ब्रह्मोवाच ॥ अथ शैलवरस्तात हिमवान्भाग्यसत्तमः ॥ प्राङ्गणं रचयामास भोजनार्थं विचक्षणः ॥१॥

brahmovAca ॥ atha zailavarastAta himavAnbhAgyasattamaH ॥ prAGgaNaM racayAmAsa bhojanArthaM vicakSaNaH ॥1॥

मार्जनं लेपनं सम्यक्कारयामास तस्य सः ॥ स सुगन्धैरलञ्चक्रे नानावस्तुभिरादरात् ॥२॥

mArjanaM lepanaM samyakkArayAmAsa tasya saH ॥ sa sugandhairalaJcakre nAnAvastubhirAdarAt ॥2॥

अथ शैलस्सुरान्सर्वानन्यानपि च सेश्वरान् ॥ भोजनायाह्वयामास पुत्रैश्शैलैः परैरपि ॥३॥

atha zailassurAnsarvAnanyAnapi ca sezvarAn ॥ bhojanAyAhvayAmAsa putraizzailaiH parairapi ॥3॥

शैलाह्वानमथाकर्ण्य स प्रभुस्साच्युतो मुने ॥ सर्वैस्सुरादिभिस्तत्र भोजनाय ययौ मुदा॥४॥

zailAhvAnamathAkarNya sa prabhussAcyuto mune ॥ sarvaissurAdibhistatra bhojanAya yayau mudA॥4॥

गिरिः प्रभुं च सर्वांस्तान्सुसत्कृत्य यथाविधि ॥ मुदोपवेशयामास सत्पीठेषु गृहान्तरे ॥५॥

giriH prabhuM ca sarvAMstAnsusatkRtya yathAvidhi ॥ mudopavezayAmAsa satpITheSu gRhAntare ॥5॥

नानासुभोज्यवस्तूनि परिविष्य च तत्पुनः ॥ साञ्चलिर्भोजनायाज्ञां चक्रे विज्ञप्तिमानतः॥६॥

nAnAsubhojyavastUni pariviSya ca tatpunaH ॥ sAJcalirbhojanAyAjJAM cakre vijJaptimAnataH॥6॥

अथ सम्मानितास्तत्र देवा विष्णुपुरोगमाः ॥ सदाशिवं पुरस्कृत्य बुभुजुस्सकलाश्च ते ॥७॥

atha sammAnitAstatra devA viSNupurogamAH ॥ sadAzivaM puraskRtya bubhujussakalAzca te ॥7॥

तदा सर्वे हि मिलिता ऐकपद्येन सर्वशः ॥ पंक्तिभूताश्च बुभुजु र्विहसन्तः पृथक्पृथक् ॥८॥

tadA sarve hi militA aikapadyena sarvazaH ॥ paMktibhUtAzca bubhuju rvihasantaH pRthakpRthak ॥8॥

नन्दिभृंगिवीरभद्रवीरभद्रगणाः पृथक्॥ बुभुजुस्ते महाभागाः कुतूहलसमन्विताः ॥९॥

nandibhRMgivIrabhadravIrabhadragaNAH pRthak॥ bubhujuste mahAbhAgAH kutUhalasamanvitAH ॥9॥

देवास्सेन्द्रा लोकपाला नानाशोभासमन्विताः ॥ बुभुजुस्ते महाभागा नानाहास्यरसैस्सह ॥2-3-52-१०॥

devAssendrA lokapAlA nAnAzobhAsamanvitAH ॥ bubhujuste mahAbhAgA nAnAhAsyarasaissaha ॥2-3-52-10॥

सर्वे च मुनयो विप्रा भृग्वाद्या ऋषयस्तथा॥ बुभुजु प्रीतितस्सर्वे पृथक् पंक्तिगतास्तदा॥११॥

sarve ca munayo viprA bhRgvAdyA RSayastathA॥ bubhuju prItitassarve pRthak paMktigatAstadA॥11॥

तथा चण्डीगणास्सर्वे बुभुजुः कृतभाजनाः ॥ कुतूहलं प्रकुर्वन्तो नानाहास्यकरा मुदा॥१२॥

tathA caNDIgaNAssarve bubhujuH kRtabhAjanAH ॥ kutUhalaM prakurvanto nAnAhAsyakarA mudA॥12॥

एवन्ते भुक्तवन्तश्चाचम्य सर्वे मुदान्विताः ॥ विश्रामार्थं गताः प्रीत्या विष्ण्वाद्यास्स्वस्वमाश्रमम् ॥ १३ ॥

evante bhuktavantazcAcamya sarve mudAnvitAH ॥ vizrAmArthaM gatAH prItyA viSNvAdyAssvasvamAzramam ॥ 13 ॥

मेनाज्ञया स्त्रियस्साध्व्य श्शिवं सम्प्रार्थ्य भक्तितः ॥ गेहे निवासयामासुर्वासाख्ये परमोत्सवे ॥ १४ ॥

menAjJayA striyassAdhvya zzivaM samprArthya bhaktitaH ॥ gehe nivAsayAmAsurvAsAkhye paramotsave ॥ 14 ॥

रत्नसिंहासने शम्भुर्मेनादत्ते मनोहरे ॥ सन्निधाय मुदा युक्तो ददृशे वासमन्दिरम्॥१५॥

ratnasiMhAsane zambhurmenAdatte manohare ॥ sannidhAya mudA yukto dadRze vAsamandiram॥15॥

रत्नप्रदीपशतकैर्ज्वलद्भिर्ज्वलितं श्रिया ॥ रत्नपात्रघटाकीर्णं मुक्तामणिविराजितम्॥१६॥

ratnapradIpazatakairjvaladbhirjvalitaM zriyA ॥ ratnapAtraghaTAkIrNaM muktAmaNivirAjitam॥16॥

रत्नदर्प्पणशोभाढ्यं मण्डितं श्वेतचामरैः॥ मुक्तामणिसुमालाभिर्वेष्टितं परमर्द्धिमत्॥१७॥

ratnadarppaNazobhADhyaM maNDitaM zvetacAmaraiH॥ muktAmaNisumAlAbhirveSTitaM paramarddhimat॥17॥

अनूपमम्महादिव्यं विचित्रं सुमनोहरम्॥ चित्ताह्लादकरं नानारचनारचितस्थलम् ॥१८॥

anUpamammahAdivyaM vicitraM sumanoharam॥ cittAhlAdakaraM nAnAracanAracitasthalam ॥18॥

शिवदत्तवरस्यैव प्रभावमतुलम्परम् ॥ दर्शयन्तं समुल्लासि शिवलोकाभिधानकम् ॥१९॥

zivadattavarasyaiva prabhAvamatulamparam ॥ darzayantaM samullAsi zivalokAbhidhAnakam ॥19॥

नानासुगन्धसद्द्रव्यैर्वासितं सुप्रकाशकम् ॥ चन्दनागुरुसंयुक्तं पुष्पशय्यासमन्वितम् ॥2-3-52-२०॥

nAnAsugandhasaddravyairvAsitaM suprakAzakam ॥ candanAgurusaMyuktaM puSpazayyAsamanvitam ॥2-3-52-20॥

नानाचित्रविचित्राढ्यं निर्मितं विश्वकर्म्मणा ॥ रत्नेन्द्रसाररचितैराचितं हारकैर्वरैः ॥ २१ ॥

nAnAcitravicitrADhyaM nirmitaM vizvakarmmaNA ॥ ratnendrasAraracitairAcitaM hArakairvaraiH ॥ 21 ॥

कुत्रचित्सुरनिर्माणं वैकुण्ठं सुमनोहरम् ॥ कुत्रचिच्च ब्रह्मलोकं लोकपालपुरं क्वचित् ॥ २२ ॥

kutracitsuranirmANaM vaikuNThaM sumanoharam ॥ kutracicca brahmalokaM lokapAlapuraM kvacit ॥ 22 ॥

कैलासं कुत्रचिद्रम्यं कुत्रचिच्छक्रमन्दिरम् ॥ कुत्रचिच्छिवलोकं च सर्वोपरि विराजितम् ॥ २३ ॥

kailAsaM kutracidramyaM kutracicchakramandiram ॥ kutracicchivalokaM ca sarvopari virAjitam ॥ 23 ॥

एतादृशगृहं सर्वदृष्टाश्चर्य्यं महेश्वरः ॥ प्रशंसन् हिमशैलेशं परितुष्टो बभूव ह ॥ २४ ॥

etAdRzagRhaM sarvadRSTAzcaryyaM mahezvaraH ॥ prazaMsan himazailezaM parituSTo babhUva ha ॥ 24 ॥

तत्रातिरमणीये च रत्नपर्य्यंक उत्तमे ॥ अशयिष्ट मुदा युक्तो लीलया परमेश्वरः ॥ २५ ॥

tatrAtiramaNIye ca ratnaparyyaMka uttame ॥ azayiSTa mudA yukto lIlayA paramezvaraH ॥ 25 ॥

हिमाचलश्च स्वभ्रातॄन्भोजयामास कृत्स्नशः ॥ सर्वानन्यांश्च सुप्रीत्या शेषकृत्यं चकार ह ॥ २६ ॥

himAcalazca svabhrAtRRnbhojayAmAsa kRtsnazaH ॥ sarvAnanyAMzca suprItyA zeSakRtyaM cakAra ha ॥ 26 ॥

एवं कुर्वति शैलेशे स्वपति प्रेष्ठ ईश्वरे ॥ व्यतीता रजनी सर्वा प्रातःकालो बभूव ह ॥ २७ ॥

evaM kurvati zaileze svapati preSTha Izvare ॥ vyatItA rajanI sarvA prAtaHkAlo babhUva ha ॥ 27 ॥

अथ प्रभातकाले च धृत्युत्साहपरायणाः ॥ नानाप्रकारवाद्यानि वादयाञ्चक्रिरे जनाः ॥ २८ ॥

atha prabhAtakAle ca dhRtyutsAhaparAyaNAH ॥ nAnAprakAravAdyAni vAdayAJcakrire janAH ॥ 28 ॥

सर्वे सुरास्समुत्तस्थुर्विष्ण्वाद्यास्सुमुदान्विताः ॥ स्वेष्टं संस्मृत्य देवेशं सज्जिभूतास्ससंभ्रमाः ॥ २९ ॥

sarve surAssamuttasthurviSNvAdyAssumudAnvitAH ॥ sveSTaM saMsmRtya devezaM sajjibhUtAssasaMbhramAH ॥ 29 ॥

स्ववाहनानि सज्जानि कैलासङ्गन्तुमुत्सुकाः ॥ कृत्वा सम्प्रेषयामासुर्धर्मं शिवसमीपतः ॥ 2-3-52-३० ॥

svavAhanAni sajjAni kailAsaGgantumutsukAH ॥ kRtvA sampreSayAmAsurdharmaM zivasamIpataH ॥ 2-3-52-30 ॥

वासगेहमथागत्य धर्मो नारायणाज्ञया ॥ उवाच शंकरं योगी योगीशं समयोचितम् ॥ ३१ ॥

vAsagehamathAgatya dharmo nArAyaNAjJayA ॥ uvAca zaMkaraM yogI yogIzaM samayocitam ॥ 31 ॥

॥ धर्म उवाच ॥ उत्तिष्ठोत्तिष्ठ भद्रन्ते भव नः प्रमथाधिप ॥ जनावासं समागच्छ कृतार्थं कुरु तत्र तान् ॥ ३२ ॥

॥ dharma uvAca ॥ uttiSThottiSTha bhadrante bhava naH pramathAdhipa ॥ janAvAsaM samAgaccha kRtArthaM kuru tatra tAn ॥ 32 ॥

॥ ब्रह्मोवाच ॥ इति धर्मवचः श्रुत्वा विजहास महेश्वरः ॥ ददर्श कृपया दृष्ट्या तल्पमुज्झाञ्चकार ह ॥ ३३ ॥

॥ brahmovAca ॥ iti dharmavacaH zrutvA vijahAsa mahezvaraH ॥ dadarza kRpayA dRSTyA talpamujjhAJcakAra ha ॥ 33 ॥

उवाच विहसन् धर्म त्वमग्रे गच्छ तत्र ह॥ अहमप्यागमिष्यामि द्रुतमेव न संशयः ॥३४॥

uvAca vihasan dharma tvamagre gaccha tatra ha॥ ahamapyAgamiSyAmi drutameva na saMzayaH ॥34॥

॥ ब्रह्मोवाच ॥ इत्युक्तश्शंकरेणाथ जनावासं जगाम सः॥ स्वयङ्गन्तुमना आसीत्तत्र शम्भुरपि प्रभुः॥३५। ।

॥ brahmovAca ॥ ityuktazzaMkareNAtha janAvAsaM jagAma saH॥ svayaGgantumanA AsIttatra zambhurapi prabhuH॥35। ।

तज्ज्ञात्वा स्त्रीगणस्सोसौ तत्रागच्छन्महोत्सवः ॥ चक्रे मंगलगानं हि पश्यन्शम्भुपदद्वयम् ॥३६॥

tajjJAtvA strIgaNassosau tatrAgacchanmahotsavaH ॥ cakre maMgalagAnaM hi pazyanzambhupadadvayam ॥36॥

अथ शंम्भुर्भवाचारी प्रातःकृत्यं विधाय च ॥ मेनामान्त्र्य कुध्रं च जनावासं जगाम सः ॥३७॥

atha zaMmbhurbhavAcArI prAtaHkRtyaM vidhAya ca ॥ menAmAntrya kudhraM ca janAvAsaM jagAma saH ॥37॥

महोत्सवस्तदा चासीद्वेदध्वनिरभून्मुने ॥ वाद्यानि वादयामासुर्जनाश्चातुर्विधानि च ॥३८॥

mahotsavastadA cAsIdvedadhvanirabhUnmune ॥ vAdyAni vAdayAmAsurjanAzcAturvidhAni ca ॥38॥

शम्भुरागत्य स्वस्थानं ववन्दे च मुनींस्तदा ॥ हरिं च मां भवाचारात् वन्दितोऽभूत्सुरादिभिः ॥३९॥

zambhurAgatya svasthAnaM vavande ca munIMstadA ॥ hariM ca mAM bhavAcArAt vandito'bhUtsurAdibhiH ॥39॥

जयशब्दो बभूवाथ नमश्शब्दस्तथैव च ॥ वेदध्वनिश्च शुभदो महाकोलाहलोऽभवत् ॥2-3-52-४०॥

jayazabdo babhUvAtha namazzabdastathaiva ca ॥ vedadhvanizca zubhado mahAkolAhalo'bhavat ॥2-3-52-40॥