नारद उवाच ॥ तात प्राज्ञ वदेदानीं सप्तर्षिषु गतेषु च ॥ किमकार्षीद्धिमगिरिस्तन्मे कृत्वा कृपां प्रभो ॥ १ ॥

nArada uvAca ॥ tAta prAjJa vadedAnIM saptarSiSu gateSu ca ॥ kimakArSIddhimagiristanme kRtvA kRpAM prabho ॥ 1 ॥

॥ ब्रह्मोवाच ॥ गतेषु तेषु मुनिषु सप्तस्वपि मुनीश्वर ॥ सारुन्धतीषु हिमवान् यदकार्षीद्ब्रवीमि ते ॥२॥

॥ brahmovAca ॥ gateSu teSu muniSu saptasvapi munIzvara ॥ sArundhatISu himavAn yadakArSIdbravImi te ॥2॥

तत आमन्त्र्य स्वभ्रातॄन् मेर्वादीन् ससुतप्रियः ॥ महामनास्स मुमुदे हिमवान् पर्वतेश्वरः ॥ ३ ॥

tata Amantrya svabhrAtRRn mervAdIn sasutapriyaH ॥ mahAmanAssa mumude himavAn parvatezvaraH ॥ 3 ॥

तदाज्ञप्तस्ततः प्रीत्या हिमवान् लग्न पत्रिकाम् ॥ लेखयामास सुप्रीत्या गर्गेण स्वपुरोधसा ॥४॥

tadAjJaptastataH prItyA himavAn lagna patrikAm ॥ lekhayAmAsa suprItyA gargeNa svapurodhasA ॥4॥

अथ प्रस्थापयामास तां शिवाय स पत्रिकाम्॥ नानाविधास्तु सामग्र्यः स्वजनैर्मुदितात्मभिः ॥ ५ ॥

atha prasthApayAmAsa tAM zivAya sa patrikAm॥ nAnAvidhAstu sAmagryaH svajanairmuditAtmabhiH ॥ 5 ॥

ते जनास्तत्र गत्वा च कैलासे शिवसन्निधिम् ॥ ददुश्शिवाय तत्पत्रं तिलकं सम्विधाय च ॥ ६ ॥

te janAstatra gatvA ca kailAse zivasannidhim ॥ daduzzivAya tatpatraM tilakaM samvidhAya ca ॥ 6 ॥

सन्मानिता विशेषेण प्रभुणा च यथोचितम् ॥ सर्वे ते प्रीतिमनस आजग्मुश्शैलसन्निधिम् ॥ ७ ॥

sanmAnitA vizeSeNa prabhuNA ca yathocitam ॥ sarve te prItimanasa Ajagmuzzailasannidhim ॥ 7 ॥

सन्मानितान्विशेषेण महेशेनागताञ्जनान् ॥ दृष्ट्वा सुहर्षिताञ्च्छैलो मुमोदातीव चेतसि ॥ ८ ॥

sanmAnitAnvizeSeNa mahezenAgatAJjanAn ॥ dRSTvA suharSitAJcchailo mumodAtIva cetasi ॥ 8 ॥

ततो निमन्त्रणं चक्रे स्वबन्धूनां प्रमोदितः ॥ नानादेशस्थितानाञ्च निखिलानां सुखास्पदम् ॥९॥

tato nimantraNaM cakre svabandhUnAM pramoditaH ॥ nAnAdezasthitAnAJca nikhilAnAM sukhAspadam ॥9॥

ततस्स कारयामास स्वर्णसंग्रहमादरात् ॥ नानाविधाश्च सामग्रीर्विवाहकरणोचिताः ॥ 2-3-37-१० ॥

tatassa kArayAmAsa svarNasaMgrahamAdarAt ॥ nAnAvidhAzca sAmagrIrvivAhakaraNocitAH ॥ 2-3-37-10 ॥

तण्डुलानां बहूञ्छैलान् पृथुकानां तथैव च ॥ गुडानां शर्कराणाञ्च लवणानां तथैव च ॥११॥

taNDulAnAM bahUJchailAn pRthukAnAM tathaiva ca ॥ guDAnAM zarkarANAJca lavaNAnAM tathaiva ca ॥11॥

क्षीराणां च घृतानाञ्च दध्नां वापीश्चकार सः॥ यवादिधान्यपिष्टानां लड्डुकानां तथैव च ॥ १२ ॥

kSIrANAM ca ghRtAnAJca dadhnAM vApIzcakAra saH॥ yavAdidhAnyapiSTAnAM laDDukAnAM tathaiva ca ॥ 12 ॥

शष्कुलीनां स्वस्तिकानां शर्कराणां तथैव च ॥ अमृतेक्षुरसानां च तत्र वापीश्चकार सः ॥१३॥

zaSkulInAM svastikAnAM zarkarANAM tathaiva ca ॥ amRtekSurasAnAM ca tatra vApIzcakAra saH ॥13॥

बह्वीर्हैयंगवानाञ्च ह्यासवानां तथैव च ॥ नाना पक्वान्नसंघांश्च महास्वादुरसाँस्तथा ॥ १४ ॥

bahvIrhaiyaMgavAnAJca hyAsavAnAM tathaiva ca ॥ nAnA pakvAnnasaMghAMzca mahAsvAdurasA~stathA ॥ 14 ॥

नाना व्यञ्जनवस्तूनि गणदेवहितानि च ॥ अमूल्यनानावस्त्राणि वह्निशौचानि यानि च ॥ १५ ॥

nAnA vyaJjanavastUni gaNadevahitAni ca ॥ amUlyanAnAvastrANi vahnizaucAni yAni ca ॥ 15 ॥

मणिरत्नप्रकाराणि सुवर्णरजतानि च ॥ द्रव्याण्येतानि चान्यानि संगृह्य विधिपूर्वकम् ॥ १६ ॥

maNiratnaprakArANi suvarNarajatAni ca ॥ dravyANyetAni cAnyAni saMgRhya vidhipUrvakam ॥ 16 ॥

मंगलं कर्तुमारेभे गिरिर्मंगलकृद्दिने ॥ संस्कारं कारयामासुः पार्वत्याः पर्वतस्त्रियः ॥ १७ ॥

maMgalaM kartumArebhe girirmaMgalakRddine ॥ saMskAraM kArayAmAsuH pArvatyAH parvatastriyaH ॥ 17 ॥

ता मंगलं मुदा चक्रुर्भूषिता भूषणैः स्वयम् ॥ पुरद्विजस्त्रियो दृष्ट्वा लोकाचारं प्रचक्रिरे ॥ १८ ॥

tA maMgalaM mudA cakrurbhUSitA bhUSaNaiH svayam ॥ puradvijastriyo dRSTvA lokAcAraM pracakrire ॥ 18 ॥

सोत्सवं विविधं तत्र सुमंगलपुरस्सरम् ॥ हिमालयोऽपि हृष्टात्मा कृत्वाचारं सुमंगलम् ॥ १९ ॥

sotsavaM vividhaM tatra sumaMgalapurassaram ॥ himAlayo'pi hRSTAtmA kRtvAcAraM sumaMgalam ॥ 19 ॥

सर्वभावेन सुप्रीतो बन्धुवर्गागमोत्सुकः ॥ एतस्मिन्नन्तरे तस्य बान्धवाश्च निमन्त्रिताः ॥ 2-3-37-२० ॥

sarvabhAvena suprIto bandhuvargAgamotsukaH ॥ etasminnantare tasya bAndhavAzca nimantritAH ॥ 2-3-37-20 ॥

आजग्मुस्सस्त्रियो हृष्टास्ससुतास्सपरिच्छदाः ॥ तदैव शृणु देवर्षे गिर्य्यागमनमादृतः ॥२१॥

Ajagmussastriyo hRSTAssasutAssaparicchadAH ॥ tadaiva zRNu devarSe giryyAgamanamAdRtaH ॥21॥

वर्णयामि समासेन शिवप्रीतिविवृद्धये ॥ देवालय गिरिर्यो हि दिव्यरूपधरो महान् ॥ २२ ॥

varNayAmi samAsena zivaprItivivRddhaye ॥ devAlaya giriryo hi divyarUpadharo mahAn ॥ 22 ॥

नानारत्नपरिभ्राजत्समाजस्सपरिच्छदः ॥ नानामणिमहारत्नसारमादाय यत्नतः ॥ २३ ॥

nAnAratnaparibhrAjatsamAjassaparicchadaH ॥ nAnAmaNimahAratnasAramAdAya yatnataH ॥ 23 ॥

सुवेषालंकृतः श्रीमान् जगाम स हिमालयम् ॥ मन्दरस्सर्वशोभाढ्यस्सनारीतनयो गिरिः ॥ २४ ॥

suveSAlaMkRtaH zrImAn jagAma sa himAlayam ॥ mandarassarvazobhADhyassanArItanayo giriH ॥ 24 ॥

सूपायनानि संगृह्य जगाम विविधानि च ॥ अस्ताचलोपि दिव्यात्मा सोपायन उदारधीः ॥२५॥

sUpAyanAni saMgRhya jagAma vividhAni ca ॥ astAcalopi divyAtmA sopAyana udAradhIH ॥25॥

बहुशोभासमायुक्त आजगाम मुदान्वितः ॥ उदयाचल आदाय सद्रत्नानि मणीनपि॥२६॥।

bahuzobhAsamAyukta AjagAma mudAnvitaH ॥ udayAcala AdAya sadratnAni maNInapi॥26॥।

अत्युत्कृष्टपरीवार आजगाम महासुखी ॥ मलयो गिरिराजो हि सपरीवार आदृतः ॥२७॥

atyutkRSTaparIvAra AjagAma mahAsukhI ॥ malayo girirAjo hi saparIvAra AdRtaH ॥27॥

सुदिव्यरचनायुक्त आययौ बहुसद्बलः ॥ सद्यो दर्दुरनामा च मुदितस्सकलत्रकः ॥२८॥

sudivyaracanAyukta Ayayau bahusadbalaH ॥ sadyo darduranAmA ca muditassakalatrakaH ॥28॥

बहुशोभान्वितस्तातः ययौ हिमगिरेर्गृहम्॥ निषदोपि प्रहृष्टात्मा सपरिच्छद आययौ ॥२९॥

bahuzobhAnvitastAtaH yayau himagirergRham॥ niSadopi prahRSTAtmA saparicchada Ayayau ॥29॥

ससुतस्त्रीगणः प्रीत्या ययौ हिमगिरेर्गृहम् ॥ आजगाम महाभाग्यो भूधरो गन्धमादनः ॥2-3-37-३० ॥

sasutastrIgaNaH prItyA yayau himagirergRham ॥ AjagAma mahAbhAgyo bhUdharo gandhamAdanaH ॥2-3-37-30 ॥

करवीरस्तथैवापि महाविभव संयुतः ॥ महेन्द्रः पर्वतश्रेष्ठ आजगाम हिमालयम् ॥३ १ ॥

karavIrastathaivApi mahAvibhava saMyutaH ॥ mahendraH parvatazreSTha AjagAma himAlayam ॥3 1 ॥

सगणस्ससुतस्त्रीको बहुशोभासमन्वितः ॥ पारियात्रो हि हृष्टात्मा मणि रत्नाकरस्सयुत् ॥३२॥

sagaNassasutastrIko bahuzobhAsamanvitaH ॥ pAriyAtro hi hRSTAtmA maNi ratnAkarassayut ॥32॥

सगणस्सपरीवार आययौ हिमभूधरम् ॥ क्रौञ्चः पर्वतराजो हि महाबलपरिच्छदः ॥ आजगाम गिरिश्रेष्ठस्स मुपायन आदृतः ॥३३॥

sagaNassaparIvAra Ayayau himabhUdharam ॥ krauJcaH parvatarAjo hi mahAbalaparicchadaH ॥ AjagAma girizreSThassa mupAyana AdRtaH ॥33॥

पुरुषोत्तमशैलोपि सपरिच्छद आदृतः ॥ महोपायनमादायाजगाम हिमभूधरम् ॥३४॥

puruSottamazailopi saparicchada AdRtaH ॥ mahopAyanamAdAyAjagAma himabhUdharam ॥34॥

नीलः सलीलस्स सुतस्सस्त्रीको द्रव्यसंयुतः ॥ आजगाम हिमागस्य गृहमानन्दसंयुतः ॥३५॥

nIlaH salIlassa sutassastrIko dravyasaMyutaH ॥ AjagAma himAgasya gRhamAnandasaMyutaH ॥35॥

त्रिकूटश्चित्रकूटोपि वेंकटः श्रीगिरिस्तथा ॥ गोकामुखी नारदश्च हिमगेहमुपागमत् ॥ ३६ ॥

trikUTazcitrakUTopi veMkaTaH zrIgiristathA ॥ gokAmukhI nAradazca himagehamupAgamat ॥ 36 ॥

विन्ध्यश्च पर्वतश्रेष्ठो नानासम्पत्समन्वितः ॥ आजगाम प्रहृष्टात्मा सदारतनयश्शुभः ॥३७॥

vindhyazca parvatazreSTho nAnAsampatsamanvitaH ॥ AjagAma prahRSTAtmA sadAratanayazzubhaH ॥37॥

कालंजरो महाशैलो बहुहर्षसमन्वितः ॥ बहुभस्सगणः प्रीत्याजगामहिमभूधरम् ॥३८॥

kAlaMjaro mahAzailo bahuharSasamanvitaH ॥ bahubhassagaNaH prItyAjagAmahimabhUdharam ॥38॥

कैलासस्तु महाशैलो महाहर्षसमन्वितः॥ आजगाम कृपां कृत्वा सर्वोपरि लसत्प्रभुः ॥३९॥

kailAsastu mahAzailo mahAharSasamanvitaH॥ AjagAma kRpAM kRtvA sarvopari lasatprabhuH ॥39॥

अन्येपि भूभृतो ये हि द्वीपेष्वन्येष्वपि द्विज ॥ इहापि येऽचलास्सर्वे आययुस्ते हिमालयम् ॥ 2-3-37-४० ॥

anyepi bhUbhRto ye hi dvIpeSvanyeSvapi dvija ॥ ihApi ye'calAssarve Ayayuste himAlayam ॥ 2-3-37-40 ॥

निमन्त्रिता नगास्तत्र तेन पूर्वं मुदा मुने ॥ आययुर्निखिलाः प्रीत्या विवाहश्शिवयोरिति ॥४१॥

nimantritA nagAstatra tena pUrvaM mudA mune ॥ AyayurnikhilAH prItyA vivAhazzivayoriti ॥41॥

तदा सर्वे समायाताश्शोणभद्रादयः खलु॥ बहुशोभा महाप्रीत्या विवाहश्शिवयोरिति॥४२॥

tadA sarve samAyAtAzzoNabhadrAdayaH khalu॥ bahuzobhA mahAprItyA vivAhazzivayoriti॥42॥

नद्यस्सर्वास्समायाता नानालंकारसंयुताः ॥ दिव्य रूपधराः प्रीत्या विवाहश्शिवयोरिति ॥४३॥

nadyassarvAssamAyAtA nAnAlaMkArasaMyutAH ॥ divya rUpadharAH prItyA vivAhazzivayoriti ॥43॥

गोदावरी च यमुना ब्रह्मस्त्रीर्वेणिका तथा ॥ आययौ हिमशैलम्वै विवाहश्शिवयोरिति ॥४४॥

godAvarI ca yamunA brahmastrIrveNikA tathA ॥ Ayayau himazailamvai vivAhazzivayoriti ॥44॥

गंगा तु सुमहाप्रीत्या नानालंकारसंयुता ॥ दिव्यरूपा ययौ प्रीत्या विवाहश्शिवयोरिति ॥४५॥

gaMgA tu sumahAprItyA nAnAlaMkArasaMyutA ॥ divyarUpA yayau prItyA vivAhazzivayoriti ॥45॥

नर्मदा तु महामोदा रुद्रकन्या सरिद्वरा ॥ महाप्रीत्या जगामाशु विवाहश्शिवयोरिति ॥४६॥

narmadA tu mahAmodA rudrakanyA saridvarA ॥ mahAprItyA jagAmAzu vivAhazzivayoriti ॥46॥

आगतैस्तैस्ततः सर्वैस्सर्वतो हिमभूधरम्॥ संकुलासीत्पुरी दिव्या सर्वशोभासमन्विता ॥४७॥

AgataistaistataH sarvaissarvato himabhUdharam॥ saMkulAsItpurI divyA sarvazobhAsamanvitA ॥47॥

महोत्सवा लसत्केतुध्वजातोरणकाधिका ॥ वितानविनिवृत्तार्का तथा नानालसत्प्रभा ॥ ४८ ॥

mahotsavA lasatketudhvajAtoraNakAdhikA ॥ vitAnavinivRttArkA tathA nAnAlasatprabhA ॥ 48 ॥

हिमालयोपि सुप्रीत्यादरेण विविधेन च ॥ तेषां चकार सन्मानं तासां चैव यथायथम् ॥४९॥

himAlayopi suprItyAdareNa vividhena ca ॥ teSAM cakAra sanmAnaM tAsAM caiva yathAyatham ॥49॥

सर्वान्निवासयामास सुस्थानेषु पृथक् पृथक् ॥ सामग्रीभिरनेकाभिस्तोषयामास कृत्स्नशः ॥2-3-37-५०॥

sarvAnnivAsayAmAsa susthAneSu pRthak pRthak ॥ sAmagrIbhiranekAbhistoSayAmAsa kRtsnazaH ॥2-3-37-50॥