापृच्छ्य ब्रह्माहं तं तथैव हि ॥ आगच्छाव स्वधामं च शिवौ संसेव्य भक्तितः ॥ ७२ ॥

viSNuzca zivamApRcchya brahmAhaM taM tathaiva hi ॥ AgacchAva svadhAmaM ca zivau saMsevya bhaktitaH ॥ 72 ॥

नारद त्वं च भगवन्संगीय शिवयोर्यशः ॥ आगमो भवनं स्वं च शिवौ पृष्ट्वा मुनीश्वर ॥ ७३ ॥

nArada tvaM ca bhagavansaMgIya zivayoryazaH ॥ Agamo bhavanaM svaM ca zivau pRSTvA munIzvara ॥ 73 ॥

एतत्ते सर्वमाख्यातं मया वै शिवयोर्यशः ॥ भवत्पृष्टेन विघ्नेश यशस्संमिश्रमादरात्॥७४॥

etatte sarvamAkhyAtaM mayA vai zivayoryazaH ॥ bhavatpRSTena vighneza yazassaMmizramAdarAt॥74॥

इदं सुमंगलाख्यानं यः शृणोति सुसंयतः ॥ सर्वमंगल संयुक्तस्स भवेन्मंगलालयः ॥७५॥

idaM sumaMgalAkhyAnaM yaH zRNoti susaMyataH ॥ sarvamaMgala saMyuktassa bhavenmaMgalAlayaH ॥75॥

अपुत्रो लभते पुत्रं निर्धनो लभते धनम् ॥ भायार्थी लभते भार्यां प्रजार्थी लभते प्रजाम्॥७६॥

aputro labhate putraM nirdhano labhate dhanam ॥ bhAyArthI labhate bhAryAM prajArthI labhate prajAm॥76॥

आरोग्यं लभते रोगी सौभाग्यं दुर्भगो लभेत् ॥ नष्टपुत्रं नष्टधनं प्रोषिता च पतिं लभेत् ॥७७॥

ArogyaM labhate rogI saubhAgyaM durbhago labhet ॥ naSTaputraM naSTadhanaM proSitA ca patiM labhet ॥77॥

शोकाविष्टश्शोकहीनस्स भवेन्नात्र संशयः ॥ इदं गाणेशमाख्यानं यस्य गेहे च तिष्ठति ॥७८॥

zokAviSTazzokahInassa bhavennAtra saMzayaH ॥ idaM gANezamAkhyAnaM yasya gehe ca tiSThati ॥78॥

सदा मंगलसंयुक्तस्स भवेन्नात्र संशयः ॥ यात्राकाले च पुण्याहे यश्शृणोति समाहितः ॥ सर्वाभीष्टं स लभते श्रीगणेशप्रसादतः ॥ ७९ ॥

sadA maMgalasaMyuktassa bhavennAtra saMzayaH ॥ yAtrAkAle ca puNyAhe yazzRNoti samAhitaH ॥ sarvAbhISTaM sa labhate zrIgaNezaprasAdataH ॥ 79 ॥