॥ सुब्रह्मण्य उवाच ॥ अथ मध्याह्नसमये स्नात्वा नियतमानसः ॥ गन्धपुष्पाक्षतादीनि पूजाद्रव्याण्युपाहरेत॥ १ ॥

॥ subrahmaNya uvAca ॥ atha madhyAhnasamaye snAtvA niyatamAnasaH ॥ gandhapuSpAkSatAdIni pUjAdravyANyupAhareta॥ 1 ॥

नैर्ऋत्ये पूजयेद्देवं विघ्रेशं देवपूजितम्॥ गणानां त्वेति मन्त्रेणावाहयेत्सुविधानतः ॥ २॥

nairRtye pUjayeddevaM vighrezaM devapUjitam॥ gaNAnAM tveti mantreNAvAhayetsuvidhAnataH ॥ 2॥

रक्तवर्णं महाकायं सर्व्वाभरणभूषितम्॥ पाशांकुशाक्षाभीष्टञ्च दधानं करपंकजैः ॥ ३ ॥

raktavarNaM mahAkAyaM sarvvAbharaNabhUSitam॥ pAzAMkuzAkSAbhISTaJca dadhAnaM karapaMkajaiH ॥ 3 ॥

एवमावाह्य सन्ध्याय शंभुपुत्रं गजाननम्॥ अभ्यर्च्य पायसापूपनालिकेरगुडादिभिः ॥ ४॥

evamAvAhya sandhyAya zaMbhuputraM gajAnanam॥ abhyarcya pAyasApUpanAlikeraguDAdibhiH ॥ 4॥

नैवेद्यमुत्तमं दद्यात्ताम्बूलादिमथापरम्॥ परितोष्य नमस्कृत्य निर्विघ्नम्प्रार्थयेत्ततः ॥ ५ ॥

naivedyamuttamaM dadyAttAmbUlAdimathAparam॥ paritoSya namaskRtya nirvighnamprArthayettataH ॥ 5 ॥

औपासनाग्नौ कर्त्तव्यं स्वगृह्योक्तविधानतः ॥ आज्यभागान्तमाग्नेयं मखतन्त्रमतः परम् ॥ ६ ॥

aupAsanAgnau karttavyaM svagRhyoktavidhAnataH ॥ AjyabhAgAntamAgneyaM makhatantramataH param ॥ 6 ॥

भूः स्वाहेति त्र्यृचा पूर्णाहुतिं हुत्वा समाप्य च॥ गायत्रीं प्रजपेद्यावदपराह्णमतंद्रितः ॥ ७॥

bhUH svAheti tryRcA pUrNAhutiM hutvA samApya ca॥ gAyatrIM prajapedyAvadaparAhNamataMdritaH ॥ 7॥

अथ सायन्तनीं सन्ध्यामुपास्य स्नानपूर्वकम् ॥ सायमौपासनं हुत्वा मौनी विज्ञापयेद्गुरुम् ॥ ८ ॥

atha sAyantanIM sandhyAmupAsya snAnapUrvakam ॥ sAyamaupAsanaM hutvA maunI vijJApayedgurum ॥ 8 ॥

श्रपयित्वा चरुन्तस्मिन्समिदन्नाज्यभेदतः ॥ जुहुयाद्रौद्रसूक्तेन सद्योजातादि पञ्चभिः ॥ ९ ॥

zrapayitvA caruntasminsamidannAjyabhedataH ॥ juhuyAdraudrasUktena sadyojAtAdi paJcabhiH ॥ 9 ॥

ब्रह्मभिश्च महादेवं सांबं वह्नौ विभावयेत् ॥ गौरीर्मिमाय मन्त्रेण हुत्वा गौरीमनुस्मरन् ॥ १०॥

brahmabhizca mahAdevaM sAMbaM vahnau vibhAvayet ॥ gaurIrmimAya mantreNa hutvA gaurImanusmaran ॥ 10॥

ततोऽग्नये स्विष्टकृते स्वाहेति जुहुयात्सकृत्॥ हुत्वोपरिष्टात्तन्त्रन्तु ततोऽग्नेरुत्तरे बुधः ॥ ११॥

tato'gnaye sviSTakRte svAheti juhuyAtsakRt॥ hutvopariSTAttantrantu tato'gneruttare budhaH ॥ 11॥

स्थित्वासने जपेन्मौनी चैलाजिनकुशोत्तरे ॥ आब्राह्मं च मुहूर्ते तु गायत्री दृढमानसः ॥ १२ ॥

sthitvAsane japenmaunI cailAjinakuzottare ॥ AbrAhmaM ca muhUrte tu gAyatrI dRDhamAnasaH ॥ 12 ॥

ततः स्नात्वा त्वशक्तश्चेद्भस्मना वा विधानतः ॥ श्रपयित्वा चरुं तस्मिन्नग्नावे वाभिधारितम् ॥ १३ ॥

tataH snAtvA tvazaktazcedbhasmanA vA vidhAnataH ॥ zrapayitvA caruM tasminnagnAve vAbhidhAritam ॥ 13 ॥

उदगुद्वास्य बर्हिष्यासाद्याज्येन चरुं ततः ॥ अभिघार्य्य व्याहृतीश्च रौद्रसूक्तञ्च पञ्च च ॥ १४ ॥

udagudvAsya barhiSyAsAdyAjyena caruM tataH ॥ abhighAryya vyAhRtIzca raudrasUktaJca paJca ca ॥ 14 ॥

जपेद्ब्रह्माणि सन्धार्य्य चित्तं शिवपदांबुजे ॥ प्रजापतिमथेन्द्रञ्च विश्वेदेवास्ततः परम् ॥ १५ ॥

japedbrahmANi sandhAryya cittaM zivapadAMbuje ॥ prajApatimathendraJca vizvedevAstataH param ॥ 15 ॥

ब्रह्माणं सचतुर्थ्यन्तं स्वाहांतान्प्रणवा दिकान् ॥ संजप्य वाचयित्वाऽथ पुण्याहं च ततः परम् ॥ १६ ॥

brahmANaM sacaturthyantaM svAhAMtAnpraNavA dikAn ॥ saMjapya vAcayitvA'tha puNyAhaM ca tataH param ॥ 16 ॥

परस्तात्तंत्रमग्नये स्वाहेत्यग्निमुखावधि ॥ निर्वर्त्य पश्चात्प्राणाय स्वाहेत्यारभ्य पञ्चभिः ॥ १७॥

parastAttaMtramagnaye svAhetyagnimukhAvadhi ॥ nirvartya pazcAtprANAya svAhetyArabhya paJcabhiH ॥ 17॥

साज्येन चरुणा पश्चादग्निं स्विष्टकृतं हुनेत् ॥ पुनश्च प्रजपेत्सूक्तं रौद्रं ब्रह्माणि पञ्च च ॥ १८॥

sAjyena caruNA pazcAdagniM sviSTakRtaM hunet ॥ punazca prajapetsUktaM raudraM brahmANi paJca ca ॥ 18॥

महेशादिचतुर्व्यूहमन्त्रांश्च प्रजपेत्पुनः ॥ हुत्वोपरिष्टात्तन्त्रन्तु स्वशाखोक्तेन वर्त्मना ॥ १९॥

mahezAdicaturvyUhamantrAMzca prajapetpunaH ॥ hutvopariSTAttantrantu svazAkhoktena vartmanA ॥ 19॥

तत्तद्देवान्समुद्दिश्य सांगं कुर्य्याद्विचक्षणः॥ एवमग्निमुखाद्यं यत्कर्मतन्त्रम्प्रवर्त्तितम् ॥ २०॥

tattaddevAnsamuddizya sAMgaM kuryyAdvicakSaNaH॥ evamagnimukhAdyaM yatkarmatantrampravarttitam ॥ 20॥

अतः परं प्रजुहुयाद्विरजाहोममात्मनः ॥ षड्विंशतत्त्वरूपेस्मिन्देहे लीनस्य शुद्धये ॥ २१॥

ataH paraM prajuhuyAdvirajAhomamAtmanaH ॥ SaDviMzatattvarUpesmindehe lInasya zuddhaye ॥ 21॥

तत्त्वान्येतानि मद्देहे शुध्यन्तामित्यनुस्मरन् ॥ तत्रात्मतत्त्वशुद्ध्यर्थं मन्त्रैरारुणकेतुकैः ॥ २२॥

tattvAnyetAni maddehe zudhyantAmityanusmaran ॥ tatrAtmatattvazuddhyarthaM mantrairAruNaketukaiH ॥ 22॥

पठ्यमानैः पृथिव्यादिपुरुषांतं क्रमान्मुने ॥ साज्येन चरुणा मौनी शिवपादाम्बुजं स्मरन् ॥ २३॥

paThyamAnaiH pRthivyAdipuruSAMtaM kramAnmune ॥ sAjyena caruNA maunI zivapAdAmbujaM smaran ॥ 23॥

पृथिव्यादि च शब्दादि वागाद्यं पञ्चकं पुनः ॥ श्रोत्राद्यञ्च शिरः पार्श्वपृष्ठोदरचतुष्टयम् ॥ २४॥

pRthivyAdi ca zabdAdi vAgAdyaM paJcakaM punaH ॥ zrotrAdyaJca ziraH pArzvapRSThodaracatuSTayam ॥ 24॥

जंघां च योजयेत्पश्चात्त्वगाद्यं धातुसप्तकम् ॥ प्राणाद्यं पञ्चकं पश्चादन्नाद्यं कोशपञ्चकम्॥ २५ ॥

jaMghAM ca yojayetpazcAttvagAdyaM dhAtusaptakam ॥ prANAdyaM paJcakaM pazcAdannAdyaM kozapaJcakam॥ 25 ॥

मनाश्चित्तं च बुद्धिश्चाहंकृतिः ख्यातिरेव च ॥ संकल्पन्तु गुणाः पश्चात्प्रकृतिः पुरुषस्ततः ॥ २६॥

manAzcittaM ca buddhizcAhaMkRtiH khyAtireva ca ॥ saMkalpantu guNAH pazcAtprakRtiH puruSastataH ॥ 26॥

पुरुषस्य तु भोक्तृत्वं प्रतिपन्नस्य भोजने ॥ अन्तरंगतया तत्त्वपंचकं परिकीर्तितम् ॥ २७ ॥

puruSasya tu bhoktRtvaM pratipannasya bhojane ॥ antaraMgatayA tattvapaMcakaM parikIrtitam ॥ 27 ॥

नियतिः कालरागश्च विद्या च तदनन्तरम् ॥ कला च पंचकमिदं मयोत्पन्नम्मुनीश्वर ॥ २८॥

niyatiH kAlarAgazca vidyA ca tadanantaram ॥ kalA ca paMcakamidaM mayotpannammunIzvara ॥ 28॥

मायान्तु प्रकृतिं विद्यादिति माया श्रुतीरिता ॥ तज्जान्येतानि तत्त्वानि श्रुत्युक्तानि न संशयः ॥ २९ ॥

mAyAntu prakRtiM vidyAditi mAyA zrutIritA ॥ tajjAnyetAni tattvAni zrutyuktAni na saMzayaH ॥ 29 ॥

कालस्वभावो नियतिरिति च श्रुतितब्रवीत् ॥ एतत्पञ्चकमेवास्य पञ्चकञ्चक्रमुच्यते ॥ ३० ॥

kAlasvabhAvo niyatiriti ca zrutitabravIt ॥ etatpaJcakamevAsya paJcakaJcakramucyate ॥ 30 ॥

अजानन्पञ्चतत्त्वानि विद्वानपि च। मूढधीः ॥ निपत्याधस्तात्प्रकृतेरुपरिष्टात्पुमानयम् ॥ ३१ ॥

ajAnanpaJcatattvAni vidvAnapi ca। mUDhadhIH ॥ nipatyAdhastAtprakRterupariSTAtpumAnayam ॥ 31 ॥

काकाक्षिन्यायमाश्रित्य वर्त्तते पार्श्वतोन्वहम् ॥ विद्यातत्त्वमिदं प्रोक्तं शुद्धविद्यामहेश्वरौ ॥ ३२ ॥

kAkAkSinyAyamAzritya varttate pArzvatonvaham ॥ vidyAtattvamidaM proktaM zuddhavidyAmahezvarau ॥ 32 ॥

सदाशिवश्च शक्तिश्च शिवश्चेदं तु पञ्चकम् ॥ शिव तत्त्वमिदम्ब्रह्मन्प्रज्ञानब्रह्मवाग्यतः ॥ ३३ ॥

sadAzivazca zaktizca zivazcedaM tu paJcakam ॥ ziva tattvamidambrahmanprajJAnabrahmavAgyataH ॥ 33 ॥

पृथिव्यादिशिवांतं यत्तत्त्वजातं मुनीश्वर ॥ स्वकारणलयद्वारा शुद्धिरस्य विधीयताम् ॥ ३४ ॥

pRthivyAdizivAMtaM yattattvajAtaM munIzvara ॥ svakAraNalayadvArA zuddhirasya vidhIyatAm ॥ 34 ॥

एकादशानां मन्त्राणाम्परस्मैपद पूर्वकम् ॥ शिवज्योतिश्चतुर्थ्यन्तमिदम्पदमथोच्चरेत् ॥ ३५ ॥

ekAdazAnAM mantrANAmparasmaipada pUrvakam ॥ zivajyotizcaturthyantamidampadamathoccaret ॥ 35 ॥

न ममेति वदेत्पश्चादुद्देशत्याग ईरितः ॥ अतः परं विविद्यैति कपोतकायेति मन्त्रयोः ॥ ३६ ॥

na mameti vadetpazcAduddezatyAga IritaH ॥ ataH paraM vividyaiti kapotakAyeti mantrayoH ॥ 36 ॥

व्यापकाय पदस्यान्ते परमात्मन इत्यपि ॥ शिवज्योतिश्चतुर्थ्यन्तं विश्वभूतपदम्पुनः ॥ ३७॥

vyApakAya padasyAnte paramAtmana ityapi ॥ zivajyotizcaturthyantaM vizvabhUtapadampunaH ॥ 37॥

घसनोत्सुकशब्दञ्च चतुर्थ्यंतमथो वदेत् ॥ परस्मैपदमुच्चार्य्य देवाय पदमुच्चरेत्॥ ३८ ॥

ghasanotsukazabdaJca caturthyaMtamatho vadet ॥ parasmaipadamuccAryya devAya padamuccaret॥ 38 ॥

उत्तिष्ठस्वेति मन्त्रस्य विश्वरूपाय शब्दतः ॥ पुरुषाय पदम्ब्रूयादोस्वाहेत्यस्य संवदेत् ॥ ३९ ॥

uttiSThasveti mantrasya vizvarUpAya zabdataH ॥ puruSAya padambrUyAdosvAhetyasya saMvadet ॥ 39 ॥

लोकत्रयपदस्यान्ते व्यापिने परमात्मने॥ शिवायेदं न मम च पदम्ब्रूयादतः परम् ॥ ४०॥

lokatrayapadasyAnte vyApine paramAtmane॥ zivAyedaM na mama ca padambrUyAdataH param ॥ 40॥

स्व शाखोक्तप्रकारेण पुरस्तात्तन्त्रकर्म्म च ॥ निर्वर्त्य सर्पिषा मिश्रं चरुम्प्राश्य पुरोधसे ॥ ४१ ॥

sva zAkhoktaprakAreNa purastAttantrakarmma ca ॥ nirvartya sarpiSA mizraM carumprAzya purodhase ॥ 41 ॥

प्रदद्याद्दक्षिणान्तस्मै हेमादिपरिबृंहिताम् ॥ ब्रह्माणमुद्वास्य ततः प्रातरौपासनं हुनेत् ॥ ४२ ॥

pradadyAddakSiNAntasmai hemAdiparibRMhitAm ॥ brahmANamudvAsya tataH prAtaraupAsanaM hunet ॥ 42 ॥

सं मां सिञ्चन्तु मरुत इति मन्त्रञ्जपेन्नरः ॥ याते अग्न इत्यनेन मन्त्रेणाग्नौ प्रताप्य च ॥ ४३ ॥

saM mAM siJcantu maruta iti mantraJjapennaraH ॥ yAte agna ityanena mantreNAgnau pratApya ca ॥ 43 ॥

हस्तमग्नौ समारोप्य स्वात्मन्यद्वैतधामनि ॥ प्राभातिकीं ततः सन्ध्यामुपास्यादित्यमप्यथ ॥ ४४ ॥

hastamagnau samAropya svAtmanyadvaitadhAmani ॥ prAbhAtikIM tataH sandhyAmupAsyAdityamapyatha ॥ 44 ॥

उपस्थाय प्रविश्याप्सु नाभिदघ्नं प्रवेशयन् ॥ तन्मन्त्रान्प्रजपेत्प्रीत्या निश्चलात्मा समुत्सुकः ॥ ४५॥

upasthAya pravizyApsu nAbhidaghnaM pravezayan ॥ tanmantrAnprajapetprItyA nizcalAtmA samutsukaH ॥ 45॥

आहिताग्निस्तु यः कुर्य्यात्प्राजापत्येष्टिमाहिते ॥ श्रौते वैश्वानरे सम्यक्सर्ववेदसदक्षिणाम् ॥ ४६॥

AhitAgnistu yaH kuryyAtprAjApatyeSTimAhite ॥ zraute vaizvAnare samyaksarvavedasadakSiNAm ॥ 46॥

अथाग्निमात्मन्यारोप्य ब्राह्मणः प्रव्रजेद्गृहात्॥ सावित्रीप्रथमं पादं सावित्रीमित्युदीर्य च॥ ४७॥

athAgnimAtmanyAropya brAhmaNaH pravrajedgRhAt॥ sAvitrIprathamaM pAdaM sAvitrImityudIrya ca॥ 47॥

प्रवेशयामि शब्दान्ते भूरोमिति च संवदेत् ॥ द्वितीयम्पादमुच्चार्य्य सावित्रीमिति पूर्व्ववत् ॥ ४८ ॥

pravezayAmi zabdAnte bhUromiti ca saMvadet ॥ dvitIyampAdamuccAryya sAvitrImiti pUrvvavat ॥ 48 ॥

प्रवेशयामि शब्दान्ते भुवरोमिति संवदेत्॥ तृतीयम्पादमुच्चार्य्य सावित्रीमित्यतः परम् ॥ ४९॥

pravezayAmi zabdAnte bhuvaromiti saMvadet॥ tRtIyampAdamuccAryya sAvitrImityataH param ॥ 49॥

प्रवेशयामि शब्दान्ते सुवरोमित्युदीरयेत्॥ त्रिपादमुच्चरेत्पूर्वं सावित्रीमित्यतः परम् ॥ ५०॥

pravezayAmi zabdAnte suvaromityudIrayet॥ tripAdamuccaretpUrvaM sAvitrImityataH param ॥ 50॥

प्रवेशयामि शब्दान्ते भूर्भुवस्सुवरोमिति ॥ उदीरयेत्परम्प्रीत्या निश्चलात्मा मुनीश्वर ॥ ५१ ॥

pravezayAmi zabdAnte bhUrbhuvassuvaromiti ॥ udIrayetparamprItyA nizcalAtmA munIzvara ॥ 51 ॥

इयम्भगवती साक्षाच्छंकरार्द्धशरीरिणी ॥ पंचवक्त्रा दशभुजा विपञ्चनयनोज्ज्वला ॥ ५२ ॥

iyambhagavatI sAkSAcchaMkarArddhazarIriNI ॥ paMcavaktrA dazabhujA vipaJcanayanojjvalA ॥ 52 ॥

नवरत्नकिरीटोद्यच्चन्द्र लेखावतंसिनी ॥ शुद्धस्फटिकसंकाशा दयायुधधरा शुभा ॥ ५३ ॥

navaratnakirITodyaccandra lekhAvataMsinI ॥ zuddhasphaTikasaMkAzA dayAyudhadharA zubhA ॥ 53 ॥

हारकेयूरकटककिंकिणीनूपुरादिभिः ॥ भूषितावयवा दिव्यवसना रत्नभूषणा ॥ ५४ ॥

hArakeyUrakaTakakiMkiNInUpurAdibhiH ॥ bhUSitAvayavA divyavasanA ratnabhUSaNA ॥ 54 ॥

विष्णुना विधिना देवऋषिगंधर्व्वनायकैः ॥ मानवैश्च सदा सेव्या सर्व्वात्मव्यापिनी शिवा ॥ ५५ ॥

viSNunA vidhinA devaRSigaMdharvvanAyakaiH ॥ mAnavaizca sadA sevyA sarvvAtmavyApinI zivA ॥ 55 ॥

सदाशिवस्य देवस्य धर्मपत्नी मनोहरा ॥ जगदम्बा त्रिजननी त्रिगुणा निर्गुणाप्यजा ॥ ५६ ॥

sadAzivasya devasya dharmapatnI manoharA ॥ jagadambA trijananI triguNA nirguNApyajA ॥ 56 ॥

इत्येवं संविचार्य्याथ गायत्रीं प्रजपेत्सुधीः ॥ आदिदेवीं च त्रिपदां ब्राह्मणत्वादिदामजाम् ॥ ५७ ॥

ityevaM saMvicAryyAtha gAyatrIM prajapetsudhIH ॥ AdidevIM ca tripadAM brAhmaNatvAdidAmajAm ॥ 57 ॥

यो ह्यन्यथा जपेत्पापो गायत्री शिवरूपिणीम्॥ स पच्यते महाघोरे नरके कल्पसंख्यया ॥ ५८ ॥

yo hyanyathA japetpApo gAyatrI zivarUpiNIm॥ sa pacyate mahAghore narake kalpasaMkhyayA ॥ 58 ॥

सा व्याहृतिभ्यः संजाता तास्वेव विलयं गता॥ ताश्च प्रणवसम्भूताः प्रणवे विलयं गता ॥ ५९ ॥

sA vyAhRtibhyaH saMjAtA tAsveva vilayaM gatA॥ tAzca praNavasambhUtAH praNave vilayaM gatA ॥ 59 ॥

प्रणवस्सर्ववेदादिः प्रणवः शिववाचकः ॥ मन्त्राधिराजराजश्च महाबीजं मनुः परः ॥ ६० ॥

praNavassarvavedAdiH praNavaH zivavAcakaH ॥ mantrAdhirAjarAjazca mahAbIjaM manuH paraH ॥ 60 ॥

शिवो वा प्रणवो ह्येष प्रणवो वा शिवः स्मृतः ॥ वाच्यवाचकयोर्भेदो नात्यन्तं विद्यते यतः ॥ ६१ ॥

zivo vA praNavo hyeSa praNavo vA zivaH smRtaH ॥ vAcyavAcakayorbhedo nAtyantaM vidyate yataH ॥ 61 ॥

एनमेव महामन्त्रञ्जीवानाञ्च तनुत्यजाम् ॥ काश्यां संश्राव्य मरणे दत्ते मुक्तिं परां शिवः ॥ ६२ ॥

enameva mahAmantraJjIvAnAJca tanutyajAm ॥ kAzyAM saMzrAvya maraNe datte muktiM parAM zivaH ॥ 62 ॥

तस्मादेकाक्षरन्देवं शिवं परमकारणम् ॥ उपासते यतिश्रेष्ठा हृदयाम्भोजमध्यगम् ॥ ६३ ॥

tasmAdekAkSarandevaM zivaM paramakAraNam ॥ upAsate yatizreSThA hRdayAmbhojamadhyagam ॥ 63 ॥

मुमुक्षवोऽपरे धीरा विरक्ता लौकिका नराः॥ विषयान्मनसा ज्ञात्वोपासते परमं शिवम् ॥ ६४ ॥

mumukSavo'pare dhIrA viraktA laukikA narAH॥ viSayAnmanasA jJAtvopAsate paramaM zivam ॥ 64 ॥

एवं विलाप्य गायत्रीं प्रणवे शिववाचके ॥ अहं वृक्षस्य रेरिवेत्यनुवाकं जपेत्पुनः ॥ ६५ ॥

evaM vilApya gAyatrIM praNave zivavAcake ॥ ahaM vRkSasya rerivetyanuvAkaM japetpunaH ॥ 65 ॥

यश्छन्दसामृषभ इत्यनुवाकमुपक्रमात् ॥ गोपायांतं जपन्पश्चादुत्थितोहमितीरयेत् ॥ ६६ ॥

yazchandasAmRSabha ityanuvAkamupakramAt ॥ gopAyAMtaM japanpazcAdutthitohamitIrayet ॥ 66 ॥

वदेज्जयेत्त्रिधा मन्दमध्योच्छ्रायक्रमान्मुने॥ प्रणवम्पूर्व्वमुद्धत्य सृष्टिस्थितिलयक्रमात्॥ ६७॥

vadejjayettridhA mandamadhyocchrAyakramAnmune॥ praNavampUrvvamuddhatya sRSTisthitilayakramAt॥ 67॥

तेषामथ क्रमाद्भूयाद्भूस्संन्यस्तम्भुवस्तथा ॥ संन्यस्तं सुवरित्युक्त्वा संन्यस्तं पदमुच्चरम् ॥ ६८ ॥

teSAmatha kramAdbhUyAdbhUssaMnyastambhuvastathA ॥ saMnyastaM suvarityuktvA saMnyastaM padamuccaram ॥ 68 ॥

सर्वमंत्राद्यः प्रदेशे मयेति च पदं वदेत् ॥ प्रणवं पूर्वमुद्धृत्य समष्टिं व्याहृतीर्वदेत् ॥ ६९ ॥

sarvamaMtrAdyaH pradeze mayeti ca padaM vadet ॥ praNavaM pUrvamuddhRtya samaSTiM vyAhRtIrvadet ॥ 69 ॥

समस्तमित्यतो ब्रूयान्मयेति च समब्रवीत् ॥ सदाशिवं हृदि ध्यात्वा मंदादीति ततो मुने॥ ७०॥

samastamityato brUyAnmayeti ca samabravIt ॥ sadAzivaM hRdi dhyAtvA maMdAdIti tato mune॥ 70॥

प्रैषमंत्रांस्तु जप्त्वैवं सावधानेन चेतसा ॥ अभयं सर्वभूतेभ्यो मत्तः स्वाहेति संजपन् ॥ ७१ ॥

praiSamaMtrAMstu japtvaivaM sAvadhAnena cetasA ॥ abhayaM sarvabhUtebhyo mattaH svAheti saMjapan ॥ 71 ॥

प्राच्यां दिश्यप उद्धृत्य प्रक्षिपेदजलिं ततः ॥ शिखां यज्ञोपवीतं च यत्रोत्पाट्य च पाणिना ॥ ७२॥

prAcyAM dizyapa uddhRtya prakSipedajaliM tataH ॥ zikhAM yajJopavItaM ca yatrotpATya ca pANinA ॥ 72॥

गृहीत्वा प्रणवं भूश्च समुद्रं गच्छ सम्वदेत् ॥ वह्निजायां समुच्चार्य्य सोदकाञ्जलिना ततः ॥ ७३ ॥

gRhItvA praNavaM bhUzca samudraM gaccha samvadet ॥ vahnijAyAM samuccAryya sodakAJjalinA tataH ॥ 73 ॥

अप्सु हूयादथ प्रेषैरभिमंत्र्य त्रिधा त्वपः ॥ प्राश्य तीरे समागत्य भूमौ वस्त्रादिकं त्यजेत् ॥ ७४ ॥

apsu hUyAdatha preSairabhimaMtrya tridhA tvapaH ॥ prAzya tIre samAgatya bhUmau vastrAdikaM tyajet ॥ 74 ॥

उदङ्मुखः प्राङ्मुखो वा गच्छेस्सप्तपदाधिकम् ॥ किञ्चिद्दूरमथाचार्यस्तिष्ठ तिष्ठेति संवदेत् ॥ ७५॥

udaGmukhaH prAGmukho vA gacchessaptapadAdhikam ॥ kiJciddUramathAcAryastiSTha tiSTheti saMvadet ॥ 75॥

लोकस्य व्यवहारार्थं कौपीनं दण्डमेव च ॥ भगवन्स्वीकुरुष्वेति दद्यात्स्वेनैव पाणिना ॥ ७६ ॥

lokasya vyavahArArthaM kaupInaM daNDameva ca ॥ bhagavansvIkuruSveti dadyAtsvenaiva pANinA ॥ 76 ॥

दत्त्वा सुदोरं कौपीनं काषायवसनं ततः ॥ आच्छाद्याचम्य च द्वेधा त शिष्यमिति संवदेत्॥ ७७ ॥

dattvA sudoraM kaupInaM kASAyavasanaM tataH ॥ AcchAdyAcamya ca dvedhA ta ziSyamiti saMvadet॥ 77 ॥

इन्द्रस्य वज्रोऽसि तत इति मन्त्रमुदाहरेत् ॥ सम्प्रार्थ्य दण्डं गृह्णीयात्सखाय इति संजपन् ॥ ७८ ॥

indrasya vajro'si tata iti mantramudAharet ॥ samprArthya daNDaM gRhNIyAtsakhAya iti saMjapan ॥ 78 ॥

अथ गत्वा गुरोः पार्श्वं शिवपादांबुजं स्मरन् ॥ प्रणमेद्दण्डवद्भूमौ त्रिवारं संयतात्मवान् ॥ ७९ ॥

atha gatvA guroH pArzvaM zivapAdAMbujaM smaran ॥ praNameddaNDavadbhUmau trivAraM saMyatAtmavAn ॥ 79 ॥

पुनरुत्थाय च शनैः प्रेम्णा पश्यन्गुरुं निजम् ॥ कृताञ्जलिपुटस्तिष्ठेद्गुरुपाद समीपतः ॥ ८० ॥

punarutthAya ca zanaiH premNA pazyanguruM nijam ॥ kRtAJjalipuTastiSThedgurupAda samIpataH ॥ 80 ॥

कर्म्मारम्भात्पूर्वमेव गृहीत्वा गोमयं शुभम् ॥ स्थूलामलकमात्रेण कृत्वा पिण्डान्विशोषयेत॥ ८१ ॥

karmmArambhAtpUrvameva gRhItvA gomayaM zubham ॥ sthUlAmalakamAtreNa kRtvA piNDAnvizoSayeta॥ 81 ॥

सौरैस्तु किरणैरेव होमारम्भाग्निमध्यगान्॥ निक्षिप्य होमसम्पूर्त्तौ भस्म संगृह्य गोपयेत् ॥ ८२ ॥

sauraistu kiraNaireva homArambhAgnimadhyagAn॥ nikSipya homasampUrttau bhasma saMgRhya gopayet ॥ 82 ॥

ततो गुरुस्समादाय विरजानलजं सितम् ॥ भस्म तेनैव तं शिष्यमग्निरित्यादिभिः क्रमात् ॥ ८३ ॥

tato gurussamAdAya virajAnalajaM sitam ॥ bhasma tenaiva taM ziSyamagnirityAdibhiH kramAt ॥ 83 ॥

मंत्रैरंगानि संस्पृश्य मूर्द्धादिचरणान्ततः ॥ ईशानाद्यैः पञ्चमंत्रै शिर आरभ्य सर्वतः ॥ ८४ ॥

maMtrairaMgAni saMspRzya mUrddhAdicaraNAntataH ॥ IzAnAdyaiH paJcamaMtrai zira Arabhya sarvataH ॥ 84 ॥

समुद्धृत्य विधानेन त्रिपुण्ड्रं धारयेत्ततः॥ त्रियायुषैस्त्र्यम्बकैश्च मूर्ध्न आरभ्य च क्रमात्॥ ८५ ॥

samuddhRtya vidhAnena tripuNDraM dhArayettataH॥ triyAyuSaistryambakaizca mUrdhna Arabhya ca kramAt॥ 85 ॥

ततस्सद्भक्तियुक्तेन चेतसा शिष्यसत्तमः॥ हृत्पंकजे समासीनं ध्यायेच्छिवमुमासखम्॥ ८६ ॥

tatassadbhaktiyuktena cetasA ziSyasattamaH॥ hRtpaMkaje samAsInaM dhyAyecchivamumAsakham॥ 86 ॥

हस्तं निधाय शिरसि शिष्यस्य स गुरुर्वदेत् ॥ त्रिवारं प्रणवं दक्षकर्णे ऋष्यादिसंयुतम् ॥ ८७ ॥

hastaM nidhAya zirasi ziSyasya sa gururvadet ॥ trivAraM praNavaM dakSakarNe RSyAdisaMyutam ॥ 87 ॥

ततः कृत्वा च करुणां प्रणवस्यार्थ मादिशेत् ॥ षड्विधार्त्थपरि ज्ञानसहितं गुरुसत्तमः॥ ८८ ॥

tataH kRtvA ca karuNAM praNavasyArtha mAdizet ॥ SaDvidhArtthapari jJAnasahitaM gurusattamaH॥ 88 ॥

द्विषट्प्रकारं स गुरुं प्रणमेद्भुवि दण्डवत्॥ तदधीनो भवेन्नित्यं नान्यत्कर्म्म समाचरेत् ॥ ८९ ॥

dviSaTprakAraM sa guruM praNamedbhuvi daNDavat॥ tadadhIno bhavennityaM nAnyatkarmma samAcaret ॥ 89 ॥

तदाज्ञया ततः शिष्यो वेदान्तार्थानुसारतः ॥ शिवज्ञानपरो भूयात्सगुणागुणभेदतः ॥ ९०॥

tadAjJayA tataH ziSyo vedAntArthAnusArataH ॥ zivajJAnaparo bhUyAtsaguNAguNabhedataH ॥ 90॥

ततस्तेनैव शिष्येण श्रवणाद्यंगपूर्व्वकम् ॥ प्रभातिकाद्यनुष्ठानं जपान्ते कारयेद्गुरुः ॥ ९१ ॥

tatastenaiva ziSyeNa zravaNAdyaMgapUrvvakam ॥ prabhAtikAdyanuSThAnaM japAnte kArayedguruH ॥ 91 ॥

पूजां च मण्डले तस्मिन्कैलासप्रस्तराह्वये ॥ शिवोदितेन मार्गेण शिष्यस्तत्रैव पूजयेत् ॥ ९२॥

pUjAM ca maNDale tasminkailAsaprastarAhvaye ॥ zivoditena mArgeNa ziSyastatraiva pUjayet ॥ 92॥

देवन्नित्यमशक्तश्चेत्पूजितुं गुरुणा शुभम् ॥ स्फाटिकं पीठिकोपेतं गृह्णीयाल्लिंगमैश्वरम् ॥ ९३॥

devannityamazaktazcetpUjituM guruNA zubham ॥ sphATikaM pIThikopetaM gRhNIyAlliMgamaizvaram ॥ 93॥

वरं प्राणपरित्यागश्छेदनं शिरसोऽपि मे ॥ न त्वनभ्यर्च्य भुञ्जीयां भगवन्तं त्रिलोचनम् ॥ ९४ ॥

varaM prANaparityAgazchedanaM ziraso'pi me ॥ na tvanabhyarcya bhuJjIyAM bhagavantaM trilocanam ॥ 94 ॥

एवन्त्रिवारमुच्चार्य्य शपथं गुरुसन्निधौ । कुर्य्याद्दृढमनाश्शिष्यः शिवभक्तिसमुद्वहन्॥ ९५ ॥

evantrivAramuccAryya zapathaM gurusannidhau । kuryyAddRDhamanAzziSyaH zivabhaktisamudvahan॥ 95 ॥

तत एव महादेवं नित्यमुद्युक्तमानसः॥ पूजयेत्परया भक्त्या पञ्चावरणमार्गतः ॥ ९६ ॥

tata eva mahAdevaM nityamudyuktamAnasaH॥ pUjayetparayA bhaktyA paJcAvaraNamArgataH ॥ 96 ॥