सूत उवाच॥ इत्याकर्ण्य वचस्तस्य ब्रह्मणो मुनिसत्तमः ॥ स मुदोवाच संस्मृत्य शंकरं प्रीतमानसः ॥ १ ॥

sUta uvAca॥ ityAkarNya vacastasya brahmaNo munisattamaH ॥ sa mudovAca saMsmRtya zaMkaraM prItamAnasaH ॥ 1 ॥

नारद उवाच ॥ ॥ ब्रह्मन् विधे महाभाग विष्णुशिष्य महामते ॥ अद्भुता कथिता लीला त्वया च शशिमौलिनः ॥ २ ॥

nArada uvAca ॥ ॥ brahman vidhe mahAbhAga viSNuziSya mahAmate ॥ adbhutA kathitA lIlA tvayA ca zazimaulinaH ॥ 2 ॥

गृहीतदारे मदने हृष्टे हि स्वगृहे गते ॥ दक्षे च स्वगृहं याते तथा हि त्वयि कर्तरि ॥ ३ ॥

gRhItadAre madane hRSTe hi svagRhe gate ॥ dakSe ca svagRhaM yAte tathA hi tvayi kartari ॥ 3 ॥

मानसेषु च पुत्रेषु गतेषु स्वस्वधामसु ॥ संध्या कुत्र गता सा च ब्रह्मपुत्री पितृप्रसूः ॥ ४ ॥

mAnaseSu ca putreSu gateSu svasvadhAmasu ॥ saMdhyA kutra gatA sA ca brahmaputrI pitRprasUH ॥ 4 ॥

किं चकार च केनैव पुरुषेण विवाहिता ॥ एतत्सर्वं विशेषेण संध्यायाश्चरितं वद ॥ ५ ॥

kiM cakAra ca kenaiva puruSeNa vivAhitA ॥ etatsarvaM vizeSeNa saMdhyAyAzcaritaM vada ॥ 5 ॥

सूत उवाच ॥ इत्याकर्ण्य वचस्तस्य ब्रह्मपुत्रश्च धीमतः ॥ संस्मृत्य शंकरं सक्त्या ब्रह्मा प्रोवाच तत्त्ववित् ॥ ६ ॥

sUta uvAca ॥ ityAkarNya vacastasya brahmaputrazca dhImataH ॥ saMsmRtya zaMkaraM saktyA brahmA provAca tattvavit ॥ 6 ॥

ब्रह्मोवाच ॥ शृणु त्वं च मुने सर्वं संध्यायाश्चरितं शुभम् ॥ यच्छ्रुत्वा सर्वकामिन्यस्साध्व्यस्स्युस्सर्वदा मुने ॥ ७ ॥

brahmovAca ॥ zRNu tvaM ca mune sarvaM saMdhyAyAzcaritaM zubham ॥ yacchrutvA sarvakAminyassAdhvyassyussarvadA mune ॥ 7 ॥

सा च संध्या सुता मे हि मनोजाता पुराऽ भवत् ॥ तपस्तप्त्वा तनुं त्यक्त्वा सैव जाता त्वरुंधती ॥८॥

sA ca saMdhyA sutA me hi manojAtA purA' bhavat ॥ tapastaptvA tanuM tyaktvA saiva jAtA tvaruMdhatI ॥8॥

मेधातिथेस्सुता भूत्वा मुनिश्रेष्ठस्य धीमती ॥ ब्रह्मविष्णुमहेशानवचनाच्चरितव्रता॥९॥

medhAtithessutA bhUtvA munizreSThasya dhImatI ॥ brahmaviSNumahezAnavacanAccaritavratA॥9॥

वव्रे पतिं महात्मानं वसिष्ठं शंसितव्रतम् ॥ पतिव्रता च मुख्याऽभूद्वंद्या पूज्या त्वभीषणा॥2-2-5-१०॥

vavre patiM mahAtmAnaM vasiSThaM zaMsitavratam ॥ pativratA ca mukhyA'bhUdvaMdyA pUjyA tvabhISaNA॥2-2-5-10॥

नारद उवाच॥ कथं तया तपस्तप्तं किमर्थं कुत्र संध्यया॥ कथं शरीरं सा त्यक्त्वाऽभवन्मेधातिथेः सुता॥११॥

nArada uvAca॥ kathaM tayA tapastaptaM kimarthaM kutra saMdhyayA॥ kathaM zarIraM sA tyaktvA'bhavanmedhAtitheH sutA॥11॥

कथं वा विहितं देवैर्ब्रह्मविष्णुशिवैः पतिम्। वसिष्ठं तु महात्मानं संवव्रे शंसितव्रतम्॥१२॥

kathaM vA vihitaM devairbrahmaviSNuzivaiH patim। vasiSThaM tu mahAtmAnaM saMvavre zaMsitavratam॥12॥

एतन्मे श्रोष्यमाणाय विस्तरेण पितामह॥ कौतूहलमरुंधत्याश्चरितं ब्रूहि तत्त्वतः ॥१३॥ ।

etanme zroSyamANAya vistareNa pitAmaha॥ kautUhalamaruMdhatyAzcaritaM brUhi tattvataH ॥13॥ ।

ब्रह्मोवाच ॥ अहं स्वतनयां संध्यां दृष्ट्वा पूर्वमथात्मनः॥ कामायाशु मनोऽकार्षं त्यक्त्वा शिवभयाच्च सा ॥१४॥

brahmovAca ॥ ahaM svatanayAM saMdhyAM dRSTvA pUrvamathAtmanaH॥ kAmAyAzu mano'kArSaM tyaktvA zivabhayAcca sA ॥14॥

संध्यायाश्चलितं चित्तं कामबाणविलोडितम् ॥ ऋषीणामपि संरुद्धमानसानां महात्मनाम्॥१५॥

saMdhyAyAzcalitaM cittaM kAmabANaviloDitam ॥ RSINAmapi saMruddhamAnasAnAM mahAtmanAm॥15॥

भर्गस्य वचनं श्रुत्वा सोपहासं च मां प्रति ॥ आत्मनश्चलितत्वं वै ह्यमर्यादमृषीन्प्रति ॥१६॥

bhargasya vacanaM zrutvA sopahAsaM ca mAM prati ॥ AtmanazcalitatvaM vai hyamaryAdamRSInprati ॥16॥

कामस्य तादृशं भावं मुनिमोहकरं मुहुः॥ दृष्ट्वा संध्या स्वयं तत्रोपयमायातिदुःखिता॥ १७ ॥ ।

kAmasya tAdRzaM bhAvaM munimohakaraM muhuH॥ dRSTvA saMdhyA svayaM tatropayamAyAtiduHkhitA॥ 17 ॥ ।

ततस्तु ब्रह्मणा शप्ते मदने च मया मुने॥ अंतर्भूते मयि शिवे गते चापि निजास्पदे ॥१८॥

tatastu brahmaNA zapte madane ca mayA mune॥ aMtarbhUte mayi zive gate cApi nijAspade ॥18॥

आमर्षवशमापन्ना सा संध्या मुनिसत्तम॥ मम पुत्री विचार्यैवं तदा ध्यानपराऽभवत् ॥ १९ ॥

AmarSavazamApannA sA saMdhyA munisattama॥ mama putrI vicAryaivaM tadA dhyAnaparA'bhavat ॥ 19 ॥

ध्यायंती क्षणमेवाशु पूर्वं वृत्तं मनस्विनी ॥ इदं विममृशे संध्या तस्मिन्काले यथोचितम् ॥ 2-2-5-२० ॥

dhyAyaMtI kSaNamevAzu pUrvaM vRttaM manasvinI ॥ idaM vimamRze saMdhyA tasminkAle yathocitam ॥ 2-2-5-20 ॥

संध्योवाच ॥ उत्पन्नमात्रां मां दृष्ट्वा युवतीं मदनेरितः ॥ अकार्षित्सानुरागोयमभिलाषं पिता मम ॥२१॥

saMdhyovAca ॥ utpannamAtrAM mAM dRSTvA yuvatIM madaneritaH ॥ akArSitsAnurAgoyamabhilASaM pitA mama ॥21॥

पश्यतां मानसानां च मुनीनां भावितात्मनाम्॥ दृष्ट्वैव माममर्यादं सकाममभवन्मनः॥२२॥

pazyatAM mAnasAnAM ca munInAM bhAvitAtmanAm॥ dRSTvaiva mAmamaryAdaM sakAmamabhavanmanaH॥22॥

ममापि मथितं चित्तं मदनेन दुरात्मना ॥ येन दृष्ट्वा मुनीन्सर्वांश्चलितं मन्मनो भृशम् ॥२३॥

mamApi mathitaM cittaM madanena durAtmanA ॥ yena dRSTvA munInsarvAMzcalitaM manmano bhRzam ॥23॥

फलमेतस्य पापस्य मदनस्स्वयमाप्तवान्॥ यस्तं शशाप कुपितः शंभोरग्रे पितामहः॥२४॥

phalametasya pApasya madanassvayamAptavAn॥ yastaM zazApa kupitaH zaMbhoragre pitAmahaH॥24॥

प्राप्नुयां फलमेतस्य पापस्य स्वघकारिणी ॥ तच्छोधनफलमहमाशु नेच्छामि साधनम् ॥२५॥

prApnuyAM phalametasya pApasya svaghakAriNI ॥ tacchodhanaphalamahamAzu necchAmi sAdhanam ॥25॥

यन्मां पिता भ्रातरश्च सकाममपरोक्षतः ॥ दृष्ट्वा चक्रुस्स्पृहां तस्मान्न मत्तः पापकृत्परा ॥२६॥

yanmAM pitA bhrAtarazca sakAmamaparokSataH ॥ dRSTvA cakrusspRhAM tasmAnna mattaH pApakRtparA ॥26॥

ममापि कामभावोभूदमर्यादं समीक्ष्य तान् ॥ पत्या इव स्वकेताते सर्वेषु सहजेष्वषि॥२७॥

mamApi kAmabhAvobhUdamaryAdaM samIkSya tAn ॥ patyA iva svaketAte sarveSu sahajeSvaSi॥27॥

करिष्यारम्यस्य पापस्य प्रायश्चित्तमहं स्वयम्॥ आत्मानमग्नौ होष्यामि वेदमार्गानुसारत॥२८॥

kariSyAramyasya pApasya prAyazcittamahaM svayam॥ AtmAnamagnau hoSyAmi vedamArgAnusArata॥28॥

किं त्वेकां स्थापयिष्यामि मर्यादामिह भूतले ॥ उत्पन्नमात्रा न यथा सकामास्स्युश्शरीरिणः ॥ २९ ॥

kiM tvekAM sthApayiSyAmi maryAdAmiha bhUtale ॥ utpannamAtrA na yathA sakAmAssyuzzarIriNaH ॥ 29 ॥

एतदर्थमहं कृत्वा तपः परम दारुणम् ॥ मर्यादां स्थापयिष्यामि पश्चात्त्यक्षामि जीवितम्॥2-2-5-३०॥

etadarthamahaM kRtvA tapaH parama dAruNam ॥ maryAdAM sthApayiSyAmi pazcAttyakSAmi jIvitam॥2-2-5-30॥

यस्मिञ्च्छरीरे पित्रा मे ह्यभिलाषस्स्वयं कृतः॥ भातृभिस्तेन कायेन किंचिन्नास्ति प्रयोजनम् ॥३१॥

yasmiJccharIre pitrA me hyabhilASassvayaM kRtaH॥ bhAtRbhistena kAyena kiMcinnAsti prayojanam ॥31॥

मया येन शरीरेण तातेषु सहजेषु च ॥ उद्भावितः कामभावो न तत्सुकृतसाधनम्॥३२॥

mayA yena zarIreNa tAteSu sahajeSu ca ॥ udbhAvitaH kAmabhAvo na tatsukRtasAdhanam॥32॥

इति संचित्य मनसा संध्या शैलवरं ततः ॥ जगाम चन्द्रभागाख्यं चन्द्रभागापगा यतः ॥ ३३ ॥

iti saMcitya manasA saMdhyA zailavaraM tataH ॥ jagAma candrabhAgAkhyaM candrabhAgApagA yataH ॥ 33 ॥

अथ तत्र गतां ज्ञात्वा संध्यां गिरिवरं प्रति ॥ तपसे नियतात्मानं ब्रह्मावोचमहं सुतम् ॥ ३४ ॥

atha tatra gatAM jJAtvA saMdhyAM girivaraM prati ॥ tapase niyatAtmAnaM brahmAvocamahaM sutam ॥ 34 ॥

वशिष्ठं संयतात्मानं सर्वज्ञं ज्ञानयोगिनम् ॥ समीपे स्वे समासीनं वेदवेदाङ्गपारगम् ॥३५॥

vaziSThaM saMyatAtmAnaM sarvajJaM jJAnayoginam ॥ samIpe sve samAsInaM vedavedAGgapAragam ॥35॥

ब्रह्मोवाच ॥ वसिष्ठ पुत्र गच्छ त्वं संध्यां जातां मनस्विनीम्॥ तपसे धृतकामां च दीक्षस्वैनां यथा विधि ॥३६॥

brahmovAca ॥ vasiSTha putra gaccha tvaM saMdhyAM jAtAM manasvinIm॥ tapase dhRtakAmAM ca dIkSasvainAM yathA vidhi ॥36॥

मंदाक्षमभवत्तस्याः पुरा दृष्ट्वैव कामुकान्॥ युष्मान्मां च तथात्मानं सकामां मुनिसत्तम॥३७॥

maMdAkSamabhavattasyAH purA dRSTvaiva kAmukAn॥ yuSmAnmAM ca tathAtmAnaM sakAmAM munisattama॥37॥

अभूतपूर्वं तत्कर्म पूर्व मृत्युं विमृश्य सा ॥ युष्माकमात्मनश्चापि प्राणान्संत्यक्तुमिच्छति ॥३८॥

abhUtapUrvaM tatkarma pUrva mRtyuM vimRzya sA ॥ yuSmAkamAtmanazcApi prANAnsaMtyaktumicchati ॥38॥

समर्यादेषु मर्यादां तपसा स्थापयिष्यति ॥ तपः कर्तुं गता साध्वी चन्द्रभागाख्यभूधरे॥३९॥

samaryAdeSu maryAdAM tapasA sthApayiSyati ॥ tapaH kartuM gatA sAdhvI candrabhAgAkhyabhUdhare॥39॥

न भावं तपसस्तात सानुजानाति कंचन॥ तस्माद्यथोपदेशात्सा प्राप्नोत्विष्टं तथा कुरु॥2-2-5-४०॥

na bhAvaM tapasastAta sAnujAnAti kaMcana॥ tasmAdyathopadezAtsA prApnotviSTaM tathA kuru॥2-2-5-40॥

इदं रूपं परित्यज्य निजं रूपांतरं मुने ॥ परिगृह्यांतिके तस्यास्तपश्चर्यां निदर्शयन् ॥ ४१ ॥

idaM rUpaM parityajya nijaM rUpAMtaraM mune ॥ parigRhyAMtike tasyAstapazcaryAM nidarzayan ॥ 41 ॥

इदं स्वरूपं भवतो दृष्ट्वा पूर्वं यथात्र वाम् ॥ नाप्नुयात्साऽथ किंचिद्वै ततो रूपांतरं कुरु ॥४२॥

idaM svarUpaM bhavato dRSTvA pUrvaM yathAtra vAm ॥ nApnuyAtsA'tha kiMcidvai tato rUpAMtaraM kuru ॥42॥

ब्रह्मोवाच ॥नारदेत्थं वसिष्ठो मे समाज्ञप्तो दयावता ॥ यथाऽस्विति च मां प्रोच्य ययौ संध्यांतिकं मुनिः ॥ ४३ ॥

brahmovAca ॥nAradetthaM vasiSTho me samAjJapto dayAvatA ॥ yathA'sviti ca mAM procya yayau saMdhyAMtikaM muniH ॥ 43 ॥

तत्र देवसरः पूर्णं गुणैर्मानससंमितम् ॥ ददर्श स वसिष्टोथ संध्यां तत्तीरगामपि॥। ४४ ॥

tatra devasaraH pUrNaM guNairmAnasasaMmitam ॥ dadarza sa vasiSTotha saMdhyAM tattIragAmapi॥। 44 ॥

तीरस्थया तया रेजे तत्सरः कमलोज्ज्वलम् ॥ उद्यदिंदुसुनक्षत्र प्रदोषे गगनं यथा ॥ ४५ ॥

tIrasthayA tayA reje tatsaraH kamalojjvalam ॥ udyadiMdusunakSatra pradoSe gaganaM yathA ॥ 45 ॥

मुनिर्दृष्ट्वाथ तां तत्र सुसंभावां स कौतुकी ॥ वीक्षांचक्रे सरस्तत्र बृहल्लोहितसंज्ञकम् ॥ ४६ ॥

munirdRSTvAtha tAM tatra susaMbhAvAM sa kautukI ॥ vIkSAMcakre sarastatra bRhallohitasaMjJakam ॥ 46 ॥

चन्द्रभागा नदी तस्मात्प्राकाराद्दक्षिणांबुधिम् ॥ यांती सा चैव ददृशे तेन सानुगिरेर्महत् ॥ ४७ ॥

candrabhAgA nadI tasmAtprAkArAddakSiNAMbudhim ॥ yAMtI sA caiva dadRze tena sAnugirermahat ॥ 47 ॥

निर्भिद्य पश्चिमं सा तु चन्द्रभागस्य सा नदी ॥ यथा हिमवतो गंगा तथा गच्छति सागरम् ॥४८॥

nirbhidya pazcimaM sA tu candrabhAgasya sA nadI ॥ yathA himavato gaMgA tathA gacchati sAgaram ॥48॥

तस्मिन् गिरौ चन्द्रभागे बृहल्लोहिततीरगाम् ॥ संध्यां दृष्ट्वाथ पप्रच्छ वसिष्ठस्सादरं तदा ॥४९॥

tasmin girau candrabhAge bRhallohitatIragAm ॥ saMdhyAM dRSTvAtha papraccha vasiSThassAdaraM tadA ॥49॥

वशिष्ठ -उवाच ॥ किमर्थमागता भद्रे निर्जनं त्वं महीधरम् ॥ कस्य वा तनया किं वा भवत्यापि चिकीर्षितम् ॥ 2-2-5-५० ॥

vaziSTha -uvAca ॥ kimarthamAgatA bhadre nirjanaM tvaM mahIdharam ॥ kasya vA tanayA kiM vA bhavatyApi cikIrSitam ॥ 2-2-5-50 ॥

एतदिच्छाम्यहं श्रोतुं वद गुह्यं न चेद्भवेत् ॥ वदनं पूर्णचन्द्राभं निश्चेष्टं वा कथं तव ॥ ५१ ॥

etadicchAmyahaM zrotuM vada guhyaM na cedbhavet ॥ vadanaM pUrNacandrAbhaM nizceSTaM vA kathaM tava ॥ 51 ॥

ब्रह्मोवाच ॥ तच्छ्रुत्वा वचनं तस्य वशिष्ठस्य महात्मनः ॥ दृष्ट्वा च तं महात्मानं ज्वलंतमिव पावकम् ॥ ५२ ॥

brahmovAca ॥ tacchrutvA vacanaM tasya vaziSThasya mahAtmanaH ॥ dRSTvA ca taM mahAtmAnaM jvalaMtamiva pAvakam ॥ 52 ॥

शरीरधृग्ब्रह्मचर्यं विलसंतं जटाधरम् ॥ सादरं प्रणिपत्याथ संध्योवाच तपोधनम् ॥ ५३ ॥

zarIradhRgbrahmacaryaM vilasaMtaM jaTAdharam ॥ sAdaraM praNipatyAtha saMdhyovAca tapodhanam ॥ 53 ॥

संध्योवाच ॥ यदर्थमागता शैलं सिद्धं तन्मे निबोध ह ॥ तव दर्शनमात्रेण यन्मे सेत्स्यति वा विभो ॥ ५४ ॥

saMdhyovAca ॥ yadarthamAgatA zailaM siddhaM tanme nibodha ha ॥ tava darzanamAtreNa yanme setsyati vA vibho ॥ 54 ॥

तपश्चर्तुमहं ब्रह्मन्निर्जनं शैलमागता ॥ ब्रह्मणोहं सुता जाता नाम्ना संध्येति विश्रुता ॥५५॥

tapazcartumahaM brahmannirjanaM zailamAgatA ॥ brahmaNohaM sutA jAtA nAmnA saMdhyeti vizrutA ॥55॥

यदि ते युज्यते सह्यं मां त्वं समुपदेशय ॥ एतच्चिकीर्षितं गुह्यं नान्यैः किंचन विद्यते ॥५६॥

yadi te yujyate sahyaM mAM tvaM samupadezaya ॥ etaccikIrSitaM guhyaM nAnyaiH kiMcana vidyate ॥56॥

अज्ञात्वा तपसो भावं तपोवनमुपाश्रिता ॥ चिंतया परिशुष्येहं वेपते हि मनो मम ॥५७॥

ajJAtvA tapaso bhAvaM tapovanamupAzritA ॥ ciMtayA parizuSyehaM vepate hi mano mama ॥57॥

ब्रह्मोवाच ॥ आकर्ण्य तस्या वचनं वसिष्ठो ब्रह्मवित्तमः ॥ स्वयं च सर्वकृत्यज्ञो नान्यत्किंचन पृष्टवान् ॥ ५८ ॥

brahmovAca ॥ AkarNya tasyA vacanaM vasiSTho brahmavittamaH ॥ svayaM ca sarvakRtyajJo nAnyatkiMcana pRSTavAn ॥ 58 ॥

अथ तां नियतात्मानं तपसेति धृतोद्यमाम् ॥ प्रोवाच मनसा स्मृत्वा शंकरं भक्तवत्सलम् ॥ ५९ ॥

atha tAM niyatAtmAnaM tapaseti dhRtodyamAm ॥ provAca manasA smRtvA zaMkaraM bhaktavatsalam ॥ 59 ॥

वसिष्ठ उवाच ॥ परमं यो महत्तेजः परमं यो महत्तपः ॥ परमः परमाराध्यः शम्भुर्मनसि धार्यताम् ॥ 2-2-5-६० ॥

vasiSTha uvAca ॥ paramaM yo mahattejaH paramaM yo mahattapaH ॥ paramaH paramArAdhyaH zambhurmanasi dhAryatAm ॥ 2-2-5-60 ॥

धर्मार्थकाममोक्षाणां य एकस्त्वादिकारणम् ॥ तमेकं जगतामाद्यं भजस्व पुरुषोत्तमम् ॥ ६१ ॥

dharmArthakAmamokSANAM ya ekastvAdikAraNam ॥ tamekaM jagatAmAdyaM bhajasva puruSottamam ॥ 61 ॥

मंत्रेणानेन देवेशं शम्भुं भज शुभानने ॥ तेन ते सकला वाप्तिर्भविष्यति न संशयः ॥६२॥

maMtreNAnena devezaM zambhuM bhaja zubhAnane ॥ tena te sakalA vAptirbhaviSyati na saMzayaH ॥62॥

ॐ नमश्शंकरायेति ॐमित्यंतेन सन्ततम् ॥ मौनतपस्याप्रारंम्भं तन्मे निगदतः शृणु॥६३॥

OM namazzaMkarAyeti OMmityaMtena santatam ॥ maunatapasyAprAraMmbhaM tanme nigadataH zRNu॥63॥

स्नानं मौनेन कर्तव्यं मौनेन हरपूजनम् ॥ द्वयोः पूर्णजलाहारं प्रथमं षष्ठकालयोः ॥ ६४ ॥

snAnaM maunena kartavyaM maunena harapUjanam ॥ dvayoH pUrNajalAhAraM prathamaM SaSThakAlayoH ॥ 64 ॥

तृतीये षष्ठकाले तु ह्युपवासपरो भवेत् ॥ एवं तपस्समाप्तौ वा षष्ठे काले क्रिया भवेत् ॥ ६५ ॥

tRtIye SaSThakAle tu hyupavAsaparo bhavet ॥ evaM tapassamAptau vA SaSThe kAle kriyA bhavet ॥ 65 ॥

एवं मौनतपस्याख्या ब्रह्मचर्यफलप्रदा ॥ सर्वाभीष्टप्रदा देवि सत्यंसत्यं न संशयः ॥ ६६ ॥

evaM maunatapasyAkhyA brahmacaryaphalapradA ॥ sarvAbhISTapradA devi satyaMsatyaM na saMzayaH ॥ 66 ॥

एवं चित्ते समुद्दिश्य कामं चिंतय शंकरम् ॥ स ते प्रसन्न इष्टार्थमचिरादेव दास्यति ॥ ६७ ॥

evaM citte samuddizya kAmaM ciMtaya zaMkaram ॥ sa te prasanna iSTArthamacirAdeva dAsyati ॥ 67 ॥

ब्रह्मोवाच ॥ उपविश्य वसिष्ठोथ संध्यायै तपसः क्रियाम् ॥ तामाभाष्य यथान्यायं तत्रैवांतर्दधे मुनिः ॥ ६८ ॥

brahmovAca ॥ upavizya vasiSThotha saMdhyAyai tapasaH kriyAm ॥ tAmAbhASya yathAnyAyaM tatraivAMtardadhe muniH ॥ 68 ॥