सूत उवाच॥ यथाभवल्लिंगरूपः संपूज्यस्त्रिभवे शिवः॥ तथोक्तं वा द्विजाः प्रीत्या किमन्यच्छ्रोतुमिच्छथ ॥ १॥

sUta uvAca॥ yathAbhavalliMgarUpaH saMpUjyastribhave zivaH॥ tathoktaM vA dvijAH prItyA kimanyacchrotumicchatha ॥ 1॥

ऋषय ऊचुः।अन्धकेश्वरलिंगस्य महिमानं वद प्रभो ॥ तथान्यच्छिवलिंगानां प्रीत्या वक्तुमिहार्हसि ॥ २ ॥

RSaya UcuH।andhakezvaraliMgasya mahimAnaM vada prabho ॥ tathAnyacchivaliMgAnAM prItyA vaktumihArhasi ॥ 2 ॥

सूत उवाच ॥ पुराब्धिगर्तमाश्रित्य वसन्दैत्योऽन्धकासुरः ॥ स्ववशं कारयामास त्रैलोक्यं सुरसूदनः ॥ ३ ॥

sUta uvAca ॥ purAbdhigartamAzritya vasandaityo'ndhakAsuraH ॥ svavazaM kArayAmAsa trailokyaM surasUdanaH ॥ 3 ॥

तस्माद्गर्ताच्च निस्सृत्य पीडयित्वा पुनः प्रजाः ॥ प्राविशच्च तदा दैत्यस्तं गर्तं सुपराक्रमः ॥ ४॥

tasmAdgartAcca nissRtya pIDayitvA punaH prajAH ॥ prAvizacca tadA daityastaM gartaM suparAkramaH ॥ 4॥

देवाश्च दुःखितः सर्वे शिवं प्रार्थ्य पुनःपुनः ॥ सर्वं निवेदयामासुस्स्वदुःखं च मुनीश्वराः ॥ ५॥

devAzca duHkhitaH sarve zivaM prArthya punaHpunaH ॥ sarvaM nivedayAmAsussvaduHkhaM ca munIzvarAH ॥ 5॥

सूत उवाच ॥ तदाकर्ण्य वचस्तेषां देवानां परमेश्वरः ॥ प्रत्युवाच प्रसन्नात्मा दुष्टहंता सतां गतिः ॥ ६ ॥

sUta uvAca ॥ tadAkarNya vacasteSAM devAnAM paramezvaraH ॥ pratyuvAca prasannAtmA duSTahaMtA satAM gatiH ॥ 6 ॥

शिव उवाच ॥ घातयिष्यामि तं दैत्यमन्धकं सुरसूदनम् ॥ सैन्यं च नीयतान्देवा ह्यायामि च गणैस्सह ॥ ७ ॥

ziva uvAca ॥ ghAtayiSyAmi taM daityamandhakaM surasUdanam ॥ sainyaM ca nIyatAndevA hyAyAmi ca gaNaissaha ॥ 7 ॥

तस्माद्गर्तादंधके हि देवर्षिद्रुहि भीकरे ॥ निस्सृते च तदा तस्मिन्देवा गर्तमुपाश्रिताः ॥ ८॥

tasmAdgartAdaMdhake hi devarSidruhi bhIkare ॥ nissRte ca tadA tasmindevA gartamupAzritAH ॥ 8॥

दैत्याश्च देवताश्चैव युद्धं चक्रुः सुदारुणम् ॥ शिवानुग्रहतो देवाः प्रबलाश्चाभवँस्तदा ॥ ९ ॥

daityAzca devatAzcaiva yuddhaM cakruH sudAruNam ॥ zivAnugrahato devAH prabalAzcAbhava~stadA ॥ 9 ॥

देवैश्च पीडितः सोपि यावद्गर्तमुपागतः ॥ तावच्छूलेन संप्रोतः शिवेन परमात्मना ॥ १०॥

devaizca pIDitaH sopi yAvadgartamupAgataH ॥ tAvacchUlena saMprotaH zivena paramAtmanA ॥ 10॥

तत्रत्यश्च तदा शंभुं ध्यात्वा संप्रार्थयत्तदा ॥ अन्तकाले च त्वां दृष्ट्वा तादृशो भवति क्षणात् ॥ ११ ॥

tatratyazca tadA zaMbhuM dhyAtvA saMprArthayattadA ॥ antakAle ca tvAM dRSTvA tAdRzo bhavati kSaNAt ॥ 11 ॥

इत्येवं संस्तुतस्सोपि प्रसन्नः शंकरस्तदा ॥ उवाच वचनं तत्र वरं ब्रूहि ददामि ते ॥ १२ ॥

ityevaM saMstutassopi prasannaH zaMkarastadA ॥ uvAca vacanaM tatra varaM brUhi dadAmi te ॥ 12 ॥

इत्येवं वचनं श्रुत्वा स दैत्यः पुनरब्रवीत् ॥ सुप्रणम्य शिवं स्तुत्वा सत्त्वभावमुपाश्रितः ॥ १३ ॥

ityevaM vacanaM zrutvA sa daityaH punarabravIt ॥ supraNamya zivaM stutvA sattvabhAvamupAzritaH ॥ 13 ॥

अन्धक उवाच ॥ यदि प्रसन्नो देवेश स्वभक्तिं देहि मे शुभाम् ॥ कृपां कृत्वा विशेषेण संस्थितो भव चेह वै ॥ १४ ॥

andhaka uvAca ॥ yadi prasanno deveza svabhaktiM dehi me zubhAm ॥ kRpAM kRtvA vizeSeNa saMsthito bhava ceha vai ॥ 14 ॥

सूत उवाच ॥ इत्युक्तस्तेन दैत्यं तं तद्गर्ते चाक्षिपद्धरः ॥ स्वयं तत्र स्थितो लिंगरूपोऽसौ लोककाम्यया ॥ १५॥

sUta uvAca ॥ ityuktastena daityaM taM tadgarte cAkSipaddharaH ॥ svayaM tatra sthito liMgarUpo'sau lokakAmyayA ॥ 15॥

अन्धकेशं च तल्लिंगं नित्यं यः पूजयेन्नरः ॥ षण्मासाज्जायते तस्य वांछासिद्धिर्न संशयः ॥ १६ ॥

andhakezaM ca talliMgaM nityaM yaH pUjayennaraH ॥ SaNmAsAjjAyate tasya vAMchAsiddhirna saMzayaH ॥ 16 ॥

वृत्त्यर्थं पूजयेल्लिंगं लोकस्य हितकारकम् ॥ षण्मासं यो द्विजश्चैव स वै देवलकः स्मृतः ॥ १७ ॥

vRttyarthaM pUjayelliMgaM lokasya hitakArakam ॥ SaNmAsaM yo dvijazcaiva sa vai devalakaH smRtaH ॥ 17 ॥

यथा देवलकश्चैव स भवेदिह वै तदा ॥ देवलकश्च यः प्रोक्तो नाधिकारो द्विजस्य हि ॥ १८॥

yathA devalakazcaiva sa bhavediha vai tadA ॥ devalakazca yaH prokto nAdhikAro dvijasya hi ॥ 18॥

॥ ऋषय ऊचुः ॥ देवलकश्च कः प्रोक्तः किं कार्यं तस्य विद्यते ॥ तत्त्वं वद महाप्राज्ञ लोकानां हितहेतवे ॥ १९ ॥

॥ RSaya UcuH ॥ devalakazca kaH proktaH kiM kAryaM tasya vidyate ॥ tattvaM vada mahAprAjJa lokAnAM hitahetave ॥ 19 ॥

सूत उवाच ॥ दधीचिर्नाम विप्रो यो धर्मिष्ठो वेदपारगः ॥ शिवभक्तिरतो नित्यं शिवशास्त्रपरायणः ॥ २० ॥

sUta uvAca ॥ dadhIcirnAma vipro yo dharmiSTho vedapAragaH ॥ zivabhaktirato nityaM zivazAstraparAyaNaH ॥ 20 ॥

तस्य पुत्रस्तथा ह्यासीत्स्मृतो नाम्ना सुदर्शनः ॥ तस्य भार्या दुकूला च नाम्ना दुष्टकुलोद्भवा ॥ २१ ॥

tasya putrastathA hyAsItsmRto nAmnA sudarzanaH ॥ tasya bhAryA dukUlA ca nAmnA duSTakulodbhavA ॥ 21 ॥

तद्वशे स च भर्तासीत्तस्य पुत्रचतुष्टयम् ॥ सोऽपि नित्यं शिवस्यैव पूजां च स्म करोत्यसौ ॥ २२ ॥

tadvaze sa ca bhartAsIttasya putracatuSTayam ॥ so'pi nityaM zivasyaiva pUjAM ca sma karotyasau ॥ 22 ॥

दधीचेस्तु तदा ह्यासीद्ग्रामान्तरनिवेशनम् ॥ ज्ञातिसंयोगतश्चैव ज्ञातिभिर्न स मोचितः ॥ २३ ॥

dadhIcestu tadA hyAsIdgrAmAntaranivezanam ॥ jJAtisaMyogatazcaiva jJAtibhirna sa mocitaH ॥ 23 ॥

कथयित्वा च पुत्रं स शिवभक्तिरतो भव॥ इत्युक्त्वा स गतो मुक्तो दाधीचिश्शैवसत्तमः ॥ २४ ॥

kathayitvA ca putraM sa zivabhaktirato bhava॥ ityuktvA sa gato mukto dAdhIcizzaivasattamaH ॥ 24 ॥

सुदर्शनस्तत्पुत्रोऽपि शिवपूजां चकार ह ॥ एवं चिरतरः कालो व्यतीयाय मुनीश्वराः ॥ २५ ॥

sudarzanastatputro'pi zivapUjAM cakAra ha ॥ evaM cirataraH kAlo vyatIyAya munIzvarAH ॥ 25 ॥

एवं च शिवरात्रिश्च समायाता कदाचन ॥ तस्यां चोपोषितास्सर्वे स्वयं संयोगतस्तदा ॥ २६ ॥

evaM ca zivarAtrizca samAyAtA kadAcana ॥ tasyAM copoSitAssarve svayaM saMyogatastadA ॥ 26 ॥

पूजां कृत्वा गतस्सोऽपि सुदर्शन इति स्मृतः ॥ स्त्रीसंगं शिवरात्रौ तुं कृत्वा पुनरिहागतः ॥ २७ ॥

pUjAM kRtvA gatasso'pi sudarzana iti smRtaH ॥ strIsaMgaM zivarAtrau tuM kRtvA punarihAgataH ॥ 27 ॥

न स्नानं तेन च कृतं तद्रात्र्यां शिवपूजनम् ॥ तेन तत्कर्मपाकेन क्रुद्धः प्रोवाच शङ्करः ॥ २८ ॥

na snAnaM tena ca kRtaM tadrAtryAM zivapUjanam ॥ tena tatkarmapAkena kruddhaH provAca zaGkaraH ॥ 28 ॥

महेश्वर उवाच ॥ शिवरात्र्यां त्वया दुष्ट सेवनं च स्त्रियाः कृतम् ॥ अस्नातेन मदीया च कृता पूजाविवेकिना ॥ २९ ॥

mahezvara uvAca ॥ zivarAtryAM tvayA duSTa sevanaM ca striyAH kRtam ॥ asnAtena madIyA ca kRtA pUjAvivekinA ॥ 29 ॥

ज्ञात्वा चैवं कृतं यस्मात्तस्मात्त्वं जडतां व्रज॥ ममास्पृश्यो भव त्वं च दूरतो दर्शनं कुरु ॥ ३०॥

jJAtvA caivaM kRtaM yasmAttasmAttvaM jaDatAM vraja॥ mamAspRzyo bhava tvaM ca dUrato darzanaM kuru ॥ 30॥

सूत उवाच ॥ इति शप्तो महेशेन दाधीचिस्स सुदर्शनः ॥ जडत्वं प्राप्तवान्सद्यश्शिवमायाविमोहितः॥ ३१॥

sUta uvAca ॥ iti zapto mahezena dAdhIcissa sudarzanaH ॥ jaDatvaM prAptavAnsadyazzivamAyAvimohitaH॥ 31॥

एतस्मिन्समये विप्रा दधीचिः शैवसत्तमः ॥ ग्रामान्तरात्समायातो वृत्तान्तं श्रुतवाँश्च सः ॥ ३२ ॥

etasminsamaye viprA dadhIciH zaivasattamaH ॥ grAmAntarAtsamAyAto vRttAntaM zrutavA~zca saH ॥ 32 ॥

शिवेन भर्त्सितः सोऽपि दुःखितोऽभूदतीव हि ॥ रुरोद हा हतोऽश्मीति दुःखेन सुतकर्मणा ॥ ३३ ॥

zivena bhartsitaH so'pi duHkhito'bhUdatIva hi ॥ ruroda hA hato'zmIti duHkhena sutakarmaNA ॥ 33 ॥

पुनःपुनरुवाचेति स दधीचिस्सतां मतः ॥ अनेनेदं कुपुत्रेण हतं मे कुलमुत्तमम् ॥ ३४ ॥

punaHpunaruvAceti sa dadhIcissatAM mataH ॥ anenedaM kuputreNa hataM me kulamuttamam ॥ 34 ॥

स पुत्रोऽपि हतो भार्यां पुंश्चलीं कृतवान्द्रुतम् ॥ पश्चात्तापमनुप्राप्य स्वपित्रा परिभर्त्सितः ॥ ३५ ॥

sa putro'pi hato bhAryAM puMzcalIM kRtavAndrutam ॥ pazcAttApamanuprApya svapitrA paribhartsitaH ॥ 35 ॥

तत्पित्रा गिरिजा तत्र पूजिता विधिभिर्वरैः ॥ सुयत्नतो महाभक्त्या स्वपुत्रसुखहेतवे ॥ ३६ ॥

tatpitrA girijA tatra pUjitA vidhibhirvaraiH ॥ suyatnato mahAbhaktyA svaputrasukhahetave ॥ 36 ॥

सुदर्शनोऽपि गिरिजां पूजयामास च स्वयम् ॥ चण्डीपूजनमार्गेण महाभक्त्या शुभैः स्तवैः ॥ ३७ ॥

sudarzano'pi girijAM pUjayAmAsa ca svayam ॥ caNDIpUjanamArgeNa mahAbhaktyA zubhaiH stavaiH ॥ 37 ॥

एवं तौ पितृपुत्रौ हि नानोपायैः सुभक्तितः ॥ प्रसन्नां चक्रतुर्देवीं गिरिजां भक्तवत्सलाम् ॥ ३८ ॥

evaM tau pitRputrau hi nAnopAyaiH subhaktitaH ॥ prasannAM cakraturdevIM girijAM bhaktavatsalAm ॥ 38 ॥

तयोः सेवाप्रभावेण प्रसन्ना चण्डिका तदा ॥ सुदर्शनं च पुत्रत्वे चकार गिरिजा मुने ॥ ३९ ॥

tayoH sevAprabhAveNa prasannA caNDikA tadA ॥ sudarzanaM ca putratve cakAra girijA mune ॥ 39 ॥

शिवं प्रसादयामास पुत्रार्थे चण्डिका स्वयम् ॥ क्रुद्धाऽक्रुद्धा पुनश्चण्डी तत्पुत्रस्य प्रसन्नधीः ॥ ४० ॥

zivaM prasAdayAmAsa putrArthe caNDikA svayam ॥ kruddhA'kruddhA punazcaNDI tatputrasya prasannadhIH ॥ 40 ॥

अथाज्ञाय प्रसन्नं तं महेशं वृषभध्वजम् ॥ नमस्कृत्य स्वयं तस्य ह्युत्संगे तं न्यवेशयत् ॥ ४१ ॥

athAjJAya prasannaM taM mahezaM vRSabhadhvajam ॥ namaskRtya svayaM tasya hyutsaMge taM nyavezayat ॥ 41 ॥

घृतस्नानं ततः कृत्वा पुत्रस्य गिरिजा स्वयम् ॥ त्रिरावृत्तोपवीतं च ग्रन्थिनैकेन संयुतम् ॥ ४२ ॥

ghRtasnAnaM tataH kRtvA putrasya girijA svayam ॥ trirAvRttopavItaM ca granthinaikena saMyutam ॥ 42 ॥

सुदर्शनाय पुत्राय ददौ प्रीत्या तदाम्बिका ॥ उद्दिश्य शिवगायत्रीं षोडशाक्षरसंयुताम् ॥ ४३ ॥

sudarzanAya putrAya dadau prItyA tadAmbikA ॥ uddizya zivagAyatrIM SoDazAkSarasaMyutAm ॥ 43 ॥

तदोंनमः शिवायेति श्रीशब्द पूर्वकाय च ॥ वारान्षोडश संकल्पपूजां कुर्यादयं बटुः॥ ४४ ॥

tadoMnamaH zivAyeti zrIzabda pUrvakAya ca ॥ vArAnSoDaza saMkalpapUjAM kuryAdayaM baTuH॥ 44 ॥

आस्नानादिप्रणामान्तं पूजयन्वृषभध्वजम् ॥ मंत्रवादित्रपूजाभिस्सर्षीणां सन्निधौ तथा ॥ ४५ ॥

AsnAnAdipraNAmAntaM pUjayanvRSabhadhvajam ॥ maMtravAditrapUjAbhissarSINAM sannidhau tathA ॥ 45 ॥

नाममंत्राननेकांश्च पाठयामास वै तदा ॥ उवाच सुप्रसन्नात्मा चण्डिका च शिवस्तथा ॥ ४६ ॥

nAmamaMtrAnanekAMzca pAThayAmAsa vai tadA ॥ uvAca suprasannAtmA caNDikA ca zivastathA ॥ 46 ॥

मदर्पितं च यत्किंचिद्धनधान्यादिकन्तथा ॥ तत्सर्वं च त्वया ग्राह्यं न दोषाय भविष्यति ॥ ४७ ॥

madarpitaM ca yatkiMciddhanadhAnyAdikantathA ॥ tatsarvaM ca tvayA grAhyaM na doSAya bhaviSyati ॥ 47 ॥

मम कृत्ये भवान्मुख्यो देवीकृत्ये विशेषतः ॥ घृततैलादिकं सर्वं त्वया ग्राह्यं मदर्पितम् ॥ ४८ ॥

mama kRtye bhavAnmukhyo devIkRtye vizeSataH ॥ ghRtatailAdikaM sarvaM tvayA grAhyaM madarpitam ॥ 48 ॥

प्राजापत्यं भवेद्यर्हिं तर्ह्येको हि भवान्भवेत् ॥ तदा पूजा च सम्पूर्णान्यथा सर्वा च निष्फला ॥ ४९ ॥

prAjApatyaM bhavedyarhiM tarhyeko hi bhavAnbhavet ॥ tadA pUjA ca sampUrNAnyathA sarvA ca niSphalA ॥ 49 ॥

तिलकं वर्तुलं कार्यं स्नानं कार्यं सदा त्वया ॥ शिवसन्ध्या च कर्तव्या गायत्री च तदीयिका ॥ ५०॥

tilakaM vartulaM kAryaM snAnaM kAryaM sadA tvayA ॥ zivasandhyA ca kartavyA gAyatrI ca tadIyikA ॥ 50॥

मत्सेवां प्रथमं कृत्वा कार्यमन्यत्कुलोचितम् ॥ एवं कृतेऽखिले भद्रं दोषाः क्षान्ता मया तव॥ ५१॥

matsevAM prathamaM kRtvA kAryamanyatkulocitam ॥ evaM kRte'khile bhadraM doSAH kSAntA mayA tava॥ 51॥

॥ सूत उवाच ॥ इत्युक्त्वा तस्य पुत्राश्च चत्वारो बटुकास्तदा ॥ अभिषिक्ताश्चतुर्दिक्षु शिवेन परमात्मना ॥ ५२॥

॥ sUta uvAca ॥ ityuktvA tasya putrAzca catvAro baTukAstadA ॥ abhiSiktAzcaturdikSu zivena paramAtmanA ॥ 52॥

चण्डी चैवात्मनिकटे पुत्रं स्थाप्य सुदर्शनम् ॥ तत्पुत्रान्प्रेरयामास वरान्दत्त्वा ह्यनेकशः ॥ ५३ ॥

caNDI caivAtmanikaTe putraM sthApya sudarzanam ॥ tatputrAnprerayAmAsa varAndattvA hyanekazaH ॥ 53 ॥

देव्युवाच ॥ उभयोर्युवयोर्मध्ये वटुको यो भवेन्मम ॥ तस्य स्याद्विजयो नित्यं नात्र कार्या विचारणा ॥ ५४ ॥

devyuvAca ॥ ubhayoryuvayormadhye vaTuko yo bhavenmama ॥ tasya syAdvijayo nityaM nAtra kAryA vicAraNA ॥ 54 ॥

भवांश्च पूजितो येन तेनैवाहं प्रपूजिता ॥ कर्तव्यं हि भवद्भिश्च स्वीयं कर्म सदा सुत ॥ ५५ ॥

bhavAMzca pUjito yena tenaivAhaM prapUjitA ॥ kartavyaM hi bhavadbhizca svIyaM karma sadA suta ॥ 55 ॥

सूत उवाच ॥ एवं तस्मै वरान्दत्तास्सपुत्राय महात्मने ॥ सुदर्शनाय कृपया शिवाभ्यां जगतां कृते ॥ ५६॥

sUta uvAca ॥ evaM tasmai varAndattAssaputrAya mahAtmane ॥ sudarzanAya kRpayA zivAbhyAM jagatAM kRte ॥ 56॥

शिवाभ्यां स्थापिता यस्मात्तस्मात्तं वटुकाः स्मृताः ॥ तपोभ्रष्टाश्च ये जाताः स्मृतास्तस्मात्तपोधमाः ॥ ५७॥

zivAbhyAM sthApitA yasmAttasmAttaM vaTukAH smRtAH ॥ tapobhraSTAzca ye jAtAH smRtAstasmAttapodhamAH ॥ 57॥

शिवयोः कृपया सर्वे विस्तारं बहुधा गताः ॥ तेषां च प्रथमा पूजा महापूजा महात्मनः ॥ ५८॥

zivayoH kRpayA sarve vistAraM bahudhA gatAH ॥ teSAM ca prathamA pUjA mahApUjA mahAtmanaH ॥ 58॥

तेन यावत्कृता नैव पूजा वै शंकरस्य च ॥ तावत्पूजा न कर्त्तव्या कृता चेन्न शुभापि सा ॥ ५९ ॥

tena yAvatkRtA naiva pUjA vai zaMkarasya ca ॥ tAvatpUjA na karttavyA kRtA cenna zubhApi sA ॥ 59 ॥

शुभं वाप्यशुभं वापि बटुकं न परित्यजेत् ॥ प्राजापत्ये च भोज्ये वै वटुरेको विशिष्यते ॥ ६० ॥

zubhaM vApyazubhaM vApi baTukaM na parityajet ॥ prAjApatye ca bhojye vai vaTureko viziSyate ॥ 60 ॥

शिवयोश्च तथा कार्ये विशेषोऽत्र प्रदृश्यते ॥ तदेव शृणु सुप्राज्ञ यथाहं वच्मि तेऽनघ ॥ ६१ ॥

zivayozca tathA kArye vizeSo'tra pradRzyate ॥ tadeva zRNu suprAjJa yathAhaM vacmi te'nagha ॥ 61 ॥

तस्यैव नगरे राज्ञो भद्रस्य नित्यभोजने ॥ प्राजापत्यस्य नियमे ह्यन्धकेशसमीपतः ॥ ६२॥

tasyaiva nagare rAjJo bhadrasya nityabhojane ॥ prAjApatyasya niyame hyandhakezasamIpataH ॥ 62॥

यज्जातमद्भुतं वृत्तं शिवानुग्रहकारणात् ॥ श्रूयतां तच्च सुप्रीत्या कथयामि यथाश्रुतम्॥ ६३॥

yajjAtamadbhutaM vRttaM zivAnugrahakAraNAt ॥ zrUyatAM tacca suprItyA kathayAmi yathAzrutam॥ 63॥

ध्वज एकश्च तद्राज्ञे दत्तस्तुष्टेन शंभुना॥ प्रोक्तश्च कृपया राजा देवदेवेन तेन सः॥ ६४॥

dhvaja ekazca tadrAjJe dattastuSTena zaMbhunA॥ proktazca kRpayA rAjA devadevena tena saH॥ 64॥

प्रातश्च वर्ध्यतां राजन्ध्वजो रात्रौ पतिष्यति॥ मम त्वेवं च सम्पूर्णे प्राजापत्ये तथा पुनः॥ ६५॥

prAtazca vardhyatAM rAjandhvajo rAtrau patiSyati॥ mama tvevaM ca sampUrNe prAjApatye tathA punaH॥ 65॥

अन्यथायं ध्वजो मे हि रात्रावपि स्थिरो भवेत्॥ इत्युक्त्वान्तर्हितश्शंभू राज्ञे तुष्टः कृपानिधिः॥ ६६॥

anyathAyaM dhvajo me hi rAtrAvapi sthiro bhavet॥ ityuktvAntarhitazzaMbhU rAjJe tuSTaH kRpAnidhiH॥ 66॥

तथेति नियमश्चासीत्तस्य राज्ञो महामुने॥ प्राजापत्यं कृतं नित्यं शिवपूजाविधानत ॥ ६७ ॥

tatheti niyamazcAsIttasya rAjJo mahAmune॥ prAjApatyaM kRtaM nityaM zivapUjAvidhAnata ॥ 67 ॥

स्वयं प्रातर्विवर्दे्धेत ध्वजः सायं पतेदिति॥ यदि कार्यं च सम्पूर्णं जातं चैव भवेदिह ॥ ६८॥

svayaM prAtarvivardedheta dhvajaH sAyaM patediti॥ yadi kAryaM ca sampUrNaM jAtaM caiva bhavediha ॥ 68॥

एकस्मिन्समये चात्र बटोः कार्यं पुरा ह्यभूत् ॥ ध्वजः स पतितो वै हि ब्रह्मभोजं विनापि हि ॥ ६९॥

ekasminsamaye cAtra baToH kAryaM purA hyabhUt ॥ dhvajaH sa patito vai hi brahmabhojaM vinApi hi ॥ 69॥

दृष्ट्वा तच्च तदा तत्र पृष्टा राज्ञा च पण्डिताः ॥ भुञ्जते ब्राह्मणा ह्यत्र नोत्थितो वै ध्वजस्त्विति॥ ७०॥

dRSTvA tacca tadA tatra pRSTA rAjJA ca paNDitAH ॥ bhuJjate brAhmaNA hyatra notthito vai dhvajastviti॥ 70॥

कथं च पतितः सोऽत्र ब्राह्मणा ब्रूत सत्यतः ॥ ते पृष्टाश्च तदा प्रोचुर्ब्राह्मणाः पण्डितोत्तमाः॥ ७१॥

kathaM ca patitaH so'tra brAhmaNA brUta satyataH ॥ te pRSTAzca tadA procurbrAhmaNAH paNDitottamAH॥ 71॥

ब्रह्मभोजे महाराज वटुको भोजितः पुरा॥ चण्डीपुत्रश्शिवस्तुष्टस्तस्माच्च पतितो ध्वजः॥ ७२॥

brahmabhoje mahArAja vaTuko bhojitaH purA॥ caNDIputrazzivastuSTastasmAcca patito dhvajaH॥ 72॥

तच्छ्रुत्वा नृपतिस्सोऽथ जनाश्चान्ये ऽपि सर्वशः ॥ अभवन्विस्मितास्तत्र प्रशंसां चक्रिरे ततः ॥ ७३ ॥

tacchrutvA nRpatisso'tha janAzcAnye 'pi sarvazaH ॥ abhavanvismitAstatra prazaMsAM cakrire tataH ॥ 73 ॥

एवं च महिमा तेषां वर्द्धितः शङ्करेण हि ॥ तस्माच्च वटुकाः श्रेष्ठाः पुरा विद्भिः प्रकीर्तिताः ॥ ७४ ॥

evaM ca mahimA teSAM varddhitaH zaGkareNa hi ॥ tasmAcca vaTukAH zreSThAH purA vidbhiH prakIrtitAH ॥ 74 ॥

शिवपूजा तु तैः पूर्वमुत्तार्य्या नान्यथा पुनः ॥ अन्येषां नाधिकारोऽस्ति शिवस्य वचनादिह ॥ ७५ ॥

zivapUjA tu taiH pUrvamuttAryyA nAnyathA punaH ॥ anyeSAM nAdhikAro'sti zivasya vacanAdiha ॥ 75 ॥

उत्तारणं च कार्य्यं वै पूजा पूर्णा भवत्विति ॥ एतावदेव तेषां तु शृणु नान्यत्तथैव च ॥ ७६ ॥

uttAraNaM ca kAryyaM vai pUjA pUrNA bhavatviti ॥ etAvadeva teSAM tu zRNu nAnyattathaiva ca ॥ 76 ॥

एतत्सर्वं समाख्यातं यत्पृष्टं च मुनीश्वराः ॥ यच्छ्रुत्वा शिवपूजायाः फलं प्राप्नोति वै नरः॥ ७७॥

etatsarvaM samAkhyAtaM yatpRSTaM ca munIzvarAH ॥ yacchrutvA zivapUjAyAH phalaM prApnoti vai naraH॥ 77॥