ऋषय ऊचुः ॥ सूतसूत महाभाग व्यासशिष्य नमोस्तु ते ॥ श्राविताद्याद्भुता शैवकथा परमपावनी ॥ १ ॥

RSaya UcuH ॥ sUtasUta mahAbhAga vyAsaziSya namostu te ॥ zrAvitAdyAdbhutA zaivakathA paramapAvanI ॥ 1 ॥

तत्राद्भुता महादिव्या लिंगोत्पत्तिः श्रुता शुभा ॥ श्रुत्वा यस्याः प्रभावं च दुःखनाशो भवेदिह॥२॥

tatrAdbhutA mahAdivyA liMgotpattiH zrutA zubhA ॥ zrutvA yasyAH prabhAvaM ca duHkhanAzo bhavediha॥2॥

ब्रह्मनारदसंवादमनुसृत्य दयानिधे॥ शिवार्चनविधिं ब्रूहि येन तुष्टो भवेच्छिवः ॥३॥

brahmanAradasaMvAdamanusRtya dayAnidhe॥ zivArcanavidhiM brUhi yena tuSTo bhavecchivaH ॥3॥

ब्राह्मणैः क्षत्रियैर्वैश्यैः शूद्रैर्वा पूज्यते शिवः॥ कथं कार्यं च तद् ब्रूहि यथा व्यासमुखाच्छ्रुतम् ॥ ४ ॥

brAhmaNaiH kSatriyairvaizyaiH zUdrairvA pUjyate zivaH॥ kathaM kAryaM ca tad brUhi yathA vyAsamukhAcchrutam ॥ 4 ॥

तच्छ्रुत्वा वचनं तेषां शर्मदं श्रुतिसंमतम्॥ उवाच सकलं प्रीत्या मुनि प्रश्नानुसारतः ॥ ५ ॥

tacchrutvA vacanaM teSAM zarmadaM zrutisaMmatam॥ uvAca sakalaM prItyA muni praznAnusArataH ॥ 5 ॥

सूत उवाच ॥ साधु पृष्टं भवद्भिश्च तद्रहस्यं मुनीश्वराः ॥ तदहं कथयाम्यद्य यथाबुद्धि यथाश्रुतम् ॥ ६ ॥

sUta uvAca ॥ sAdhu pRSTaM bhavadbhizca tadrahasyaM munIzvarAH ॥ tadahaM kathayAmyadya yathAbuddhi yathAzrutam ॥ 6 ॥

भवद्भिः पृच्छयते तद्वत्तथा व्यासेन वै पुरा॥ पृष्टं सनत्कुमाराय तच्छ्रुतं ह्युपमन्युना ॥७॥

bhavadbhiH pRcchayate tadvattathA vyAsena vai purA॥ pRSTaM sanatkumArAya tacchrutaM hyupamanyunA ॥7॥

ततो व्यासेन वै श्रुत्वा शिवपूजादिकं च यत् ॥ मह्यं च पाठितं तेन लोकानां हितकाम्यया ॥ ८ ॥

tato vyAsena vai zrutvA zivapUjAdikaM ca yat ॥ mahyaM ca pAThitaM tena lokAnAM hitakAmyayA ॥ 8 ॥

तच्छ्रुतं चैव कृष्णेन ह्युपमन्योर्महात्मनः ॥ तदहं कथयिष्यामि यथा ब्रह्मावदत्पुरा॥९॥

tacchrutaM caiva kRSNena hyupamanyormahAtmanaH ॥ tadahaM kathayiSyAmi yathA brahmAvadatpurA॥9॥

ब्रह्मोवाच ॥ शृणु नारद वक्ष्यामि संक्षेपाल्लिंगपूजनम् ॥ वक्तुं वर्षशतेनापि न शक्यं विस्तरान्मुने ॥2-1-11-१०॥

brahmovAca ॥ zRNu nArada vakSyAmi saMkSepAlliMgapUjanam ॥ vaktuM varSazatenApi na zakyaM vistarAnmune ॥2-1-11-10॥

एवं तु शांकरं रूपं मुखं स्वच्छं सनातनम् ॥ पूजयेत्परया भक्त्या सर्वकामफलाप्तये ॥११॥

evaM tu zAMkaraM rUpaM mukhaM svacchaM sanAtanam ॥ pUjayetparayA bhaktyA sarvakAmaphalAptaye ॥11॥

दारिद्र्यं रोगदुःखं च पीडनं शत्रुसंभवम् ॥ पापं चतुर्विधं तावद्यावन्नार्चयते शिवम् ॥१२॥

dAridryaM rogaduHkhaM ca pIDanaM zatrusaMbhavam ॥ pApaM caturvidhaM tAvadyAvannArcayate zivam ॥12॥

सम्पूजिते शिवे देवे सर्वदुःखं विलीयते ॥ संपद्यते सुखं सर्वं पश्चान्मुक्तिरवाप्यते ॥१३॥

sampUjite zive deve sarvaduHkhaM vilIyate ॥ saMpadyate sukhaM sarvaM pazcAnmuktiravApyate ॥13॥

ये वै मानुष्यमाश्रित्य मुख्यं संतानतस्सुखम् ॥ तेन पूज्यो महादेवः सर्वकार्यार्थसाधकः ॥१४॥

ye vai mAnuSyamAzritya mukhyaM saMtAnatassukham ॥ tena pUjyo mahAdevaH sarvakAryArthasAdhakaH ॥14॥

ब्राह्मणाः क्षत्रिया वैश्याश्शूद्राश्च विधिवत्क्रमात् ॥ शंकरार्चां प्रकुर्वंतु सर्वकामार्थसिद्धये॥१५॥

brAhmaNAH kSatriyA vaizyAzzUdrAzca vidhivatkramAt ॥ zaMkarArcAM prakurvaMtu sarvakAmArthasiddhaye॥15॥

प्रातःकाले समुत्थाय मुहूर्ते ब्रह्मसंज्ञके॥ गुरोश्च स्मरणं कृत्वा शंभोश्चैव तथा पुनः ॥१६॥

prAtaHkAle samutthAya muhUrte brahmasaMjJake॥ gurozca smaraNaM kRtvA zaMbhozcaiva tathA punaH ॥16॥

तीर्थानां स्मरणं कृत्वा ध्यानं चैव हरेरपि ॥ ममापि निर्जराणां वै मुन्यादीनां तथा मुने।१७॥

tIrthAnAM smaraNaM kRtvA dhyAnaM caiva harerapi ॥ mamApi nirjarANAM vai munyAdInAM tathA mune।17॥

ततः स्तोत्रं शुभं नाम गृह्णीयाद्विधिपूर्वकम् ॥ ततोत्थाय मलोत्सर्गं दक्षिणस्यां चरेद्दिशि ॥ १८ ॥

tataH stotraM zubhaM nAma gRhNIyAdvidhipUrvakam ॥ tatotthAya malotsargaM dakSiNasyAM careddizi ॥ 18 ॥

एकान्ते तु विधिं कुर्यान्मलोत्सर्गस्स यच्छ्रुतम् ॥ तदेव कथयाम्यद्य शृण्वाधाय मनो मुने॥१९॥

ekAnte tu vidhiM kuryAnmalotsargassa yacchrutam ॥ tadeva kathayAmyadya zRNvAdhAya mano mune॥19॥

शुद्धां मृदं द्विजो लिप्यात्पंचवारं विशुद्धये ॥ क्षत्रियश्च चतुर्वारं वैश्यो वरत्रयं तथा ॥2-1-11-२०॥

zuddhAM mRdaM dvijo lipyAtpaMcavAraM vizuddhaye ॥ kSatriyazca caturvAraM vaizyo varatrayaM tathA ॥2-1-11-20॥

शूद्रो द्विवारं च मृदं गृह्णीयाद्विधिशुद्धये ॥ गुदे वाथ सकृल्लिंगे वारमेकं प्रयत्नतः ॥ २१ ॥

zUdro dvivAraM ca mRdaM gRhNIyAdvidhizuddhaye ॥ gude vAtha sakRlliMge vAramekaM prayatnataH ॥ 21 ॥

दशवारं वामहस्ते सप्तवारं द्वयोस्तथा ॥ प्रत्येकम्पादयोस्तात त्रिवारं करयोः पुनः ॥ २२ ॥

dazavAraM vAmahaste saptavAraM dvayostathA ॥ pratyekampAdayostAta trivAraM karayoH punaH ॥ 22 ॥

स्त्रीभिश्च शूद्रवत्कार्यं मृदाग्रहणमुत्तमम्॥ हस्तौ पादौ च प्रक्षाल्य पूर्ववन्मृदमाहरेत् ॥२३॥

strIbhizca zUdravatkAryaM mRdAgrahaNamuttamam॥ hastau pAdau ca prakSAlya pUrvavanmRdamAharet ॥23॥

दंतकाष्ठं ततः कुर्यात्स्ववर्णक्रमतो नरः ॥२४॥

daMtakASThaM tataH kuryAtsvavarNakramato naraH ॥24॥

विप्रः कुर्याद्दंतकाष्ठं द्वादशांगुलमानतः॥ एकादशांगुलं राजा वैश्यः कुर्याद्दशांगुलम् ॥२५॥

vipraH kuryAddaMtakASThaM dvAdazAMgulamAnataH॥ ekAdazAMgulaM rAjA vaizyaH kuryAddazAMgulam ॥25॥

शूद्रो नवागुलं कुर्यादिति मानमिदं स्मृतम् ॥ कालदोषं विचार्य्यैव मनुदृष्टं विवर्जयेत् ॥२६॥

zUdro navAgulaM kuryAditi mAnamidaM smRtam ॥ kAladoSaM vicAryyaiva manudRSTaM vivarjayet ॥26॥

षष्ट्याद्यामाश्च नवमी व्रतमस्तं रवेर्दिनम्॥ तथा श्राद्धदिनं तात निषिद्धं रदधावने ॥ २७ ॥

SaSTyAdyAmAzca navamI vratamastaM raverdinam॥ tathA zrAddhadinaM tAta niSiddhaM radadhAvane ॥ 27 ॥

स्नानं तु विधिवत्कार्यं तीर्थादिषु क्रमेण तु ॥ देशकालविशेषेण स्नानं कार्यं समंत्रकम् ॥ २८ ॥

snAnaM tu vidhivatkAryaM tIrthAdiSu krameNa tu ॥ dezakAlavizeSeNa snAnaM kAryaM samaMtrakam ॥ 28 ॥

आचम्य प्रथमं तत्र धौतवस्त्रेण चाधरेत् ॥ एकान्ते सुस्थले स्थित्वा संध्याविधिमथाचरेत् ॥२९ ॥

Acamya prathamaM tatra dhautavastreNa cAdharet ॥ ekAnte susthale sthitvA saMdhyAvidhimathAcaret ॥29 ॥

यथायोग्यं विधिं कृत्वा पूजाविधिमथारभेत् ॥ मनस्तु सुस्थिरं कृत्वा पूजागारं प्रविश्य च ॥2-1-11-३०॥

yathAyogyaM vidhiM kRtvA pUjAvidhimathArabhet ॥ manastu susthiraM kRtvA pUjAgAraM pravizya ca ॥2-1-11-30॥

पूजाविधिं समादाय स्वासने ह्युपविश्य वै ॥ न्यासादिकं विधायादौ पूजयेत्क्रमशो हरम्॥३१॥

pUjAvidhiM samAdAya svAsane hyupavizya vai ॥ nyAsAdikaM vidhAyAdau pUjayetkramazo haram॥31॥

प्रथमं च गणाधीशं द्वारपालांस्तथैव च ॥ दिक्पालांश्च सुसंपूज्य पश्चात्पीठं प्रकल्पयेत् ॥ ३२ ॥

prathamaM ca gaNAdhIzaM dvArapAlAMstathaiva ca ॥ dikpAlAMzca susaMpUjya pazcAtpIThaM prakalpayet ॥ 32 ॥

अथ वाऽष्टदलं कृत्वा पूजाद्रव्यं समीपतः ॥ उपविश्य ततस्तत्र उपवेश्य शिवम् प्रभुम् ॥३३॥

atha vA'STadalaM kRtvA pUjAdravyaM samIpataH ॥ upavizya tatastatra upavezya zivam prabhum ॥33॥

आचमनत्रयं कृत्वा प्रक्षाल्य च पुनः करौ ॥ प्राणायामत्रयं कृत्वा मध्ये ध्यायेच्च त्र्यम्बकम् ॥ ३४ ॥

AcamanatrayaM kRtvA prakSAlya ca punaH karau ॥ prANAyAmatrayaM kRtvA madhye dhyAyecca tryambakam ॥ 34 ॥

पंचवक्त्रं दशभुजं शुद्धस्फटिकसन्निभम् ॥ सर्वाभरणसंयुक्तं व्याघ्रचर्मोत्तरीयकम् ॥ ३५ ॥

paMcavaktraM dazabhujaM zuddhasphaTikasannibham ॥ sarvAbharaNasaMyuktaM vyAghracarmottarIyakam ॥ 35 ॥

तस्य सारूप्यतां स्मृत्वा दहेत्पापं नरस्सदा ॥ शिवं ततः समुत्थाप्य पूजयेत्परमेश्वरम् ॥३६॥

tasya sArUpyatAM smRtvA dahetpApaM narassadA ॥ zivaM tataH samutthApya pUjayetparamezvaram ॥36॥

देहशुद्धिं ततः कृत्वा मूल मंत्रं न्यसेत्क्रमात् ॥ सर्वत्र प्रणवेनैव षडंगन्यासमाचरेत्॥३७॥

dehazuddhiM tataH kRtvA mUla maMtraM nyasetkramAt ॥ sarvatra praNavenaiva SaDaMganyAsamAcaret॥37॥

कृत्वा हृदि प्रयोगं च ततः पूजां समारभेत् ॥ पाद्यार्घाचमनार्थं च पात्राणि च प्रकल्पयेत्॥३८॥

kRtvA hRdi prayogaM ca tataH pUjAM samArabhet ॥ pAdyArghAcamanArthaM ca pAtrANi ca prakalpayet॥38॥

स्थापयेद्विविधान्कुंभान्नव धीमान्यथाविधि॥ दर्भैराच्छाद्य तैरेव संस्थाप्याभ्युक्ष्य वारिणा ॥३९॥

sthApayedvividhAnkuMbhAnnava dhImAnyathAvidhi॥ darbhairAcchAdya taireva saMsthApyAbhyukSya vAriNA ॥39॥

तेषु तेषु च सर्वेषु क्षिपेत्तोयं सुशीतलम्॥ प्रणवेन क्षिपेत्तेषु द्रव्याण्यालोक्य बुद्धिमान् ॥2-1-11-४०॥

teSu teSu ca sarveSu kSipettoyaM suzItalam॥ praNavena kSipetteSu dravyANyAlokya buddhimAn ॥2-1-11-40॥

उशीरं चन्दनं चैव पाद्ये तु परिकल्पयेत् ॥ जातीकं कोलकर्पूरवटमूल तमालकम् ॥४१॥

uzIraM candanaM caiva pAdye tu parikalpayet ॥ jAtIkaM kolakarpUravaTamUla tamAlakam ॥41॥

चूर्णयित्वा यथान्यायं क्षिपेदाचमनीयके ॥ एतत्सर्वेषु पात्रेषु दापयेच्चन्दनान्वितम् ॥४२॥

cUrNayitvA yathAnyAyaM kSipedAcamanIyake ॥ etatsarveSu pAtreSu dApayeccandanAnvitam ॥42॥

पार्श्वयोर्देवदेवस्य नंदीशं तु समर्चयेत् ॥ गंधैर्धूपैस्तथा दीपैर्विविधैः पूजयेच्छिवम्॥४३॥

pArzvayordevadevasya naMdIzaM tu samarcayet ॥ gaMdhairdhUpaistathA dIpairvividhaiH pUjayecchivam॥43॥

लिंगशुद्धिं ततः कृत्वा मुदा युक्तो नरस्तदा ॥ यथोचितं तु मंत्रौघैः प्रणवादिर्नमोंतकैः ॥४४॥

liMgazuddhiM tataH kRtvA mudA yukto narastadA ॥ yathocitaM tu maMtraughaiH praNavAdirnamoMtakaiH ॥44॥

कल्पयेदासनं स्वस्तिपद्मादि प्रणवेन तु ॥ तस्मात्पूर्वदिशं साक्षादणिमामयमक्षरम् ॥ ४५ ॥

kalpayedAsanaM svastipadmAdi praNavena tu ॥ tasmAtpUrvadizaM sAkSAdaNimAmayamakSaram ॥ 45 ॥

लघिमा दक्षिणं चैव महिमा पश्चिमं तथा ॥ प्राप्तिश्चैवोत्तरं पत्रं प्राकाम्यं पावकस्य च॥४६॥

laghimA dakSiNaM caiva mahimA pazcimaM tathA ॥ prAptizcaivottaraM patraM prAkAmyaM pAvakasya ca॥46॥

ईशित्वं नैर्ऋतं पत्रं वशित्वं वायुगोचरे॥ सर्वज्ञत्वं तथैशान्यं कर्णिका सोम उच्यते ॥ ४७ ॥

IzitvaM nairRtaM patraM vazitvaM vAyugocare॥ sarvajJatvaM tathaizAnyaM karNikA soma ucyate ॥ 47 ॥

सोमस्याधस्तथा सूर्यस्तस्याधः पावकस्त्वयम्॥ धर्मादीनपि तस्याधो भवतः कल्पयेत् क्रमात् ॥ ४८ ॥

somasyAdhastathA sUryastasyAdhaH pAvakastvayam॥ dharmAdInapi tasyAdho bhavataH kalpayet kramAt ॥ 48 ॥

अव्यक्तादि चतुर्दिक्षु सोमस्यांते गुणत्रयम् ॥ सद्योजातं प्रवक्ष्यामीत्यावाह्य परमेश्वरम् ॥ ४९ ॥

avyaktAdi caturdikSu somasyAMte guNatrayam ॥ sadyojAtaM pravakSyAmItyAvAhya paramezvaram ॥ 49 ॥

वामदेवेन मंत्रेण तिष्ठेच्चैवासनोपरि ॥ सान्निध्यं रुद्रगायत्र्या अघोरेण निरोधयेत् ॥ 2-1-11-५० ॥

vAmadevena maMtreNa tiSTheccaivAsanopari ॥ sAnnidhyaM rudragAyatryA aghoreNa nirodhayet ॥ 2-1-11-50 ॥

ईशानं सर्वविद्यानामिति मंत्रेण पूजयेत्॥ पाद्यमाचनीयं च विधायार्घ्यं प्रदापयेत्॥५१॥

IzAnaM sarvavidyAnAmiti maMtreNa pUjayet॥ pAdyamAcanIyaM ca vidhAyArghyaM pradApayet॥51॥

स्थापयेद्विधिना रुद्रं गंधचंदनवारिणा ॥ पञ्चागव्यविधानेन गृह्यपात्रेऽभिमंत्र्य च॥ ॥५२॥

sthApayedvidhinA rudraM gaMdhacaMdanavAriNA ॥ paJcAgavyavidhAnena gRhyapAtre'bhimaMtrya ca॥ ॥52॥

प्रणवेनैव गव्येन स्नापयेत्पयसा च तम् ॥ दध्ना च मधुना चैव तथा चेक्षुरसेन तु॥५३॥

praNavenaiva gavyena snApayetpayasA ca tam ॥ dadhnA ca madhunA caiva tathA cekSurasena tu॥53॥

घृतेन तु यथा पूज्य सर्वकामहितावहम् ॥ पुण्यैर्द्रव्यैर्महादेवं प्रणवेनाभिषेचयेत्॥ ५४ ॥

ghRtena tu yathA pUjya sarvakAmahitAvaham ॥ puNyairdravyairmahAdevaM praNavenAbhiSecayet॥ 54 ॥

पवित्रजलभाण्डेषु मंत्रैः तोयं क्षिपेत्ततः ॥ शुद्धीकृत्य यथान्यायं सितवस्त्रेण साधकः ॥५५॥।

pavitrajalabhANDeSu maMtraiH toyaM kSipettataH ॥ zuddhIkRtya yathAnyAyaM sitavastreNa sAdhakaH ॥55॥।

तावद्दूरं न कर्तव्यं न यावच्चन्दनं क्षिपेत् ॥ तंदुलैस्सुन्दरैस्तत्र पूजयेच्छंकरम्मुदा ॥ ५६ ॥

tAvaddUraM na kartavyaM na yAvaccandanaM kSipet ॥ taMdulaissundaraistatra pUjayecchaMkarammudA ॥ 56 ॥

कुशापामार्गकर्पूर जातिचंपकपाटलैः ॥ करवीरैस्सितैश्चैव मल्लिकाकमलोत्पलैः ॥५७॥

kuzApAmArgakarpUra jAticaMpakapATalaiH ॥ karavIraissitaizcaiva mallikAkamalotpalaiH ॥57॥

अपूर्वपुष्पैर्विविधैश्चन्दनाद्यैस्तथैव च ॥ जलेन जलधाराञ्च कल्पयेत्परमेश्वरे ॥ ५८ ॥

apUrvapuSpairvividhaizcandanAdyaistathaiva ca ॥ jalena jaladhArAJca kalpayetparamezvare ॥ 58 ॥

पात्रैश्च विविधैर्देवं स्नापयेच्च महेश्वरम् ॥ मंत्रपूर्वं प्रकर्तव्या पूजा सर्वफलप्रदा ॥ ५९ ॥

pAtraizca vividhairdevaM snApayecca mahezvaram ॥ maMtrapUrvaM prakartavyA pUjA sarvaphalapradA ॥ 59 ॥

मंत्राँश्च तुभ्यं ताँस्तात सर्वकामार्थसिद्धये ॥ प्रवक्ष्यामि समासेन सावधानतया शृणु ॥ 2-1-11-६० ॥

maMtrA~zca tubhyaM tA~stAta sarvakAmArthasiddhaye ॥ pravakSyAmi samAsena sAvadhAnatayA zRNu ॥ 2-1-11-60 ॥

पाठयमानेन मंत्रेण तथा वाङ्मयकेन च॥ रुद्रेण नीलरुद्रेण सुशुक्लेन सुभेन च ॥६१॥

pAThayamAnena maMtreNa tathA vAGmayakena ca॥ rudreNa nIlarudreNa suzuklena subhena ca ॥61॥

होतारेण तथा शीर्ष्णा शुभेनाथर्वणेन च ॥ शांत्या वाथ पुनश्शांत्यामारुणेनारुणेन च ॥ ६२ ॥

hotAreNa tathA zIrSNA zubhenAtharvaNena ca ॥ zAMtyA vAtha punazzAMtyAmAruNenAruNena ca ॥ 62 ॥

अर्थाभीष्टेन साम्ना च तथा देवव्रतेन च॥ ६३ ॥

arthAbhISTena sAmnA ca tathA devavratena ca॥ 63 ॥

रथांतरेण पुष्पेण सूक्तेन युक्तेन च ॥ मृत्युंजयेन मंत्रेण तथा पंचाक्षरेण च ॥ ६४ ॥

rathAMtareNa puSpeNa sUktena yuktena ca ॥ mRtyuMjayena maMtreNa tathA paMcAkSareNa ca ॥ 64 ॥

जलधाराः सहस्रेण शतेनैकोत्तरेण वा ॥ कर्तव्या वेदमार्गेण नामभिर्वाथ वा पुनः ॥६५ ॥

jaladhArAH sahasreNa zatenaikottareNa vA ॥ kartavyA vedamArgeNa nAmabhirvAtha vA punaH ॥65 ॥

ततश्चंदनपुष्पादि रोपणीयं शिवोपरि ॥ दापयेत्प्रणवेनैव मुखवासादिकं तथा ॥ ६६ ॥

tatazcaMdanapuSpAdi ropaNIyaM zivopari ॥ dApayetpraNavenaiva mukhavAsAdikaM tathA ॥ 66 ॥

ततः स्फटिकसंकाशं देवं निष्कलमक्षयम् ॥ कारणं सर्वलोकानां सर्वलोकमयं परम् ॥ ६७ ॥

tataH sphaTikasaMkAzaM devaM niSkalamakSayam ॥ kAraNaM sarvalokAnAM sarvalokamayaM param ॥ 67 ॥

ब्रह्मेन्द्रोपेन्द्रविष्ण्वाद्यैरपि देवैरगोचरम् ॥ वेदविद्भिर्हि वेदांते त्वगोचर मिति स्मृतम् ॥ ६८ ॥

brahmendropendraviSNvAdyairapi devairagocaram ॥ vedavidbhirhi vedAMte tvagocara miti smRtam ॥ 68 ॥

आदिमध्यान्तरहितं भेषजं सर्वरोगिणाम् ॥ शिवतत्त्वमिति ख्यातं शिवलिंगं व्यवस्थितम् ॥ ६९ ॥

AdimadhyAntarahitaM bheSajaM sarvarogiNAm ॥ zivatattvamiti khyAtaM zivaliMgaM vyavasthitam ॥ 69 ॥

प्रणवेनैव मंत्रेण पूजयेल्लिंगमूर्द्धनि ॥ धूपैर्दीपैश्च नैवैद्यैस्ताम्बूलैः सुन्दरैस्तथा ॥ 2-1-11-७० ॥

praNavenaiva maMtreNa pUjayelliMgamUrddhani ॥ dhUpairdIpaizca naivaidyaistAmbUlaiH sundaraistathA ॥ 2-1-11-70 ॥

नीराजनेन रम्येण यथोक्तविधिना ततः ॥ नमस्कारैः स्तवैश्चान्यैर्मंत्रैर्नानाविधैरपि ॥ ७१ ॥

nIrAjanena ramyeNa yathoktavidhinA tataH ॥ namaskAraiH stavaizcAnyairmaMtrairnAnAvidhairapi ॥ 71 ॥

अर्घ्यं दत्त्वा तु पुष्पाणि पादयोस्सुविकीर्य च ॥ प्रणिपत्य च देवेशमात्मनाराधयेच्छिवम् ॥७२॥

arghyaM dattvA tu puSpANi pAdayossuvikIrya ca ॥ praNipatya ca devezamAtmanArAdhayecchivam ॥72॥

हस्ते गृहीत्वा पुष्पाणि समुत्थाय कृतांजलिः ॥ प्रार्थयेत्पुनरीशानं मंत्रेणानेन शंकरम् ॥ ७३ ॥

haste gRhItvA puSpANi samutthAya kRtAMjaliH ॥ prArthayetpunarIzAnaM maMtreNAnena zaMkaram ॥ 73 ॥

अज्ञानाद्यदि वा ज्ञानाज्जपपूजादिकं मया ॥ कृतं तदस्तु सफलं कृपया तव शंकर ॥७४॥

ajJAnAdyadi vA jJAnAjjapapUjAdikaM mayA ॥ kRtaM tadastu saphalaM kRpayA tava zaMkara ॥74॥

पठित्वैवं च पुष्पाणि शिवोपरि मुदा न्यसेत् ॥ स्वस्त्ययनं ततः कृत्वा ह्याशिषो विविधास्तथा ॥७५॥

paThitvaivaM ca puSpANi zivopari mudA nyaset ॥ svastyayanaM tataH kRtvA hyAziSo vividhAstathA ॥75॥

मार्जनं तु ततः कार्यं शिवस्योपरि वै पुनः ॥ नमस्कारं ततः क्षांतिं पुनराचमनाय च ॥७६॥

mArjanaM tu tataH kAryaM zivasyopari vai punaH ॥ namaskAraM tataH kSAMtiM punarAcamanAya ca ॥76॥

अघोच्चारणमुच्चार्य नमस्कारं प्रकल्पयेत् ॥ प्रार्थयेच्च पुनस्तत्र सर्वभावसमन्वितः ॥७७॥

aghoccAraNamuccArya namaskAraM prakalpayet ॥ prArthayecca punastatra sarvabhAvasamanvitaH ॥77॥

शिवे भक्तिश्शिवे भक्तिश्शिवे भक्तिर्भवे भवे ॥ अन्यथा शरणं नास्ति त्वमेव शरणं मम ॥७८॥

zive bhaktizzive bhaktizzive bhaktirbhave bhave ॥ anyathA zaraNaM nAsti tvameva zaraNaM mama ॥78॥

इति संप्रार्थ्य देवेशं सर्वसिद्धिप्रदायकम् ॥ पूजयेत्परया भक्त्या गलनादैर्विशेषतः ॥ ७९ ॥

iti saMprArthya devezaM sarvasiddhipradAyakam ॥ pUjayetparayA bhaktyA galanAdairvizeSataH ॥ 79 ॥

नमस्कारं ततः कृत्वा परिवारगणैस्सह ॥ प्रहर्षमतुलं लब्ध्वा कार्यं कुर्याद्यथासुखम् ॥ 2-1-11-८० ॥

namaskAraM tataH kRtvA parivAragaNaissaha ॥ praharSamatulaM labdhvA kAryaM kuryAdyathAsukham ॥ 2-1-11-80 ॥

एवं यः पूजयेन्नित्यं शिवभक्तिपरायणः ॥ तस्य वै सकला सिद्धिर्जायते तु पदे पदे ॥ ८१ ॥

evaM yaH pUjayennityaM zivabhaktiparAyaNaH ॥ tasya vai sakalA siddhirjAyate tu pade pade ॥ 81 ॥

वाग्मी स जायते तस्य मनोभी ष्टफलं ध्रुवम् ॥ रोगं दुःखं च शोकं च ह्युद्वेगं कृत्रिमं तथा ॥ ८२ ॥

vAgmI sa jAyate tasya manobhI STaphalaM dhruvam ॥ rogaM duHkhaM ca zokaM ca hyudvegaM kRtrimaM tathA ॥ 82 ॥

कौटिल्यं च गरं चैव यद्यदुःखमुपस्थितम् ॥ तद्दुःखं नाश यत्येव शिवः शिवकरः परः ॥८३॥

kauTilyaM ca garaM caiva yadyaduHkhamupasthitam ॥ tadduHkhaM nAza yatyeva zivaH zivakaraH paraH ॥83॥

कल्याणं जायते तस्य शुक्लपक्षे यथा शशी ॥ वर्द्धते सद्गुणस्तत्र ध्रुवं शंकरपूजनात् ॥८४॥

kalyANaM jAyate tasya zuklapakSe yathA zazI ॥ varddhate sadguNastatra dhruvaM zaMkarapUjanAt ॥84॥

इति पूजाविधिश्शंभोः प्रोक्तस्ते मुनिसत्तम ॥ अतः परं च शुश्रूषुः किं प्रष्टासि च नारद ॥ ८५ ॥

iti pUjAvidhizzaMbhoH proktaste munisattama ॥ ataH paraM ca zuzrUSuH kiM praSTAsi ca nArada ॥ 85 ॥