ब्रह्मोवाच ॥ वर्द्धमाना गिरेः पुत्री सा शक्ति लोकपूजिता ॥ अष्टवर्षा यदा जाता हिमालयगृहे सती ॥१॥

brahmovAca ॥ varddhamAnA gireH putrI sA zakti lokapUjitA ॥ aSTavarSA yadA jAtA himAlayagRhe satI ॥1॥

तज्जन्म गिरिशो ज्ञात्वा सतीविरहकातरः ॥ कृत्वा तामद्भुतामन्तर्मुमोदातीव नारद॥२॥

tajjanma girizo jJAtvA satIvirahakAtaraH ॥ kRtvA tAmadbhutAmantarmumodAtIva nArada॥2॥

तस्मिन्नेवान्तरे शम्भुर्लौकिकीं गतिमाश्रितः॥ समाधातुं मनस्सम्यक्तपः कर्त्तुं समैच्छत।३॥

tasminnevAntare zambhurlaukikIM gatimAzritaH॥ samAdhAtuM manassamyaktapaH karttuM samaicchata।3॥

कांश्चिद्गणवराञ्छान्तान्नंद्यादीनवगृह्य च ॥ गङ्गावतारमगमद्धिमवत्प्रस्थमुत्तमम् ॥ ४ ॥

kAMzcidgaNavarAJchAntAnnaMdyAdInavagRhya ca ॥ gaGgAvatAramagamaddhimavatprasthamuttamam ॥ 4 ॥

यत्र गंगा निपतिता पुरा ब्रह्मपुरात्स्रुता ॥ सर्वाघौघविनाशाय पावनी परमा मुने ॥ ५ ॥

yatra gaMgA nipatitA purA brahmapurAtsrutA ॥ sarvAghaughavinAzAya pAvanI paramA mune ॥ 5 ॥

तपःप्रारम्भमकरोत्स्थित्वा तत्र वशी हरः ॥ एकाग्रं चिंतयामास स्वमात्मानमतन्द्रितः ॥ ६ ॥

tapaHprArambhamakarotsthitvA tatra vazI haraH ॥ ekAgraM ciMtayAmAsa svamAtmAnamatandritaH ॥ 6 ॥

चेतो ज्ञानभवं नित्यं ज्योतीरूपं निरामयम् ॥ जगन्मयं चिदानन्दं द्वैतहीनं निराश्रयम् ॥७॥

ceto jJAnabhavaM nityaM jyotIrUpaM nirAmayam ॥ jaganmayaM cidAnandaM dvaitahInaM nirAzrayam ॥7॥

हरे ध्यानपरे तिस्मिन्प्रमथा ध्यानतत्पराः॥ अभवन्केचिदपरे नन्दिभृंग्यादयो गणाः॥६॥

hare dhyAnapare tisminpramathA dhyAnatatparAH॥ abhavankecidapare nandibhRMgyAdayo gaNAH॥6॥

सेवां चक्रुस्तदा केचिद्गणाः शम्भोः परात्मनः॥ नैवाकूजंस्तु मौना हि द्वरपाः केचनाभवन् ॥९॥

sevAM cakrustadA kecidgaNAH zambhoH parAtmanaH॥ naivAkUjaMstu maunA hi dvarapAH kecanAbhavan ॥9॥

एतस्मिन्नन्तरे तत्र जगाम हिमभूधरः॥ शङ्करस्यौषधिप्रस्थं श्रुत्वागमनमादरात्॥2-3-11-१ ०॥

etasminnantare tatra jagAma himabhUdharaH॥ zaGkarasyauSadhiprasthaM zrutvAgamanamAdarAt॥2-3-11-1 0॥

प्रणनाम प्रभुं रुद्रं सगणो भूधरेश्वरः ॥ समानर्च च सुप्रीतस्तुष्टाव स कृताञ्जलिः ॥ ११॥

praNanAma prabhuM rudraM sagaNo bhUdharezvaraH ॥ samAnarca ca suprItastuSTAva sa kRtAJjaliH ॥ 11॥

हिमालय उवाच ॥ देवदेव महादेव कपर्दिच्छंकर प्रभो ॥ त्वयैव लोकनाथेन पालितं भुवनत्रयम् ॥ १२॥

himAlaya uvAca ॥ devadeva mahAdeva kapardicchaMkara prabho ॥ tvayaiva lokanAthena pAlitaM bhuvanatrayam ॥ 12॥

नमस्ते देवदेवेश योगिरूपधराय च ॥ निर्गुणाय नमस्तुभ्यं सगुणाय विहारिणे ॥ १३॥

namaste devadeveza yogirUpadharAya ca ॥ nirguNAya namastubhyaM saguNAya vihAriNe ॥ 13॥

कैलासवासिने शम्भो सर्वलोकाटनाय च ॥ नमस्ते परमेशाय लीलाकाराय शूलिने ॥ १४॥

kailAsavAsine zambho sarvalokATanAya ca ॥ namaste paramezAya lIlAkArAya zUline ॥ 14॥

परिपूर्णगुणाधानविकाररहितायते ॥ नमोऽनीहाय वीहाय धीराय परमात्मने॥१५॥

paripUrNaguNAdhAnavikArarahitAyate ॥ namo'nIhAya vIhAya dhIrAya paramAtmane॥15॥

अबहिर्भोगकाराय जनवत्सलते नमः॥ त्रिगुणाधीश मायेश ब्रह्मणे परमात्मने॥१६॥

abahirbhogakArAya janavatsalate namaH॥ triguNAdhIza mAyeza brahmaNe paramAtmane॥16॥

विष्णुब्रह्मादिसेव्याय विष्णुब्रह्मस्वरूपिणे॥ विष्णुब्रह्मकदात्रे ते भक्तप्रिय नमोऽस्तु ते ॥ १७॥

viSNubrahmAdisevyAya viSNubrahmasvarUpiNe॥ viSNubrahmakadAtre te bhaktapriya namo'stu te ॥ 17॥

तपोरत तपस्थानसुतपः फलदायिने ॥ तपःप्रियाय शान्ताय नमस्ते ब्रह्मरूपिणे ॥१८॥

taporata tapasthAnasutapaH phaladAyine ॥ tapaHpriyAya zAntAya namaste brahmarUpiNe ॥18॥

व्यवहारकरायैव लोकाचारकराय ते ॥ सगुणाय परेशाय नमोस्तु परमात्मने ॥ ॥ १९ ॥

vyavahArakarAyaiva lokAcArakarAya te ॥ saguNAya parezAya namostu paramAtmane ॥ ॥ 19 ॥

लीला तव महेशानावेद्या साधुसुखप्रदा ॥ भक्ताधीनस्वरूपोऽसि भक्तवश्यो हि कर्मकृत् ॥ 2-3-11-२० ॥

lIlA tava mahezAnAvedyA sAdhusukhapradA ॥ bhaktAdhInasvarUpo'si bhaktavazyo hi karmakRt ॥ 2-3-11-20 ॥

मम भाग्योदयादत्र त्वमागत इह प्रभो॥ सनाथ कृतवान्मां त्वं वर्णितो दानवत्सलः॥२१ ॥

mama bhAgyodayAdatra tvamAgata iha prabho॥ sanAtha kRtavAnmAM tvaM varNito dAnavatsalaH॥21 ॥

अद्य मे सफलं जन्म सफलं जीवनं मम॥ अद्य मे सफलं सर्वं यदत्र त्वं समागतः ॥२२॥

adya me saphalaM janma saphalaM jIvanaM mama॥ adya me saphalaM sarvaM yadatra tvaM samAgataH ॥22॥

ज्ञात्वा मां दासमव्यग्रमाज्ञान्देहि महेश्वर ॥ त्वत्सेवां च महाप्रीत्या कुर्यामहमनन्यधीः ॥ २३ ॥

jJAtvA mAM dAsamavyagramAjJAndehi mahezvara ॥ tvatsevAM ca mahAprItyA kuryAmahamananyadhIH ॥ 23 ॥

ब्रह्मोवाच ॥ इत्याकर्ण्य वचस्तस्य गिरीशस्य महेश्वरः ॥ किंचिदुन्मील्य नेत्रे च ददर्श सगणं गिरिम् ॥ २४ ॥

brahmovAca ॥ ityAkarNya vacastasya girIzasya mahezvaraH ॥ kiMcidunmIlya netre ca dadarza sagaNaM girim ॥ 24 ॥

सगणं तन्तथा दृष्ट्वा गिरिराजं वृषध्वजः ॥ उवाच ध्यानयोगस्थः स्मयन्निव जगत्पतिः ॥ २५ ॥

sagaNaM tantathA dRSTvA girirAjaM vRSadhvajaH ॥ uvAca dhyAnayogasthaH smayanniva jagatpatiH ॥ 25 ॥

महेश्वर उवाच ॥ तव पृष्ठे तपस्तप्तुं रहस्यमहमागतः ॥ यथा न कोपि निकटं समायातु तथा कुरु ॥ २६ ॥

mahezvara uvAca ॥ tava pRSThe tapastaptuM rahasyamahamAgataH ॥ yathA na kopi nikaTaM samAyAtu tathA kuru ॥ 26 ॥

त्वं महात्मा तपोधामा मुनीनां च सदाश्रयः ॥ देवानां राक्षसानां च परेषां च महात्मनाम् ॥ २७ ॥

tvaM mahAtmA tapodhAmA munInAM ca sadAzrayaH ॥ devAnAM rAkSasAnAM ca pareSAM ca mahAtmanAm ॥ 27 ॥

सदा वासो द्विजादीनां गंगापूतश्च नित्यदा ॥ परोपकारी सर्वेषां गिरीणामधिपः प्रभुः ॥२८॥

sadA vAso dvijAdInAM gaMgApUtazca nityadA ॥ paropakArI sarveSAM girINAmadhipaH prabhuH ॥28॥

अहं तपश्चराम्यत्र गंगावतरणे स्थले ॥ आश्रितस्तव सुप्रीतो गिरिराज यतात्मवान् ॥ २९ ॥

ahaM tapazcarAmyatra gaMgAvataraNe sthale ॥ Azritastava suprIto girirAja yatAtmavAn ॥ 29 ॥

निर्विघ्नं मे तपश्चात्र हेतुना येन शैलप ॥ सर्वथा हि गिरिश्रेष्ठ सुयत्नं कुरु साम्प्रतम् ॥ 2-3-11-३० ॥

nirvighnaM me tapazcAtra hetunA yena zailapa ॥ sarvathA hi girizreSTha suyatnaM kuru sAmpratam ॥ 2-3-11-30 ॥

ममेदमेव परमं सेवनं पर्वतोत्तम ॥ स्वगृहं गच्छ सत्प्रीत्या तत्संपादय यत्नतः ॥ ३१ ॥

mamedameva paramaM sevanaM parvatottama ॥ svagRhaM gaccha satprItyA tatsaMpAdaya yatnataH ॥ 31 ॥

॥ ब्रह्मोवाच ॥ इत्युक्त्वा जगतां नाथस्तूष्णीमास स सूतिकृत् ॥ गिरिराजस्तदा शम्भुं प्रणयादिदमब्रवीत् ॥ ३२ ॥

॥ brahmovAca ॥ ityuktvA jagatAM nAthastUSNImAsa sa sUtikRt ॥ girirAjastadA zambhuM praNayAdidamabravIt ॥ 32 ॥

॥ हिमालय उवाच॥ पूजितोऽसि जगन्नाथ मया त्वम्परमेश्वर ॥ स्वागतेनाद्य विषये स्थितं त्वाम्प्रार्थयामि किम् ॥३३॥

॥ himAlaya uvAca॥ pUjito'si jagannAtha mayA tvamparamezvara ॥ svAgatenAdya viSaye sthitaM tvAmprArthayAmi kim ॥33॥

महता तपसा त्वं हि देवैर्यत्नपराश्रितैः ॥ न प्राप्यसे महेशान स त्वं स्वयमुपस्थितः ॥ ३४ ॥

mahatA tapasA tvaM hi devairyatnaparAzritaiH ॥ na prApyase mahezAna sa tvaM svayamupasthitaH ॥ 34 ॥

मत्तोप्यन्यतमो नास्ति न मत्तोऽन्योऽस्ति पुण्यवान्॥ भवानिति च मत्पृष्ठे तपसे समुपस्थितः॥३५॥

mattopyanyatamo nAsti na matto'nyo'sti puNyavAn॥ bhavAniti ca matpRSThe tapase samupasthitaH॥35॥

देवेन्द्रादधिकम्मन्ये स्वात्मानम्परमेश्वर॥ सगणेन त्वयागत्य कृतोऽनुग्रहभागहम्॥ ३६॥

devendrAdadhikammanye svAtmAnamparamezvara॥ sagaNena tvayAgatya kRto'nugrahabhAgaham॥ 36॥

निर्विघ्नं कुरु देवेश स्वतन्त्रः परमन्तपः॥ करिष्येऽहन्तथा सेवां दासोऽहन्ते सदा प्रभो।३७॥

nirvighnaM kuru deveza svatantraH paramantapaH॥ kariSye'hantathA sevAM dAso'hante sadA prabho।37॥

ब्रह्मोवाच॥ इत्युक्त्वा गिरिराजोऽसौ स्वं वेश्म द्रुतमागतः॥ वृत्तांत्तं तं समाचख्यौ प्रियायै च समादरात्॥३८॥

brahmovAca॥ ityuktvA girirAjo'sau svaM vezma drutamAgataH॥ vRttAMttaM taM samAcakhyau priyAyai ca samAdarAt॥38॥

नीयमानान्परीवारान्स्वगणानपि नारद॥ समाहूयाखिलाञ्छैलपतिः प्रोवाच तत्त्वतः॥३९॥

nIyamAnAnparIvArAnsvagaNAnapi nArada॥ samAhUyAkhilAJchailapatiH provAca tattvataH॥39॥

हिमालय उवाच ॥ अद्य प्रभृति नो यातु कोपि गंगावतारणम्॥ मच्छासनेन मत्प्रस्थं सत्यमेतद्ब्रवीम्यहम् ॥2-3-11-४ ० ॥

himAlaya uvAca ॥ adya prabhRti no yAtu kopi gaMgAvatAraNam॥ macchAsanena matprasthaM satyametadbravImyaham ॥2-3-11-4 0 ॥

गमिष्यति जनः कश्चित्तत्र चेत्तं महाखलम् ॥ दण्डयिष्ये विशेषेण सत्यमेतन्मयोदितम् ॥४१ ॥

gamiSyati janaH kazcittatra cettaM mahAkhalam ॥ daNDayiSye vizeSeNa satyametanmayoditam ॥41 ॥

इति तान्स नियम्याशु स्वगणान्निखिलान्मुने ॥ सुयत्नं कृतवाञ्छैलस्तं शृणु त्वं वदामि ते ॥४२॥

iti tAnsa niyamyAzu svagaNAnnikhilAnmune ॥ suyatnaM kRtavAJchailastaM zRNu tvaM vadAmi te ॥42॥