सुब्रह्मण्य उवाच ॥ द्वादशाहे समुत्थाय प्रातः स्नात्वा कृताह्निकः ॥ शिवभक्तान्यतीन्वापि ब्राह्मणान्वा शिवप्रियान् ॥ १ ॥

subrahmaNya uvAca ॥ dvAdazAhe samutthAya prAtaH snAtvA kRtAhnikaH ॥ zivabhaktAnyatInvApi brAhmaNAnvA zivapriyAn ॥ 1 ॥

विमन्त्र्य तान्समाहूय मध्याह्न चाप्लुताञ्छुचीन् ॥ विधिवद्भोजयेद्भक्त्या स्वाद्वन्नैर्विविधैश्शुभैः ॥ २ ॥

vimantrya tAnsamAhUya madhyAhna cAplutAJchucIn ॥ vidhivadbhojayedbhaktyA svAdvannairvividhaizzubhaiH ॥ 2 ॥

सन्निधौ परमेशस्य पंचावरणमार्गतः ॥ पूजयेत्तस्य संस्थाप्य प्राणानायम्य वाग्यतः ॥ ३ ॥

sannidhau paramezasya paMcAvaraNamArgataH ॥ pUjayettasya saMsthApya prANAnAyamya vAgyataH ॥ 3 ॥

महासंकल्पमार्गेण संकल्प्यास्मद्गुरोरिह॥ पूजां करिष्य इत्युक्त्वा ततो दर्भानुस्पपृशेत्॥ ४ ॥

mahAsaMkalpamArgeNa saMkalpyAsmadguroriha॥ pUjAM kariSya ityuktvA tato darbhAnuspapRzet॥ 4 ॥

पादौ प्रक्षाल्य चाचम्य स्वयं कर्ता च वाग्यतः ॥ स्थापयेदासने तान्वै प्राङ्मुखान्भस्मभूषितान् ॥ ५ ॥

pAdau prakSAlya cAcamya svayaM kartA ca vAgyataH ॥ sthApayedAsane tAnvai prAGmukhAnbhasmabhUSitAn ॥ 5 ॥

सदाशिवादिक्रमतो ध्यायेदष्टौ च तत्र तान् ॥ परया सम्भावनयेतरानपि मुने द्विजान् ॥ ६ ॥

sadAzivAdikramato dhyAyedaSTau ca tatra tAn ॥ parayA sambhAvanayetarAnapi mune dvijAn ॥ 6 ॥

परमेष्ठिगुरुं ध्यायेत्सांबबुद्ध्या स्वनामतः ॥ गुरुश्च परमन्तस्मात्परापरगुरुं ततः ॥ ७ ॥

parameSThiguruM dhyAyetsAMbabuddhyA svanAmataH ॥ guruzca paramantasmAtparAparaguruM tataH ॥ 7 ॥

इदमासनमित्युक्त्वा चासनानि प्रकल्पयेत् ॥ प्रणवादिद्वितीयांते स्वस्य नाम समुच्चरन् ॥ ८ ॥

idamAsanamityuktvA cAsanAni prakalpayet ॥ praNavAdidvitIyAMte svasya nAma samuccaran ॥ 8 ॥

आवाहयामि नम इत्यावाह्यार्घोदकेन तु ॥ पाद्यमाचमनं चार्घ्यं वस्त्रगन्धाक्षतानपि ॥ ९ ॥

AvAhayAmi nama ityAvAhyArghodakena tu ॥ pAdyamAcamanaM cArghyaM vastragandhAkSatAnapi ॥ 9 ॥

दत्त्वा पुष्पैरलंकृत्य प्रणवाद्यष्टनामभिः ॥ सचतुर्थौंनमोऽन्तैश्च सुगन्धकुसुमैस्ततः ॥ १० ॥

dattvA puSpairalaMkRtya praNavAdyaSTanAmabhiH ॥ sacaturthauMnamo'ntaizca sugandhakusumaistataH ॥ 10 ॥

धूपदीपौ हि दत्त्वा च सकलाराधनं कृतम् ॥ सम्पूर्णमस्त्विति प्रोच्य नमस्कुर्यात्समुत्थितः ॥ ११ ॥

dhUpadIpau hi dattvA ca sakalArAdhanaM kRtam ॥ sampUrNamastviti procya namaskuryAtsamutthitaH ॥ 11 ॥

पात्राणि कदलीपत्राण्यास्तीर्याद्भिविशोध्य च ॥ शुद्धान्नपायसापूपसूपव्यञ्जनपूर्वकम् ॥ १२ ॥

pAtrANi kadalIpatrANyAstIryAdbhivizodhya ca ॥ zuddhAnnapAyasApUpasUpavyaJjanapUrvakam ॥ 12 ॥

दत्त्वा पदार्थान्कदलीनालिकेरगुडान्वितान् ॥ पात्रासनानि च पृथग्दद्यात्सम्प्रोच्य च क्रमात् ॥ १३ ॥

dattvA padArthAnkadalInAlikeraguDAnvitAn ॥ pAtrAsanAni ca pRthagdadyAtsamprocya ca kramAt ॥ 13 ॥

परिषिच्य च सम्प्रोक्ष्य विष्णोर्हव्यमिति ब्रुवन् ॥ रक्षस्वेति करस्पर्शं कारयित्वा समुत्थितः ॥ १४ ॥

pariSicya ca samprokSya viSNorhavyamiti bruvan ॥ rakSasveti karasparzaM kArayitvA samutthitaH ॥ 14 ॥

आपोशनं समर्प्याथ प्रार्थयेत्तानिदम्प्रति ॥ सदाशिवादयः प्रीता वरदाश्च भवन्तु मे ॥ १५ ॥

ApozanaM samarpyAtha prArthayettAnidamprati ॥ sadAzivAdayaH prItA varadAzca bhavantu me ॥ 15 ॥

ये देवा इति च ततो जप्त्वेदं साक्षतं त्यजेत् ॥ नमस्कृत्य समुत्थाय सर्वत्रामृतमस्त्विति॥ १६ ॥

ye devA iti ca tato japtvedaM sAkSataM tyajet ॥ namaskRtya samutthAya sarvatrAmRtamastviti॥ 16 ॥

उक्त्वा प्रसाद्य च जपन्गणानांत्वेत्युप क्रमात् ॥ वेदादीन् रुद्रचमकौ रुद्रसूक्तं च पंच च ॥ १७ ॥

uktvA prasAdya ca japangaNAnAMtvetyupa kramAt ॥ vedAdIn rudracamakau rudrasUktaM ca paMca ca ॥ 17 ॥

ब्रह्माणि भोजनान्ते तु यावन्मन्त्रांश्च साक्षतान् ॥ दत्त्वोत्तरापोशनं च हस्तांघ्रिमुखशोधनम् ॥ १८॥

brahmANi bhojanAnte tu yAvanmantrAMzca sAkSatAn ॥ dattvottarApozanaM ca hastAMghrimukhazodhanam ॥ 18॥

कृत्वा चान्तान्स्वासनेषु स्थापयित्वा यथासुखम्॥ शुद्धोदकम्प्रदायाथ कर्प्पूरादि यथोदितम्॥ १९ ॥

kRtvA cAntAnsvAsaneSu sthApayitvA yathAsukham॥ zuddhodakampradAyAtha karppUrAdi yathoditam॥ 19 ॥

मुखवासं दक्षिणां च पादुकासनपत्रकम् ॥ व्यजनं फलकान्दण्डं वैणवं च प्रदाय तान् ॥ २० ॥

mukhavAsaM dakSiNAM ca pAdukAsanapatrakam ॥ vyajanaM phalakAndaNDaM vaiNavaM ca pradAya tAn ॥ 20 ॥

प्रदक्षिणनमस्कारैस्संतोष्याशिषमा वहेत ॥ पुनः प्रणम्य सम्प्रार्थ्य गुरुभक्तिमचंचलाम् ॥ २१॥

pradakSiNanamaskAraissaMtoSyAziSamA vaheta ॥ punaH praNamya samprArthya gurubhaktimacaMcalAm ॥ 21॥

सदाशिवादयः प्रीता गच्छन्तु च यथासुखम् ॥ इत्युद्वास्य द्वारदेशावधि सम्यगनुव्रजन्॥ २२ ॥

sadAzivAdayaH prItA gacchantu ca yathAsukham ॥ ityudvAsya dvAradezAvadhi samyaganuvrajan॥ 22 ॥

निरुद्धस्तः परावृत्य द्वास्थैर्विप्रैश्च बन्धुभिः ॥ दीनानाथैश्च सहितो भुक्त्वा तिष्ठेद्यथासुखम् ॥ २३ ॥

niruddhastaH parAvRtya dvAsthairvipraizca bandhubhiH ॥ dInAnAthaizca sahito bhuktvA tiSThedyathAsukham ॥ 23 ॥

विकृतं न भवेत्क्वापि सत्यं सत्यं पुनः पुनः ॥ प्रत्यब्दमेव कुर्वाणो गुर्वाराधनमुत्तमम् ॥ इह भुक्त्वा महाभोगाञ्छिवलोकमवाप्नुयात्॥ २४ ॥

vikRtaM na bhavetkvApi satyaM satyaM punaH punaH ॥ pratyabdameva kurvANo gurvArAdhanamuttamam ॥ iha bhuktvA mahAbhogAJchivalokamavApnuyAt॥ 24 ॥

॥ सूत उवाच ॥ एवं कृतानुग्रहमात्मशिष्यं श्रीवामदेवं मुनिवर्य्यमुक्त्वा ॥ प्रसन्नधीर्ज्ञानिवरो महात्मा कृत्वा परानुग्रहमाशु देवः ॥ २५ ॥

॥ sUta uvAca ॥ evaM kRtAnugrahamAtmaziSyaM zrIvAmadevaM munivaryyamuktvA ॥ prasannadhIrjJAnivaro mahAtmA kRtvA parAnugrahamAzu devaH ॥ 25 ॥

यन्नैमिषारण्यमुनीश्वराणां प्रोक्तं पुरा व्यासमुनीश्वरेण ॥ तस्मादसावादिगुरुर्भवांस्तु द्वितीय आर्य्यो भुवने प्रसिद्धः ॥ २६ ॥

yannaimiSAraNyamunIzvarANAM proktaM purA vyAsamunIzvareNa ॥ tasmAdasAvAdigururbhavAMstu dvitIya Aryyo bhuvane prasiddhaH ॥ 26 ॥

श्रुत्वा मुनीन्द्रो भवतो मुखाज्जात्सनत्कुमारः शिवभक्तिपूर्णः ॥ व्यासाय वक्ता स च शैववर्य्यश्शुकाय वक्ता भविता च पूर्णः ॥ २७ ॥

zrutvA munIndro bhavato mukhAjjAtsanatkumAraH zivabhaktipUrNaH ॥ vyAsAya vaktA sa ca zaivavaryyazzukAya vaktA bhavitA ca pUrNaH ॥ 27 ॥

प्रत्येकं मुनिशार्दूलं शिष्यवर्गचतुष्टयम् ॥ वेदाध्ययनसंवृत्तं धर्मस्थापनपूर्वकम् ॥ २८ ॥

pratyekaM munizArdUlaM ziSyavargacatuSTayam ॥ vedAdhyayanasaMvRttaM dharmasthApanapUrvakam ॥ 28 ॥

वैशम्पायन एव स्यात्पैलो जैमिनिरेव च ॥ सुमन्तुश्चेति चत्वारो व्यासशिष्या महौजसः ॥ २९ ॥

vaizampAyana eva syAtpailo jaiminireva ca ॥ sumantuzceti catvAro vyAsaziSyA mahaujasaH ॥ 29 ॥

अगस्त्यश्च पुलस्त्यश्च पुलहः क्रतुरेव च ॥ तव शिष्या महात्मानो वामदेव महामुने ॥ ३० ॥

agastyazca pulastyazca pulahaH kratureva ca ॥ tava ziSyA mahAtmAno vAmadeva mahAmune ॥ 30 ॥

सनकश्च सनन्दश्च सनातनमुनिस्ततः ॥ सनत्सुजात इत्येते योगिवर्याः शिवप्रियाः ॥ ३१ ॥

sanakazca sanandazca sanAtanamunistataH ॥ sanatsujAta ityete yogivaryAH zivapriyAH ॥ 31 ॥

सनत्कुमारशिष्यास्ते सर्ववेदार्थवित्तमाः ॥ गुरुश्च परमश्चैव परात्परगुरुस्ततः ॥ परमेष्ठिगुरुश्चैते पूज्यास्स्युश्शुकयोगिनः ॥ ३२ ॥

sanatkumAraziSyAste sarvavedArthavittamAH ॥ guruzca paramazcaiva parAtparagurustataH ॥ parameSThiguruzcaite pUjyAssyuzzukayoginaH ॥ 32 ॥

इदं प्रणवविज्ञानं स्थितं वर्गचतुष्टये ॥ सर्वोत्कृष्टनिदानं च काश्यां सन्मुक्तिकारणम् ॥ ३३ ॥

idaM praNavavijJAnaM sthitaM vargacatuSTaye ॥ sarvotkRSTanidAnaM ca kAzyAM sanmuktikAraNam ॥ 33 ॥

एतन्मण्डलमद्भुतं परशिवाधिष्ठान रूपं सदावेदान्तार्थविचारपूर्णमतिभिः पूज्यं यतीन्द्रैः परम् ॥ वेदादिप्रविभागकल्पितमहाकाशादिनाप्यावृतन्त्वत्संतोषकरं तथास्तु जगतां श्रेयस्करं श्रीप्रदम् ॥ ३४ ॥

etanmaNDalamadbhutaM parazivAdhiSThAna rUpaM sadAvedAntArthavicArapUrNamatibhiH pUjyaM yatIndraiH param ॥ vedAdipravibhAgakalpitamahAkAzAdinApyAvRtantvatsaMtoSakaraM tathAstu jagatAM zreyaskaraM zrIpradam ॥ 34 ॥

इदं रहस्यम्परमं शिवोदितं वेदान्तसिद्धातविनिश्चितम्परम्॥ मत्तश्श्रुतं यद्भवता ततो मुने भवन्मतम्प्राज्ञतमा वदंति ॥ ३५ ॥

idaM rahasyamparamaM zivoditaM vedAntasiddhAtavinizcitamparam॥ mattazzrutaM yadbhavatA tato mune bhavanmatamprAjJatamA vadaMti ॥ 35 ॥

तस्मादनेनैव पथा गतश्शिवं शिवोहमस्मीति शिवो भवेद्यतिः ॥ पितामहादिप्रविभागमुक्तये नद्यो यथासिन्धुमिमाः प्रयान्ति ॥ ३६ ॥

tasmAdanenaiva pathA gatazzivaM zivohamasmIti zivo bhavedyatiH ॥ pitAmahAdipravibhAgamuktaye nadyo yathAsindhumimAH prayAnti ॥ 36 ॥

श्रीसूत उवाच ॥ एवम्मुनीश्वरायैतदुपदिश्य सुरेश्वरः ॥ संस्मृत्य चरणाम्भोजे पित्रो स्सर्व्वसुरार्चिते ॥ ३७॥

zrIsUta uvAca ॥ evammunIzvarAyaitadupadizya surezvaraH ॥ saMsmRtya caraNAmbhoje pitro ssarvvasurArcite ॥ 37॥

कैलासशिखरम्प्राप कुमारश्शिखरावृतम् ॥ राजितम्परमाश्चर्य्यदिव्यज्ञानप्रदो गुरुः ॥ ३८ ॥

kailAsazikharamprApa kumArazzikharAvRtam ॥ rAjitamparamAzcaryyadivyajJAnaprado guruH ॥ 38 ॥

वामदेवोऽपि सच्छिष्यैस्संवृतश्शिखिवाहनम् ॥ सम्प्रणम्य जगामाशु कैलासम्परमाद्भुतम् ॥ ३९॥

vAmadevo'pi sacchiSyaissaMvRtazzikhivAhanam ॥ sampraNamya jagAmAzu kailAsamparamAdbhutam ॥ 39॥

गत्वा कैलासशिखरम्प्राप्येशनिकटम्मुनिः॥ ददर्श मोक्षदम्मायानाशञ्चरणमीशयोः॥ ४०॥

gatvA kailAsazikharamprApyezanikaTammuniH॥ dadarza mokSadammAyAnAzaJcaraNamIzayoH॥ 40॥

भक्त्या चार्पितसर्वांगो विस्मृत्य स्वकलेवरम् ॥ पपात सन्निधौ भूयो भूयो नत्वा समु त्थितः ॥ ४१ ॥

bhaktyA cArpitasarvAMgo vismRtya svakalevaram ॥ papAta sannidhau bhUyo bhUyo natvA samu tthitaH ॥ 41 ॥

ततो बहुविधैः स्तोत्रैर्वेदागमरसोत्कटैः ॥ तुष्टाव परमेशानं सांबिकं ससुतं मुनिः ॥ ४२ ॥

tato bahuvidhaiH stotrairvedAgamarasotkaTaiH ॥ tuSTAva paramezAnaM sAMbikaM sasutaM muniH ॥ 42 ॥

निधाय चरणत्म्भोजन्देव देव्योस्स्वमूर्द्धनि ॥ पूर्णानुग्रहमासाद्य तत्रैव न्यवसत्सुखम्॥ ४३ ॥

nidhAya caraNatmbhojandeva devyossvamUrddhani ॥ pUrNAnugrahamAsAdya tatraiva nyavasatsukham॥ 43 ॥

भवन्तोऽपि विदित्वैवम्प्रणवार्थम्महेश्वरम्॥ वेदगुह्यं च सर्वस्वन्तार कम्ब्रह्म मुक्तिदम् ॥ ४४ ॥

bhavanto'pi viditvaivampraNavArthammahezvaram॥ vedaguhyaM ca sarvasvantAra kambrahma muktidam ॥ 44 ॥

अत्रैव सुखमासीनाः श्रीविश्वेश्वरपादयोः ॥ सायुज्यरूपामतुलाम्भजध्वम्मुक्तिमुत्तमाम्॥ ४५ ॥

atraiva sukhamAsInAH zrIvizvezvarapAdayoH ॥ sAyujyarUpAmatulAmbhajadhvammuktimuttamAm॥ 45 ॥

अहं गुरुपदाम्भोजसेवायै बादराश्रमम् ॥ गमिष्ये भवताम्भूयस्सत्सम्भाषणमस्तु मे ॥ ४६ ॥

ahaM gurupadAmbhojasevAyai bAdarAzramam ॥ gamiSye bhavatAmbhUyassatsambhASaNamastu me ॥ 46 ॥