ईश्वर उवाच ॥ अत्रास्ति च महादेवि खल्वावरणपंचकम् ॥ पंचावरणपूजान्तु प्रारभेत यथाक्रमम् ॥ १॥

Izvara uvAca ॥ atrAsti ca mahAdevi khalvAvaraNapaMcakam ॥ paMcAvaraNapUjAntu prArabheta yathAkramam ॥ 1॥

प्रथमम्पूजितौ यत्र तत्रैव क्रमशस्सुधीः ॥ गन्धाद्यैरर्चयेत्पूर्वं देवौ हेरंबषण्मुखौ ॥ २ ॥

prathamampUjitau yatra tatraiva kramazassudhIH ॥ gandhAdyairarcayetpUrvaM devau heraMbaSaNmukhau ॥ 2 ॥

पंच ब्रह्माणि परितो वृत्ते सम्पूजयेत्क्रमात् ॥ ईशानदेशे पूर्वे च दक्षिणे चोत्तरे तथा ॥ ३ ॥

paMca brahmANi parito vRtte sampUjayetkramAt ॥ IzAnadeze pUrve ca dakSiNe cottare tathA ॥ 3 ॥

पश्चिमे च ततस्तस्मिन्षडंगानि समर्चयेत ॥ आग्नेये च तथैशाने नैर्ऋते वायुदेशके ॥ ४ ॥

pazcime ca tatastasminSaDaMgAni samarcayeta ॥ Agneye ca tathaizAne nairRte vAyudezake ॥ 4 ॥

मध्ये नेत्रन्तद्वदस्त्रम्पूर्वादिपरितः क्रमात् ॥ प्रथमावरणम्प्रोक्तं द्वितीयावरणं शृणु ॥ ५ ॥

madhye netrantadvadastrampUrvAdiparitaH kramAt ॥ prathamAvaraNamproktaM dvitIyAvaraNaM zRNu ॥ 5 ॥

अनन्तम्पूर्वदिक्पत्रे सूक्ष्मन्दक्षिणतस्तथा ॥ शिवोत्तमं पश्चिमत एकनेत्रन्तथोत्तरे ॥ ६ ॥

anantampUrvadikpatre sUkSmandakSiNatastathA ॥ zivottamaM pazcimata ekanetrantathottare ॥ 6 ॥

एकरुद्रन्तथैशाने त्रिमूर्तिं वह्निदिग्दले ॥ श्रीकण्ठं नैर्ऋते वायौ शिखण्डीशं समर्चयेत् ॥ ७ ॥

ekarudrantathaizAne trimUrtiM vahnidigdale ॥ zrIkaNThaM nairRte vAyau zikhaNDIzaM samarcayet ॥ 7 ॥

द्वितीयावरणे चैव पूज्यास्ते चक्रवर्तिनः ॥ पूर्वद्वारस्य मध्ये तु वृषेशानम्प्रपूजयेत् ॥ ८ ॥

dvitIyAvaraNe caiva pUjyAste cakravartinaH ॥ pUrvadvArasya madhye tu vRSezAnamprapUjayet ॥ 8 ॥

तद्दक्षिणे नन्दिनञ्च महाकालन्तदुत्तरे ॥ भृंगीशन्दक्षिणद्वारपश्चिमे सम्प्रपूजयेत् ॥ ९॥

taddakSiNe nandinaJca mahAkAlantaduttare ॥ bhRMgIzandakSiNadvArapazcime samprapUjayet ॥ 9॥

तत्पूर्वकोष्ठे गन्धाद्यैस्सम्प्रपूज्य विनायकम् ॥ पश्चिमोत्तरकोष्ठे च वृषभन्दक्षिणे गुहम् ॥ १० ॥

tatpUrvakoSThe gandhAdyaissamprapUjya vinAyakam ॥ pazcimottarakoSThe ca vRSabhandakSiNe guham ॥ 10 ॥

उत्तरद्वारपूर्वे तु प्रदक्षिणविधानतः ॥ नामाष्टकविधानेन पूजयेदुच्यते हि तत् ॥ ११ ॥

uttaradvArapUrve tu pradakSiNavidhAnataH ॥ nAmASTakavidhAnena pUjayeducyate hi tat ॥ 11 ॥

भवं शर्वं तथेशानं रुद्रम्पशुपतिम्पुनः ॥ उग्रम्भीमम्महादेवन्तृतीयावरणन्त्विदम् ॥ १२ ॥

bhavaM zarvaM tathezAnaM rudrampazupatimpunaH ॥ ugrambhImammahAdevantRtIyAvaraNantvidam ॥ 12 ॥

यो वेदादौ स्वर इति समावाह्य महेश्वरम् ॥ पूजयेत्पूर्वदिग्भागे कमले कर्णिकोपरि ॥ १३ ॥

yo vedAdau svara iti samAvAhya mahezvaram ॥ pUjayetpUrvadigbhAge kamale karNikopari ॥ 13 ॥

ईश्वरम्पूर्वदिक्पत्रे विश्वेशन्दक्षिणे ततः ॥ सौम्ये तु परमेशानं सर्वेशम्प श्चिमे यजेत् ॥ १४ ॥

IzvarampUrvadikpatre vizvezandakSiNe tataH ॥ saumye tu paramezAnaM sarvezampa zcime yajet ॥ 14 ॥

दक्षिणे तु यजेद्रुद्रमावोराजानमित्यृचा ॥ आवाह्य गन्धपुष्पाद्यैः कर्णिकायान्दलेषु च ॥ १५ ॥

dakSiNe tu yajedrudramAvorAjAnamityRcA ॥ AvAhya gandhapuSpAdyaiH karNikAyAndaleSu ca ॥ 15 ॥

शिवः पूर्वे दक्षिणतो हर उत्तरतो मृडः ॥ भवः पश्चिमदिक्पत्रे पूज्या एते यथाक्रमम् ॥ १६ ॥

zivaH pUrve dakSiNato hara uttarato mRDaH ॥ bhavaH pazcimadikpatre pUjyA ete yathAkramam ॥ 16 ॥

उत्तरे विष्णुमावाह्य गन्धपुष्पादिभिर्यजेत् ॥ प्रतद्विष्णुरिति प्रोच्य कर्णिकायान्दलेषु च ॥ १७॥

uttare viSNumAvAhya gandhapuSpAdibhiryajet ॥ pratadviSNuriti procya karNikAyAndaleSu ca ॥ 17॥

वासुदेवम्पूर्वभागे दक्षिणे चानिरुद्धकम् ॥ सौम्ये संकर्षणञ्चैव प्रद्युम्नम्पश्चिमे यजेत् ॥ १८ ॥

vAsudevampUrvabhAge dakSiNe cAniruddhakam ॥ saumye saMkarSaNaJcaiva pradyumnampazcime yajet ॥ 18 ॥

ब्रह्माणम्पश्चिमे पद्मे समावाह्य समर्चयेत् ॥ हिरण्यगर्भः समवर्तत इति मंत्रेण मंत्रवित् ॥ १९ ॥

brahmANampazcime padme samAvAhya samarcayet ॥ hiraNyagarbhaH samavartata iti maMtreNa maMtravit ॥ 19 ॥

हिरण्यगर्भं पूर्वस्यां विराजन्दक्षिणे ततः ॥ उत्तरे पुष्करञ्चैव कालम्पश्चिमतो यजेत् ॥ २० ॥

hiraNyagarbhaM pUrvasyAM virAjandakSiNe tataH ॥ uttare puSkaraJcaiva kAlampazcimato yajet ॥ 20 ॥

सर्वोर्द्ध्वपंक्तौ पूर्वादिप्रदक्षिणविधानतः॥ तत्तत्स्थानेषु संपूज्य लोकपालाननुक्रमात् ॥ २१ ॥

sarvorddhvapaMktau pUrvAdipradakSiNavidhAnataH॥ tattatsthAneSu saMpUjya lokapAlAnanukramAt ॥ 21 ॥

रान्तंपान्तं तथा ज्ञान्तं लान्तं लान्तमपूर्वकम् ॥ षान्तं सान्तञ्च वेदाद्यं श्रीबीजञ्च दशक्रमात् ॥ २२ ॥

rAntaMpAntaM tathA jJAntaM lAntaM lAntamapUrvakam ॥ SAntaM sAntaJca vedAdyaM zrIbIjaJca dazakramAt ॥ 22 ॥

बीजानि लोकपालानामेतैरेतान्समर्चयेत् ॥ नैर्ऋते चोत्तरे तद्वदीशानस्य च दक्षिणे ॥ २३ ॥

bIjAni lokapAlAnAmetairetAnsamarcayet ॥ nairRte cottare tadvadIzAnasya ca dakSiNe ॥ 23 ॥

ब्रह्म विष्णू च विधिना पूजयेदुपचारकैः ॥ बाह्यरेखासु देवेशम्पञ्चमावरणे यजेत् ॥ २४ ॥

brahma viSNU ca vidhinA pUjayedupacArakaiH ॥ bAhyarekhAsu devezampaJcamAvaraNe yajet ॥ 24 ॥

श्रीमत्त्रिशूलमीशाने वज्रं माहेन्द्रदिङ्मुखे ॥ परशुं वह्निदिग्भागे याम्ये सायकमर्चयेत् ॥ २५ ॥

zrImattrizUlamIzAne vajraM mAhendradiGmukhe ॥ parazuM vahnidigbhAge yAmye sAyakamarcayet ॥ 25 ॥

नैर्ऋते तु यजेत्खड्गम्पाशं वरुणगोचरे ॥ अंकुशं मारुते भागे पिनाकं चोत्तरे यजेत् ॥ २६॥

nairRte tu yajetkhaDgampAzaM varuNagocare ॥ aMkuzaM mArute bhAge pinAkaM cottare yajet ॥ 26॥

पश्चिमाभिमुखं रौद्रं क्षेत्रपालं समर्चयेत् ॥ यथाविधि विधानज्ञश्शिवप्रीत्यर्थमेव च ॥ २७ ॥

pazcimAbhimukhaM raudraM kSetrapAlaM samarcayet ॥ yathAvidhi vidhAnajJazzivaprItyarthameva ca ॥ 27 ॥

कृताञ्जलिपुटास्सर्वे चिन्त्याः स्मितमुखाम्बुजाः ॥ सादरं प्रेक्षमाणाश्च देवं देवीञ्च सर्वदा ॥ २८॥

kRtAJjalipuTAssarve cintyAH smitamukhAmbujAH ॥ sAdaraM prekSamANAzca devaM devIJca sarvadA ॥ 28॥

इत्थमावरणाभ्यर्चां कृत्वा विक्षेपशान्तये ॥ पुनरभ्यर्च्य देवेशम्प्रणवं च शिवं वदेत्॥ २९॥

itthamAvaraNAbhyarcAM kRtvA vikSepazAntaye ॥ punarabhyarcya devezampraNavaM ca zivaM vadet॥ 29॥

एवमभ्यर्च्य विधिवद्गन्धाद्यैरुपचारकैः॥ उपचर्य्य ततो दद्यान्नैवेद्यं विधिसाधितम्॥ ३०॥

evamabhyarcya vidhivadgandhAdyairupacArakaiH॥ upacaryya tato dadyAnnaivedyaM vidhisAdhitam॥ 30॥

पुनराचमनीयं च दद्यादर्घ्यं यथा पुरा ॥ ततो निवेद्य पानीयन्ताम्बूलं चोपदेशतः ॥ ३१ ॥

punarAcamanIyaM ca dadyAdarghyaM yathA purA ॥ tato nivedya pAnIyantAmbUlaM copadezataH ॥ 31 ॥

नीराजनादिकं कृत्वा पूजाशेषं समापयेत् ॥ ध्यात्वा देवं च देवीञ्च मनुमष्टोत्तरं जपेत् ॥ ३२॥

nIrAjanAdikaM kRtvA pUjAzeSaM samApayet ॥ dhyAtvA devaM ca devIJca manumaSTottaraM japet ॥ 32॥

तत उत्थाय रचितपुष्पाञ्जलिपुटः स्थितः॥ जपेद्ध्यात्वा महादेवं यो देवानामिति क्रमात् ॥ ३३ ॥

tata utthAya racitapuSpAJjalipuTaH sthitaH॥ japeddhyAtvA mahAdevaM yo devAnAmiti kramAt ॥ 33 ॥

यो वेदादौ स्वरः प्रोक्त इत्यंतम्परमेश्वरि ॥ पुष्पाञ्जलिन्ततो दत्त्वा त्रिः प्रदक्षिणमाचरेत् ॥ ३४ ॥

yo vedAdau svaraH prokta ityaMtamparamezvari ॥ puSpAJjalintato dattvA triH pradakSiNamAcaret ॥ 34 ॥

साष्टांगम्प्रणमेत्तं स भक्त्या परमयान्वितः ॥ पुनः प्रदक्षिणां कृत्वा प्रणमेत्पुनरेकधा ॥ ३५ ॥

sASTAMgampraNamettaM sa bhaktyA paramayAnvitaH ॥ punaH pradakSiNAM kRtvA praNametpunarekadhA ॥ 35 ॥

स्थित्वासने समभ्यर्च्य देवं नामाष्टकेन च ॥ साधु वासाधु वा कर्म यद्यदाचरितं मया ॥ ३६॥

sthitvAsane samabhyarcya devaM nAmASTakena ca ॥ sAdhu vAsAdhu vA karma yadyadAcaritaM mayA ॥ 36॥

तत्सर्वं भगवञ्छम्भो भवदाराधनम्परम् ॥ इति शंखोदकेनैव सपुष्पेण समर्पयेत् ॥ ३७ ॥

tatsarvaM bhagavaJchambho bhavadArAdhanamparam ॥ iti zaMkhodakenaiva sapuSpeNa samarpayet ॥ 37 ॥

पूज्यं पुनस्समभ्यर्च्य सार्थं नामाष्टकं जपेत् ॥ तदेव शृणु देवेशि संब्रुवे तव भक्तितः ॥ ३८ ॥

pUjyaM punassamabhyarcya sArthaM nAmASTakaM japet ॥ tadeva zRNu devezi saMbruve tava bhaktitaH ॥ 38 ॥