॥ ब्रह्मोवाच ॥ अथ शंभुः प्रसन्नात्मा सदूतं स्वगणैस्सुरैः ॥ सर्वैरन्यैर्गिरेर्द्धाम जगाम सकुतूहलम् ॥ १ ॥

॥ brahmovAca ॥ atha zaMbhuH prasannAtmA sadUtaM svagaNaissuraiH ॥ sarvairanyairgirerddhAma jagAma sakutUhalam ॥ 1 ॥

मेनापि स्त्रीगणैस्तैश्च हिमाचलवरप्रिया ॥ तत उत्थाय स्वगृहा भ्यंतरं सा जगाम ह ॥ २ ॥

menApi strIgaNaistaizca himAcalavarapriyA ॥ tata utthAya svagRhA bhyaMtaraM sA jagAma ha ॥ 2 ॥

नीराजनार्थं शम्भोश्च दीपपात्रकरा सती ॥ सर्वर्षिस्त्रीगणैस्साकमगच्छद्द्वारमादरात् ॥ ३ ॥

nIrAjanArthaM zambhozca dIpapAtrakarA satI ॥ sarvarSistrIgaNaissAkamagacchaddvAramAdarAt ॥ 3 ॥

तत्रागतं महेशानं शंकरं गिरिजावरम् ॥ ददर्श प्रीतितो मेना सेवितं सकलैस्सुरैः ॥४॥

tatrAgataM mahezAnaM zaMkaraM girijAvaram ॥ dadarza prItito menA sevitaM sakalaissuraiH ॥4॥

चारुचंपकवर्णाभं ह्येकवक्त्रं त्रिलोचनम्॥ ईषद्धास्यप्रसन्नास्यं रत्नस्वर्णादिभूषितम् ॥५॥

cArucaMpakavarNAbhaM hyekavaktraM trilocanam॥ ISaddhAsyaprasannAsyaM ratnasvarNAdibhUSitam ॥5॥

मालतीमालया युक्तं सद्रत्नमुकुटोज्ज्वलम् ॥ सत्कंठाभरणं चारुवलयांगदभूषितम् ॥६॥

mAlatImAlayA yuktaM sadratnamukuTojjvalam ॥ satkaMThAbharaNaM cAruvalayAMgadabhUSitam ॥6॥

वह्निशौचेनातुलेन त्वतिसूक्ष्मेण चारुणा ॥ अमूल्यवस्त्रयुग्मेन विचित्रेणातिराजितम् ॥७॥

vahnizaucenAtulena tvatisUkSmeNa cAruNA ॥ amUlyavastrayugmena vicitreNAtirAjitam ॥7॥

चन्दनागरुकस्तूरीचारुकुंकुम भूषितम् ॥ रत्नदर्पणहस्तं च कज्जलोज्ज्वललोचनम् ॥८॥

candanAgarukastUrIcArukuMkuma bhUSitam ॥ ratnadarpaNahastaM ca kajjalojjvalalocanam ॥8॥

सर्वस्वप्रभयाच्छन्नमतीवसुमनोहरम् ॥ अतीव तरुणं रम्यं भूषितांगैश्च भूषितम् ॥९॥

sarvasvaprabhayAcchannamatIvasumanoharam ॥ atIva taruNaM ramyaM bhUSitAMgaizca bhUSitam ॥9॥

कामिनीकांतमव्यग्रं कोटिचन्द्राननांबुजम् ॥ कोटिस्मराधिकतनुच्छविं सर्वांगसुंदरम् ॥2-3-46-१०॥

kAminIkAMtamavyagraM koTicandrAnanAMbujam ॥ koTismarAdhikatanucchaviM sarvAMgasuMdaram ॥2-3-46-10॥

ईदृग्विधं सुदेवं तं स्थितं स्वपुरतः प्रभुम् ॥ दृष्ट्वा जामातरं मेना जहौ शोकम्मुदाऽन्विता ॥ ११ ॥

IdRgvidhaM sudevaM taM sthitaM svapurataH prabhum ॥ dRSTvA jAmAtaraM menA jahau zokammudA'nvitA ॥ 11 ॥

प्रशशंस स्वभाग्यं सा गिरिजां भूधरं कुलम् ॥ मेने कृतार्थमात्मानं जहर्ष च पुनः पुनः ॥ १२ ॥

prazazaMsa svabhAgyaM sA girijAM bhUdharaM kulam ॥ mene kRtArthamAtmAnaM jaharSa ca punaH punaH ॥ 12 ॥

नीराजनं चकारासौ प्रफुल्लवदना सती ॥ अवलोकपरा तत्र मेना जामातरं मुदा ॥ १३ ॥

nIrAjanaM cakArAsau praphullavadanA satI ॥ avalokaparA tatra menA jAmAtaraM mudA ॥ 13 ॥

गिरिजोक्तमनुस्मृत्य मेना विस्मयमागता ॥ मनसैव ह्युवाचेदं हर्षफुल्लाननाम्बुजा ॥ १४ ॥

girijoktamanusmRtya menA vismayamAgatA ॥ manasaiva hyuvAcedaM harSaphullAnanAmbujA ॥ 14 ॥

यद्वै पुरोक्तं च तया पार्वत्या मम तत्र च ॥ ततोधिकं प्रपश्यामि सौन्दर्य्यं परमेशितुः ॥ १५ ॥

yadvai puroktaM ca tayA pArvatyA mama tatra ca ॥ tatodhikaM prapazyAmi saundaryyaM paramezituH ॥ 15 ॥

महेशस्य सुलावण्यमनिर्वाच्यं च संप्रति ॥ एवं विस्मयमापन्ना मेना स्वगृहमाययौ ॥१६॥

mahezasya sulAvaNyamanirvAcyaM ca saMprati ॥ evaM vismayamApannA menA svagRhamAyayau ॥16॥

प्रशशंसुर्युवतयो धन्या धन्या गिरेः सुता ॥ दुर्गा भगवतीत्येवमूचुः काश्चन कन्यकाः॥१७॥

prazazaMsuryuvatayo dhanyA dhanyA gireH sutA ॥ durgA bhagavatItyevamUcuH kAzcana kanyakAH॥17॥

न दृष्टो वर इत्येवमस्माभिर्द्दानगोचरः ॥ धन्या हि गिरिजा देवीमूचुः काश्चन कन्यकाः ॥१८॥

na dRSTo vara ityevamasmAbhirddAnagocaraH ॥ dhanyA hi girijA devImUcuH kAzcana kanyakAH ॥18॥

जगुर्गन्धर्व्वप्रवरा ननृतुश्चाप्सरोगणाः ॥ दृष्ट्वा शंकररूपं च प्रहृष्टास्सर्वदेवताः॥१९॥

jagurgandharvvapravarA nanRtuzcApsarogaNAH ॥ dRSTvA zaMkararUpaM ca prahRSTAssarvadevatAH॥19॥

नानाप्रकारवाद्यानि वादका मधुराक्षरम् ॥ नानाप्रकारशिल्पेन वादयामासुरादरात् ॥2-3-46-२०॥

nAnAprakAravAdyAni vAdakA madhurAkSaram ॥ nAnAprakArazilpena vAdayAmAsurAdarAt ॥2-3-46-20॥

हिमाचलोऽपि मुदितो द्वाराचारमथाकरोत् ॥ मेनापि सर्वनारीभिर्महोत्सवपुरस्सरम् ॥२१॥

himAcalo'pi mudito dvArAcAramathAkarot ॥ menApi sarvanArIbhirmahotsavapurassaram ॥21॥

परपुच्छां चकारासौ मुदिता स्वगृहं ययौ ॥ शिवो निवेदितं स्थानं जगाम गणनिर्जरैः ॥२२॥

parapucchAM cakArAsau muditA svagRhaM yayau ॥ zivo niveditaM sthAnaM jagAma gaNanirjaraiH ॥22॥

एतस्मिन्नन्तरे दुर्गां शैलान्तःपुरचारिका ॥ बहिर्जग्मुस्समादाय पूजितुं कुलदेवताम् ॥ २३ ॥

etasminnantare durgAM zailAntaHpuracArikA ॥ bahirjagmussamAdAya pUjituM kuladevatAm ॥ 23 ॥

तत्र तां ददृशुर्देवा निमेषरहिता मुदा ॥ सुनीलांजनवर्णाभां स्वांगैश्च प्रतिभूषिताम्। ॥२४॥

tatra tAM dadRzurdevA nimeSarahitA mudA ॥ sunIlAMjanavarNAbhAM svAMgaizca pratibhUSitAm। ॥24॥

त्रिनेत्रादृतनेत्रांतामन्यवारितलोचनाम् ॥ ईषद्धास्यप्रसन्नास्यां सकटाक्षां मनोहराम् ॥ २५ ॥

trinetrAdRtanetrAMtAmanyavAritalocanAm ॥ ISaddhAsyaprasannAsyAM sakaTAkSAM manoharAm ॥ 25 ॥

सुचारुकबरीभारां चारुपत्रक शोभिताम् ॥ कस्तूरीबिन्दुभिस्सार्द्धं सिन्दूरबिन्दुशोभिताम् ॥२६॥

sucArukabarIbhArAM cArupatraka zobhitAm ॥ kastUrIbindubhissArddhaM sindUrabinduzobhitAm ॥26॥

रत्नेन्द्रसारहारेण वक्षसा सुविराजिताम् ॥ रत्नकेयूरवलयां रत्नकङ्कणमंडिताम् ॥ २७ ॥

ratnendrasArahAreNa vakSasA suvirAjitAm ॥ ratnakeyUravalayAM ratnakaGkaNamaMDitAm ॥ 27 ॥

सद्रत्नकुण्डलाभ्यां च चारुगण्डस्थलोज्ज्वलाम् ॥ मणिरत्नप्रभामुष्टिदन्तराजिविराजिताम् ॥२८॥

sadratnakuNDalAbhyAM ca cArugaNDasthalojjvalAm ॥ maNiratnaprabhAmuSTidantarAjivirAjitAm ॥28॥

मधुबिम्बाधरोष्ठां च रत्नयावकसंयुताम् ॥ रत्नदर्प्पणहस्तां च क्रीडापद्मविभूषिताम् ॥ २९ ॥

madhubimbAdharoSThAM ca ratnayAvakasaMyutAm ॥ ratnadarppaNahastAM ca krIDApadmavibhUSitAm ॥ 29 ॥

चन्दनागुरुकस्तूरीकुंकुमेनाति च र्चिताम् ॥ क्वणन्मंजीरपादां च रक्तांघ्रितलराजिताम् ॥ 2-3-46-३० ॥

candanAgurukastUrIkuMkumenAti ca rcitAm ॥ kvaNanmaMjIrapAdAM ca raktAMghritalarAjitAm ॥ 2-3-46-30 ॥

प्रणेमुश्शिरसा देवीं भक्तियुक्ताः समेनकाम् ॥ सर्वे सुरादयो दृष्ट्वा जगदाद्यां जगत्प्रसूम् ॥ ३१ ॥

praNemuzzirasA devIM bhaktiyuktAH samenakAm ॥ sarve surAdayo dRSTvA jagadAdyAM jagatprasUm ॥ 31 ॥

त्रिनेत्रो नेत्रकोणेन तां ददर्श मुदान्वितः ॥ शिवः सत्याकृतिं दृष्ट्वा विजहौ विरहज्वरम् ॥ ३२ ॥

trinetro netrakoNena tAM dadarza mudAnvitaH ॥ zivaH satyAkRtiM dRSTvA vijahau virahajvaram ॥ 32 ॥

शिवस्सर्वं विसस्मार शिवासंन्यस्तलोचनः ॥ पुलकांचितसर्वाङ्गो हर्षाद्गौरीविलोचनः ॥३३॥

zivassarvaM visasmAra zivAsaMnyastalocanaH ॥ pulakAMcitasarvAGgo harSAdgaurIvilocanaH ॥33॥

अथ कालीबहिः पुर्य्यां गत्वा पूज्य कुलाम्बिकाम् ॥ विवेश भवनं रम्यं स्वपितुस्सद्विजाङ्गना ॥३४॥

atha kAlIbahiH puryyAM gatvA pUjya kulAmbikAm ॥ viveza bhavanaM ramyaM svapitussadvijAGganA ॥34॥

शङ्करोपि सुरैस्सार्द्धं हरिणा ब्राह्मणा तथा ॥ हिमाचलसमुद्दिष्टं स्वस्थानमगमन्मुदा ॥३५॥

zaGkaropi suraissArddhaM hariNA brAhmaNA tathA ॥ himAcalasamuddiSTaM svasthAnamagamanmudA ॥35॥

तत्र सर्वे सुखं तस्थुस्सेवन्तश्शङ्करं यथा ॥ सम्मानिता गिरीशेन नानाविधसुसम्पदा ॥ ३६ ॥

tatra sarve sukhaM tasthussevantazzaGkaraM yathA ॥ sammAnitA girIzena nAnAvidhasusampadA ॥ 36 ॥