ब्रह्मोवाच ॥ अथ विष्ण्वादयो देवा मुनयश्च तपोधनाः ॥ कृत्वावश्यककर्माणि यात्रां सन्तेनिरे गिरेः ॥१॥

brahmovAca ॥ atha viSNvAdayo devA munayazca tapodhanAH ॥ kRtvAvazyakakarmANi yAtrAM santenire gireH ॥1॥

ततो गिरिवरः स्नात्वा स्वेष्टं सम्पूज्य यत्नतः ॥ पौरबन्धून्समाहूय जनवासं ययौ मुदा ॥ २ ॥

tato girivaraH snAtvA sveSTaM sampUjya yatnataH ॥ paurabandhUnsamAhUya janavAsaM yayau mudA ॥ 2 ॥

तत्र प्रभुम्प्रपूज्याथ चक्रे सम्प्रार्थनां मुदा ॥ कियद्दिनानि सन्तिष्ठ मद्गेहे सकलैस्सह ॥ ३ ॥

tatra prabhumprapUjyAtha cakre samprArthanAM mudA ॥ kiyaddinAni santiSTha madgehe sakalaissaha ॥ 3 ॥

विलोकनेन ते शम्भो कृतार्थोहं न संशयः ॥ धन्यश्च यस्य मद्गेहे आयातोऽसि सुरैस्सह ॥ ४ ॥

vilokanena te zambho kRtArthohaM na saMzayaH ॥ dhanyazca yasya madgehe AyAto'si suraissaha ॥ 4 ॥

ब्रह्मोवाच ॥ इत्युक्त्वा बहु शैलेशः करौ बद्ध्वा प्रणम्य च ॥ प्रभुन्निमन्त्रयामास सह विष्णुसुरादिभिः ॥५॥

brahmovAca ॥ ityuktvA bahu zailezaH karau baddhvA praNamya ca ॥ prabhunnimantrayAmAsa saha viSNusurAdibhiH ॥5॥

अथ ते मनसा गत्वा शिव संयुतमादरात् ॥ प्रत्यूचुर्मुनयो देवा हृष्टा विष्णुसुरादिभिः ॥ ६ ॥

atha te manasA gatvA ziva saMyutamAdarAt ॥ pratyUcurmunayo devA hRSTA viSNusurAdibhiH ॥ 6 ॥

॥ देवा ऊचुः ॥ धन्यस्त्वं गिरिशार्दूल तव कीर्तिर्महीयसी ॥ त्वत्समो न त्रिलोकेषु कोपि पुण्यतमो जनः ॥ ७ ॥

॥ devA UcuH ॥ dhanyastvaM girizArdUla tava kIrtirmahIyasI ॥ tvatsamo na trilokeSu kopi puNyatamo janaH ॥ 7 ॥

यस्य द्वारि महेशानः परब्रह्म सतां गतिः ॥ समागतस्सदासैश्च कृपया भक्तवत्सलः ॥ ८ ॥

yasya dvAri mahezAnaH parabrahma satAM gatiH ॥ samAgatassadAsaizca kRpayA bhaktavatsalaH ॥ 8 ॥

जनावासोतिरम्यश्च सम्मानो विविधः कृतः ॥ भोजनानि त्वपूर्वाणि न वर्ण्यानि गिरीश्वर ॥ ९ ॥

janAvAsotiramyazca sammAno vividhaH kRtaH ॥ bhojanAni tvapUrvANi na varNyAni girIzvara ॥ 9 ॥

चित्रन्न खलु तत्रास्ति यत्र देवी शिवाम्बिका ॥ परिपूर्णमशेषञ्च यवं धन्या यदागताः ॥ 2-3-53-१० ॥

citranna khalu tatrAsti yatra devI zivAmbikA ॥ paripUrNamazeSaJca yavaM dhanyA yadAgatAH ॥ 2-3-53-10 ॥

॥ ब्रह्मोवाच ॥ इत्थम्परस्परन्तत्र प्रशंसाभवदुत्तमा ॥ उत्सवो विविधो जातो वेदसाधुजयध्वनिः ॥ ११ ॥

॥ brahmovAca ॥ itthamparasparantatra prazaMsAbhavaduttamA ॥ utsavo vividho jAto vedasAdhujayadhvaniH ॥ 11 ॥

अभून्मङ्गलगानञ्च ननर्ताप्सरसांगणः ॥ नुतिञ्चक्रुर्मागधाद्या द्रव्यदानमभूद्बहु ॥ १२ ॥

abhUnmaGgalagAnaJca nanartApsarasAMgaNaH ॥ nutiJcakrurmAgadhAdyA dravyadAnamabhUdbahu ॥ 12 ॥

तत आमन्त्रय देवेशं स्वगेहमगमद्गिरिः ॥ भोजनोत्सवमारेभे नानाविधिविधानतः ॥ १३ ॥

tata Amantraya devezaM svagehamagamadgiriH ॥ bhojanotsavamArebhe nAnAvidhividhAnataH ॥ 13 ॥

भोजनार्थं प्रभुम्प्रीत्यानयामास यथोचितम् ॥ परिवारसमेतं च सकुतूहलमीश्वरम् ॥ १४ ॥

bhojanArthaM prabhumprItyAnayAmAsa yathocitam ॥ parivArasametaM ca sakutUhalamIzvaram ॥ 14 ॥

प्रक्षाल्य चरणौ शम्भोर्विष्णोर्मम वरादरात् ॥ सर्वेषाममराणाञ्च मुनीनाञ्च यथार्थतः ॥ १५ ॥

prakSAlya caraNau zambhorviSNormama varAdarAt ॥ sarveSAmamarANAJca munInAJca yathArthataH ॥ 15 ॥

परेषाञ्च गतानाञ्च गिरीशो मण्डपान्तरे ॥ आसयामास सुप्रीत्या तांस्तान्बन्धुभिरन्वितः ॥१६॥

pareSAJca gatAnAJca girIzo maNDapAntare ॥ AsayAmAsa suprItyA tAMstAnbandhubhiranvitaH ॥16॥

सुरसैर्विविधान्नैश्च तर्पयामास तान्गिरिः ॥ बुभुजुर्निखिलास्ते वै शम्भुना विष्णुना मया ॥१७॥

surasairvividhAnnaizca tarpayAmAsa tAngiriH ॥ bubhujurnikhilAste vai zambhunA viSNunA mayA ॥17॥

तदानीम्पुरनार्यश्च गालीदानम्व्यधुर्मुदा ॥ मृदुवाण्या हसन्त्यश्च पश्यन्त्यो यत्नतश्च तान् ॥१८॥

tadAnImpuranAryazca gAlIdAnamvyadhurmudA ॥ mRduvANyA hasantyazca pazyantyo yatnatazca tAn ॥18॥

ते भुक्त्वाचम्य विधिवद्गिरिमामन्त्र्य नारद ॥ स्वस्थानम्प्रययुस्सर्वे मुदितास्तृप्तिमागताः ॥१९॥

te bhuktvAcamya vidhivadgirimAmantrya nArada ॥ svasthAnamprayayussarve muditAstRptimAgatAH ॥19॥

इत्थन्तृतीये घस्रेऽपि मानितास्तेऽभवन्मुने ॥ गिरीश्वरेण विधिवद्दानमानादरादिभिः ॥2-3-53-२०॥

itthantRtIye ghasre'pi mAnitAste'bhavanmune ॥ girIzvareNa vidhivaddAnamAnAdarAdibhiH ॥2-3-53-20॥

चतुर्थे दिवसे प्राप्ते चतुर्थीकर्म शुद्धितः ॥ बभूव विधिवद्येन विना खण्डित एव सः ॥ २१ ॥

caturthe divase prApte caturthIkarma zuddhitaH ॥ babhUva vidhivadyena vinA khaNDita eva saH ॥ 21 ॥

उत्सवो विविधश्चासीत्साधुवादजयध्वनिः ॥ बहुदानं सुगानञ्च नर्त्तनम्विविधन्तथा ॥ २२ ॥

utsavo vividhazcAsItsAdhuvAdajayadhvaniH ॥ bahudAnaM sugAnaJca narttanamvividhantathA ॥ 22 ॥

पञ्चमे दिवसे प्राप्ते सर्वे देवा मुदान्विताः ॥ विज्ञप्तिञ्चक्रिरे शैलं यात्रार्थमतिप्रेमतः ॥ २३ ॥

paJcame divase prApte sarve devA mudAnvitAH ॥ vijJaptiJcakrire zailaM yAtrArthamatipremataH ॥ 23 ॥

तदाकर्ण्य गिरीशश्चोवाच देवान् कृताञ्जलिः ॥ कियद्दिनानि तिष्ठन्तु कृपाङ्कुर्वन्तु मां सुराः ॥२४॥

tadAkarNya girIzazcovAca devAn kRtAJjaliH ॥ kiyaddinAni tiSThantu kRpAGkurvantu mAM surAH ॥24॥

इत्युक्त्वा स्नेहतस्ताँश्च प्रभुम्विष्णुञ्च माम्परान् ॥ वासयामास दिवसान् बहून्नित्यं समादरात् ॥२९॥

ityuktvA snehatastA~zca prabhumviSNuJca mAmparAn ॥ vAsayAmAsa divasAn bahUnnityaM samAdarAt ॥29॥

इत्थम्व्यतीयुर्दिवसा बहवो वसतां च तत् ॥ सप्तर्षीन्प्रेषयामासुर्गिरीशान्ते ततस्सुराः ॥ २६ ॥

itthamvyatIyurdivasA bahavo vasatAM ca tat ॥ saptarSInpreSayAmAsurgirIzAnte tatassurAH ॥ 26 ॥

ते तं सम्बोधयामासुर्मेनाञ्च समयोचितम् ॥ शिवतत्त्वम्परम्प्रोचुः प्रशंसन्विधिवन्मुदा ॥ २७ ॥

te taM sambodhayAmAsurmenAJca samayocitam ॥ zivatattvamparamprocuH prazaMsanvidhivanmudA ॥ 27 ॥

अङ्गीकृतं परेशेन तत्तद्बोधनतो मुने ॥ यात्रार्थमगमच्छम्भुश्शैलेशं सामरादिकः ॥ २८ ॥

aGgIkRtaM parezena tattadbodhanato mune ॥ yAtrArthamagamacchambhuzzailezaM sAmarAdikaH ॥ 28 ॥

यात्राङ्कुर्वति देवेशे स्वशैलं सामरे शिवे ॥ उच्चै रुरोद सा मेना तमुवाच कृपानिधिम् ॥ २९ ॥

yAtrAGkurvati deveze svazailaM sAmare zive ॥ uccai ruroda sA menA tamuvAca kRpAnidhim ॥ 29 ॥

मेनोवाच ॥ कृपानिधे कृपाङ्कृत्वा शिवां सम्पालयिष्यसि ॥ सहस्रदोषं पार्वत्या आशुतोषः क्षमिष्यसि ॥ 2-3-53-३० ॥

menovAca ॥ kRpAnidhe kRpAGkRtvA zivAM sampAlayiSyasi ॥ sahasradoSaM pArvatyA AzutoSaH kSamiSyasi ॥ 2-3-53-30 ॥

त्वत्पादाम्बुजभक्ता च मद्वत्सा जन्मजन्मनि ॥ स्वप्ने ज्ञाने स्मृतिर्नास्ति महादेवं प्रभुम्बिना ॥ ३१ ॥

tvatpAdAmbujabhaktA ca madvatsA janmajanmani ॥ svapne jJAne smRtirnAsti mahAdevaM prabhumbinA ॥ 31 ॥

त्वद्भक्तिश्रुतिमात्रेण हर्षाश्रुपुलकान्विता ॥ त्वन्निन्दया भवेन्मौना मृत्युंजय मृता इव ॥३२॥

tvadbhaktizrutimAtreNa harSAzrupulakAnvitA ॥ tvannindayA bhavenmaunA mRtyuMjaya mRtA iva ॥32॥

ब्रह्मोवाच ॥ इत्युक्त्वा मेनका तस्मै समर्प्य स्वसुतान्तदा ॥ अत्युच्चै रोदनङ्कृत्वा मूर्च्छामाप तयोः पुरः॥३३॥

brahmovAca ॥ ityuktvA menakA tasmai samarpya svasutAntadA ॥ atyuccai rodanaGkRtvA mUrcchAmApa tayoH puraH॥33॥

अथ मेनाम्बोधयित्वा तामामन्त्र्य गिरिस्तथा॥ चकार यात्रान्देवैश्च महोत्सवपुरस्सरम् ॥३४॥

atha menAmbodhayitvA tAmAmantrya giristathA॥ cakAra yAtrAndevaizca mahotsavapurassaram ॥34॥

अथ ते निर्जरास्सर्वे प्रभुणा स्वगणैस्सह ॥ यात्राम्प्रचक्रिरे तूष्णीं गिरिम्प्रति शिवं दधुः ॥ ॥३५॥

atha te nirjarAssarve prabhuNA svagaNaissaha ॥ yAtrAmpracakrire tUSNIM girimprati zivaM dadhuH ॥ ॥35॥

हिमाचलपुरीबाह्योपवने हर्षितास्सुराः॥ सेश्वरास्सोत्सवास्तस्थुः पर्यैषन्त शिवागमम्॥३६॥

himAcalapurIbAhyopavane harSitAssurAH॥ sezvarAssotsavAstasthuH paryaiSanta zivAgamam॥36॥

इत्युक्ता शिवसद्यात्रा देवैस्सह मुनीश्वर॥ आकर्णय शिवयात्रां विरहोत्सवसंयुताम् ॥ ३७ ॥

ityuktA zivasadyAtrA devaissaha munIzvara॥ AkarNaya zivayAtrAM virahotsavasaMyutAm ॥ 37 ॥