विष्ण्वादय ऊचुः ॥ देवदेव महादेव लौकिकाचारकृत्प्रभो ॥ ब्रह्म त्वामीश्वरं शंभुं जानीमः कृपया तव ॥ १ ॥

viSNvAdaya UcuH ॥ devadeva mahAdeva laukikAcArakRtprabho ॥ brahma tvAmIzvaraM zaMbhuM jAnImaH kRpayA tava ॥ 1 ॥

किं मोहयसि नस्तात मायया परया तव ॥ दुर्ज्ञेयया सदा पुंसां मोहिन्या परमेश्वर ॥ २ ॥

kiM mohayasi nastAta mAyayA parayA tava ॥ durjJeyayA sadA puMsAM mohinyA paramezvara ॥ 2 ॥

प्रकृतः पुरुषस्यापि जगतो योनिबीजयोः ॥ परब्रह्म परस्त्वं च मनोवाचामगोचरः ॥ ३ ॥

prakRtaH puruSasyApi jagato yonibIjayoH ॥ parabrahma parastvaM ca manovAcAmagocaraH ॥ 3 ॥

त्वमेव विश्वं सृजसि पास्यत्सि निजतंत्रतः ॥ स्वरूपां शिवशक्तिं हि क्रीडन्नूर्णपटो यथा ॥ ४ ॥

tvameva vizvaM sRjasi pAsyatsi nijataMtrataH ॥ svarUpAM zivazaktiM hi krIDannUrNapaTo yathA ॥ 4 ॥

त्वमेव क्रतुमीशान ससर्जिथ दयापरः ॥ दक्षेण सूत्रेण विभो सदा त्रय्यभिपत्तये ॥ ५ ॥

tvameva kratumIzAna sasarjitha dayAparaH ॥ dakSeNa sUtreNa vibho sadA trayyabhipattaye ॥ 5 ॥

त्वयैव लोकेवसितास्सेतवो यान् धृतव्रताः ॥ शुद्धान् श्रद्दधते विप्रा वेदमार्गविचक्षणाः ॥६॥

tvayaiva lokevasitAssetavo yAn dhRtavratAH ॥ zuddhAn zraddadhate viprA vedamArgavicakSaNAH ॥6॥

कर्तुस्त्वं मंगलानां हि स्वपरं तु मुखे विभो ॥ अमंगलानां च हितं मिश्रं वाथ विपर्ययम् ॥७॥

kartustvaM maMgalAnAM hi svaparaM tu mukhe vibho ॥ amaMgalAnAM ca hitaM mizraM vAtha viparyayam ॥7॥

सर्वकर्मफलानां हि सदा दाता त्वमेव हि॥ सर्वे हि प्रोक्ता हि यशस्तत्पतिस्त्वं श्रुतिश्रुतः ॥८॥

sarvakarmaphalAnAM hi sadA dAtA tvameva hi॥ sarve hi proktA hi yazastatpatistvaM zrutizrutaH ॥8॥

पृथग्धियः कर्मदृशोऽरुंतुदाश्च दुराशयाः ॥ वितुदंति परान्मूढा दुरुक्तैर्मत्सरान्विताः ॥९॥

pRthagdhiyaH karmadRzo'ruMtudAzca durAzayAH ॥ vitudaMti parAnmUDhA duruktairmatsarAnvitAH ॥9॥

तेषां दैववधानां भो भूयात्त्वच्च वधो विभो ॥ भगवन्परमेशान कृपां कुरु परप्रभो ॥2-2-41-१०॥

teSAM daivavadhAnAM bho bhUyAttvacca vadho vibho ॥ bhagavanparamezAna kRpAM kuru paraprabho ॥2-2-41-10॥

नमो रुद्राय शांताय ब्रह्मणे परमात्मने॥ कपर्दिने महेशाय ज्योत्स्नाय महते नमः ॥११॥

namo rudrAya zAMtAya brahmaNe paramAtmane॥ kapardine mahezAya jyotsnAya mahate namaH ॥11॥

त्वं हि विश्वसृजां स्रष्टा धाता त्वं प्रपितामहः॥ त्रिगुणात्मा निर्गुणश्च प्रकृतेः पुरुषात्परः ॥ १२ ॥

tvaM hi vizvasRjAM sraSTA dhAtA tvaM prapitAmahaH॥ triguNAtmA nirguNazca prakRteH puruSAtparaH ॥ 12 ॥

नमस्ते नीलकंठाय वेधसे परमात्मने ॥ विश्वाय विश्वबीजाय जगदानंदहेतवे ॥ १३ ॥

namaste nIlakaMThAya vedhase paramAtmane ॥ vizvAya vizvabIjAya jagadAnaMdahetave ॥ 13 ॥

ओंकारस्त्वं वषट्कारस्सर्वारंभप्रवर्तकः ॥ हंतकास्स्वधाकारो हव्यकव्यान्नभुक् सदा ॥१४॥

oMkArastvaM vaSaTkArassarvAraMbhapravartakaH ॥ haMtakAssvadhAkAro havyakavyAnnabhuk sadA ॥14॥

कृतः कथं यज्ञभंगस्त्वया धर्मपरायण। ब्रह्मण्यस्त्वं महादेव कथं यज्ञहनो विभो ॥ १५ ॥

kRtaH kathaM yajJabhaMgastvayA dharmaparAyaNa। brahmaNyastvaM mahAdeva kathaM yajJahano vibho ॥ 15 ॥

ब्राह्मणानां गवां चैव धर्मस्य प्रतिपालकः ॥ शरण्योसि सदानंत्यः सर्वेषां प्राणिनां प्रभो ॥ १६ ॥

brAhmaNAnAM gavAM caiva dharmasya pratipAlakaH ॥ zaraNyosi sadAnaMtyaH sarveSAM prANinAM prabho ॥ 16 ॥

नमस्ते भगवन् रुद्र भास्करामिततेजसे ॥ नमो भवाय देवाय रसायांबुमयाय ते ॥ ॥ १७ ॥

namaste bhagavan rudra bhAskarAmitatejase ॥ namo bhavAya devAya rasAyAMbumayAya te ॥ ॥ 17 ॥

शर्वाय क्षितिरूपाय सदा सुरभिणे नमः ॥ रुद्रायाग्निस्वरूपाय महातेजस्विने नमः ॥ १८ ॥

zarvAya kSitirUpAya sadA surabhiNe namaH ॥ rudrAyAgnisvarUpAya mahAtejasvine namaH ॥ 18 ॥

ईशाय वायवे तुभ्यं संस्पर्शाय नमोनमः ॥ पशूनांपतये तुभ्यं यजमानाय वेधसे ॥ १९ ॥

IzAya vAyave tubhyaM saMsparzAya namonamaH ॥ pazUnAMpataye tubhyaM yajamAnAya vedhase ॥ 19 ॥

भीमाय व्योमरूपाय शब्दमात्राय ते नमः ॥ महादेवाय सोमाय प्रवृत्ताय नमोस्तु ते ॥ 2-2-41-२० ॥

bhImAya vyomarUpAya zabdamAtrAya te namaH ॥ mahAdevAya somAya pravRttAya namostu te ॥ 2-2-41-20 ॥

उग्राय सूर्यरूपाय नमस्ते कर्मयोगिने ॥ नमस्ते कालकालाय नमस्ते रुद्र मन्यवे ॥ ॥ २१ ॥

ugrAya sUryarUpAya namaste karmayogine ॥ namaste kAlakAlAya namaste rudra manyave ॥ ॥ 21 ॥

नमश्शिवाय भीमाय शंकराय शिवाय ते ॥ उग्रोसि सर्व भूतानां नियंता यच्छिवोसि नः ॥ २२ ॥

namazzivAya bhImAya zaMkarAya zivAya te ॥ ugrosi sarva bhUtAnAM niyaMtA yacchivosi naH ॥ 22 ॥

मयस्कराय विश्वाय ब्रह्मणे ह्यार्तिनाशिने ॥ अम्बिकापतये तुभ्यमुमायाः पतये नमः ॥ २३ ॥

mayaskarAya vizvAya brahmaNe hyArtinAzine ॥ ambikApataye tubhyamumAyAH pataye namaH ॥ 23 ॥

शर्वाय सर्वरूपाय पुरुषाय परात्मने ॥ सदसद्व्यक्तिहीनाय महतः कारणाय ते ॥२४॥

zarvAya sarvarUpAya puruSAya parAtmane ॥ sadasadvyaktihInAya mahataH kAraNAya te ॥24॥

जाताय बहुधा लोके प्रभूताय नमोनमः ॥ नीलाय नीलरुद्राय कद्रुद्राय प्रचेतसे ॥ २५ ॥

jAtAya bahudhA loke prabhUtAya namonamaH ॥ nIlAya nIlarudrAya kadrudrAya pracetase ॥ 25 ॥

मीढुष्टमाय देवाय शिपिविष्टाय ते नमः ॥ महीयसे नमस्तुभ्यं हंत्रे देवारिणां सदा ॥ २६ ॥

mIDhuSTamAya devAya zipiviSTAya te namaH ॥ mahIyase namastubhyaM haMtre devAriNAM sadA ॥ 26 ॥

ताराय च सुताराय तरुणाय सुतेजसे ॥ हरिकेशाय देवाय महेशाय नमोनमः ॥ २७ ॥

tArAya ca sutArAya taruNAya sutejase ॥ harikezAya devAya mahezAya namonamaH ॥ 27 ॥

देवानां शंभवे तुभ्यं विभवे परमात्मने ॥ परमाय नमस्तुभ्यं कालकंठाय ते नमः ॥ २८ ॥

devAnAM zaMbhave tubhyaM vibhave paramAtmane ॥ paramAya namastubhyaM kAlakaMThAya te namaH ॥ 28 ॥

हिरण्याय परेशाय हिरण्यवपुषे नमः ॥ भीमाय भीमरूपाय भीमकर्मरताय च ॥ २९ ॥

hiraNyAya parezAya hiraNyavapuSe namaH ॥ bhImAya bhImarUpAya bhImakarmaratAya ca ॥ 29 ॥

भस्मदिग्धशरीराय रुद्राक्षाभरणाय च ॥ नमो ह्रस्वाय दीर्घाय वामनाय नमोस्तु ते ॥ 2-2-41-३० ॥

bhasmadigdhazarIrAya rudrAkSAbharaNAya ca ॥ namo hrasvAya dIrghAya vAmanAya namostu te ॥ 2-2-41-30 ॥

दूरेवधाय ते देवा ग्रेवधाय नमोनमः ॥ धन्विने शूलिने तुभ्यं गदिने हलिने नमः ॥ ३१ ॥

dUrevadhAya te devA grevadhAya namonamaH ॥ dhanvine zUline tubhyaM gadine haline namaH ॥ 31 ॥

नानायुधधरायैव दैत्यदानवनाशिने ॥ सद्याय सद्यरूपाय सद्योजाताय वै नमः ॥ ३२ ॥

nAnAyudhadharAyaiva daityadAnavanAzine ॥ sadyAya sadyarUpAya sadyojAtAya vai namaH ॥ 32 ॥

वामाय वामरूपाय वामनेत्राय ते नमः ॥ अघोराय परेशाय विकटाय नमोनमः ॥ ३३ ॥

vAmAya vAmarUpAya vAmanetrAya te namaH ॥ aghorAya parezAya vikaTAya namonamaH ॥ 33 ॥

तत्पुरुषाय नाथाय पुराणपुरुषाय च ॥ पुरुषार्थप्रदानाय व्रतिने परमेष्ठिने ॥ ३४ ॥

tatpuruSAya nAthAya purANapuruSAya ca ॥ puruSArthapradAnAya vratine parameSThine ॥ 34 ॥

ईशानाय नमस्तुभ्यमीश्वराय नमो नमः ॥ ब्रह्मणे ब्रह्मरूपाय नमस्साक्षात्परात्मने ॥ ३५ ॥

IzAnAya namastubhyamIzvarAya namo namaH ॥ brahmaNe brahmarUpAya namassAkSAtparAtmane ॥ 35 ॥

उग्रोसि सर्वदुष्टानां नियंतासि शिवोसि नः ॥ कालकूटाशिने तुभ्यं देवाद्यवन कारिणे ॥ ३६ ॥

ugrosi sarvaduSTAnAM niyaMtAsi zivosi naH ॥ kAlakUTAzine tubhyaM devAdyavana kAriNe ॥ 36 ॥

वीराय वीरभद्राय रक्षद्वीराय शूलिने ॥ महादेवाय महते पशूनां पतये नमः ॥ ३७ ॥

vIrAya vIrabhadrAya rakSadvIrAya zUline ॥ mahAdevAya mahate pazUnAM pataye namaH ॥ 37 ॥

वीरात्मने सुविद्याय श्रीकंठाय पिनाकिने ॥ नमोनंताय सूक्ष्माय नमस्ते मृत्युमन्यवे ॥ ३८ ॥

vIrAtmane suvidyAya zrIkaMThAya pinAkine ॥ namonaMtAya sUkSmAya namaste mRtyumanyave ॥ 38 ॥

पराय परमेशाय परात्परतराय ते ॥ परात्पराय विभवे नमस्ते विश्वमूर्तये ॥३९॥

parAya paramezAya parAtparatarAya te ॥ parAtparAya vibhave namaste vizvamUrtaye ॥39॥

नमो विष्णुकलत्राय विष्णुक्षेत्राय भानवे ॥ भैरवाय शरण्याय त्र्यंबकाय विहारिणे ॥ 2-2-41-४० ॥

namo viSNukalatrAya viSNukSetrAya bhAnave ॥ bhairavAya zaraNyAya tryaMbakAya vihAriNe ॥ 2-2-41-40 ॥

मृत्युंजयाय शोकाय त्रिगुणाय गुणात्मने ॥ चन्द्रसूर्याग्निनेत्राय सर्वकारणसेतवे ॥ ४१ ॥

mRtyuMjayAya zokAya triguNAya guNAtmane ॥ candrasUryAgninetrAya sarvakAraNasetave ॥ 41 ॥

भवता हि जगत्सर्वं व्याप्तं स्वेनैव तेजसा ॥ परब्रह्म निर्विकारी चिदानंदःप्रकाशवान् ॥ ४२ ॥

bhavatA hi jagatsarvaM vyAptaM svenaiva tejasA ॥ parabrahma nirvikArI cidAnaMdaHprakAzavAn ॥ 42 ॥

ब्रह्मविष्ण्विंद्रचन्द्रादिप्रमुखास्सकलास्सुराः ॥ मुनयश्चापरे त्वत्तस्संप्रसूता महेश्वर ॥४३॥

brahmaviSNviMdracandrAdipramukhAssakalAssurAH ॥ munayazcApare tvattassaMprasUtA mahezvara ॥43॥

यतो बिभर्षि सकलं विभज्य तनुमष्टधा ॥ अष्टमूर्तिरितीशश्च त्वमाद्यः करुणामयः ॥ ॥ ४४ ॥

yato bibharSi sakalaM vibhajya tanumaSTadhA ॥ aSTamUrtiritIzazca tvamAdyaH karuNAmayaH ॥ ॥ 44 ॥

त्वद्भयाद्वाति वातोयं दहत्यग्निर्भयात्तव ॥ सूर्यस्तपति ते भीत्या मृत्युर्धावति सर्वतः ॥ ४५ ॥

tvadbhayAdvAti vAtoyaM dahatyagnirbhayAttava ॥ sUryastapati te bhItyA mRtyurdhAvati sarvataH ॥ 45 ॥

दयासिन्धो महेशान प्रसीद परमेश्वर ॥ रक्ष रक्ष सदैवास्मान् यस्मान्नष्टान् विचेतसः ॥ ४६ ॥

dayAsindho mahezAna prasIda paramezvara ॥ rakSa rakSa sadaivAsmAn yasmAnnaSTAn vicetasaH ॥ 46 ॥

रक्षिताः सततं नाथ त्वयैव करुणानिधे ॥ नानापद्भ्यो वयं शंभो तथैवाद्य प्रपाहि नः ॥४७॥

rakSitAH satataM nAtha tvayaiva karuNAnidhe ॥ nAnApadbhyo vayaM zaMbho tathaivAdya prapAhi naH ॥47॥

यज्ञस्योद्धरणं नाथ कुरु शीघ्रं प्रसादकृत्॥ असमाप्तस्य दुर्गेश दक्षस्य च प्रजापतेः॥४८॥

yajJasyoddharaNaM nAtha kuru zIghraM prasAdakRt॥ asamAptasya durgeza dakSasya ca prajApateH॥48॥

भगोक्षिणी प्रपद्येत यजमानश्च जीवतु ॥ पूष्णो दंताश्च रोहंतु भृगोः श्मश्रूणि पूर्ववत्॥४९॥

bhagokSiNI prapadyeta yajamAnazca jIvatu ॥ pUSNo daMtAzca rohaMtu bhRgoH zmazrUNi pUrvavat॥49॥

भवतानुग्रहीतानां देवादीनांश्च सर्वशः॥॥ आरोग्यं भग्नगात्राणां शंकर त्वायुधाश्मभिः ॥ 2-2-41-५० ॥

bhavatAnugrahItAnAM devAdInAMzca sarvazaH॥॥ ArogyaM bhagnagAtrANAM zaMkara tvAyudhAzmabhiH ॥ 2-2-41-50 ॥

पूर्णभागोस्तु ते नाथावशिष्टेऽध्वरकर्मणि ॥ रुद्रभागेन यज्ञस्ते कल्पितो नान्यथा क्वचित् ॥ ५१ ॥

pUrNabhAgostu te nAthAvaziSTe'dhvarakarmaNi ॥ rudrabhAgena yajJaste kalpito nAnyathA kvacit ॥ 51 ॥

इत्युक्त्वा सप्रजेशश्च रमेशश्च कृतांजलिः ॥ दंडवत्पतितो भूमौ क्षमापयितुमुद्यतः॥५२॥

ityuktvA saprajezazca ramezazca kRtAMjaliH ॥ daMDavatpatito bhUmau kSamApayitumudyataH॥52॥