ऋषय ऊचुः ॥ सूतसूत महाभाग धन्यस्त्वं शिवसक्तधीः ॥ महाबलस्य लिंगस्य श्रावितेयं कथाद्भुता ॥ १ ॥

RSaya UcuH ॥ sUtasUta mahAbhAga dhanyastvaM zivasaktadhIH ॥ mahAbalasya liMgasya zrAviteyaM kathAdbhutA ॥ 1 ॥

उत्तरस्यां दिशायां च शिवलिंगानि यानि च ॥ तेषां माहात्म्यमनघ वद त्वं पापनाशकम् ॥ २॥

uttarasyAM dizAyAM ca zivaliMgAni yAni ca ॥ teSAM mAhAtmyamanagha vada tvaM pApanAzakam ॥ 2॥

सूत उवाच॥ शृणुतादरतो विप्रा औत्तराणां विशेषतः ॥ माहात्म्यं शिवलिंगानां प्रवदामि समासतः ॥ ३ ॥

sUta uvAca॥ zRNutAdarato viprA auttarANAM vizeSataH ॥ mAhAtmyaM zivaliMgAnAM pravadAmi samAsataH ॥ 3 ॥

गोकर्णं क्षेत्रमपरं महापातकनाशनम् ॥ महावनं च तत्रास्ति पवित्रमतिविस्तरम् ॥ ४ ॥

gokarNaM kSetramaparaM mahApAtakanAzanam ॥ mahAvanaM ca tatrAsti pavitramativistaram ॥ 4 ॥

तत्रास्ति चन्द्रभालाख्यं शिवलिंगमनुत्तमम् ॥ रावणेन समानीतं सद्भक्त्या सर्वसिद्धिदम् ॥ ५ ॥

tatrAsti candrabhAlAkhyaM zivaliMgamanuttamam ॥ rAvaNena samAnItaM sadbhaktyA sarvasiddhidam ॥ 5 ॥

तस्य तत्र स्थितिर्वैद्यनाथस्येव मुनीश्वराः ॥ सर्वलोकहितार्थाय करुणासागरस्य च ॥ ६ ॥

tasya tatra sthitirvaidyanAthasyeva munIzvarAH ॥ sarvalokahitArthAya karuNAsAgarasya ca ॥ 6 ॥

स्नानं कृत्वा तु गोकर्णे चन्द्रभालं समर्च्य च ॥ शिवलोकमवाप्नोति सत्यंसत्यं न संशयः ॥ ७ ॥

snAnaM kRtvA tu gokarNe candrabhAlaM samarcya ca ॥ zivalokamavApnoti satyaMsatyaM na saMzayaH ॥ 7 ॥

चन्द्रभालस्य लिंगस्य महिमा परमाद्भुतः ॥ न शक्यो वर्णितुं व्यासाद्भक्तस्नेहितरस्य हि ॥ ८ ॥

candrabhAlasya liMgasya mahimA paramAdbhutaH ॥ na zakyo varNituM vyAsAdbhaktasnehitarasya hi ॥ 8 ॥

चन्द्रभालमहादेव लिंगस्य महिमा महान् ॥ यथाकथंचित्संप्रोक्तः परलिंगस्य वै शृणु ॥ ९ ॥

candrabhAlamahAdeva liMgasya mahimA mahAn ॥ yathAkathaMcitsaMproktaH paraliMgasya vai zRNu ॥ 9 ॥

दाधीचं शिवलिंगं तु मिश्रर्षिवरतीर्थके ॥ दधीचिना मुनीशेन सुप्रीत्या च प्रतिष्ठितम् ॥ १० ॥

dAdhIcaM zivaliMgaM tu mizrarSivaratIrthake ॥ dadhIcinA munIzena suprItyA ca pratiSThitam ॥ 10 ॥

तत्र गत्वा च तत्तीर्थे स्नात्वा सम्यग्विधानतः ॥ शिवलिंगं समर्चेद्वै दाधीचेश्वरमादरात् ॥ ११ ॥

tatra gatvA ca tattIrthe snAtvA samyagvidhAnataH ॥ zivaliMgaM samarcedvai dAdhIcezvaramAdarAt ॥ 11 ॥

दाधीचमूर्तिस्तत्रैव समर्च्या विधिपूर्वकम् ॥ शिवप्रीत्यर्थमेवाशु तीर्थयात्रा फलार्थिभिः ॥ १२ ॥

dAdhIcamUrtistatraiva samarcyA vidhipUrvakam ॥ zivaprItyarthamevAzu tIrthayAtrA phalArthibhiH ॥ 12 ॥

एवं कृते मुनिश्रेष्ठाः कृतकृत्यो भवेन्नरः ॥ इह सर्वसुखं भुक्त्वा परत्र गतिमाप्नुयात् ॥ १३ ॥

evaM kRte munizreSThAH kRtakRtyo bhavennaraH ॥ iha sarvasukhaM bhuktvA paratra gatimApnuyAt ॥ 13 ॥

नैमिषारण्यतीर्थे तु निखिलर्षिप्रतिष्ठितम् ॥ ऋषीश्वरमिति ख्यातं शिवलिंगं सुखप्रदम् ॥ १४॥

naimiSAraNyatIrthe tu nikhilarSipratiSThitam ॥ RSIzvaramiti khyAtaM zivaliMgaM sukhapradam ॥ 14॥

तद्दर्शनात्पूजनाच्च जनानां पापिनामपि ॥ भुक्तिमुक्तिश्च तेषां तु परत्रेह मुनीश्वराः ॥ १५॥

taddarzanAtpUjanAcca janAnAM pApinAmapi ॥ bhuktimuktizca teSAM tu paratreha munIzvarAH ॥ 15॥

हत्याहरणतीर्थे तु शिवलिंगमघापहम् ॥ पूजनीयं विशेषेण हत्याकोटिविनाशनम् ॥ १६ ॥

hatyAharaNatIrthe tu zivaliMgamaghApaham ॥ pUjanIyaM vizeSeNa hatyAkoTivinAzanam ॥ 16 ॥

देवप्रयागतीर्थे तु ललितेश्वरनामकम्॥ शिवलिंगं सदा पूज्यं नरैस्सर्वाघनाशनम् ॥ १७ ॥

devaprayAgatIrthe tu lalitezvaranAmakam॥ zivaliMgaM sadA pUjyaM naraissarvAghanAzanam ॥ 17 ॥

नयपालाख्यपुर्य्यां तु प्रसिद्धायां महीतले ॥ लिंगं पशुपतीशाख्यं सर्वकामफलप्रदम् ॥ १८ ॥

nayapAlAkhyapuryyAM tu prasiddhAyAM mahItale ॥ liMgaM pazupatIzAkhyaM sarvakAmaphalapradam ॥ 18 ॥

शिरोभागस्वरूपेण शिवलिंगं तदस्ति हि ॥ तत्कथां वर्णयिष्यामि केदारेश्वरवर्णने ॥ १९ ॥

zirobhAgasvarUpeNa zivaliMgaM tadasti hi ॥ tatkathAM varNayiSyAmi kedArezvaravarNane ॥ 19 ॥

तदारान्मुक्तिनाथाख्यं शिवलिंगं महाद्भुतम् ॥ दर्शनादर्चनात्तस्य भुक्तिर्मुक्तिश्च लभ्यते॥ २०॥

tadArAnmuktinAthAkhyaM zivaliMgaM mahAdbhutam ॥ darzanAdarcanAttasya bhuktirmuktizca labhyate॥ 20॥

इति वश्च समाख्यातं लिंगवर्णनमुत्तमम्॥ चतुर्दिक्षु मुनिश्रेष्ठाः किमन्यच्छ्रोतुमिच्छथ॥ २१॥

iti vazca samAkhyAtaM liMgavarNanamuttamam॥ caturdikSu munizreSThAH kimanyacchrotumicchatha॥ 21॥